| عشگ المداح | ' باللهجة العراقية '

البارت الثاني عشر

#عشگ المداح
#بقلم: الراوية
#البارت الثاني عشر

بسم الله ❤
اللهم صلِ على محمد و آل محمد❤

.

تقيه..

جمدت بمكاني من گال محمد كلمتو..گلت ها هي انفضح امرچ ي تقيه و هذا ابو لسان ما يظم حچايه أكيد يروح يسولف گدامهم

بلعت ريگي و گمت على حيلي و گلت بتعثلم

- انت شعندك تتصنت علينا !

- الجداحه واگعه و رجعت اخذها..ما متصنت عليچ

حچاها و هو يخور بيه..ناز استأذنت و جتي تروح
كمشتها من ايدها و گلت

- افوت وياچ

- تقيه ظلي اريد احچي وياچ

حچاها محمد..و اني انداريت ل ناز الي تقربت عليه و همست باذني

- تقيه قوي قلبچ

و راحت و عافتني..انداريت ل محمد..الي گعد و اخذ جداحتو و گال

- اي منو هذا الغبي الي تريدين تگولين احبك الو

صديت عنه و گلت بهمس

- ما عليك

- ما عليه موو ؟ عجل والله اروح و اگول ل سيد عليچ

گال حچايتو و اني گبل انداريت و صحت بي

- وين تولي ؟ انت شبيك محمد حچايه ما تظل بلسانك !

- منو هذا ؟

حچاها برود و اني سندت رجلي على صدري و گلت

- ما دخلك

قرب وجهو مني و گال يصوت مصرور

- ليش ما تصيرين آدمي و تحچين عدل ؟
گاعد اسالچ جاوبني عدل

كتمت بچيتي و كلمتي الي على طرف لساني گبل لا الزگ و احچيلو..عيوني غورفت و هو رخى حواجبو
و صد عني..بس لو عندي شوية جراءه چان رميت نفسي بحظنو و گلتلو انت
بس ما عندي..جبانه ل درجه اكره نفسي من وراها..

- هسا لا تبچين..ما اريد اعرف
اخيريني عرفان من هو

- لا تخاف ما تعرف منو هو

- هه ليش

- أحسن

جاوبتو بهلكلمه و هو رجع صد عليه..دحگت بعيونو
و هو ضحك و گال

- لا ادحگيلي هيچ..
نظراتچ احسهن مو راحه

- يعني تقصد اتحرش بيك !

هز راسو ب اي..و اني هزيت راسي بقلة حيله..
جريت حسرة و هو تقرب النوب و گال

- تقيه..گوليلي منو الي تحبينو و اني اگلچ الي احبها..
و اثنينه نحفظ اسرار بعض..مثل ما چنا صغار
من واحد يسوي وكاحه الثاني يظم عنه و ما يحچيلهم عنو

ما جاوبتو و هو ما استسلم رجع گال بإصرار

- ترا أني حيل متساهل وياچ..لو غير واحد بنت عنو و اختو تعترف انو تحب واحد چان سواها طلابه عليها..بس اني شخص فري و عادي المهم في ما يرضى الله

- محمد شگد تحچي

گلب عيونو و گال

- يعني ما راح تحچين

هزيت راسي ب لا..و هو تعدل بگعدتو و گال

- تريدين تعرفين منو احب

- انت يوميه حاب وحده..شوكت لحگت ترسه على بر

حچيتها بسخرية و هو هز راسو ب لا و گال

- لا ..عرفت منو اريد

انمحت بقاية ابتسامه سخرية من على شفايفي و اني اشوف مدى جدية كلامو
تقرب عليه و لزم ايدي الي جيت اسحبها منو لأن هسا رجفتها و دگات گلبي العاليه تفضحني..

- تقيه..ادري الوكت هسا ما يسمح
بس ما اگدر اظم أكثر من هيچ..اني احبها ل ناز و معجب بيها حيل..و هي رغم هالشي رفضتني
اريدچ تقنعيها بيه..اني اخوچ  و طالب مساعدتچ

ثقلت انفاسي..و اني احس الدنيا حشرتني بزاوية مغلقة..ايدي سحبتها من بين ايديه..و ما عرفت شنو احچي
لأن الكلمات كلها فرت مني..
حبو ل ناز من جهة..و كلمتو اني اخوچ من جهة ثانيه..ردت ارد عليه
بس ما گدرت والله..اصعب شعور حسيت بي هسا
اني الي احبو..و ظامه حبو عن الكل بس عن ناز
و بالاخير يطلع يحبها..و هي رافضتو !

زين ليش ما گالت ؟ لو چانت خايفة مني و من ردة فهلي عليها

گمت على حيلي فجاة و هو رفع راسو عليه و گال

- شبيچ تقيه

- ما بيه..بس اني ما عليه
تنجاز بروحك

گام هو همين..و صار گبالي و گال بانفعال

- تقيه شنو انجاز بروحي ! اگلچ احبها
و هي ما تريدين..اريدچ بس تقنعيها و تحچين وياه ا

- إذا تعرف انها رافضتك..عجل ليش مصر على الموضوع...شوية خلي عندك كرامه
و لا تلطش عليها

عگد حاجبو..و اني عفتو و فتت جوه
كاتمه دموعي..صعدت فوگ و بدون ما ادحگ ل ناز و لا اجاوبها على تساؤلاتها مددت على التخت و غطيت راسي و اني احاول انام..بس دموعي ما تركتني بحالي

و لا ناز..الي وخرت الغطا و گالت بقلق

- تقيه شبيچ ؟ شنو الي صاير بينكم ؟

- ما صار شي..اريد انام

حچيتها و اني اسحب الغطا..و اصد على الجهة الثانيه..و عفتها بحيرتها..

عضيت على شفتي و اني اغمض عيوني بقوة..
و احس گلبي صار مثل الجمره يحرگ بيه..شگد حاولت ابطل احبو و انو اطلعو من بالي بس ما اگدر..

الصبح من گعدنا..گعدت متأخرة
اخواني ما رايحين للمعمل ينتظرون خالي يجي..
من بعد كلام محمد البارحه..حسيت بخمول و عدم اهتمام لأي شي گدامي
ما درت بال شنو گاعد يصير

بدون نفس حظرت وي فاطمه الغدا..اني و ناز
الي حاولت ابتعد عنها..لأن ادري بنفسي راح انفجر
بس ما اريد اطلع قهري عليها..هي مالها ذنب إذا محمد حبها..و يمكن حقو
وحده مثلها و مثل جمالها و تصرفاتها تفوت بگلب أصعب واحد..و شلون إذا كان هالواحد محمد
الملطط و الي ما تعبر وحده گدامو الا يخليها بگلبو...

أما أحلام و حنين ف ما شفتهن و لا اريد اشوفهن
شگد چنت فرحانه و مكيفه علمود تزوجن إخواني..صرت ما اطيق شوفت وجهن بعد الي سونو..

صار وكت الظهر و خالي عدنا..ما فتت سلمت عليه
چنت اخبط لبن..من لمحت أحلام و حنين فاتن للصالة
انداريت ل ناز الي سألت فاطمه

- شنو راح يصير هسا ؟

- ما ادري يا ناز..بس الله يستر من اليصير

جاوبتها فاطمه الي رجعت اندارت عليه و گالت

- و انتي شبيچ اليوم ؟

- ما بيه شي..راسي يوجعني بس

- ايي عود تغدي و اخذي براستول

هزيت راسي ب اي بدون ما اجاوبها..
كملت البن و دحگت ل فاطمه و گلت

- عود من تصبون الغدا صيحلي تا اسعادچن

- خوش

طلعت من المطبخ..و صعدت فوگ
تمددت على التخت..و اني صافنه بالسگف..بدون مقدمات حدرت دموعي على خدودي
مديت ايدي و مسحتهن مع فوتت ناز للغرفة

انداريت للجهة الثانيه و هي گعدت يمي
خلت ايدها على جتفي و گالت

- تقيه..ليش تخوفيني..شبيچ

- ما بيه شي ناز..بعدين احچيليچ

- شلون ما بيچ و بعدين تحچيلي ؟

التفتت عليها و گلت بشبه همس

- لأن ما احس بشي ناز..بس نار الي بگلبي

جتي تحچي بس ارتفع صوت صياح جاي من غرفة سيد..چان صوت أحلام و هي تصيح و تبچي

گمزت من التخت و طلعت من الغرفة و ناز وياي..
چان باب غرفتو مفتوح..
صنمت بمكاني من لگيتو ل سيد كامش أحلام و يكتل بيها..على أصواتهم جتي الحجيه و عمار و خالي ..

رجعت خطوه ليورا من دفعها سيد برا و صاح بعصبيه و عروق رقبته بارزه

- طلعوها من هين لو ارتمب بيها جريمة و هالمره بعد ما اريدها لو انصاغت ذهب..

.

عبدلله..

ما ادري ليش كل ما اگول
تعدلت حال الدنيا..تميل أكثر..صدمتي ب ياسر گدرت اتقبلها
و صدمتي ب حنين و أحلام خلتني ما اثق بيهن..
گلت أحلام ما تظل عندي هسا..على الأقل الا ان تهدأ النفوس
و تجي تعتذر هي و اختها و اخوية الي مشى وراهن على عماة عينو..

بس يصل الحال انو اكتشف انو طول مدة زواجي من أحلام تاخذ حبوب منع حمل..
من صعدت فوگ تا احچي وياها على انفراد شفتها لامه هدومها و هي مقرره تروح..صار بينا حچي و عتب
و هي كالعادة بارده و تجاوب من ورا خشمها..بعصبيه ضربت الجنطه  الي على التخت و وگعت بالگاع و تطشرت هدومها..و من بينهن انتبهت ل شريط دوه

هي جتي ادنگ و تاخذو بس اني سبقتها..سألتها بعصبيه و هي ما انكرت و بسرعة اعترفت انو هاي حبوب منع حمل

يمكن صح ما احبها..بس حابها ك زوجه و من واجبي احترمها و اقدرها..بس ان تصل لهذا الحال و تاخذ حبوب منع حمل كلو في سبيل انو ما تحمل

جريتها من ايدها و اني اكز على اسناني و اقربها عليه

- ليش هالحبوب هااا ؟ ليش تاخذين يم الهاري

دفعتني بغضب و هي تگول و تحرك ايديها بعصبيه

- لأن ما اريد احبل منك..لأن ما اريدك و لا اطيقك
ما اريد جاهل منك و يشبهك و يشبه تصرفاتك..همجي و متخلف كلشي عندو ما يصير

فتحت عيوني على وسعهن..و هي ما سكتت لهذا الحد..انما زادت بالحچي و هي تكمل كلامها بحسرة و قهر

- ما چنت رايدتك والله..هلي غصبوني عليك
لأن ما يصير يردونك..عرفت ليش ما اريد احبل منك
لأن ما احبك

و بدون واعيه مني هجمت عليه و توليتها ضرب
اول مرة بحياتي امد ايدي على مرة...حرمه ضعيفه
ما عدها سلاح بس لسانها..
فتحت الباب و دفعتها و التم الكل و حچيت حچايتي
كلهم گاموا يريدون يسكتون بيه و اني بارود يم نار

فتت للغرفة و سحبت هدومها و خليتهن بالجنطه و رجعت لگحتها يم رجليها و ابوها الواگف يمها

رفعت ايدي و گلت و اني اجر نفس

- انتي طالگ بالثلاث ..و باچر تصل لبيتكم ورقة طلاگچ

- يمه سيد بروح ابوك اهدأ..شجاك

- حجيه شجاني ؟؟؟ جتني شيطاني ركبت راسي
هالمره اگلچ بعد ما اريدها الي تاخذ سم زقنبوت علمود ما تحبل مني ما اريدها..

كملت كلامي و شهگت امي..انداريت للغرفتي و گبل لا افوت گلت

- خالي بنتك اخذها وياك..
الله معاك

طبيت و سديت الباب بقوة..گعدت على التخت و اني اسحب بالنفس
و احس نفسي ضاگ فجاة..دحگت بالغرفة و احسها كتمت على صدري بالزايد..

گمت افتر بيها و اني امسح على صدري..انفتح الباب و فاتت أمي

- يمه وليدي شبيك !

حچتها و هي تگف گدامي..حطت ايدها على صدري و گعدت تمسح بلطف
و أني گلت بصوت ناصي

- نفسي ضاگ يمه

- الله لا ينطيها ان شاء الله بجاه كلمن عندو جاه
تعال يمه انت تعال

اخذتني للچربايه و گعدت عليها و هي گعدت يمي
فات عمار الي گبل گال

- خالي طلع زعلان

امي انتفضت من مكانها و هي تگول بعصبيه

- طبوو مرض درب يسد ما يرد..يزعل عليش !!
لازم يستحي من عمايل بنواتو

- سيد..

ناداني عمار و رفعت راسي عليه و هو گال

- أحلام تگول خلي يطلگني

- لا تستعجل على رزقها..والله باچر تصل ورقة طلاقها لبيتهم..حرام عليه إذا ظلت حرمة ليه

انداريت على امي و گلت بعتب

- هاي الي ظليتي تمدحينها و سويتيها ماكو منها..فوگ ما وزت ياسر هي و اختها
تروح تأخذ حب مانع..و بكل صلافة تگول ما اريدك..يمه من الاول ما ردت هالزواج بس انتي الله يصلحچ دبستيني بيها

- يا يمه اني شمدريني هي هيچ..شزينها و شحلاتها من چنت اشوفها
و بعدين الصوچ من خالك ليش گال البنيه موافقه و خلانا نكمل هالزواج

- هسا ما يفيد الندم و لا العتاب..هالشي رب العالمين كاتبو و انتوا مالكم قسمه سويه
كل واحد يروح بحال سبيلو احسن

حچاها عمار و اني هزيت راسي ب اي..
من حسيت نفسي صرت احسن..حدرت جوه
و صحت ل ياسر
الي جه و وگف گدامي چنت بالصالة وحدنا

- ها سيد

- اسمع و حط هالحچايتين حلقة باذنك..تريد تظل بهالبيت ترجع مثل گبل
عفا الله عما سلف..تشتغل بالمعمل و تأخذ حقك و انت الممنون..لو تريد ترجع لسوالفك و البوگ ف اعذرني يا ابن امي و ابويه..بهالبيت ما الك گعده بيه

ما جاوبني بحرف واحد..تقدمت عليه و حطيت ايدي على كتفو و هو رجع رفع راسو عليه و كملت كلامي..

- ياسر ارجع مثل گبل و احنا مسامحينك
بس ارجع ياسر الينعرفو..و عوف كلام مرتك و شوية جر اذنها تا تعرف انو السوتو غلط..ادري بيك راسك يابس و يمكن ما راح تقتنع بكلامي..

- يعني ما راح تجبروني اعوفها

- محد يجبرك تعوفها و لا نجبرك اطلگها..هاي تظل مرتك..بس انت الي عليك تسوي شوية تفهم و تخليها تجر عدل..لو والله تصير غير سالفة

هز راسو ب اي..و اني جريت حسرة و گلت

- حنين تظل بنت خالنا و مرتك..و محسوبه علينا
اني ادري بيها هي الچانت توز براس أحلام..و هي الي خلتك تمد ايدك على الحرام..بس گتلك هي مرتك
و غلطت و جل من لا يخطى

و بتردد گال

- زين و أحلام ! شراح تسوي وياها

- ما عليك بسالفتي و شراح اسوي وياها..و اياك
تجي عليه و تگعد تقنعني حتى اغير قراري لأن هي اخت مرتك..احلام من بعد سالفتها طلعتها من حياتي

ما حچه شي..و اني ارتاحيت من هالناحية..لأن ادري هسا راح تگعد حنين توز براسو و انو اختي مالها ذنب و من هالسوالف ..اكتشفت بنوات خالي اثنيهن نفس الطينه
بس الفرق بيهن..حنين من جوه ليجوه و أحلام تحچي بالوجه..رغم چنت اگول عليها فطيره و بريئه

- اروح

هزيت راسي ب اي و هو جه يطلع بس اني وگفتو و گلت

- اسمع ياسر..الفلوس الخذتهن بدون علمنا اعتبرهن راتبك مال هالشهرين الجايات..يعني چنك ماخذهن مقدماً

ختمت كلامي بابتسامه و هو جر حسرة و هز راسو و طلع..تنهدت اول ما طلع
و من باب الصالة الخارجي فات عمار
دحگلي و گال

- عود بشرني اذا استعدل.

- يستعدل..بس شوية جرة اذن يستعدل

- هه و الله على كلامك الي سمعتو..ما استبعد يرجع يمد ايدو و ما يخاف..لأن چنت حيل رقيق وياه

ختم كلامه بضحكه و اني گعدت يمو و گلت

- مو كلشي يجي بالعنف و العصبيه ..اكو ناس ما تستوعب بهالشي..احنا راح نسوي و كانو الموضوع انتهى و احنا مسامحينو..و همين فوگاها راح نخليه يستلم نص الشغل و نأمنو..و وراها راح يشوفنا نسينا الموضوع لان نحبو
و هو هيچ راح يتأنب ضميرو..خوية ترا عذاب الضمير يوجع أكثر من العصا و الضرب مو ؟

هز عمار راسو و گال

- ايي ولله بعد اخوك.. عذاب الضمير يوجع
حيل

مر اليوم كلو و محد حاول يرجع يفتح الموضوع..جه محمد العصر من دوامو و گعد يسال امي شصار و مصار..اخر شي انداريت عليه و گلت

- ما كملت اسأله..من جيت لوك لوك لوك
خرب يومك صدعت راسي

- ايي سيد شجاك..ما چنا موجودين و ما واكبنا الحدث تا نعرف شصار

گالت امي بتنهيده

- يا يمه يعني شصار ! انسدت السالفة على خير
و ماكو واحد ما يخطى..و الحمدلله اخوتك تصالحوا

ابتسم و اندار عليه و گال

- اي عفيه..هو صح ياسر ما يستاهل و جاهل
بس يظل واحد منا و بينا

حچاها و گام بعد ما لقط كل الإخبار  و دحگت لأمي الي جرت حسرة و نظراتها على محمد الي طلع

- بجاه النبي و اهل بيتو يا ربي تنطيني مرادي

- آمين حجيه..بس شنو مرادچ ؟

سألتها و دحگت عليه و گالت

- هالوليد يتزوج و اشوف جهالو

ضحكت و اني اهز براسي و گلت

- ايي يمه شدي عليه و دبسيه بوحده
و شوفي جهالو

- محمد اثول و غبي..حچيتلو على وحده
بس هو راس التيس..اوف منو
عشگ بنت مطلگ و ما شايف هالنعمه الي عندو من وراها

عگدت حاجبي و اني ادحگلها..شلون گامت على حيلها و طلعت من الهول..
الحجيه ما طول حطت محمد بالزائد ف يعني راح توگعوا و تزوجوا و غصب عنو..

بالليل ورا العشا..اخذني عمار على جهة..و گعد يقنع و يحچي وياي بسالفة أحلام
الي افتهموا منو انو خالي مخابرو..اني ظلين على قراري و گلتلو گول لخالك
بنتك خليها عندك..

و كالعادة گبل لا انام بالليل..طلعت برا
دحگت لتقويم بالموبايل..و ابتسمت ما ظل اقل من اسبوعين على رمضان
و ان شاء الله من باچر نبدي نحظرلو..ربي يرزقنا صيامه و قيامه و يعينا..

انداريت للصوت ورايه..رخت ملامحي
من شفتها ناز..الي گلت يمكن راح ترجع و تتجاهليني بعد الي صار بيني وبينها

جتي و وگف گدامي..رفعت راسي عليها و هي گالت

- اعرف انت بوضع ما يسمح اگعد احچيلك مشاكلي
بس يا ريت تتصل على عمو جرجيس و تگله يتواصل وي عمو فريد بأسرع وقت..لأن ما اگدر ابقى هنا أكثر

- الزلمه گال الگه الرقم و اتواصل وياه..يعني لو يعرفو أكيد چان اتصل و انطى خبر

- زين اني اريد احچي وي عمو جرجيس

- ليش ؟

سألتها..و هي اخذت نفس و گالت

- اريده ينطيني رقم امي..اريد احچي وياها

گمت على حيلي و گلت بنبرة هادئه

- ميخالف..باچر اتصل و اخلي يجيبلچ رقم امچ

هزت راسها ب اي..و جتي تروح بس وگفتها و گلت

- ناز

- نعم سيد

حچتها برود.. و هي ادحگلي
مسحت على لحيتي و گلت

- اعرف زعلتي مني..و اني ارجع اكرر اعتذاري
ترا الي ما ارضاء على اختي همين ما ارضاء عليچ

- تسلم سيد..بس اني چبيره و افهم الي ديصير يعني مو طفله..حتى واحد يجي يوجهني حسب تفكيره

حچتها و استأذنت مني قبل لا ارد عليها..طبت جوه
و اني تنهدت و فتت وراها

.

ناز..

الصبح گعدت و لگيت تقيه توي گاعده..صبحت عليها
و نزلنا جوه تريگنا..و انشغلنا بالشغل
فاطمه بدت تحظر بالغدا..و ساعدتها و تقيه بدت تغسل بالملابس..

اما حنين ف ما طلعت من غرفتها و لا شفناها..

چنا بالمطبخ من فات سيد..سلم و اني سويت نفسي ما سمعت و غلست على الرد..جتي الحچي و سألته شنو صار
و هو برود گال

- طلگتها

حچاها و طلع من المطبخ..و الحجيه گعدت تتسغفر ربها و شكلها ضاجت..اما اني
ف ما اعرف ليش ارتاحيت..لأن من الأول اشوف أحلام ما تناسب سيد اطلاقاً..

صبينا الغدا..و صاحت تقيه سيد يجي يتغدا
نزل من فوگ و مبين على ملامحه البرود..و لا كانو صاير شي.. گعدنا على الغدا و فتحت الحجيه الموضوع
حنين ما چانت موجوده..بعدها زعلانه بغرفتها و حتى ما قبلت تجي تتغدا من نادتها فاطمه..

- يمه رحمة لوالديچ سدي هالموضوع
خلص كل واحد راح لحال سبيلو

- و ابوها ! شگال من رحت طلگتها

- ما گال شي..بس گعد يتحسب
عبالك بنتو بريئه ما سوت شي

- يا يمه الله يقدم الي بي خير..الحمدلله طريقكم انتهى هسا احسن من ما بعدين و الناس تگوم تحچي بعد سنين طلگها لمرتو

- اني كلام الناس ما يمهني..

- زين الموخر وديتو

- بالليل خلي عمار يوديه

كمل كلامه و رفع راسه عليه..و اني تجاهلته و كملت اكلي
و ادري بي يباوعلي بس مغلسه..كلامه لحد هسا ما راح عن بالي..و شكله ما راح يروح
اذا هو اعتذر ف مو كل اعتذار يجبر..

كملنا غدا و كل وحده لزمت شغله و صعدت فوگ
فاتت ورايه تقيه..الي گعدت على الچربايه و جرت حسرة  و گالت

- سيد ضايج حيل..

- ما انتبهت

- لا انتبهالو...بس هو مو ضايج علمود طلگها لا
اني ادري بي ضايج من سالفتها..يعني اكو وحده عاقل تسوي هيچ ! تاخذ حبوب منع حمل
محد يرضاها والله..و من حقو انو عافها

تنهدت و گلت بهدوء

- المفروض ابوها ما يجبرها على الزواج منه..يعني الزواج مو بهاي البساطه

- مو هي هاي المشكله..خالي انطانا الموافقه و بنتو مو راضيه

- و بسبب هالشي ما توافقوا..محد بيهم فهم الآخر و لا عرف شنو يكره و شنو يحب..فجاة خلوهم گدام بعض و گالوا تزوجوا..و هاي النهاية ثارت طلاق ماكو مفر منه

هزت راسها ب اي..و مددت على التخت و گالت

- ربي يبعدنا

ابتسملتها و گلت

- آمين..

طول اليوم چنت انتظر جواب من سيد و انو اتصل على عمو جرجيس
و انطاه رقم تلفون امي..قطعت الأمل
بس الرب رحم بحالي..من اجا سيد المغرب احنا بالمطبخ
و گال

- ناز..حصلت على رقم تلفون امچ

- صدگ ؟؟

هز راسه ب اي..و گمت على حيلي من على الكرسي
و رحت عنده و حسيت نظرات حنين عليه تريد تاكلني..صح هي طلعت من غرفتها بعد ما اجا ياسر
بس عبالك مزهريه و واگفه..كلمه ما نطقت لحد هسا..

ضغط هو على زر الإتصال و اخذته منه..خليته على أذني
و طلعت من المطبخ و اني احس گلبي راح يطلع من مكانه
يا رب صار شگد ما سامعه صوتها ! مشتاقتلها
و ميته على شوفتها..
طول الرنين و ما ردت..گمت افتر بالممر بدون هدايه
اخر شي گعدت على الدرج

فصل الخط و رجت أتصلت..باوعت ل سيد الي واگف يم باب المطبخ و يباوعلي..

انفتح الخط و اخيراً.. و بسرعة صحت ماما
بس ما وصلني صوتها..وصلني غير صوت خلاني
احبس نفسي و اني أسمع النبرة القويه مالته و الخشنه
و هز ينادي ب إسمي و هو يريد يتأكد من انو اني المتصله..خليت ايدي على شفتي مانعه بكائي
و نظراتي على سيد الي تعدل بوگفته و هو يباوعلي..

- ناز يا عاه...هاي انتي ! ولچ وين شردتي يا بنت الكلب
و الرب بس الزمچ الا اشرب من دمچ

هزيت راسي ب لا و گلت بتعلثم و دموعي توگع

- اريد ماما

- تريدين وجع فوگ وجع..ماكو امچ بحح
انسي عندچ ام ولچ..موتيها خليتيها تنجلط
كتلتي اخوها و مات رجلها من وراچ

اجا يوگع التلفون من ايدي..بس تماسكت لأخر لحظه..نفسي ضاق و انتباتني نبوبة الهلع..گمت گوه انتفس
شفايفي گامت ترجف و اني اسمع صوته ل خالي الچبير و هو يرجع يصيح

- وين انتي هاا ؟ وين شردتي يا عاه....
بأي بيت دعارة هساا..

وگع التلفون مني..و اني اخلي ايدي على صدري افرك بي
من شافني سيد بهالحالة اجا ركض عليه شال التلفون و صاح الو و هو يحچي بعصبيه جاوبوا..بس فجاة سكت و باوعلي و ثواني غلق الخط

گرمز گدامي و صاح ل تقيه..و لزم ايدي و هو يحچي وياي حتى اهدأ
اجت تقيه و الحجيه
و گعدت تغسل الي..و اني مثل الضايعه..بس اسمع اصواتهم و ما افرق شنو ديگولون

لحظات طويله حسيتها و هدأت و رجعت انفاسي ل طبيعتها..التموا الكل عمار و محمد و فاطمه
و هما يطمنون عليه

اخذتني تقيه فوگ و گعدت يمي
سألتني شنو الي صار..و بنحيب گلتلها كلامي خالي
ما عرفت شنو تگول غير انو اخذتني ل حظنها و گعدت تسكت بيه..

من صار العشا گوه نزلتني جوه
نفسي مسدوده و ما الي نفس..بس تذكرت علاجي لازم اخذه..
نزلت جوه و اكلت شوية..الحجيه گعدت يمي و كل شوية تنطيني لفة و تعالي اكليها
و ما حبيت افشلها..

بقيت ساكته و ما حچيت لأحد شنو صار...كل ما اتذكر كلام خالي اكره نفسي و اذكر نفسي انو الصار كله من ورايه..بابا مات بسببي و ماما ما اعرف حالها
و كلها تكرهني..

كملت عشا و رجعت صعدت فوگ..اخذت علاجي
و رجعت نزلت ساعدت البنات..بس بنص الشغل گالتلي فاطمه عوفي الي بيدج انتي تعبانه روحي نامي

و اني ما اعترضت..بالعكس ارتاحيت لأن صدگ چنت محتاجه اگعد وحدي
صعدت فوگ و تمددت بفراشي و تركت الگلوب مشتغل..حاولت انام بس المحاولات بأت بالفشل
فوگ النص الساعة يلا گدرت اغفي

من گعدت بعد مده..باوعت للساعة چانت بال١٢ و عشرة
باوعت ل تقيه نايمه بفراشها
مسحت على وجهي و طلعت من الغرفة اريد اروح للحمام..من طلعت من الحمام
صنمت بمكاني من لگيت سيد باب غرفته..بلعت ريگي من شفته
مشيت ناحية الغرفة و اجيت افوت بس هو گال

- ناز..تعاي اريد احچي وياچ

- گول سيد

- مو هين

حچاها و اندار للناحية الدرج..مشى ومشيت وراه
اخذت نفس و گلت أكيد راح يسألتي عن ألي صار
فات للصالة و اني فتت ورا..تركت الباب شوية مفتوح
وگفت و هو التفتت عليه و گال

- ناز من اجيتي لهنا..ما حاولت لا اني و لا واحد من اهلي نعرف شنو صار و خلاچ انتي و ابوچ تتهزمون..لأن گلنا هالشي خاص بيكم..ابوچ توفى و الله يرحمو..و انتي ظليتي عدنا أمانه و انتي طلبتي انو نتواصل ويا عمچ و اني ما اعتقد قصرت بهالشي..بس سبحان الله ما گاعد تصير

بللت شفتي و گلت بتردد

- سيد انتوا محد بيكم قصر وياي..و فصلكم فوگ راسي
و اني گلت اعرف دازعجكم ببقائي هنا..بس انتظر عمي فريد

- ناز لا تفكرين لحظه انو احنا منزعجين من ظلتچ هين..انتي صرتي وحده منا و بينا..و على العموم هذا مو موضوعنا

- لعد ؟

جر حسرة و گال و هو يضيق عيونه

- اريد اعرف ليش الشخص الي اتصلتي بي تهجم عليچ ! و لا تگولين لا
من اخذت التلفون سمعتو شنو يحچي..يگول كلو بسببچ الي صار و انتي راس البلاء

دمعت عيوني و اني اگول بانكار

- سيد و الرب انظلمت..كلامه مو صحيح

- عجل اذا مو صحيح..احچيلي !
گوليلي شنو الي صاير..عسى و لعل اگدر اساعدچ

نزلت راسي..و اني اريد اكتم دمعتي الي اجت توگع

- ناز لا تبچين..اني گاعد اسالچ سؤال
و اذا ردتي جاوبيني..و صدگيني هالشي راجع لچه

- مالي ذنب و الرب..هو الي اجا عليه مو اني

حچيتها و إني اخلي ايدي على شفتي..گعدت على القنفة ورايه و غطيت وجهي
و گمت احچيله و اني مع كل كلمه تطلع شهگه احسها تكتل روحي

ردت اطلع هالكم من الكلام الي بداخلي..ردت بس احد يسمعني و يوخر عني فكرة انو اني قتلت شخص ما اله ذنب..هو اجا يعتدي عليه..اجا يقتل روحي بيده

كملت كلامي..و رفعت راسي اله
چان گاعد على القنفة گدامي و هو مصدوم و علامات الصدمه مرسومه باحتراف على ملامحه..ما الومه و لا اگدر ازعل من ردة فعله..

- سيد و الرب ما چنت اقصد اقتله..بس ردت اوخره عني ترجيته و اني ابچي و اصيح يوخر عني بس ما
وخر.. ما چان احد اكو غيرنا بالبيت و من ضربته اجوب بابا و ماما

لحظات من الصمت مرت..و شگد حسيت بثقلهن على روحي
منتظرته يحچي..ينطق كلمه بس بقى كتلة من الصمت

ورا لحظات طويله..رفع راسه عليه و گال و هو يمسح جبينه

- ناز..انتي دافعتي عن نفسچ
يعني چنت گدام امرين..لو ياخذ شرفچ لو تقتلينو

هزيت راسي و اني ابچي و اريد اطلع هالذكرى من راسي
باوعتله من گام على حيله
و گعد گدامي على الطاوله..رفعت راسي اله و هو تنهد و گال

- قتلچ الو دفاع عن النفس..
و لا حكم عليه من قتل دفاع عن نفسو لو عن اهل بيتو لو مالو... ناز صح چان بيدچ انو ما تقتلينو بس انتي گلتي مو بوعيو..و ما يحس بالي حواليه

- بس و الرب ما چنت اقصد..يعني حسبالي الضربه خفيفه
بس هو وگع بسرعة و مات..و حتى دم مو هواي نزف

- اكيد اجت على مكان حساس ف لذلك توفى بسرعة

جر حسرة و گمل كلامه و هو يمسح على لحيته

- اني راح أسأل محامي رفيچ الي..بس اريدچ تقوين گلبچ و تبطلين بچي

- يعني راح انسجن!

حچيتها و اني ابچي و هو بسرعة گال مطمني

- اكيد ما اخليهم يسجنونچ..اكو شي اسمو كفاله
و بعدين ناز الدفاع عن النفس بالادلة راح يكون ل صالحچ

- بس ماكو دليل

جاوبته و هو  سألني

- يعني تصوير..مكان الحادث

هزيت راسي ب لا..و گلت

- حرگوا بيتنا..ورا الحادث بيومين

تنهد و سكت..و اني گلت بتلعثم و تردد

- ما راح تگول لأحد مو ؟

- ليش ما اگول

- ما اريدهم يعرفوني قاتله

حچيتها بغصه..و هو هز راسه ب اي
و گال

- ميخالف

حچاها..و گام على حيلو..من وگف
اني وگفت علمود اروح..

- اگدر اروح ؟

هز راسه ب اي
و اجيت اطلع بس نادى اسمي التفتت اله و هو رجع يگول

- ناز لا تخافين..اني وياچ
و رب العالمين راح ينصر المظلوم

هزيت راسي ب اي..و طلعت و اني احس براحه و لو القليل
انو راح يگدر يساعدني..و انو گدرت اخفف من هالحمل الي اسمه سر

.

محمد..

طبيت للغرفة و اني احس الصدمه تملكتني..گعدت على التخت و اني احط ايدي على راسي من هول الي سمعتو

اني شورطني گمت بهالليل و سمعت الي حچوا بي ناز و سيد..

كلشي توقعت انو صاير ب ناز..بس هالشي لا
و الله الله يعينها..بس تخيلت الموقف شگد صعب
و هي عاشتو و تحملت نتأجو

بالليل گوه نمت و اني أفكر  بالي سمعتو..
من گعدت الصبح..و طلعت للدوام
النهار كلو إني افكر ب ناز و سالفتها..و حتى شغل ما اشتغلت عدل

من رجعت للبيت العصر..صحت ل تقيه تسويلي عصريه..
گعدت بالمطبخ على الميز..و حطت گدامي تقيه العصريه
جتي تروح بس وگفتها و گلت

- تعاي تعاي تقيه

- هاا

حچتها و رجعت گلت

- عندي سالفة وياچ

گعدت و گالت بشبه همس

- بس لا تگول امشي قنعي ناز

هزيت راسي ب لا و گلت و اني انحني ليگدام

- تقيه..عرفت سالفة ناز

رفعت تاك حاجب مستغربه من كلامي و رجعت احچي

- عرفت ليش منهزمين من بغداد

تنهدت تقيه و تقربت همين هي و گالت بصوت ناصي و عيونها بعيوني

- ادري..خبرك قديم

.

السلام عليكم شلونكم حبايب قلبي

ان شاء الله الكل بخير

اتمنى البارت عجبكم

شنو آرائكم و توقعاتكم 💜💕

و خلصتو من حلومه 😌🤭
يلا طشوا جكليت 🤣🤣

و ها هواي يسألون النشر شلون
النشر بين يوم و يوم ❤🖤

و بس نلتقي على خير احبتي