| عشگ المداح | ' باللهجة العراقية '

البارت الخامس

#عشگ المداح
#بقلم: الراوية
#البارت الخامس

بسم الله ❤
اللهم صلِ على محمد و آل محمد❤

.

ناز..

رفعت الغطا و اني عاگده حاجبي..دورت بكل مكان و ما لگيته
رجت للكنتور و فتحته و دورت بين ملابس و هماتين ماكو..تخصرت و اني اباوع لكل مكان حتى على سرير تقيه دورت و ماكو

التفتت الها من گالت

- ناز شدورين

تأفتت و اني ارجع شعري ليورا

- الصليب مالتي ماكو

- خاف وي هدومچ

- ماكو..فص ملح و ذاب

گامت من الطابوريه و تركت تلفونها  على ميز المراية و گالت

- يجوز نزعتيه و نسيتي وين خليتي

هزيت راسي ب لا و جاوبتها و اني ارجع ادور بين ملابسي..مع اني متأكده من نفسي انو ما خليته هنا

- ما نزعته..ادري بنفسي

- يجوز واگع منچ بدون ما تدرين

باوعت عليها و اني اعض اضافيري و اگول

- يمكن لازم ادور اله جوه

چانت دنيا ليل ورا العشا..الكل مجتمع بالصالة و بس اني و تقيه فوگ
ف طلعت من الغرفة و اني ادور بالممر بلكتن واگع منا منا..نزلنا جوه و گالت تقيه

- امشي نروح للصاله

- لا تقيه..هنا احسن

زفرت و گالت و هي تلزم ايدي

- امشي انتي وحده من البيت صرتي

ابتسمت الها بتوتر..و ما حبيت اردها
فتنا للصالة و هي سلمت..كلها باوعت عليه و رجعوا كملوا كلامهم
يمكن انصدموا من شوفتي هنا..لأن اني اطلاقاً ما اگعد وياهم
ابتسمت و اني احس بحرارة طغت على وجهي

گعدت يم تقيه بالأخير عند الباب..باوعت عليها و گلت بصوت ناصي

- تقيه اريد ادور للصليب

التفتت عليه و گالت

- والله هسا ادور وياچ و نلگاه..بس أريد اتأكد من الخبر الي سمعتو

- اي خبر

ابتسمت و هي تتقرب الي و تگول بنفس طبقة صوتي

- سمعت أمي تحچي وي عمار علمود سيد

تلقائياً عيني راحت اله..چان گاعد و بيده سبحه
و هو يباوع على التلفزيون..بقيت لحظات اباوع اله و اني اسمع ل تقيه الي تكمل كلامها

- يمكن راح يتزوج

گبل التفتت الها..و هي ابتسمت و گالت

- فرحانتلو والله

ابتسمتلها و ما حچي شي..و يمكن الحجيه تقرأ افكارنا
اندارت اله و گالت

- ها سيد..شوكت نروح نخطبلك

فز محمد من مكانه و گال

- شنو شنو سيد يريد يتزوج

ضحكت الحجيه و اني باوعت لسيد باستغراب

- ايي يمه راح يخطب

- منو ؟

- أحلام

حچتها و اني التفتت الها..و هي باوعت ل سيد الي و لا عبالك الي ديحچون عنه هو

- همزين قنع و فكت العقده

گالت تقيه و الابتسامه شاگه وجهها

- شوكت تخطبونها ؟

- باچر ان شاء الله

جاوبها عمار و باوع ل سيد..الي گام على حيله و گال

- يلا عن اذنكم تعبان و اريد انام

طلع من الصاله و اول ما سد الباب وراه..گمز محمد من مكانه و گعد يم الحجيه و گال

- شو عبالك عادي الوضع عندو ؟

- تعرف اخوك ما يحب يبين مشاعرو

- زين جده هو موافق

باوعتله بطرف عينها و گالت

- عجل شلون قررت اخطبها الو لو ما موافق

ضيق عيونه و رجع سألها

- جده انتي قنعتيه موو

دفعته من كتفه و گالت بانفعال

- شبيك يول بس تسأل !! هو جه عليه و گال يمه روحي اخطبيلي أحلام اني شدخلني

- هاا..بيها خير

جاوبها و گبل باوع ل ياسر الي رفع تك حاجب
و هو يبتسم

اني باوعت ل تقيه الي التفتت عليه و گالت

- أحلام اخت حنين تعرفينها مو

هزيت راسي ب أي و گمت على حيلي سألتني وين ؟
ابتسمت و گلتلها

- اريد ادور السلسال

هزت راسها ب أي و اني طلعت..بالممر باوعت و اني ادور عليه و ما لگيته
فتحت غرفة ياسر الي بعد باچر توصل غرفة الخشاب باوعت الگاع فارغه ما بيها شي..جريت حسرة
و فتت للمطبخ

استغربت من لگيت الباب مالته مفتوح..و اني أتذكر چان مسدود

طلعت من المطبخ و اني اباوع للحديقة .الي مضويه
وگفت بمكاني من شفت سيد گاعد بالحديقة و منطيني ظهره
هو مو گال اريد انام شو گاعد هنا

التفتت للمطبخ اخاف احد موجود..و اخاف يشوفني هنا و يفهم خطأ

مشيت كم خطوة و يمكن سمع صوت خطواتي على الارضيه السيراميك
وگفت بمكاني من گال بدون ما يباوعلي

- تقيه حظريلي گلاص چاي..راسي يوجعني

ضيقت عيوني و اني افكر بيني و بين نفسي..اروح اسويله لو اگول ل تقيه
بس هو شكله ضايج
رجعت للمطبخ..و اخذت القوري و خليت بي مي حار
انتظرته يفور..مع اني ما اعرف اسوي شي
بس من خلال بقائي هنا..بديت اتعلم شويه شويه
اباوع للبنات من يشتغلن و اتعلم
سويت الچاي..و خليت شوية شكر بالگلاص
و ورا كل هذا..ترددت انو اخذه اله

يمكن هسا يفهمني غلط..انو داحاول اتقرب اله
مثل ما فهموا الي صار خوالي انو خليت خالي يتقرب الي..بس رجعت افكر
سيد مو مثلهم..

اخذت الگلاص و طلعت برا..و هو بعده بمكانه گاعد

مشيت ناحيته و وگفت گدامه..من رفع راسه و شافني انصدم من لگاني
قربت الگلاص اله و گلت

- الچاي

باوع للگلاص و رجع باوعلي..و اخذه و گال

- شكراً

- عفواً

رجع باوعلي و گال

- بس اني گالت ل تقيه..وينها

شابكت ايديه و گلت

- اني الي طلعت مو تقيه..

هز راسه ب اي و گال

- حسبالي تقيه..على العموم شكراً

رجع دنگ و شرب شوية من الچاي
چنت اباوعله اريد اشوف ردة فعله على الچاي..بس هو ملامحه ما تغيرت
بقت عاديه
تنهدت اني و مشيت من عنده..فتت جوه و تلگتني تقيه بالممر و گالت

- ها لگيتي الصليب

هزيت راسي ب لا و جاوبتها بتنهيده

- لا

اجينا نصعد فوگ ..و احنا على الدرج انفتح باب الصالة و صاح محمد

- تقيه شو تعاي

اندارت عليه و گالت

- شتريد

ابتسم و گال بسخرية

- گعدي گبالي مشتاگ اشوف شورابچ

كتمت ضحكتي و اني اباوع ل تقيه الي عيونها گامت تذب نار و شرار..ضربت الگاع برجلها و گالت من بين سنونها

- شگد اكرهك..غثيث

- على اساس اني الي احبچ..دطيري
و اني صحتلچ لأن ردتچ تكويلي قميصي..و الا مو متعطل على شوفت چهرتچ

- تنجاز ما عليه

مع ما حچتها دخل سيد و هو شايل گلاص الچاي
ما ادري ليش ابتسمت و اني اباوع للگلاص الي شاربه منه
يعني طعمه زين..و الا ما شرب منه رشفة

- شبيكم ؟

حچاها بتساؤل و گبل گال محمد

- گلتلها اكويلي قميصي و ما تقبل

باوع ل تقيه و گال

- ليش ما تكوينو !

خلت ايدها على خصرها و گالت و عيونها تغورق

- خلي يطلب مني بأسلوب حلو و اني اكوي
بس من يقلد و يعيب عليه ما اكوي لو اطگ براسو نخلة

- لا تصدگها سيد..ترا طلبت منها بأسلوب و حتى ناز چانت شاهده

حچاها و باوع هو و سيد عليه..إني استحيت من نظرات محمد و هو يريدني أكد على كلامه
باوعت ل تقيه الي رفعتلي تك حاجب
گلت و اني اباوع ل تقيه

- هو قلد عليها..و طلب منها بس بطريقة مستفزه

زفر محمد و باوعلي برفعة حاجب  باوعت لسيد الي يستمع باهتمام ..وراها باوع ل محمد و گال

- محمد حبل الچذب گصير

حچاها و مشى ناحية الدرج من وصل يمنا انطى الگلاص ل تقيه ورا ما شرب رشفة منه..
و كمل طريقة لفوگ

باوعت اله الا ان اختفى من گدام عيني
انداريت ل تقيه الي گالت

- ادوي الگلاص و اجيچ

هزيت راسي ب اي..و هي نزلت للمطبخ
و اني اجيت اصعد فوگ بس وگفت بمكاني من سمعت محمد گال

- عود ردتچ عون..طلعتي فرعون
عود اكيد توگفين وي تقيه صديقتچ

انداريت عليه و گلت

- اني وي الحق..لو الحق وياك چان وگفت وياك مو وياها

حچيت كلمتي و كملت طريقي و رحت للغرفة
شوية و فاتت تقيه
گعدنا شوية سولفنا..و وراها كل وحده راحت لفراشها..

الصبح من گعدت البيت چان داخل حالة انذار..اليوم يروحون يخطبون أحلام للسيد
الي نزل الصبح و احسه شوية و ينفجر من العصبيه
عبالك عنده مصيبه و واگعه على راسه مو عبالك يريد يروح يخطب

مر اليوم على خير..و راحوا الإخوان و وياهم الحجيه
و سمعت من تقيه انهم ماخذين كم واحد من معارفهم علمود الخطبه
راحوا ورا العشا..و رجعوا بال١٠

اول ما فاتت الحجيه طگتها هلهوله..اني ابتسمت من شفت فرحتها و هي تحچيلنا شلون وافقوا

باوعت ل تقيه الي گالت بتعجب

- يعني بهالسرعة گطعوا مهر !!

- اي يا يمه..ابوها گال نگطع هسا و سيد وافق

مدت تقيه بوزها و گالت بقهر

- عود شنو هاي..ردت اكون موجوده

- بالعرس يمه عود تكونين موجوده

- تقصدين بالخطوبه

ضحكت الحجيه و گالت

- يمه اخوچ مستعجل..گال ماكو خطوبة..گطع مهر و عرس بس

- هااي شنو جده..ترا والله ما يصير يعني ماكو خطوبة

- لا

جاوبتها الحجيه باختصار..و هي تخلي ايد على ايد و تزفر

اني چان دوري بس اباوع عليهن..و أفكر من خلال كلام الحجيه انو سيد مو راضي
او يمكن صاير شي يخليه يتصرف هيچ و ما يريد خطوبة

.

عبدلله..

ورا يومين من گطع المهر..رجعت العصر من المعمل
طبگت السيارة بالحوش و حدرت منها

زواجي من أحلام ما چان إلا ل ارضاء أمي..أني ما اشوف بأحلام الزوجه الي مناسبه ليه
بس هي قسمه و نصيب..
فتت من باب المطبخ و تفاجئت من لگيت أحلام و حنين گاعدات بالمطبخ وي البنات
وگعت عيني على ناز الي واگفه يم الكاونتر و هي مكتفه ايديها من شافتني تعدلت بوگفتها

سلمت على حنين الي ترحب و تسأل شلوني و شخباري
اما أحلام بس سلمت و سكتت..عبالك غريب عنها

بس ما الومها بعدها مو متعوده..شوية شوية تتعود على وجودي و كلامي وياها

- أحلام شلونچ ؟

رفعت راسها عليه و گالت بابتسامه

- الحمدلله..انت شلونك

- الحمدلله

استأذنت منهن و رحت للهول لگيت الحجيه تقرأ قرآن
صعدت لغرفتي و بدلت هدومي

دحگت لباب الكنتور و فتحتو و وگعت عيني على السلسله مالت ناز..اخذتها بيدي و اني مقرر ارجعها الها بس ما گاعد تصير فرصه
و اذا انطيتها ل تقيه..اكيد راح تگعد تسأل و هاي عبالك محقق كونان لازم تعرف شكو

ف قررت بس اشوفها وحدها اناوشها اياها

حدرت جوه و فتت للهول لگيت أمي مكمله قرايه
گعدت يمها و گعدت تسألني عن الشغل و اني اجاوبها

آخر شي گالتلي

- سيد اريد اسألك سؤال

- گولي يمه

- البنيه ناز شوكت تظل هين

انداريت عليها و گلت بانزعاج

- يمه شهل السؤال..

- وليدي لا تفهمني غلط..و الله اذا ما شالتها الگاع عيني تشيليها
بس يا يمه اقصد هي بنيه..و حرمه و انت تشوفها لا طبعها و لا تصرفاتها نفس تصرفاتنا..و فوگاها غريبه
اخاف الناس تگوم تحچي عليها و هي وحيده

- يمه كلام الناس ما يخلص

- اعرف ما يخلص..بس انت تعرف أكثر مني
احنا غربه عنها..و انتوا شباب اسم الله عليكم..و الناس ما ترحم تگوم اطلع اشاعات و كلام الله ما يرضى عليه

تأفتت و تعدلت بگعدتي..يمكن من جهة كلامي أمي صحيح
مرات أفكر بيني و بين نفسي..انو ظلتها هين مو راهمه
بس ارجع و اگول..بنيه و ما يصير نعوفها وحدها
و خصوصاً كلام ابوها المرحوم..بعدو يرن بأذني
من راح و اخذني على جهة
گال بعضمة السانو بنتي امانه عندكم لحد ما ارجع

و هو راح و ما رجع

امي كملت كلامها و اني انداريت عليها

- اني حچيت وي اخوك عمار..و انت تعرفها هو شوية الله يسلمه ما ينطي تفاهم
عصب و يگول خوما نطردها ؟ البنيه لو عدها أحد چان أكيد راحتلو

- و اني نفس كلام عمار يمه..أبوها وصاني وگال لحد ما ارجع بنتي أمانه عدكم..يمه فكري بيها شوية
الناس حاچيه حاچيه ماكو مفر من هالشي..و كلامهم لا يأخر و لا يقدم
و الزلمه لو ما متأكد من و شاف تعاملنا وياهم ما چان وثق بينا و گال هذا كلامو

- زين أبوها شوكت يطلع..يعني ما عندو احد يبريه ! لو يگدر يسوي شي

- يمه الزلمه مات

لطمت على صدرها و گالت

- صخام الصخمني شوكت

گعدت احچيلها الي وصلني..و هي گبل گعدت تبچي و تتحسر على حالة البنيه
و اني حسيت جبل و انزاح عني..عمري ما ظميت عليها شي
و احس الخبر من چنت ظامو شي و كاتم على صدري

اندارت عليه و گالت

- البنيه ما تعرف..اوف يا يمه و هي تنتظر اتصال لو خبر من ابوها و هو صار جوه التراب

امي نطقت كلامها..و ما حسينا الا على هبطه يم الباب
و صياح تقيه تنادي بأسمي و بإسم الحجيه

حفزت من مكاني و اول ما فتحت الباب صارت گدامي ناز واگع من على طولها و تقيه يمه و البنات

دنگت يمها و أمي تحاول تگعدها..ضربتها على الخفيف على وجهها الي صار قطعة ثلج

تقيه گامت تبچي و هي تگول

- سمعتكم تحچون عن ابوها

أحلام و حنين واگفات يمنا و بس يدحگن..أمي گالت شيلها فوتها للهول
و اني شلتها و چانت عبالك ريشة..لشتها ناعمه طببتها للهول و خليتها على القنفة
وگعدت يمها تقيه و رشفت على وجهها شوية مي
أمي اندارت عليه و گالت

- نوديها للطبيب

جيت اجاوبها و اگول اي..بس هي قاطعتنا من بدت تتحرك
فجاة جفلت و گعدت على حيلها..و صار بيها مثل ما صار ذاك اليوم بالهول من عرفت انو ابوها مسجون

انصدمت و اني اشوف ايديها ترجف و عيونها شاخصه و نفسها ثگيل..
رجعت چم خطوة ليورا و اني ادحگ ل تصرفاتها ..گالتلي تقيه هاي نوبة هلع تظل تجيها

حسيت روحها راح تطلع من صدرها و هي تريد تاخذ نفس..أمي تمسح على وجهها و تفركلها ايديها و هي ما هدأت بالعكس زادت و هي تبچي بس بدون صوت دموعها تحدر على خدها و هي تشهگ تريد نفس

ما ادري شصار بيه و اني اشوفها بهاي الحالة..بس انقهرت عليها
حسيتها راح تموت بين ايدينا و احنا ما سوينا شي..الاعمار بيد الله
بس مرات الشخص يريد يسوي اي شي بس بسبيل انو تساعد

خليت ايدي على چتف تقيه حتى تسويلي مجال اعبر
هي وخرت و اني گعدت بصفها و امي دحگت عليه و تستغيث بعيونها..
خليت ايدي على راسها و هي زادت بالبچي و گمت اقرأ عليها..اية الكرسي و تبتعتها ب آيات السكينه
شوية شوية بدت تهدأ..امي اخذتها لحظنها و هي و هي دفنت وجهها بصدر أمي الي نزلت دموعها على حالها..

گمت على حيلي و طلعت بس گبلها دحگت ل حنين الي مكتفه ايديها لصدرها و ادحگ ل ناز بنظرات ما عرفت افسرهن

طلعت من الهول..و اني امسح على وجهي و استغفر ربي
الله يعينها..شي صعب و حيل الي گاعد تعيشه
ما اگول غير انو رب العالمين ينزل الصبر على گلبها

بالليل..وكت العشا ظلت حنين و أحلام عدنا..و جه اخوهم ثامر

التمينا كلنا على العشا..ثامر من صغرة تعود يجي علينا عكس اخوه الچبير طلال
و نعتبره واحد من اهل البيت.. دحگت من گعدت تقيه اخر وحده يم فاطمه و ما لگيت ناز وياها

ما گدرت اسألها..ف ظليت ساكت
كملت عشا و گمت للمغسله تا اغسل..و اني واگف يمها
نزلت ناز من الدرج..نشفت ايدي بالمنشفة و تركتها و اني ادحگ ل ناز

وجهها شاحب و شعرها لامتو بذيل حصان..انفها احمر
و تطوطح و هي تمشي..ما انتبهت عليه اتجهت صوب المطبخ
سمعت صوت باب المطبخ ينفتح و اني لحگتها
طلعت برا و اتجهت ورا البيت
جيت ارجع بس صوت بچيها الي ارتفع خلاني اگف بمكاني..غمضت عيوني و اني اسمعها تهذي و تبچي

تقدمت كم خطوة و اني المحها گاعده على الممشى و لامه رجليها لصدرها و تبچي

جريت حسرة و انداريت تا ارجع
بس لگيت محمد بوجهي..عگدت حاجبي و هو رفع تك حاجب و گال

- شبيك سيد

- ما بيه

جاوبتو باختصار و جيت اكمل طريقي بس هو گضبني من ايدي و خلاني ادحگلو و گال بهدوء

- سيد ترا انت خاطب

- سبحان الله..ما چنت ادري

حچيتها باستهزاء و رجعت تقربت عليه و اني اگول بنبرة غضب خافته

- إذا اني خاطب ف انت ماكو شي يربطك بيها حتى تجي تحچي هذا الحچي..البنيه درت ابوها  توفى و جيت اشوف شبيها
و عفتها بحالها تفرغ حزنها

هديتو و هو نزل راسو و اني كملت

- امشي عوفها بحالها..البيها كافيها

هز راسو ب اي..و مشيت و هو لحگني
و گبل لا افوت للبيت وگفني و گال

- سيد ترا والله مو قصدي

- اعرف مو قصدك محمد

تنهدت و رجعت احچي بصوت خافت و اني أرفع ايدي و احطها على كتفو

- محمد الزم حدودك..البنيه أمانة عدنا
الا أن يفرجها ربك عليها.. وانت ما لازم تنسى هالشي

هز راسو ب أي و اني فتت و هو فات ورايه..

.

محمد..

ورا اسبوع تقريباً..واگف يم الدرج و اني كل شوية ادحگ بلچي تنزل تقيه و اعرف اخبار ناز منها

من عرفت بسالفة وفاة ابوها صارت ما تبين
اربعة و عشرين ساعة فوگ بغرفة تقيه..ما تطلع و إذا طلعت تروح ورا البيت تگعد برفقة تقيه

طول الأيام احاول بس المحها..ما ادري  شبيه بس صابني شوگ اشوفها

بعد اسبوع عرس ياسر..و البيت مگلوب گلب عليه
و فوگاها فاجئنا سيد بقرارو انو يريد  يقدم العرس..يعني راح يتزوج هو و ياسر بنفس اليوم..الكل انصدم من قرارو بس هو أصر على هالشي
الوحيده الي كيفت و فرحت هي جدتي..تگول ازوج اثنين  بيوم واحد و فرحتي تكبر

حدرت تقيه من فوگ و اني گبل گمزت گدامها و هي عبالك شافت جني جفلت و صاحت بوجهي
خزرتني و جاي تمشي ناحية المطبخ بس اني كمشتها من زندها و گلت

- صبري صبري..اريد اسألچ سؤال

اندارت عليه و تفت ايدها و گالت

- شبيك

تحمحمت و گلت

- شلونها ناز

گبل عگدت حاجبها و گالت

- ليش؟

- هيچ أسأل

كتفت ايديها چدام صدرها و گالت

- شلونها يعني ؟ بس تبچي و تاكل روحها من القهر

- الله يساعدها..الي جر الها مو قليل

جتي تكمل طريقها بس اني وگفتها و گلت

- تقيه ديري بالچ عليها

- عجل اني شمسويه ؟ مخليتها بعيوني
لا توصيني عليها

حچتها برود و شكلها ضاجت مني و من كلامي
ابتسمت و اني احچي بشقة..بس بالحقيقه هو كلام ظامو بگلبي من فترة

- تقيه شمسويلچ اني و هيچ تكرهيني ! بس لا عمود اقلد على شورابچ

سكتت و بس دحگتلي و اني رجعت  اكمل كلامي

- توبة بعد اقلد عليچ اعتذر

- ها

تقربت منها و اني اقرصها من خدها بلطف..مثل گبل و هي تگوم تصرخ بوجهي
بس ما دريت انو الأشخاص يتغيرون..مشاعرهم
تصرفاتهم و كلشي بيهم

من قرصتها و وخرت ايدي صار وجهها احمر..استحت مني و نزلت راسها و مشت من يمي..و اني بضحكه گلتلها

- يولي شو ما صحتلي و لميتي العرب علينا

ما ردت عليه و اني هزيت راسي و فتت لغرفتي..

بالليل طلعت من الغرفة اشرب مي..لگيت گلوب المطبخ مشتغل من فتت لگيت تقيه گاعده
و هي مخليه ايدها جوه خدها و صافنه
ردت  اجفلها
وگفت وراها و دنگت و گلت

- شگاعد تسوين

جفلت و هي تصيح و اني رجعت ليورا خربان من الضحك على شكلها..دحگتلها و هي حاطه ايدها على گلبها و ادردم

تقربت و صرت گدامها و گلت

- جبانه

- انچب

حچتها و هي ترجع ليورا..و عيونها غورقت اني مسحت ضحكتي و گلت بنبرة جديه

- اسف ما عبالي راح تجفلين هيچ

شو بس حچيت هيچ..هي انفجرت من البچي و حطت ايدها على وجهها
بللت شفتي و حطيت ايدي على چتفها بس هي وخرتها بعصبيه و گالت

- وخر عني..انت الا تموتني تا ترتاح

- شبيچ تقيه..يعني ما متعوده على الشقة

رفعت راسها عليه و گالت

- لا..بطل سخافتك هاي انت مو جاهل

تخصرت  و گلت

- عيني يا النازكه شبيچ !
شو صرنا ما نعجب احد

اندارت للسنگ و غسلت وجهها
و اني مشيت ناحيتها و صرت وراها و گلت

- تقيه شبيچ..انتي ما گاعد تبچيت علمود جفلتچ موو !

التفتت و صارت مقابيلي.. وجهها صار مقابل وجهي و هي صار احمر رافعتو
و الا هي تصل ل چتفي

بلعت ريگها و اني صفنت بوجهها..عيونها العسليه حواليهن احمر بسبب البچي
هي من شافتني صافن بوجهها گالت

- شبيك اول مرة تشوفني

- لا شايفچ..بس ما دريت انچ حلوه

يمكن لو ما كامشها من زندها تا ماتنهزم چان وگعت
حسيت برجفة ايدها..و عيونها الي گامت تتحرك حتى ما ادحگ عليه

حسيت الوضع الي صار مو راهم..گلت هسا تگوم تفكر أفكار  مو مناسبه ف كملت كلامي بضحكه معتاده

- بس شواربچ مخربه وجهچ

حچيت هيچ..و هي تلت ايدها من ايدي و دحگتلي بخزرة و مشت و عافتني بس گبلها گالت

- سخافة و غثاثة العالم كلها بيك

طلعت من المطبخ..و اني ظليت واگف بمكاني
هزيت راسي و اني اطلع صورتها من بالي گبل لا ارجع لغرفتي و اگول..محمد تقيه اختك
مثل ما حذرك سيد من انو تتقرب ل ناز
همين حذر نفسك لا تتقرب من تقيه

.

ناز..

متمدده على السرير و اني اسمع الهوسه الي جوه
اليوم عرس ياسر و سيد عبدلله..كلهم تحظروا علمود العرس
هما ما راح يسوون عرس مثل ما متعارف عليه
انما الزلم بقاعة و يكون عدهم مثل  المولد
هذا الي حچته الي تقيه و ما عرفت شنو قصدها
بس اخر شي گالتلي " مثل باب الحارة " حاولت افهم شنو و هي جزعت مني
و بالاخير گالت

لأن عبدلله مداح..ما راح يسوون عرس مثل الاعراس الباقيه..النسوان اي بس الزلم راح يكون مديح بالقاعة الي راح يگعدون بيها

و اني فهمت قصدها..و هي زفرت براحه لأن افتهمت
و اخيراً

اني قررت ما انزل جوه..حزني على بابا بعده بقلبي
هملت نفسي و صحتي..من سمعت الخبر الي نزل على گلبي مثل الصاعقة

ابچي و اني اترجاه يرجع..بس الميت شيرجعه !
الكل تفهم شعوري..انو ما اريد احظر العرس
لان الي مريت بي مو شوية..حاولت اتذكر رقم ماما
اريد إتصل عليها..اريدها تجي  تاخذني
خوما ابقى هنا..بنص الغرب
بس ما لگيت شي يوصلني الها
من اريد انام أحظن ملابس بابا و اغفي..احس روحي تريد تطلع بأي لحظه
كلشي ما اريد..بس احد من اهلي يمي..

صح بيت حجي ممدوح محد مقصر وياي بشي..حتى قبل فترة اشترت الي فاطمه ملابس
بس يبقى شي اسمه غربه..ناس ما تربطني بيهم اي صلة قرابه

انفتح الباب و دخلت تقيه و هي متوتره..چانت لابسه فستان زهري طويل باكمام طويله فضفاضه و ذابه شال على راسها..ملامحها الناعمه مخلي الهن مكياج خفيف راهم لوجها و طلتها

وگفت گدام المرايه و هي تعدل بالشال
تعدلت بگعدتي و گلتلها

- صاير شي ؟

التفتت الي و گالت بتعلثم

- هاا لا ماكو شي

حسيتها نكرت بكلامها..بس ما حبيت اضغط عليها
هي لو تريد تحچي چان حچت
اخذت تلفونها و طلعت و اني ورا شوية گمت اريد اروح للحمام..چان اكو حمام بالطابق الثاني

اول ما فتحت الباب صار گدامي سيد..و هو يعدل بالشمغ مالته گدام مراية طويله بالممر
من شافني بقى يباوعلي ثواني قبل لا يرجع يباوع للمراية
استحيت انو شفته و ما باركت اله..تقدمت بخطوات بطيئه و گلت

- مبروك..شايف الخير

- الله يبارك بيچ

هزيت راسي من جاوبني بنبرة خافته
نسيت اني ليش طلعت من الغرفة..يمكن من شدة توتري و اني احچي وياه
رجعت للغرفة و گعدت على الچربايه مالتي
سحبت الصورة الي چانت تجمعني اني و بابا و ماما
برفقة سرمد..چانت الصورة بالمستشفى
سرمد على السرير مالته و اني حاظنته من اليمنى و بابا على الجهة الأخرى و ماما بصفي
چانت اخر صورة ناخذها اله

اتذكر اخذنها بمناسبه اخر جرعة كيميائيه يأخذنا..بعد ما گالوا الأطباء انو المرض انتهى تماماً

بس ورا يومين..يومين بس
تخربط و نقلناه للمستشفى و هناك توفى..

نزلت دموعي على الصوره و اني اقربها لحظني..مددت و اني حاظنتها و ابچي من شوقي الهم
ابچي سرمد و بابا..الي راحوا و تركوني..و ابچي امي
الي الضروف خلتها تتركني و اني ب أعز حاجتي الها..

ما ادري شلون اخذني النوم..و نمت
نمت بس  مو براحة..الكوابيس من كل جهة
و أصوات العرس نخرت عقلي..

بالليل گعدت بوقت متأخر..باوعت ل تقيه الي دتنشف شعرها بالسشوار ابتسمتلي و گالت

- صح النوم

- يصح بدنچ

جاوبتها و اني امسح وجهي من آثار النوم
و رجعت سألتها

- خلص العرس ؟

- الساعة بال١

- اووف هلگد نمت..من ال٥ العصر

- گعدتچ مرتين تا تعشين بس  ما گعدتي

- ما ادري بنفسي

- خليت الچ عشا بالميكرويف

- تعبتچ

- ما سويت شي

حچتها..و هي تتمدد بمكانها و باعتذار گالت

- ناز..إذا حبيتي حدري و تعشي
و الله نعسانه و ميته تعب و إلا  چان حدرت وياچ

- حياتي نامي..اني اخلي اكل الي

- البيت بيتچ..تصبحين على خير

- و انتي من اهله

حچيتها و گمت على حيلي..چنت ميته من الجوع
من الظهر ما خليت لگمه بحلگي..طلعت من الغرفة بس قبلها طفيت الضو
و نزلت جوه
البيت هدوء و لا عبالك چان من ساعات يعج بالناس و الاصوات العاليه
باوعت للهول الي بابه مفتوح شوية
لگيت ناس نايمه بي..ما عرفت منو

دخلت للمطبخ و فتحت الميكرويف لگيت فخذ دجاج و صاج..معقوله سوو عشا العرس هذا ؟

ما درت بال سخنتهن و گعدت على الطاوله و توي اجيت اخلي لگمه بحلگي فات محمد
نزلت الگمه  و هو بسرعة گال

- كملي اكلچ..بالعافيه

لو بغير موقف چان استحيت..بس هسا جوعانه
و الجوع كافر..گمت اكل و اني احس  نظراته عليه
ورا لحظات گال

- تقيه دزتلچ على الصاج..گالت اخاف ما تاكل دليميه
لو ام العراوي

- هاا

ضحك على فهواتي..و گال و هو يتقرب للطاوله

- يعني أكل دسم..ثريد

- هاا ثريد

هز راسه ب اي و گال بابتسامه

- اي خبز مبلل

عگدت حاجبي و اني ابتسم و هو اردف بضحكه

- عندي صديق من بغداد اقلد عليه و اگول اله انتوا تسمون الثريد خبز مبلل

- لا عاد مو لهاي الدرجه

حچيت باعتراض و هو شو سحب الكرسي و گعد و گال

- لا ترا نتشاقه..كلنا اخوان و اهل
و اهل بغداد على راسي من فوگ..كلهم زلم ينشد بيهم الظهر

- تسلم

جاوبته بنبرة خافته و ابتسامه ناعمه على وجهي
بس فجاة انمحت ابتسامتي من رفعت راسي ل سيد الي دخل..باوعت ل محمد يباوع ل سيد بنظرات ما فهمتها
و هو الاخر يرمقه بنفس النظره..بقيت حايره هذوله شبيهم
حسبالك واحد يريد ياكل الآخر بعيونه
بس بقى سؤال ابالي..سيد اليوم مو عريس
شعنده نازل هنا؟

.

السلام عليكم شلونكم حبايب قلبي

ان شاء الله الكل بخير

اتمنى البارت عجبكم ❤

شنو ارائكم و توقعاتكم

و يا ترى شبيها تقيه من فاتت للغرفة متوتره ؟

و محمد ؟ شنو رائيكم بي و بتصرفاته ناحية ناز و تقيه ؟

و كلام الحجيه بخصوص بقاء ناز عدهم ؟

و بس والله 😂❤ معندي سؤال بعد

و نلتقي على خير احبتي