الفصل الثالث
تجلس اعتماد ببيت شقيقتها سعاد تتذمر وتشتكي لها من تعلق وحيدها بعتاب وحبه لها
سعاد : هتلاقيها سهونة زي امها ومسهوكة
اعتماد : ايوة ياختي تحسي انه مش شايف غيرها في الدنيا وكتير قلتله بلاش واتخانقت معاه ولا في فايدة
سعاد بمكر : علشان هبلة انتي لازم تطفشيها من غير هو ما ياخد باله تضربي من تحت لتحت
لتتدخل ابنة سعاد بالحوار قائلة :
نهلة : صح يا خالتي سامح عنيد وميجيش بالشد
انتي تلعبي من تحت لتحت قدام سامح تبيني انك مبسوطة ومستنيه جوازه وبعيد عنه تعامليها معاملة تطفيش وهو مرة هيصدقها ومرة هيبدأ يشك في كلامها لحد ما يزهق منها
اعتماد : يعني اعمل ايه
سعاد : تروحي تشتري هدية وتديهاله وتقوليله قدمها لعروستك يومين وتديله فلوس وتقوليله خدها فسحها
علشان لما هي تشتكي منك ميصدقش
انتهت عتاب من عملها بالمشفي والذي تعتبره عقابا فالامكانيات معدومة كما عدمت الضمائر.. ترى ان مهنة الطب تلك المهنة المقدسة تحولت الي تجارة.. احتكار من قبل بعض الاطباء.. يتلاعبون بمصائر الناس وحياتهم من اجل المكاسب المادية لتخرج من العمل منهكة.. لتجد فارس احلامها واقفا امامها
عتاب : ياااه يا سامح بجد كان نفسي النهاردة تجيلي
سامح : احنا في الخدمة في اي وقت
عتاب : مرحتش السنتر النهاردة ليه
سامح : محمد فاتح السنتر من بدري ولما عرف انك وحشاني قال روح انت وبوسلي عتاب من هنا ومن هنا ومن هنا
عتاب : اتأدب يا باشمهندس بدل ما اتصل علي خالتي وافتن عليك
سامح : مش هتصدقي اصلا ان خالتك قالتلي باليل خد عتاب واتفسحو وادتني فلوس كمان
عتاب : يبقي بتخطط تقتلني او في مجموعة من المسلحين هيخطفوني
سامح : تعالي بس نمشي من قدام المستشفي
انطلق عتاب وسامح ناحية احدي المطاعم التي طالما اختبئا بها سويا عن العيون
عتاب : بجد مش مصدقة ان والدتك بدأت تتغير الحمد لله كده مفيش حاجة ناقصه
سامح : انا كمان مبحبش ازعلها وكنت بضايق من طريقتها بس الحمد لله شكلها هتحلو يا توته
عتاب : ان شاء الله.. يلا بقي انا جعانه ومفطرتش
سامح : كام مرة يا عتاب قلتلك اهتمي بأكلك الشغل مش هيطير.. ممنوع تخرجي من غير فطار
عتاب : حاضر
امسك سامح يدها واخرج من جيبه خاتما ذهبيا بسيطا مطبوع بداخله(عتابي)
عتاب تصدق انا الصبح كنت بحلم بنفس اللي حصل ده بالظبط.. بس الحقيقة اجمل كتييير
قبل سامح يدها برقة مرات عديدة لتبعد عتاب يدها بخجل ويبتسم هو بسعادة
سامح : الخاتم ده ممنوع يتخلع من ايدك ابدا
عتاب : عمري ما هخلعه ابدا
ببيت عتاب تجلس والدتها تتحدث الي ابنتها الكبري شهد الأكبر بين شقيقاتها والأجمل والاشرس حاليا ففيما مضي كانت كالنسمة.. لا يسمع صوتها بالبيت.. حتي تزوجت من احد شباب قريتها في بادئ الامر كانت حياتها وردية.. حتي اكتشفت طباعه السيئة.. كان يضربها ويهينها ومرات كان يعايرها بعدم وجود اب لهن او احد يقف بوجهه الي ان علم حمزة زوج اختها وتؤامها (شمس) فعلم وقتها طليق شهد ان لديهم بالفعل اخ وسند واستطاع حمزة اجباره علي طلاقها ومنذ ذلك الوقت تبدلت كليا..
ثم سافرت الي دبي للعمل ممرضة باحدي المستشفيات هناك وما لبثت ان لفتت نظر احد الاثرياء الموجودين هناك لتتزوجه وتنجب منه طفليها وليد وواثق
وهذا الشئ ازعج خالتها اعتماد كثيرا فهي تري ان بنات اختها ماكرات يوقعن الاثرياء العرب بشباكهن وعتاب يجب ان تفعل مثلهن وتبتعد عن سامح
بالمطعم نجد سامح يبدو عليه الضيق وعتاب تحاول مراضاته
عتاب : انا قلت ايه غلط وقفشت فجأة كده
سامح : لا والله مش عارفه بجد.. الولد اللي جابلنا الأكل عينه هتطلع عليكي تقومي حضرتك ضحكاله وقايلاله تسلم ايدك
عتاب : سامح انت بتهزر.. ده طبيعي ان اشكر الولد
سامح : لا مش طبيعي في راجل قاعد قدامك هو اللي يرد.. مش كفاية سي حمزة اللي بقالك ساعه بتمدحي فيه
عتاب : لا ده كده عبط انت هتغير من حمزة ده انا بعتبره اخويا الكبير مش بس جوز شمس اختي
سامح بغيرة زائدة : اه ويبقي ابن عم المحروس اللي كان عاوز يتجوزك من سنتين
مش كان اسمه ركان يا دكتورة
عتاب بعتاب لحبيبها الغاضب: مش فاكرة اسمه لاني مش فارق معايا وانت عارف اني رفضت من غير حتي ما اقولك مع اننا وقتها مكناش اتخطبنا رسمي.. الغيرة الزيادة دي تبقي في محلها لما تلاقيني مهتمه بحد غيرك او بدلع بالعكس ده انا عاملة زي العسكري الاخضر وبطفش اي حد يقرب مني
سامح : وانا اعمل ايه يا عتاب انتي بتقتليني بجمالك ونظرات الناس ليكي.. واحتمال كبير البسك نقاب بعد الجواز
عتاب : طيب اضحك الاول علشان شكلك عاوز تبوظ علينا الخروجة
سامح لا يا حبيبتي مش هقدر ابوظ الخروجة ده احنا لسه في اولها
ببيت ذكية تجلس وبجانبها والدتها وشقيقها الاكبر يحاول اقناعها بالعريس الذي تقدم لخطبتها
والدة ذكية وتدعى فضيلة
فضيلة : يا بنتي ربنا يهديكي احنا ما صدقنا يتقدملك حد عدل.. الواد مدرس انجليزي وحلو واهله مبسوطين وعندهم ملك وفلوس
ذكية بدموع : وارمل وعنده طفلين نسيتي اهم نقطة.. ومش مو افقه وعارفة اني معاقه ولازم ارضي بقليلي بس بردة مش موافقه
شقيق ذكية بغضب : متقوليش علي نفسك كده انتي ست البنات مافي مليون بنت معندهمش اعاقات وشكلهم يسد النفس وانت زي القمر ودكتورة وعارفه ربنا.. بلاش طمع واحمدي ربنا ولو عالعريس محدش هيجبرك علي حاجة وطول ما انا عايش امشي في الدنيا وقولي يا ارض اتهدي ما عليكي ادي
ذكية بابتسامة : ربنا يباركلي فيك يا عادل ثم قبلت يد والدتها
انا اسفه يا ماما مش قصدي ازعق بس انا تعبت من عقاب الناس ليا علي ذنب مش ذنبي
فضيلة : انا مش زعلانه منك.. انا زعلانه عليكي يا ضنايا ربنا يسعدك ويستر عرضك يا بنتي ويباركلي فيكي وفي اخوكي
قاطع كلامهم صوت الجرس ليذهب عادل ليفتح فيجد بالباب شاب غريب لا يعلم هويته
عادل بأدب : اهلا يا استاذ خير
ماجد : السلام عليكم ده بيت الدكتورة ذكية المسيري
عادل : ايوة بيتها حضرتك زميلها
ماجد : لا انا بحبها وجاي اطلب ايدها
نظر عادل اليه بدهشة : طيب اتفضل.. ثم نادي علي والدته بصوت مرتفع
يا ام عادل اعملي شاي وجهزي الغدا للاستاذ... معلش متشرفتش باسمك
ماجد.. اسمي ماجد دكتور وزميل دكتورة ذكية
عادل بسعادة : اهلا اهلا يا دكتور.. بس معلش يعني انت جاي لوحدك ليه
ماجد بحرج : انا اهلي معترضين علي ارتباطي انا وذكيه وهي رافضة تتكلم معايا وقالتلي طالما اهلي رافضين يبقي خلاص
عادل : والله يا بني اختي عندها حق رغم ان صراحتك كبرتك في نظري.. بس اهلك اهم يعني متزعلش مني لو اتجوزتها مش هترتاحو واختي طيبة وملهاش في المشاكل
ماجد : انا عارف الكلام ده.. انا بس هطلب منك تديني فرصة اعتبرني خطيبها ومسافر اديني فرصة سنه اكون نفسي هشتغل ليل نهار وهحاول اقنعهم يوافقو بس تديني كلمة انكم مش هتوافقو علي اي عريس يتقدملها
عادل : بس انت كده هتوقف حالها جنبك
ماجد : لا مش هوقف حالها.. لو جالها حد افضل مني وهي وافقت اعتبروني مش موجود لكن بلاش تجبرَها علي حاجة
عادل بتعاطف : خلاص اتوكل عالله وانا ميهمنيش غير سعادة اختي
احضرت والدة ذكية الشاي لتنظر ناحية عادل باستفهام
عادل : الدكتور ماجد خطيب ذكية يا أمه
نقطعكم بس شوية ركزوا معايا اعملوا فولو ل الواتباد اللي فوق لانه سابق جروبات الفيس بحلقة وهيفضل كدة لحد اخر القصة ف تابعوا الواتباد وكمان القصة هتنزل قريب كاملة في تطبيق رواياتك كاااااملة نزلوا التطبيق واعملوا فولو على اكونت رودينا رضا ابحثوا عنه وهتلاقوه متنسوش تقيموا الرواية بنجوم