ازمة ضمير ... البارت السابع والاربعون
«للكاتبه روزايه»
مُره ... مُره
والمرارة تزيد للما يلگة فيّ
وينتچي اعلة الشيب عمره
كون أذب ثوب الحزن وانة بشبابي
والحزن عالخد أسطره .
...
ثريا... هاي الدنيا ماتعرف شنو معني الرحمه من يوم الي نجي للدنيا ماكو مصيبه ماتركض وراك وماتعوفك الا تهدك للكاع وماتخليك ترجع مثل قبل حتلو كدرت تتغلب على هاي المصائب وكفت على رجليك يبقه داخلك مكسور
شنو هاي الدنيا والحياة الي ماخلت شي علينه واخذت كلشي حلو عدنه...
شذره بنيه مسالمه عايشه حياة طبيعيه ويه امهه الي ماتملك بس هاي البنيه ادحك على ضحكتهه وتضحك وياهه بيوم الي تتالم شذره امهه تتالم اكثر منهه...
شذره لاحهه شرار اللعنه الي محاوطه اخوتي من الاول اتذكر كلام امهه من خطبناهه كالت بنتي فقيره وصغيره افرح يتزوجهه فاروق تتربى على ايدو بس اخوتج ماعدهم حظ وخاف بنتي هم تتاذى...
جنت كاعده يم راس ام شذره بالطوارئ وكلساع تريد تكوم ولازمتهه كوه ضغطهه مرتفع واهدي بيهه بس صوتهه خله حته الموجودين يسالون شكو...
فاروق وقع على عملية قلع الرحم لان مامتلاحكين عليهه الطفل طلع سلامات والام بين الحياة والموت...
بلحظه طلعت الدكتوره وكالت لازم يوقع زوجهه ع العملية لان واحد بالميه من النساء يصير بيهن هيج واغلبو سوء معالجه من قبل الطبيبات ...
تحملت المسوؤليه لطبيبتهه الخاصه الي المفروض تكون حاضره وهي اداوم بهاي المستشفى بس للاسف وحده تعبرهه ع الثانيه...
تهديدات فاروق ودخوله لغرفه المدير وكالو اذا صار شي ع زوجتي بسبب دكتوراتكم الفاشلات احسبو ماقامتلكم قيامه...
ما اعرف منين اتصلو ع طبيبه شاطره واجت تركض كالت المريضه تعبانه و٩٠٪ نفقدهه صاير ضغط ع الرحم قوي ومتماهلات بيهه الممرضات الي بصاله الولاده والدكتورات الخفر ...
شرحت الاسباب وكالت كدامنه حل واحد هو نشيل الرحم حته يتوقف النزف وماكان بيدو فاروق غير يوقع باسى ويستلم ابنو بحضنو ويوقع على حياة شذرتو..
طلع الطفل لحمه حمره وعلى فد صريخ وكانو يعلم بحال امو حته الطبيبه بنفسهه كالت هسه يوكف كلبو من الصريخ وحولو على طبيب اطفال وخلو بالخدج...
طلعت الطبيبه وكالت الي علينه سوينا والباقي يم رب العالمين مابيدكم غير الدعاء ...
يومين انه كاعده اباب الغرفه بس انريدهه تستفيق من البنج ماكو نامت والنومه نومه...
اكثر من طبيب اجه زارهه وكل واحد يصرح بشي حسب رايو كالو منطيهه جرعه بنج زايده والي كال اكو منهم طبيعه اجسامهم هيج ومايتحملون البنج...
بدت اعصابنه تتلف واخوي الجبل الي شالنه على كتفو طول هاي السنين بده ينهار وبينت علي ملامح الحزن والفقدان.....
ما ندري شنتحمل قيس يركض لنيران الي كلساع وتتخربط واخوتي واكفين بجانب فاروق وام شذره ابواجيهه خلت المابكلبه رحمه يحن..
جانت الساعه ب١١ بالليل وصار 5 ايام شذره فاقده الوعي لا دحكت ابنهه ولا فتحت عينهه طبت برجلهه وماطلعت بعد...
صدك ماخلو دكتور يعتب عليهم وصلت بفاروق شكو دكتور عندو خبره يركض يجيبو حتلو من غير مستشفى باوراق رسميه من القاضي صديقو ...
بس كلشي مقدر ورب العالمين كاتب لهذا الحد بعمر ٢٢ وتسقط ورقتهه وتسافر عن هاي الدنيا وتعوف وراهه طفل يعاني اليتم مثل مامر بابو...
ب١١ صار ركض الممرضات وطلع الدكتور يطبطب على كتف فاروق ويكلو البقيه بحياتك واللهمك الله الصبر والسلوان...
(اعتذر جدا عن ذكر المشاهد الحزينه ولا اكدر اطرق عن ايام الفاتحه لان اعرف تاذيتو بهذا البارت وانه من البارحه ابجي وهسه كوه كتبته لان مواعدتكم )
خلصت الفاتحه واذا جان الحزن مخيم على البيت هسه حاوطنه وغلفنه وكبت علينه اختفت الضحكه واختفه كلشي حلو...
ام شذره حال الضيم حالهه وتبجي الصخر نواعي الحجيه ماخلت عدنه دموع وكسرة اخوي الي مانكول غير الله يجبرو...
شنو السوا فاروق حته اتجازى هيج اكثر واحد ينطي من ايدو ومتكفل عوائل ايتام ومتعففه كل الي يسوي يكول صدقه تدفع البلاء ...
كدامنه مادحكنه فاروق نزلت دمعتو ولا نطق بحرف واحد جان مصدوم ما نعرف شيصير بالغرفه من يصعد لثاني يوم يله ينزل وصريخ ابنو وانه والحجيه الي نظل كاعدين ويا للصبح...
بين يوم وليله فاروق انكلب شعرو ابيض ماكو شعرايه سوده براسو لا نقاش ولاكلام واختفت هذيج الكعده الي بكعدتو يجمع اخوتي داير مدايرو ...
نيران تعبت من العلاج الكيماوي وبعد اربعين شذره خابرتنه جدتهه كالت اريد اخذهه للامام الحسين واكو علويه يسموهه شريفه بنت الامام الحسن عليهم السلام ...
سامعه بيهه عدهه كرامات اريد ازورهه بيت جدهه شيعه ويعرفون بالمزارات وبيومهه قيس اخذهن وام شذره اخذوهه كالو بلكي كلبهه يبرد...
ورا ايام بدت صحتهه تتحسن ووصفو طبيب بلبنان كالو زين وقيس حجزلهه ورا مادز التقارير وهم اوس الي اخذهه وراح ..
رجعت بعد اسبوعين صحتهه زينه وبدت تتشافى ع الاقل نفرح شويه الحمدلله من كدر يجبر خاطر واحد بينه...
ابن فاروق سما عمر ومتكفله بي الججيه ومرات انه اجي لو ام شذره دكوم تشيلو بس ادحكو تبجي ونخاف عليهه تتخربط...
هاي هي الحياة ولازم يجي يوم ونغادرهه ومانعرف احنه متهيئين لولا شذره توفت بالولاده والله يغفر الهه ويحسبلهه هذا الاجر ....
بعد مرور 8 اشهر...
الحال مثل ماهو ماكو شي جديد فارس سافر يكمل بورد حصل بعثه وانه اجيت يم اهلي ونتواصل بالتليفون...
فاروق تخرج وينتظر يرفعون اسمو ع التعين مانحس بي بالبيت من يرجع يبوس عموري ويشيلو شويه ويصعد لغرفتو ...
من نحتاجو نصيحو راحت هذيج الكعده والسوالف حته ماينطي رايو ولا يهتم ولايسال على احوالنه ...
يكابر وبس رب العباد وحدو يعلم شكو بكلبو اتذكرو من جنه زغار وماتت جدتي مانزلت دمعه من عندو بس بليل من اكعد ادحكو يبجي ..
وهسه اكيد كدامنه الجبل الشامخ بس بغرفتو العبد الضعيف يرثي زوجتو الراحله...
صادف رمضان وتوسلنه بفاروق يظل كاعد واجتمعنه ورا الفطور شويه تغير الجو بسالفه وضحكه ...
عموري مخليتو بحضني الي نسخه من شذره ماكو شي يشبه فاروق ابد كلو ع امو بس سمارو من ابو ...
الحجيه تهوسلو الناس من جابت جابت غنم وعجول...
واحنه من جبنه جبنه ذهب مشخول...
... يمه الويلاد راحو سفار لبغداد..
جابو رمان مفشك ... كلب العدو تفشك...
وهو ينطز بين اديه والضحكه مرسومه على وجهو الحلو ويلكح نفسو بحضن ابو واجي ادغدو وهو يظم راسو بركبة ابو...
كمنه يوميه ورا العشه نتعلل شويه وبدت الحياة ترجع طبيعيه خاصه من نسمع نيران حالتهه تحسنت...
ادهم نفس وضعو معدتو اذتو راجع مره كالولو عندك قرحه حسره عليه ياكل اذا مايتخربط...
انه راجعت جثير اطباء والكل يكول مابيج شي بس الله ماكاتبلب رزق
فارس التهه بالدراسه والسفر وابتعد عن كلام امو الي جانت بالطبه والطلعه دكلو البكدك خلفو ٤ وانته لسه ماكو ...
اروح لدوامي ارجع للبيت بين تنظيف وشغل حسيت نفسي رجعت ثريا القديمه الي كل همهه تخدم اخوتهه نسيت نفسي متزوجه ...
بيوم منهن جنه كاعدين ودك تليفون الحجيه بتهه امل جاوبتهه واسمع صوت امل تبجي ودكلهه راح يموت بنتي ع شنو عايشين ويا...
امل اطالب امهه تبيع حصتهه من اخوهه الشيخ ناصر وتكعد امل بيهه لان طلعت كلشي ماكو بس حته اطلك بتهه وترتاح...
بليل ورا الفطور فتحت الموضوع كدام فاروق وطلبت من عندو يخابر على ابن الشيخ ناصر وينطيهه حصتهه حته تبيعهه...
فاروق.. حجيه من احجي انه يكولون طمعان بحصتهه انتي احجي الكاع كاعج ..
الحجيه.. دكلي عليهم خلي احاجيهم خابرهم فاروق وحاجتهم الحجيه ماكال شي كالهه جده بعيني انه اشتريهه ابيش تريديهه...
اتفقت ويا الحجيه وكالهه ادزلج الفلوس بيد اخو يداوم ابغداد ورجعت خابرت ع بتهه وكالتلهه حطي بنتج وطلكيهه..
امل ضعيفه وتخاف بس تسال شلون وشلون وخاف حمويني يكتلوني وياخذون بنتي...
كالهه فاروق خلي اتجيب بتهه وتجي ولاتحجي بموضوع الطلاك بحجه جايه تزورج ومنا انه ارفع دعوه عليهم ويطلك...
وصدك ثاني يوم ب١٢ وصلت امل وياقوت نفس شكلهه بس متعوبه بالعربان بس بعدهه حلوه وصغيره ...
جان اوس بالخفاره ومايدري بيهه اجت لمن رجع تفاجىء بيهه بس سلم وصعد ...
بسرعه اشتغلت بمعامله الطلاك وايوب جيب المستمسكات ورجع التاييد يكول وضيفتو بس احوي الارامل والمطلقات...
خلال ايام اطلكت ياقوت واتنازلت عن كلشي بلاول بيت عمهه حجو بس من سمعو فاروق قاضي خافو وسكتو وياقوت لزمت عده ومحد يدحكهه خطيه ليل نهار محبوسه ...
بيوم من عدهن كاعدين ورا العشه وفاجانه قيس وهو يحجي كال فاروق انه اريد اخطب نيران ؟؟
كلنه تفاجانه من قرارو المفاجىء كالو فاروق اسالهه تقبل؟؟
قيس.. ماتقبل حجيت وياهه وتحسو عطف موحبا بيهه انت روح واحجي ويه جدهه ..
ايوب..انت روح احجي ويه جدهه يول وبرر موقفك احنه شكو نحجي نيابه عنك...
... ايوب جدهه ماطايقني ولايريد يدحكني حته من جنت اروح ادحكهه يسمعني الف كلمه وتاليتهه يطردني..
فاروق.. ماتروح وحدك كلنه اروح وياك ونحاجي اذا هي قابله جدهه مالو علاقه ..
ايوب.. شكد مدحك غمان بس مثلك مامدحك يول من الاول احويهه واخذهه كعدت تمد بركبتك وخليت البنيه وصلت هاي المواصيل...
قيس.. كافي ايوب مايوم حجيتلك حجايه بيهه خير..
... لا والله الحجي الي مايعجبك يصير مابي خير هاي الحقيقه لاتنكرهه يول...
لازم ينهون الكعده بعركه ويطلع واحك من عدهم زعلان وايوب يكول انه شكلت وزعل هو يدوس بالبطن ويكول شكلت...
ثاني يوم راحو لبيت جد نيران وماقبلت وحته جدهه مقنعهه وكايلتلو انه مو ضعيفه حته يشفق عليه بيوم الي اجيت واستنجدت بي ماعبرني وبيوم الي تمرضت وحس بيه راح اموت عطف عليه..
هذا مو حب هذا عطف ويريد يبري ضميرو وحته خاف اموت ويظل يانبو ورفضت رفض قاطع وذكرتو بكلامو الي كالو الهه انتي اختاريتي حياتج وطلعتي من البيت وطلكتي بدون علمي هم اطلعين من حياتي للابد...
رجع قيس خالي الوفاق وماحصل كلشي من نيران والحق وياهه ومحد يلومهه...
فاروق اتعين وصار قاضي بمحكمه بمنطقه معروفه ابغداد وصار كل وقتو دوام والحزن مخيم علي حته مره وحده جيرانه عدهه قضيه بالمحكمه كالت اخوج شكد حزين وشايل هموم الدنيا ع راسو...
دكول حته المحامي مالتي يخاف يطب ويحجي يكلي هدوءه يخوف كلنه المحامين نخاف من عندو وفعلا هدوء فاروق مخيف..
محد يدري هذا الهدوء اجه اثر صدمه وفراكو لزوجتو وحبيبتو مدى العمر...
انه متواصله ويه فارس وكال بعد يومين واجي وانه رحت للبيت اتحضرت لجيتو بس ياريت مارحت...
اجه فارس وتلكيتو بلاحضان وهو كذلك لليل ويفاجاني بقرارو وهو يكول ثريا صار سنه ونص ع زواجنه انه اريد طفل...
... بس انه مابيدي شي كدامك اراجع وماكو ماصار جثير ع زواجنه..
... لا ثريا اخذت تقاريرج وعرضتهن لاكثر من طبيب وكالو عدهه ضعف ونسبه العلاج قليله ...
انه قررت ياثريا راح اتزوج بنت خالي وانتي بكيفج تريدين تتقبلين الوضع تريدين تطلكين.....
يتببببع.... احبكم
البارت قصير لان مريضه وكوه كتبت واعتذر ع الحزن بس هاي قصتهم احنه نقراهه ومتاذين شحال هم الي مرو بيهه ثريا تسولف وتبجي والي يكولن حزينه وراح نترك القصه مابيدي شي اغير بيهه من الاول كتلكم حقيقيه
ثريا تطلب من عدكم الدعاء لفاروق الله يصبرو ويخلي ينسه....
هاي الاغنيه اهداء من متابعه عزيزه ...