رواية #بنات_نور
( حقيقة ممزوجة بلخيال )
للكاتب #أحمد_عبدالله
الرواية بلهجة الليبية
حلقة 15
🔥
طلع شوشو طول لحوش خوات نور
طق الباب
( للاسف احلام كانت في المحل ) اصلا حتي لو كانت هني متعرفاش
فتحتله ليلي
شوشو : السلام عليكم
ليلي : و عليكم السلام تفضل خوي
شوشو : اني شوشو صديق قمر ممكن ندخل
ليلي : 😕 تفضل
قعمز هوا و ليلي و بدي يهدرز
شوشو : اني جاي ننصح مش جاي نشهر بيها ابدا
ليلي : مني يلي تشهر بيها
شوشو : اختكم قمر
( علي نزلت ليال من الدروج تبي أمية )
ليال : السلام عليكم
( و قعدت تأشر بيدها لأختها و تقوللها مني هذا )
شوشو : اني جاي بنقوللكم ان اختكم قمر ....................
( قال ما كتب ربي عليها )
ليلي : انت شن تقول
ليال : لا لا انت جاي تشوه صورتها لا اكتر لا اقل
شوشو : و اذا تبؤ تتاكدوا تعالوا معاي توا
ليلي : وين
شوشو : للمكان يلي فيه اختكم
ليال : وين المكان
شوشو ؛ في شارع ذرة العتيق
ليلي : اوكي خلاص حنمشوا بروحنا
شوشو : اوكي اني نستادن
و طلع من الحوش
ليلي : توا شن الحل
ليال : تعالي وراي
علي طلعة ليال و ليلي من الحوش جت احلام
احلام : وين ان شاء الله خير
ليال : جانا واحد قال ان اختكم في كباريه
احلام : اه
وينه
ليلي : اهوا كيف ركب في السيارة
احلام : تراه
( دارت روحها تضحك هدا تي هذا مهبول ما تعدلوش عليه تعالوا تعالوا )
ليال :تي شن تعالوا يقولك اختنا في كباريه
احلام : 😂 تي لا
هذا واحد مهبول نعرفه اني و بعدين امس تعارك مع قمر
. ( المهم دخلتهم للحوش و قعدت تقنع فيهم ان هذا الشخص مهبول و مش بعقله و لان متعارك مع قمر فا يقول هكي و ما تعدلوش عليه و تم )
.
🔥 انتقال الي شوشو و قمر 🔥
رجع شوشو للمحل و قعد يستني في خوات قمر باش اول ما يجوا يجيب الفلوس و يحدفهم علي نور قدام خواتها و لكن للاسف خوات قمر ما جوش )
( 😡 وينهم الحيوانات )
صالح : شن وينه يلي بديره
شوشو : 😖 الكلاب
اي عارفين و راضيين مع ان وصلتني اخبار انهم ما يعرفوش
صالح : الباين قمر كسرت خشمك
ناديهالي خلي نصفي حساباتها
( حرقة قلب شوشو كانت كبيرة و بدأت لما خوات قمر ما جوش و ما صارش يلي في باله لكن حلف ان فضيحتها علي يديه )
قمر : تبيني أستاذ صالح
شوشو : 😡
صالح : قعمزي خلي انصفيلك احساباتك
( قعمزت و بدي يعد في أرباحي معاه لأني يلي كنت ماسكة كل شي في المحل و كانت لحظة حلوة هلبا و بدأت لما نذكر ان المكان الوسخ هذا معش بنشوفه )
خديت فلوسي و وقعت و اني طالعة جيت لصالح و شفتله
( مش اني معش بنخدم معاك يعني معش نشوفك او ننسي فضلك عليا فضلك عليا كبير كبير كبير و ان شاء الله يقدرني ربي و اردهولك و لو بعد حين )
صالح : ما تقوليش هكي ان نتمنالك حياة سعيدة و ان شاء الله تتهمني في حياتك الجاية
تلفتت لشوشو
قمر : شن مش رح تقولي بسلامة
طلع و خلاهم
صالح : مهم قمر تقدري تتفضلي و ياريت ما تنسيناش
قمر : اكيد اكيد
.
طلعت من الباب و هيا فرحانة انها مش رح ترجع للمكان هذا و خدت فلوسها صح فلوس حرام بس لازم تبدا بداية من الاول
.
وصلت الحوش هيا كيف نزلت من السيارة لقت فارس واقف قدام الباب
شافتله و خشت الحوش
.
فتحت الباب
لقيت احلام و ليال مقعمزين
قمر : بسم الله
ليال : هاي قمور رقصتي كريس اليوم
قمر : 😶 شني
ليال : في الكباريه
قمر : 🔥 ( حسيت زي قلبي معش يدق و بطني و وظائف جسمي وقفت كلها حتي لساني كاني ما عنديش لسان
قعدت تابتة ما تحركتش )
ليال : 😂😂 خيرك
قمر : 😕
( قاعدة مش فاهمة ليش تضحك لين و الحمد الله غمزتلي احلام و ضحكت )
احلام : ههها ههها قمر 😹🤭🥶 تبصر عليك
( نشوف في حركات احلام )
وليت نضحك زي المهبولة زيهم
علي نزلت ليلي
ليلي : روحتي من الكباريه قمر 😂
( معش عرفت تركيزي وقف هذا شني الكلام هل عرفوا و لا لا )
احلام : هههها يبصروا عليك خواتك توا بري غيري دبشك و بعدين نهدرزوا
.
ركبت للدار نغير في دبشي و للان قاعد الفار يلعب في دماغي منين عاملان جابوه
بألك عرفوا و لا بالك يبصروا
معش عارفة
.
احلام : خلاص عاد انتي وياها شن كباريه كباريه عيب راه حتي كان بتبصروا عليها لكن عيب هيا تصرف و تتعب برزق الحلال و انتم توا تقولوها كباريه
عيب راه
خلي نمشي نركب نشوفها
.
ليال : هادي خيرها 😂
ليلي : فوتيها فوتيها
احكيلي عليك انتي و زين
ليال : حقا ما حكيتلكش
ليلي : احكي
ليال : شفت احمد اليوم
ليلي : كذابة
ليال : اقسم بالله
ليلي : و خيرك واخدة الموضوع عادي
ليال : عادي عادي عادي و اكتر من عادي و كاني ما شفتاش
ليلي : كذابة ليال انتي قاعدة تحبه
ليال : لالا خلاص نسيت
ليلي ؛ باهي كلمتيه
ليال : لالا بس خاطري نعرف ليش
ليلي : اسمعي تعالي نكملوا كلامنا فوق
🔥 انتقال الي احلام 🔥
احلام : قمر
قمر : باهي يلي جيتي شن الكلام يلي يقولوا فيه خواتك
احلام : مش عارفة يا وخيتي واحد جاهم و هدرز عليهم و قاللهم و اني قعدت نكدب و حالتي حليلة
قمر : الكلب
احلام : مني تعرفيه
قمر : اكيد هوا الحيوان
احلام : تي مني
قمر : واحد وسخ أسمه شامل و يقولوله شوشو اكيد هوا دارها
احلام : الحيوان الكلب
قمر : باهي هما شكوا
احلام : لالا صدقوا طول
قمر : اصلا هوا يبان مهبول
احلام : احكيلي شن صار معاك
قمر : خلاص معش بنمشي خلاص 👏🏻
احلام : ❤️🔥😭 بلحقة و اخيرا
( خلاص توا بعد ما وقفتي علي رجليك تبدي تبني حياتك صح )
و اضبتت توام روحي حلومة امي و اختي و كل شي في حياتي
اقسم بالله دمعتي الا نزلت
احلام : ( قعدت تمسح في دمعوها ) خليني نمشي اندير العشي ليك
قمر : لالا متعشية
احلام : باهي خلي نمشي اندير تسالي
قمر : 😹❤️ بري نستنا فيك
.
( نزلت دارت كاكاو و سامينسا و بطاطا و بشقطي و دارت صونية و نزلنا كلنا قعمزنا مع بعض )
( الله محلاها اللمة ❤️ )
فتحنا اغاني عراقية و قعدنا نرقصوا
ليلي : ايوا قمر ايوا
نوضت معاي ليال و بعدين نوضنا احلام معانا و رقيص و جو
❤️❤️
🔥 انتقال الي اليوم التاني 🔥
قمر : صباح الخير احلام
احلام :ًوين ان شاء الله خير شن عمل
قمر : لالا خلاص حرمنا بنمشي نرفع الشيك للمصرف
احلام : باهي و شن مخططاتك
قمر : خليها مفاجاء توا نقولك
احلام : باهي باهي توكلي علي الله ربي معاك ان شاء الله
لبست و مكيجت و طلعت
و اني طالعة للسيارة لقيت فارس مقعمز في سيارته
ركبت في سيارتي و طلعت و من غير ما نشبحه
( مشيت للمصرف و صرفت الشيك و حطيت الفلوس في حسابي و الحمد الله فيه تفتوفة باهية نقدر اندير بيها مشروع حلو و طلعت و اني فرحانة هلبا الحق )
🔥 انتقال الي البنات 🔥
ليلي : صباح الخير
احلام : صباح النور شن عندك جامعة اليوم
ليلي : لالا
احلام : غريبة نايضة بكري
ليلي : ايه راقدة بكري امس
احلام : باهي كويس انديرلك فطور
ليلي : لالا توا ندير بروحي
احلام : شدي مكانك توا نديرلك اني عارفاتك تخليلي الكوجينة ساحة معركة
ليلي : باهي بسرعة جعانة
احلام : اختك عندها جامعة
ليلي : ما نندريش عليها
( طقت كعب ليال في الدروج )
ليلي : ذكرنا الكلب قال هاو
احلام : فكينا منها
ليال : صباح الخير
احلام : أشي أشي أشي شن هذا كله
ليال : شن رأيكم
ليلي : اللبسة واو
احلام : واو الحق كلاسيكية
( لابسة جيم سوت ابيض و تجاكة سودة و كعب اسود و شنطة سودة و طاقية سودة )
ليال : هيا اني تأخرت باي
ليلي و احلام : باي
...
طلعت ليال من الحوش و اتصلت بزين لقاته خارج نطاق التغطية طلعت تجري لنهاية الشارع
لي طلعة زين من الحرش شاف ليال تجري كلمها للاسف تليفونها تسكر و يتصل بيها يلقا فيها مقفل
ركبت في تاكسي و وصلت الجامعة
و قعدت ادور فيه و للاسف ما القاتاش خشت المحاظرة و لقت قدامها احمد ...
🔥 انتقال الي شروق 🔥
شروق : صباح الخير ماما
ناهد : صباح الورد يا الورد
شروق : صباحكم خير
زياد و مرته : صباح النور
زياد : شني جوان ولت تخدم معاك
شروق : ايه أمانا شني و تعودت علي طبيعة الشغل كله
زياد : باهي كويس
ناهد : كل سنة و انتي بألف خير
شروق : شن المناسبة
ناهد : عيد ميلادك
شروق : تي مزال 3 أيام
ناهد : عارفة غير قلت اندكرك باش تعزمي يلي تبي تعزميهم اوكي
شروق: حاضر
ولد زياد : عمتي شروق بنديروا عيد ميلادك ههههييي
شروق : 😍 يا وخيتي سلمه الغزال نوعدك غدوا نطلع اني وياك نشروا حاجات للعيد ميلاد اوكي
الولد : ههههي
باساته و طلعت للشركة
( اول ما وصلت خشت سالت علي مالك و للاسف قداش ليه معش يداوم استغربت هلبا و عصبت )
هذا خيره ❓
طلعت تجري من الشركة
شروق : عمي جمعة وينك
جمعة : تفضلي
شروق : بسرعة وتي السيارة
جمعة : جاهزة تفضلي
ركبت شروق
جمعة : وين تبي
شروق : نبي حوش مالك لو تعرفه
جمعة : ايه مرة موصله
لكن كيف ما تعرفيش وين يسكن
شروق : تي يقرا معاي من الابتدائي و اصحاب و منعرفش حوشه
جمعة : حاضر هي
( وصلنا لحي كان شعبي هلبا هلبا الحق و حتي السيارة ما قدرتش تخش للحي فا اطريت اني ننزل )
.
جماعة الحي مستغربين ألبي ام دبليو فئة سابعة شن ادير في الحي و اكيد اللبسة و الشعر المفتوح و الكلاب يلي تنبح في الحي
قعدت اني و جمعة نتمشوا لين وصلنا لحوش
جمعة : هذا حوش مالك علي ما أطن
شروق : هذا حوش مالك 😱💔
جمعة : شوية بس نسال
( سال و جاني و اكدلي ان هوا الحوش )
المشكلة باش تخش الحوش فيه سلوم لازم تركبه حاطينه قدام الباب نحيت الكعب و ركبت
جمعة : هاني نستني فيك
شروق : اوكي
و طقيت الباب و فتحتلي ام مالك نعرفها شايفتها زمان هلبا كانت تجيه للمدرسة
خشيت للحوش
الحوش اقل من بسيط و الحياة اقل من عادية
امه : تفضلي تفضلي بنتي
شروق : سلمك يارب
امه : تفضلي بنتي تبي حاجة
شروق : اني شروق مديرة الشركة يلي يشتغل فيها مالك و الحق ليه هلبا معش يداوم انشغلت عليه
امه : انتي شروق
شروق : باين عليه مالك حكالك عليا
امه : اكيد ديما يقول زي اختي
شروق : 😢😖💔
المهم هوا شن مداير
امه : و اللهي لاهي في الأوراق متع السفر يبي يهاجر
شروق : قاعد المرضوع في دماغه
امه : ايه و اللهي قاعد
اقنعيه انتي كان قدرتي
شروق : و اللهي قتله مافيش فايدة
امه : خلي نمشي نشربك حاجة
شروق : لالا شكرا
امه : لا يابنتي عيب في حقي
شروق : باهي بري نستني فيك
( مشت و جت جابت شاهي و معاه كعك مالح )
الحق اول مرة نشرب و ناكل هكي و اللهي اني حاسدة الناس هادي علي انهم يحسوا بطعم الماكلة احني ماكلتنا شكل و بلا طعم كأنها رسم )
أمه : انتي منين يا بنتي
شروق : اني من ........ من عيلة التاجي
امه : عيلة التاجي
شروق : ايه
امه : شن يقربلك صالح التاجي
شروق : بوي
امه : بوك
صالح ما عنداش بنات عنده أربعة ولاد بس
شروق : لالا اني الصغيرة بعد الأربعة الأولاد
صالح : اني كنت نشتغل عنده في وحدة من الشركات يلي كان مالكها و كان يجيب في ولاده معاه و مرة سألناه قال عندي أربعة ولاد بس
شروق : لالا اني الخامسة بس اكيد قبل ما أنجي
امه : غريبة
..
و هوا خاش الشارع مالك شاف سيارة قمر قدام الشارع و السواق جمعة واقف بحداها
جاه يجري و ساله و قاله ان شروق جاته للحوش
جئ يجري للحوش خش لقاهم قاعدين يهدرزوا
مالك : السلام عليكم
امه : اهو جئ مالك
شروق : و عليكم السلام
مالك : اهلين شروق تفضلي تبي حاجة
.
قعدت شروق تشبحله ( كيف شاد اوراق الهجرة متعه و شاد كيس الخبزة في يده و معاه جبنة لامه )
زاد كبر في عينها هلبا هلبا هلبا
شروق : مشغولة عليك وينك مغيب
مالك : عندي مشاغل
شروق : باهي عندك مشاغل تغيب هكي من العمل علي كيفك
ولا عارف ان شروق مش رح تخصملك
( عصب مع انها كانت تبصر )
امه ( خلي نمشي نرفع الطيس )
جاها
شروق :وينك مالك اقسم بالله انشغلت عليك
مالك : شكرا
شروق : شكرا هذا اقل حاجة انديرها معاك
مالك : ان شاء الله غدوا نرجع نداوم
شروق : شني قاعد موضوع الهجرة في دماغك
مالك : ايه و مش رح يتغير أبدا
شروق : حرام عليك امك بروحها تخليها
مالك : ان شاء الله مش رح انخليها شهور و رح نبعتلها تجي معاي
شروق : باهي المهم جيت سالت عليك تعرف معزتك عندي
مالك : بارك الله فيك
شروق : محتاج حاجة مالك
مالك : لا لا شكرا
شروق : تي غير شوفني بس قصدي كان محتاج حاجة قول ما فيها شي عادي
مالك : لا لا مستورة و الحمد الله و اكيد كان احتجت حاجة رح نكلمك انتي اختي يا شروق
شروق : 😳💔
مالك : حقا سامحينا خليناك تنحي الكعب متعك و تركبي علي لوحة غير تعرفي انتي المطر مرات تخش الحوش
شروق : لالا عادي اصلا اني ديما بنجي هني اني و امك ولينا اصدقاء
.
هيا اني نستادن
امه : اقعدي افطري معانا
شروق : مرة تانية ان شاء الله في فرح مالك يارب
امه : سلمك ياربي
نزلت شروق و ركبت السيارة و قعدت تبكي و تزهق
جمعة : وين تبي
شروق : الشركة
..
جمعة : ممكن نسألك سوال
شروق : تفضل عمي انت زي بوي و اكتر
جمعة : بارك الله فيك
خيرك شروق فيه شي
شروق : فيه و اللهي و شي كبير هلبا بس مش قادرة نقول عليه
جمعة : يتعلق بمالك
شروق : ايه
جمعة : تحبيه صح
شروق : 😭 من تلاتة إعدادي
جمعة : اف و خيرك ما قلتيلاش
شروق : ما قدرتش كل ما نجي نقوله يقولي اختي و بعدين المفروض تجي منه لكن الباين الحب من طرف واحد
جمعة : لالا تجاري و قوليها ليه
شروق : للاسف منقدرش
( هاذي علاقة شروق و مالك علاقة حب معقدة هلبا كل حد يحب التاني و ما يعرفش ان التاني يحبه )
...
بما ان ليلي اليوم ما عندهاش جامعة و قاعدة في الحوش بروحها
بعد ما طلعت ليال للجامعة و احلام للكوافير و زادت قمر مشت للكوافير متع اختها بدير نيو لوك جديد
..
ليلي : ( لابسة توتة و شادة كاكاو و طالعة للجردينة تسمع في اغاني )ً
علي طلعة يزن من الروشن متع الحوش شاف ليلي مقعمزة في الجردينة نزل و قعد يتسلل و جئ و راها و شدها
.
و للاسف قلب ليلي ما يتحملش اول ما مسها طاحت طول
يزن : 🥶 ليلي ليلي ليلي خيرك
قعد يضرب في وجهها
قعد يجري جاب أمية و صبها عليها
ليلي : اههه 😖 خيرك هكي قلبي وقف
يزن : نبصر عليك اقسم بالله
قعدت تضرب فيه بايدها
ليلي : حرام عليك حرام عليك
المرة يلي فاتت أيدي قريب كسرتهالي و توا قلبي قريب طيحتهولي ما تحسش انك عنيف شوي
يزن : اني اسف
ليلي : ورأس بوك برا عليا
يزن : باهي صحيتي بارك الله فيك
ليلي : خلاص خلاص تعالا نبصر عليك
يزن : باهي ممكن ندوق الكاكاو
ليلي : استنا قعمز هني توا نجيبلك طاسة
( قعمزاته في الجردينة و جابتله طاسة )
ليلي : تفضل
و جت قعمزت في الطاولة معاه
ليلي : توا يلي يشوفنا من بعيد يقول هاذم عيلة مش محترمين
يزن : و ليش
ليلي : قصدي المفروض قبل ما تطلع من الحوش لبست حاجة مش جايني بكنتيرة و شورت
يزن : حاضر توا انوض
ليلي : تي قعمز قعمز
خيرك طول هكي
يزن : قصدي معش فهمتك مرة برا اقلب مرة اقعد
ليلي : لالا اقعد
اسمع باين عليك مش فاطر شن رايك انديرلك فطور
يزن : لالا صحيتي
ليلي : استني لا لازم ادوق الدحي متعي حاجة خيالية
يزن : باهي بري هي
...
🔥 انتقال الي قمر و احلام 🔥
جت قمر للكوافير متع احلام بدير ضوافرها و منها تهدرز مع صحاب اختها و قعدت احلام تهدرز علي صاحبها يلي اتصدمت فيه مرتين قبل هكي
بعد ما كملت ضوافرها جتها مكالمة و هيا في الكوافير من صاحب الوحدات السكانية و يقوللها ان لقالها حوش و اذا تبي تطلع تقدر تطلع
و بعدين سكرت و رجعت قعمزت مع صاحبات خواتها
.
🔥 انتقال الي ليال 🔥
بعد ما خشت المحاضرة و للاسف للان ما شافتش زين و ادور فيه لين لقت احمد مقعمز في القاعة
و دارت روحها كأنها ما تشوفش فيه
كملت المحاضرة و قعدت تلم في شناطيها و حاجاتها
جئ وقف بحداها و قعد يقول ليال ليال ليال
و هيا ولا كانه
وقفت و كيف بتطلع شد يدها تلفتت و قالتله
ليال ( لو سمحت نحي أيدك )
احمد : ليال نبي نكلمك
ليال : ما فيش بيني و بينك كلام
احمد : خليني نبررلك
( ليال نفعلت )
ليال : شن بتبرر شن تبرر انت شارب حاجة ولا شني كيف ليك عين توقف قدامي و تشد أيدي
انت بعتني يا احمد
بعتني
خليتني أضحوكة عند كل الناس
خليت الناس يضربوا عليا في المتل
الناس اتهمتني بشرفي
احمد : مني يلي اتهمك
ليال : صاحباتك يلي تكلم فيهم في الجامعة و تبعتلهم في صور خطبتك و حياتك الجديدة
و اني ولا كانه
احمد : ليال اني
ليال : ✋🏻 انقولك حاجة من الأخير
احمد اني نسيتك
و ياريت زي ما نسيتني قبل هكي انساني
.
شد يدها و اضبتها
.
و للاسف علي جيت زين
زين : 😳
جئ يجري و ضرب احمد علي وجهه
ليال : 😱🔥💔 لألا يزن
شدني من أيدي
و طلعني
زين : توا عرفت ليش بتبيش تكلميني و لا تعبريني
ليال : لا لا حبيبي
زين : ههها حبيبي ليال انتي كذبتي كذبة و اني صدقتها انتي عمرك ما حبيتيني اني جايبتيني باش تقهري احمد لا غير
ليال : 😖✋🏻 لالا ما تقولش هكي
هوا الحيوان
💔 ( دفلي أيدي و طلع يجري )
و اني وراه نجري بس لانه كعب كنت نمشي و نعكز
و نعيط ( زين يازين يازين )
.
😡🤬 احمد عصب طلع بسيارة و راهم و يجري بسرعة كبيرة و هذيكا اللحظة الشيطان قاله لازم تضرب زين
و للاسف كيف زين بيقص الطريق
قص زين و جت ليال
احمد : 😱😱 ليال
ليال : اااااااااااااااه
زين : 😳
( صوت عيطة ليال رنت في ودن زين تلفت و شاف ليال طايحة غرقانة بدمها
و تلمدت الجامعة كلها عليها
زين و احمد كانهم تشلوا معش عرفوا شن يديروا
زين : ليال ليال نوضي ليال لللللليييييااااااااللللللللل
......
🔥 انتقال الي ليلي و يزن 🔥
قاعد يزن يفطر
ليلي : 😳 قداش ليك ما فطرتش
يزن : 🤭
ليلي : نزيدك
يزن : لالا شكرا نبي قهوة اذا ممكن
ليلي : ايه حاضر أستاذ يزن انت تامر
( يحسابي شغالة بوه )
يزن : تقولي حاجة
ليلي : سلامتك
اااففف
..
لين اتصل الأرضي متع الحوش
ليلي : الو
زين : الو ليال
ليلي : الو من معاي
زين : اني زين
ليلي : شن فيه زين
زين : ليال
ليلي : 😳 خيرها
زين : مريضة شوي و توا في المستشفي
ليلي : زين في شي
زين : لالا مريضة بس
ليلي : متاكد
زين : ايه هيا تعالوا
سكرت التيلفون و قعدت تجري في الحوش
يزن : شن فيه
ليلي : ليال اختي في المستشفي بسرعة البس خلي نمشولها بسرعة
ليلي ( قلبي مقبوض كان فيه حاجة )
ليلي : بسرعة يا يزن
..
ركبت هيا و يزن و طلعوا طول للمستشفي و طول الطريق و هيا تتصل بقمر و احلام و الاتنين خارج نطاق التغطية
.
وصلت المستشفي
لقت زين قدامها
ليلي : ها ان شاء الله خير
زين : لالا خير خير
ليلي : ( بصوت عالي ) زين ليال خيرها
زين : ليال ضربتها سيارة في الجامعة
( طول طاحت ليلي )ً
يزن : ليلي ليلي ليلي
...
رفعوا ليلي دارولها تغذية و هيا تبكي و حالتها حالة و يزن معاها
..
و زين قاعد يحاول يتصل بقمر لين شد الخط
قمر : الو ليال
زين : لا اني زين
قمر : زين اهلين زين
زين : قمر كنت بنقولك ان ليال مريضة شوي و هيا توا في المستشفي
قمر : شني
احلام : خيرك قمر شن فيه
قمر : هيا هيا هاني جاية
احلام : خيرك شن فيه
قمر : ليال في المستشفي
احلام : شني ( بصوت عالي )
قمر : هيا هيا بسرعة نمشوا هيا
بنات الكوافير : يا وخيتي طمنونا عليها
..
طلعت قمر و احلام للمستشفي و وصلوا
نزلوا و كيف خاشين من الباب
يسمعوا في عياط ليلي
شبحوا لبعض
صوت عياط ليلي يزيد
احلام و قمر يجروا
احلام : ( لللللليييييياااااالللللل) .......يتبع
رح نشوفوا مصير ليال و علاقتها مع زين
و اكيد رح نشوفوا مصير قمر و فارس
و فيه حدت حلو رح يصير في الحلقة الجاية
و ناهد رح تبان في الرواية اكتر
و اكيد علاقة مالك و شروق
و اللقاء بين ليلي و ليال و شروق
و وين رح يكون و هل معاها ناهد او لا
..
نبي رأيكم في الاحدات و رأيكم في تطور احدات الرواية و شن تتمنوا يصير فيها
و سامحوني علي التأخير
بس لان فيه هلبا حاجات تغيرت في الرواية 🔥❤️