#أبي_لم_يكن_إنساناً
البارت الخامس
للكاتبة لبنى الموسوي
طيبة.. حچيتها وشهگت بصوت عالي
ما احس إلا بيبي وگعت من طولها بالگاع وعمة انهارت تدگ على راسها وتصيح يبووو بكل صوتها
هي وگعت لو اني تخبلت
ركضت عليها بيبي گومي لتموتين وتعوفيني مثل عمو وجدو بيبي فدوة فتحي عيووووونچ
اباوع عليها ماكو متتحرك
التفتت على عمة گاعدة بالگاع تدگ على راسها وتنحب بصوت عالي شبه الفاقدة
- عمة تعالي البيبي
فدوة گومي شوفيها مگاعد تتحرك اخاف صارلها شي
- ااااااااااخ ولچ طيبةةةةةة
شيگومني بعدددد
ماكو ما اگدر اتحرك راح حيلي عمة راح ولچ راااااااح
بـ هالاثناء دخل عمو محمود يركض
صاح بكل صوتة حامد وأبوية غرگانين بدمهم
ولكم ياناس ماتووووو
ضربتين ع الراس توووجع ولكم قسم بعرش رب الكون تووووووجع
هو حچاها لو البيت أنخبص
عماتي صارن يدگن ويلطمن بكل حيلهن
عمة نهاية تملخ بوجها وتنعى عمي حامد من گلبها
ولد عمي يبچون
صالح ينحب ويرگع بـ راسة بالحايط حتى وجهة انترس دم ما حاس على روحة شديسوي
دخل عمي للبيت يجيب المستمسكات يمكن
التفتت على بيبي
واگعة بالگاع النفس ميطلع منها من شدة الصدمه محد انتبه على وگعتها
باوعت عليهم أصيح من گلبي
ولك صالح تعال گوم شوف بيبي واگعةةةةةة
سمير سعد عمةةةةةة
ولكم اصحوا راح تموووووت شجاكم احد يساعدهاااا
محد صحى على روحة
درت وجهي عمي محمود طلع يركض گبل صحتة عمو تعااااااال الحگ بيبي حباااااااب
بس شافها ركض دفعني وگعد يم راسها
ضرب وجها حيل يمة گومي
فدووووووة اروووحلچ گوووووومي يمة شبييييييچ
شالها وصاح على ولدة راحوا ويا
اخذوها للمستشفى
شوية والبيت انگلب بالنسوان وبدا النعي والصياح
نفس الخوف الحسيت بي بوفاة أمي حسيتة اليوم بس الفرق هسة واعية للمصيبة وأعرف حجمها
من الهوسة أخواني صاروا يتصارخون
ما اگدر اعوف عمة وحدها
طلبت من زينة تاخذهم وتصعد بيهم للغرفة الفوگ
بس صعدتهم رحت الصفاء
گاعدة بالزاوية گعدت بصفها حضنتها وصرنا نبچي من گلبنا حتى نفسي حسيتة نگطع
ما عندي غير الدعاء بمثل هالمصيبة
ظليت اردد ويا نفسي
ياربي فدوة بلكي يطلعون عايشين
يا رب أستجاب الدعائي ولو بس هالمرة انت تدري ما عدنة غيرهم سند بـ هالدنيا
بين الدعاء ودمع عيني الما نشف ولا لحظة مر الوقت ما اشوف إلا عمو محمود دخل للبيت
حالتة متنوصف
بس شافنة النسوان ركضن للباب صاحن بشر صرخ من گلبة شبشرررررررررررررر
- ولكم ماااااااات أبويةةةةةة
أخويةةةة وحزام ظهرررررري مااااااااااااات
اااااخ لو بس تدرون شلون زرفتوا گلبي بروحتكم هاي
بس حچاها دخلت من بين النسوان لزمت أيدة حيل
- عمو صدگ يعني ماتوا ؟!!
- اي طيبة ماتووووا
ماتوا گدام عيننننننني وبين أديييييييية
ما گدرت أسوي شي
ما گدرت اشيل من عمري واخلي على عمرهم الما عاشوا منة غير بس شي بسيط
هو گال هيچ لو اني فقدت
وگعت بالگاع ادگ على راسي لا عمو حامد لاااا
وين رحت وشلون عفتني
جدو حبيبي ليش متت ومنو الي من بعدك
أنهاريت من البچي
ممصدگه لسة راحوا وعافوني للأبد
معقولة انتهت
معقولة بعد ما أشوفهم ولا أسمع صوتهم
هاي هي يعني بعد ماكو الحب والدلال الما حسيت بي غير وياهم وبحضنهم !!!
فجأة تذكرت بيبيتي
رفعت راسي عمو فدوة بيبي وين خو ما صارلها شي
- أنشلت طيبة
بيبيتچ ما تحملت فگد رجلها وولدها وأنشلت ي عمي
عقلي راح يوگف ما اتحمل بعد
عفتهم ورحت أركض لغرفة عمو حامد أبچي
دخلت لگيت أخواني خاتلين بالزاوية
الظاهر زينة منزلتهم من عرفت بعمي اجة واني هم من المصيبة نسيت حتى روحي
باوعت عليهم يناشغون من البچي
تذكرت نفسي بيهم
نفس الموقف مر على أختهم قبل كم سنة
الظاهر حظهم مثلي
واني أدري الي حظة أعوج عمرة ميحصل الراحة بيوم
ظلوا بحضني اريدهم يسكتون ماكو
باوعت داير مدايري محتارة
شسوي هسة ؟!!
عمة نهاية مو بحالنا هم الله يساعدها الصار مو شوية
بقيت احاول اسكتهم لحد ما جزعت
- يربي شسووووي
وين اروح والمن اصيح حتى يساعدني بيهم
اذا ظلوا أخواني هنا يموتون من الخوف صياح النسوان يرعب حتى الچبير
صفنت عليهم مخنوگة
من البچي گوة يسحبون النفس الصدرهم حضنتهم حيل
- ظلوا هنا هسة أرجع الكم مو تخافون
سدوا أذنكم حتى لتسمعون شي.... وخليت أيديناتهـم على أذانهم
أنتظروني حبيباتي ما اتأخر هسة أجي
حچيتها وطلعت أركض
باوعت العمة نهاية منهارة متدري بالدنيا شديصير
التفتت على عماتي
نفس الحالة ظليت أفتر على روحي يربي وين اووولي
ركضت للمطبخ لگيت هواي نسوان بي
ظليت أدور على عرف
هناك والمح عمـة سهام مرت عمو محمود واگفـة على الطباخ أي همزين بلكي تساعدني
تقربت منها شكلها ضايجة بس مدتبچي
- عمة حبابة ساعديني
أخواني خطية ماتوا من البچي ديخافـون من الصياح شسويلهم
بس حچيتها دفعتني من يمها حيل
- شو ولي بت الفگر
هالدور انتِ وأخوانچ علية ناقصتكم اني مو كافي كل الشغل تاركينة فوگ راسي
حبست دمعتي بعيني وطلعت من المطبخ
ردت اروح لعمة نهاية بس بطلت
هي هسه بيا حال لازم أعتمد على نفسي شوية ميصير كل شي صار وأركض عليها
ما تحملت گعدت ع الدرج واطلقت سراح دموعي
- ليش هيچ عمو ؟!!
ليش رحت وكسرت كل البيت بروحتك هاي ومنو النا من بعدك
بعدني احچي ويا روحي
لمحت اقاربنا الرحت يمهم بوفاة ماما دخلت من الباب گبل رحت الها ركض
- ها خالة شلونچ عرفتيني ؟!!
- هلا حبيبتي
أي غير انتِ طيبة بت رزاق
- اي خالة اني طيبة
خالة عفية أخواني بعدهم كلش صغار
ومن سمعوا صياح النسوان ولسة ما سكتوا من البچي أگدر اخذهم البيتكم بس اليوم ؟!!
- اي عيني روحي وديهم
جهالي هناك والحجية بيبيتهم هم موجودة بالبيت
تشكرت منها ورجعت للغرفـة طايرة
لگيتهم على نفس الوضعية
سادين أذنهم بـ أيدهم ويبچـون بصوت عالي گومتهم أبوس بيهم
- تعالوا حبيباتي تعالوا
لتبچون هسة اطلعكم منا اني يمكم لتخافون زين
باوعلي بقلة فهم
اخذتهم ورحت لـ بيت اقاربنا
دگيت الباب طلعت بتهم الچبيرة خليتهم يمها عود ردت اطلع ما قبلوا ظلوا لازمين بية بخوف
- يربي هسة شسوي
اكيد اذا رحت يظلون يبچون وراية والعالم تبتلي بيهم
مديت راسي للشارع
شفت سعد ابن عمو محمود واگف ويا الرياجيل بالفرع ينصبون چادر الفاتحة
- سعد سعد
- ها طيبه شجابچ البيت عمي فلاح
- أخواني خافوا من صوت النسوان
جبتهم هنا عود اعوفهم وارجع للبيت بس ظلوا يبچون أخاف احد يسأل عليه گلهم اني هنا
- خوش صار معلوم
يلا دفوتي دخلي جوة الفرع متروس زلم
اخذت أخواني وطبيت للبيت
خليتهم بـ حضني وظليت ابچي لحد ما راسي انسطر
بقيت هناك ثلث أيام
محد اجة سأل علينة وحقهم اكيـد ملتهين بمصيبتهـم وسوالف الفاتحة اصلاً هوستها واصلة لهنا
مرت هـ الأيام مثل الجبل على صدري
غياب عمو حامد كسر روحي وهز گلبي هز لأن كل شي چنت متوقعة إلا أن يعوفني ويروح
شراح اسوي من بعد عينة ؟!!
زين عمة نهاية وجهالة شراح يصيرلهم بغيابة؟!!
اكيد بيت جدي ميرحموهم
محد چان لازمهم عن أذيتنة غير عمو حامد منو هسه يمنعهم اذا جرموا بينة
ظليت بـ مخاوفي وقهري على غياب أعز اثنين لحد ما خلصت الفاتحة
باليوم الرابع اندگت الباب فتحها واحد من الجهال وبس شفت صالح گدامي ركضتلة
وصلت يمة انصدمت
خطية شصاير بحالة الوجه ذبلان والشعر شحالة حتى عيونة مورمة من البچي والتعب
حاسة بيك صالح
مريت بالي مريت بي انت من قبل
بس الفرق اني مچنت افتهم من ماتت ماما
اما هسة غياب عمو حامد كسرني مثل ما كسرك لأن هو أبويه مو رزاق
- يلا طيبة جيبي أخوانچ وتعالي وياية
- انت زين صالح ؟!!
- الحمد لله على كل حال.... يلا استعجلي شوية
رحت تشكرت من العالم ورجعنا للبيت
أول ما دخلت انضربت على راسي مـن الصدمـة أبوية گاعد بالصالة يربي هذا شجابة لهنا ؟!!
سنتين واني مرتاحة منة
معقولة موت عمي راح يرجعني لكابوس الماضي ويرجع رزاق يتفنن بعذابي وعذاب أخواني !!
رفع راسة باوعلي
خفت من نظراتة وگبل ختلت ورى صالح أحتمي بي
- شبيچ طيبة شنو هالحركات ؟!!
- ليش اجة هذا شجابة
- منو رزاق قصدچ
- اي
بس حچيتها التفت علية
- لتخافين طيبة طول ما اني موجود محد يگدر يأذيچ
هزيت راسي بخوف
فجأة لمحت بيبتي گاعدة ع الكرسي المتحرك
منظرها سحن روحي سحن
ركضت حضنتها ابچي بيبي حبيبتي شلون صرتي ها
- شلوني يبيبي شلوني
ولچ راحوا الغوالي راح عمچ حامد راح جدچ ي طيبة منو ظل النة بعد عينهم غير بس ربچ
ما گدرت حتى اجاوبها
ظليت گاعدة يمهم بـ الربع ساعة
طول ما اني بالصالة عيوني تدور على عمة نهاية هسة شصاير بحالها ؟!!
عفتهم ورحت الغرفة عمو حامد
دگيت الباب ودخلت
گاعدة على الچرباية تبچي وحالتها تفتت حتى الحجر گبل ركضت حضنتها
- راح عمچ طيبةةةةة
راح ذاك الطيب الچان ساند ظهرنا منو بعد يدافع عنا ويا كل هالوحوش الداير مدايرنا
فجأة اجانة صوت صالح
- يمة لعد اني وين رحت وسفة والله
شحده اليتجرأ ويمد أيدة عليكم أو يهينكم بـ وجودي
- وين تگدر عليهم وليدي ذوله ظلام ما يخافون ربك
- فوگ كل ظالم اكو الله يمة
وهو راح يعيني حتى اگدر اسندكم وادافع عنكم
هاي چانت أخير وصية الأبويه وما أتخلى عنها لحد ما الله ياخذ أمانتة واموت
بس حچاها گامت من مكانها حضنتة
- لتجيب طاري الموت
الله يخليك لتحچي بي ما اتحمل اسمع سيرتة بعد لهنا وكافي لأن گلبي خلص
مرت الأيام بقسوة متنوصف
البيت صار هادئ بشكل وكأن روحة انطفت
وفعلاً هالشي صار
لأن عمو وجدي هـمَ روح هذا البيت وبغيابهم كل شي مات وانطى
أربعين يوم مرت واني عايشة بالصدمة
لحد الأن ممستوعبة موتهم
أو بالأصح أستوعبت بس مگاعد اگدر أتقبل غيابهم عن حياتنا
اما عمة نهاية فـ هاي وحدها مصيبة غير
أنهارات تماماً
هملت روحها وهملت البيت وياها
ما بيها حتى تگـوم تدارينا او تهتـم الأكلنا على الأقـل
هنا حسيت بـ روحي كبرت
خلص بعد صار لازم أعتمد على نفسي
مو بس صالح يشيل المسؤولية هو وصغير اني هم راح اشيل مسؤولية أخواني
لأن ما ظل الهم أحد غيري بعد ما خسرنا عمو حامد
صار الأربعين وانعادت علينة نفس المآسات
وبعد ما خلص العزا
رجع البيت الوضعة القديم بس بابا ظل ما راح وكلش خفت من بقاءة هنا
اليوم گاعدة بالمطبخ اريگ أخواني بيض سلگ فجأة سمعت حسة ها ولچ متجين تسلمين على ابوچ
خفت من شفتة گدامي
مو على نفسي لا على أخواني لأن بالنسبة الي تعودت على ظلمة المينتهي
شمرت البيض من أيدي وگمت أسلم علي
- هلو بابا شلونك
- هه لا هلا بيچ بت *****
دمعت عيني من كلامة
شو هذا فجأة وبلا سبب راح على رحمة ضربها راشدي قوي خطية چانت تلعب ممتوقعة عملتة
الطفلة صارت تصرخ من البچي
ركضت حضنتها بابا ليش تضربها قابل هي شسوتلك
- بكيفي والله يعجبني
ناقص تجين تحاسبيني انت بعد ما خلصت من عمچ
باوعتلة بخوف مو طبيعي
فعلاً هالأنسان مريض مو صاحي والله موووو صاحي
لزمت أخواني داطلع من المطبخ صاح
- اوگفي وووولچ منو سمحلچ تاااااخذيهم وتررررحين
- شتريد بابا مدافتهم عليك ؟!!
- ها خايفة مني هههههه
- لا وليش داخاف يعني
بس حچيتها تقرب مني بنظرات حقيرة
- لا لازم تخافين طيبة
أنصحچ تخافين منا وجاي لان مثل ما كتلت عمچ ممكن اكتلچ أوووووو.....
رفع عينة وأشر على أخواني وهو مبتسم
- أو اكتل واحد من أخوانچ مثلاً
هو گالها لو اني أنهاريت
شنو كتل عمي
يعني معقولة هو ورى هذا الحادث !!!
گبل ضميت أخواني وراية وباوعت الة بنظرات توسل
- لا بابا عفية
كل شي ولا أخواني تريد أذيني الي هم ممسويلك شي
حچيتها وطلعت من المطبخ أركض مثل المخبلة
بوجهي رحت الغرفة صفاء
حضنتهم وظليت أناشغ من گلبي ابد ممصدگة الكلام السمعتة منة
- ليش بابا !!
شلون كتلت جدي وعمي حامد
ولك اااااااكو ووواحد يكتل أبووووو وأخووووووو
شنو انت بشر لو حيوااااااان
من شنو خالقك رب العالمين اريد بس اعرف اااااااانت شنووووووو
حبست روحي يومها بالغرفة
أخواني يمي حتى ما اتجرأ اطلع أخاف لا يلمح خيالهم
بكلامة هذا رجع فتح جرح غيابهم من جديد
اشتاقيت الهم حيل
خصوصاً عمو حامد كل ساعة اتذكر من چان يطب من الدوام ويحضني
لو من يرجع من دوامة ويسمع بية ماخذة عشرة يظل يصفگلي هو وصالح وثاني يوم يجي جايب هدية حتى يشجعني ع الدراسة
بيومها دعيت من گلب ورب
الله ياخذ حقهم من بين عيون رزاق ومستحيل يضيع حق عد رب العالمين
نومت أخواني ونمت بلا عشى
فزيت على صوت صالح يگعدني طيبة گومي أصحي
- ها صالح
- هاچ جبتلچ العشى
گومي أكلي صارلچ من الظهر مماكلة شي مو زين هيچ
- شكراً ما اشتهي
- شبيها عيونچ ليش باچية ؟!!
باوعت العيونة وبچيت
ضميري يأنبني احس اني السبب بموت أبو
لو ما اني ما تجرأ بابا وسواها حتى يزيحة من طريقنا
- سامحني صالح
- وليش داسامحچ سويتي شي وما ادري ؟!!
- لأن ما گدرت أنقذ عمو حامد من الموت
- وشلون تنقذي !!!
اني چنت يمچ واگف لو اگدر چان اني نقذتة مو انتِ
بعدت نظري عنة احچي ويا نفسي
- لا صالح
لو رايحة بذاك اليوم اني وأخواني ويا رزاق مچان أبوية كتل أبوك
وچان كل واحد راح بطريقة وظل عمو حامد خيمة على راسكم وما فقدتوا
فزيت من صفنتي على صوتة
- لتبچين طيبة
الحياة تمشي غصباً علينا وكل شي راح نشوف بيها
لازم تصيرين قوية
مو أبوية چان دوم يصيحلچ بنيتي السباعية
أريدچ هيچ تبقين مثل مچان هو يشوفچ قوية وگدها
- خايفة صالح كلش خايفة
- شيلي هالخوف من راسچ عاد
وأوعدچ اني راح اسوي الي أكدر علي حتى أحميكم بس اكلي لتظلين هيچ
گعدت اكل بالغصب ما اشتهي
كلما اتذكر كلام أبوية ومنظرة من چان يهدد بية روحي تهتز من جوة وعقلي ينرعب
ثاني يوم بدت المدارس
چان لازم أداوم بس احتاريت بأخواني وين اخليهم !!
ولأن قررت اعتمد على روحي واسند أخواني بنفسي
فـ انجبرت اتخذ هالقرار
رحت الغرفة عمة دگيت الباب ودخلت چانت دتقرا قرأن
انتظرتها تكمل
بس صدقت مباشرتاً گلت الها عمة اني راح ابطل بعد
- شنو هالحچي طيبة ؟!!
تردين تزعليني منچ بهذا الكلام لو شنو بالضبط
- عمة مو انتِ تعبتي
وأخواني يرادلهم حيل منو يظل يمهم من أروح للمدرسة
بس حچيتها گامت حضنتني
- لا طيبة ما تعبت ولا راح اتعب منكم
وانتِ راح تكملين دراستچ حتى تحققين حلم عمو حامد بيچ
وأوعدچ كلما تجيبين عشرة أجيبلچ هدية
مثل ما چان يسويلچ هو
اني هنا بمكان عمچ مستحيل اخليچ تبطلين او تهملين دراستچ واني موجودة
الدراسة هي سلاحچ طيبة
هي الشي الوحيد التگدرين تستندين عليها من تكبرين
رجعت حضنتها ودموعي تتسابق على خدي
شگد طيبه هالمرة
وبنفس الوقت شگد مظلومة بحيث دائماً اشوف بيها أمي الله يرحمها
نمت بيومها يم صفاء
ثاني يوم فزيت على صوت عمة دتگعدنا للدوام
بوست أخواني ورحت غسلت
دخلت للمطبخ مجهزة الريوگ خطية ما ادري حچيتها
- عمة أخواني راح يظلون....
- شنو السالفة طيبة
قابل أول مرة تعوفيهم اني يمهم لتخافين شجاچ
- عفية ديري بالچ عليهم من بابا ليأذيهم
- محد يتقرب يمهم واني موجودة
المهم انتِ تديرين بالچ على دروسچ ومعليچ بالباقي
گمت بوستها وگعدت اكل
شوية وطلعنا للمدرسة وصلنا ردت ادخل سمعت صوت أبوية صاح طيبةةةةةةة
بس درت وجهي اجاني مثل الأعصار
سحبني من أيدي والشر ينط من بين عيونة عاط بية
- ماكو مدرسة بعد
الچان يحميچ راح بببببببح
منا وجاي بس كلمتي التمشي تسمعييييين لو لاااااا
- لا بابا الله يخليك كل شي ولا دراستي حباب لتبطلني
صالح... عمو عوفها
خليها تدخل للمدرسة لتخليني اصيحلك الحارس
- امشي لك ساقط تهددني أبن *****
- احسبها مثل متحسبها
طيبة متتحرك منا وراح تدخل للمدرسة
وهاي اخير مرة أسمعك تفشر على أبوية افتهمتتتتتت
- شو دتعال ابن الكلب
اااانعل أبووووك لابو الرباااااك على هـ التربية النگسه
حچاها وضرب صالح حيل
ركضت صحت للحارس اجة يركض ومن الهوسة طلعت حتى المديرة
ست رشا.. شديصير هنا
صالح.. ست هذا عمي يصير أبوها الطيبة
يريد يبطلها من المدرسه واكيد هي متقبل تبطل يصير هالشي يعني ؟!!
ست رشا.. لا طيبة أشطر البنات عدنة تبطل شنو !!
رزاق.. اني أبوها وبكيفي
أبطلها ما أبطلها هالشي راجع الي وبس انتم منو حتى تتدخلون بينا
ست رشا.. أخي شنو بكيفك
قابل تايهتلك والله اشتكي عليك وتروح بيها
بس حچتها بهت لون بابا
اكيد خاف
هو خلصها شارد لأن چان بالحزب وميريد يفتح العيون علي من جديد
مباشرتاً عافني وراح
أخذتني ست رشا ودخلت للمدرسة درت وجهي يمشي ويباوع علية
طول الدوام فكري يم أخواني
أخاف أبوية رجع للبيت وطلع حرگتة بواحد من أخواني يسويها مو غريبة علي
بس وصلت للبيت ركضت اشوفهم
لگيتهم يم عمة نهاية گاعده توكلهم وهم يلعبون وياها ويضحكون
سحبت نفس براحة
سلمت على عمة گبل گاموا تلگوني بوستهم وانطيتهم جبس وراها طلعت للغرفة ابدل
غيرت ملابسي ورحت للصالة
بعدني توني طبيت صار أبوية بوجهي بس شافني گبل ركض بـ أتجاهي سحلني من شعري
- تعالي ولچ بت الكلب شلون تكسرين كلمتي
حچاها ودخلني الغرفتة
بس دخلنا طگ قفل الباب ظليت أتوسل بي يرحمني
ركض للكنتور جاب ربطتين
وحدة شد بيها حلگي والثانية ربطها بـ أيدي حيل باوعت علي أبجي
شراح يسوي بية يربي ما اشوف إلا شالني من رجلي
صعد على الطبلة وصعدني ويا
رفعني ليفوگ وعلگني من أيدي بالچنگال الـ بالسگف
نزل ع السريع سحب الحزام من بنطرونة
غمضت عيني خايفة
ما احس إلا اجتني ضربة سحنت روحي سحن
وراها صار يضرب بكل قوتـة أريد اصيح ماكـو صوتي ميطلع لأن شاد حلگي رغم بلاعيمي طگن
بالعشر دقايق وهو جارم بية
جسمي بند من التعب
هو منا يغلط ويفشر وعمة نهاية وجهال عمامي خبصوا الدنيا بالصياح مناك
يدگون الباب يردوا يفتحها ماكو
حسيت اكتافي انخلعت من الوجع لأن كل ثگل جسمي عليهن صاير
اما جسمي بند من الضرب ورجلي نملت
ظليت اباوعلة بنظرات توسل
بلكي گلبة يحن بس للأسف هالشي مراح يصير لأن هذا الواگف گدامي وحش مو إنسان
حسيت روحي بـ لحظاتي الأخيرة
صرت أفكر بـ أخواني شيسوون لو متت وعفتهم
ما احس إلا الباب انكسر وطب عمو محمود صاح بكل صوتة لككككك رزااااااااااااق.....
يتبع
لتنسووون ⭐⭐⭐⭐⭐⭐
كل الحب ❤🥀