رواية #بنات_نور
( حقيقة ممزوجة بلخيال )
للكاتب #أحمد_عبدالله
الرواية بلهجة الليبية
حلقة 13
🔥
🔥 علي طلعة ليلي و علي جية يزن للحوش و في ايده المشروب
شبح لليلي و هيا عيونها عليه
جاي ماشي للحوش
جاته شدتله ايده
ليلي : اشبحلي خيرك يزن 🥺❤️🔥
( عيون يزن كانت لوطة )
شبحلها و قاللها
( ما خيرني شي ) و بكل عصبية
و نحي ايدها بقوة
ليلي : 😳🥺🥺 يزن يزن يزن
و هوا و لا كانه
سكر باب الحوش علي وجه ليلي
و وقف وراء الباب و دموعه حاصلات في عيونه
علي جيت فارس
فارس : خيرك يزن
يزن : ( بكل عصبية ) ما خيرني شي
و حط شيشة المشروب علي الطاولة و خش لداره
و قعمز علي فراشه
( دموع عيونها لتوا لقدام عيني )
ما عرفتش كيف خشت قلبي هكي بسرعة البنت هادي
..🔥 انتقال الي ليلي 🔥
خشت ليلي و في ايدها البخشة و دموعها في عيونها
احلام : بسم الله خيرك
( قعدت تمسح في عيونها )
ليلي : لالا ما خيرني شي هاك البخشة نفضتها
احلام : المهم انتي كويسة
ليلي : لالا و اللهي ما فيه حاجة غير الريح قوي البرا و خشت حاجة في عيني
احلام : تعالي اشربي شاهي معانا
ليلي : لالا ما خاطري بنمشي نرقد
احلام : 🤨 ( هادي خيرها )
( مشت ليلي و هيا كأنها في عالم تاني و تحسسك انها تعرفه ليها سنة هيا حتي رقمه متعرفاش بس حباته حب من اول نضرة )
.
احلام : هيا تفضلي قمور
قمر : مير سي
احلام : شدي يا سخطة
ليال : باهي
احلام : غير نحي التليفون يلي من يدك و بعدين شدي الطاسة
ليال : افففف
( ليال قاعدة تراسل في زين )
قمر ناضت بطاستها للجردينة
احلام : وين ماشية قمر
قمر : بنقعمز شوي في الجردينة بنشم هواء
احلام : باهي
طلعت قمر و قعدت واقفة في الجردينة يلي قدام الحوش
🔥 انتقال الي الشباب 🔥
تعشا فارس بروحه لان يزن زعلان في داره و زين مقعمز هايم في الأخت ليال علي الوتساب
بعد ما تعشاء طلع للجردينة
تلفت لقي قمر واقفة وفي ايدها طاسة الشاهي
جاها
فارس : بس
تلفتت قمر : ☺️ فارس
( ضحكت ضحكة خفيفة )
قمر : خاطري نشد ايده و نشكيله و الله 🥺😭
فارس : شن اديري في هلصقع
قمر : و اللهي قلت خلي نشم هواء شوية خير من طيق الحق
فارس : باهي كويس
قمر : المرة يلي فاتت انت جبتلي شاهي المرة هاذي اني رح نجيبلك تعال للجردينة متعنا تعال
( نادت فارس للجردينة متع حوشهم و جابت طاسة شاهي ليه )
قمر : احلام رد بألك تطلعي اهو قتلك
احلام : باهي حاضر اسمعي ما تنسيش تساليه علي زياد
قمر : باهي خلاص
....
قمر : هي تفضل فارس
فارس : يسلم أيدك
قمر : سلمك
قمر :احكيلي كيف حال اختك
فارس : شروق
قمر : ايه
فارس : كويسة الحمد الله
قمر : الحمد الله
فارس : تعرفي يا قمر اول مرة نشوف صدفة بلدرجة هادي
قمر : كيف يعني
فارس : يعني انتي نفس قمر بس مش قمر نفسها
قمر : هذا لغز
فارس : لا بس و اللهي بجد انتي الخالق الناطق لوحدة كانت حلم حياتي اسمها قمر انتي وياها ما فيش فرق بكل
قمر : اها ان شاء الله ترجع تلقاها
فارس : لو نلقاها مستحيل انخليها أندور عليها للان و للاسف ما لقيتهاش
( كان فارس يهدرز علي قمر و عيونه في عيونها و كانه يقوللها لو انتي قمر نفسها قولي )
( و توتر قمر واضح هلبا كان )
قمر : احم احم
قامت قمر التواصي و ناضت و رجعت
فارس : هيا اني نستادن
قمر : اوكي
فارس : تصبحي علي خير
قمر : و انت من أهله
...
قمر : 🥺 ( انقوله او لا معش عارفة )
🔥 انتقال الي ناهد و شروق و زياد 🔥
تعشوا كلهم مع بعض الا ناهد ما طلعتش من دارها
و التفكير حارقها
ولادها رجعوا لنفس القصة
بنات نور قاعدات في حياتها زي الشوكة في الحقل
( مشكلتي في بنتي شروق و اللهي نموت لو خلتني )
لازم نمشيلها توا و نتكلم معاها
نبي نعرف لوين وصلت العلاقة بينها و بين فارس
لازم
ناهد : الو جمعة
السواق جمعة : الو يا هانم
ناهد : وتي السيارة عندي مشوار
جمعة : حاضر
لبست و طلعت و شروق كانت واقفة في روشن دارها و شافت امها راكبة في السيارة و طالعة
استغربت و تصلت بيها
شروق : الو ماما وين ماشية
ناهد : ماشية مشوار صغير شوي عندي صديقتي في المستشفي نشوفها و نجي
شروق : باهي ماما ان شاء الله خير
ناهد : ان شاء الله
( سكرت التليفون و قعدت تبكي ناهد في السيارة و هيا ماشية لحوش قمر لان تتخيل في شروق لو عرفت ان ليها خوات بنات و يحكولها ممكن تخليها و تمشي 🥺❤️
( تحبها تموت عليها بنتها بنتها )ً
بس هل ممكن شروق تخليها صح لما تعرف ؟
🔥 انتقال الي قمر 🔥
قمر كيف خشت من الجردينة
احلام : مشي روح
قمر : ايه روح
عيونه يا احلام عيونه كانه عارف و الله
احلام : هيا تعالي كان بترقدي
قمر : لالا بري انتي اني قاعدة شوي لوطة مش جايني نوم
ركبت احلام
طق الباب 🔥
تلفتت قلت من بيجي لعندنا في الساعة هادي
فتحت الباب
جت عيني في عينها
طول طلعت و سكرت الباب
درت روحي منعرفهاش
قمر : تفضلي
ناهد : قمر ناصر الزاوي بنت نور
الله الله الدنيا قداش صغيرة
قمر : عفوآ
ناهد : جاية تنتقمي يا بنت نور
بعد سنين جاية تاخدي حقك
كم تبي قولي من مليون لمئة و تقلبي وجهك من هني
قمر : للعلم اني مش فاهمة شن تقولي
ناهد : نفس العيون نفس الملامح نفس قوة الشخصية نفس الحقد يلي كان في عيون امك بزبط
كبرتوا و جايين تاخدوا حقكم تالت و متلت
قمر : قاعدة مدايرة روحي عبيطة
ناهد : استغبي و ديري روحك انك مش قمر بس اني عارفة انها انتي و رح نقولك كلمة حد الله بيني و بينكم لان لو حطيتكم في راسي رح تشوفوا شي عمركم ما شفتوه و احرف من يلي شفتوه
و نزلت من الدروج و ركبت في السيارة
و اني كنت نشوفلها و مستغربة
و قلت في نفسي لازم انحول من الحوش باي طريقة و في اقرب وقت ممكن مش خوف من الحيوانة هادي بس خجل من ان يعرف فارس
خشيت و سكرت الباب و تفكيري كان مشوش كله
🔥 انتقال الي ليال 🔥
و هيا تتصفح في الفيس بلصدفة قالت خلي نفتح إيميل احمد
و للاسف يا ريتها ما فتحت
صور حب مع بنت عمه في كندا
و اغاني حب و المشكلة بنات الجامعة كلها معلقة قهوة فيا 💔💔
قعدت تبكي و مقهورة كيف و ليش المشكلة في ليش 💔💔🔥 شن درت اني
🔥 انتقال الي ناهد 🔥
وصلت ناهد للحوش
شروق: ماما جيتي
ناهد : ☺️ قاعدة نايضة
شروق : انشغلت عليك و الله
( اضبتت بنتها )
تعالي ارقدي معاي
شروق : 😍 هيي
خشوا و اتكوا علي الفراش
ناهد : حتي وليتي عروسة ما ترتاحيش الا في حضني
شروق : ما فيش زي حضن الأم
ناهد : تعالي تعالي تعالي تعالي
شروق : 😂😂😂
..
ناهد : شروق شن رايك نسألك سوال
شروق : اسألي
ناهد : تخيلي ان فيه حد غالي عليك قالك لازم تنسي امك و تخليها
شروق : في اعز منك
ناهد : 😭😭🔥 يا وخيتي
........
🔥 اليوم التاني 🔥
ليال. : هيا وينك يا زين
زين : هيا هيا شوي
ليال : تي هيا
احلام : صباح الخير
ليال : صباح النور
احلام : خيرك اليوم مبكرا و بعدين من تستني
ليال : وووه قداش تسالي
بعدين اسمعي عندي 4 جني
احلام : آسفة ما عنديش
ليال : احسن باي
...
طلعت ليال لقت زين قدامها
ليال : تي هيا
زين : خيرك مزال
ليال : ايه عارفة مزال
زين : باهي مدامك عارفة ليش ماشية بكري
ليال : عندنا ما نديروا هيا
طلعت هيا و ياه و فتحت اغاني في السيارة
( نساني و خيب ضنوني حبيبي
عساها بلعمي عيوني حبيبي )
🔥 انتقال الي شروق 🔥
شروق : صباح الخير ماما
ناهد : صباح العسل و الياسمين
تعالي افطري
شروق : لالا مشغولة
خليها مرة تانية
ناهد : شن صار في موضوع مرت خوك
شروق : خليها تجي اليوم
.
طلعت شروق و كل الطريق تكلم في مالك ولا كانه و ميردش
وصلت الشركة نزلت من السيارة و خشت لقاته في المكتب
مالك : صباح الخير
مشت طول سكرت الباب و جاته
شروق : خيرك ما تردش علي اتصلاتي
مالك : و ليش بنرد عليك يا هانم
شروق : 😳 كيف
مالك : قصدي ليش بنرد عليك اذا تبي شي تلاقيني في الشركة يا هانم
شروق : أها صار هكي
( ما باش يشبحلها بكل )
علقتهم تعصب الحق كل حد يحب التاني بس ميعرفش ان التاني يحبه
للاسف
طلع مالك من المكتب و قعدت شروق متاترة من بكلامه يلي يسكر الرقبة و مش عارفة شن بتقوله
🔥 انتقال الي ليال و زين 🔥
وصلت هيا و ياه للجامعة و اول ما وصلوا للباب متع الجامعة شدت ايده
يزن 😳😳 كان مصدوم صدمة ما تتخيلوهاش
و يقول في عقله هادي خيرها
خشت للجامعة و ايدها في ايده و تشبحله و تضحك
و كل يلي في الجامعة يشوفولها
وحدة من بنات الجامعة آيات : ايوا حني ايوا حني
ليال : هاي
و قعدة ايدها في ايده
بنات الجامعة : هاي شن اخباركم
ليال : الحمد الله
و تتكلم و تشوف لزين
ليال : انتم شن اخباركم
بنات الجامعة : كويسين
آيات : شفتي احمد يا ليال
ليال : ورأس بوك ما نبيش نسمع اسمه و بعدين اني مرتبطة خلاص هذا ماضي و تم
هيا نستاذنكم المحاضرة بدت
خشت المحاضرة و هيا شادة ايدها في ايده و ما تبيش تنحيها
😍😍😍
...
🔥انتقال الي احلام 🔥
احلام : قمر قمر قمر
قمر : هااااا
احلام : خيرك راقدة في الصالة
قمر : خدتني نومة
احلام : باهي نوضي
قمر : هيا هيا اصلا عندي مشوار
احلام : حتي اني عندي الكوافير اليوم بنمشي بكري
( ناضت قمر لبست و طلعت و طول اتجهت لصاحب الوحدة السكانية و في المقر متعه )
قمر : السلام عليكم
صاحب الوحدات السكانية : تفضلي يا هانم
قمر : يزيد فضلك
اني جاياتك في موضوع الحوش اني ان شاء الله علي مدار هليومين رح نطلع منه و الحق نبي اي حوش في اي منطقة نحول فيه حاجاتي
صاحب الوحدات السكانية : باهي استني عليا سبوع تاني
قمر : لالا لازم الأيام هادي
صاحب الوحدات السكانية : فيه حد مضايقكم
قمر : لالا حاشة الجيران بس اني الحق تشائمت من الحوش
صاحب الوحدات السكانية : حاضر رح نشوفلك
قمر : و ياريت في اقرب وقت رد بالك تنسي
صاحب : حاضر
...
🔥 انتقال الي احلام🔥
و هيا في طريقها للكوافير
رن التليفون فا تلفتت لشنطتها و في راجل قدامها يمشي
تصادمت فيه
احلام : بسم الله
تشرتعت الشنطة كلها في السارع
احلام : اني آسفة اني آسفة
الشخص : لا و الله اني يلي اسف
احلام قعدت تلم في الحاجات و هوا يلم معاها
احلام : اني آسفة
الشخص : لالا عادي
احلام : 😍محلاه
ساوت شنطتها و مشت و قعدت كل ما تقص خطوة تتلفت و يتلفتلها
وصلت الكوافير هايمة في الجمال و اللحية و الشخصية
الله 🔥❤️
( و حكت حتي للبنات في الكوافير علي صار 😂 )
...
🔥 انتقال الي قمر 🔥
بعد ما مشت لصاحب الوحدات السكانية
رجعت للحوش و مع المغرب لبست و طلعت للعمل
وصلت للمحل و هيا مش خاطرها تخش للمكان الوسخ النجس هذا
خشت طول قعمزت علي كرسي و قعدت تشبح
شوشو : هاي قمور
قمر : اهلين
شوشو : خيرك العفوا
قمر : خيرني
شوشو : لالا لا انتي متغيرة راه
قمر : اسمع جئ صالح
شوشو : جئ اصلا هوا يلي شاد الشغل انتي شغلك ولا بلهون
قمر :باهي وين قاعد
شوشو : فوق
قمر : بيه في موضوع
...
🔥 انتقال الي احلام 🔥
احلام : ليلي تمشي تجيبيلنا مكسرات و بطاطا من المحل
ليلي : باهي هاتي
احلام : ليال احدفيلي جزداني من فرق
حدفت ليال الجزدان و مشت ليلي لبست تجيبوتي ابيض و طلعت مشت للمحل
خشت للمحل خدت شن تبي و طلعت
و هيا طالعة قعدوا زوز ولاد يلحقوا فيها
الولاد : انت يا غزال
( ليلي كانت خايفة و تمشي بسرعة )
الولاد : تي انت انت يا غزال
و جئ واحد منهم وقف قدام ليلي و شد ايدها
ليلي : نحي أيدك نحي أيدك
و صاحب الولد واقف وراها
..
علي جيت يزن بلسيارة يشوف في ليلي شادينها زوز ولاد
نزل يجري من السيارة طول شد الولد يلي شاد ليلي و ضربه علي وجهه
ليلي : ( قعدت نشوف في سن الولد يلي تنطرت ) و الدم يلي يصب و صاحبه هرب
و يزن قاعد شاد الولد و يضرب فيه
ليلي : يزن يزن خلاص خلاص خلاص الولد حرام عليك
يزن
خلاصصصصص
شدت يزن و دفاته
طول هرب الولد يجري
يزن : مزال انتي
شد يد ليلي بلقوة و ركبها في السيارة
و قعد يجري بلسيارة
( في نهاية الوحدة السكانية فيه زي الجردينة فيها نافورة )
نزل من السيارة و نزلها و شاد ايدها بلقوة
ليلي : زين أيدي أيدي اههه 😭😢
يزن : ( و شكله ولا كله احمر 🤬🤬
مني هذا يلي كان شاد أيدك
ليلي :و اللهي ما نعرفه هوا يلي شد أيدي
يزن : ( فنص فيها )
تعرفي اقسم بالله العظيم واحد يحط عليك ايده الا لما نكسرهاله حتي لو كان بوك
( و قاعد شاد ايدها )
ليلي : أيدي أيدي 😭😭 اهههههه
فاق يزن و سيب ايدها
و هيا تبكي بلعبرة ايدها ضغتها هلبا
يزن : اهو قتلك
ليلي : انت من قالك أوقفني اصلا
مش ما تبش تشوفني و زعلان
و بعدين اصلا انت منو اني حتي اسمك مرات ننسي فيه
و توا جايني تقولي معش حد يحط ايده عليك
انت منو ( و تتكلم و تبكي )
يزن : اني يزن يا ليلي
و دفها ليه
ليلي : 🥺😳
و قرب عليها
يزن : حتي اني منعرفكش و ما نبيش نعرفك
لكن من اليوم تخصيني
ليلي : روح بيا 🥺
مشي للسيارة
لحقاته و ركبت في السيارة
قعدت تشبحله و هوا معصب و يسوق
وصلوا للحوش
يزن : هيا انزلي
ليلي : شكرا
( ما ردش عليها )
نزلت و قعدت تتلفت و تشبحله
كيف نزل من السيارة و خش الحوش
خشت الحوش
احلام : وينك سنة تجيبي في مكسرات
ليلي : ورأس بوك شدي
عطت لأحلام المكسرات و ركبت
احلام : هاذي خيرها ديما سرحانة
شن العيلة هاذي
🔥 انتقال الي قمر 🔥
قمر : السلام عليكم
صالح : خشي يا قمر
قمر : كيف حالك أستاذ صالح
صالح : كويس الحمد لله
قمر : شن صار في الاستقالة
صالح : اي استقالة
قمر : استقالتي
صالح : قاعدة مصرا
قمر : للاسف ايه
صالح : بارك الله فيك يا قمر تبي تخربيلي بيتي
قمر : و اللهي لا و اللهي لا عمري ما ننسي فضلك الكبير عليا في يوم من الأيام و بعدتني علي طريق الدعارة و اشياء تانية بس لامتا بنقعد نشتغل هكي اني نبي نفتح اي محل نسترزق منه و ناكل رزق حلال
صالح : توا كيف فقتي و عرفتي ان هذا رزق حرام بعد الفلوس و الفيلا و الرفاهية
قمر : اني قاعدة مصرا علي الاستقالة
خش شوشو و احني نهدرزوا
شوشو : انتي شني
قمر : 🤨 خيره هذا
شوشو : جاية توا و مدايرا روح شيخ شويطر علينا
قمر : انت شن تقول
شوشو : تبي تستقيلي بلناقص اقلبي خليقتك
بس و رحمة هذاك الغالي رح تشرفي يلي عمرك ما شفتيه
قمر : شن يلي نكلمه يقولي رح تشوفي يلي عمرك ما شفتيه شن بديروا يعني بروا اعلي ما في خيلكم اركبوه
و طلعت و سكرت الباب بلقوة
شوشو : توا تشوفي اعلي خيلي كيف شكله يا قمر
🔥 انتقال الي احلام 🔥
و هيا تنضف فوق الدولاب ضربت المكنسة التاكوا متع الضي و نطفت الفيلا كلها
و للاسف غباء احلام نحسابه صارت ماصة
ليلي و ليال يعيطوا
احلام : اسكتوا اسكتوا خلاص توا انادي واحد من جيرانا
مشت طول تجري لحوش الشباب طقتقت فتحلها فارس
احلام : سامحنا يا وخي ممكن تجي تشوفي التاكوا صارتله ماصة
فارس : حاضر هي
مشي يجري معاها للمطبخ
اول ما شبحه لقاه مصكر
فارس : هذا مصكر
احلام : كيف يعني خرب
فارس : 😂 لا في حد مسكره
ولعه ولع الحوش كله
احلام : ما شاء الله كيف درتها بلسرعة هادي
فارس : انقولك كان مطفي
احلام : 😂 اها اكيد أني طفيته بلغط
نزل فارس من فوق الطاولة
احلام : سامحنا يا وخي تعبناك
فارس : لالا ما فيش اي تعب
علي جيت ليلي و ليال و هما ينادوا احلام احلام
احلام : تعالوا تعالوا
فارس : 😳❌ انتي احلام
احلام : ايه اني احلام و هادي ليلي و ليال
فارس : ( صدمته كانت كبيرة هلبا )
أمانا وين قمر
احلام : قمر في الشغل
فارس : أها
اني نستادن
طلع فارس و قعد مقعمز واقف قدام الحوش
( يستني في قمر ❌❌❌❌❌)
🔥 انتقال الي قمر 🔥
طلعت من المحل و اني معصبة من كلام شوشو المستفز و لازم اندير حل في المحل و في الحوش الأغبر هذا قبل ما يعرف فارس
.
ركبت السيارة و طلعت للحوش
وصلت لقت فارس واقف قدام الباب
استغربت
نزلت
قمر : اهلين أستاذ فارس
فارس : اهلين قمر .....يتبع
رح نشوفوا رد فعل فارس لما عرف قمر
و رح نشوفوا شوشو شن رح يدير
و رح نشوفوا ناهد شن رح ادير
و هل ممكن خوات قمر يعرفوا أختهم شن تشتغل و شن موقفهم
ان شاء الله حلقة غدوا
رأيكم في الاحدات
تصبحو علي الف الف الف خير ❤️❤️🔥