ازمة ضمير

البارت 33

ازمة ضمير ... البارت الثالث والثلاثون
«للكاتبه روزايه»

‏اي يـ گلبي الصوچ منك
ليش گتله اشما تغيب اتظل حبيب
وليش گتله الشمس وكت المغرب احلى
و علميته اعله المغيب....
...

ثريا.. سد الموضوع فاروق وكام مايتناقش والحجيه كالت وهسه شلون المره واعدتهه خايبين ماتحجون  شجاكم سكتو...

ادهم.. والله ياجده فاروق من كال لا يعني لا لا انه ولاغيري ياثر علي دحكهه ماترهم...

امنيه.. ها بيبي شراح تسوين وانطيتي وعد للمره جنت احجي بهمس ويه الحجيه ما احس غير الكفخه ع راسي..

...كومي منا من خليتي روحج بنص السالفه لصتيهه ونعلتي والديهه ...

ادهم.. هاا هااا ليش ضربتيهه..
الحجيه... تتمسهد عليه هاي الصفيره يولو حاجوني شكل للمره الله يرحم جدكم ما عاف غير هاي الصفه بفاروق سوده عليه حليمه شلون تحملتي...

ثريا.. باءت كل المحاولات بالفشل ثاني يوم كعدنه الصبح والحجيه تلوب شلون واعدت المره وهسه تنتظرهه وشراح تحجي تفشلت ماتوقعت فاروق هيج شديد..

اذن اذان الظهر ومنتظرين اخوتي يجون الحجيه راحت للغرفه نامت وصاحت يول ثريه حدري هين...

رحت لكيتهه متغطيه كالت من يجي اخوج ابو راس اليابس كليلو الججيه متخربطه وضغطهه مرتفع لان تفشلت ويه المره وهذيج تنتظرهه...

ثريا.. جده ما اعرف اجذب يكشفني فاروق ماتعبر علي..
... يولي جذبه بيضه هسه احنه شورطنه وياا  ..

ثريا... امنيه تضحك ودكلهه هسه يكشفوج وهي سوت نفسهه مريضه اجو اخوتي كلهم كعدو على السفره سالو ع الحجيه ماعرفت شكول كوه طلعت الحجايه وكتلهم ع حالتهه...

ادهم.. فاروق يمعود لايروح يصير بيهه شي انطتهه كلمه بعد..

ثريا.. جان مدنك ياكل ولاحجه ابد ولاجاوب ادهم عاد نفس الكلام اوس وهو ساكت ...

ايوب.. يول فاروق سويتهه قصه جثير بيوت عدهم حرمه تساعدهم واذا بتهه وياهه هسه قابل بتهه شراح تسوي..

فاروق.. ما ادري تفكيركم شنو ... كال الحمدلله وكام واحنه واحد يدحك بوجه الثاني ...

لميت السفره ورحت للحجيه سولفتلهه شالت البطانيه وكالت اااخ يايمه انعل امهه وابوهه التاخذ فاروق كومي يولي جيبيلي لكمه راح تموع روحي...

هي تحجي وادهم طب للغرفه يضحك كالهه هاحجيه والله وطلعتي موهينه بس انه اكلج لاتحاولين اذا مو بقناعتو...

الحجيه.. يول فضحتنه هسه يكول جدتي تمثل بس يايمه المره تنتظر من الصبح شكلهه شحجي..

ثريا...طلعت من الغرفه  وصعدت لفاروق لكيتو يدحك اخبار كعدت بصفو كتلو فاروق الحجيه فشلانه لان هي انطتهه كلمه ماتكدر بعد وهي مقهوره...

فاروق.. يا ثريا بيتي فندق والله ماترهم المره عدهه بنت واحنه مامحتاجين خدمه بس علمود انساعدهه...

هاهي هو اني اكدرلج انتي والحجيه خلي تجي وان شاء الله خير وهسه انه انزل اخبرهه...

نزل فاروق باس الحجيه من راسهه وطلع وهي دكول خايبات حسيت روحي مثل الجهال من يزعلون على لعبه ...

كالت باجر اروح اجيبهه هسه عصريه نخليهه ع باجر من الصبح ...
...

ثريا... اسماء تجينه يوميه العصر واكعد وياهه رغم الرزايل مال الحجيه ولسان امنيه بس مايفيد كمت احبهه هاي البنيه واريد اسولف وياهه...

بنفس اليوم العصر كالت انه شاطره بالطبخ لاتسووين عشا اسويلكم بيتزا وحلاوه وانه العبيطه كيفت هم اخلص من العشه ...

للمغرب وجابت صينيتين بيتزا وحلاوه اتشكرت منهه وراحت سوينه عشه بسيط بس اضافه للبيتزا...

فاروق والحجيه وايوب ما اكلو بيتزا واحنه البقيه كلنه اكلنه والحلاوه ايوب بس ضاكهه موكلش يحب الحلا كتلهم جيرانه دزوهه ما عمقوا بلاسئله ...

من هذا اليوم وروحي صارت مفرفحه ع اسماء احب اكعد وياهه واسولف وعلاقتي بامنيه موشي لان ماتقبل...

اجتنه العصر وعادي اخذت راحه بلبيت وانه الغبيه منطيتهه كامل الصلاحيه تفتر وتناقش شكد حجت الحجيه مايفيد...

وصلت بيهه طردتهه علني وامنيه نفس الشي وانه اروح اركض وراهه حته ارضيهه...

جانت يمي وتسولفلي ع اهلهه شلون ماخلوهه تدرس انفتح الباب وفات ادهم بس دحكهه دنك وطب ليجوه هي بسرعه كامت كالت خلي انفوت جوه ...

اني وياهه مثل الطلي وين ماتروح وراهه جريئه بشكل موطبيعي سلمت ع ادهم الواكف بالمطبخ رد السلام عادي وامنيه مشتعله نار...

امنيه.. واضحه وضوح الشمس تملقهه واللواكه مالتهه واضحه تريد ادهم وتحاول تقلل من شأني...

عصبت ع ادهم وكتلو شوف حل ويه ثريا لان متعمده اتجيبهه رغم ما اريدهه وعينهه صلفه ...

ادهم... انه مونبهت ثريا عليهه انه هم ما ارتاحلهه..
امنيه.. مايفيد تتعارك وياي اذا حجيت عليهه ومخليتهه تسرح وتمرح بكيفهه حته اطب للغرفه وثريا مكيفتلهه...

وفوك كل هذا هي مبينه عينهه عليك شوفهه شلون صلفه والله اذا ماطردوهه انه اسحلهه برا...

ادهم... يحجي ويتقرب واني ارجع ليورا لحدماطخيت بالحايط وهو مثبت ايده ع الحايط كال يعني افهم انتي تغارين؟؟

امنيه.. لا ع شنو اغار بس هيج وحده صلفه مايصير تقوي علاقتهه بيهه...

ادهم.. هسه عوفيني من هاي المدري شسمهه حاجيني تغارين؟؟

امنيه.. اعرف هاي النظرات الوراهه مكيده خليت ايدي على صدره اريد ادفعه بس لزمني من خصري وقربني علي ...

تلاويت وياا اريد افلت نفسي من عنده الحجيه كالت خليج عزيزه لاتسمحيله باي شي وردت اطبق كلامهه...

قرب راسه ع ركبتي واني مدنكه وبدت شفايفه تلامس بشرتي بحنيه وايده يحرك بيهه بهدوء على خصري...

بس ايوب هادم اللحظات صاح ادهم يول وينك ...

خلا ادهم بسرعه ابتعد وصاح وقزرقط الله مسلطك عليه يول. وفتح الباب وطلع ...

عدل نفسي وطلعت لكيت ايوب واكف باب المطبخ من شافني كال بهاي حقك يخوي لو انه ابمكانك الا اطيح حظك...

ادهم.. دمشي شيجي من وراك غير طيحان الحظ طلع ادهم لان جماعتو جايين وهاي الحوته اسماء رايحه...

بليل كلنه كاعدين والحجيه كالت اسمعوني يمه هاي اختكم صايره تخوط وحدهه ومصادقه هاي الجنهه غراب اسمهه اسماء ...

ايوب.. هاي مامرتاحلهه يولي ثريا صادقتي وحده بيهه خير شنو هالنماذج..

ثريا... شبيهه البنيه فقيره والله بس انتم مدري شجاكم وياهه ماساءت ادب بس  انسولف...

فاروق.. ثريا انتي موصغيره حته انعلمج مدام الكل نبهج منهه يعني كلامهم صح انه مااعرفهه البنيه ولا حته مدحكهه شلونهه بس اذا دحكتيهه ساءت ادب اطرديهه...

ثريا.. لا تحكمون على انسان ظلم مامسويه شي والله لان امنيه ماحبتهه لازم اعوفهه هي صديقتي...

ادهم.. ثريا لا ادخلين امنيه بالنص انه من اول يوم حذرتج منهه وكتلج لا تنطيهه وجه هالحجي الزايد شنو

امنيه.. اني شدخلني بصديقاتج بس انتي تدرين ليش ما احبهه واعتقد اكثر من مره قللت من شاني كدامج وانتي ساكته...

ادهم.. شكالتلج..
امنيه.. كلما تجي تعيرني بالدراسه ودكلي انتي امنيه وشلون متحمله حياتج وحته سمعتهه كالت فوكاهه مخطوبه لواحد يسوه راسهه ...

ابتسم فاروق ودحك ع ادهم الي التفت على ثريا بصوت حاد كدامج هالحجي صاير وانتي ادافعين عنهه...

فاروق.. امنيه انتي داخلج نظيف وادهم الله يحبو وخلاج بطريقو كلشي عندج بريء لا ادوخين نفسج بيهه ماعاش الي يقلل من قيمتج واحنه موجودين...

وانتي ياثريا تدرين بيه ما اقبل بالغلط لاتخلين وحده مثلهه تخرب علاقتج ويه امنيه..

ادهم.. ثريا هذا الموضوع ينسد مدامهه مامحترمه نفسهه عوفيهه مالكيتي غير هيج نماذج تصادقيهه ..

ثريا.. سكتت ماحجيت بس ضجت من انانيه امنيه هي منو وتقرر اصادق والغي صداقه اسماء بنظري طيبه ومرحه وامنيه هي الشايفه نفسهه...
...

ثريا... ثاني يوم الصبح راح اوس والحجيه جابو المره وبتهه  حضرتلهن مكان بغرفتنه جانت المره مستحيه حيل وكلساع وكالت والله زحمه اشتغل بس ما ابات ...

الحجيه.. اسكتي بشيره هسه تتعرفين عليهم مثل جدهم الحجي تذكري الوكف وياج هذوله احفاده...

بشيره.. شلون ما اتذكر لو ماهو ما حصلت بنتي اخذوهه مني وطلعوني بشارع الله يرحمو هو الاخذني وجابني لاهلي وكال بنتج انه اردهه الج..

الحجيه.. هذوله مثل جدهم من كرم وحكمه اطمئني نكعد بهاي الغرفه هو اسبوع بس يترتب البيت...

ثريا... كاعده واحوص شلون يدحكوهه ما ادري شحس بهاي السالفه كله من ورا الحجيه ليش مانحجيلو الصراحه ونكلو عليهه ليش هيج نسوي ...

امنيه وجهه ثكيل عليه وتضرب بسامير بيه دكول كل الي تعجبهه ثريا اتجيبهه للبيت وتاليتنه نصفى بشوارع ...

ماجاوبتهه لان صايره امنيه عصبيه بشكل وادهم عندو دوره بالبصره وماموجود اليوم راح من الفجر هي تشتاك لادهم واحنه نوكع بيهه...

بلشنه بالشغل ومحد بالبيت ولا واحد العمال دمار انظف بالفوك وهي وامهه ويانه لان كتلهن اخوتي ماموجودين...

نزلنه علاكه بس كسر طابوك شايليهه انه وياهه ذبيناهه بالحديقه وردنه انفوت تلكانه ايوب بالباب جاي..

اخوي البطل مايعرف شيسوي جان لازم علاكه بيهه مسواك فلتت من ايده وكعت قوطيه المعجون ع رجلو وماكال اااخ ...

هي بسرعه ركضت جوه وانه واكفه صافنه ع ايوب ومبتسمه ع حالتو...

ايوب.. يولي ثريا هاي شارده من الجنه بسلا بنت الحرمه..

ثريا.. هااا هااا ايوب الي اعرفك ما ادحك للبنات ..

ايوب.. استغفر الله يولي هاي توكع اخوتج بالمعصيه روحي من هين ولاتخليهه تطلع كدامنه ...

ثريا.. ميته ضحك على ايوب الي بعدين حس بالم رجلو ويصيح اخ طلع ايوب وهي راحت كعدت بالغرفه ...

سولفت للحجيه كالت هذا ابو سمره يصيد صيدات خايبه موالو البت لا يروح يوكع اخوج وتنكلب علينه...

كلنه ننتظر جيه فاروق وبلكي يدحكهه وينعجب بيهه احس الجاي انسوي موصحيح بس لعلى وعسى تعجبو ويفكر يتزوج ....

كملنه شغل بس موكله لان الفوك مكلوب وكالو انطلع عمال ينظفو بس الحجيه كالت لا شيرادلو هي بس كاعده تنطي اوامر...

واكفه اسوي غده وامنيه تسوي زلاطه وعاقجه الوجوه التفتت عليهه كتلهه يولي مدكليلي شبيج وجهج مايكصو طبر...

بعدني احجي وبجت ذبت السجين من ايدهه وغطت عيونهه وكامت تبجي بسرعه غسلت ايدي وكعدت كدامهه جريت ايدهه ...

يولي امنيه شبيج منو وياج ليش تبجين؟؟ اسماء ماتجي بعد عليمن ضايجه..

امنيه.. ثريا حلمت بنيران ... خير يولي شحلمتي..

امنيه.. حلمت بيهه تعبانه ومريضه ويطلع شي من حلكهه ابيض وتصيح ع ماما ورؤى بس مايسمعوهه اجيت اركض عليهه مدت ايدهه الي تريدني اساعدهه شفت ايدهه سوده مثل الفحم وفزيت مرعوبه...

ثريا.. استغفر الله شنو من حلم يولي كومي احجي لجدتي خاف بيهه شي شلون اجت مثل مزنه مطر كلشي مافهمنه منهخ ولاحجتلنه...

ثريا... رحنه للحجيه سولفتلهه امنيه الحلم كالت الله يحفظهه معناتهه موزينه وجاي تتمنى الموت شبيدنه عليهه ماتقبل انساعدهه ..

امنيه ظلت ضايجه ومالهه خلك وما الومهه رغم الحجي الحجته وتعاركت وياهه بس تبقه اختهه مانعرف شي عنهه...

شذره وامهه بغرفه الحجيه اجو اخوتي وكتلهم ترى هنا المره هي وبتهه صبيت غده  هن والحجيه وحدهن واحنه بالديوانيه تغدينه وكل واحد راح لشغلو...

للعصر وامنيه تخربطت صار عدهه هبوط ركضت اريد اسويلهه عصير برتقال مخلصين برتقال كالت الحجيه انه اروح اشتري من المحل...

لبست وطلعت اشو الحجيه تاخرت عيني ع الباب كلساع واكول هسه تجي وهو المحل خطوتين من بيتنه...

وين راح ياذن الاذان يله اجت الحجيه بس فتحت الباب وادحكهه بس شايله برتقاله وحده بيدهه ولافه عباتهه جوه جنحهه...

تلكيتهه بلاسئله وين تاخرتي جده وين البرتقال؟؟

الحجيه.. ياخايبه اشتريت كيلو لان ماعنده كلو ذابل واجيت امشي والعلاكه طلعت مشكوكه وتكومن كلهن بالمجري وبس هاي اجت بيدي...

لازمتهه وتفر بيهه دخذيهه عصريهه حتلو تصير استكان شسوي مالحكت عليهن كامن يوكعن بالمجري...

ثريا..  خربت ضحك على وضع الحجيه الي راحت كل هذا الوقت واجت ببرتقاله وحده...

عصرتهه لامنيه وانطيتهه شويه احسن لان اكلت وعلكت رجليهه...

كمت اريد اسوي عشه غاز مخلصين صحت شذره تشيل القنينه الي مخليهه بالممر اجت وياي شلناهه وظلت يمي بالمطبخ تسوي بتيته...

مطمئنه اخوتي كلهم ورا الاذان يله يجون حته ماسمعت الباب من انفتح ما احس غير فاروق شايل علاليك المسواك وواكف اباب المطبخ...

اجت عينو على شذره وبسرعه نزلهه وكال السلام عليكم البنيه حته ماردت السلام بس صافنه وعبالك دحكت شبح كدامهه ...

تعدانه فاروق وصعد كتلهه هذا اخوي فاروق الجبير هي بسرعه كالت متزوج؟؟؟

ثريا... لا محد بيهم متزوج بس ادهم خاطب امنيه..
شذره... اني راح اروح يم ماما خاف يجون اخوتج راحت للغرفه وانه ادحك عليهه

البنيه تفاجات بي وهو ولا يمو ادري شوكت تهتز معقوله باجر من يتزوج هم يعامل زوجته بهالاسلوب الجاف والبارد...

ويه نزلتو من الدرج صار كدامو وانه واكفه اباب المطبخ دحك عليهه بنظره خاطفه ومر من يمهه وهي دخلت للغرفه...

اجاني كال شحجينه ياثريا بعدنه اول يوم والبنيه كدامنه ماعوزنه قهر يولي ...

ادري يا فاروق شجاك بليد المشاعر خلاني صافنه معقوله اشو كل الزلم تهزهه النسوان بس اخوي ولايمو حته كمت اعد بلاسبوع هسه يخلص ومايتحرك ونطلع بخساره...

بليل كعدنه بغرفه الحجيه واخذنهه يسولفن ع ايام قبل وهي شذره ساكته هادئه وماتنبز بالكلام حبيتهه حيل كولت امنيه انتي منو ماتحبيهه...

ثاني يوم كالعاده محد اكو وبدينه نشتغل انطلع الانقاض نخليهن يم الباب من الداخل وكالو انجيب عامل يطلعن بس انزلهن من فوك وكلساع اتهدد ع الحجيه لان ماخلتوهم يجيبون عمال دكلهم سهلات...

شايله طاسه جبيره مال بنيان شمرت التراب واريد ارجع انزل بعد بس الانقاض راح توصل لنص الحديقه لزمت بيدي حديده وبديت اشيل بيهن...

دحكت بنص هاي الانقاض وبلاحرى بالكاع يعني مو من الي انزلهم فد مجموعه اوراق وملفوفات بقراصه لونهه اخضر مثل اللاستيك...

اخذتهن وادنيت بنص الحديقه كلهم تراب بس مابيهم مي نفضتهم حيل وكعدت على الدرجات فتحتهم جانن عباره عن 4 اوراق متروسات كتابه بقلم جاف ومكبوسات من فوك صايرات مثل الدفتر...

وكعت عيني على بدايه الورقه الكلمات القريتهن بلبدايه جانت كفيله بظهور الصدمه ودكات كلبي زادت ...

بوسط الورقه اول سطر مكتوب اني نيران اذا لكيتو هاي الاوراق انطوهه لقيس وياريت الكل يقراهه بس الورقه الاخيره امانه لاتقروهه بس قيس يقراهه  ....

بسرعه طبكتهه وكمت اريد اروح للغرفه اقراهه على كيفي ماكدرت اتحمل رجعت فتحتهه وكملت قراءه السطر ...

مكتوب اني ما اكدر احجي اي شي بس كدرت اكتبلكم وتحملت الاهانه والكلام الي راح اسمعه من عدكم بس بسبيل اكدر اوصلكم هاي الرساله ....

اجاني صوت الحجيه تصيح ثريا طبكتهن وضميتهن بصدري واحس كل جسمي يرعش معقوله هاي الاوراق راح تبين حقيقه نيران...

وشلون لكحتهه اتذكرت من عثرت ودنكت معقوله خلتهه بالكاع وليش دكول ما اكدر احجي اكيد موضحه كلشي بهاي الرساله...

ما انطتني مجال الحجيه ابد تريدني انخلص الشغل من وقت وانه بالي كلو يم كلماتهه شراح تحجي ومبين الحجي طويل لان ٤ اوراق وجه وكفه مكتوب بيهن يعني نيران حاجيه كلشي ...

ردت انطيهه لقيس بس كلت اقراهه يله وليش طلبت الورقه الاخيره محد يقراهه بس قيس والله عقلي افتر وماجاي يصير مجال افتحهه...

طلعت حجتي اريد اروح للحمام هستوني طبيت واندك باب البيت وهن فوك اضطريت اطلع طلعو جهال يريدون الطوبه ...

كلت لو موتصيح الحجيه الا اقراهه ركضت ورا البيت بالممر الخلفي ربعت بالكاع وكمت افتح وحده وحده واقراهه...

من اول سطرين قريتهن نزلت دموعي حاره بحراره گلب نيران اريد اكمل كلامهه الي كاتبتو من كل گلبهه ما اكدر  احس الهوه شح عليه....

مجرد قراءه هاي الكلمات تخلي الانسان ينهار شحال الي مر بيهه وعاش احداثهه ...

بسرعه طلعت التليفون ودكيت على قيس ما جاوبني دزيتلو رساله قيس نيران تركت رساله الك ولازم تجي تقراهه...

ورجعت اكمل قراءه كلماتهه الطرزتهن بلوعه والم وانكسار وهي ادون حلمهه المذبوح ....

يتببببع... متابعه شيقه