24
زهرةنيسان
بقلم سهير رائد
نيسان من عرف بية بنية كلش تغيير يضحك على طول يسولف بالبنات
كلساع مطلع گوگل ويدور بدلات
عبالك وحدة مگطوع رحمها من الخلفة وصار عدها طفل فرحته متنوصف ابد
كلها ملاحظتها ومرات اني اضوج من كلامة ويصير عندي ملل من گد ميسولف بالبنية
بس جنت احاول اگعد يمة من يفتح تلفونه اريد اعرف شلون افتحه و اشوف شبية مابيه
مالگيت حيلة اخذ موبايلة بس أنسولف عن الحمل ومن اولد والتجهيزز
يعني احاول استغل هلشي
جان متمدد على القنفة ويتابع اخبار الحرة ساعة ثمانية
بقيت احوص شلون افتح موضوع وشلون إبدي
لزمت موبايلي لگيته مصفر شحن ههههه
صحت ياااا حرامات
هو دار وجها شبيج خير
عصرت روحي وگلبت خلقتي علساس مقهورة
وهو يخاف انقهر خاف البطني تتاذة الخاتون هههه
گتلة داكلب بليوتيوب عن الحمل وطفى موبايلي موضوع كلش مهم الوحدة دكتورة اسمها رولا قطامي اوووف والله ولاشي يجي عدل وياي ماعندي حظ وگمت ابجي هههههه
نيسان ..
طفر واجة شبيج صدك جذب تبجين علمود فديو
لاتنقهرين هااج موبايلي بس لاتبجين شبيج طفلة انتي صايرة على كلشي تبجين
رفعت راسي مسحت دموع العيارة
حبيبي هاي هرمونات الحمل بسرعة اتاثر وهاي الهرمونات خطيرة احتمال اذا اضوووووج كُلشششش الطفل هم يتأثر 😒
وسحبت الموبايل من ايدة
افتحه اليه
نيسان ... اي هاي بصمتي
رحت عليوتيوب وهو كاعد بصفي متحرك
نيسان .. اكتبي اسم الفديو
هاا نيست شسمة اكتب اسم الدكتورة وبلكي الگاه
نيسان اوك .. انشوفه اني وياج
بگلبي خرب لشتگ دگوووووم اريد افتش منا ومنا
بقيت اشاهد فديو وهو يمي متحرك واني عيني صفح علية وادعي ربي بلكي يگوووم هههههههههههه
وأجة المنقذ صااح مهيب نيسان ابوي يريدك تعال بسرعة؟؟؟
نيسان .. خير وگام علسريع طلع
اني بعدة مواصل للباب طلعت من اليوتيوب
على الواتساب ماكو شي فايبر ماكو شي ماسنجر ماكو شي
مكالمات ماكو شي
رسائل اممم اكلب هم ماكووو شي افففففف كلشي ممخلي خرب
طلعت للاستديو اباوع على صورة
صور وي اصدقاءة
صورة يشرب نرگيلة؟؟ وعاكسة صورة بنية
اني الك يانيسان هاااي منو وين ركزت بالصورة عبالك بيت او شقة الوراة شو ممفهومة الصورة
بسرعة رسلتها لموبايلي
رجعت للواتساب أگلب اتأكد گلبت بهواي رسائل اخر شي لكيت رسالة كاتب شوكت تجين
رقم ممسجل ايا حقير لزمتك ياخائن
گمت ابجي
طلعت من الغرفة لكيتة يسولف وي ابوة
واذا انزل واني ابجي راح تصير مشكلة
رجعت بخطواتي للغرفة وسويتها مناحة وي روحي وياحقير ويانذل ولاابقى بالبيت
اني حاسة انت تخوني اعرفك ذيل الجلب مينعدل نگسسس
واطلع ملابسي بجنطة صغيرة گًوة جريتها
اشيل بالملابس بلا وعي واخلي بالجنطة وإبجي واگول عندي الدليل اي لزمتك ياخاااين
فتح الباب نيسان دخل صافن علية
باوعتلة ودموعي عشرة عشرة تنزل
رأد يفتح حلگـة صحت قبلة أششششش اسكت ولا كلمة
اخذني هسة لااهلي
نيسان متفاجئ وردة فعلة مخربطة
حبيبتي يعني الصباح رباح وهو صار زين هسة ومحد بيتكم وين نروح للمستشفى
مااكدر اخاف عليج ...
مدري اني سمعت بالمگلوبي مدري هو سكران
مافتهمني شبية
صحت انت شبيك هسة توديني لااهلي عرفت كلشي
نيسان .. تقدم تجاهي وحضني بقوة
لاتضوجين والله حدوري زين ؟؟؟
يا حدوري شبيك
نيسان .. اخوج انتي تبجين علية
رفعت راسي بسرعة وصحت شبية حيدرررررر
نيسان ..غير مسوي عملية
شنننو وگمت اضرب على وجهي حيدر ررر شبية حيدررر
وگعت للکاع نيسان لزمني بقوة جوري على كيفج وداعتج زين مابيه شي زائدة دودية وشايلها وحاجاني قبل شوية
لا لا جذب هسة توديني اشوفه ووين حاجاك تلفونك عندي
نيسان .. من ابوي شبيج جوري لا تضغطين على نفسج والله زين وعملية سهلة جدآ
ماعليه هسة توديني گمت اصيح بأعلى صوت وديني اريد اررروح طلعت برة الغرفة وهو يجر بيه شبيج يمعودة تخبلتني گتلج الصبح لتركضين
عوفني انت ماريدك ودوني لاأهلي هسة أكيد حيدوري بيه شي وتجذبون عليه فقدت گمت أصرب على رأسي اتخيلت حيدر لاسامح الله ميت ويجذبون عليه....
بقيت ابجي ويسكتون بية وسمعت عمي يتصل وفتح سبيكر وعالي الصوت وصوت بابا رد روحي
عمي يگله هاي تخبلت من گللها نيسان
بابا وصوتة بالتلفون لاحبيبتي مبية شي الصبح يطلع انشاءالله نامي وارتاحي والصبح تعاي
هداءت شوية واستقر جسمي
بقيت الليل كلة كاعدة وابجي نيسان حاول يخليني انام جنت حاقدة عليه
بقيت بفراشي وغفيت بعد ماتعبت ونفسي تلعب من البجي
كعدت على صوت نسيان
جوريتي كعدي حبي راح تصير بالتسعة وبعدج نايمة
فزيت بسرعة
نيسان .. على كيفج حبي
غسلت وبدلت ونزلت اركض لكيت بيت عمي كلهم كاعدين منتظريني يرحون ويايه لبيت اهلي
ومرت عمي مسويتلي لفة وبس نزلت صبت جاي
كتلها عمة ماريد شالهن نيسان ويانه بالسيارة اكلهن
الطريق كلة ساكتة سالفتين بالي
سالفة نيسان وسالفة حيدر
وصلت لبيت اهلي قبل الكل نزلت للبيت ودخلت گبل للمطبخ محد موجود
بالصالة سمعت صوتهم دخلت واني ابجي دنگت على حدوري وابجي وابجي وحدوري وجها اصفر سودة عليه
ولاحسيت ولانتبهت خطار يمنا مدري منو اثنين زلم😆غربة
بس حسيت نيسان يكلي ثولة انتبهت بحقد اريد اتعارك هههههههه
من شفت عمي وولدة يسلمون
انتبهت ذولة منو وطلعت ركض للهول لگيت ماما حضنتها وابوس بيها وابجي واضحك
ساعة ماطولو عيالي وراحو عطلهم بابا ولح عليهم مقبلو أبـد يبقون
نيسان مدخل يم ماما ولا سلم عليها
اني كلش حزت بنفسي وانقهرت وضجت وسويت نفسي ما ادري ولا منتهبه بقيت ساكته وادعي كون ماما متبقى تحجي ولا تگول وتعتب وتصير سالفة وعركة مثل كل مرة بينها وبين بابا من ورا نيسان ...
اول يوم جان متعب خطار وحدوري يبجي مدري شبيه يكول بطني توجعني
بليل يمنه ام زهراء وزهراء كملنا تنظيف اني وزهراء وهيا راحت
واني سبحت وذبيت روحي بالغرفة نمت مادري مم التعب
گعدت تقريب الخمسة المثانة مليانه ورحت ورجعت
سمعت الاذان هم صليت
ورجعت شفت موبايلي لگيتة مشتعل جدة من اتصالات ومسجات نيسان
بين الاشتياق والرزايل
ماهتميت لان اني زعلانه ومقررة مارجعلة واتذكرت خيانته هههه وگمت ابجي وادعي
الصبح عادي جان ساعدت ماما بالغدة وهيا مخلتني اغسل امواعين وتسئلني تتعبين بالشغل مرت عمج شتشغلج
استجوابات وكذا😁
وجنت اجاوب بكلمة اي لا
اي
لا
هيا ضاجت مني كلش هههه
اني ماكدر احجي كلشي التريدة مني
هيا تريد تعرف ادق التفاصيل عن بيت عمي
واني مااحب اسولف سوالفهم عيب حتى لو لماما
لان ماما اخر فترة كلشي التعرفة حتى لو شي تافه تگوم تعيير بيه وتسوي بيه مشاكل
اني ماخذة حذر كلش بهيج سوالف
وعن علاقتي بنيسان تتمنى تلزم زلة او كلمة
حتى تبقى ترزلني وتحجي عليه
جنن اتمنى احجيها او اشكيلها بس ماشوف عدها رد يطمني او يريحني او كلام يسعدني منها عن حياتي
كلمة والثانية تگلي هسة يعوفج هسة يخونج هسة يطلگج
لهيج اني ما حجيت عن الصورة والرسالة اللي بالواتساب وحتى لبابا ماحجيت
بقيت اربعة ايام يمهم نيسان يخابر مااجاوب يراسل افصل النت
لحد ما فد يوم دزلي رسالة بتهديد اذا ما اجاوبه يجي يطيح حظي يم اهلي
خفت منه ليسويها هلمخبل هذا
جاوبته
بس فتحته رزلني رزالة غسل ولبس
اني سكتت
خليته يگمل
اسمع نيسان انت لتسوي روحك انت الصح وابو الراهي ترا اني عندي الدليل ضدك ياخاين صورة الحمد لله وگعن بيدي وعرفتك انت شنو ؟؟
نيسان .. ياصور عوبه
فتحت الباب ماما وهنا خفت من ردة فعلها اكثر من ردة فعل نيسان
بسرعة سديت الخط
وسويت روحي اخابر واضحك جذب
ماما .. شنو مو كتلج هذا خاين ليش متحجيلي هااا وجانت بيها نظرة الشماته ع نيسان واليه
بلعت ريگ گوة واحس نفسي يتكطع عبالك اوكسجين ماكووو
بطني وجعتني حيل
شنو ماما شكو شبيج داخابر بنيسان وداشاقه مو عبالك صدك
اتشاقه وعليت صوتي
ولزمت بطني من الوجع
نيسان يحبني ومداريتي وميخوني واني اتشاقة اي اتشاقة وياة
ماما.. لا جذابة وجهج صار اصفر
لا ماجذب اخذت التلفون ولكيت نيسان يتصل فتحت گتلة ها حبيبي هسة شوكت تجيلي
نيسان .. انعل ابوج لابو اليجيج انتي مخبلة شي
انبز گلبي بسبه لابوية
بس ماكدر احجي ماما گدامي
ضحكت صحكة طويلة كتلة يله انتظرك حبيي رتح احظر جنطتي وسديته
ماما .. لا شوفيني فونج
ليش اشوفه حجيتها وطلعت اغسل
تمشي وراي شوفيناة اريد اشوف الصور؟
سمعت ومتاكدة جانت ماما من كلامي
غسلت ورفعت راسي
ماما انتي ليش متحبلي الخير ليش تردين بس نيسان يعوفني كااافي والله كافي اتمنى اجي يوم هنا واروح واني ممغثوثة
طلع بابا من غرفته
گال شكو
سلامتك بابا وابتسمت
داسولف وي ماما وهسة نيسان يجي ياخذني اروح لبيت عمي
بابا .. يعني ماكو شي امج ماحجت شي
لا بابا هو اكو مثل ماما رحت بستها من خدها وحضنتها وگتلها كرشي موجبير احضنج براحتي وضحكت ورحت للغرفة لميت ملابسي مجبورة اواجة نيسان هناك مو هنا
ماريد مشاكل
مشاكلي اني وياه واذا عندي شي بيناتنه احله
احسن شي...
ساعتين وهيا تحوم عليه تريد تجرجرني بالكلام
حاولت وبكل الطرق ماگدرت تضوجني ولا تبجيني ولا انطيت كلمة
اندك الباب نيسان جنت جاهزة كلش
طلعت اتلگيته بالطرمة حضنه قوية مشتاقتلك حبيبي
نيسان .. باوعلي انتي صاحية
غمزتلة ع المطبخ
عرف ماما بيه گتلة سلم عليها
نيسان عمي وين
مموجود راح قبل شوية لفاتحة
لخاطري سلم ع ماما
نيسان وگف باب المطبخ
شلون عمة ان شاءالله بخير
ماما .. اهلا زينه الحمد لله
نيسان .. عمي وين ردت اشوفه
ماما .. طالع يجي بعد ساعا
نيسان .. لا نروح مع السلامة بوسيلي حدوري
واني رجعت بوست ماما وطلعت ركض للسيارة
نيسان على كيفج بطنج لاتنسيها من تركضين