زيجه راس براس

البارت 10

كعدت يوم ثاني صفا ماكو انتبهت ع علاء واكف بالباب خفت منو اخاف يرجع يضربني

.. صباح الخير

. ااا صباح النور أعتقد غلطان بالعنوان

.. كومي ليش نايمه هين

. احمد ربي اجيت نمت هناا جان هسه اني بعداد الموته

.. آلاء بعدي عني بوكت اعصابي لا تخليني انفجر بوجهج وانتي تاكلينها

. اكلك هسه اني اكلت الكتله ومشت وهسه جاي تكلي بعدي بس تره الحق وياي

.. يأبه الحق وياج وهذا راسج ابوسو وفوكها حبه مسك

. والله ما تضحك علي بهذا حجيك امس تكفخ بيخ وهسه تبوس ولا فوك هذا كله مغير أسمي

.. امشي بويه امشي لا تخلينه من اول اسبوع تبلش المشاكل بينه

. ماا ماا

.. استغفر الله ادري كاعد اراضي جاهل كومي يا عمري مايصير هيج وشنو تردين يجرالج بس الزعل مانريد

. بشرط تكلي روان منو و ارو هم منوو وليش امس تسميني بأسمائهن

.. اوك امشي

رحنه للغرفه كتلو.. يي احجي ارو منوو

سحب الجهاز وفتحو طلع صور وانطاني الجهاز

.. دحكي هاي الصوره هاي روان اللي هيه أرو حبيتها حيل اول حب بحياتي تعرفت عليها ع الفيس اول شي علاقتنه عاديه بس صداقه اسئل عنها وتسئل عني بعدها تطورت علاقتنه حبيتها جنت ادحكها ملاك نازل من السما ما فكرت بيوم تلعب علي يوميه ترسلي صورها وارسلها صوري بس قبل لا تجون بالعطله اتصلت علي وبكل بساطه ماريدك واضحك عليك بس علمود فلوسك ارتبطت بيك وهسه لكيت واحد احسن منك وما مستعده اخذ واحد مريض وابتلي بي بهذا اليوم تعصبت انقهرت تعبت كسرت الغرفه كلها بس من يوم ثاني نسيتها وكرهتها بس من انتي اجيتي ورجعتي كلشي بحياتي انتي هيه كلشي يكول انتي روان مو الاء اشوف بوجهج روان مو الاء ايام وليالي اني رجعتيها بالي بس مو حب لا انتقام اريد انتقم منها اجت الفرصه تمام وهيه خطبه مازن المروه انه كلت هاي فرصتك العب يا ذيب كتلهم ناخذ رأس براس وانتي قبلتي بهاي الايام وفتره الخطوبه اريد اخليج تعترفين بكلشي تعترفين انتي روان  احجي وياج من سوالف اللي جنه نحجيها بس انتي طينه ماكو شي بس السان كلشي ماكو

. يعني انته تريدني بس لان اني اشبه روان علاء تعرف انته دمرت حياتي بهذا تصرفك غلط انته غلط مو صح اللي تسوي مو حرام عليك

.. اعرف غلط اعرف حرام بس هذا اللي صار ومانكدر نغير المكتوب

. لا علاء ابد ما اتوقعتك هيج

.. فهمي كتلج مو بيدي وبعدين اتزوجنه

. شكلك انته تكسر بيه بسبب وحده ساقطه لعبت عليك وانته جاي تنتقم منها ع  حسابي

.. كافي سكتي الصار صار والزمن ما يرجع بعد يلا كومي رتبي نفسج علمود ننزل

_ ضحكت ع روحي بعد وبعد وبعد الهسه كلشي ما شفتي يا الاء شكلها كعدتج بهذا البيت راح تكون كلها مفاجئات شسوي مجبوره اتحمل الكل دخلت للحمام غسلت وغيرت ملابسي وطلعت كعدت اخفي بالاثار مال الضرب مال الحيوان مالتي تقريباً اختفت طلعنه من الغرفه نزلنه هوه ولا كانو صاير شي يسولف ويضحك فضينه الريوك الحجيه كالت

.. كوم يمه ويه البنات خلص بعد هذا بيتج

. ان شاء الله حجيه كمت للمطبخ صفا تغسل بالمواعين وكفت وياها ضليت اشطف وياها كملنه صعدنه نظف الفوك  الصاله والحمامات كملنه نزلنه جوه ريان و سوسن مركبات الغده كعدنه بالمطبخ نسولف محد يعرف بسالفه أمس لان علاء ماجان صوته عالي و بس احنه وغرفه صفا و مروه و إحسان بالدور الثالث و احسان كام مايرجع من وكت محد عرف شصار بس صفا وكلنه تسترنه ع السالفه اما علاء ما تقربت منه ولا حجيت وياه بس هو كل شوي يجي يمنه ويكعد يسولف ويه البنات اخر شي كال

.. يخرب ابليسجن مكعداتني بهل حر

سوسن... والله محد جابرك تكعد يمنه روح

.. كاعد بيت الخلفوج وتطردين اروح اشرفلي الكعده يمجن دخل بأني ادم جهنم

صفا* والله خويه انته ما واكف علمودنه انته هناا الخاطر زعطوطتك اخذها وروح

.. لا خليها يمج

* هاااا عجل روح خلي نشتغل

_ طلع من المطبخ وهنه بس يحجن ما يملن ريان و سوسن و سهاد و صفا كلهن يحجن و اني مصفنه عليهن مااحب احجي هواي ولا أحب اسولف ويه بنات ما اعرفهن صارت الصلاه كمت اصلي كملت ونزلت علاء بالصاله يصلي شوي وكامو الولد يدخلون رجعو من دواماتهم مخلد و هشام و حسين و علاء و هاشم و احسان مخلد متزوج ريان هشام متزوج سوسن وحسين هديل زعلانه بيت أهلها وراكب راسو ما يرجعها وعلاء متزوجني خاف ماتدرون😁😁 وهاشم و إحسان مامتزوجين راحو الغرفهم ضلينه نحضر المواعين والمي واللبن أساسيات ع السفره اذا ماكو لبن الحجي يلعب بينه لعب غده وعشه المهم فرشنه السفره والكل كعد بقينه ننكل بالاكل علاء مخوزر مااعرف ع شنو كملنه كعدنه كل واحد زوجتو وجهالو يمو يكعدهم اني كعدت يم الحجيه

... مصكوعه كومي كعدي يم رجلج لازكه روحج بيه

. لا حجيه هين مرتاحه

... ماكو يلا كومي تره بالقوه متحملتكم انتم الاثنين

. كايمه كمت كعدت يمو وهو ياكل همس

.. صدرج لا اكوم احركهم الاهلج

. شكو شبيك

.. صدرج طالع ستري نفسج لا تخليني ادفنج وانعل ساس اهلج

عدلت الشال وكتلو. هيج تمام

.. يي تمام

_ كملنه اكل لمينه السفره مواعين الغده كلها ع ريان إيهاب ما يخليها تشتغل بس يبجي مايريد احد كتلها

. ولج ابنج فرفح اخذي والله خطيه

.. وين اخذه تروح تجي هاي السوسه وتلعب بينه فلك اذا ما اكمل المواعين

. روحي انتي اني اكملهن خطيه الطفل راح يموت من كثر البجي

.. لا ولج عروس تغسلين كل هذا مايصير

. اكلج سنو قابل اول وحده تتزوج وبعدين خلص خلص العرس هسه دور الشغل روحي والله كلبي تكطع ع هوبي

.. بعد عمري ربي يسعدج ويهنيج

. حياتي انتي يلا ولج موتي الولد

.. رايحه

_ اخذت إيهاب وطلعت ضليت اغسل بيهن احب اغسل مواعين اكعد افكر وارسم النفسي عالم خاص مابي احد غيري اني وبس ماريد احد يشاركني عالمي ضليت اغسل واغسل لحد ما انتبهت مكملتهن كلهن بدون ما احس شلون هيج خليتهم ع الكاونتر لان مااعرف سلون يرتبوهن كملت ودخل ريان

.. هاا حبيبه اجي اساعدج

. لا خلصت

.. يمته لحكتي

. اني بسرعه اغسل المواعين

.. حبيبه ماكو منج

. شسالفه حياتي قابل شسويت هنه شكم صحن وبعدين هوبي ماريده يبجي هل العيون الحلووه امشي هنا حر

.. يي امشي الغرفتي

. اوك امشي رحنه للغرفه غرفتها حلوه مرتبه كلها ورد

.. اكلج الاء

. كولي

.. ولو راح اتدخل بحياتهم الشخصيه

. كولي عادي

.. علاقتج ويه علاء شلونها

. علاقه عاديه

.. شوفي خلي اكلج شغله خليها حلق باذنج سوسن و هديل هذان اتجنبيهن لا تصاحبيهن مالهن صاحب يوم الج ويوم عليج لا تامنين الهن

. اعرف حته علاء كلي ما احتك ويه سوسن واني ما احب احجي هواي

.. دحكي من حجيت وياج وسئلتج بس هنه راح يلعبن لعبه ويروحنج بيها وع كوله الكايل تجيك التهايم وانته نايم

. ان شاء الله اخذ بحجيج وما احجي وياهن بس صدك ليش هديل زعلانه

.. مو قبل خطبتكم حسين جان راجع من الشغل متاخر وهاي لزكه بيومها جانت تريد تروح الاهلها حسين كلها من اكعد اخذج هاي حضرت روحها وملابسها حسين اخذته النومه وهديل راحت تكعدنو وهذا موتو ولا تكعدو من النوم وهو تعبان وهاي عندت روحي وكعدي وصارت العيطه بفلس هذا يصارخ وهذاك يصارخ محد يسكت منهم كام اخذها الاهلها وبعد ما ردها لليوم راكب راسو

. ياا وهسه شنوو تبقى عند اهلها

.. مااعرف عمي ومخلد يردون يرجعوها وهذا يحلف بس ترجع للبيت يكتلها عاد هين محد حجه وياه تاركينو ع راحتو

. هاا بس خطيه حرام صارلها هواي يعني عند اهلها

.. ولج هو مايريد يطلكها بس يريد يادبها شوي

. الله يهدي سرهم المهم مر يومين مابقى شي ع المدرسه علاء ما نقلني المدرسه يمهم كلت من يرجع من الشغل اكلو علمود المدرسه للعصر هو رجع محضرتلو الحمام دخل اني نزلت حضرت اكلو وصعدتو جان طالع من الحمام دحكني وابتسم كعد ياكل كتلو

. علاء

.. همممم

. يمته تنقلني

.. وين انقلج

. للمدرسه بعد وين احنه جان شرطنه اوافق ع الزواج بس اني اكمل دراسه

رفع راسو وعاقد حواجبوو

هلا والله شلونكم اخباركم مشتاقتلكم كوومه كومه دخلنه 400 متابع اشكركم ولو  هوه رقم قليل بس القناعه حلوه اشكركم ع كلشي اشكر اللي دعمني واللي شجعني اكمل القصه
احبكم من القلب للقلب يا احلا متابعين