هادي الروح .... لك تشتاق 💖💖
الجزء التاني 💖💖
الحلقه الرابعه عشر .... والاضافيه 💝💝
امها .... اااااااي معقول توا ساعه 6 العشيه ؟ مسرع الوقت يجري .... حتي صلاه فاتتني ...
ناصر .... اهو وصلنا خلاص وصلي ...
وخشو لزنقه .... واول ماخشو لزنقه ومريم قامت رأسها لقت سيارة عقاب مدرسه فم حوش حميدا ومافيهاش حد او بجانب الكنشيلو متعهم حد .... فاقعدة تشوف لسياره وسارحه ... وشي في قلبها يعصر فيها بدون ماتعرف سبب ... لحد ماسمعت صوت بوها يكلم فيها ...
ناصر ..... مريم بنتي اول ماندرسو ياريت تنزلي تجيبيلي الكيسه الا علي الانتري محطوطه لاني طالع تاني ..
مريم ... حاضر يابابا ...
واول مادرس نزلت باش تمدله الشكاره ... وبمجرد ماطلت باش تمدهاله لقت عقاب واقف مع حميد وكيف فتح باب سيارته ...مشيك ولابس وريحة برفانه واصله لفم الشارع .. فاقعدة تشبحله بس هوا ماقامش عينه حتي عليها ... واول ماكمل حديته مع حميدا ... ركب سياره ومشي طول .... واول ماطلع وبدي يبعد .. حست انه مامشاش بس لا ... رشق اسهم في قلبها ومشي وكمل طريقه وكأنه عمره مايعرفها او شافها من قبل ... والا حرق في قلب مريم انها كانت متوقعه هالشي بس بي هالسرعه هيا .... واول ماخشت للحوش ... خشت لدارها وسكرتها عليها وبدلت حوايجها وشدة تلفونها وقعدة تقلب علي الامل تشوف اي شي منه .... وبعدين فتحت الفيس وقعدة تقلب فيه لحد ماشافت بوست منزلاته نسرين لنهال وعليه صورة عروسه مكتوب فيه ...
نسرين .... الف الف مبروك حبيبتي واخيرا طولتي ونولتي سيد التريس .. عقبال الفرحه الكبيره ياررررب ..
وهنا مريم حست بقلبها قبضها وماكانتش متأكده من الا هيا شاكه فيه ... فافتحت الفيس متع عقاب مالقت شي وفي نفس الوقت فتحت ايميل سمر مالقتش شي .... فا حست انها مبالغه في شكها اتجاه نهال واكيد تحب شخص تاني وهدا وين جي وتم فيها ... والا زاد اكدلها هالشي ... دخول امها ليها ..
امها ..... مريم تبي تتعشي بنتي ؟
مريم .... ماما بنسألك ... سمعتي من ام نهال ان نهال بيجوها ناس او نخطبت ؟
امها .... اي امها اخر مره تلاقينا قالت ولد عمها يبيها وعاطي فيها كلمه وبيجو الاسبوع هوا بيتمو فيها رسمي ...
مريم .... شن الا خلاها تقوللكم هكي هيا .
امها .... ماهو جارتنا فتحيه لما التمينا اخر مره مع بعض كلمتها وسالتها علي نهال مرتبطه ولا لا لانها تدور لي ولدها مسعود علي عروسه ..
مريم ... امتي الكلام هوا ماما ؟
امها .... قبل مشيتك للاستراحه بشوي ..
مريم ..... ( تنهيدة راحه ) ... اوك تمام ...
امها .... علاش في شي ؟
مريم .... لا لا ولا حاجه ... تعبانه بس ونبي نرقد ...
ياريت طفي ظي وتسكري الباب وراك ... لا لا خليه ماما روشن مفتوح نبي نشم هواء نظيف ...
امها .... ماشي المهم سكريه قبل الفجر ...
مريم ... ماشي تصبحي علي الف خير ...
وفي اللحظه الا طلعت امها فيها .... خدت مريم شال حطاته علي كتافها ووقفت علي روشن وغمضت عيونها ووهيا تاخد في شهيق وزفير قوي .... واول ماقامت عينها علي حوش حميدا .... شافت نهال واقفه علي البلكونه وواضح عليها الانسجام والمشاعر الجياشه ...
نهال .... شكرا حبيبي 💖
عقاب .... اوووووووووف ... ( وتنهد بعصبيه )
نهال ... خيرك اتضايقت ؟ ... عقاب ممكن نقولك شي
عقاب .... نعم.... تتفكر اول مره قعمزة معاك وحكيتلك قصة شخص حبيته ؟
نهال .... (مع تنهيده ) ....كنت انت شخص هوا ... اي ماتتفاجاش ... كنت كل مره نسمع من خوي عقاب تحب بنت وتخطب بنت كنت طول الليل نبكي ... وكنت نتمني نكون بدلهم .... ولما جي الوقت الا نكون فيه من نصيب حبيبي يستخسر فيا حتي كلمة حبيبي ؟ اني ماطلبتش منك تقوله بس خليني نقولهالك حتي ولو كانت خطوبه مؤقته ... خليني نحس بالسعاده ولو حتي لي 3 شهور بس ...
عقاب .... مريم اني مشغول توا ..
نهال ..... مريم ؟ علي فكره اني مريم اني نهال ؟
عقاب .... اني اسف ماكنتش قاصد ...
نهال .... ( وهنا التزمت الصمت لعله يقوللها كلام حلو يراضيها بيه ) ...
عقاب .... نستأدن منك توا .... سلام ...
وسكر تلفون بدون حتي مايستناها ترد عليه ....
بينما هيا اول ماقامت عينها وشافت مريم تشوفلها شاورتلها باابتسامه واشرتلها بصبعها الا يدل علي خاتم الخطوبه وعلامة اتصال ... وقالتلها باي ... وخشت وسكرت الباب وقربعة تلفون علي طول ايدها وهيا تتتأفأف ...
نهال ..... اوف اوف حقيرررررررررر اني يناديني مريم وفوقها يسكر بدون مايرضيني ؟ والله والله الا مانسيك فيها وتخليك تعشقني عشق وتزحف باش نوافق علي انك تتزوجني .. وطفت ضي وخشت تحت اليرغان ورقدة ... ولكن خطرلها في اخر لحظه انها تعري من عليها اليرغان وتقلب تلفون علي وجهه لعل عقاب يبعتلها رساله .... ولكن لماﻻلقت مابعت شي خدت تلفون وبعتتله رساله ..
نهال ... حبيبي ممكن نتلاقو بكرا في كليتك ؟
عقاب .... ممكن تبطلي تقوليلي حبيبي ... لاني مش حبيب حد اولا ... وتانيا اني مش فاضي ... سلام ..
نهال ..... ااااااااااااه خزي عليك والله ماتستاهل ... اوف ( ولوحت تلفون وغطت وجهها ...
بينما عقاب ... حط تلفون علي كمدينو وناض وفتح روشن ... ولع دخانه وقعد يفكر وهوا يدخن ومقطع تفكيره الا باب شقته الا تطق ...
عقاب .... لحظه لحظه بس ...
وطفي دخانه علي طبله ومشي باش يفتح الباب ....
سمر ..... درت بيتزا وحسبتك معاي قولت اكيد ماتعشيتش فانتعشو مع بعض ...
عقاب ... لا مازال ماتعشيتش ...
سمر ... شن حالك اليوم انت عقاب ؟
عقاب .... كيف يعني .
سمر .... انت مرتاح بعد الا درته اليوم ؟ حاسس انه اختيارك صح ؟
عقاب ..... مش حاب نحكي في موضوع هوا ياسمر ... غيري موضوع ارجوك ...
سمر .... انتم تتكلمو مع بعض ؟
عقاب .... علاش تسألي ؟ .... اكيد خطيبتي ومن حقها تكلمني ... والماضي انتهي خلاص ... صح ولا مش صح . مش هدا كلامك ليا ؟
سمر .... عقاب .... ماتعالجش الغلط بغلط ياعقاب ... اني مازالت ننصح فيك لانك خوي ولاني عشت مع نهال ونعرفها ... نهال رح تستدرجك بشوي شوي لين تجيبك في جحرها وساعتها مش رح تقدر تطلع ...
عقاب ( بوجه معصب ) ... تصوري هوا هدا مطلوب ... اني بجد نبيها هكي تدير ... واقفلي موضوع ولا مش لازم نتعشي بكل ...
سمر ... اني اسفه علي عموم ... خلينا نغيرو موضوع خلاص ...
عقاب .... مازال مصره انك ماترجعيش لي حميدا ؟
سمر .... مش عارفه عقاب ... كل يوم يتصل وكل يوم يبعت رساله وقريب يبات فم حوشنا ... اني تعبت واني نفهمه ان احنا خلاص ...
عقاب .... سمر .... الزواج مش لعب ... وحميدا ماغلطش في شي لو تﻻاجعي نفسك كويس تلقي انتي غلطتي وهوا غلط انتي غلطي لما دسيتي عليه وهوا غلط لما مشي بدون مايعطيك فرصه تتكلمي او يصدقك ... يعني انتم متعادلين في غلط ...
سمر... والطلاق الا تكلم فيه هوا وامه وكان اني وحده من شارع ...
عقاب .... قالي ان امه سمعت من حد الموضوع وهيا الا قالتله وهوا رفض واني مصدقه .. صاحبي ونعرفه ونعرف انه مايكدبش والمفروض حتي انتي تعرفي ...
سمر .... قلبي يقولي ارجعي بس عقلي وكبريائي رافضين ...
عقاب .... راجعي نفسك والا يريحك ديريه اني كلام بنات هوا مانفهمش فيه ...
سمر .... ياريت مريم هنا راهو استشرتها ...
وهنا عقاب فجاه فنص لين طلعو عيونه وناض وسيبها وقاللها ...
عقاب .... شبعت ... تصبحي علي خير ...
وخش وقربع دار نوم وراه ... وبعدين سمعاته ضرب حاجه مرش علي طول ايده ... فا حست بتسرعها في الكلام ... فاخدت صونية البيتزا وانسحبت ونزلت ..وسكرت الباب وراها .... واول ماوصلت لنهاية دروج سمعت تلفونها يرن فاطلعت تلفون من جيبها وشافت رقم ... لقاته حميدا يتصل .... فا رست علي بطمت صامت وخلاته يرن وكملت طريقها ... للحوش ... ولكن لما تلفتت لقت ان باب الحديد مردود فاعرفت ان عقاب نساه مفتوح فاسكراته وفتحت باب حوش بوها وخشت ... ومشت للمطبخ ... ووقت علي تلاجه باش تحط اابيتزا في تلاجه ... ولكن فجأه حست باايد علي خسرها فاتلفتت زي مجنونه من الخوف ... وهنا صدمه ...
حميدا .... استاحشتك حبيبتي 😍
سمر .... انت كيف تتجراي وتخش للحوش ؟ هبلت انت افرض جي عقاب تواااااا ... اطلع برا ( بوجه متعصب ) ..
حميدااا .... اني راجلك ... ومافيش حد يقدر يتكلم ... وبالشرع وبالدين راجلك وعندي حقوق اتجاهك ...
سمر ..... ( بوجه عصبي ) ... كنت مرتك ... قبل ماتقول لامك تبي تطلقني
حميدا ... ياعمري انتي والله والله وراسك ماقولت لامي هكي ... هوا اني نطول اني نعيش مع سمورتي ونقول لا .
سمر ... (بوجه وردي ) ... حول ايدك ... بعد خلاص ... خلاص بعد قتلك ..
حميدااا .... لا مش رح نبعد ... انتي مرتي الحلوه الا استاحشتها واستاحشت ريحتها جنبي ..
سمر ... لا مش مرتك ...
حميدا .... لا مرتي وغصبن عنك ... ومستحيل نبدلك بي اي بنت تانيه مهم كان سبب ...
سمر .... بس اني ماقدرتش نعطيك بيبي يقولك يابابا ...
حميدا ... صغار الا مايجوش منك انتي مانبيهمش ...
سمر ... باهي علاش تصرفت هكي من الاول ؟
حميدا .... لان اني عمري ماخوفتك مني او هددتك باش تخبي عليا بالعكس ... ولما خبيتي عليا حسيت اني مانعرفكش بجد ...
سمر ... خلاص معناها شن الا رجعك ليا .
حميدا ... ( بنظرة حب وعشق مع ابتسامة حب خبيته ) ....لاني اكتشفت ببساطه اني غالط ... وغبي ... وحمار ... لاني بنخلي عسل زي هيا تطير مني ... واني اسف اسف اسف علي اي جرحتك بيها يااحلي ورده في حياتي ...
سمر .... هههههههههه بعد بعد والله انت قليل ادب هههههههههه
وهنا خداها حميدا في غمره ودخلها لغرفتها وسكرو عليهم الباب وطفو الاضواء ...
وفاتت الليله هادي زي اي ليله حلوه علي سمر ... او بالاحري من احلي الليالي في حياتها ... علاش ... لان متعة الزواج في اللحظات الجميله الا يتراضو فيها الازواج بعد صراع واختلاف وشوق ومشاعر ملهوفه ... في اللحظه هيا بس ومع كل زعل طويل وبعده تراضي قوي .. يحسو كأنهم يرجعو يعيشو شهر العسل من أول وجديد 💖💖💖💖..
💘💘ومن هده الليله نقدرو نقولو فاتو الايام ببطئ علي عقاب ... وهوا يحاول يبعد علي نهال ومايخليهاش تقتحم الاسوار الا هوا بناها حوليه من بعد انفصاله .... وعلي العكس كانت مع سمر الا حست انها رجعو بيها الايام الي قبل سنتين ايام شعلة الحب والشوق العميق ... وخاصة بعد رجوعها لشقتها واكتشافها انها كانت رح تتسرع لو انفصلت علي الشخص الا ماحبتش غيره ... مع اول عقابات يوجهوها زي اي زوز متزوجين .... اما مريم ... فاكانت تقريبا الايام تفوت عليها زي عقاب ويمكن اكتر ... لان اسوء شي في الدنيا هوا الانتظار ... انتظار شي بمعرفتك لنتيجته ... تكوني اما خسرتي حياتك او خسرتي حب حياتك والاتنين اصعب من بعض اكيد ...
(( وبعد اسبوع ))
مريم .... صباح الخير ياماما .... امتي بابا بيجي يرفعنا باش نشوفو التحليل ماما ؟
امها .... اليوم موجود العشيه دكتور بعون الله نكونو غادي ساعه 3 ظهر .. وبعدين زي ماقتلك دكتور بوك لما كلمها كان صوته مبشر وقاله تعالو للعياده ورح تعرفو كل شي ...
مريم .... بعون الله يارررب ادعيلي بس ... تعرفي كانا طلعت تحاليلي سليمه من الفرحه اليوم رح نمشي لتلبيسة نهال ونشوف عريس الغفله متعها .... مهم خلي نمشي نكلم سمر نبشرها لعل فتحت تلفونها ...
ومشت تجري لدارها وفتحت تلفون واتصلت ... واول مانفتح الخط قالت ....
مريم .... صباح الخير... معقوله اسبوع نتصل بيك تلفونك مقفل ..
سمر ... صباح الورد ... معليشي توا نحكيلك صارت تطوارت ...
مريم .... بنقولك شي مهم استني ...
سمر .... مش فاضيه اني بعدين نعاودلك اوك ؟
مريم ... اوك تمام سلام ..
سمر ... سلام ... (( وسكرت تلفون وشبحت لعقاب )) ... اي باه ... انت مصر علي رأيك ؟ فضنيه في تلبيسه طول معقوله ؟ مش كانك تسرعت ؟ انت هكي تنتقم من نفسك بس صدقني يعقاب ومش رح تقدر تنساها مريم بي الا تدير فيه ..
عقاب .... خلاص سمر انتهي موضوع ... ونهال بنت ناس ومش رح نلقي خير منها ...
سمر .... بسهوله هادي قدرة تنسي مريم ...
وهنا عقاب قلب طاوله بي الا فيها بعصبيه وعيط عليها وقاللها ...
عقاب .... ماتفهميش انتي .. حماااااااره ... قوتلك الاسم هوا مانبيش نسمعه تاني ... خلاااااااص ... تلاته سنين قريب علي نفس السيره ... خلااااااااص طلعيني من دماااااااااااغك .... ( ومشي وسيبها وبعدين تلفت وقاللها ) نخطم عليك ساعه 4 عشيه تكوني واتيه ..
سمر .... (تنهدة تنهيدة عميقه وقالتله ... ماشي ) ...
وهوا طلع يجري وركب سيارته .... وولعها رابعه وطلع ... وهنا خدي السي الدي الا نزل متعمد يشريه ... وفتح اول اغنيه شري علي خاطرها سي دي ...
(( كرهيني فيكي حاولي بأي شكل
متسيبيش على حبي ليكي ف يوم علامة
ساعديني يمكن وانتي ماشية على الأقل
يجيني قلب اقولك ساعتها بالسلامة!
سيبيلي أسباب يمكن اتمنى الفراق
خليني اشوفك واحدة من غير انتماء
لو بعدتي قبل قلبي ما يكرهك
مش هبطل ليكي في البعد اشتياق
علميني أنسى وانكر أي وعد
زي مانتي نسيتي وبنفس الطريقة
أقلُّه أضمن روحي بس ان شفنا بعض
بالصدفة متأثرش يومها ولو دقيقة
سيبيلي أسباب يمكن اتمنى الفراق
خليني اشوفك واحدة من غير انتماء
لو بعدتي قبل قلبي ما يكرهك
مش هبطل ليكي في البعد اشتياق ))
وبمجرد ماكملت الاغنيه قعد يقلب فيها مره واتنين وتلاته وهوا يسمع فيها وكانها جت علي جرحه بالزبط ...
واول ماوصل للكليه ... خش للمحاضره طول اعطي محاضراته وطلع .... وكان مستعجل باش يروح يوتي روحه للفضانيه وتلبيسه ...
وفاتت ساعه ببطئ علي كلتا طرفين ... وهما مش عارفين مصيرهم القدام شني ...
نهال .... مازال هلبااااا ياماما عقاب وسمر قريب يجو وهما قاعدين ماكملوليش ظوافري كلميهم ...
امها .... لهدا اني جبتهملك للحوش ... اني ماشيه نكلمها تستعجل لان اكيد هما في طريق ... صوت كلاكس شكلهم وصلو ...
ام نهال ...... روووووووووووووووووووووووي ......
وطلع احمد وحميدا استقبلو عقاب ودخلوه للمربوعه ... وام نهال استقبلت سمر بترحاب وكانها نست الا فات كله .. وخاصة انها اول مره تزورهم من لما رجعت لحميدا ....
وبعد لحظات كان صالون مزحوم بالنساوين علي خاطر تلبيسة نهال ... والمربوعه كان فيها احمد وعقاب وحميدا وخال نهال الكبير فقط ....
مافاتت ساعه والصالون بدي يزحم بالنساوين ونهال في وسطهم بالقفطان .... والرجاله يتفقو علي كل شي ...
كانت مريم مع تتحاضن هيا وامها وبوها في مصحه ويتباكو ....
مريم .... يعني الا فيا مش خبيت يادكتور ؟
الدكتور .... لا لا ورم ليفي بس متضخم جداااا وهوا الا كان مسببلك الالم هوا ...
ناصر .... باهي امتي تقدر تدير العمليه بنتي ؟
الدكتور ... اني عندي مؤتمر لمدة تلاته اسابيع اول مانروح الاسبوع الرابع نديرهالها طول ...
امها ... هل بنتي تقدر تصبر شهر بدون اي مضاعفات يادكتور ؟
الدكتور ... بعون الله واني رح نعطيها مسكنات ومضاد حيوي ظروري تلتزم بيهم قبل العمليه وتدير تحاليل هيا باش نروح نجريهالها علي طول ...
مريم ( مسحت دموعها ) بجد شكرا يادكتور اني مش مصدقه .... بجد شكرا شكرا شكرا ...
ناصر .... تمام دكتور بارك الله فيك ومانبوش نعطلوك اكتر ...
وطلعو هما زوز ودموع الفرح ورزغاريط يعلو المصحه كلها ....
واول ماركبت مريم لسياره قالت لامها ....
مريم .... اني فرحانه ياماما ... ونبي نطلع ... نبي نمشي لتلبيسة نهال علي ولد عمها ممكن بابا .
بوها .... اكيد يابنتي ...
مريم ... خلاص ببنزل بلبستي هيا ... اني بنت جيرانهم مش ظروري نطرح بجني كله
امها ... لا لا عندك قفطان اسود من فوق مشبك وربع كم برقبه البسيه كيف تمشي هكي ...
مريم .... اوك ياحلي ام في دنيا اموووووووووووووه ...
وطلعو من المصحه وروحو لحوشهم ... وخشت مريم تجري بدلت حوايجها وطلعت تجري باش تلحق تتفرج وتغير جوها بعد ماحست انها عايشه من اول وجديد وحست بمعني ان الله يمدلها في عمرها ...
وفي اللحظه الا طلعت فيها ... كانت ام نهال خاشه تزغرط وتقول ...
ام نهال .... رووووووووووووووووووي واخيرااااا العرس تحدد بعد شهر بعون الله ... باركولها يابنات ورغرطو والا عندها وشاح تلبسه العريس بيخش يلبس الدبله ..
روووووووووووووووووووووووووووووووي ...
وفي اللحظه الا خش فيها عقاب بعد مانحرج وحطاته نهال في الامر الواقع باش يخش ... وفي اللحظه الا خش فيها والمصوره بدت تصور ... قرب من نهال وطلع باكو الدبل ... وبدو يلبسو لبعض ... وهنا خشت مريم والابتسامه تعلو وجهها قبل ماتتلفت وتشوف لطاولة العروسه ...
يتبع
Kinda