💞💞هادي الروح ... لك تشتاق 💞💞
الجزء التاني ....💞💞
الحلقه السابعه (( الاضافيه ))💘💘💘💘
.
مريم .... شن رايك تسألي خوك وهوا يقولك ...
سمر .... شن في قصدك عقاب عرف بي موضوعي ؟ علاااااش قولتيله يامريم قبل مانقول لحميدااا علااااااش تكلللللللمي مصاريني بنحطهم ؟
وفي اللحظه هيا كان حميدا وراها وقاللها ....
حميدا .... شن هوا موضوعك ياسمر الا مازال مانعرفش بيه اها اني نسمع ؟
سمر ...... ( اكتفت بصمن وعيونها في عيونه والدموع يصبو منها ) ...
حميدا .... شن في ؟ تكلمي ؟
وهنا سمر شبحت لي مريم وقالتلها ...
سمر ... بري انتي وخلينا بروحنا ....
وهنا مشت مريم وهيا تشبح لصاحبتها وقلبها متقطع عليها 💔💔 ... بس كان لازم يجي هاليوم ويعرف ... وكانت بينها وبين نفسها تعرف ان كل ما سمر كتمت الكدبه وكدبت علي كدبتها باش تغطيها كل مازادت كبرت الكدبه اكتر وكانت عواقبها اكبر واكبر .. وركب حميدا ومريم في سياره وسكروها وبعدين حميدا تلفت وقاللها ....
حميدا ... تكلمي سمر شن في ؟ اني والله والله كنت حاس في شي داستيه عليا بس مش عارف شن هوا ... تكلمي ياسمر ماتخلنيش نهبل ...
سمر ( مسحت دموعها وقالتلها ) .... تبي تعرف ؟ تمام ... ببساطه اني مش حامل .
حميدا .... ( نظرة صدمه ) كيف يعني ببساطه مش حامل شن تقوووووولي انتي ؟ تنكتي ؟
سمر .... اي مش حامل ... دسيت عليك وكدبت لما استمريت في كدبه بس مش باايدي ... ماكنتش حابه نصدمك ... بس والله كنت نبي نقولك في الوقت المناسب .. ممكن تهدي و تخليني نشرحلك كيف صار موضوه
حميدا .... ( نط بعصبيه ) .... مانبيش نسمع منك اي كلمه تااااااانيه خلااااااص الا سمعتها سااااااااد معناها نهااال كان معاها الحق .. واني الا تعاركت مع الكل وماخليت شن هزبت اختي وطلعت مرة خوي فتانه وكدابه وهيا كلامها صحححححححح واني مغفل الوحيد صححححح صح ياسمرررررر ... قداش كدبتي مره عليا واستغفلتيني ررررردي ؟ يااااااربي النصيب هههههه شوفي قدرة ربي وكانه يقولي ياأعمي فتح عيونك ... سكرت منك لقيت روحي نسيت مفاتيح شقه عندك جيت باش ناخدهم سمعت مرتي بصدفه تقول بصددددفه هاااا بكل امانه بصدفه هيا ماكانتش قاصده تقولي ... اني مش حامل ههههههههههه .. بنسألك بالله عليك بااامانه هااااا ردي شن منظري واني ندبح في الخرفان ونصدق هههههههههه لا لا وكله كوووووم والحفله والشوا اليوم هههههههههه اكيد كنتي ميته بضحك صح ... تقولي الله اني واخده اكبر قارقوز واضحوكه في العالم صح ( بدي يعيط زي مجنون ) رددددددددددددددددددي ...
سمر .... ( ردت وقعدة تعيط وتبكي ) .... اني بروحي نصدمت زيك ... ودكتور قالي انهم غلطو في تحليل ...
حميدا ..... ههههههههههههههه هادي كدابه تانيه صح ؟ انتي ماشالله بديتي بروفشينل في كدب .. ماهو لازم كدبه تغطي بيها علي كدبه ...شابو ليك بجد قدرتي تضحكي علي مغفل زيني ... هوا اني مفروض هكي صدقت صح ؟
سمر ..... طلقني ....
حميدا .... اي صح المغفل ابو قرون ... تقوليله صدق يصدق ... تقوليله يالله نحبو بعض تماااام معاك ياروحي .. تقوليله اختك غالطه يصدقك طووووول تقوليله طلقني يقوووولك اااه من عيوني غالي وطلب رخيص ... تماااام ... انزلي من سيااااااااااااااره .... استني اقسم بالله ياسمر لو نروح ومانلقاكش في شقه الا ماتشوفي وجه تاني عمرك ماشفتيه مني تماااااااااااااااااام ؟
وهنا سمر انهارات بالبكي وطلعت من سياره وقربعت الباب ورها وخشت تجري للحوش وهوا ولع سياره وطلع .....
وهنا شافتها مريم من بعيد فاخشت تجري وراها وقالتلها ...
سمر ... عرف كل شي وبي احقر الطرق عرف ... من شدة حقارة الموقف الا نحطيت فيه وخلاني نبان اني كدابه ... ماعرفتش ندافع علي نفسي وماصدقنيش قالي انتي كدابه وقال كلام اني نصدمت فيه ... مافهمتش من البني ادم هوا .... خلاص وصلنا لطريق مسدود ..
مريم .... شني يعني ؟
سمر .... اني ليا اكتر من سنتين ربك ماكتبليش فيهم الحمل ... والا كان مصبرنا اني وهوا الحب الا بينا ... بس بعد الا صار اليوم ... خلاص في شي كبير بينا نكسر ..
مريم ... انتي خيرك تستبقي في البلي قبل وقوعه ... خليه اليوم يسافر ومهما قال هوا متعصب وصدمه كبيره عليه ... وصدقيني لما يراجع نفسه رح يلقي انه تسرع ... وخلينا نحكو لعقاب يزيد يتكلم معاه اكتر ويفهمه ..
سمر ... لا ماتقوليلاش عقاب ..
مريم .... علاش .
سمر ... اني بجد نفسيتي مش متحمله اي مواعظ او تغليط فيا وانتى عارفه عقاب ... وتاني شي اني مش رح نزل خشمي لحميدا اكتر من هكي ... لان ماعطانيش فرصه او حتي حاول يصدقني ...
مريم .... سمر ماتخليش الغضب يخسرك اغلي ناس حبيبتي ... اهدي واستعودي من شيطان ماتبيش عقاب توا يكلمه خلاص بس اهددددي ومعاش تبكي ....
سمر .... تصوري يهدد فيا لو روح ومالقانيش في شقه رح يبهدلني ... يحسابني من ماعنديش اهل ..
مريم .... اكيد عندك اهل حبيبي ... بس تدكري انك غالطه لانك دسيتي عليه ...
سمر .... مريم حررررام عليك تتكلمي هكي حتي انتي ... اني انصدمت زيني زيه وخفت علي مشاعره وكنت محتاجه نقولهاله في الوقت المناسب ولما نكونو بروحنا..
مريم ... اوك خلاص نوضي اغسلي وجهك واستعودي من شيطان وصلي الظهر لان العصر قريب يأدن ... وصدقيني انتي ترتاحي ... ووالله حميدا مارح يقدر يعيش من غيرك خوديها مني هههههههه خلاص اضحكي وغيري جوك ... اهو عرف وافتكيتي وطالما وهيا سخونه قولتيله طلقني وقالك ارجعي لشقتك معناها وهيا بارده بعون الله كف رياحي وبعدها يرضيك وتم ...
سمر .... ( مسحت دموعها وابتسمت وقالتلها ) في عينك يضربني تحسابيها سايبه مالا والله خوي يقطعه ...
مريم .... اسكتي اسكتي ماتدكرنيش بخوك صايع شن دار مبكري ... بجد خوك هدا يخوف ...
سمر .... ماتدكرنيش بوجهك مبكري اقسم بالله لما شفته كيف اصفر احمر اني خلاص نحسابك قولتيله ولا حميدا عرف وقال لعقاب ..
مريم .... تسمعي بدجاجه الا قعدة تحفر تحفر لين طلعت الموس ودبحت روحها ... انتي صارلك هكي .... توا شن بيصير ؟
سمر .... مازال فيها هيا ... نلمو قشيشنا ونروحو ... خلاص .... نفسيتي تعبانه ومش قادره نقعد هنا دقيقه .. وين عقاب هوا ؟
مريم .... اوك .... خليته في نهاية الحوازه يتمشي مش عارفه علاش قعد غادي ...
سمر .... بري ناديه انتي خلي نصلي و نلم القشيش متعنا ...
مريم .... لا لا اسفه بري نادي علي خوك بروحك ...
سمر .... مريم وراس امك بري اني مازال من الخوف والله رجليا ماحمليني ... حتي بنوض نصلي ونكر في رجليا كر ..
مريم .... حسبي الله ونعم الوكيل بس ....
وطلعت مريم ومشت في الحوازه باش تنادي عليه .... ووهيا ماشيه حست بحد حاط ايديه علي كتفها وقاللها ...
عقاب ..... تدوري علي حد مريم ؟
وهنا مريم انتفضت بسرعه وقعدة تبعد عليه وبعدين قالتله ...
مريم .... هيا نبو نروحو ...
بس هوا ابتسم ابتسامه ساحره علي جنب وقعد يمسح في لحيته وقاللها ...
عقاب .... باهي تعالي نبيك ...
مريم .... لا بنمشي ...اختك قالتلك تعالي ...
عقاب .... تعااالي والله بنقولك شي بس هههههههه
مريم ... لاااااااا انت كداب ....
عقاب ..... ههههههه هوا اني مش ضامن نفسي لم تكوني قريبه مني بس والله نحاول ... تعااالي ...
وهنا مريم قلبها بدي يدق اكتر واكتر ومشت تجري زي الطفله الا خايفه من الوحش الا في غابه وماارتاحتش الا بعد ماخشت للحوش ...
مريم .... واخيراااا هيا بنروحو الحوازه هيا تخوف وبدات لما فيها خوك ...
سمر .... مريم خيرك هبلتي .
مريم .... لا لا ماهبلتش نبي نروح بس ... اني طالعه باش نستف باقي الحاجات برا ... حتي هادم نحطهم ؟
سمر .... اي هادم بس اصلا الا بنروحو بيهم والباقي خليهم ...
مريم ... اوك .... سياره مفتوحه ؟
سمر .... اي اعتقد مفتوحه والمفاتيح مرشوقات فيها ...
مريم ... اوك ....
وطلعت وقعدة تشوف لسياره المظلمه كلها تقول سيارة مجرمين ... وبعدين فتحت الكوفينو وستفت الحاجات وفتحت سياره وقعمزة وفي اللحظه الا قعمزة فيها ... لقت عقاب مقعمز القدام ويقلب في نقاله وسياره كلها ريحتها ريحته الا اول مايشمها البني ادم يمشي في عالم تاني ... وهالريحه كانت مختلطه بريحة دخانه الا كان بالنسبه ليها زي المخدر الا يدوب قلبها ويدخله لي هلاوس قبل عقلها ... وولحظه قعدة متررده تقعمز ولكن ماكنتش تبي تحسسه انها خايفه منه وقعمزة وتلفتت جيهة روشن .... وماهياش تواني لين سمعت صوت البطم تسكرو .
