🍀🍀هادي الروح ... لك تشتاق 🍀🍀
الحلقه الخامسه عشر ( الاضافيه )..
وفي اللحظه الا وصلو فيها فم الحوش .... كان عقاب غير رأيه ورجع باش يحضر دفينه مرام .. واول ماشافاته اخته مسحت دموعها وشافتله بصدمه بدون اي تعليق ...
مريم .... سمر ... من قاله ان مرام مااااتت ؟
سمر ... مصدومه وماعرفتش ترد ولا كلمه ...
وبعدين قالتلها ...
سمر ... اني بعتله رساله .. شكله سلمهم الورق وجي طول .
تعالي نخشو ... انتي مش قادره تصلبي طولك ...
وخششتها سمر ومريم مش دايره بي اي شي حوليها ... وفاتت ساعه وراء ساعه ببطئ وكانت من اسوء الا يام الا فاتت علي مريم وامها ... وفات يوم جنازه ومريم مابطلتش بكي وسمر تواسي فيها ... وباتت معاها ووقفت معاها زي ماتوقف الاخت مع اختها واكتر ... وقعدة سمر يوم واتنين وتلاته معاها واسبوع واتنين وتلاته ومريم حاسه بالونسه بوجود سمر جنبها ... ولكن اكيد هالاحساس بينتهي في يوم معين ... وبدات لما الغير يكون واخد قراره في لحظة غضب ...
سمر ... اني بنروح حبيبتي معاش نقدر نسيب عقاب اكتر من هكي في حوش بروحه ...
مريم ... (شبحتلها وعيونها دموع ) ... خليك ... هوا علاش كل الا نحبهم يمشو ويسبوني ...
سمر ... كلنا في جنبك ... وانتي مش ان الاون تروحي لحوشك ... عقاب قعد ويستني فيك ..
مريم .... ( مع تنهيده ) ... اني وصلت مكاني خلاص ياسمر ...
سمر .... مريم حرام والله حرام عقاب يستاهل فرصه تانيه ..
مريم ... سمر ... كان لازم نطلع من حياة عقاب ...لو طلعت ماكانش صار هدا كله ...
سمر ... بس توا خلاص انتهي كل شي حرام تهدي زواجكم وانتم ماليكمش علاقه بشي ..
مريم ... اني بس مالياش علاقه بس دفعت تمن بروحي واختي كانت تمن ..
سمر ... اني عارفه انك تحبيه ...
مريم .... كنت نتمني نكون نصيبه ويعلم ربي قداش تعلق قلبي بيه .
سمر ... قرار نهائي ؟
مريم .... قوليله يطلقني بهدوء ... واني متنازله علي كل حقوقي ..
سمر ... الا يريحك ..
مريم ... ياريت تردي عليا وماتخلنيش نستني ..
وهنا تكلمت مريم فوق من نفسها برغم يعلم الله قداش تحبه ... بس بعد الا صار في شي نكسر بينهم وحاسه ان هوا مستحيل يرجع .. وكل مارح تكون معاه رح تدكر اختها كيف مدفونه في القبر وهيا معاه بكل برود ... ومريم قررت تنسي الماضي كله بكل حلوه ومره وماتبيش اي شي يدكرها بيه ...
وخشت وهيا نار ... تستني في رد سمر عليها .... وخشت لدارها وقعدة تستني وقلبها نار وحابه تعرف عقاب شن رده ... وبينما مريم تفكر فيه ... هوا كان رده ...
سمر ... هدا الا قالتهولي ...
عقاب ... مش رح نطلقها واعلي مافي خيلها تركبه ... اني ركبت راسي ومش رح نطلقها .. اني تعبت خلاص .. اني شن دنبي في هدا كله ...
سمر .... انت تبيها ؟
عقاب .... ايه نبيها وماتسالنيش اي سؤال تاني ...
سمر .... باهي شن نقوللها ؟
عقاب ... قوليلها بالحرف الواحد قالك عقاب نجوم سمي اقربلك طلاق لا لا لا تنساه ومش توا بس الا مدي الحياه ... وتوا تتصلي بيها
سمر ... لا لا خلاص خليها توا ....
عقاب .... ( وهنا تعصب ) تووووووا قنااااااالك ... ( وضرب برجله الباب ) يلعن ابو الشيطان والحياه المرمطه هيا بس
وطلع وسيب الحوش ... وسمر علي قد خلعتها من عيطته بس ابتسمت لانه برغم كل هالظروف مازال يقاوم ورافض يطلق وحتي برغم انه مش حابب يحكي علي اسبابه ... بس يكفي انه مازال شاريها برغم انها بايعه ...
وفاتت الليله علي خير ومافاقتش سمر الا علي اتصال مريم بيها ...
مريم ... صباح الخير سمر ..
سمر ... صباح النور حبيبتي ... سامحيني والله امس بنتصل بيك بس قولت مرات رقدت لان عقاب روح موخرو لما فتحت معاه كان موخر هلبه
مريم ... ولايهمك حبيبتي ... شن قالك ؟
سمر ... رافض ومايبيش يعني رفضه نهائي ومايبيش حد يناقشه في موضوع ...
مريم ... اوك تمام ...
وسكرة مريم من هنا ... وكلمت بوها يحطها علي حوشها من هنا ....
مريم ... بابا تحطني في حوشي ؟
بوها .... اي عادي يابنتي بس عندي خدمه ومش مروح بكري ...
مريم ... انت حطني ومش رح نعطل عشره دقايق ونكون عندك نلم وراقيا شخصيه وشوية اغراض مهمه ليا بس ...
بوها .... باهي هي واتيه انتي ؟
مريم ... اعطيني شويه بس ...
وكانت هنا مريم كيف طالعه من دوش وجابده شعرها ... فالبست تيشرت وسروال جينز من دولاب مرام اختها وسبيدرو اختها وطلعت ...
بوها ... شميت عليك ريحت اختك يامريم ...
مريم .... الله يرحمها يابابا لهدا قولت لامي ماتصدقيهمش حوايج مرام ...
بوها .... بنتي متاكده من قرارك انتي .
مريم ... بابا اني اول مره في حياتي نحس اني اتخدت قرار صح بس ارجوكم ماتضغطوش عليا حاليا وتطلبو مني نحكي الاسباب قتلكم مش مرتاحه معاه وتم ...
بوها ... ماشي خلاص ... ماتعطليش بس ..
وهنا كملو باقي طريق وهما ساكتين ... الاب يتدكر في بنتها الا ماتت وبنتها تانيه الا بتطلق وكأن لعنه وصبت عليهم ومريم تخمم كيف تطلق بااقل اضرار ممكنه وتتفادي مشاكل معاه ... ولكن الا يستني فيها كان اكتر من هكي ...
واول ماوصلت ركبت فوق تجري وفتحت الباب وخشت لدارها وماكنتش متوقعه انها راقد فيها لان لما حولها كان بشكل مؤقت فقط في وجود مرام .... واول مافتحت الباب لقت دار ظلام فارصت تاكو لقت لامبه محروقه ومش باين شي في دار فا جت علي روشن وفتحت الستار ... وهنا كان عقاب راقه فااول ماشافها ناض وحط ايده علي عيونه وبعدين انتفض وقال ...
عقاب .... مرييييم ؟
وقعدو عيونه في جسمها ولبستها وشكلها الا لو شافهم بتلقفي كان قال مرام .... بس هيا اتجاهلاته وقعدة تفتح في دولايب وتطلع في صندوق الا فيه اوراقها وصندوق فيه شوية تصاوير ليها معاه في عرسىماهنوش عليها مره الا فاتت تحرقهم ...
وفتحت شنطتها وبدت تحط ... وهنا انتفظ وناض من سرير بسرعه وقعد يفك منها ...
عقاب ... شن تديري شن تديري نحي من ايدك واسمعيني ...
مريم ...اول شي استر نفسك ... تاني شي اني مانبيش نسمع شي ... وياريت تطلقني بسكوت ... خير مانتكلم ونقول كل شي ...
وهنا عقاب قرن حواجبه وبدي يعيط وقاللها ...
عقاب .... مافيش طلاق وبري قولي شن تبي وهي مانيش ساتر نفسي ... ها. هااااا ... شن تبي تاني ...
وهنا طلعت تجري باش تطلع من الباب ... فا لحقها وسكر الباب ...
عقاب .... ( بنبره حاده ) ... مافيش طلوع انتي وصلتي لحوشك خلاص ...
مريم .... بوي يستني برا ... رح يركب وينزلني هوا ... بعد خلاص انتهي كل شي وانت عارف بد ن مانتكلم ...
عقاب .... اوك ... خليه يركب ونفتحو كل موضيع وينتهي موضوع ... اني بجد تعبت ...
مريم ... اوك ... تمام اتفاهمنا ...
وخشت لدار تانيه ووهيا خاشه قالتله ...
مريم .... ( بعصبيه ) استر نفسك ...
عقاب ( بعياط ويشلي باايده وايديه في نصه ) مانبيش نستر هي ونبي بوك يركب ونتفاهم معاه ومافيش قوه في الارض تخليني نطلق الا بمزاجي مااااااشي ... شن هدا الواحد لين ينرفزوه ...
وهنا سمع بوها يكلكس ... فا خطر في باله شي ... مشي بشويه ... ولقاها هنا واقفه علي روشن وعاطيا بالقفي فاسكر الباب بسرعه .. وهيا قعدة تعيط وتخبط ... وخش لدار نوم لبس سرواله وتيشرته وطلع من حوش باش يكلم بوها ... واول مانزل قال لبوها ..
عقاب ... صباح الخير عمي ناصر ...سامحنا علي تشحوير بس خلاص مريم غيرت رايها وبتقعد واهي اختي سمر معاها ...
عمي ناصر ... والله ياولدي هدا مانتمني ... ربي يهديكم وبعد نروح ليا كلام معاك ..
عقاب ... تم تم كلمني بس ونجيك ...
بوها ... خلاص مرات نخطم ..
عقاب ...( مع شبحه تزريطيه ) لا لا لا معقوله تعب روحك ياعمي وتجيني واني الندل الا بنطلق ... انت اتصل بس واني نكون عندك ... ادعيلنا بس يسهلها فوق ..
عمي ناصر ... شن قولت .
عقاب ... قصدي يسهلها من عنده من عنده ..
وفي اللحظه الا بيتكلم فيها عمي ناصر ... طلعت سمر راسها وقالت ...
سمر ... عقااااب القهوه ..
وهنا تزرط عقاب ونفضح لما قاله سمر معاه وشبح لعمه ناصر شبحة ماروكو وقاله ..
عقاب ... ولع عمي ولع مانعطلش عليك فاهمك من غير ماتقول ... في الليل نكون عندك تم ...
اول ماطلع عمي ناصر خش بسرعه ولقي سمر كيف بتخش فاعطاها تيرو جابها في دار مقعمزه ...
عقاب .... ( يتكلم ويعوج فمه علي جنب مع ايد معاقه ) .... عقاااااااي يا عقاااااااب ... تفييي عليك زي مافضحتي بيا ...
وهنا سمر قعدة تحك في مكان تيرو وميته بضحك عليه كيف يقلد فيها ويتكلم ويمشي ... وقالتله ...
سمر .... الاسد فوق ... البس ياعم هههههههه
فاتلفت حدفها بشبشب الا كان في رجله وخش ....
عقاب .... احم احم ... وفتح الباب عليها ...
مريم .... قدرة تضحك عليا وتوزع بابا ... بس رح نطلع يعني رح نطلع ورح نطلق ياعقاب
عقاب .... شن حابه تتغدي اليوم ؟ مكرونه مبكبكه ولا مكرونه مبكبكه ^-*
مريم .... شبحتلها شبحت متغاظه .... وسكرت الباب في وجهه .... وفتحت شنطتها وخدت تلفونها واتصلت بي خدوجه صديقتها ايام دراسه كلها الا فارقتها لما بطلت وهيا كملت وولت محاميه ... ورجعو يتواصلو كل يوم من لما سمعت اختها ماتت وجتها تعزي ...
مريم .... اهلين خدوجه ..
خدوجه .... اهلين مريم شن اخبارك ؟
مريم ... تمام .... مش امس وقعتلك علي الاوراق وقتلك ماتتحركيش في قضيه لين نقولك مرات نلقو حل ودي ؟
خدوجه ..... اي ... ثار شي جديد معاك .
مريم .... ايه ياريت اليوم تقدمي الاوراق بشكل رسمي ونبي الجلسه بكرااااا معاش نبي نقعد علي دمته يوم واحد ...
خدوجه ... صعب بكرا مريم تبي وقت باش تم الاجراءات والقاضي يحدد اول جلسه بس رح نسﻻع في الاجراءات ونخليها في اقرب وقت لان قاضي صديقي ... بس ماتترعيش حبيبتي اني مانعرفش الاسباب الا خلاتك تطلقي بس عيونك يقولو تحبيه ..
مريم .... ارجووووك خدوجه لهدا ماتصعبيش عليا موضوع وكلمي قاضب طالما تعرفيه يحددلي جلسه في اقرب وقت ويبعتوله استدعاء علي حوش ...
يتبع ..
Kinda
.
