سعاد

10

#سعاد

_10_

بقلم: NAREMAN KARM

....

وبعد ماخلص العيد وردينه لبغداد ردينه
لحياتنه العاديه انه رديت اخيط واحف
للنسوان خاطر اجمع للاجار وطلع مصرفنه
بعد اسبوع اجتي عائله جديده كعدو بلخان
والحجي انطاهم غرفه مقابيل غرفتي وهلعائله
أعوذ بالله منهم ابوهم يشرب ومرته لسان ماتنجرع
وكحه حيل وجهالهم الله مايجرعهم من الجلابه
الامايه الي اسمهه نجله يطلع عمرهه ب٣٠ ورجلهه
واحد سكير ٢٤ ساعه ناصب بطله وكاعد علكرويته
كبال غرفتي وشكد يتعاركون هوه ومرته ودك غلط وفشاير بينهم ادور هيه المكموعه ماتخاف ترد عليه وتلاسن ويشتغل رفيق بحزب البعث من دريت
بي واحد من الرفاق اخذت حذري ومااطلع جدامه
خوفي لايعرف رشيد جنت حيل حذره منهم
واتجنب المشاكل وياهم بس همه يدورون طلايب
ابد ماتستحي تفتر بلخان بدشداشتهه وشعفتهه الصفره وعلجهه يطك بحلكهه  وكلساع رافسه الباب وطابتلي تفتح الثلاجه وتاخذ
مسواك لو كلساع دازتلي واحد من الجهال على حاجه
وانه استحي اطي.

.....

نجله: هاي شدسوين تخيطين

سعاد: ها اي عيني ام مصعب جاي اخيط
هله بيج عيوني تفضلي

نجله: زاد فضلج حبيبه....شنو ماعندج كيك شربت

سعاد: هااا هسه اسويلج جاي..

نجله: مشكوره عيني انتي لوحدج كاعده لعد
الشفيه مالتج وين.

سعاد: اي ولله فد انه وابني هلصغير ورجلي
عفته من زمان

نجله: ليش عفتي..

سعاد: حشاج مو ادمي. ايده والطك وانه
تحملت منه ضيم وظلايم. عفته وطلعت

نجله: صخام الصخمه..ليش يكتلج اكو احد
يعوف هلجمال والحسن..

سعاد: قسمه ربج بعد ورضيت بنصيبي

نجله: هاي شمتسوكه اليوم برتقال وشجر وبتيته
راح اخذ شويه اطبخ ماعندي.

سعاد: كدامج الثلاجه عيني..وفتحت ادينهه
وكعدت تكرف جماله انه المسواك جان يضل
عدي اسبوعين ٣ هلدور ماكام يكفي من وراهم
كل يومين ٣ زاركه للسوك اتسوك..محد جان
مرتاحلهم بلخان جنه مرتاحين وماكو مشاكل
بس ذوله بيت هرج...لحد ماطبتلي ام ساجد
تعاين عليهه من طلعت وتهز بديهه

ام ساجد: تهي بهي...شمالهه هاي متستحي
متخجل..

سعاد: تعاي ام ساجد حبيبه كعدي شسوي
كعدو بجارنه بعد ولزوم نتحمل..ادور
كل ماتطبلي تنكل الثلاجه نكال اعاين
عليهه وكلبي محترك لابيه اصد ولاارد

ام ساجد: ولله ياام محمد اسمحيلي اكلج
انتي مابيج خير شنو مخليتهه تفرغ ثلاجتج
وساكته..احجي اصيح اتعارك لتضلين فقيره
تره ياكلوج اني من اشوفهه طالعه من عدج
ومحمله دمي يحترك..

سعاد: شسوي ياعيني تدرين بيه مااحجي
واستحي اكول نمونه هلطماطه والبتيته
ياهو بحالهن..واتي تدرين انه ينكسر ضهري
وركبتي كاعده علمكينه واخيط حتينه اجمع
للاجار. وكل يومين زاركه بسوك حتينه
المسواك ماكام يكفينه..

ام ساجد: ثكلي بوجهه بعد حته متطبلج
هاي العوجه..عوذه وجه يطرد النعمه
ولله ياحجي شكول عليك من جبتهم
وكعدتهم يمنه جماله هذا رجلهه سكير
وعينه علرايحه وجايه ابو عين المالحه

سعاد: اي ادري جا ماتشوفيني حابسه
روحي هنا ومااطلع من موجود..عبن
اكثر من مره اشوفنه يلصلص ويغمز

ام ساجد: عمت عينه هلتعبان السكران
ولله لو اني منج ابطله عينه..

سعاد: ياعيني انه ساكته ومتجفيه الشر
عبن هذا بالامن..مابيه حيل طلايب

ام ساجد: اي خيه هوه هذا الكاسرنه
منكدر نحجي الحيطان الهه اذان...

......

بعد شهرين اجانه عيد الأضحى المبارك
واهل الخان كالو حنجمع فلوس ونجيب
ضحيه نذبحهه بلخان ونوزعهه على روح
موتانه اليحب يشارك يدفع وثوابه واصل
لروح موتاه..انه شاركت ودفعت كلت ثواب
لامي وابوي ورجب ونجيه الله يرحمهم
وبيت ام ساجد شاركو على روح موتاهم
وشكم بيت من الخان شاركو ماعده بيت نجله
ماشاركو....
وراح ابو ساجد واستاد مزهر وابو رونق رجل
ست لميعه شترو الخاروف وجابو للخان العصريه
ربطو وذبوله ماي وعلف حتينه يذبحونه ثاني
يوم الصبح بلعيد..وهاي الجهال داير مدايره
وحمودي متونس عليه ويلعبون عليه..
ثاني يوم الصبحيه كبرو بلجوامع تكبيره العيد
نزلو الزلم لابسين دشاديش وطلعو للجامع
يصلون صلاه العيد.
ومن رجعو كلمن شايل بيده ماعون كيمر وكاهي
وانه بدلت خيطتلي دشداشه ولبست محمد
وطلعو الجهال براس الفرع مال خان للملاعيب
وراهه عايدني النسوان وام ساجد نزلت عايدتني
ادور راحو جابو كصاب وسمه علطلي وذبحه
والدم يجري بلكاع نوب صلخه وجنكله على باب
الخان وكطعه وزعو لاهل الخان وللبيوت البجارنه
وراهه انه وام ساجد فتحنه الحنفيه وكفينه هدومنه
وغسلنه الكاع من الدم...
ادور ابو ساجد كال حجيب سياره ونطلع للنجف
نزور ابوي...وانه هم كتلهم اروحن وياهم ازورن
اهلي...ضلت مهاوي واخوتهه امهه وصتهه عليهم
وخليت حمودي عدهه وصيتهه عليي ماتغفل عنه
ولبست الاسود وقفلت الغرفه وطلعنه...
وصلنه النجف ابو ساجد راحو على كبر اهلهم
وضلو يبجون وقرو قرأن وانه رحت شتريت
من وليد يفتر بلمكبره دبه ماي وبطل ماي ورد
واخذت وياي بخور وشموع...والمكبره مليانه عالم
جايين يزورون موتاهم مصباح العيد
كملو بيت ام ساجد   وكالو شو مازرتي اهلج...

ام ساجد: خيه ماتعرفين اسم الدفان
نروح عليه يطلعهم

سعاد: لاولله ماجايه هنا اول مره ازورهم
بس اعرف اساميهم

ابو ساجد: امشو نروح على هاي الغرفه
مال هذا الدفان ونسئله...

وحجه ويا الدفان واطا اسامي اهلي
واسم رجب.بساعتين نفتر وهلكت يلا
دلونه على كبر امي وابوي مدفونين
واحد بصف الخ اول ماشفتهم ذبيت
روحي على كبرهم وكعدت ابجي واشكي
واعاتب بيهم وام ساجد تصبر بيه وتبجي وياي
دور غسلت كبورهم ورشيت ماي ورد وقريت
الفاتحه وشعلت البخور وكمت رحت على كبر نجيه هم بجيت دور الدفان كادني لكبر رجب
لكيت زهره وصبيحه يبجن يم كبره .وصبيحه كبرانه حيل حاطه شيلتهه بين عيونهه وتبجي
ضليت واكفه وره كبر تانيتهن لحد ماكامن
ورحت يم كبره..دنجت على رجولي
وضليت اتلمس بلكبر ودموعي تجاره.
واعاتب بي..

انه جيت اعاتبنك يبو غايب عبن انته
مو كد الوعد جا وين حجيك الي
مو كتلي للموت ماعوفنج يسعاد جا هلجوه
اللحد اته وضاعت بعدك سعاد..ضاعت يرجب
اااااخ ياحبيبي ورجلي شون وجهك نام جوه التراب
شون طولك ركد جوه يبو طول الحلو...

انه جيت انشدن على الضيعونه..
ولله ضيعونه وجوه اللحد نامو وتيهونه..
يبو غايب بعدك الدنيا ضلمه بعيونه.
ولله بعيونه المامش كلهم ركدو يمك وعافونه .اهي اهي
يارجب.....ااهييي اهييييي يبو وجه الحلو
اااااخ يارجب اااااخ تعال وشوف حالي
بعدك. مشرده ولمتني الليالي مايوم
نسيتك ولاراح انساك ياحبيبي وكل فتره
اجي ازورنك...مسحت عيوني بعباتي
وقريت الفاتحه ورشيت ماي ورد وكمت
نفضت عباتي من التراب ورجعنه من النجف
للخان...طبينه بليل وصلنه لكينه حاتم
رجل نجله كاعد يشرب بره طب ابو ساجد
يستغفر واخذ مرته وصعد وصعدت وياهم
نزلت محمد وفتحت الغرفه جاي اطب
شو هذا صار وراي وعيونه حمر يخوفن
ويغمز ويعض بحلكه..ويحجي سكران ولسانه ثكيل

سعاد: خير شرايد

حاتم: هاا وشبيج عصبيه رايد ثلج

سعاد: ماعدي ثلج ثلاجتي طافيه
روح منا خويه

حاتم: على كيفك ياحلووو ليش ضايج
دخلينه ندخل نكعد نرتاح جوه

سعاد: انته صدك ماتستحي وعاين ابو ساجد
مد راسه من فوك وشافه نزل يركض وجره
مني وكلي خيتي اخذي ابنج وطبي
ماجذبت خبر شلت محمد وفتحت الغرفه
وطبيت وقفلتهه وضلو بره يحجون اسمع
ابو ساجد يكله ..

ابو ساجد : شعندك بهليل يم غرفه المره
متستحي انت ماعدك عرض

حاتم: نزل ايدك لك تره اكتب بيك تقرير
وخلي الامن يسحلونك منا..بعدين اني
شطلبت هوه ثلج..يعني ماي يابس

ابو ساجد: ولله اذا اشوفك تتعرض لمره. بلخان
متلوم إلا نفسك...جبان..

وعافه ابو ساجد وصعد وذاك ضل لازم بطله
ويدردم بلحوش..انوب طلعت مرته السعلوه
تصيح هيا هاي سعيده تذب روحهه علزلم
ذاك اليوم شفتهه شوف عيني ذبت نفسهه
على رجل لميعه والرجال  خرب كدامهه..
يااا دهر صابج ينجله شني هلحجي دور
كل اهل الخان طلعو يسمعون حجيهه وست لميعه.
واكفه فوك تسمع وتعاين على غرفتي بعين غضب
دور جرت رجلهه وطبت بس لاصدكت بيهه
وهوه رجل ست لميعه كاضي واعمى لابس نظارات
.....
الصبح فاتت لميعه سلمت عليهه ردت
ماردت خلت وطلعت لدوامهه. ضل بخاطري
شون صدكت نجله. عاد كلت بس اشوفنهه
احاجيهه ولله وطلعت من غرفتهه...

سعاد: اوكفي نجله اريد احاجيج

نجله: اهو هاي شرايده من الصبج وجه البلاوي

سعاد: اتي شون لبارحه تطعنين بيه
وتذبين عليه تهايم..وتكولين اذب روحي
ع الزلم..وعلى رجل لميعه

نجله: لعد المثلج كاعده وحدهه ماعدهه
رجال يحكمهه شنو معناته اعرف ذني
المثلج كلش زين عيوني توكعين بلزلم
وحتى حاتم كلي لبارحه انتي ذبيتي
نفسج عليه وتغمزين وتلمزين...امداج بومه

سعاد: ياااااا اعاين عليهه هاي حجت حجي
ماينلبس عليه ثوب وغمتني وراحت شحجي
وياهه اذا اثنينهم هيه ورجلهه باطلين..

....

بسنه ال 81  صار عمري ٢٤ سنه كبرت وجنت
كل مااكبر يحلى جسمي اكثر ورسومي تحله
وأيست انو بعد كل هلسنين رشيد يلكاني
وحتمال نساني ونسه عده مني ولد.بس
ضلت كميله دوم تخطر على بالي وشتاقيتلهه
...خطفت رجلي لبيت كميله..
ومن وصلت دكيت الباب اجاني صوت كميله.

كميله: ياهووو بلباب

سعاد: انه

كميله: سعاد...هله بخيتي وريحه العزاز
هله بسعاد هله..فوتي خيه فوتي وينج
كل هاي السنين..صدك شردتي من رجلج.

سعاد: موجوده بهلدنيه يكميله اي طلعت منه
عبن ظالم ومايخاف الله

كميله: خايبه يسعاد جا ماتدرين عكب مانهزمتي
منه شسوه..اجه هنا لباب الشيخ وضل يرمي
بسلاحه وكام يصيح سعاد ما سعاد..وابني
شني ابنه. فهميني

سعاد: سالفه طويله يخيه مو انه من شردت
منه جنت حامل ورحت كعدت بخان واهل
الخان ماقصرو وياي لحد ماحكمت ولادتي
وجبت وليد.

كميله: بعد رويحتي الله يخلي الج بس هذا
رشيد شون .خيه غير دفر الباب علينه بليله
ضلمه وطلعلج هاشم مصلخ وسجنه ٤ شهور
يلا تأكد احنه مانعرف بيج وين يلا هده.

سعاد: الله لايوفقه هلظالم دمر حياتي
وكسف احوالي وتشردت بشوارع ورا

كميله: كومي خيه كومي روحي هساع
جيه هاشم وحلف بعد ماسجنه رشيد واكل هلصوندات
اذا شافج يبلغ رشيد عنج كومي روحي
وتعاي من ماموجود الصبحيه..

سعاد: خوش...ضلت عدج العافيه خيه
مع سلامه..
بوست كميله وطلعت رديت للخان
واول ماطبيت صارت بوجهي لميعه
ورجلهه سلمت عليهم ماردت بس رجلهه رد

سعاد: سلام عليكم

ابو رونق: هله ام محمد

سعاد: هله بيك خويه ابو رونق

لميعه: امشي شكو دترد لو حلت بعينك
أما انتي فصدك ماتستحين. وماتعرفين العيب

ابو رونق: هاي شبيج لميعه كافي عيب

سعاد: ولله ياست لميعه المايعرف العيب
هوه اليخش بعين صاحب الحك
وانه مامسويه غلط صارلي سنتين
وياكم بلخان شفتو مني شي بذر مني شي
شو من حجت هاي الماتستحي نجله وذبت
بلوه عليه صدكتيهه. واذا سويت غلط وسلمت
عليكم ف السلام لله وبعد لساني مايطخ لسانج.
وأمني من ناحيتي مو جليله اصل وناكره
للزاد والملح وانه مااكل بماعون واتفل بي ياام رونق
ولا اهلي ماربوني حتينه احط عيني على زلمجن
زلمتج هوه اخوي والله شاهد ابو رونق ونعم منه
مايوم حط عينه عليه ولايوم سمعني حجايه
والزلمه يطب ويطلع مدنج بس ماكول غير حسافه
عفتهم ومشيت لغرفتي وست لميعه ضلت
بخجلهه وندمهه

ابو رونق: ولله بت اصول هلمره وضلمتيهه
هواي يالميعه من تسمعين لهاي نجله ام المصايب
امشي وحسابج بعدين..

ام ساجد: وينج ام محمد. سعاد..اسم الله
ليش كاعده تبجين من حجي لميعه

سعاد: انه يم ساجد تكلي حاطه عينج
على زلمتي..شني بت شارع لو مامربايه.

ام ساجد: لايضل بخاطرج وهاي لميعه مخبله
وماتستحي هيا وهاي نجله البومه مرت السكير
يرحلج فدوه.

سعاد: احلفنج بعزيز كلبج صارلج شكد
تعرفيني شفتي علي بيوم شي سمعتي
شي .

ام ساجد: لاولله ماسمعت ولاشفت منج
الاكل خير وانتي بت اصول يسعاد
ومايعرف قيمتج إلا اليعاشرج. وذني
حسبي الله ونعم الوكيل بيهن المايستحن
مسحي دموعج خيه. ولله دموعج عزيزه

سعاد: يم ساجد الظلم يقهر وانتي اكثر
وحده انه مسولفتلج وتعرفين سري
وتدرين انهزمت من ظيم رشيد وظلمه
لابحال رجال ولاهاي سوالف ولااخذ زلمه من مرته
انه حايره بضيمي وبعيشتي وبأبني شون
اعلمه وكبره وتجيني المصايب ركع وحده
فوك الثانيه..ولله تعبت ياربي رحمتك عليه

ام ساجد: ولله اليوم إلا العبلج فلك
بهاي نجله ام الوسخ...

سعاد: عوفيهه خيه مابينه حيل للطلايب

.....

وكامت ام ساجد ولزمت سطل الماي
وتذب بلحوش عودك تغسل بي لحد
ماطلعت نجله من غرفتهه وركعتهه
ام ساجد بسطل ماي. وذيج عاطت

نجله: عمه بعينج يلبومه متشوفين
متباعين متكولين بشر يعدي يفوت

ام ساجد: العمه بعينج انتي يلكرطه
ام الكمل ام القواطي..وشصار واذا
ذبينا عليج ماي تراب ونثلمتي. اهمداج 🙏🙌

ساجد: أيا ماتستحين يلخايبه يلعايبه
العجيز امشي امشي شوفي رجلج بيا
خان للدعاره كاعد يتونس وخلصان من وجهج

ام ساجد: ولج امشي مرت السكير ابو العرك
انتي ورجلج ماتوصلين لاخلاق وطهاره
ابو ساجد ولله اذا جبتي طاريه على لسانج
احشه الج حش بلتنك..

سعاد: خيه ام ساجد فدوه اروحلج كافي
طلايب

نجله: ها ولج. ام الرجوله هلدور عليمن
حطيتي عينج على رجل هاي العجيز
لفيتي منهه..وانتي الغمه يوميه اشوفه لرجلج
بليل ينزل يمهه..

سعاد: ولج انتي صدك ماتستحين ولامربايه
ياطايحه الحظ ياالمامش ناموس براسج
ولج تعرفين شني معناته قذف المحصنات
وهتك اعراض العالم وتحجين بشرفي ياجلبه

ام ساجد: ادبسزز ام الوسخ ترحين فدوه
لام محمد تجين باخلاقهه لطهارتهه حتى
لسان ماعدهه ترد عليج باخلاقج ام الشوارع..

وتعاركن ذيج العركه صارت مكافش
من الشعر وام ساجد لازمه نجله من
زندهه وتعض بيهه ادور نزل مزهر يفاكك
بيهن لاحته نجله بلمكناسه على راسه
وكسرن نظارته وهوه عافهن ونهزم فوك
لحد ماطب الحجي ابو الخان...

الحجي: ولكمممم بسسسسسسس
شني هاي ماتملن ماتشبعن من الطلايب
طايحات الحظ جنجن ديوجه كل وحده
لازمه شعر الثانيه. صغار انتن ويكلك وين الهرجه
بيت العرجه.....ولله الاسمع حسهه اطلعهه
بره إلخان..

ام ساجد: حجي بس خل افهمك

الحجي: كافي بسجن يلا كل وحده
تولي لغرفتهه...

وفارغهن الحجي..وبليل اندكت الباب
طبت ست لميعه..

سعاد: تفضلي ام رونق

لميعه: زاد فضلج...سعاد اني جايه
اعتذر منج هايا نجله لعبت بعقلي
وخلتني اشك بيج. وخشيت بخطيتج
الله يخليج سامحيني وعذريني

سعاد: الله ايسامحج بس انه اعتب عليج
صارلج سنتين تعرفيني شفتي مني حتينه
تكولين عني هيج..

لميعه: ولله مشفت منج بس الخير انتي
كلبج طيب وبت عالم وناس واني وحده
مااستحي وتهمتج

سعاد: لافدوه لكلبج ست لميعه لاتكولين
هيج...انه مسامحتج والله ايسامحج من عالي سماه

لميعه: فدوه لكلبج ام محمد خو مابعدج
زعلانه مني وشايله بخاطرج

سعاد: لاولله يخيه صفت الكلوب.
عليمن اشيل بخاطري انتم هنا احس
الله عوضني بيكم بعد ماراحو مني هلي وانتن خياتي

لميعه: واني اختج موجوده شتحتاجين
ميردج إلا لسانج وبابي مفتوح الج اروح اني اعشيهم

سعاد: بعد عيني ماتقصرين. روحي الله وياج.
وصالحتني لميعه وبوستني وطيبت خاطري.

ثاني يوم جان ابو ساجد مستلم راتب
وعزمني وياهم اخذنه للزوراء وللسينمه
جانت الزوراء تخبل وتوهه مفتوحه ماصارلهه
سنتين جديده وحاطين بيهه اشكال الحيوانات
وهذا حمودي متعجب وين مايشوف حيوان يشهك
بعدين طبينه للسينمه ابو ساجد قطع التذاكر
وحصلنه الكراسي البنص جانو عارضين مسرحيه
عراقيه لأمل طه تخرب ضحك هيا عود اخذهه
رجلهه هيا وجهالهه للسينمه وذوله السكرتيه
بلسينمه الشقاوه تحرشو بيهه وهيا تغطي وجهه
بعباتهه عود خجلانه ادور اجه رجلهه كعد خافوا
حسبالهم ابوهه لحد مابعدين عرفوا رجلهه وتعاركو
ونهزمو وكام مايوديهه سينمه يغار عليهه
جابلهه تلفزيون للبيت...واحنه كمنه نبجي من الضحك
صدك جانت تخرب ضحك سوالفهه
كملنه طلعنه من السينمه وجانت طلعه من العمر ضحكت من كل كلبي ونسيت همومي حتى الجهال ضحكو ويانه
  ورحنه نمشي
يم الفورتات حد مااجه باص المصلحه صعدنه
وردينه للخان لكينه هذا حاتم هم سكران
ويغلط ومرته ترد تغلط عليه. عفناهم وطبينه
كلمن لمجانه..

يتبع.....