قبل ايام وردتني رساله من احدى متابعاتي العزيزات
وقد اخبرتني بقصتها الجميله التي تحاكي ذاك الزمان
الجميل و(ايام الخير) وزمن الطيبين طيله تلك الايام
وانا على اتصال بها كانت تخبرني بكل تفصيل وحدث
مرت به مع عائلتها .وقد شدتني حكايتها الجميله وتشوقت
أن اكتبها لكم. السيده(سعاد) اليوم تروي لنا حكايتها
التي تمتزج بين الحزن والفرح. وبين نوبات السعاده والتعاسه
فدعوني اروي لكم قصتنا لهذا اليوم. وقد وتأكدت من جميع وارجو صبركم
علينا اعزائي سيكون تنزيل البارت كما عودتكم
كل يوم وأن حدث لنا ضرف وغبنا عنكم ف ارجو منكم السموحه والعذر ....طبتم وطابت اوقاتكم بكل خير..
#سعاد
بقلم Nareman karm
البارت _1_
بذيج القريه الي صايره بين اطراف الناصريه
قريه السبيعي..انولدت انه وجانت ولادتي
عسيره مثل ميكولون اهلنه وامي نقلوهه
للولايه لان ماكدرن الجدات يجيبنهه جان
لازمهه عمليه وجانت مخطره بيه وجابتني
وسمتني على اسم الدكتوره الجيبتهه دكتوره
سعاد خيري.. ومن رجعت بيه للقريه اهل ابوي
زعلو ليش ماسمتني على اسم حبوبتي عجيبه.
جنت مميزه بين اخواتي حلوه عيوني عسليه
وسيعه وجاحظه وسماري يجذب الناظر ورشيقه
ومن كبرت جمالي جان السبب بمشاكلي الوكعت بيهه
....
1971 صار عمري ١٤ سنه كبرت وامي كامت
ماتحمل وتجيب بعد جان ابوي بنفسه ولد
بس مارزقه الله غير بس ب٤ بنات اختي نجيه
الجبيره وراهه ربيعه والثالثه كميله وانه الاخيره سعاد
وابوي جبر وامي رازقيه من احنه زغار تعلمنه النداره
والشطاره وكل امور البيت. جنه كاعدين بصريفه
مال تنك بلقريه على كد حالنه بعد ماصارت مشكله
بين ابوي وعمامي على مود شغلت ورث ماورث
عزلنه منهم وابوي وامي جابو تنك وكصكصو
وسو صريفه وكعدنه بي ابوي غطا السكف بسعف
وفرشنه الكاع بسط وحصران جانت بصيف تفور فور
علينه وبشته ماتنكحم من البرد بس شنسوي تعلمنه..
رازقيه: نجيه خايبه نجيه تعاي ليه وينج
نجيه: ها يمه شمالج..عليش تصيحين
رازقيه: خايبه شوفي ذني خواتج وين صارن
دزيتهن ينكلن ماي من النهر ولسه مابينن
نجيه: تلكيهن كاعدات يبربعن بلماي هسا اشوفهن
اختي نجيه جانت حيل قاسيه ويانه ونخاف منهه
اكثر من منخاف من امنه وابونه. امي جانت
تخليهه تكتلنه وتأدبنه اذا توكحنه لو مانسمع كلامهه
انه ترست تنكتي ماي ومنتضره خواتي يكومن لان
ضلن ع ساكيه مال نهر فهن ع ولد القريه نزعو
دشاديشهم وطبو يسبحون بلنهر ويستعرضون
جدامنه..وانه عيني على نجيه لاتجينه وصدك
جان اشوف من بعيد نجيه تهف علينه شمرت
تنكه الماي ونزعت نعالي وطكيتهه ركضه..
