سعاد
_,13_ الجزء الثاني
بقلم: NAREMAN KARM
.....
وبعد ماحقق وياي ضابط المركز وعرف
عني كل شي طلع يعرف رشيد كعدت عد
رجلينه وتوسلت بي مايخبر رشيد عني لان
اذا دره راح ياخذ ابني مني..بس الضابط
توعد خير اخذ عنوان سكني وكلي روحي لابنج بلمستشفى
وبعدين ننضر بقضيتج ويصير خير. طلعت
من المركز وانه وروحي لايبه وانقبضت
مادري شسوي اخاف هذا الضابط يخبر رشيد
عني ...رفعت اديه للسما و دعيتك ياربي
تخلصني من شره وطول الطريق وانه اردد
وجعلنا من بين ايديهم سدآ ومن خلفهم سدآ
فأغشيناهم وهم لايعلمون...يارب خلصني
من رشيد وظلم رشيد واعمي عني وعن ابني
وصلت للمستشفى وكتبو تقرير وطلع ابني
غايب عن الوعي بسبب سوء تغذيه
لاماكل ولاشارب عمت عيني وبقى علمغذي
وزركت للمطعم اشتريتله كباب وشربت
وكيلو برتقال ورجعت..من صحى الدكتوره
كلتلي وكلي. وكعدن الكمه بيدي سوده عليه
وبوس بي وكشرتله برتقال اكل..ثاني يوم
الصبح رجعو معاينه فحصو كتبولي خروج
ورديت للخان .....
......
ام ساجد: كللللللوش هله بحمودي كل الهله
كرت عينج داده ويهنيج بسلامته انشالله
سعاد: الله يسلمج يبعد عيني ام ساجد
لميعه: كرت عينج ام محمد
ست فيروز: حمدلله على سلامته ام حمودي
كواكب: الف الحمدلله داده كرت عينج بي
سعاد: الله يسلمكم ويخليكم ماتقصرون
ام ساجد: لج داده افرحي خلصنه من نجله
ام السحوره. لبارحه الحجي اجه وشمرهه بره
وضلت تتوسل كلهه مالفي مجرمين ومشعوذين
عدي..
سعاد: الحمدلله ربج بالمرصاد خيه وكريم
ام ساجد: اي ولله. وشصار على رجلهه السكير
سعاد: سجنو الله لارده ولازم حبسه انشاءلله
مثل ماحرك كلبي وشعوطني تشعوط على وليدي
ام ساجد،: الف الحمدلله من خلصنه منهم
اليوم غداكم يمي. بمناسبه خلاص حمودي بسلامه
سعاد: عليش كلفتي نفسج ياخيه ماله لزوم
ام ساجد: دسكتي يولي اليسمعج يكول اني
كايمه بواجبكم ولله مقصره. وياج وتطلبيني
٢٠ دينار مال الخياط بس خل يستلم ابو ساجد
الراتب وانطيج
سعاد: ياا خايبه مو عيب عليج هيه نمونه ال٢٠
بعدين انه مداعيتج لو مطالبتج بيهن ماريدهن
ام ساجد: ميخالف حقج هذا وتعبج واني
مستحيه منج الله شاهد. لان تأخرت عليج
سعاد: خيه ال٢٠ واكعات ومحالله ومواهبه بيهن
