زهرة

البارت السابع الجزء الثاني

🌷صباحكم الياس 🌷
زهرة

ج 7

طلع وسد ااباب وراة ..

درت وجهي للغرفه ..

جان كل شي جديد عليه ...

دقايق واسمع صوت هلاهل ..
رحت يم الباب جيت اقفلها بس خفت لا اقفلها ويطب عليه يضربني ويسوي شي ..
اوف ياربي ..هسة اني هنا وحدي شسوي ..
لو جايبه وحدة من خواتي ويايه ..
لا عليمن خواتي ابوي مو جوة اصعدة فوك ..

اف شصعدة وهاي غنيه ام السعيلو

باوعت ع روحي بالمرايا .
شالحسن هذا ..
اليوم انام بالبدله والله ولا انزعها .ولا اغسل وجهي ..
شحلاتني هيج ..

مشيت للجربايه ...

تلمست الفراش ..
شكد ناعم يالله ..خالين فرشه بيضة ..
وله الغطة ياربي جنه زبد كون هيج اطمس وجهي بي وماكعد من نومي ابد

سمعت صوت طكطه ..
وخرت من الفراش ..
وكفت ع جهه ..

انفتحت الباب ..
طبت شيماء ..
زهرة ..
ضحكت الها ..
جتي كعدت يمي ..

كعدت كالت تعاي اكعدي ..

رحت كعدت كبالها بالكاع ..
كالت لا بصفي ..
كلها لا مرتاحه هيج ..
كومي زهرة ولزمت ايدي وكعدتني فوك ..بصفها
شوفي حبي ..
اني بتت بغداد واجيت اهنا ..
وراح نكعد اني وياج بيت واحد ..
كتلها كولي والله ..
ضحكت ي ..
ونطلع من هاي القريه ..
زهرة ..
مو هذا موضوعي اريدج ..تسمعين كلام رجلج منير وهو ابن عمج ..واكيد يحبج ..
ماعرف شنو الي صار ..بس الي اعرفه نهة عليج ..
وشنو السبب مادري ..
كتلها اني ماحبه ومجنت اريد ازوجه جنت اريد ابن المختار ..
كالت ..زهرة هسة انتي زوجتي ميصير هيج تحجين
لا ابن مختار ولا غيرة ..
وتعيطين
حتى العالم عبالها سوالج شي لو اذاج
بعد صرتي مرته ..دتفهمين كلامي ..
جان كلامها مثل فارس شكد حلو وتحجي بهدوء ..

كتلها انتي تعرفين تقرين وتكتبين ..

صفنت كالت اي ..طبعا ..

كتلها علميني واسمع كلامج ..عليج الله تعلميني ..

ضحكت كالت هاي سهلة ..

واريدح سمعين كلام عمه غنيه ..

وهي شويه سويه تحبج..
ومنير عندة حقوق يمج وهسة حياتج تغيرت ..
مومثل انتي وبنيه ..
نفس الصفنه وي فاؤس صفنتها وياها ..

هسة كل شي تمام ..

اروح وبعد اسمع اخبار حلوة ..
كتلها اي ..
لعد اروح وباجر اجي اشوفج ..
بوستني وطلعت ..
شكد حبابه وشكد حلو كلامها ..ياربي ..

طب منير وبايدة صينيه جبيرة ..

وسد الباب .

خلاها بالكاع ..
اسمعي حركاتج مو عليه زين وامشي عدل لا اكسر رجلج ..والله ..موزين ساكت عنج لحد هسة فهتي لو لا
وتقرب مني .لزم وجهي افتهمي كلامي
هنا كعدتج يمي طول العمر ..مو مال ادزلج عالم تفهم بيج ..
طاوعيني
غيرها مشوفين مني شي زين ..
دفعت ايدة بس اني اكرهك..
واتمنة الك الموت ..
وانتمى متت ولا اني وياك زوجنه

ضل يباوع عليه ..لهل درجه ..

وهد ايدة ..
اي ..والله ماحبك وكلبي من اشوفك يختنك ..

باوع عليه من فوك ليجوة ..
وغمض عينه ..وتافف ..زهرة ..افهمي لا اريد اذيج ولا اغصبج ع شي ولا اجبرج ..
انسي الي راح ..والي ثار
لا يوميه تحسسيني بذنب ..
كافي بعد ..
يلا

بدلي هدومج حتى ناكل جوعانه انتي ..

صفنت عليه ..

واذكرت اني من الريوك مخاله شي بطني ..

كتله ..جوعانه بس بدلة ماذبها ..
كال ليش ؟-

كتله مابدل وماذبها ..
كال راح اوكف بالباب نزعي هدومج وهذا الكنتور بي هدوم الج لبسي منه الي يعجبج ..

كتله بس ماذب البدلة والله ..

ولج شبيج شنو عصيتي بيها .

اريد اكوله حلوة..عفيه مانزعها خلي اشبع منها ..

واسكت ..

كتله منير..اريد بس اذب حذائي من الصبح لابسته وورم رجلي ..

كال ذبي ..وفتح الكنتور ..
كال لبسي الي يعجبج ..

بعد عن الكنتور ..
مشيت اله واشيل بذيال البدلة ..
اكو ضحكه بداخلي اخاف اطلعها ..
واخاف افرح احس مثل ماتقشمرت بالمصقول والملاعيب قبل لا يقشمرني هسة بالهدوم ..

صفنت ع الكنتور ..

بي خانات مرتبه ..
وهيج دشاديش كل الالوان ..

ومن هذن ملابس المصاليخ ..عزة بعينهم ..
جايبين وخاليهم الي ..

كال لبسي الي تردي ..

ماذب البدلة ..

وتالي ..
معليك بيه ..عوفني بيها ..

كال اوو سالفتج سالفة ..

شوفي بنت عمي ..
اتحملج نوبه نوبتين ترة وراها لا تلوميني ع شي
انا ناوي غير نيه من صعدت ..

بس ربج برد اعصابي

سالفه اعناد وتقفلين البوب وتعيطين انسيها ..

مايصرف الي هالحركات ..

كتلج طيش مراهقة مو عقل هسة انسي الي صار ..
وتعاي اكولج شي
ليش نهيت عليج وزوجتج ..
يعني لو اني بلا شرف اعوفج تنذبحين ..

وخلي ابالج غيري ع سالفه فارس المكطم ..
يكسرج اني بلعتها وسكتت اعرفج طفله
ولا ظنين اني غافل وماعرف شي ..

كل شي اعرف ..

خوش فهمتي كلامي عدل ..
هسة يلا ..غسلي وجهج وبدلي البدلة ..
حتى نتعشا ..

كتله ..ماذب البدلة
وخلي نتعشى ..
زهرة ..
مو جاي احاجيج ...لا تعاندين ..

مجاي اعاند بس ماذبها ..

يابويه يابوية ..راح اطلع ذبيها ..
وهسة جاي ..
خوش ..

اف ياربي هذا شلون افهمه اني اريد ابقى بيها ..

راح ابقى بيها وشيسوي خلي يسوي ..

جنت فرحانه بيها حييل
رغم الي صار بيومها ..
لبسة البدلة ..طيرت كل حزن من راسي ..

دقايق ودك الباب ..
كملتي ..
لا ..
ورة شويه كملتي..
لا ..
ثلاث مرات ..واكوله لا ..
تاليها طب ..
صدك جذب شنو فلمج ..شبيج يمعودة
ذبيها للبدله ..

منير ..عوف كل شي بس عليك الله بقيني بيها ..

شبقيج شلون تنامين ..

انام مالك لازم انت ..
زهرة ..
هسة شتريد مني انت..عوفني بيها..
بكيفج ..
يلا تعاي ..
ناكل كاضي جوع اني ..
اي ..
كعد ووخر الخبز عن الاكل ..

ماعون جبير وبي تمن وعليه لحم ..
وخضرة وزلاطه ولبن ..خالين ..
كعد ..
كعدت بوجهه ..

اريد اكل استحي ..امد ايدي ..
كال اكلي لا تستحين ..

هزيت راسي ..
اي ..

اكلت لكمتين ووكفت ..
كال شبعتي ..كتله اي ..

شنو هاي ..؟

كمت عنه ..
وكعدت بالكاع ع جهه ..ياربي شسوي هسة بلا شي اكرهه منا ومنا كبال وجهي كاعد ..
ليش هيج اخاف منه ..
وفارس كلي لا تخافين ابد ..
صيري قويه شلون يعني اصير قويه ..
اتعارك ويا ..

لو اسكت ..
لو اسمع كلام شيماء ..
بس هي متعرف بسوالفه ..
وارحع واذكر
هسة فارس كرهني اكيد من كلامي بس اني اخاف عليه ..
اوف ..

والله احتاريت ..شسوي ..

كمل اكل ورجه الصينيه ع جهه ..

وطلع ..بكعدتي كمت اغفي ع روحي ..
وارجع افتح عيوني ..
وارجع اغفى ..
وافتحها حيل ..

حسيت يدغني زهرة بدلي وصعدي نامي
فتحت عيوني ..
كتله وين..

كال ع جربايه ..

لا خليني هنا مرتاحه ..

شنو مرتاحه ..

كتله انطيني مخدة وعوفني انام عادي ..

زهرة ..شببج انتي مو طببعيه ترة ..
شنو ابالج وبيش تفكرين
تفكرين بفارس مو ؟

لا لا مو هيج ..
بس وين انام ..وانت وين تنام ..
كال يمج ..
لا متنام يمي ..
لعد وين ..؟
انام بشارع ..ترة كافي ..حتى الطفل انبهه منج

والله مبين سالفه فارس دك براسج مو ..

خفت منه ..

وكمت بسرعه ..

راح ابدل هدومي ..
وانام ..
طلع ..
فتحت الكنتور جريت دشداشة ..
وذبيت البدله كوة ..وشلت البركع ..

وكلت بالكي باجر ارد البسهن من جديد  ..
لبستها ..
وشفت فوك الكنتور خالين الفرش..
صعدت ع الجربايه وجريت ..
فراش وغطه ..ومخدة ..
وفرشتهم ..
بالكاع ..
وغطيت راسي ..

حسيته طب ..
غمضت عيوني ..
مسمعت اله حس ..بس طفة الضوة
بس اسمعه ..
يطكطك ع الجربايه ..

بجيت ..جنت مثل الضايع بهوسة الوادم وميندل
دربه شكد جمعت نفسي وقويتها ..
بجيت .
مخنوكه من الجاي والي راح ..

كل حلم انتهى بسدة هالباب والضوة
كل امل بروحي انطفى ..
من نزعت البدلة ..
كد مابجيت ..
احس المخدة انتكعت وصوتي انبح ..
كثر ماونيت ..

انجر الغطة مني

زهرة ..

كتله فدوة لا تاذيني ..

كال استغفر الله ..زهرة ..والله ماذيج ..

وكعد يمي ليش تبجين ..

كتله اريد اهلي ..

زهرة انتي مو جاهله .حتى تحجين هيج ..

كتله اعرف بس مخنوكه واريد اهلي فدوة وديني
اروح ..

ميصير ..وادنى الي ..
ليش ..
ادنى اكثر حسيت جتفة طخ بجتفي ..

كمت وكفت ..

هسة توديني لاهلي ..
كام ..
كال لا ..وهذا الموجود اتعلمي زين ..

تنامين لا ..بكيفج. .
يلا طفي الضوة..دانام .
كام ومدد ع جربايه ..
طفيت الضوة ..

ومنمت بيومها ..جنت انتظر طلعع الصبح
حتى. اكوم وانزل ..
عبالك محبوسة اني .وذيب بغرفه وحدنا ..
حتى اخاف اغفى واخاف انكلب ..

خوف خوف ..
من كل شي .

كد مابجيت جعت حيل ..
بس اريد اكل لكمه معدتي ..مغصتني من الجوع ..
حسيت صوت الديج يعوعي ..
فرحت ووخرت الغطى ..
وكمت اعاين ه البردة توة ديجهجر الفجر ..
وكت كعدتنا هذا ..
كمت شغلت الضوة ..
وبديت الم بالفراش ..
فتح عيونه ..منير ..
شنو هاي شدسوين..
كتله طلع الصبح

عاين للساعه ..كال يا صبح  ولج ..
بعدها دنيا لليل ..

كتله لا فجر شوف ووخرت البردة ..
يلا اكوم اسوي الخبز و  ريوك ..

زهرة نامي ..
بعد وكت مو هسة نكعد ..

لا عمه غنيه كالت كعدي من وكت ..
وتالي وياج ..فهميني

زواج هذا لو عقاب

داكولج مو هسة ..ناامي ..
كتله اني نازله ..

ولج محد كاعد ..
تعاي ..

عفته وفتحت الباب ..

اعاين البيت اظلم ..وفد ضوة الدرج .
مشغلي ..
مشيت ونزلت ..
بيت عمي ..جان جبير وحلو ..بي هوايه غرف ومابي حوش ..من انزل حولي ..وبي غرف واستقبال
بيوت مال ملوك ..
مثل جديتي من جانت تسولف النه
عن بيت الملك سلون معدل ومرتب
مو مثل بيتنا ..ابد ..
وصح هم بغير دربونه ودربونتهم بيوتها مرتبه وحتى الكاع مالتهم مو طين..صبه ..بيها ..

طبيت للمطبخ ..و
اعاين ..

شنو هالغراض والطباخ جديد ..وكاونتر والثلاجه شكبرها ..

يالله بقيت امشي واتلمس بيهم ..
زين ..القوري وين ..
حتى اسوي ريوك اكل كم لكمه ..

وبالكي اروح لاهلي كم ساعه واجي ..

حسيت احد ورايه ..
اندار ..
عمه غنيه ..
كالت ولج شدسوين ..من الليل
كتلها عمه داسوي ريوك ..

ياؤيوك وهسة الفجر روحي انطمري بعد وكت ..
لو نازله ذبين سحورة بنت ام الهوايش ..
كتلها ..لا سنو سحور ..داسوي اكل ..

احنا متعلمين هيج وكت نخبز ونتريك ..
فتحت البوري مال مي وصبت بكلاص وشربت ..
كالت هاي هناك يم امج ..
وليش امج مراح جيب صينه للعرسان ..
سكتت ..

يلا يلا روحي نامي مدري شلون ابني جارع ريحتج .
وتعاي اكولج ..
شنو هالعرامه والعياط مالتج ..
شريفه ومادري بيج ..
جنتي صغيرة تركضين وراهم ..لحد ما وكعتيهم ..

وهسة صرتي ام الشرف ..

ضليت اباوع عليها ..

معرفت اردها رغم وجود امي العدم
بس جنت اعرف ارجع للبيت ..

هسة ماكدر احجي لان اعرف وين ماروح راح اكابلها ..

كالت يلا ولي نامت عليج طابوكه كون ..
بالثناء دخل عمي ..
كال شبيكم ..

كالت شببنا ..بنت اخوك بس بقى طبب معزة بنص البيت وتحلبها ..
غنيه شلج بهالحجي ..
عاطت ..هيج زواجه ماريجها وهيج جنه عوذة منها
جبرتني انت وابنك
ع سنو
ع الكمل لو الجيفه ..مالتهم ..

عاط بيها غنيه ..عيب اسكتي

عيب مو عيب هذا الموجود ..
وله معاجبك ..عيني ..
اذا ماعاجبك الم هدومي واروح لاهلي
وانت كابل ..بنت اخوك ..

ماعرف شسوي وشحجي ..
ولا شكول ..
بقيت متبسمرة بمكاني
لا بيه اصعد ولا بيه ابقى

راحت من يمنا وطبت غرفتها

عمي كال ..بيتي لا تاخذين ع خاطرج هي عصبيه ..
وراح

بقيت وحدي شسوي ياربي
لا اجرع الفوك

ولا اجرع الجوة
وين اولي ..

عمي بيت اهلي وذله امي ولا كلامهم ..

صدك جابتني خدامه ..هنا ..

رجعت صعدت فوك طبيت كعدت ع الجودليه
واجاجي بروحي ..
كام يطب ضوة للغرفه ..مم البردة ..
كمت ع كيف كعدت كبال الصبنيه مال عشا البارحه .
وكمت اكل منه بس بدون صوت..
اخلي اللكمه بحلكي .

اخاف يحس عليه..
اكل واذكر كلام ..كلام غنيه وابجي .
واسكت روحي ..

ليون يلا كام منير من نومه ..
واني كاعدة انتظر ..الوكت كله حتى اكدر اتحرك ..

كام  صباح الخير
كتله صباح الخير  يلا نزلي ناكل كتله لا مجوعانه عاين ع الصينبه ..
صحك كال امشي .
نزل ..جوة..
نزلت وراه ..

ادور عليه ..

شفته كاعد بللمطبخ ..
ويكولها يمه بطلي ..هالسوالف عيب ..
طبيت اني ..
صباح الخير ..
دارت وجهها عني ..

كال وينه هسة ..
كالت والله بزبل .ولك ..داكولك اكل جايف ..
يمه ..خوما كدامهم سويتي هيج صدك جذب
عيب من عمي ..
كالت عوذة منهم..

بقيت اباوع بالعيون ..
مداعرف شكو .

كال وتالي هسة جوعان ..

كالت ..من عيوني .
كال تعاي زهرة اكعدي يمي .

كاعد بالكاع ..كعدت يمه ..
كال ..
بصوت ناصي ..
سمعتي
حس اابارحه ..
كتله ياحس ..
كال حس ..واحد يكركط اكل ..وماسح الصينيه مسح ..
اكو فارة بالغرفه ..
بس فد فارة حلوة وتشلع القلب ..

اني صخنت ..

كتله ي والله يمكن اكو جريدي ..
واكلهم .
.ضحك اكثر ..

كال كعدي حدي ليش بعيدة ..

حجيت بصوت ناصي ..
انت ليش متصدك من اشوفك اتقزز ونفسي تكلب ..
دار وجهه

خلت صينيه .كبالنا ..
بيها ..بيضتين وجبن وكوب جاي ..واحد ..

كلها يمه وزهرة ..

تخوصرت اله ..
كالت شدشوف ..مكطمه اديها ..لو رجليها
متسوي لروحها هي ..

يمه ..
لا تكول يمه ..

هذا الموجود ..والله ..

كلمه منه وكلمه منها ..
كلب الصينيه وكام يعيط ويصيح ..
وعافنا وطلع برة ..
بطلعته ..
عمه غنيه .تخبلت عليه ..
كام تغلط وتفشر ..

وكعد البيت كله ع صياحها ..وحجيها الي جان مثل السيف الي يذبح ذبح ..

وكامت تغلط ع امي ..

وتكولي بنت الفكر ..
ماعرف ليش ..انخرست ومكدرت كل شي احجي
جنت اسكت لو بيدي الزمها
اسحلها من شعرها ..
واطلعها بنص الشارع ..
كرهت امي وابويه الي ذبوني بنصهم ..

اذا اصعد فوك تعيط ..مكابله الغرفه وكاعدة
انزل جوة شلزم تكولي وخري ايدج تنكسي
حتى للاكل الي اكل منه الباقي  اتذبه ..
ومرتين اشرب مي ..بكلاص ..
ذبهم بزبل ..
صح هي جانت حقيرة

بس هسة بشعه ويايه بكل تصرفاتها ..

جنت اسكت ...

لا اني اححي ويا منير ولا ويا امه
كل شي منهم اقابله بهدوء مني ..

من يوم عرسي ماشفت امي وابوي بعد ..
الي عرفته ..

امي جايبه اكل من الصبح ..

زعمتي غنيه ذبته بزبل ..

كرهت اهلي كل شي يصير بيه بسببهم ..

منير ..هاي الفترة ..فوك عبالك مو ويا اني
ياكل ويشرب وينام ..
الي عرفته ..عندة دوام كل مدة وينزل ..
من ينزل لخاف بروحي
وفديوم
جاي انام اسمع صوت من جهه السطح الطكك
شلون عبالك احد يفتح باب
كمت بسرعه سديت الباب
مال غرفتي ونمت
يلربي لو حرامي لو جني هذا ..
وكامت تتكرر مرة ورة مرة
والخوف يموتني ..
للصبح اضل كاعدة ..

بهاي الفترة ..
اشترو بيت ..
من القريه الى المدينة ..

مشترين بيت اكبر ..
مجان اكو احد هنا ..اني ومنير وابتهال وعمي وعمتي
وياسر الصغير الباقي طالعين ومزوجين ...

جانت اتمر ايام .ابجي ..لليل كله ابجي ..
حتى اللكمه الي اكلها تطلع سم عليه ..

الى ان انتبهة عليه منير ..
بدون ماحجي كام كل ما يطلع ويطب ..
يجيب ويا ..

لفه ..نص دجاجه ..

ويطلع من الغرفه يلا اكدر اكل ..

حتى فرحتي بغرفتي راحت ..

كد ماسممت من غنيه ..

جانت ذب سم ..

كام منير يوميه يروح ويرجع من دوامة كام مايبات ..
مثل قبل ..

وغنيه بدت اذب عليه الشغل من وحدنا
ومن اكو احد ضل تعيب عليه وع شغلي ..
ومتخليني الزم شي ..
اجه ابويه وامي  مرة وحدة
طلعت سلمت وشبكته حيل
كال ها يابه شلونهم وياج
سكتت
كال صبريه ..اخذي بنتج وشوفي شلونها
اخذت امي وايدي ع قلبي راح يرجعوني ..
وياهم ..
جريتها من اديها ..
اول ماطبينا غرفتي ..سديت الباب ..
وشبكتها يمه خلصيني اروح الج فدوة والله والله ماحجي شي ينكم بس اخذيني منا ..
مشفت منها اي ردة فعل ..
وخرت منها اشوف عيونها ع الغرفه ..واكلتها اكل ..
وتضحك ..
كالت والله بنعيم عايشة ..

يمه ماريدة النعيم ..

زهرة هذا تليفزيون يشتغل ..
ولج شنو هالفرسه يالله ..
باعي حنام وكعديني فد شويه ..

هنيالج ..

صفنت عليها ..يمه مذلوله والله هنا انام ع الحصير ولا هنا ..

فتحت الكنتور ..وكلبت بالهدوم
وتكدر ع روحها ..

كالت انطيني هذول ..

كتلها اخذيهم كلهم ..ورجعيني ..
لفت دشداشتين ..جوة عبااتها ..

شترجيعين حمدي ربج ..واهمدي

هنا ..

بيج خير خلفي كم جاهل..

مو بس حايرة ذله وعشك ..

سكتت ..ومحجيت شي بعد ..

حقدت عليهم ..اكثر واكثر ..

ونسيت عندي اهل ..
وتلمفروض انسى ..
شكول وشحجي ..ومنو الي يسمع الي

كل المريت بي جان اكو شي واحد يصبرني ..
يجي يوم واطلع منهم ..
حنت اريد اي فرصه اطلع بيها ..
من البيت ..
وبس اطلع من البيت هذا مارجع بعد ..ابد طول عمري
ولا ارجع ..لاهلي
ولا اروح لفارس ..
اروح عسا ..ماشتغل خدامه عند العالم ولا هالذله الي بيها اني ..

يوم بعد يوم غنيه تزيد وتتتخبل عليه
ومنير من يوم ..الي كتله تلعب نفسي منك ..
من موجزد تخف عني من يروح تتخبل

صار كلامه وياي ع الكد بس ..

وانام بالكاع وهو ع الجربايه ..

مرت الايام مثل السم عليه ..

كمت اضعف واتعب حيل ..
ودومي جنت اسكت ولا احجي شي ابد ..
شكد اريد اصير قويه ..ماكدر ..

فديوم ..جانت غنيه عازمه عالم يمها ..

واجتي ابتهال عليه كالت زهرة اليوم عدنا خطار وامي تكول ..نظفي البيت وركبي الاكل ..
احنا طالعين للسوك ..
نزلت للبيت ..
كد مانظفته ..ايدي وكعت ..
جنت بين الطبخ والبيت اركض منا اروح لهنا ..

دكت الباب ..وطبت غنيه وابتهال ..

مكالت شي ..
بس فرت البيت كله ..
وفتحت الجدور ..
وطبت غسلت ..
وكفت بصفي ابتهال ..كالت عاشت ايدج ..

زين لحكتي  والله امي الطريق كله تدعي متلحكين ..

زهرة ..
ها ..
اقصد نعم ..

شنو الي صاير بينكم انتي ومنير وامي هيج تكرهج ..

سكتت محجيت شي ..

جتي غنيه وتلف الخاولي ع راسها ..

ابتهال كم مرة اكولج لا تحاجيها ..
يلا روحي بدلي
جاين ع العدة ..

وانتي طبي سبحي ريحتج مجيفه البيت ..

من كد كلامها جنت دائما اشم روحي وابجي
اكول اخاف صدك بيه شي
لو اسبح واجلف روحي جلف ..
اريد اعرف ليش ازوجني

ليش ؟
هيج باقيه ..لو مزوجه فارس هم هذا حالي ..

عفتها وصعدت ..
كمت مابجي لا ..
كمت احاجي المرايا مثل المخبله
يوميه احجي وياها
لحد ماار تاح ..
طبيت سبحت وحضرت روحي ..
لبست دشداشة ..نيلي وبيها ورد احمر ..
ورتبت شعري ..
وخليت كحل وحمرة ..
وعطرت نفسي ..بريحه ..

نزلت ..

بين مداحضر بالمواعين ..
طبو النسوان ..يطلعن اربع نسوان وياهم جهال 3
صرت بوجهم ..
سلمت عليهم ..وابتسم اتفضلو عمه تنتظركم
ياهلا بيكم ..

جتي غنيه ..

ياهلا ياهلا ..
وحدة كالت ولج غنوة هاي بنتج
كالت لا لا جنتي ..هاي ..

كالت ماشاء الله ماشاء الله ..

ادري هالحسن كله وشاهرتها بالعشيرة جايفه ..

اتحولت ملامحي من الضحكه الى الصدمه ..

كدام ناس غرب ..
تحجي عليه ..

موقف جان اصعب مايكون ..

شكد ماريد اوصفة ماكدر ..

كالت دطبي طبي ..هذا البيت كله براسي
شايفه انتي ..

طبو جوة ..
مكدرت الزم روحي ..

اجتي ابتهال..
يمي ..

كالت هذولي بنات خاله امي ..من بغداد جاين
يتباركون لعرسج ..

شفتيهم ..
طمست وجهي بسنك واجلف بي ..
كتلها ..اي
كالت صبي امي تكول ..
اللتهيت اصب واخلي ..
واودي ..للستقبال ..
وهم يسولفن ويضحكن ..

كملت ..

جبت الخبز ودولكه المي ..
خليتهم ..
دادنج اكعد خنزت عليه غنيه ..جيبي خواشيك بعد وتاشر براسها روحي
عرفت معناها ..لا تكعدين يمنا..

رجعت ..
للمطبخ ..
اريد افتح لكومدي ماكدر .ايدي ترجف ..

عفت كل شي وصعدت
فوك ..

بلسطح اكو جليكان نفط ..

اخذته .
وطبيت ..للغرفه ..

خليته بالكاع ..وكمت ادور ع جداحه لو شخاطه
مكدرت اتحمل الضغط بعد
عمر هذا لا يوم ولا يومين ..
احس تعبت وكبرت حييل ..
كلت اكوت واخلص ..وارتاح
واريح اهلي ..

ملكيت فتحت الباب ..
داجيب من جوة ..

بعدني منازله بايه ..
صعد منير ..
صار بةجهي
شببج ..

انصدمت بي ..
مابيه ..
زهرة عيونج دم شبيج ..

مابيه وكمت ابجي اكثر واكثر ..
واج احجي شجرالج ..
ماكو ..
جرني من ايدي طببني للغرفه
شكو ..
امي وياج ..
لا ..
بس هيج طب تراب بعيني ..
احجي لا انزل بدون ماعرف اكسر الجوة ..احجي

اني شنو هنا ..انتي مرتي ..

كتله اريد اروح

وين ..

ماعرف خلصني منا ..مداتحمل ..
امي مو ؟
دينزل ..
وكفت بالباب ..
فدوة لا تحاجيها
وخري داشوف شبيها لجت وياج ..

بس اسمعني ..
منير .
اريد ارجع لاهلي ماريد احد هنا .
فدوة لعينك ..

راح كعد ع الجربايه ..
دفعت جليكان النفط ..حتى لا يشوفه ..
كال اسمعي ..
صارلج شكد وياي ..
لا دنيت الج ولا تقربت زهرة ..
ترة اني مو بشع
وتعبت ابرر الج ..

تعبت تفهمين ..اصبري 5اشهر بعد
واطلكج حتى اطلع من خطيتج كلها

خوش زهرة

وامي اني اعرف شسوي وياها ..
ومن نتحول للبيت الجديد مابقيج يمها

خوش بويه ..
مسحي دمعاتج ..
وحسبيها عليه ..
اني السبب والله ..اعرف ..
لا عبالج مرتاح من اعاين عليج لا اموت الف موته
وماحاجيج ..ولا اسوي شي ..
اعرف ..الي سويته غلط..
ولو باقي ومدارس ومافاهم جان ماهتميت الج
ابد ..
فهمتيني ..
هزيت راسي اي

هسة شريد منج اريد تمسحين هالعيون الحلوة ..
وتنزلين تحضرين لكمه ااي لان تعبان حيل ..
راح اسبح ..
جيبي الاكل ..

طلع يسبح ..
اخذت ..الجليكان شمرته بسطح ..

شفت ..فراش مذبوب ..
رحت عليه ..
فراش جديد .ومخاد زغطه
خاليهم بين التانكيات هيج حتى لحد يشوفهم ..

ماعدتا احد ينام بسطح عفتهم  ..واني اكول هالصوت الطكك واخاف  شنو يجوز عمي ينام لو ياسر

نزلت
جانو بعدهم ياكلون ..

صبيت وصعدت ..

مر اليوم واني ويا منير
ينزل انزل يصعد اصعد
بيومها ..
بنفس اليوم رجع لدوامه ...
ونفس الشي هو ينزل بس يتعدى الليل
يصير صوت ..

هالمرة كمت ..فتحت الباب ..

جانت طافيه الكهرباء وعندي لاله صغيرة
اخذتها ومشيت ..
شفت باب السطح مردودة
دخيلك ربي منو هاي هنا ..
خلي ارجع ..

اسمع صوت همس بسكوت ..

ذبيت الاله بالكاع ومشين بسكوت ..
ع كيف فتحت الباب وطلعت بنص السطح ..
ماكو شي
هناك وسمعت صوت ..مشيت ..
ديجي من صوب التانكي
شفت ..مندر مفروش
ورجلين ..مددة مال اثنين ..

وللحكايه بقيه
شهرزاد