شافت تماره امجد مر من الحديقه وصاحتله
تماره: امجد رائد تغدا لو لا ادري بي هسه ما اكل
امجد: اي ما اكل ولا حجه ويا احد وبس كمل الغدا اخذه رافد البيتكم
تماره: اوك شكراً
تماره (خلي اروح اشوف رائد والله مشتاقتله احسن شي اعبر من الحديقه الخلفيه ومحد يشوفني وهمات اشوفه اذا يقبل يتغدا)
مدت راسها وباوعت مشافت احد افترت من الحديقه الخلفيه وصلت البيتهم فتحت الباب وراحت تركض تريد تشوف رائد مشتاقتله حيل بس فجأه انضربت بشخص وتعورت بأنفها والشي الي انضربت بي ما تحرك رفعت راسها وشافت جلال....
جلال تقدم عليها وكاتم الضحكه: تأذيتي
تماره: هااا لا مابيه شي ااخ
جلال بأبتسامه: لا تأذيتي ليش تعاندين
تماره: طبعاً اذا انت جنك حايط
جلال: اوك مقبوله منج بس خليني اشوف انفج
تماره وهي مخليه ايدها على انفها بألم: مابيه شي
جلال: عنوديه
تماره: بكيفي
جلال رفع حاجبه: واني شكو جاي اخذ رئيج اساساً
تقدم عليها وحصرها على الحايط ولزم اديها ورفعهن فوگ وسندهن ع الحايط وباوع على انفها بتركيز وهي بهاي اللحضه جمدت بمكانها جسمه لازك على جسمها وجهه قريب منها حتى جاي تحس بأنفاسه
جلال: بسيطه مو ضربه قويه بس انت تبالغين ما جذبت من گتلج اول ما شفتج متتحملين ضغوطات العسكريه
تماره دفعته ورجعت تمشي بعصبيه وگالت بصوت مقهور: لئييييم
طلعت من المكان وهي تسمع وراها ضحكات جلال
دخلت تماره البيت عمها وطلعت ياره بوجها
ياره: ياا ولج شبي خشمج هيج احمر
تماره: مبين هواي؟
ياره: اي
تماره: هههف وين البنات
ياره: گاعدات يم النسوان امشي نگعد يمهن جنت ادور عليج
المعازيم صارو يرحون لحدما بقو بس العائله رادو يشوفون رائد بس جان نايم ماحبو يضايقونه وكلمن رجع البيته....
_______
بالليل گاعدات لاره وياره وساره اتصلن ع سمر....
لاره: سمر مشتاقه السهراتنا وگاعدين ضايجين تعالن عازماتجن ع فلم رعب
سمر: ميخالف بس حضرن الأجواء واحنه علينا الحلويات والموالح
لاره: يلا ننتضرجن
اندگ باب بيت ام صقر طلع عمر يفتح الباب شاف سمر وسحر وقمر واكفات وشايلات اكياس حلويات ولابسات تراكات بيت
عمر بمزح: تعالن باجر اليوم ماعندي خرده
سمر: لا يا وجه الفگر
قمر: عميران يمعود استر علينه وافتح الباب دباوع ملابسنا ملابس بيت يفشلن افتح الله يخليك
عمر: اممم انتضري خلي افكر
سحر: ولك شتفكر خرب تفتح لو اصيح
عمر: عادي صيحي اذا تكدرين
سمر نفذ صبرها باوعت على الفتحه الصغيره الي مسويها عمر بالباب حتى يحجي وياهن دخلت رجلها بالفتحه ودفعت نفسها على الباب عمر جان يسولف ومالازم الباب جان ينفتح وطلع عمر يركض وسمر ذبت الغراض وتركض ورا
سمر بصياح: اجاك الموت ياتارك الصلاه
عمر: دسكتي يالبطه
سمر: اني بطه يادب اصبرلي
دخلو للبيت واحد يركض ورا الثاني
ام صقر: يمة لتوكعين ديري بالج
سمر: خاله اذا مكتلت عمر اليوم يمكن انجلط
ام صقر تضحك: مدري شوكت تكبرون
نزلن البنات على صوت الصياح وگعدن يضحكن على شكلهم
لاره: هاي شبيها سمر معصبه
سحر: عمر حبسنا برا واحنه لابسين ملابس بيت ويگول تعالن باجر اليوم ماعندي خرده وسمر ركبها جني
لاره: هههه يستاهل لعد ميجوز منها حاط راسه براسها
صقر جان واكف يشرب مي وفجأه دخلو عمر وسمر يتراكضون وكامو يفترون حوالين طبلة المطبخ
صقر اختنك بالمي: كح كح ولكم كح شكوو
سمر: الله عليك الزمه ياصقر
صقر: غير افتهم شكو
سمر: عليك الله صقر الزمه بداعتي
صقر هنا ماگدر يرفض وتوجه العمر ويباوعله بخبث حاصرو من الجهتين وصقر لزمه من اديناته وخلاهن ورا ضهره
عمر بتمثيل ودراما: الله على الضالم ياعيب الشوم لك وينكون يا اهل الحاره
سمر: سوده عليه هاي شوكت بگناك من باب الحاره بلا دراما وانتضر عقابك
عمر: وشنو هو العقاب
سمر: راح تشوف بعيونك يا ابضاي
راحت ترست گلاص مي بارد وگفت گدام عمر وفرغته على راسه وعمر يشهگ من برودة المي
تركه صقر وهو كاتم ضحكته...
عمر: تضحك عليه مو عود اني اخوك
صقر: الا سمر خط احمر
صعد عمر الغرفته وهو يتوعد بيهم...
تقدم صقر على سمر بأبتسامه: شسوالج
سمر وهي تبررله وتشرح ومثل الأطفال وتحرك اديها بكل اندماج: بس تخيل اني بهذا تراكي وتكرم حذائي ابو الأصبع وگفني برا يگولي ماعندي خرده تعالي باجر والعالم التعبر تباوع علينا متت فشله وفوگاها شايله غراض حتى باوع شلون تعورت من ورا..
انطت ايدها الصقر يشوف الجرح جان صغير وبالگوه يلا لاحظه...
گال بتمثيل: حيل هواي متأذيه اليوم احرگ عمر
سمر: من ورا انضربت ايدي بالميز اني واركض
صقر: اشتعل عمر هسه اخليلج لصقة جروح
طلعلها لصقة جروح من المطبخ وسحب ايدها وخلاها ع الجرح وابتسم: هسه راضيه؟
سمر: شوي احسن
صقر ضحك على تمثيلها كله حتى تقنعه عمر غلطان وهو يدري بيها هي وعمر حاطين راس براس....
صقر: معافايه
سمر: تسلم
صعدت يم البنات وشافتهن مشغلات الفلم
سمر: حقيرات تشغلنه بدوني
لاره: يلا تعالي توه بدأ
گعدت يمهن وجاي يباوعن بأندماج
سحر كأنو تذكرت: بنات مو جبنا ويانا حلويات؟
قمر: اي والله وينهن
سمر: ماكو غير عمر وقفن الفلم هسه اجي
راحت سمر على غرفة عمر وتدگ الباب بعصبيه....
سمر: عميران ادري بيك خذت الحلويات جيبهن نريد انتابع الفلم
عمر: انسيهن
سمر: اكولك جيبهن بسرعه
عمر: نوووو ياحلوه
سمر: اصبرلي
راحت سمر على غرفة صقر ودكت الباب
صقر جان متربع على السرير مالته وتارس الفراش اوراق جاي يراجعهن
سمر دخلت الغرفته وباوعت عليه جان مشغول
هو استغرب شعجب جايه الغرفته راحت سمر وكفت كدامه وضربت رجلها بالأرض مثل الأطفال....
كالت بدلع: صقرررر
جان يمثل عدم الأهتمام ويكلب بالورق الي كدامه بس صوتها وهي تنطق اسمه شعلت النار بكلبه...
صقر: نعم
سمر: عمر
صقر: شبي انوب
سمر: باك الحلويات مالتنا ونريد انتابع الفلم
رفع رأسه وباوع عليها وسحب نفس طويل ورجع ركز بالأوراق الي امامه...
راحت سمر وگفت گدامه وسحبت الأوراق من ايده وخلتهن ورا ضهرها هو گلبه رجف من ريحة عطرها...
سمر: يلا
صقر ضحك: يعني بهاي الحركه جاي تجبريني مثلا
سمر: احسبها شلون متريد بس گوم
صقر: واذا ما كمت
سمر: الخاطري
صقر تنهد وگف وياها وهو يگول بداخله (تعرفين على يا جرح تضغطين يا سمر)
راح صقر على غرفة عمر ودك الباب
صقر: عمر ليش ماخذ غراضهن
عمر: مشكلتهن حتة بعد ميعيدنها
صقر: رجعهن ترا انت الغلطان وانت البديت
عمر: اصلا اكلتهن بعد لتحلمون
سمر: اني اعلمك ابو كرش
عمر: ديلا روحي خليني اكل براحه
سمر: سم بكلبك
صقر ضحك عليهة لأنو عصبت: هاي كله علمود الحلويات هسه اجيبلج عوفي عمر
سمر: ماريد اله حلوياتي
صقر: اعوضج خلي يولن اجيبلج احسن منهن
سمر تحاجي عمر من ورا الباب: ماريدهن بعد سم بطنك يالدب
عمر: وجع لتدعين
صقر وهو يسحبها من امام غرفة عمر: عوفي خلص هسه اجيبلج
دخل الغرفته اخذ محفضته وفونه وطلع....
سحر: لج وين صرتي
سمر: ولج عمر القرد ماكلهن وهسه راح صقر يجيب
لاره: خرب عقلك عمر شگد يحب يعاندج
سمر: خل يولي ماريدهن بعد
دخل صقر وشايل اكياس كثيره
سمر: اي والله كفو
صقر: هههه بالعافية
اجا اتصال الصقر وطلع برا يحجي
لاره متقصده: اكول سمسم
سمر: ها حبي
لاره: روحي صيحي الصقر خلي يجي يشوف الفلم ويانا يحب الرعب
سمر: خلي تروح وحده من البنات مابيه
البنات كلهن كالن مابينه وتعاجزن
سمر: اااف اوك
راحت سمر للحديقه شافت صقر منطيها ضهره ويخابر مشت بهدوء وكفت ورا وانتضرته لما خلص المكالمه .... خلص وسد الخط سحب نفس وكام يدندن
أنا أكثر شخص بالدنيا
يحبك وأنتي ماتدرين
وفيك أموت أنا وأحيى
من أول يوم لين الحين
يا أجمل أجمل الاشياء
ويا اغلى من نظير العين
متى قلبك متى ممكن
يصافح بالوله قلبي
متى هالبال يتطمن
على احساسي وعلى حبي
ابي هذا الغلا معلن
تعبت احب واخبي
ـــــــــــــــــــــــ
من وصل الأخير كلمات تنهد التفت ورا يريد يرجع الغرفته وطلعت بوجهه سمر...
سمر: بووووووو
صقر فز: اسم الله
سمر: هههههه
صقر: خبله انتي بالله لو مأذيج
سمر: ها ولك صقر عشگان واني مادري
صقر ارتبك: احم من شوكت انتي هنا
سمر: من لما جنت تحجي بمكالمتك
صقر وهو يحاول يكتم ارتباكه: امممم
سمر: على فكرة صوتك حلو
صقر: خلي سر بيناتنا
سمر: ماگتلي منو سعيدة الحظ
باوع للسما بمحاوله للهروب من نظراتها حتى لا يضعف ويگول شي يتندم عليه بعدين....
صقر: وحده غبيه متدري انو هي باللنسبه الشخص تعنيله هذا النفس الي يصعد وينزل بريته وگاعده بعقله وگلبه
سمر:هنيالها لعد اني ليش محد يحبني هيج
صقر: يمكن اكو شخص يحبج مثل هالحب بس انتي متدرين
سمر: يعني قصدك شخص يحبني ويفكر بيه واني مادري؟
صقر: لعد ليش لا
سمر: لا ماتوقع منو داعيه عليه امه ويحب خبله مثلي
صقر ابتسم ومارد...
سمر شهكت كأنو تذكرت شي: اي صدك تذكرت لاره تكول خلي يجي يتابع الفلم ويانا
صقر: لاماكدر عندي شغل
سمر سحبته من ايده: دمشي يمعود العمر يخلص والشغل ميخلص
صقر ارتبك من لزمة ايدها بس اكتفى بالسكوت وراح وياها دخلو شافو الأضواء مطفيه وبس ضوء شاشة التلفاز بوجوه البنات ويباوعن بأندامج.....
لاره: ياهلا بصقر كل الهلا بأخويه اررررحب يالغالي اجلس حياك
گعد صقر وگامتله لاره صبتله ببسي وانطته شيبس وهو طول الفلم مركز على حركات سمر شلون تباوع بأندماج ومن تصير لقطه مرعبه تغمض عيونها وبقى مبتسم على تصرفاتها الطفوليه....
جانت الأجواء هادئه والكل يتابع بترقب وحبت تخبث عليهن لاره وصاحت كل قوتها وهنه صاحن وياها من الفزه وگعدت تضحك عليهن هي وصقر....
سمر شمرتها بقوطية بيبسي
ياره: عززا بعينج لو جايه القوطيه براسي جان كبل للأنعاش
سمر: قليله بحقج
رجعن يباوعن على الفلم وسحر اجاها مسج فتحت الفون شافت رقم غريب راسللها
"ما توقعتج تحبين الرعب دائماً تفاجئيني كلما اگول حفضتج اطلع بعدني ما مكتشفج"
استغربت وبعدين گالت اكيد وحده من البنات ناصبه عليها تجاهلت الموضوع
خلص الفلم ورجعن سمر وسحر وقمر البيتهم وصعدن ياره وساره الغرفتهن ينامن
لاره: سوززززي
سوزي: يس
لاره: رتبي المكان وشيلي هاي الأغلفه منا
راحت لاره على صقر الجان گاعد ع التخم مخلي رجل ع رجل وصافن....
لاره: الي ماخذ عقلك يتهنى بي
صقر ابتسم: ليش اكو غيرها
لاره تغمزله: بشر شصار ماصار بالحديقة اشو تأخرتو
صقر: ماصار شي بس تورطت
لاره: شلون يعني
صقر: خلتني اگوللها احب وحده وهي متدري اني اقصدها
لاره: هههههه ياربي هاي البنيه مو طبيعي غبائها
صقر: الله كريم الدنيا تتغير متضل على حالها شبيدي اذا الله شايل عقلها ومخلي بمكانه بتيتيه تصدگين اذا اگلج من گتلها احب وحده گالت الله شوكت واحد يحبني هيج
لاره: ههههههههه يعينك الله
صقر: شنسوي الحمدلله على كل حال
لاره تغمزله: ترا اني دزيتها
صقر: ههههه اي واذا دزيتيها شتردين مثلا
لاره: يعني ما استاهل طلعه منا منا
صقر: افااا ليش شوكت اني رفضت طلب الأميرتي حتى تتمصلح يمي ان شاء الله بعد كم يوم نطلع بس هاي الأيام مشغول بيها
لاره: يبعد عيوني
صقر: تسلملي عيونج خرب نسيت العقود
لاره: ياعقود
صقر: لج غير عندي كومه شغل وسمر ماخلتني اكمله من ورا مشاكلها هي وعمر جنهم اطفال
لاره: صدك عود عمر وين شو اختفى معقوله ضل خاتل خايف من سمر هههههه
صقر: مادري هسه اصعد واشوفه يلا غاليتي اترخص منج احلامج سعيده
لاره: احلامك سعيده
صعد صقر الغرفة عمر دگ الباب محد فتحله دخل وشاف عمر متمدد ع الأرض وغافي وگدامه شاشة التلفاز مشتغله
صقر: عمر
عمر: هممم
صقر: كوم على فراشك الكاع بارده
عمر كام مثل السكران يروح يمنى ويسرى ميدري وين يروح سنده صقر واخذه لفراشه وغطا وطفى الأضويه وطلع وسد الباب وراح يكمل شغله....
دخلت ياره الفرفتها هي وخواتها لأن متعودات ينامن سوه من هنه وصغار شافت ساره تحاول تنام وياره تصبغ اضافرها گعدت يم لاره وبدأت تسولف وياها
لاره: شعجب مصبغه هيج لون ما احسه يوالم شخصيتج
ياره: هالمره حبيت اصبغ لون جريئ مليت من الألوان الهادئه
ساره: تسكتن لو شلون نريد انام گاعدين من الصبح بسبب العزيمه
لاره: نامي نامت عليج طابوكه
ياره: اااف مدري شلون هاي سويران بس تخلي راسها على المخده كبل تستشهد اشو اني اضل اتگلب عبالك فقمه
لاره: اي والله جبتيها على الجرح حتى اني همات يعني طول اليوم عقلي ميفكر بشي ومن اجي اريد انام هذاك الوكت اكوم افكر بالماضي والحاضر والمستقبل لحدما اتعب وانام
ساره: المفروض اني من اموت كبل للجنه لأنو متحمله العيشه وياجن
ياره: ولج تنامين لو شلون والله ثولتينا
ساره: اي غير تنجبن بالبدايه
لاره: انجبينه يلا نامي اني هم خلي احاول انام لأنو تعبانه اليوم كاعده من الصبح
نامت ساره ولاره بس ياره ماگدرت تنام نزلت جوه شغلت شاشة التلفاز ماعجبها شي ( صارلي هواي ممتصله على احمد من اجينه هنا ولهسه صح ماحجي شي بس الأغاني تكفي توصل الي بكلبي) فتحت فونها وسحبت نفس تحاول تقلل ارتباكها دخلت ارقام رقمه الحافظتهن على الغيب و انتضرت الرد.....
_________
نروح الـ احمد جان كاعد بالحديقه يشرب قهوه ويقرأ كتاب يحب القرأه يحسها تنتشله من الواقع وهو هذا الي يريده شي يفصله عن الواقع بهاي اللحضات رن فونه سد الكتاب وخلى بصفه وشال فونه باوع على الشاشه وابتسم على هالرقم الي مايعرف صاحبه والي كل فترة يتصل عليه ومن يفتح الخط يسمع بس صوت انفاس شخص وبعدين تبدء اغنيه وبعدما تخلص ينتهي الأتصال.. فتح الخط وكالعاده يسمع بس صوت نفس يصعد وينزل وهدوء شوي واجا صوت الأغنيه
شكد احبك يا اناني
شكد احب جرحك اليه
لو بديه اني اكرهك
اني احبك مو بيديه
من وراك اسهر ليالي
اني ميت من وراك
الهوا انت بحياتي
ليش خانكني هواك
شكد اخاف اني عليك
و انت ما خايف عليه
ماشي بس وكفني حبك
بطريقي شجابك انت
ما كسرت بيوم گلبك
و انت گلبي شكد كسرته
جنت من اشتاك اشوفك
روحي تتركني و تجيك
هواي باعوك انت تدري
و اني بس المشتريك
مو تعبت وياك اني
صرت محبس بين ايديك
انت متخاف الله بيه
تعبي كله يضيع بيك
ياما سهرتني جروحك
آي جروحك مو حرام؟
انت نايم مستريح
و اني ما اكدر انام
وبعدما خلصت الأغنيه انسد الخط.....
_______
اليوم الثاني
ام احمد: قموره
قمر بالطابق الثاني: اجيت والله اجيت شلون يعني اطير مثلا اصبري يا ماما
نزلت قمر وراحت على امها بالمطبخ
قمر: هاعيني
ام احمد: اريدج تروحين البيت خالج ابو رافد
قمر: ليش
ام احمد: تودين هاي الدولمه سويتها مخصوص الرائد سمعت انو يحبها فـ سويتا اله بأيدي
قمر: وليش الا اني ماكو احد غيري بهالبيت
ام احمد: احمد بالشركة وامجد طلع مدري وين وسمر وسحر راحن يودن ماعون دولمه الأم صقر وتأخرن اكيد ضلن يسولفن ويا البنات المهم يلا استعجلي ماما
قمر: اااف ماما دباوعي ملابسي مال بيت واتعاجز ابدل
ام احمد: ولج امشي بالعكس كولشي مابيهن ملابسج حلوات
قمر: ادري بيج تجذبين عليه حتى اروح ديلا جيبي بعد متعوفيني خلي اوديها واخلص
ام احمد: يلا هاج وسلميلي على خالج
فتحت سمر الباب مال بيتهم وباوعت زين مجان اكو احد راحت ركض لأنو البيت كدامهم فتحت الباب ودخلت توجهت البيت ابو رافد وسمعت صوت صياح دخلت للبيت بهدوء تريد تفهم شكو....
رائد: معليكم بيه اني ماريد اشوف احد عوفوني بحالي
ابو رافد: وليدي ميصير لازم تطلع تسولف قابل تضل حابس نفسك بالغرفه ومتقبل تاكل
ام رافد: يمه لاتحرك كلبي عليك وتضل حابس نفسك
رائد: كلتلكم لحد يتدخل بيه معليكم هيه حياتي واني حر بيها
قمر ترددت تسلم عليهم وتخليهم ينتبهون الوجودها لو تنسحب بس مالحكت تقرر لأن لمحها خالها....
ابو رافد: هلا بقمر تعالي بنيتي ليش واكفه هناك
قمر: السلام عليكم
الكل: وعليكم السلام
قمر بأرتباك: اني اسفه على التدخل بس ماما دزت الكم دولمه وتسلم عليكم
ام رافد: الله يسلمها استريحي حبيبتي خلي اجيبلج شي تشربينه
قمر: لا والله خاله اعذريني بس مستعجله راح اخليها بالمطبخ
ام رافد: ماشي بنيتي وكولي الماما عاشت ايدها
راحت قمر للمطبخ وهي تلوم بنفسها( اووف يربي كله من وراي تدمرت حياة الولد شلون بيه يربي)
بهاي اللحضات سمعت صوت تكسير جاي من غرفة رائد راحت تركض وكفت كدام غرفته شافت امه وابو يمه وهو اعصابه فالته كام يسحب الأغراض الي بجنب سريره ويشمرها على ميز المرايه شافت هالمنضر دموعها كامت تنزل صعبه تشوف انسان جاي يتعذب وحياته تتدمر بسببك....
دخلت قمر للغرفه ودموعها تجري: خالو ياريت تنطوني مجال انت وام رافد احجي ويا على انفراد عندي كلام ويا
ابو رافد وافق بقلة حيله وطلع هو ومرته وسدو الباب گعدت قمر بصف رائد على السرير ودموعها تنزل ومدنگه راسها ورائد ماگال شي بس يباوع....
قمر: اني اسفه
رائد: على شنو؟
قمر: على الي صار بيك بسببي مجان المفروض تعرض حياتك المفروض اني هسه بمكانك لو مو اني جان انت هسه وضعك مو هيج بس اني السبب
رائد: وشنو انتي هسه جاي تشفقين عليه؟؟
قمر: لا انت فهمتني غلط اني متندمه لأن كل الصار بيك بسببي واتمنى اعوضك بأي طريقه ولو ادري كولشي كدام تضحيتك صغير
رائد: هه متكدرين اني بعد شغل ماكدر اشتغل ولا امشي مثل العالم ولا احقق احلامي ولا زواج اكدر اتزوج منو تقبل بواحد معاق ولا تكدرين تمحين نضرات الشفقه الي بعيون العالم من يباوعون عليه
قمر: اني مستعده اوافق على الزواج بيك
رائد: مستحيل اني ادري بيج متعاطفه وياي وتشفقين علي وتحسين بالذنب على الي صار بحالي بس بعدما اتزوجج راح تحسين بالنقص واني ماريد اضلمج وياي
قمر: لا والله مو قصة شفقه ولا تعاطف بس انت قدمت اليه شي مو هين واني لازم ارد الك ولو شي بسيط وبالعكس ماحس بنقص انت مناقصك شي وان شاء الله راح تتعالج
رائد: لامستحيل ماريد ادمر حياتج
قمر: ضحيتلي بروحك انت التستاهل حياتي
رائد:...........
شافته ساكت ماحبت تضايقه اكثر طلعت وسدت الباب وراها (صح اني ماعندي مشاعر تجاه رائد غير الشعور بالذنب بس حتلو اجبر نفسي هو يستاهل اكثر من غيره) طلعت للحديقه ترخصت من خالها ورجعت البيتهم....
______
الشركه
رافد: صقر المخططات التخص مشروعك اريد اطلع عليهن
صقر: اي تدلل بس مخليهن بـ لابتوب وناسي اليوم بالبيت من تكمل شغلك نروح سوى واشوفهن الك
رافد: اني شغلي مخلصه انت اذا مخلص خلي نروح
صقر: اني هم ماعندي شي
رجع صقر للبيت هو ورافد دخل رافد سلم على عمته ام صقر وتوجهو للأستقبال اجا اتصال الصقر فـ فتح الابتوب وضعه بجنب رافد وطلع من المكان.....
نروح الـ لاره سمعت انو صقر اجا وهو بـ الأستقبال بس متدري انو رافد ويا راحت للأستقبال شافت رافد منطي ضهره للباب ويتصفح بـ الابتوب على بالها صقر لأنو جانو نفس الطول واثنينهم عدهم عضلات راحت بهدوء وجان تكمز على ضهره من ورا وتغمض عيونه...
لاره: منوو اني
رافد انصدم وماگال شي عطرها الأنوثي ترس المكان وشعرها الأسود الطويل وكع على صدره بقى ساكت ومارد...
لاره: افااا معرفت اخيتك لاره عاد صدك هسه تستاهل عقاب
حضنته من رقبته وعضت اذنه....
رافد: اااخ شبيج جلب وتعضين
لاره انصدمت اول مره اخوها هيج يكوللها ابتعدت عنه ونزلت من التخم تريد توكف كدامه....
لاره: ها صقر شو صاير متتحمل شقه خيرك
ومن وكفت كدام رافد انصدمت وجها صار اصفر من الفشله وسبت نفسها الف مره بداخلها على تسرعها بس حاولت تسوي نفسها مافشلانه....
لاره: منو جلب؟؟
رافد باوعلها بلامبالاة ورجع ركز بالابتوب....
لاره: يعني انت لو تتجاوز لو تضرب لو متجاوب على الي يحاجيك شنو قلة الأدب هاي
رافد جرها من التيشيرت الابسته بأتجاهه وصار وجها بوجهه وكال بنبرة تهديد: كل حجايه راح تتندمين عليها يالاره بس هسه اني محترم البيت الگاعد بي
لاره بنضرات حاده: نزل ايدك
رافد رفع حاجبه وجرها عليه اكثر
لاره: اكولك نزل ايدك احسنلك
رافد سحبها عليه اكثر وهي تحاول ترجع ليوره وتوخر ايده وهو جان لازم النيشيرت بقوه فجأة سمعت صوت التيشيرت انشك....
_______
للكاتبه ساره حسين