راح صقر البيتهم ورجعن البنات يغسلن الگراج ....
قمر: لاره تعالي رشيلي مي هنا
ياره: بنات وخرن الماسحات منا
سمر: يابه ديلا فضنها يرادلها علم اخرطي المي بالماسحه
سحر: هسه انتي شتحسين واكفه هنا لا شغله ولا عمله وتصيحين علينا
سمر: والله مشكلتجن منو كاللجن تذبني بهيج موقف محرج اله اعاقبجن واخليجن تغسلن الگراج كله
ساره تذكرت الموقف: هههههههه يابه والله لقطه انوب سمر من الاحراج كامت تمشي مثل البطريق على كيف حتى لا ترجع توكع
الكل:ههههههههه
سمر: كافي ترا والله بعد الساني ميطخ السانجن
سكتن البنات يخافن من زعل سمر كملن وجهز العشا گعدو على ميز الطعام كلهم ماعدا امجد مجان موجود....
ام احمد: يمه متشوف اخوك وينه
احمد: اتصلت عليه توني يگول لتنتضروني ع العشا
كملو عشا وكعد يشربون شاي ويسولفون الى ان كل شخص راح لفراشه الا شخص واحد وهي ساره الماكدرت عيونها تاخذ نوم وتنتضر امجد ( ادري بسببي ما اجا ميريد يشوف اي ردة فعل مني تدل على الرفض) لحدما شافته من غرفة البنات الي تطل على باب الحوش دخل للبيت وسمعت باب غرفته انسد يلا تطمنت ونامت ........
_______
جان نايم وحواجبه معقوده وغالق عيونه بقوه وانفاسه تصعد وتنزل بسرعه وينعاد عليه نفس الكابوس ومثل كل مره جان طفل ورايح المدرسته وملامحه تدل على الحزن فتح باب بيتهم وشاف شيء غريب يغطي كيس اسود استغرب وتردد بفتحه مشى بخطوات ثقيله حاول يفتح الكيس بأدين مرتجفه وجان المنظر الأمامه مخيف جثة ابو مشوهه، صار يبجي ويصرخ بهستيريه الى ان فز من النوم وعى على نفسه وهو يصرخ .....
تنهد وحط اديناته على جبهته يحاول يهدء گعد على طرف السرير ونزل اقدامه للأرض وصفن بالفراغ مد ايده جوه مخدته وسحب ورقه ملطخه بالدم ومكتوب عليها (السفاح) نفسها الورقه الي لگاها على جثة ابو...
رجع شعره على ورا بعصبيه
وگال: ثاري وياك مثل ثار البدوي ينسى كلشي الا طلابته......
__________
جانت نايمه بهدوء الى ان صوت المنبه تسلل المسامعها وصارت تعابير وجها تدل على الانزعاج فتحت عيونها صار ضوء النهار بوجها رجعت غمضت و مدت ايدها تدور على فونها حتى تغلق المنبه.....
سمر: وجعا لاره سدي لا اكوم ادفنج
لاره: يابه راح اسده شبيج معصبه
سمر: معصبه من غبائج اول مره اشوف وحده تضبط منبه بيوم عطله عكس العالم
لارة: الضاهر سهرة البارحة فقدتج الذاكره كومي عيني كومي اليوم نروح الخوالنه الزود وحزام الضهر
سمر گامت من فراشها بفزع: يا شلون نسيت كبر غير تكوليلي
لاره: لعد اني شسويت هسه؟؟
سمر بصياح: بنات كعدن
ساره: اللهم اجعله خير شنو هذا الصوت البقري
سمر: بقري بعينج كومي لا تنكتلين
ياره: بدلن هسه شوي ونگعد
سحر: اي والله بس اطلعن من الغرفه
لاره: ضلن نايمات رايحه اصيح الخالتي ام احمد ترزلجن
البنات بس سمعن لاره كامن من الفراش بهلع
سمر: ههههههه نبع الحنان مسيطره
_____
ترتيب الركاب هيج صار ....
سيارة احمد بيها البنات لأن رادن يكعدن سوه
وسياره صقر بيها امه وخالته وامجد وعمر
طول الطريق البنات مندمجات بالسوالف ويحشن بجدهن وخوالهن الي لسى ماتعرفو عنهم
احمد: ترى بعدجن حتى ماشفتنهم ليش خليتنه نشيل ذنوبهم
لاره: ميحتاج نشوفهم صيتهم سابق شايلينه بالصلاوات خوب ما احجيلك على جدي اسمعو اسمعو
هيبه وصدر ديوان للكلفات ينخونه
مجرب جدي ميرد اليحبونه
احمد وهو يباوع عليها بالمرايه: اتفق وياج بس مو كلش ههههههههه
لاره ضحكت بحسن نيه لكن قلب ياره اشتعل نار وهي تشوف احمد شلون يباوع على اختها طول الطريق تمنت يباوعلها بيوم هيج نضرات....
وصلو و نزلو من السيارات دخلو من باب كبير و شافو كدامهم 3 بيوت نفس الشكل بس عبالك قصور وسيارات فخمه تارسه الگراج...
استقبلهم واحد لابس دشداشه سوده طويل واسمر وجسمه مرتب سلم على الشباب
: كل الهلا بيكم حياكم الله
احمد وامجد وصقر وعمر: الله يحييك
توجه الـ ام صقر وام احمد باس راسهن وهو يگول: شلونهن عماتي
ام صقر ودموعها نزلت: يا بعد عين عماتك انت ابن محمد اكيد لأن تشبهه
ابتسم وگال: رافد ابن محمد
ام احمد: ما شاء الله يمه الله يحفضك الشبابك
البنات من شافنه وهنه يعلقن بهمس
قمر: جسمه يخبل
سمر: غامض
ياره: صوته رجولي
سحر: ثگيل
ساره: شخصيه
ضحكن البنات بيناتهن الا لاره عرفته من صوته هو الي اتصل بهذاك اليوم قاطعهن صوته المبحوح وهو يگول: شلونجن بنات
البنات: الحمد بخير
رافد: استريحو ليش واكفين
صقر: ماعرفنه ياهو بيت جدي
رافد: اول بيت الجدي والثاني الأبوي والثالث العمي ابو فهد واعتبرو البيوت كلهن بيوتكم ماكو كل فرق
احمد: ونعم ماتقصرون بيكم الخير والبركه بس اول شي نمر على جدي
رافد: استريحو الكل ينتضرونكم جوه
دخلو وجان البيت كبير بي حديقه ومسبح ومكان للخيول ....
دخلو للأستقبال كان كبير واثاثه فخم ويترأسه الجد مبين عليه الوقار والعز گاعد بشموخ ولده گاعدين بجانبه على الجانب الأيمن والأيسر وكل واحد منهم بجانبه عائلته بعد دخولهم وقف الكل احترام للضيف ....
ام احمد وام صقر اول ما شافن ابوهن ركضن الحضنه وكامن يبجن وهو حاول يلزم نفسه لكن صار يبكي بكل ضعف وهو يحتضنهن....
تقدمو الشباب وسلمو على جدهم وبعدهم البنات الا لاره بقت واگفه بمكانها
ام صقر: لاره تعالي سلمي على جدج
ماتحركت...
ام صقر وهي متفشله وبصوت شبه معصب: تعالي لاره
گعدت لارا على اقرب تخم بدون متسلم وهي متجاهله همساتهم ونضراتهم بعدم اهتمام ....
من بين الهمسات سمع صقر رافد وهو يهمس الأبو (قليلة ادب) على اخته استفزه الكلام وحاول يتحكم بأعصابه وگال بهدوء: قبلنه طلبكم واجينه هنا مو معناتها احنه نسينا الماضي وبعد ماكو حزازيات وتتوقعون كلنا عدنا قابليه ناخذكم بالأحضان يمكن اني ضغطت على نفسي ومابينت غيري مايگدر احنا جينه هنا علمود نسمع منك (ويباوع على جده) ثانياً سلمنه عليكم لان بناتكم الي من لحمكم ودمكم الي بيوم من الأيام تبريتو منهن فـ هنه ربنه احسن تربيه وعلمنه نحترم الصغير قبل الجبير لذلك اختي تصرفها مو قلة ادب بس الكل فعل ردة فعل.....
لاره ابتسمت بداخلها على موقف اخوها دوم فاهمهن وساندهن وميرضه عليهن حجايه مو زينه صارلهن نعم الأخ وعوض مكان ابوهن ....
الجد: اعتذر بالنيابه عن الي گال هالكلام واني فاهم موقفكم وعاذركم راح احجي الي عندي ادري بيكم الراح يسامح وبيكم الما يسامح واني من داخلي ممسامح نفسي....
سكت الكل وبدأ الجد يسرد الصار ويا....
: جاي تشوفون هذا العز كله بنيته بتعب لحدما صار اسمي يهز الگاع وكل الناس تعرفني وتشهدلي جان عندي منافسين طبعا واكيد الدنيا خساره وربح وبيوم من الأيام خسرت كولشي وتدمرت سمعتي بالشغل ومنافسيني تشمتو بيه و جنت شاب وغارتني الدنيا وعاميه عيوني طرحو عليه ابو فهد وابو رافد انو اكو شخصين متقدمين البناتي واسمهم معروف واني بمحاوله مني ارجع اسمي ومكانتي الأجتماعيه ناسبتهم وحتى اخلص من تأنيب الضمير بعد ما زرتهن ولا شافني لحد هذا اليوم واني حيل متندم وشايل حوبة امهن الي ماتت وهي تتمنى تشوفهن واني ماخليها فـ اتمنى تسامحوني والمسامح كريم حتى الله يسامح ليش احنه منسامح وادري قصرت وياكم لكن خير الخطائون توابون....
الكل ساكت......
لاره: ههههههههه
الكل استغرب!!
لاره وهي تمثل تمسح دموعها وتصفق: وااو برافو تستحق الأوسكار....
وگفت وگالت بصياح: جهال احنه تضحك علينه بهاي المسرحيه المطلعتك مضلوم، انت تعرف الضلم العاشنه بناتك بسببك شنو؟؟ شمرتهم على عالم حتى اهلهم متبرين منهم حتى ماندري عدهم اهل لو لا يشتغلون بأمور ممنوعه عدهم عداوات خير من الله كل يوم واصلنه تهديد جانن ينامن ودمعتهن بعينهن تدري ليش؟ لان رجالهن نخطفو شهر وهنه بدون زلم تايهات ولدهن صغار ميكدرون يدافعون عنهن لحد مايوم شمرولهن زلمهن باب البيت بجياس زباله.....
(هنا لاره صار صوتها مخنوگ وبي البجيه بس ماحبت تبين ضعف بلعت غصتها وكملت)
تخيل انت طفل ويجيبولك ابوك باب بيتك بجيس زباله والمنظر يبجي الكافر واحنه بعدنه اطفال وشفنه هذا المنظر وياريت لو لحضات بقو يوم كامل بحديقة البيت ماعدنه احد يدفنهم والغربه يخافون لا يتورطون ويوگعون بيها لأن جانت جريمة قتل منو دفنهم تتوقع؟؟ بناتك دفننهم حتى بجنازتهم محد مشى...
ومهما يكون همه هم احسن منكم ع الأقل عافولنه ورث نعيش بي لو ضالين عليكم جان متنا جوع وانتم ماتدرون بينه خلف الله على صقر واحمد بعدهم اطفال و يدرسون ويشتغلون ياخذهم صبح ويجيبهم ليل تخلو عن كل حرياتهم حتى لنعتاز شي كل هذا تجي تگول المسامح كريم الله يسامح وانتو متسامحون ليش انتم تعرفون الله تعرفون الدين لو تعرفون بس اليفيدكم تستغل هاي المقوله لأن الصالحك صراحه ما اثق بيك ليش ورا ما وگفنا على حيلنا طلعتلنا ليش من جنه محتاجين ضامين روسكم خاف هم طابيلنه على طمع مثلما سويتو بأبوي واخو؟؟ دنيا متنضمن يكلك اليسويها مره يسويها مرتين حجي هههههه....
الجدوهو يحاول يمسك اعصابه: عجيبه جرأتج منين وارثتها محد اله عين ولا يسترجي او يفكر يحاجيني بهيج نبره وهيج كلام
لاره: منك وارثتها بس ما اوصل الجرأتك شمرت بناتك على ناس متسوه وعاشن ذل علمود يبقالك هذا الخير والعز وتنطي الولدك المگعدهم مثل الأسود بصفك ومعيشهم احسن عيشه
الجد: محد اله حق يمنعهن عني وهذا بيت ابوهن والهن حصه حالهن حال ولدي
لاره: صح بس اليكسر خاطري انت ابوهن وبناتك غشيمات بكلمه منك ما سمعن الكل اعتراضاتنا واجنك وختلن جوه ذراعك عموماً اني العندي گلته ولتتوقع امنعهن عنك واخرب علاقتي وياهن علمودكم لأن متهموني....
صقر: مدام امي وخالتي مرتاحات القرارهن احنه منعارضهن والأجل عين تكرم مدينه
الجد: انتم حقكم بلي تگولونه ما الومكم الكلام هسه ميغير نضرتكم بس الزمن والمواقف الها دور جبير كل الأريده منكم وقت وان شاء الله كلشي يتصلح....
باوع الجد الاره بنضرة تفحص:مبين عليج بعدج صغيره بس ذكيه وگويه
صقر ويباوعلها بفخر: ذيبتي
الجد: انشهد ذيبه بس الضاهر مناويه تسلم عليه لهسه عاد انطيني فرصه اغير نضرتج مو هيج تقفلين علينا ههههه
گامت لاره وسلمت على جدها برود وبدأ الجد يعرفهم على بعض....
عائله ابو رافد متكونه من:
ابو رافد
ام رافد
رافد
رائد
تماره
عائلة ابو فهد متكونه من:
ابو فهد
ام فهد
فهد
حلا
________
سلمو على بعض وبعد الكلام والسوالف گاللهم الجد امشو نگعد بالحديقه گعدو بالحديقه وجانت حيل حلوه واكو اسطبل خيول شوي بعيد بقت لاره تباوع عليهن....
الجد: عجبنج
لاره: ومنو ميحب الخيل
الجد: روحي شوفيهن اخذي راحتج البيت بيتج
لاره ابتسمت ومشت بأتجاهن وبنص الطريق رجعت الصقر بعيون متوسله: ركبني
صقر: ههههه اني مو يم الخيل ولا اعرفله
الجد: ولا يهمج شوفي فهد لو رافد ياخذونج
فهد: تعرفون كاسر ميقبل احد يتقربله غيري وخاف يشمرها وتتأذه خلي رافد يوديها على الأقل جامح يتقبل اي شخص بوجود رافد
رافد: بس جد....
قاطعه الجد: بلا بس بلا بطيخ وديها
مشت گدامه بأنتصار وفرحه دخلت للأسطبل ماحست غير خيل اسود صار يصهل خافت وختلت بضهر رافد ضحك عليها وهو يتوجه للخيل: ها وين السانج القبل شوي مطلعته شو خفتي
لاره: على فكره تدري بروحك دمك سم ومينبلع؟
رافد: وتدرين ما طلبت رأيج؟
لاره: لئيم
تجاهلها ومشى بأتجاه جامح وهو بس تقربله صار يمسح نفسه بكتف رافد ضحك رافد ومسح على راسه وهو ارتخت اعصابه وهدأ .....
رافد:لتتقربين ميحب الغرباء خلي يهدأ شوي
لاره تباوع بحذر...
رافد: تعالي
جانت خايفه بس ما حبت تبين تقربت بثقه شال رافد ايدها وخلاها على الخيل جانت ايدها ترجف وشوي وتقبلت الأمر ....
لاره: شسويتله وهدأ
رافد: جامح عندي من جان صغير محد يمد ايده عليه غيري متعود على عطري وصوتي ولمستي من شافج خاف هدأته وامن بيج لأن اني موجود يعني اذا اطلع يرفسج رفس ويحقق امنيتي
لاره: عوذه شگد حقود سم سم مو بشر
رافد: ههههههه
طلع الخيل من الأسطبل وگال: اصعدي
لاره(حرت شلون ما اصعد ما اوصل لأن قصيره احط رجلي على حبل السرج واگمز وارجع اوگع وهو ما ساعدني يباوع ويضحك): اعتقد تحتاجين مساعده
لاره: ياريت مجاي تشوف مثلا!!
رفعني وصعدت وهو يمشي بجانب الخيل : السانج طويل
لاره: والسانك اطول
رافد: انتي الي رديتي اول ما اتصلت مو
لاره: اي للأسف
رافد: سبحان الله من لحضتها كرهتج
لاره لوحت بأيدها وهي تضحك الصقر وهو عيونه تراقبها من بعيد وگالت الرافد: شعور متبادل
رافد: تذكريني بالأطفال
لاره: شنو قصدك!!
رافد: الأطفال من يسوون شي جديد الاحظهم يلوحون بفخر الأكثر شخص مقرب الهم حتى ينتبه ويشوف انجازهم معقوله لهل درجه انتي ما عندج انجازات وفرحانه لأن راكبه خيل هههههه
لاره: لعد شگد غاثتك حتى تركز بأبسط التفاصيل الأسويها
رافد: صحيح كلامج انتي غاثتني ما تنبلعين بس اكثر شي غاثني السانج الطويل اريد اگصه
لاره: لو تعرف تگص جان گصيت السانك اول
رافد: هههههه على گولة اخوج لكل فعل ردة فعل طبيعي الساني طويل وياج لأن ما شاء الله اطول شي بيج السانج....
بهاي الأثناء رفع الخيل نفسه وگعت لاره بالگاع نزل المستواها يتطمن عليها وهمس بضحكه: صدگ لو گالو اخوانه المصريين القلوب على بعضيها حتى خيلي ما استلطفج ههههه
گامت لاره وضربت رجلها بالكاع بغضب وتوجهت الصقر وحابسه الدموع ورافد يمشي وراها وشبه ابتسامه على وجهه....
وصلت الصقر وخلت راسها على كتفه وتبكي وهو يضحك ويمسح على ضهرها
لاره: باوع ايدي شلون انجرحت
صقر وهو حابس الضحكه باس الجرح وكاللها: يلا بسته هسه يطيب
لاره من بين دموعها: وانت شبيك حابس الضحكه
صقر: ههههه يا گلبي اول مره تركبين خيل طبعا توگعين وبعدين احنه نتعلم من شنو
لاره وهي تمسح دموعها: من اخطائنا
صقر وهو يبوس راسها: عفيه بذيبتي
تماره بمزح: لعد ليش الله ما رازقني بهيج اخو مثل صقر شو رافد اذا وگعت يگولي امداج الثوله
الكل: ههههههه
بهاي الأثناء رن جوال صقر استأذن منهم وراح على صفحه
صقر: ها حارث
حارث: استاذ وين انت
صقر: اني خارج المحافظه خير شكو
حارث: استاذ وصل تهديد الباب الشركه
صقر: من نفس الشخص؟
حارث: اي اعتقد لان الورقه بيها دم مثل كل مره
صقر: شنو مكتوب هالمره؟
حارث: استاذ مكتوب
(متعلمين تشردون مثل ابائكم وانتم تدرون الكاكم لو بسابع سما)
صقر: هههه تمام حارث گولي بأي شي جديد يصير
حارث: حاضر استاذ
_____
مر اليوم وجهز العشا وتعشو ورجعو كملو تعلولتهم والكل يتعرف على بعض اكثر ومندمجين بالسوالف....
نروح للبنات....
قمر: هههههه ااخ بطني والله لو تشوفن سمر من جانت صغيره بنكلادش
سمر: لج قمر الضاهر نسيتي روحج لتخليني افتح دفاترج القديمه
تماره: فدوه بنات اريد اشوف صورجن قبل
حلا: اي والله اني هم صار عندي فضول
لاره: احنه كلنا مسحناهن شلون طفوله سوده
ياره: اعتقد كم وحده موجوده عند ساره لمن جنا بالابتدائي
سارة: مخليتهن حتى بس وحده تتفيك وتكول اني حلوه اشوفها صورتها قبل واكوللها لا تنسين ماضيج يالشكره
حلا: اريد اشوف
ساره: اوك هسه اجيب فوني...
توجهت ساره للأستقبال الدخلو بالبدايه ناسيه جنطتها هناك اخذت فونها وتمشي وهي تتصفح بي وانلطخت بشخص رفعت راسها شافت امجد
ساره: امجد!
امجد: شفتج گمتي ولحگتج اريد سألج سؤال
ساره: اسأل
امجد: الكلام الكاتبته بنهاية الدفتر حقيقي لو مجرد كلام
ساره: ضلت ساكته
امجد لزم ايدها وخلاها على قلبه: اسمعي نبضاته شگد عاليه تريدج تسمعينها تحسين بيها ماتنبض الغيرج احبج ساره گلبي ماينساج احسج سالفه بدمي
ساره ارتبكت وقاومت خجلها تقربت على امجد وگالت بهمس: احبك
امجد حضنها بدون وعي رجف گلبها وبادلته الحضن ....
صحت على نفسها وهي تدفعه: امجد هسه يشوفنه احد
امجد: خلي اليشوف يشوف اول وتالي انتي حلالي
دفعته وركضت بخجل ورجعت للبنات...
_______
ساره: بنات تحذير لا ينصح بمشاهدة ذوي القلوب الضعيفه
البنات انصدمن متوقعنها راح تسويها صدك!!
سحر: انجبي سويران لا تشوهين برستيجنا
ياره: اويلي طارت هيبتنا
قمر: ساره حبابه لاااا
سمر: الضاهر مشتهيه بوكس انتي
لاره محجت جاي تخطط شلون تاخذ الفون وتمسح الصور لأنو ساره مصختها كل شوي مهددتهن......
