نور...
چان الجو شتا وبارد، وجنت نايمة بغرفتي، صار الصبح، گعدت ونزلت للمطبخ سويتلي فنجان گهوة...
وطلعت فوگ وهمين سمعت اغنية الا حبذا...رتبت غرفتي وبدلت، راح اروح للمحكمة، اليوم عندي قضية ميراث وكذا...بدلت ونزلت، بعدني عالدرج وسمعت صوت حسوني ابن اسيد...كالعادة، ميريد يشرب الحليب، واية دتفاهم وياه...
ـ نور...صباح الخير.
ـ الام...صباح النور.
ـ الاب...صباح النور.
ـ نور...حسوني انت ليش متسمع الكلام وتشرب الحليب مالتك...مو خطية هيج ماما تعذبها.
ـ حسن...ماحبه.
ـ نور...اية عوفيه على راحته اليوم ان شاء الله احجي وياه واخلي يحب الحليب.
ـ اية...اووووف اووووف والله تعبني.
ـ نور...هاي اسيد ليش ما گاعد...ماعنده دوام؟.
ـ اية...اليوم ما عنده دوام واني همين ماعندي...خليت سارة نايمة يمه.
ـ نور...خوش اني رايحة...اجاني الخط.
ـ اية...الله وياج.
نور...
بعد مرور سبع سنين من زواج اسيد...صار عنده طفل اسمه حسن عمره ست سنوات، وبنت اسمها سارة عمرها سنة...
اسيا جابت بنوتة سمتها ودق...عمرها سبع سنوات...
واني بطريقي للقصر رجعت شوية لذاكرتي...
صارت هواي شغلات خلال هاي السبع سنين...
مهند رجع تقدملي وهمين رفضته...فقد الامل بانه ياخذ گلبي، اخر شي سمعته عنه انه تزوج بعد ما تخرجنا...
سما بنت خالتي تزوجت...وريومة بصف ثاني متوسط هسة، ازهار تخرجت وتعينت مدرسة انگليزي بمدرسة ثانوية، اخوها رائد فات كلية هندسة وهسة هو مرحلة ثانية، اما علّة گلبي...ادم...
معذب امه وياه، تريد تخطبله وتزوجة وميريد...صار عمره 30 سنة وما متزوج...ولا مفكر بالزواج...اخر مرة شفته بحفلة التخرج مال ازهار...
ـ نور...السلام عليكم.
ـ ام ادم...وعليكم السلام بنيتي...شونج.
ـ نور...بخير الحمدلله خالة وانتي.
ـ ام ادم...زينة الحمدلله.
ـ ادم...شلونج نور.
ـ بخير اخي وانت.
ـ (اخذ نفس عميق) زين.
ـ يمته تتزوج تفرحنا بيك.
ـ مراح اتزوج.
ـ ياااا...ليش؟.
ـ جنت احب وحدة ومتريدني واني ماريد غيرها.
ـ يالله...الله يعوضك.
بوگتها حسيت بنظراته التي چانت تريد تاكلني اكل، هالنظرات بيها حب وحزن وعتاب وحقد وعشق، نظرات تحوي مشاعر مختلطة...
نقطعت سلسلة ذاكرتي بلحظة وصولي للمحكمة...
نزلت واني احمل ثقتي بنفسي الي محد يشيل مثلها، متاكدة من انه راح اربح القضية، وصار وگت الجلسة، وربحت القضية... ورجعت للبيت واني احمل الفرح بگلبي، مع كل قضية اربحها تزيد ثقتي بنفسي، بالمناسبة اني بسنة التخرج طلعت الثانية عالكلية، وتكرمت، وهذا الشي چان اول خطوة الي نحو تحقيق حلمي بانه اكون اشطر وحدة بمجال عملي، وفعلا اني هيچ....
اول ما دخلت من باب المطبخ الخارجي سلمت على امي...
ـ نور...هلا يوم شلونج.
ـ الام...بخير... الگوة بنتي .
ـ اية...ها نور بشري ربحتي القضية...لا...
ـ نور...اي ابشرج الحمدلله ربحتها.
ـ الام...الف مبروك بنيتي الف مبروك.
ـ نور...بوست امي وگتلها الله يباركلچ.
ـ الام...يوم الي افرح بيج عروس.
ـ نور...اهووووو يمه...همين عروس، يمته راح تقتنعون انه اني ماريد اتزوج.
ـ الام تحجي بعصبية...اي همين عروس...وماراح نقتنع انه انتي متريدين تتزوجين...ماكو هيج شي، باوعي لروحج...صار عمرج ستة وعشرين سنة وممتزوجة، اسيا بعمرج بنتها سارة عمرها خمس سنوات...
ترا خل يكون بعلمج...اليوم راح تجي ام اكرم تخطبج لابنها وليد....
ـ نور...يمه هاي شنو دتخططين من ورا علمي...شنو اني لازم صرت علّة عليكم.
ـ الام...نور لتحللين الحجي بكيفج، منو كال صرتي علّة علينا...يمه انتي بنيتي، واني وابوج مادايميلج...واخوج واختج همين من حقهم انه كل واحد بيهم يشوف حياته ويا اسرته وبيته، والمره مكانها بيت زوجها...يمه ترا العمر يمر بسرعة، واخاف يمر بيج لا متزوجة ولا عنچ ولد ولا تلد، فكري بكلامي يمه.
ـ نور...خلاص خل يجون.
ـ الام...اي عفية بنتي...هي هاي نور بنيتي العاقلة.
ـ نور...يالله يمه اني استرخص...اطلع ابدل وارتاح.
ـ الام...الله وياج.
نور...
رحت غسلت وطلعت لغرفتي بدلت وتمددت على چربايتي، فكرت بحجي امي، اكتشفت انه صحيح، ميحقلي اظل ويَ اخوية او اختي وهمة متزوجين ويريدون يعيشون حياتهم ويا عوائلهم...
خطبني التاجر والصياغ والمهندس والمعلم واشكال الوان، ولا واحد عجبني او بالاحرى همَ مبيهم شي وخلوقين وحبابين وكل مرة يروح اسيد يسال عليهم وعلى اخلاقهم ويطلعون مثل المسك...
بس اني ماريد اتزوج، اريد ابني مستقبلي، ماريد اتقيد ويَ زوج واطفال، يمكن اذا تزوجت ما اكدر اوفر الاهتمام لاطفالي، والام تضحي لمساعدة اطفالها، اهم شي بالنسبة للام هو طفلها، تتحمل علمودة كلشي، الزين والشين...بالتالي هذا جزء منها وقطعة من گلبها...
واليوم راح تجي صديقة امي تخطبني لابنها الصغير...
اسمه وليد، شفته مرة وحدة قبل اسبوعين، وهو كلش خلوق وحباب، حسب ما اعرف انه يكبرني بسنة، واني ودا افكر استسلمت ولفيت راسي ونمت.
ـ نور...نور.
ـ هممممم.
ـ يالله اگعدي...بعد ساعة يجون الناس عليچ...كومي يالله يا دوبچ تلحكين تتحرضرين.
ـ اي گعدت گعدت...اريد انزل جوا اتغدا واصعد ابدل.
ـ اي ليش ما متغدية؟.
ـ لا.
ـ سودا عليَ نور...يالله اروح احمي واصبج...والله عذريني يا خيتي حسبالي ماكله شي گبل مترجعين.
ـ يالله اية مصار شي...بعدين اني خوما صغيرة اخليچ تصبيلي من ارجع، اني اصلا مردت اكل اول ما رجعت.
ـ يالله انتي گومي غسلي وطلعيلچ ملابس تلبسيها من يجون بين ما انا احمي واصب.
ـ يالله.
نور...
گعدتني اية ورحت غسلت وطلعت ملابس ونزلت اتغدا لان ممتغديه وگابلني بابا.
ـ وج بنتي ليش هيج متاكلين غير وجبتين باليوم صحتج حرامات ترا انتي بعدج شابة.
ـ يا بابا انت دتشوف التعب مال المحكمة والقضاية...ما افضى اكل والله.
ـ يالله باباتي الله يقويج...اكول بنتي.
ـ تفضل بابا.
ـ شنو رايج بذولة الناس الي راح يجون عليچ.
ـ مادري والله بابا...بعد مشفناهم.
ـ يالله بنتي الله كريم.
تحججت كتله بعد مشفناهم بس اني اصلا مموافقة عليه وراح افوت اسقاط فرض، كملت اكل وصعدت فوك لغرفتي لبست فستان طويل مشجر وطلعت عليه شال ووردي بلون الورد البي
ولبست عليه حذاء كعدب عالي
ومكيت خفيف ولبست سوارة ذهب مالتي ومحبس ذهب ولفيت الشال لفه مرتبة لان مردت البس گلاده حتى اظل نازگة...
كملت وباوعت لروحي بالمراية العمودية، هالمرة صدگ طلعت اخبل، هو اني رافضة الولد وهيج ترتيب وهاي اذا ما رافضته شلون...
نزلتمن الدرج وصارت امي گبالي..
ـ الام... اللهم صلي على سيدينا محمد....عيني باردة عليج بنتي... اقري المعوذات لروحج.
ـ نور...صدگ اني طالعة حلوة هيچ.
ـ اية...شنج الگمر وشوية اضوه.
ـ نور...ههه تسلميلي ايوتة.
ـ الام...روحي يبنيتي الله يجعله من نصيبج.
اجو الناس وگعدت وياهم واول ما طبت للاستقبال تعجبت بيَ ام اكرم وحسيت بالولد حباب ومبي شي وچان مرتب وكاشخ وعطره يسطر سطر، وبعدين طلعو وگعد اسيد وياي ووافقي وزين الولد وحباب وسألت عليه اليوم الصبح ومن هالسوالف وكذا، واني اكول يصير خير...يصير خير...عدت يومين وصار العصر ونزلت لاكيت ابوبة وامي واسيد واية...
ـ نور...اريد احجي وياكم شي.
ـ الام...خير شكو بنيتي.
ـ اسيد...شصار.
ـ نور...يا جماعة اريد احجي وياكم علمود هذا الولد.
ـ الاب...خير ان شاء الله.
ـ نور...يا جماعة ترا اني..........................
الى اللقاء في البارت القادم.....
شنو تتوقعون يصير ويا نور؟؟؟؟؟
تتوقعوها توافق؟
لو ترفض؟