خلصت قرايتي ومسكت موبايلي ردت افتح يوتيوب شوية وجان بابا يجي ويكلي:-
-نوارة بابا هذا سايق الخط مالتج للمدرسة ميكدر يجي عليج منا لاسبوعين.
-يي عزة، ليش بابا؟.
-خطية هذا صايرة عندا حالة وفاة بالبصرة ولازم يروح.
-يي واسبوعين ليش؟.
-بابا هاي العادات مو بكيفج.
-ييي ومنو راح يوديني؟.
-والله مادري، انتي تدرين ماكدر اتاخر عن الدوام مالتي، نحنا دائر حكومية والانضباط مطلوب، واخوج ميكدر يعوف جامعته.
-يي وهسة شلون؟.
-تغيبين ماكو غير حل.
-بابا ماكدر اغيب عن الدوام كل هالفترة.
-يي لعد شلون.
-بابا اني عندي حل؟.
-شنو؟.
-بابا اخلي ازهار صديقتي توصلني لان اخوها هو الي ديوصلها للمدرسة وهو الي يجيبها للبيت.
-ييي خوش بنيتي، احجي وياها ونطيني اخوها استاذن منه اذا يكدر يوصلج يوميه.
-صار بابا.
وبوكتها فعلا طلعت من برنامج اليوتيوب وفتت للفايبر حجيت وياها والحمد جانت نشطة، وكالت اي عادي هو ميكول لا، كتلها انطيني رقم اخوج حتى ابوية يتصل عليه ويحجي وياه، وفعلا نطتني الرقم وحجه ابوية وياه وحتى خزن رقمه بجهازه وكال حظري روحج باجر ادم يجي عليج واني من سمعت هيج ردت اطير من الفرح واحس الدنيا كلها مواسعتني وكيفت كلش وكلت بكلبي مصائب قوم عند قوم فوائد.
كعدت الصبح واني كلني نشاط وحيوية مكيفة وفرحانة لان راح اشوف ادم، اخذت عهد على روحي احجي وياه والزك بي، لان عرفت من ازهار انه ادم يجب البنت اللعوبة والي تحجي بس متحجي زايد عن حدها وميحبها ساكتة وصنطه، واخذت مساكرة وباودر خدود وحطيتهم بجنطي بجيب سري، خطيت مرطب شفاه بي لون وردي بسيط على شفتي ومن كملت حطيته بالحنطة، مااكدر احط مسكارة وباودر قبل الدوام لان اخاف وحدة من المدرسات تشوفني وتسويلي قصة عنتر، الي يشوفني اسوي هيج يكوم يشك بتربيتي، بس اني مراضية عن الي اسوي بس حبا بادم وحتى اخلي ينجذبلي لا اكثر، وحسيت بشعور المراهقة وهستوني عرفت ليش بنات جيلي تسوي هيج.
-الام:-يالله يمة نور، استعجلي ليجي عليج الولد وتنحرجين ويكول شوفو هاي اول يوم وهيج تتاخر.
-نور:؛يالله اجيت يوم اجيت.
-اسيا:-نور تعالي اريدج بشغلة.
-نور:-كولي شعندج.
-اسيا:- ماكدر هنا.
وسحبتني من المطبخ من ايدي وكفت كدامي وكلها غضب وكالت:-
- هاي شمسوية بروحج؟؟؟؟.
-ش....شنو؟ شمسوية؟.
-شنو هذا الوردي الي على شفتج؟.
-يا وردي؟؟؟.
-شوفي نور....حسبالج اني ثولة وغمة وما افهم شدتسوين؟؟؟؟ وج مبين حاطة حمرة على شفتج.
-لا هاي مو حمرة....هاي مرطب.
-ييي مرطب وبي لون....وج من تردين اتجذبين تجيبن على وحدة ثولة مو على وحدة مثلي....لوما اني وانتي شتريناه لهذا الزفت المرطب وابو المحل كال بي لون....مسحي يالله ولا تخليني احجي لامي عنج والله تموتج غير.
-اي اي اي شكو....اصلا اني يومية احط منه.
-لتجذبين....لوما اني وياج بنفس الغرفة واشوفج من تبدلين، صارلج فترة اداومين وما حاطيته ولا مرة، ليش الا هاليوم....لان اخو ازهار راح يوصلج وانتي ردتيها من الله.
-هششششششش، راح امسحه.
-مسحي و حمدي ربح الف مرة واشكريه لان امي فشافتج بي، لان جانت دطبخ وما باوعتلج.
-اييي.
وجان يجي ادم واصعد واسلم عليه واحجي ويا ازهار واتشاقة وياها وهو يسمعنا، طبعا اني ادري بي يسمع حجينا لان كل شوية يباوعلي بالمراية، الطريق كله وايدية ترجف وكلبي احس بي يريد يكوع من مكانه، واحس كلبي دينبض بقوة وسرييييييع، نزلت من السيارة وكتلة(مع السلامة....خوما ضوجتك بالغوة مالتي، راح تتعود لان اني ما اسكت....باااي)، وفتت للمدرسة وازهار تحجي وياي وتباوعلي واني مو يمها، وخلص الدوام وبس ردته يخلص لان اريد اشوف حبيب كلبي، وكبل منطلع جنا بالساحة ولكتلها لازهار:-
-زهورة روحي طلعي بالسيارة انتي شوية واجيج عندي شغلة نسيتها بالصف.
-اي عادي نطلع اني وانتي سوية للسيارة اجي وياج للصف.
-لا لا لا لا لا لا، اني اروح وحدي للصف انت طلعي للسيارة(حجيت هيج واني متوترة).
-اهاااا ممممممم اوك.
ورحت للصف وجانت الكل طالعة منه ماكو بس اني والصبورة والرحلات، طلعت المسكارة وتمسكرت وبرزت رموشي ورديت طلعت الباودر وحطيت طوووووووخ حتى يبينن خدودي، وكوبل طلعت للسيارة وباوعلي ادم وسلم علي وشافني ورديت السلام وضلينا نحجي بس هالمرة مو مع ازهار مع ادم.
-اكول نور.
-كول تفضل.
-انتي دايما هيج تحجين ومرحة وعفوية.
-(حسيت كلبي راح يوكع) اييي ههههه اني دايما هيج وانت؟.
-اني شبية؟؟؟؟.
-همين هيج شقاوجي وطبعك يخبل.
-اييييي دايما،،،اعجبج اني.
-هههههههه(وتعمدت اضحك بغنج وادلع شوية وادوس زايد وياه).
ورجعت للبيت وكبل ما فوت غسلت وجهي بالكراج خفت لا امي تشوف خدودي وبلوتي وتحرمني طلعة البيت، طبعا منطيتنا حريتنا اني واسيا بس متحب البنية تكبر بعمرها بالمكياج وتلبس لبس كباري، تحب تعيشنا لحظات عمرنا، ومن نطلع بمكان احط شوية مكياج بس احس ماما تتضايق كولش، انوب احط مكياج بالمدرسة، غير تموتني.
-السلام عليكم.
-وعليكم السلام بنيتي يا هلا ويا مرحبا، هاي شنو مغسلة وجهج؟؟؟؟.
-هاااا....اي يمة مغسلته تدرين الجو حار برا.
-اي والله صدوك حارة ولا كانه نحنا بشعر العاشر....اكو نوارة روحي غسلي وبدلي وتعالي سوي السلاطة لان الدولمة صارت ممظللها شي.
-ييي هلا هلا اليوم دولمة....ثواني وتلاكين السلطة كاملة.
-ههههه اي يالله بدلي حتى تسويها.
طلعت فوك وبدلت وكملت وانا شاغلة تفكريري بادم، حسيت كلامي وياه اليوم اكبر غلط غلطه بحياتي، نزلت كرامتي وكرامة اهلي بمكياجي وضحكي، المفروض اكون ثكلية، نزلت كرامة اهلي وبالاخص امي وابوي، حلفت الي سويتة اليوم ميتكرر ابدااااا، مو لاجلي بس ولكن حتى ولا واحد يطلع حجاية مو زينة على تربية امي، وفعلا كدرت انسى تخبصي اليوم ونزلت ساعدت امي بتحضير الغدا ومر اليوم على خير، وحطيت راسي على مخدتي اعلن عن نهاية حربي مع هذا اليوم الي غلطت بي هواي، بس يا ترا هل اكدر اطلع ادم من بالي وانساه؟؟؟، او عل اكدر اجذبه الي؟؟؟ ....وعلى غفلة انقطعت سلسلة افكاري بصوت اسيا:-
-نور.
-نعم.
-نمتي؟؟؟.
-شلون نمت واحجي وياج؟؟؟.
-مو ضروري نمتي ومتردين علية ايجوز غفيتي بس، بعدين لحظة لتنسيني بموضوعي كومي بالله خلي اشوفج.
-شنو هالموضوع المهم الي مراح انام هسة علموده؟؟؟.
-اخو صديقتج الي وصلج اليوم....
-شبي؟.
-انتظري اكمل كلامي ليش معندج صبر؟.
-كملي اسمعج....
-هذا الي وصلج، خوما حجه وياج شي طالع نازل؟.
-اسيا....انتي ليش معندج ثقة بالناس وج حرام عليج الولد حباب ومسمعت صوته كافي عاد بس كاااااافي.
نور:-
اعرف سوالف اختي كلش زين اتظل تستجوبني على كل شغلة واني ماحب هذا الشي، لمن سالتي اذا حجه وياي كلام مو حلو اني كوبل صديتها لان اعرف اذا سكتت راح تعرف انه حجينا سوا....نحنا محجينا شي غلط، وكلامي وياه بهالحرية جان غلط بالنسبة الي بس تعال فهم باقي الناس انه اني غلطانة واعترف بغلطي، راسا تبدي الرزايل والحجي الطالع نازل وياي يعني باختصار الناس بمجتمعنا معدهم شي اسمه غلطان واعترف بغلطي.
نمت مباشرة واحاول انسى شك اختي بكلشي من حولها، واستسلمت للنوم بعد صراع كبير مع كلام اختي الي ظل ابالي، وفعلا اخذت قسط كافي من علاجي الي هو النوم.
الى اللقاء في البارت القادم.
منشن لشخص وكله يتابع روايتي.
تتوقعون انه كلام نور ويا ادم غلط لو صح؟؟؟؟؟.
وشراح يصير بالبارت القادم.