✨حديثتي الشقراء ✨
***
وبيوم بالليل اجاني محمد عصبي واني واكفه اعزل بالمطبخ جان يباوع عليه ومخنزر وراح للغرفه جوه .. عفت الي بيدي ورحت وراه .. لزمت جتفه من وره جان يعيط بيه ..
- ميلييييي منيي
تفاجأت منه هو ابد مايعيط عليه هيج حتى لو يصير عصبي مايعلي صوته كلش .. كلتله ..
- عيوني خير صاير وياك شي
اندار وباوعلي وهو وجه مدخن ولزم زندي وضغط عليه حيل وكالي ..
- كعده وحيدج مامش بعد سمعتتتتتتي
- شنو ياكعده مافتهمت
جان يعيط بيه وهو يضغط حيل بايده وكالي ..
- لاشوفج تعتبين للحوش بعد لاكسسسرها لرجلج
اني بس فاتحه حلكي ومتفاجأه منه شديسوي
يصيح على شي مايسوى وهو اني اصلاً ماطالعه هو جنت اعزل بالمطبخ شوكت شايفني طالعه؟
مالحكت احجي شي وهو دفعني وطلعني بره الغرفه وطبك الباب ....
انداريت وشفت امه واكفه تتسنط من باب المطبخ
ومن شافتني راحت رأساً .. ماهتميت بس بوجع ايدي وضليت افركهه ورجعت للمطبخ خواته يباوعلي ويسألوني شبيج شمسويه واني ماجاوبهن
وبعد ماخلصت تنظيف وهمه راحو نامو رحت للغرفه وطبيت شفته متمدد وحاط ايده على عيونه
من شافني اندار وانطاني ظهره .. عفته ماحجيت شي ورحت طلعت ملابس ورحت للحمام غسلت وبدلت ورجعت للغرفه اخذت فراش ومديته بالكاع
وطفيت الضوا واجيت تمددت هستوني تغطيت وهو اجه حضني وخله راسه بركبتي وكالي..
- شني اليوم نايمه بعيد عني
- عبالي بعدك ضايج مني
- لااا الحبيبه انتي شلون اكدر انه بلياج
- محمد اني ماسويت شي يضوجك ليش هيج صيحت عليه اني ماجنت طالعه والله
- اعرف يارويحتي اعرف
- لعد ليش
- هيج انه اعصابي جانت تعبانه شويه
-هسه يعني ماكو شي
-اي جا شني هاي موش جاي نحجي بهداوه وعين الله علينه
-اي الحمدلله
دارني عليه وهو يضحك وضل يتلمس بوجهي ويبوس وتغير ميه درجه عن وضعه قبل ساعتين
ثاني يوم كالي راح يطلع ويه ولد عمه لسامراء
ياخذون الزرع يبيعوه هناك ..
العصريه ماعندي شي مخلصه شغلي ورحت كلت امر على الحجيه اكعد اسولف وياها ..
رحت وصلت للطرمه وجان اسمع الحجيه تكول
لمرت عمهم الجبير ..
- يمه ماتجيبيلي شويه عنبات اكلهن شو نفسي مشتهيتهن
كبل سمعت صيحتهه وكالت ..
- ايييييي واحنه نلم بيهن ومكسوره ظهورنه حتى نكضيهن بالاكل والمشتهى
هنا اني كلبي صار ناار وكبل رجعت ركض للبيت
وجان عدنه عنب خير من الله مكوم بالسلال اخذت
اربع عناكيد وغسلتهن بمي بارد وخليت رمان هم بسله واخذتهن ورحت للحجيه ..
طبيت واني اضحك وكلتلهه ..
- الله يساعدج حجيه
- هلا يايمه هلا
- شلون جبتلج عنبات باارده تلوك لهالحلك
كلت الحبيبه هسه ضايجه وحدهه اروح نتونس بالسوالف اني وياها وناكل
هي ضحكت وعينه دمعت جان ترفعلي ايدهه واني دنكتلهه وباست خدي وحضنتني وهي تكلي ..
- يمه ريت كلبج بارد وعمرج طويل وهني
يابعد بيتي ياحبيبه الله يرضى عليج يايمه ولايفجع كلبج بمصاب
ضحكت وبست راسهه وايدهه وكلتلهه..
- الحمدلله الي خلاني محظوظه بدعائج
جبت السله وخليتهه كدامنه وكطعت شويه من العنكود وانطيتهه واكلتهن بفرح واني اسولف وياها واكل وبقيتلهه السله جوه جربايتهه وكلتلهه
- حجيه بعد كل يوميه اجيج هيج وكت نكعد هالكعده والله ماتونس الا وياج
- هلا بيج يايمه كلبي وعيني ينطرن جيتج
حضنتهه وجان تكلي ..
- هاج هاذ المفتاح وامشي افتحي الباب الاول من البوفيه
اخذته ورحت كعدت كدام البوفيه وفتحت الباب
وجانت الخانه كلها غراض بس مرتبه جان تكلي
- جيبي هاي الشيشه المذهبه
اخذتهه وقفلته ورجعتلهه المفتاح جان تلزمهه وتكلي ..
- عايني يمه هاي الشيشه بيهه زيت غالي
هاذ زيت الورد موش ياهو الجان هاذ انه جان عندي منه جثير وجنت كل ما امشط شعري وره الحمام ادهن منه على المشط وامشي على طول الشعر هاذ مامش منه هنايه وغالي يايمه لجن شني يغدي شعرج حرير وريحته تفوح وتضلين وحدج تفوحين باطيب الريح مامش مره عدهه منه هاذ من الاولي .. اخذي لج يابعد عيني
حضنتهه وجنت حيل فرحانه بحيث كل شويه الزمه اباوعله وارجع اضحك واحضنهه جان تكلي
تعاي اعلمج شلون تسوين بي شعرج .. ودزتني جبت مشط من بوفيتهه وكعدت خلت بايدهه شويه منه ومشته على سنون المشط واني فتحتلهه شعري
وجان تتلمس طوله وسمت بالرحمن ومشطتلي بهالزيت وصدك ريحته فاحت ..
صرت اشم بي ريح القداح وريحه حلوه ودافيه
شي من ورد الجوري ميزت ريحته بخفه موجود بي والباقي ينطي شي مثل ريحه حلاه ... ومن كملت ضفرتلي شعري وجان شعري طوله بوكتهه يوصل بشبر جوه الخصر وثخين حيل بحيث هي تسمي كل شويه عليه من تلزمه وتكلي لا تفتحي بس جدام رجلج ... واني اضحك ومتونسه وياها
كلش احس بيهه حنيه بيبي واني مايرتاح كلبي بس وياهه ...
من رجعت لبيت عيالي و سويت العشه وحطيت السفره وصحتهم اول ماكعدنا جان عمي يكول
- بويه شني جن خشمي يشم ريح امي هنايه امشو عاينو اخافن جتي وماندري عنها
اني ضحكت ودنكت وكام باسم طلع بره شاف ماكو احد ورجع كعد وكاله ..
- بويه مامش احد بره
- بووويه انه مااخطي بريحهه امش دورهه
ضحكت وكلتله ..
- لا عمي ماله داعي هاي الريحه عندي اني
ذب الخبزه من ايده وباوعلي وصفن ومرته هم صفنت جان تكول عمتي ..
- منيلج هالريحه يامعزايه
- الحجيه انطتني من الزيت ومشطتلي شعري بي
اليوم العصر
جان تلطم على رجلهه وباوعت لبناتهه وهنه كلهن سكتن وعمي دنك وضحك وكالي ..
- والله والنعم اي والله امي عمرها ماتخطي بشي
والنعم والله والنعم
مافهمت شقصدو من هذا كله وليش هيج متفاجئين وليش عمي فرحان وياكل ويرجع يكول والنعم
كلت اسأل محمد وافتهم منه ...
وضلت عمتي الليله كلهه هي كاعده ومكابلتني وحاطه ايدهه على خدهه وتتصفن مره عليه ومره على بناتهه عاد كعدت يمهن وذبيت الشال وفاحت الريحه اكثر وبنين كالت ..
- الله شكد طيبه هالريحه الله
- ههه اي والله كلش طيبه ومريحه للاعصاب
- حطيلي منهه شويه بشعري
- ميخالف باجر من تسبحين وتمشطين احطلج
كيفت هي وراحت اخذت فراشهه وهي تكمز وفرحانه وجان عمتي تكلي ..
- اكلج يا زهره لاتحطيلهه منه ديربالج
— ليش عمه هو شويه احطلهه عندي هواي بالشيشه
- وغمه كون اي والله والصكع ماعليج انه الاكوله سوي واسكتي
- عمه شنو اكو شي ضامي شو مداحسكم مرتاحين
- مامش شي انتي الثانيه لاتجلبين بهالسالفه وهاذ الزيت ضمي لا تنطين منه لاحد تره بس تدري الحجيه مره غيرج حاطه منه تلعب بيج فلك اركدي ولاتضلين تنطين بحاجتج
- ماشي عمه مانطي لاحد صار
ضلت تفرك باديهه وتالي كامت اخذت فراشهه وراحت واني ضليت صافنه شبيهه ليش هيج ؟
حسيت الفجر على صوت محمد وهو يكعدني جانو هستوهم راجعين ... كمت سويتله اكل وجبتله ملابسه وبعدين اخذت الصينيه وعفته ينام
وصبحت على عمي وعمتي وشفتهه تريد تخبز
ردت اوكف اساعدهه بس هي دزتني اخذ سطلتين حليب حاطتهن بره ..وكالتلي الجبيره اروبهه والصغيره اسويهه جبن ...
هي انطتني هالشغله اسويهه باعتبار اني دائماً بالمطبخ وصار هواي وياهن عبالهه تعلمت كلشي بس اني ماعرف وخفت لا اروح اخرب الحليب
خليتهن بالمطبخ ورحت بالختله للحجيه لكيتهه كاعده بالحديقه وتسبح كبل ضحكت وكالت ..
- من الصبح اليوم شعجب
اني ركضت عليهه وكلتلهه ..
- حجيه فدوه الحكيلي
- هااه خيرج
- عمتي تريدني اخثر روبه واسوي جبن منطيتني سطلتين حليب شمعرفني شلون يسووهن الله يخليج علميني كليلي شسوي والله هسه تشرني ع الحبل لو ماسويتهن
جان تضحك وتجر عوجيتهه واني كومتهه وكالتلي امشي اعلمج واخذتهه ورحت للبيت وكل شويه اباوع من الشباك اخاف عمتي تجي وهي تضحك عليه جان تكعد بالكاع وكالت ...
- عايني يايمه تراج ماتعرفين تسوين شي بشلشتج هاذي اركدي وتهدي وصفي نيتج حتى تطلع روبتج طيبه
- ليش حجيه الا اسويهه بهدوء يلا تطلع طيبه
- اييي جااا شني هاي يايمه الحليبه خثرتهه تطلع على صاحبهه لو جلن صاحبهه كلبه ابيض وروحه طيبه تغديلج عسل ولو جان صاحبهه روحه ضغينه وكلبه موش نظيف تطلع حامضه وكشوتها ماتثخن جثير
- يااا يعني هيج حساسه
- ايي جثير لازم نعتني بيهه موش جيب وحط
- زين لعد خلي اشوف شلون راح تاثر روحي على هالروبه ههههههه
- يايمه انتي على فطاريتج تغديهه كيمر
- حجيه هاي راح تصير بيهه ايدج وايدي شلون راااح تطلع اليووم اله اكسر سوك عمتي بالروبه
- هههههه كومي جيبي جدريه الروبه الضاله بالثلاجه
كمت جبتهه وحطيتهه يمهه وجبت سطلت الحليب
الجبيره وهي كلتلي اصلي على النبي وبعدين ادير الحليب بالجداري الاثنين الي مخليتهن الهه ..
ودرت الحليب وبعدين كلتلي افوره شويه وخليته شويه وشلته وحطيت من الروبه العدنه شويه بكل جدريه وغطيتهن وحطيتهن ع الكاونتر ورحت هم اخذت جدريه ودرت بيهه الحليب من السطل الثاني
وخليته ع النار وخليته يفور شويه وذبيت عليه خاشوكه خل ابيض وشويه ملح وضليت احرك بي
وهي شتنبهني اسوي وبعدين كلتلي اجيب قطعه قماش الململ وهي لزمتهه الي ع الجدر واني صبيت بيهه الحليب الفورته الي تحول قطع مجبن
وضليت اعصر بي وضغطته لحد مانزل كل ميه
وبعدين ردت اشيله افتحه جان تكلي ..
- جيبي صينيه صغيره
رحت جبتهه وخليتهه اول مالزمته جان تكلي
- هسه شتعلمتي شتكلين كبل ماتبدين وتنهين
- بسم الله الرحمن الرحيم اللهم صل على محمد وال محمد
- عليه الصلاه والسلام ..يلا اكلبي بالصينيه
وكلبته وطلع قطعه دائريه كامله وطريه وبيضه تلمع شلتهه واني اضحك وفرحانه بانجازي
ورجعت للحجيه تشكرتهه وبوستهه وضليت كاعده يمها جان تكلي ..
- روبتج من تصير جيبي اضوكهه واشوفن شلون
روحج حامضه حلوه
ضحكت واخذتهه وصلتهه لبيتهه ورجعت لكيت عمتي بالمطبخ وكبل عاطت بيه ..
- وين موليه وعايفه البيت ومامحضره الريوك
- رحت شفت الحجيه وصبحت عليهه
- ايي والله عاااد انتي ذابين صرتج يمهه امشي حطي الريوك يلاا تحركي
رحت حطيتلهم من الجبن الي سويته وجاي وبيض وباوعت للساعه صارت ب ٦ ونص اول مره يبدا يومي هيج من وكت بالعاده اني بالسبعه يلا اسوي ريوك الي وللولد لان عمي وعمتي ياكلون من وكت وهمه اصلاً يكعدون من الاربعه الفجر
حطيت الصينيه لعمي وعمتي ورحت للمطبخ صفطت الخبز الجابته عمتي وكعدت احضر ريوك للولد لان كعدو واول من يصبح عليه دائماً هو مازن واعرفه يحب البيض ويه البتيته ومكثر دهن
فاسويله طاوه خاصه بس اله وباسم وحازم يحبون بيض عين اسويلهم واني اكل الجبن ...
كعدت اريد اكل وكلت ..
- اني شكد غبيه غير احط ريوك للحجيه
عمت عيني عليها ضلت بلا اكل
كمت اخذت نص من الجبن وكرصه خبز وشيفتلهه طماطه وصبيت جاي وجان مازن يكلي ..
- شني هاي المن موديه
- دا اخذ للحجيه خطيه تحبه
- صايرات دهن ودبس انتن
- هههه يامحلى عشرتهه
طلعت من الباب الي تودي كبل على حديقتهم حتى ماتشوفني عمتي ورحت لكيتهه تتعارك ويه الحجي
ع الزرعات واني كلتلهه ..
- حجيه تعاي اشحني قوتج وكملي عرك تعاي ضوكي الجبن ما هلي اكل منه قبلج
- هلاا بهالنووور هلا بهالزهوور تعاي يمه انه صفيت بس وياج زين نتجابل كلها تغيرت نفوسها
جان الحجي يشمر من ايده الصونده وكال ..
- جاا والزين ذاك كله شني نسيتي
- الزين لو انه زين جان دام لهساع موش يتغير
اني اضحك وهمه واحد يبسمر بالثاني عاد اخذت الحجيه وكعدنه كلتلها..
- مااصيح الحجي هم يتريك
- لاتخافين ماكِل من زماان
- لعد انتي ليش ماكلتي وياه
- انه نفسي ضايكه من هالبيت ومحد صاير يشوفن امري ويهتم ليه غيرج
- لااا حجيه انتي الخير والبركه وكلهم يحبوج
بس الشغل ملهيهم عنج وخطيه الحجي تزعلينه
- هاذ رويحتي انه وياه مانتخارب ونتزاعل لجن هَيج نتناغش بهالصباح
- هههههههههه حركتي كلبه حجيه هي مال نقاش
ضحكت ودنكت تاكل واني اكلت وياهه وجان تكلي ..
- خوش جبنه هاي بعد صرتي ام صنعه
- هههه بفضل الله وفضلج حجيه
- عايني شلون جبنه حلوه وطيبه عبن رويحتج طيبه هيج بياض يعكس على بياض
- الحمدلله استفاديت من روحي الطيبه هههههه
-رجلج ما رد
- لا حجيه رجع من ٣ الفجر هو كعدني سويتله اكل ونام
- هاا خطيه خلي عوينتج علي الزلمه يحب ايتدلل
- مدللته حجيه لتخافين شايلته بعيوني
- اي عفيه هيج اكسبي رجلج يصيرلج عون وكت الناس تنكلب عليج فرعون
ضليت اسمع بنصايحهه وناكل سوه وبعدين اخذت الصينيه ورجعت لكيت عمتي متخوصره ومنتظرتني اول ماحطيت الصينيه كالت ..
- انتي وين كل ساع ونازه ماتجابلين البيت وتركدين اضل انه ادور وراج والله هالنوب لو شفتج طالعه اكسر ركبج واكعدج
سكتت مارديت شي جان تعيط بيه ..
- امشي شيلي الحشيش ويه البنيات بالعجل
يلا امشي جدامي
طلعت كدامهه ورحت للبستان وشفتهن يشيلن ويحطن بالعربانه وحازم كاعد ليكدام ولازم اللجام مال الحمار وباسم يمدله الحشيش يوكله ...
صرت اشيل وياهن هالاكدر عليه وهي كلساع وصايحه على وحده بينه برغم احنه مامسوين شي غلط بس هي متنرفزه ومطايقه حتى روحها
رجعت للبيت محتره رغم الجو بارد ثلج بس من الحركه احتريت ورحت غسلت وجنت انفض ملابسي جان اسمعهه تصيح من المطبخ
- يالفااااهيه لساعج ما مزهبه الغدا وين وليتتتتي
اجيتهه ركض وكلتلهه ..
- عمه هستوني رجعت شوكت يعني اسوي
- صمي حلكج عااد وشغلي ايدج تحركي حطي جدرج عاد مو كتلنه الجوع
رحت طلعت الجداري وهي راحت طلعت واني وكفت صافنه ..شسوي غدا ؟
باوعت على جداري الروبه وكلت خلي اسوي تمن كشري مدام عدنه روبه حتى كلهم يضوكوهه ..
وكعدت ركبته وكثرتله دهن وصار تمن منفش يخبل وسويت زلاطه وعصرت عليها الرارنج
وشفت محمد كعد رحت يمه وهو سألني على اهله وين وحجيتله كل واحد وينه وضل كاعد صافن
بعدين كالي حطي الغدا ..
اني جنت مكمله كلشي رأساً صبيت وطلعت صحتهم وبين مالتمو على السفره اني عزلت المطبخ حتى لا عمتي تلكالي شغله وترزلني عليهه النوب ..وضل بالي بس على الروبه شلون طعمها
هو اني من صبيتها شفت كشوتها صفره وثخينه
بس عاد طعمها طيب من خبصتي حتى مالحكت اضوك ...
واول من مدح بيهه جان محمد كال ..
- عاشت ايدج يمه خوش خاثر
اني دنكت وابتسمت ورجع عمي هم أكد عليهه..
- اييي والله حلوه ودسمه جنه مزاجج اليوم كافوري ياام محمد
كلهه ضحكت الا هي مدلغمه وتباوعلي عاد كالت
- لا عيني لا كافوري ولا مدري شني هاي صنيعه جنتك موش انه واشوفنهه اعجبتك ازيد من كل يوم
- هااااه جنتنه اليوم خثرت ؟
كلهم يباوعولي واني حجيت بصوت ناصي
- اي عمو
ومازن كال ..
- الجبن هم انتي سويتي
- اي هو اثنينهن
جان محمد كال ..
- والله خوش هم طلعتي خبره خوش صنيعه عشتي
- تدللون
جان عمتي تكول ..
- مدامهه هيج عجبتكم انه بعد ماطخن شي خلهه هي تفيدكم وتخثرلكم واشبعو
محمد كاللهه ...
- لا يمه شني انتي ام الخير لو موش من ايدج
مايصيرن ليهه طعم
- اسكت اسكت لا تغشمر وياي انه سنين اسويهن ليكم ماتعجبتم بيهه مثل هالساع
- يمه هو انه غير عبالي انتي وحجيت اتشكرج عليهه لو داري موش انتي شعندي حاجي
وضلو محمد وعمي يجيبوهه منا ويودوهه منا حتى ترضى بس اني جنت مرتاحه اهم شي عندي
عكست نفس طيبه على الاكل الي اسوي ونجحت هالمره ..
وللعصر خليت عمتي تنام واخذت كاسه روبه وديتهه للحجيه ورحت ركض وبالختله واول ماعتبت طرمتهم جان يجيني صوت علي ..
- انتتتي هيييييي اكفففففي مجانج
وكفت واني اخذ نفس جفلني بصوته وانداريت شفته بعده بالزي العسكري جان طالع هيبه بي
ونجمته تلهث وحتى البسطال يلهث اجه يتمشى
ناحيتي وحاط ايده وره ظهره ونافخ صدره جان يكلي ...
- شعندج تحومين على بيتي ياوجه النحس
ماشفتج بيوم اذا ماتشائمت شجابج هنا
- مجايه حتى اخرب يومك اجيت على الحجيه
- امشششي يلااااا ودي البيدج وردي لبيتج ماريدن شوفته وجهج جدامي يلااا
- مدامك اجيت هالبيت بعد ماعتبه صار يخنك
ركضت جوه للحجيه نطيته الكاسه وكلتلهه اجه علي وهي فهمت واني طلعت بسرعه رجعت للبيت وردت اروح اسبح والحك اناملي شويه
حيل تعبانه وجان يجونه خطار بيت خالهم
وهم ضليت اقدم واحضر للعشه وضليت على وكفه الوحده لحد الساعه عشره بالليل راحو الخطار ونامو يلا رحت سبحت وكبل تمددت وغفيت ولا حتى حسيت على محمد شوكت رجع
ومن كعدت الصبح جان كالب وجهه عليه لان نايمه وعايفته حاجيته ردت منه بس هو مطنكر
عافني وطلع ...
ماهتميت لان ورايه يوم متعب لازم اشد حيلي اله
وهم نفس الروتين شغل وركضه من السته الصبح
مابين طبخ وتنظيف وخطار وهسه مواسم حصد وزراعه وعمتي كل شويه طالعتلي بشغله ماافهمهه وتريدني اسويهه واني لا اكدر اروح للحجيه لان
هالخبل هناك ولا اعرف اسوي فاضل اسأل بمازن
خطيه يساعدني بالختله .....
وخلص الاسبوع ومحمد مايرضى نرجع لبيتنه واني هلكت من الركضه طول اليوم حتى اكل مارتاح بي اذا اكعد شويه ودزوني جيبي فلان شغله لو يجي خطار ولازم اكوم اضيفه وبين ماارجع همه مكملين استحي اكعد اكل واكوم الم بالمواعين واني اكلي يلا خاشوكتين ...
بيوم بالليل عمي كال عنده اثنين من كرايبه مرضى ويريد يروح يزورهم وكال منو اليجي وياي لديرتهم ؟؟
بنين وحازم رادو يروحون جان كالي انتي هم امشي ويانه اشوفج ديرتهم ماتعرفينهه ..
كلت لمحمد كالي مدام وياج ابوي روحي
وثاني يوم طلعنه اني وعمي وحازم وبنين ومازن
همه عدهم سياره بيكم بيهه بس سره واحد للكعده
مازن يسوق وبصفه عمي واني من يم الباب وحازم وبنين وره كاعدين ومتلفلين ويضرب بيهم الهوا ....
جان المكان على طريق واسط من بعيد عبالك صحراء وبس دخانه مبينه عاليه ... من وصلناهم
عدهم مضيف جبير بس كعدنا بي شويه واجني النسوان اخذني يمهن تغدينا وطلعت داغسل بره
حاطين تانكي وبي بوري افتحه واغسل .. وباوعت
دخانه عاليه وريحه تخنك سألت وحده من جناينهم
كلتلهه ..
- هاي الدخان مال شنو
- هاي الخشبات جاي يحتركن غادي
-ليش شتسون بيهن
- غير نسوي الفحمات امشي اراويهن لج
واخذتني مسافه عن البيت واشوف بالكاع حاطين
قطع حديد خفيفه وسوده وفوكاها سعف ومريه جبيره متلثمه ولابسه جزمه وبيدهه وصله شالت بيهه الحديد واشوف حفره شكبرها وبنصها نار
خفت ورجعت ليوره واشوف المريه لازمه حديده طويله وتهيج بالخشب الي بالحفره ورجعت سدتهه وغطتهه وراحت لغير حفره هم نفس الشي
اجتي يمي جنتهم وكالتلي ..
- هاي الخشبات يمتى مايحتركن نجيب الماي ونطفيهن ونبردهن وثاني يوم ننزل للحفره انزل هالجويهل هذول يلكطون الفحم من الكاع
- وهاي منين تجيبون هالخشب
- من ذاك الصوب عدهم بساتين احنه نشتري الخشبات منهم زلمنه يجيبوه
- وانتن تشتغلن بهالخنكه والنار وهمه بس يجيبون
- ايي جا موش هالخشب موش ياهو الجان اله نوعه وهمه يعرفونه واحنه وكت النشد الكواني ونخيطهن ياخذوهن عاد يبيعوهن للوادم
- بس هالشي مو صعب عليجن يعني المفروض همه يوكفون هاي وكفتجن خطيه هالمره الجبيره بنص هالدخان مو تختنك وهي بهالعمر وعدكم ولد خير من الله ليش ميشيلونهه عنكم
- لاا ياخيه هنايه كلمن زلمه ويه زلمتهه مامش هاذ اكدر عليه وهاذ لا كلشي نتحمل احنه موش حضريات
- داده هي شنو حضريات كل شغله وتكلولي حضريه هي شغله حقوق وقابليه بما ان الرجال قوته اكثر خلي هو يحرك ويكسر ليش انتن هيج ماذيات نفسجن
- هاي احنه وعينه لكينه هاذ دربنا مشينه بي بعد
عفت الحجي وياها مايفيد حالهه حال الالاف الي خاضعات ويعتبرن تعبهن وتضحيتهن بانوثتهن
هو الي يخلي الحياه تمشي لعوائلهن وراحه رجولتهن وبالتالي هو كل واحد منهم متزوج اثنين و٣ وكاعد يكش بذبان وجهه وهنه مطمسات روحهن بالصخام والتراب ويركضن من مكان لمكان ....
عفتهن ورجعت للبيت ماتحملت اضل اباوعلهن هيج افور باعصابي اريد احجي اوعي عقولهن
افهمهن بس من المستحيل الالف انهن يشوفن شي من حجيي غير اني حضريه واتمضيك عليهن
رجعنه للبيت المغربيه وحجيت ويه محمد على الي شفته وكالي كلمن اله عالمه لا تحاولين تجيبين هاذ على هاذ ...
ثاني يوم التحق محمد وضليت ويه عمتي تصيح عليه ليل نهار كبل تعيط بيه اذا شافتني رحت للغرفه جوه او كعدت بحديقه او ردت امر على الحجيه واني مرات اردهه بالحجي ونتناكر ومرات اسكت ...
ورجع الدوام خابرت محمد حتى اشوف شوكت يرجع وياخذني لاهلي ... جان يكلي ..
- ياروحه هاي انتي متفكرين بيه ارد تعبان اريد الي يداريني لو تعوفيني وتمشين لاهلج
- لعد شلون محمد الدوام بدا صارله يومين وانته رجعتك بعد اقل شي اسبوعين يعني يروح عليه شهر كامل والله ارسب
- جا شلون تمشين وانه موجود
- زين خلي مازن ياخذني باجر ومن ترجع ارجع وياك عفيه والله ارسب محمد الله يخليك بس هالشهرين واتخرج
- يلا عود انه اخابره خلي امشي هسه بعدين نحجي
سد التلفون وراح واني ضليت روحي مفرفحه على الدوام ورجعت لبيت عيالي وحاجيت عمي
ومن سمعت عمتي تخبلت وحتى ماخلت مازن يحجي ويه محمد خاف يقنعه .. وتروح وتجي وتكلي بطلي واكعدي شستفادينه من دراستج بس زياده صرف ...
اني ماتحملت رحت للحجيه ابجي واشكيلهه
جان تكوم وتصيح على ابو علي ابنها الجبير
وكلتله ياخذنه لبيتي ...
واخذنه وهناك كلتلي
- هسه ادكين على ابوج وتحجيله هالصاير وياج كله وكليله يجي ياخذج بين مايرجع رجلج
- لا حجيه مايصير اطلع مشاكل بيتي لاهلي عيب
واخاف ابويه يزعل مني
- دكيييي هالتلفون لا تجادلين والله ان مادكيتي لاكسر عليج العصا
ضلت تضربني بظهري بيهه بخفه وتكلي دكي
واني جنت متردده بس كلت خلي هالمره يفيدوني بشي اهلي .. ودكيت ..
طلعت امي سلمت عليهه وكلتلهه اريد ابويه
انتظرت لما اجاني صوته ..
- الووو
- شلونك بابه
- هلااا ببنيتي هلا والله شلونج باباتي زينه
- اي زينه
جان الحجيه ادغني بعوجيتهه وتكلي احجي
كلتله ..
- بابه عمتي ماتقبل اداوم بعد وتريد تبطلني
- شنوووو شوكت هالحجي
- صارلها كم يوم
- ومحمد
- محمد بعده ملتحق وخابرته كلتله خلي ياخذوني لبيت اهلي اداوم بين ماترجع مايقبل ولا يقبل من يجي ياخذني ويريدون هالشهر يروح عليه بالدوام
- لاااا لاااا بابه شلوون هيج مايصير هاي اخر سنه ماضل كم شهر وتتخرجين شنو هالحجي
- بابه دتعال اخذني انته والله ميخلوني اجي الله يخليك تعال اخذني خلي اداوم
- استغفر الله استغفر الله يلا اني باجر جايج لا تخافين
- انتظرك بابه عليه مو تكللهم خابرتك اخاف تصير مشاكل
- لا لا اني اتصرف معليج انتي هسه روحي ارتاحي وحضري روحج واني باجر بأذن الله جايج
- شكراً بابه الله يخليك النه
- الله يخليج بنيتي يلا في امان الله
سديته وكلتلهه للحجيه وهي فرحت خطيه وكلتلي
- هيج صيري لا تسكتين وكت االلازم تحجين
عندج ابوج يسند ظهرج دكي هالتيلفون عليه
ولا تضيعين تعب عمرج يايمه
- والله حجيه انتي الله خلاج رحمه بطريقي شكد مااشكر قليل
- الحمدلله يلا امشي لمي غراضج وخليهن هنايه ونرد للبيت مانحجي شي وباجر انتي وابوج ارجعي اخذيهن وامشي لاهلج وداومي
كمت بست ايدهه وراسهه وركضت للكنتور طلعت ملابسي مال الدوام شكد مشتاقه البسهن اختنكت من الدشاديش واللثام .. حضرتهن بالجنطه وخليت مكياجي وعطوري وكتبي ورجعنه لبيت عيالي
وهناك بالليل الحجيه دزت عليه وانطتني علبه بيهه مسك وحبه حلوه مطحون وانطتني جيس اسود ومطرز بذهبي واحمر وبي خيط ينخرط وينسد
وكالت هذني وصليهن سلام لبيبيتج ...
اخذتهن ورحت نمت مرتاحه وكعدت بنشاط اريد بس يمشي الوكت وارجع لبغداد وارجع لحياتي
تعبت هنا مو طبعي وتعلمي عليه صعب ويتعب لا يوم ولا يومين بهالحال ...
وقبل الغدا سمعت صوت عمي يرحب ويسلم عرفت ابويه اجه ركضت طلعت من باب المطبخ واشوفه جاي ومحمل علاليك تلكوهن منه الولد
ومن شافني كبل ضحك واشرلي واني اجيته ركض عيوني مدمعه ورحت حضنته هواي جنت مشتاقتله وحسيت نفسي كاعده بغربه من شفته تذكرت عائلتي وراحتي هناك كبل بجيت ماتحملت بعد
رفع راسي ومسح دموعي ويكلي ..
- شدعوه باباتي شدعوه هالبجي
- بابه اشتاقيتلكم والله
- ههههه واحنه كلنه مشتاقيلج
طبينه جوه ورحت جبتله مي وبعدين رحت صبيت الغدا واجوي باسم وحازم اخذو ليمه بالاستقبال
واني اعرف ابويه يحب الخاثر خليتله كاسه ام الكشوه كدامه وهو عاف اللحم والاكل كله وضل ياكل منهه ومن عرف اني الاسويهه كلش فرح
ومدح بيهه .. وره الغدا اخذته للحجي والحجي سلم عليهم والحجيه تباوعلي وتضحك واني اضحك
وكعدو يشربون جاي وعمي موجود هم جان ابويه يكول ...
- محمد شوكت ينزل
عمي كاله ..
- العلم عند الله مانعرف يجوز يطول
- لعد شلون دوام الكليات بدا صار اسبوع لعد بنتي شوكت تداوم اذا محمد يطول
- هاا والله مانعرف يجي زلمتهه وهي وياه يتفاهمون
- لاا لااا شنو تضل غايبه لحد مايرجع مارجع بعد شهر شلون بنتي تروح عليهه السنه وترسب !
- جا شلون تمشي غير يرد زلمتهه
- اني اخذهه وياي وتداوم وشوكت مايرجع يجي ياخذهه
- لاااا ياابن عمتي شني تاخذهه وزلمتهه موش داري
- لااا انطي خبر شلون لعد وبعدين هي طالعه ويه ابوهه مو غريب واني ولي امرها قبله فماكو داعي بعد احد يعترض
كلهم سكتو والحجيه كالت ..
- اي هاذ حك والله ..ابوهه انته الامر والناهي
اخذهه يمه اخذهه
ضحك وتشكر منهه وكالي اروح احضر نفسي
واني ركضت كبل لميت ملابسي ولبست عبايتي بسرعه وطلعت جان عمتي تكلي ..
- وين متكبعه وماشيه وييين
- اروح ويه ابويه
- شننننني يمه عيدي ماسمعت وين تمشين ويه ابوج
- شنو وين لبيت اهلي غير عندي دوام وبابه كالي اخذج تداومين منا لما يرجع محمد ويرجعني
- امشششي رددي لدارج امششي مامش مره تطلع بلايه شور زلمتهه من يرد ذاك الوكت تكبعي واطلعي
جان يصيح عليهه عمي وكللهه ..
-خليهه ماعليج بيهه ..امشي بويه ابوج ينطرج بره
ابتسمت وطلعت لابويه وهو سلم عليهم وطلعنه
وصلنه مازن لبيتي وذبيت هالعلاكه واخذت الي جنت محضرتهه ورجع وصلنه لمكان السيارات
واخذنه سياره ورجعنه لبغداد ...
رجعت روحي طايره من الفرح رجعت لدوامي
واهلي ومنطقتي .. دربونتنه والشناشيل وصوت
اذان الجامع وكلمه الاغاتي الي مرحب بيهه من بعيد وضحكه نسوان البغداديه وحجايه .. انزول عليج ياداده ... الي اسمعهه بين كل بابين مفتوحه وواكفات النسوان يتحاجن كبالهه ..
وصوت الاغاني والمقامات الي يدندن بيهه كل ابو دكان وكل راديو معلك بباب كهوه لو باب المزينجي ..
هنا ماكو لا صوت ابقار ولا صوت طليان ولا صياح عمتي وراي ليل نهار ولا حشيش يبهذل ملابسي ولا حطب يصخم ايديه ويخرب ريحتي
رجعت لراحتي واماني وبيتي الاولي ..
رجعت ابدا صباحي بريحه الكهوه المهيله وقطع الكليجه المحلايه بالتمر والحلقوم وادندن ويه صوت فيروز من الراديو الي بالطرمه ويه ابويه
وابتسم لوجهه الحلو صاحب المعاني الثابته والشارب الخفيف المرتب .. من نعومه ضحكته ويه نعومه هالروب والبجامه الستن الي يتمشى بيهن الصبح اخذ نعومه وسلاسه يومي ..
واروح اتكشخ بفساتي النيلي الكصير وقبوطي الثخين الابيض وحذائي النيلي ابو كعب ٥ وارفع شعري بشكل مرتب وملموم وتبقى الكذله مكلوبه على اليسره ومنفشه والكحل ممدود فوك العين
و اورد الشفه بلون خمري واتعطر برشتين على الركبه وشويه بالمعصم واختمهه بجنطتني الورديه باليمنى وكتبي باليسره وابدأ طريقي المحبوب
بسلامي للجاره العزيزه وضحكتي ويه ابو الدكان الي حافظني من صغري اتردد عليه واتمشى بثقه وتفاؤل ليوم جديد بي ذاتي مثل مااني جنت واحب
مو مثل ما صرت ويحبون ......
.
.
يتبع 💓
بارت بمناسبه رجوع النت 😁
وارجع اسألكم ..
- علي شتتوقعون منه ؟؟
اريد اشوف منو راح تحزر وجوده شراح يسوي ؟لان راح ينزل البارت الي يكشف هوااي
امور فاكتبو توقعكم هنا قبل مانكشف كلشي 😄
- ومنو فهمت لو عرفت زيت الورد شيعني ؟
🤓🤓
احبكم