حديثتي الشقراء

Part_15_

✨حديثتي الشقراء ✨
***

كلشي مشى بشكل طبيعي لحد ما بالليل كعدت بغرفتي صافنه على الروج وين دياخذني ؟؟
كمت رحت فتحت الكنتور وطلعت الثوب الاسود الي لبسته وحبه ايوب ..
لزمته وضليت اباوعله وبجيت فرغت كل دمعي بي كل حسرتي وشهكاتي ونفسي الحار كله خليت اثره عليه وبعد التعب اخذته وحطيت بي رساله
ولفيته بعلاكه وخليته يم راسي ونمت ..

وثاني يوم اخذته وياي للدوام وهناك تلكتني روعه
من باب القسم وعيونهه تتفحص وجهي وايدهه تتلمس جتفي واصابعي .. رادت تشوف وجعي وانكساري بس مالكت غير الصمود والاناقه بكل حذافيرها والابتسامه الي متعوده اطل بيهه عليهم بكل صباح ....
جانت عيني بعينها افهم منها شتريد تعرف عني وتشوف مني جمال هالقناع وصلادته ..

تمشينا للحديقه وانطيتها العلاكه وكلتلها ..
- روعه يوم الي يتواصل وياج كليله يجي ياخذ منج هاي الامانه
- شنو بيهه هاي
- تذكار بسيط
- حبيبتي كافي ارجوج كافي ابجي عيطي احجي اي شي بس لاتضلين هيج كاتمه بصدرج وتعذبين بنفسج
- وشيفيد حيغير شي ! خليني هيج اكدر امشي بس اذا بجيت بعد ماكدر اوكف حتى على رجليه
- الله يكون بعونج اني اكول بلكت يطلع محمد رجال زين ويعوضج وان شاء الله تعيشين وياه براحه
- ان شاء الله

بقينه ساكتات وبعدين رحنه ناخذ محاضراتنا
كملتهن ورحت اخذت اجازه وبلغتهم بزواجي هالاسبوع وعزمت البنات وهنه اعتذرن مايكدرن يجن وباركلي وبعدين سلمت عليهم وطلعت  للبيت .. هالمره ضليت اتمشى
ماركبت سياره مثل كل مره من يم الجامعه لا ضليت امشي واحاول اجرد نفسي من الخوف والتوتر  ،، احاول ازرع بيهه الامان والرضا بالنصيب واعلمهه على نمط حياه جديد وارسخ بيهه قوانين الزوجيه الواجبه عليه وبنفس الوكت
اتأمل هالجو والوجوه البشوشه بكل ركن واسمع
رد السلام من بعيد بعلو صوت ورحابه نفس ويجذبني من بعيد صوت الراديو باغاني فيروز وبغير شارع اسمع من بدايته المواويل والمقامات من الكهاوي واركز على شكل الاستكان وهو بيد الحجي الي جذبني اله صوت طكته وهو يخوطه وريحه الهيل الفواحه من الباب وصوت طكه الزار ويتبعه تعالي صوتهم عليه وبعد مااتعداهم واني ابتسم للطافه منظرهم يقابلني رجال جبير منتجي على الحايط بسد دكان ومنعزل عن اقرانه بقرائته لكتيب صغير ومركز بي لصغر الكلمات ويذكرني هنا بكم الوقت الي اني التهيت بي عن القراءه ؟
وبعد ماياخذني صوت العصافير وهي فوك شجره السدر يصير كدامي صباغ الاحذيه وهو يشتغل يضحك للولد الي كاعد يصبغله حذاءه والثاني هم يقابله بضحكه مو اقل من ضحكته وبعد ماياخذ الفلوس منه يتبادلون  الشكر والسلام ويصير الصباغ يبوس ويحمد الله على هالكم فلس الي بايده
وهنا يخطر بالي ان هالشارع متفاوت الارزاق والطبقات بس متشابه الضحكه والبهجه والكل تردد .. يافتاح  يارزاق يا الله  .. والكل دترتزق
بس بتفاوت ..كلمن حد كفايته .. وهنا اني وكفت وكلت .. هالنصيب هو رزقي واكيد ربي يرزقني مايكفيني ...
وكلت امري لله وذبيت همي وره ظهري ورحت صعدت المصلحه وتوجهت للبيت ...

بهالليله امي جابت الغراض وفردشتهن وجابت كراتين وضلينه نعبي بيهن وهنا كمت اركز شعندي من جهاز وشفت خير من الله موجود
نص بيبي دازتهن ونص امي مشتريتهن وتجيب وتحط وتكول هاي من فلوسنه مو فلوس رجلج هذا من خير امج وابوج ..
كملنه ترتيب غراض البيت والفراش واخذتني امي لغرفتهه وطلعتلي بقجه كلها ملابس وكلتلي ..
هاي اني كل هالايام اجيب واكوملج هنا كون يغزر بعينج .. تشكرتهه بهدوء وكعدت اشوفهن ..
الي منهن دشاديش مطرزه ثكيله والي خفيفه مال بيت عاديه وبيهن الكصار والطوال وبقجه ثانيه بيهه ملابس نوم كم قطعه وطلعتلي كوستمين معلكات بكنتورهه جانن هذني مال طلعه وكلتلي
عندج احذيه كلهه جدد وجنط هم نظفيهن وجيبي نحطهن   ويه هذني ..

جانت جايبه جنطتين كبار وكامت تشيلهن من البقج وتصفطهن هناك هي واختي .. رحت اني لميت شعندي غرض بالكنتور من ملابس ومن كلايد وشغلات الشعر وخليتلي كم قطعه البس بيهن هالكم يوم .. وكعدت انظف الاحذيه ولميتهن ويه الجنط ونطيتهن الهه ... ورحت لميت كتبي الاحبهن ودفتر مذكراتي وبقيت بس كتب الدوام ..
وامي اتفقت ويه عمتي وبناتهه حتى يروحن يودن الجهاز على باجر ..
وثاني يوم الخميس اني طلعت لدوامي وعفتهم ينتظرون عمتي تجي ويطلعون ... ومن رجعت لكيتهم رايحين ولكيت بيبي وبنات عمامي موجودات ... تغدينا وجان بيبي تكلي ..

باجر من الصبح نطلع لسوك الكاظميه ونجيب البدلات ... وضلت العصريه كلهه تصفك وتهوس والبنيات يكمزن وياهه .. وللمغرب رجعو جايبهم محمد وكف سلم عليه وكالي ..
الاحد نعقد محكمه والاثنين والثلاثاء العرس
هزيت براسي بالموافقه وهو ترخص وطلع حتى يلحك يرجع لبيته ...

وفرشت ونمت بسد بيبي هالليله وثاني يوم من الغبشه كعدتني كمنا سوينه الريوك وتريكنا ولبسنا وطلعنه اني وياها وامي ورحنه لسوك الكاظميه
ندور على بدلات .. وضلينه نفتر واني خليتهه على ذوق بيبي شتكلي اكللهه بكيفج وهي صارت تعامل وتختار والي ميعجبهه تكلي امشي غير محل
وتالي اختارتلي وحده وردي للحنه ومال العرس اشتريناهه جانت مثل الستن وردانهه منفوشه بشكل ورده من فوك ونفشتهه من جوه زينه وسط وبيهه شغل بسيط بالصدر وخلالي وياهه جفوف محبيت البسهن بس امي ضلت تلح وتكلي هي حلاتهه بهالجفوف المطرزه واخذتهن جانن مشبكات بس تول ومطرز .. واشترينه حذاء العرس هم ابيض كعب عالي لان محمد طويل واني هالكدتوتني
وتسوكنه ورجعنه ... ولليل اجتي جيرانه حفتلي وجهي وجانت هاي اول مره احف بيهه ..

الشعر بوجهي خفيف ميبين يعني ماعليه شي بالدوام وعايفته بس شو من حفيت تغير شكلي
صوت اشوف حلكي ورد اكثر وعيوني برزت بهالحواجب ام الكسره وصار احمر .. جان تحطلي عليه مي ورد ونشا شويه وغسلته واجتي امي كلتلهه ..
عيني داده خليج على كعدتج وياهه ونظفي جسمهه

اني هنا ماقبلت وراساً كمزت .. ماحب احد يشوف جسمي وعاندت وعاندت ومخليتهه تسويلي شيره
وراحت المره وامي استلمتني رزايل وبيبي تدافعلي وتسكت بيهه وتردلهه الكلمه بعشره وجان تكلي بيبي ..
انتي منو تريدين وياج بهالشي ؟
صفنت وماحسيت احد قريب مني لهالدرجه من العائله واختاره وياي ... ضلت تلح عليه بالسؤال وتالي كلتلهه ..
اريد جيرانه بنتهم صديقتي واني ماينه عليهه
كلتلي ..
روحي عليهه وجيبيهه واكعدي بغرفتج وسدي بابج وضلي براحتج وياها احنه مالنه دخل بيج بعد براحتج انتي شيعجبج سوي ..

حضنتهه لان كلش ريحتني بهالكلام ارتاحيت من مالكيت جبر بهالموضوع هم ..

ورحت لبيت جيرانه هاي صديقتي بعمري هي واني دائماً اتردد على بيتهم وهي تجي لبيتنه ونايمين وماكلين سوه ومايمر يوم اذا مااشوفهه وتشوفني اسمهه سهاد ..

طبيت سلمت على اهلهه واخذتهه حجيت وياهه على جهه وهي كيفت وراساً خلت عباتهه على راسهه وكالت لامهه رايحه لبيت الحبيبه وامهه اشرتلهه روحي بدون ماتعرف شكو وراساً اجينه للبيت وصعدنا فوك ...

سولفنه شويه وحجيتلهه على الجهاز وشوفتهه البدله وبعدين نزلنه للمطبخ سوينه الشيره وصعدنا
قفلت الباب وهي بحجاياتهه وشقاهه شالت المستحى وخلتني انزع كدامهه وكعدت تسويلي رجليه كلهه وبعدين ارتاحينه شويه ورجعت تكملي الباقي وتضحك وتسألني على محمد شنو اطباعه شلون علاقتنه واحجيلهه الزين منهه ...

ماخلصنه للنص واجه عليهه اخوهه وكالتلي باجر نكمل هم بالليل وراحت .. نزلت سبحت وكعدت ويه اهلي وبيبي تكلي
الحكي نامي كبل مايضيع عينج السهر ..
واني هم جنت منعسه ونمت من التسعه وكعدت هم من الغبشه على صوت بيبي ..هم تريكت ورحت بدلت وحظرت نفسي وبالسبعه وشويه دكو الباب اهل محمد .. نزلت سلمت عليهم وجان موجود ابوه وعمه وهو من سألت على امه شعجب مجايه
بيبي كلتلي ...
ماعدهم نسوان اطب محاكم واماكن بيهه زلم 
كلت بنفسي الله اليستر من عقلهم ويه عقلي شلون راح نتصافى ...

ومشينا للمحكمه وياي ابويه وبيبي وهناك بكلمه نعم موافقه صرت زوجه محمد شرعاً وقانوناً وتغيرت جنسيتي لمتزوجه بلمح البصر ......

ورجعو تغدو يمنه وراحو ... وجان بيبي تكلي
كومي دزي على صاحبتج تجي تكملج ورانه طلعه
كلتلهه وين؟  تكلي .. مالج لازم وين امشي كملي

ودزيت اخويه عليهه واجتني تركض وتهلهل من الباب وركضت حضنتني وتبوسني وتبارك وطايره من الفرح .. ورحنه صعدنا نكمل هالشيره
ومانزلنه للعصر .. ردت اطب اسبح جان تكلي بيبي ...
بس خضي جسمج بالمي من الدبك واطلعي
وسويت مثل مكالت وطلعت جان تكلي
يلا بدلي خلي نروح  لحمام النسوان بشارع السباع  هناك يلجفنج عدل يشفن كلبي بجلفهن ...

ضليت اكللهه ماحب هالنسوان وماريد اروح وهي واكفه ولابسه عباتهه وتكولي ..
اذا ماتمشين هسه اعوفج واروح لبيتي
عاد صعدت  اخذت ملابس اليه وجبت صابونه وليفه ومحجاره ولفيتهن  بالبقجه ورحنه واجني ويانه بنات عمي واختي ...
وهناك سون عليه هجوم بالمبارك والتبوس وبعدين استلمني جلف جلف وشعري راد يتهلس من الفرك
وطلعت مصخنه من البخار والحراره بهالحمام
وبيبي كالتلي ..
هسه هيج صرتي عروس وارتاح كلبي من اشوف هيج يجلفوج مايعجبني جلفجن الفاهي

اني بس اضحك على سوالفهه احبهه بكلشي
ورجعنه للبيت لكيت عماتي جايات ونسوان عمامي والبيت بابه  مدروعه  والدربونه مليانه بجهالهن وكلهه تهلهل وتبارك ...
وسون هذاك العشه المرتب وكعدنا ناكل وهنه يتمضحكن وسون الكعده حلوه بسوالفهن ...

ونكلنه فراشنه كله فرشناه الهم واني والبنيات فوك ومن الصبح كعدنا على صوتهن كلها تصيح يلا كومن تاخر الوكت .. وباوعت على ساعه هستوهه بالسته ونزلنه كلنه تريكنا وكامن يوزعن الشغل
بينهن واني صعدت حضرت غراضي وبالتسعه طلعت للصالون ... وهناك اباوع بالمرايه وصفنت على  شلون الامور دتمشي كلهه بسلاسه وشلون اني بارده تجاه كلشي .. لا انفعلت ولا بجيت ولا عارضت
ولا وكفت وكفه العناد والجدال هذيج .. مستسلمه لكل شي واباوع لنفسي واني انأخذ من نفسي بكل برود ......

رجعت الظهر للبيت وتلكوني بالهلاهل والجهال تتراكض بين الرجلين وطبيت شفتهم محضرين صينيه الحنه ومرتبين المكان .. كعدت وجابولي اكل بين ماكملته اجتي الملا طلعن عماتي موصيات عليهه والتمن جاراتنه وصديقاتي من المنطقه كلهن بس روعه ماقبلت تجي كالتلي مااركص على حزنكم واني شاهده عليه  ..

بيبي حنتلي ايدي وخلت على كل ايد درهم وشدتهن وصديقاتي حنن رجليه بس الاظافر مارضيت يخلون عليهن ماحبهن وصار جف ايدي ورجلي معطر بريحه الحنه ...
خلصت ليله الحنه بتعب نفسي وجسدي وصرنا بنص الليل الكل نيام واني بفراشي صاحيه ماعيني غمضت ولا ثانيه ...
اول شي جنت افكر بي هو ابويه ليش مااجه شافني اليوم ؟ ومامبين عليه مقهور لروحتي وبعدي عنه ليش تغير بمشاعره وياي؟؟؟

وراحت النوب افكاري لحجي عمتي ومرت عمي وهنه يوصني على ليله العرس وشلون اتعامل ويه محمد واهله .. وسيطر عليه الخوف بهاللحظه
مادري شلون راح اسلمه نفسي باجر واني الجنت رافضته من كل حياتي ولحد هاالحظه راح اتزوجه ومامقتنعه بي ..شلون راح اسلمه اغلى شي عندي؟

ورجعت اعاتب المحبوب واودعه بداخلي وكل ماريد ابجي امنع نفسي واكول لا اني قررت وصرت صاحبه مسؤوليه لازم اصير اقوى واسيطر على نفسي ..

وطلع الصبح واني مانايمه بس تعبانه ومن كمت غسلت وكعدت على الريوك جنت احس بنفسي متملكني شعور البرود تجاه هالعالم وهالهوسه والجو هذا كله .. جنت اباوع لكل شي بعين الصغيره ونظره استحقار لكل شي وطلعت للصالون وكملت تجهيز هناك من زينه ولبس ورجعت للبيت ببدلتي البيضه وكعدت اباوعلهم وهمه يصفكون ويغنون ويركصون وضليت اتفرج عليهم لحد مااجتي الزفه ...
بالهوسات والهلاهل دخل محمد واهله .. باوعتله لابس قاط اسود وقميص ابيض ورباط بيجي ويضحك وهو حنطاوي وطويل وضعيف .. اجه كعد يمي وماحجينه شي لحد ما اهله صاحو خلي نمشي .. يلا هو كالي ..
تكبعي حتى نطلع ..

درت وجهي عنه وامي جانت واكفه يمي انطتني الكبوس لبسته وطلعنه ماشفت بيبي حتى اودعهه ولا اختي بس اخواني بالباب واكفين ويه ابويه وعمامي .. اجه ابويه يمي ورفع راسي وصارت عيني بعينه .. جانت عينه تلمع وبيهه حنيه بس اني جامده ومانطيت اي رد فعل كالي ...

ديري بالج على روحج وارضي الله باهل بيتج

هزيت براسي ودنكت وهو وخر على جهه وطلعنه للسياره وجان ليكدام كاعد ابو محمد وعمه وطلعت الزفه كبل لبيتنه الجديد ...

طريق شويه طويل وعلى طوله اني ساكته ولا حجينه اني ومحمد ولا حرف ... وكت الي وصلنه البيت ذبحو جوه رجلي وبعدين طبينه البيت وضليت كاعده وحدي ويه هالنسوان بالصاله
لحد ما واحد من الولد صاح على وحده من هالنسوان حتى يمشون للبيت الجبير يتعشون
وطلعو نصهم وبعدين دخل محمد ويه اخوته وعمامه زفوه واني جنت كاعده بالغرفه ودخل عليه سد الباب واجه كعد يمي ....

لزم ايدي وكال ..
- واخيراً صرتي بيتي ياكَحله
ماحجيت شي بس مدنكه جان يكوم ويجر ايدي وكومني وشال الطرحه من وجهي وهو يضحك باس راسي ولزم جتافي وضل يباوعلي وبعدين
كالي ..
- انه حلمت بهاليوم من يوم ما طاحت عيني عليج
لا تخربي ليه بصدج بعد مامش سبب وتصديني بي عنج ..انتي ليه من زمان واليوم حكي بيج اريدنه برضاتج

هزيت راسي بموافقه وهو ضحك وكال ..
-رايح اشوف الولد انتي اخذي راحتج

طلع واني باوعت على نفسي بالمرايه ويه هالبدله وهالمكياج والتسريحه وويه هالهوسه الي بره اني وين ؟ ماداحس بشي ابد ولا بالي شي او اريد شي

رحت للمرايه وبديت انزع الطرحه وفتحت السحاب بنفسي ونزعت البدله ولبست ثوب النوم الابيض الستن والروب وجنت اريد افتح التسريحه وحسيت روحي تعبانه رحت كعدت على الجربايه شويه وفات محمد .. باوعت عليه وهو يتفحص جسمي شبر شبر اجه كعد يمي وكالي ..
- ليش مافتحتي شعرج لهسه
- تعبت شويه هسه افتحه
- يلا كومي افتحي

كمت للمرايه وصرت افتح واشمر بالماشات على الميز وانتبهت عليه صار يبدل ملابسه .. بس كملت فتح شعري اجه اخذ بايدي للجربايه
استسلمت اله بكل هدوء .. مانطيت اي رد فعل جنت كلش بارده وهادئه بس النفس ينسمع مني واول ماتاذيت شويه طلع صوتي وتفاجأت بتصرفه الي سواه .. بصوره سريعه خله ايده على حلكي وضل يكلي ..
مااسمعلج ولا نفس ...
هنا اني خفت وارتبكت ماكمت اركز بشي بس اتاذى واتاذى واني مكتوم على حلكي .. لحد ماوخر مني اني بس دموع تتجارى ..
عافني وطلع وره شويه سمعت صوت الطلق واني بعدني مدده بفراشي وجسمي كله متكسر من غير هالكسر الي بداخلي .. كمت تلفلفت ورحت للحمام
فتحت الدوش وضليت كاعده ..
ماكلت غير .. حسبي الله على الي جان السبب ..
غسلت وطلعت واني قويه واعاند نفسي مااضعف بعدني بدايه الحرب لازم ابقى صامده ومسيطره

رحت للغرفه وشفته متمدد رحت للميز وطلعت المشط ووكفت امشط شعري جان يكلي ..
- زهره اكو فرد سالفه ماعجبتني منج
- شنو
- انه اعرفج بنت بيت شريفه وعفيفه وبنت مربايه لاتغيرين نظرتي عليج

انداريت عليه وباوعتله باهتمام اريد افهم شنو السويته وهيج يحجي .. جان يكول..
- مره الثانيه عيب صوتج يطلع ويعلى بفراشنه هالسالفه بس بنات الشوارع يسونهه ماريد اسمعهه منج فهمتي
- بس اني تأذيت ماقصدي شي عفويه والله
- اي ادري بيج بس انبهج حتى اديرين بالج مره اللخ
- ماشي

انداريت وكملت تمشيط وهو كام طلع من الغرفه وجان يصيحني ..
- تعالي انتعشى ياكحله

ذبيت المشط من ايدي ورحت كعدت يمه واكلت
اني متعوده على اكله السريع وطريقته ماتغير شي عندي هنا ....
كمل اكل وكالي ..
- صبي الجاي واغسلي الصينيه حتى ادزهه يرجعوهه لبيت عمي

ماجادلت بشي لو يفكر بيه عروس واكعد اغسل مواعين من اول ساعتين اكعد بيهه وياه جان محجى هالحجايه ....

كمت اخذت الصينيه ورحت للمطبخ غسلت المواعين ودورت على قوري وين مخلينه
وطلعته وكعدت اخدرله الجاي ...

بين ما اني واكفه وانتظر يخدر اجه هو واخذ الصينيه وطلع ... اني كمت اشوف شكو بالثلاجه
شفت بيهه بس سراحيات مي .. وشفت جوه الدرج باقي كارتونه ممفتوحه رحت شفتهه هذني كتبي
بيهه باقيه مامعزليهن ...

رجعت للمطبخ وطفيت القوري وانتظرته يجي
وصبيتله وضليت كاعده يمه وهو يشرب بالجاي
جان الملل هو سيد الكعده بوكتها ..اني بس صافنه وتعبانه وهو بيده ورقه يكلب بيهه مره يمنه مره يسره وبيده الثانيه الاستكان ... وره شويه جان يكوم للغرفه وصاحني رحت وراه جان يكلي ...

- تعاي فرجيلي جتوفي وظهري

وكبل راح نزع دشداشته وتمدد على بطنه .. رحت كعدت بصفه وضليت افركله جتوفه وظهره وركبته ..  كالي ..
- ايدج حيل ناعمه وصغيره ضلي محافظه عليهه هالشكل موش يومين والكاهن خشب
- لا ماعليهن شي يضلن ناعمات
- شني شعورج تجاهي سولفيلي انتي ولا مره حجيتيلي شني بكلبج علي
- كل خير شايلك كلبي لا تخاف
- عليج الحسين احجيلي شني بكلبج علي لاتجذبين
- والله كتلك كل خير قابل شنو اكرهك لو اريد اذاك حتى تحلفني بالعكس اني مااتمنالك الا كل خير وراحه
- جا صيري راحتي ولا تصيرين ويه الدنيا ضدي وتشلعين كلبي خليج بسيطه وياي وانه ماكصر وياج لكص اللوزه اضل مداريج
- ماتقصر ادري بيك
- اسعديني وقومي بواجبي وكلشي تردينه يجرالج
- ان شاء الله من عيوني
- ايي تشكرين على هالتفريج الزين تعاي هالساع انه بعدني ماشبعت منج

ابتسمتله وهو اخذني بحضنه جنت احس مثل واحد وقابض على صدري هيج مخليني متشنجه وياه

بعدين هو نام واني رحت سبحت مره ثانيه وافتريت شويه بالبيت .. شفت الحديقه بعدها بس تراب والحمام الي بره مامنظف زين والكراج كله كواخد الجكليت والدم بعده ماممسوح زين بالباب
وانتبهت جوه القنفات الحاطيهن بالاستقبال مابيهن جرجف مرتب بس دوشك وهواي نواقص بالبيت وشغلات رادلهه شغل ..
رجعت للغرفه طفيت الضوا ونمت جنت تعبانه ومنايمه ليله البارحه فكبل عيني اخذت نوم
وماكعدت الا على صوته فتحت عيني وشفته
لازم اطراف شعري ويلعب بيهن ويباوعلي ويبتسم
كلتله ..
- صباح الخير
- اصباح العافيه عليج ماشبعتي نوم
- لاا كافي .. شكد ساعه هسه
- ثمانيه ونص .. كومي جهزي روحج اهلج على جيه جايبين الريوك
- ماشي

بين ماغسلت ولبست وتمكيجت اجوي اهلي طلعت سلمت عليهم جانت امي واختي وعمتي ..
كعدنا سولفنه شويه وبعدين كالو يروحون للبيت
وراحو واحنه كعدنا تريكنا وبعدين محمد كلي

- حضري روحج حتى نمشي لاهلنه غدانه يمهم
- ماشي
- وحسبي حسابج نبات هالليله هناك
- محمد خلي نبات غير مره شوف البيت رادله كومه شغل شلون اعوفه هيج
- من نرجع نظفي يلا خفي ايدج

عافني وطلع واني اخذت الصينيه ورحت للمطبخ اغسلهه ونظفت هالكدرت عليه مال استعجال ورحت بدلت وعلى نفس مكياجي ضليت وجنت ارتب بغراضنه بالجنطه جان يجي محمد
لكاني محضره ملابسه وحذائه .. كالي..

- عفيه عليج تشفين الكلب انتي

ابتسمتله ورجعت اكمل الي بايدي وقبل ميطلع كالي ..
- البسي عباه فوك هدومج
- محمد لبسي زين مابي شي مكشوف وطويل
- ميخالف ماعدنه حرمه تمشي بلايه عباه بعربنه
وانتي محسوبه علي بعد تمشين بالنمشي عليه
- ماشي مثل ماتريد

اخذت العبايه وحطيتهه على راسي وطلعنه
ورحنه لبيتهم وتلكونه هناك عمامهم ونسوانهم وخالاتهم وبناتهن والحجي والحجيه كلهه ملتمه بيتهم .. سلمت عليهم كلهم والحجي انطاني البياض وابوه هم وضليت كاعده بين نسوانهم الي نصهن ماعرفهن وضليت اتعرف عليهن واخت محمد الجبيره هي الي تكفلت تعرفني عليهن وحده وحده وتشرحلي هاي من بيت منو ومنو متزوجها وين كاعدين وضلينه هيج لحد ماصار الغدا ...

هستوني كمت اريد اساعدهم بشي جان عمته كلتلي
- اكعدي انتي عروس مالج شغل بينه احنه نصب

رجعت اريد اكعد وسمعت اثنين من بنات عمه كبار واكفات يم الباب الداخلي مال مطبخ وكالن
- عودينه تريد تسوي روحهه زينه وتشتغل عود شوفوني واني عروس اشتغل ماتدري متعودين على هالشكول

جانن متقصدات يسمعني الحجي لان صوتهن على من وصلت يمهن والثانيه تضحك وتهز بايدهه
وتباوعلي واحنه عين بعين ومااستحن يحجن هيج كدامي .. عرفتهن اصحاب لسنه وكال وكلت لذلك تجاهلتهن وكأني ماسمعت شحجن ...

حطو الاكل واني مستحيه بس كاعده وكلها تجيب وتحط كدامي حسيت كلش واكفه وجودي هيج بينهم بس اذا كمت يفهموني بغير قصد واذا كعدت نظراتهن تحجي بدل لسانهن وحرت شسوي ..
هذا اكثر شعور كرهته من بين الصار كله بهالايام

كمل الغدا شلون مجان ومن لمو السفره كبل اخذتني وحده من خالاته جانت الجبيره وكالتلي
- ضلي يايمه كاعده هنايه وماعليج بالرايح والجاي
- خاله اخاف عيب كعدتي هيج والله مستحيه وماعرف شتصرف ويرضون
- مايرضون حبيبه ..اكسبي راحتج واكعدي هنه كلهن يومين بعرسج تهني بيهن لاحكه على الشغل والركضه
- زين ضلي يمي فدوه
- هاي انه كاعدتلج هنايه لاتخافين ياه شجاج مصوفر وجهج
- مادري اخاف اتصرف شي وياخذون عليه غير نظره واني مامتقصده دتفهميني خاله
- اي يمه فهمتج كلنه جنه هيج ويه الايام تعردين وتفهمين طبع عيالج

ضلينه كاعدين وحدنه بالغرفه جوه ونسولف وهي تحجيلي على بناتهه وين زوجتهن وشعدهه من احفاد وجان يجن البقيه خواتهه وصارت بس لمه خالات .. جان وحده منهن تكول ...

- شو كشفي على ركبتج خلي نشوف محمد بي خير شمسوي ممسوي بيج
- لاااا عفيه شنو هالحجي
- ااهييي وشبيج يمه شكلنالج شني كلنه رجولتنه تمصمص وتعضعض شني جديده لو بنات البارحه احنه ومانفهم
- اي بس هذا شي خاص بين الرجال ومرته مايصير نحجي بي
- ولج كشفيلنه هالركبه خلي اشوف ابن اختي شمطبع واكضهه عليه وادوهنه
- عفيه خاله كتلج هالشي خاص بينه لاتحرجيني رجاءاً
- زين عمي لاتشوفينه احجيلي شلونه وياج البارحه زين لا يشفي الكلب ؟؟
بيني وبينج محد يسمع
- خاله يعني ليش دتحرجيني هيج كتلج هاي خصوصيه بيني وبين رجلي شلون احجيلج وبعدين اني ماارضى ينسأل هيج سؤال وينجاب طاري رجلي بي رجاءاً مااريد اضايقج بكلامي واجرح خاطرج بس تفهميني

جنت كلش متنرفزه من تطفلها هذا بس مابينت هالشي وهي جان تكوم تضحك وكامت باستني اني ضليت صافنه هاي شبيهه؟؟.
جان تكلي ..
- لا عيني لا تضوجيني ولا شي عفيه عليج عجبتيني من مانطيتي برجلج واسرار بيتج جدامنه عفيه عليج والله اصيله
- يعني شنو دتختبريني جنتي؟
- اي جا غير نعرف طبايعج وذبتج شلونهه ان جانت عوج  نعدلهه وان جانت عدله وترضينه نثني عليهه .. وزين ياحبيبه طبعج عدل وموزون هيج خليج لا تنطين سرج لوحده ولا تدخلين بينج وبين زلمتج ولا بني ادم تصونين بيتج بنفسج احسن لج
- ان شاء الله

رغم اني نجحت باختبارهن وشفت فرحتهن وفخرهن بس ضليت حذره منهن لان عرفت
هالفتره كلها يضلن رقيبات عليه وهالشي ابد ماريحني ..

ترخصت منهن واخذت دشداشتي ورحت للحمام حتى ابدل ومن طبيت جان حمامهن عباره عن قسمين ..قسم بي الدوش وقسم فارغ بي تعاليك للملابس وطشت وسله وجان اشوف ضفدع على الطشت واكف واطلع ركض من الحمام وكلبي يرجف ورحت ركض للغرفه يمهن وجان واكف يمهن اخو محمد اسمه مازن واني اجيتهم مخروعه وراساً جفتت وهنه كلهن دارن وجهن عليه واني ضليت امتمت جان خالته الجبيره تكلي ..

- خيرج يمه شبيج مخروعه
- هذا شسمه .. بالحمام ضفدع صغير وخفت

ضلن كلهن يضحكن والولد هم مدنك راسه ويضحك جان تكلي ...
- شو امشي وياي وينه هالضفدع هاذ الثبرتينه بي
- على الطشت واكف خفت لا يكمز عليه

مشت كدامي وهي تضحك جان تشوفه وتكلي
- ولج يمه هاي عكركه ماتسوي شي
- خاله والله اني مو صلح ويه هالاشياء عفيه طلعيه

جنت احاجيه واني مجلبه بثوبهه من وره ..جان تصيح لمازن اجه جاب خشبه وصلهه ليمه وهذا كمز عليهه وشاله طلعه بره .. يلا كدرت افوت وابدل ملابسي وركض ركض طلعت خاف النوب تطلعلي غير شغلات وتكمزني ..

رجعت للغرفه ولكيت امه موجوده سلمت عليهه
وكعدت جان تكلي ...
- العصريه راح يجن حبيباتنه من عربنه وجيرانه هم يشوفنج ويسلمن عليج عود حضري روحج
- ان شاء الله

ضلينه نسولف واني منعسه بس اريد اخذلي غفوه وهنه مكضياتهه سوالف وتكمز وره جهالهن وجان تصير ساعه ٣ ونص وكمت رتبت حجابي اني بس مخليته هيج على شعري ومغطيه  ركبتي هو هذا اهم شي عدهم الركبه مغطايه وهنه اكثرهن ضفايرهن طالعه من حجابهن .. بس اني جنت رافعته لشعري ماضافرته ..
عدلت شويه حمرتي ورشيت  عطر  وطلعت ويه البنات بره شويه تمشينه بحديقتهم وشويه واجوي
مجموعه نسوان ورحنه طبينه للاستقبال وكضيتهه
سلام وسوالف وياهم لحد ماتعشو ومشو وصارت ساعه ثمانيه بالليل يلا شفت محمد ...

اجاني للغرفه والبنات طلعن وضلينه وحدنه سألته
- وين رحت اليوم كله
- يم جماعتي كاعدين واخذتنه السوالف وعزموني على العشه وضليت وياهم
- ها زين
- اي شلونه يومج هنا صار شي ؟
- لا عادي كضيتهه اتعرف على بقيه العائله
- زين افرشيلنه هنايه خلي نام
- خاف احد يريد ينام هنا تاكد منهم يكون احسن
- انتي افرشي وانه اشوفهم واجيج

راح هو ورأساً طبت وراه امه وكالتلي ..
- لا تمدين ايدج على هالنضده انه اطلعلج هسه اكفي
وكفت على جهه وهي جرت شويه من الجرجف المغطيه بي نضدتها وانطتني دوشكين ومخاد وبطانيه من الكنتور طلعتها مو من نضدتها
ووكفت تعدل بيهه وسوتهه مسطره يلا طلعت
ضحكت شفتهه شكد تحب فراشهه وغراضهه

فرشتهن وطلعت ثوب نوم بدلت وجنت اعدل بكحلتي ودخل محمد اجه وكف يلعب بشعري ويضحك واني بس ابتسمله .. راح طفى الضوا واجه تمدد بصفي وكالي ..
- تدرين انه بعد ٣ ايام التحق
- هاي شنو ليش بسرعه هيج
- نزولي بس عشر ايام وهاي حتخلص
- وشوكت ترجع بعد
- ماعرف يم الله بعد شوف شكد يثبتوني جم يوم
- الله كريم ترجع بالسلامه ان شاء الله
- الله يسلمج
- زين يعني راح ترجعني لاهلي من تروح
- شعندج هناك ضلي يم اهلي
-محمد عندي دوام بعد كم يوم امتحاناتي شنو نسيت
- يعني هم تلتحقين مثلي
- ههههه اي
- يلا تكضي مااضل هيج
- هسه تاخذني مو
- اذا اداريني وتشبعيني هالجم يوم اخذج واذا لا تضلين
-شنو شنوو
- بعدني عريس اريد اشبع واطلع ضيم السنين
بارحه عفتج جنتي تعبانه  ومتاذيه اليوم بعد مالج عذر
-يعني شنو بالك بالضبط
- تضلين وياي شكد ماريد من هسه وكل يوم

مالحكت احجي شي وهو بدا يتلمس وخفت احجي واعارض ويتغير عليه ويخوفني باعصابه ضليت ساكته مثل مايريد ومطيعه اله بكل شي ..شكد اضوج اتاذى اتعب اريد احجي اكوم تلعب نفسي
بس ماكدر احجي واذا صوت واحد او كلمه احجيها يثور عليه .. جربت اكله كافي ورجع لنفس اسلوبه بأن يسد حلكي ويخليني اتخبل من هالحركه واكره روحي .. ضليت متحملته وبس الدموع بسكته تنزل لحد ما عافني ورجع لمكانه اني ماضلت بيه لا اعصاب ولا قدره تحمل بعد ..
انداريت وتلفلفت بالبطانيه وضليت ابجي خله ايده على جتفي وتفاجىء من بجيي كالي...
- جاي تبجين ! عليش بويه شمالج
- عوفني محمد الله يخليك
- شجاج فهميني لاتسودنيني عليش هالبجي
- ليش تتعامل وياي هيج يعني معقول مدتحس اني مداتحمل هالوضع متشوفني ممرتاحه هيج ليش متهتم لهالشي
- شني الماهتميتله ! شني الماعجبج احجيلي
- دتاذيني بهالتعامل محمد لا هيج فدوه
- تاذيتي مني
- اي
- وعليش متكليلي
- انته ماترضى احجي شي ولاتهتم شيصير بيه
- شوفي بويه انه احبهه هيج .. تشوفيني موش لين بتعاملي وياج لين انه زلمه عربي عسكري ماعرف اللين شنهي  لونه .. انتي بعدج صغيره وهاي جديده عليج ويه الايام تعودين علي وتشوفينه هو الصح وهو الاحلى .. مسحي دموعج وبسج عاد حساسيه لكل شي .. لا شبعت والله اذا تضلين هالشكل
- محممد
- دبري روحج بويه انه مايصرفلي هيج

دار ظهره ونام واني بقيت بضيمي وحدي حتى ماكلف نفسه يطمئن اذا تحسنت او بعدني متاذيه
راح انام مرتاحه لو بكلبي شي عليه !!
وين جنت يم ايوب يحس بيه مهمومه من نبره صوتي يفهمني واذا ضايقني بيوم يحير شيسوي ويراضيني .. مو ملكه ولا حلاله وشايلني بالصلوات من احترام واحساس واسلوب
بس راح بعد ويه روحتي اني عفت نفسي لمن عفته

ثاني يوم مشى عادي لوره الغدا احنه يمهم ورجعنه بعدين لبيتنه .. ذبيت الغراض ولبست دشداشه للشغل وبديت انظف البيت ولزمته كنس ومسح
من فوك ليجوه .. وغسلت الطارمه والحمام البره لمعته واخير شي طبيت اخذت كارتونه الكتب
وجان عندي خانه بالكومدي فارغه حطيتهن بيهه
وتالي رحت سبحت وهذا كله ومحمد جان نايم
من كعد وصيته يتسوك للبيت فارغ كلشي مابي
غير هالتمن والجاي والعدس .. وراح يتسوك
واني ضليت ارتب بالملابس وغيرت الفرشه
ومن جابلي المسواك بديت اسوي عشه
و وره ماتعشينه  اجوي بيت عمه تعللو يمنه
وللتسعه يلا راحو .. ورجع محمد استلمني مثل ليله البارحه كل مره يزيد بقوته وياي اكثر وكمت حتى ماركز شيحجي وشيريد اضل بس مغمضه عيني وعاصره ايدي واحسبهن ثانيه ثانيه حتى اخلص
ووكت الي يعوفني اجر نفس قوي وارتاح شويه واكوم اسبح بين مااجي الكاه نايم .. احط راسي على المخده واضل امسح بالدموع واهدي بروحي واصبرها واحاجيها ان ماكو شي يسوه وابجي عليه وهذا شي عادي وكل رجال يختلف عن الثاني
وهيج اطمن نفسي وانام ...

واليوم الثالث هم مشى على هالنحو ومن الفجر طلعنه لبغداد وصلني لبيتنه وراح التحق ..
جان امي تكلي ..
- شجابج من الصباحيات ولج
- يعني هيج تستقبليني
- دعوفي هالسوالف يلا .. واحجي بس لا صخمتيلج شي ويه الرجال وزهكت  روحه وشمرج علينه قبل سبعتج
- ههه خيالج واسع .. عندي دوام عيني اذا ناسيه فاذكرج اني مابطلت من الكليه بعدني والرجال التحق ارتاح كلبج هسه
- اي دكولي هيج من البدايه فززتي كلبي ولج مو ادري بيج ماتكعدين راحه ولسانج لسان دلاله
- عوفيني امي لخاطر الله عوفيني
- عشتو وشبيج هيج زهكانه روحج

عفتهه ورحت صعدت لغرفتي تمددت بصف اختي وحضنتهه وهي كعدت كبل حضنتني وباستني وضلت تسولفلي شمسوين بغيابي ورجعنه كملنه النومه وجان هاليوم سبت همزين على بدايه الاسبوع اداوم ...

وكضيت اليوم ويه اخواني وصديقاتي من المنطقه التمن بيتنه وكعدنه نسولف ومشى الوكت هيج
بس ابويه ماشفته جان بايت بالنجف وللمغرب يلا رجع من تلكيته حضني بلهفه ويبوسني وجان فرحان بشوفتي ..
سألني  ..
- شلونج بابه مرتاحه هناك

ابتسمت وكتله ..
-اي الحمدلله

صفن بوجهي شويه واني ضلت عيني بعينه شكد عندي عتب وحجي وياه بس هو بنى حاجز بينه بعد ماكدر اعبره ...

وثاني يوم طلعت الصبح للدوام من نفس البيت ونفس الطريق رجعت اكمل حياتي الاولى بصفه
ثانيه وهالمره مو اني البنيه الحره الي حلمهه وطموحهه الوحيد تجيب الشهاده وترفع راس ابوهه وتكون حياتهه الخاصه لا هالمره اني المره المتزوجه الي تريد بس تنجح حتى تستقر بيتهه ويه رجلهه وتنتظر رجوعه بسلامه من الجبهه. ...

سلمت على البنات هناك وباركولي وشفت اخيتي روعه اجتني ملهوفه وحضنتني وهي تكلي
- كل فكري بيج شلونج شصار وياج تعاي كلشي احجيلي

واخذتني وكعدنا بالحديقه وسولفتلهه كلشي صار وياي هي الوحيده الي اشكيلهه لان ادري بيهه متطلع سالفه وتغدر بيه هي بير اسراري ..

وره فتره من سكوتنه هي حزنانه لواقعي واني تعبانه منه سألتهه ..
- وصلج خبر منه ؟
- اي هو الصراحه
- احجي كلبي تعود على الصدمات احجي
- .....
.
.
يتبع
⭐️⭐️⭐️⭐️⭐️⭐️⭐️⭐️⭐️⭐️
شلونكم يا حلوات .. ان شاء الله تكونون بخير
اعتذر لتاخيري عليكم بس من كثر ما ضليت اكتب ونهار كله على التلفون عيوني صارت توجعني والله فكمت اكتب شويه بعد ماكدر واضل اقطعهن هيج واني معودتكم البارت مو اقل من ٥٠٠٠ فلذلك اتاخر بي .. بس ان شاء الله مايتكرر بعد

وهسه جاوبوني هنا  لو سمحتو الكل تشارك 👇🏼

تتوقعون ايوب وين ؟ وليش خلف بالوعد؟ ☘️

برأيكم ايوب صادق بحبه لو مو كد الحب ؟ ☘️

شنو نظرتكم لمحمد ؟☘️

☘️المتزوجه والي بعدهه شنو راح يكون تصرفج لو مريتي بنفس هالتعامل من زوجج؟