-
متعب تعب من مرزوق بأنه يقعده مو راضي يقوم، و يقول له عطني دقايق و يرجع ينام و استمروا على هالحاله ساعتين، حاول متعب يبوسه لكن هالشي خدر مرزوق اكثر ونام، لذا استسلم متعب
"اوكي حبيبي بس مو تعصب لما تدري اني ما قعدتك اوكي؟" يهز جتف مرزوق اللي هز راسه و يبصم متعب بالعشره انه ما سمعه بس يسكته
"اشوفك باجر" يبوس خده و يتركه طالع من غرفته و الشقه هدوء بما انها الساعه ٢ الفجر، يطلع و يسكر الباب وراه
-
فهد كعادته ما ينام هالحزه، انطق باب غرفته، و فز قلبه عارف انه ما يجي هالحزه لغرفته غير طلال، اعتدل بقعدته و رجع شعره لورا و عدل بلوزته و اللابتوب حطه بحظنه
"ادخل" يتكلم و يدخل طلال للغرفه و يبتسم لفهد
"كنت عارف انك مو نايم" يقول له داخل للغرفه و يسكر الباب، و فهد عارف انه يتظاهر بأن ما صار شي
"اشبع من النوم بسرعه لذا ما انام الحين" يقول له و يهز طلال راسه و يقعد عالسرير جدامه و يتربع
"مقدرت انام مدري وش فيني" يقول له منزل راسه لايده و يتعبث بالاسواره اللي لابسها
"عادي يمكن مافيك النوم" يقول له و يهز طلال راسه
"لا نعسان بس مب قادر انام اغمض عيني لكن يطير النوم" يقول له و يرفع فهد حاجبه و يرجع يشتغل للابتوبه
"اسف على اللي قلته اليوم.. لكن مب اسف لاني قلت لك الحقيقه مابي ازيف لك الموضوع او اني ممكن ابادلك" يقول له و يطالعه فهد و بقلبه حرقه لكن متجاهلها
"ولا يهمك" يبتسم له و يسكر اللابتوب و يحطه على جنب و ينسدح على جنبه مسند راسه على ايده و يطالع بطلال
"هذا انا سولف لي لما تنعس" يقول له و يبتسم له طلال
"وش اسولف عنه بالله؟ انت كلمني عنك ابي اعرف عن حياتك و ماضيك" يقول له و يتنهد فهد و يطالع السقف متذكر حياته ببيت ابوه
"اول شي طفولتي كنت هااادي جداً جداً هادي بس لحد يدوسني على طرف كنت ما اتهاوش ولا لي بالمشاكل لكن احياناً اضطر بصراحه بالمدرسه و كنت متفوق و شاطر و ذكي حلمي اصير دكتور و ليلحين حلمي كان لما دخلت للثانوي شفت المصايب بالاحياء و الكيميا و الفيزيا و حولت ادبي وقتها قلت لك شلون ابوي درى اني ملحد و درى اني مثلي و هذا انا الحين عندك" يقول له و يطالعه طلال بصدمه
"هذه اقصر قصة حياة سمعتها بحياتي!" يرفع حاجبه و يضحك فهد منسدح على ظهره و يطالع بطلال
"وش اسوي بعد هذه حياتي" يقول له و تتسع ابتسامة طلال
"صاير تتكلم سعودي! لا يكون مني" يضحك و يرجع طلال شعره لورا "اوكي خلني اقول لك عن حياتي بما ان ادري لك فضول تعرفها اكثر" يقول له و فهد يبتسم له و عينه على ملامح طلال و اهوا معقد حواجبه يتذكر
"ابوي من كان عمري عشر سنوات مدري وينه كل اللي اعرفه انه اختفى امي ظلت تقول لنا انه مات و اخواني صدقوا لكن ما دخلت عقلي انه مات لكن ظليت اقولها طوال هالسنين لانها مب مقعده يعني لو تقول لشخص ابوك مات غير لما تقول له قمت من النوم و اختفى! ظليت انا اشتغل من بعد المدرسه بالبقاله لجارنا اساعده من اني اوصل البضاعه و غيره علشان اعين امي بالمصرف بس كان يسد حاجة يوم واحد و هذا اللي مكفينا كون اخواني اطفال ما يحتاجون اكل بكميه! لما وصلت للمتوسط و تعرفت على محارب و حبيته و باختصار اني استنفذت كل ذره حب فيني له كل طاقتي استهلكتها بأني احبه ولا فكرت بالاضرار ولا كنت ابي مقابل بس كنت احبه لمدة سنين طويييييله لحد هذه السنه و قررت اني اتركه افضل و دراستي فالكويت مدري ليه جيت هنا لكن حسيت انه كذا افضل لو بعدت عن الكل ابدا فدراستي بدون تشتت كان من المفروض اني ابدا السنه اللي طافت لكن ما قدرت حتى تأكدت ان لاهلي مصدر فلوس من بعدي و هذا انا عندك" يقول له عن حياته ، و فهد مو فاهم شي
علي قال له ان ابوه ميت! معقوله حتى علي ما قال له او علي ما كان يبي فهد يعرف؟، سكت لثواني و عينه على طلال اللي بعد عينه عن فهد
"قصتك ناقصه" يقول له و يطالعه طلال بسرعه
"كيف ناقصه؟" يسأله مو فاهم
"مادري جذي احس ناقصه" يقول له، و طلال يتنهد فعلاً في جز ما قاله لفهد، مو عارف فهد شلون عرف هالشي لكن بيقول له
"من سبب حبي لمحارب دخلت بموجة اكتئاب حاده كان يلعب فنفسيتي بشكل لا يُصدق كلمه توديني فووووق بين السحب و كلمه تخفس فيني الارض و يتركني كذا احياناً معلق بين السما و الارض و احياناً بس يتجاهلني ولا كأني شي بحياته مو فاهم ليه كان يسوي كذا بس تعبت نفسيتي مره منه كنت ابكي ليل و نهار كنت اكره نفسي و... فهد ما ابي ادخل فالتفاصيل لانها ماضي ما ابي اذكرالماضي لكن هذه كانت حياتي صارت سوده تماماً احس بقلبي كذا كأنه بين يد عدوي و يضغطه بقوه الدنيا تظلم فوجهي اكره كل شي بحياتي" يقول له بتبرير و فهد يعتدل بقعدته سامعه مصدوم من مشاعر طلال اللي ليلحين بقلبه
"فأنا اسف فهد انا عارف شعورك لما تكون تحب من طرف واحد و وش كثر هو يجرح لكن.. انا مو بايدي والله مو بايدي اي شي هو قلبي يتحكم فيني والله مقدر اجرب احس بذا كله قهر و غيره و دموع و حسره و خيانه و بكي و صياح و نوبات الاكتئاب اللي تجيني بدون سبب انا تعبت منها حاولت انهي حياتي بسببها انا اسف... اسف" يتأسف و يحظنه بسرعه و يبادله طلال بقوه
"انا اسف لو كلامي وترك لكن لو تعطيني فرصه ماراح تندم" يبوس راسه و طلال ظل دقايق اكثر حاظن فهد، و يفكر بكلامه، لكن مرتاح لوضعهم، مرتاح لأي علاقه بينهم هذه ما يبيها تتطور، عالأقل مو الحين لانه مو مستعد
يبعد عن فهد و يبتسم له، و يبتسم فهد متوقع ان طلال وافق لكن خاب ظنه لما قال
"عاجبتني علاقتنا اي كانت تحت اي مسمى هذه.. ما ابيها تتطور عالاقل مو الحين لاني مرتاح معاك كذا طيب؟" يسأله بهدوء و يمد يده ماسك يد فهد و بابهامه يحركه على يد فهد اللي ابتسم من حركته هذه
"طيب اوعدني" يهمس له و ينتبه له طلال و يأشر فهد على قلب طلال "اذا قدر يحب من جديد اذا تقبل انه ينفتح لا يكون لغيري" يهمس له و واضح عليه الجديه و يبتسم له طلال على كلامه، و حاس بأنه فعلاً فهد يحبه لكن مو عارف شيسوي
"ماكو غيرك اصلاً حتى لو في غيرك ما اتوقع بيوصل لمكانتك عندي" يقول له طلال ببساطه رافع جتفه، و تتسع ابتسامة فهد و
يعض شفايفه
"مو فاهمك!" يجعد فهد حاجبه له لكن فرحان بنفس الوقت من كلام طلال توه
"ولا انا فاهمني بالله اذا فهمتني قول لي" يقول له
"صعب ان الواحد يفهمك.. انت عباره عن متاهه.. لغز او تقدر تقول احجيه لكن تطمن و ثق ان بالي طويل" يقول له بهدوء، و طلال عقد حواجبه من كلام فهد، و قلبه حاس انه ببطنه، و تقلص ببطنه من التوتر من كلام فهد
"راح تتعب و تستسلم" يقول له بتحدي و يبتسم له فهد
"بيثبت لك مع الوقت.. يا أنا يا قلبك" يقول له بثقه مع رفعة حاجبه و يبتسم له طلال رافع حاجبه بشك
"طيب مثل ما تبي سيد فهد" يوقف من مكانه و فهد يعتدل بقعدته
"تصبح على خير" يبتسم، و فهد له رغبه كبيره بأنه يقوم و يبوسه، لكن ما يبي يسوي شي غلط، لذا اكتفى بأنه يبتسم و ينسدح بفراشه و يسكر الابجوره جنبه، يطلع طلال من الغرفه و يسكر الباب وراه، و يسند راسه على الباب و عينه عالسقف
"ماني عارف وش الصح.. قلب خايف و عقل حيران" يهمس لكن سمعه فهد، و تنهد براحه انه ما باسه، و اهوا خايف
-
"صباح الخير" يدخل عليهم و يلقاهم يتريقون و طلال واضح ما نام عدل و ليلحينه ببجامته
"صباح النور" يردون عليه الا طلال اكتفى بأنه يطالع بفهد اللي كان لابس و جاهز للدوام
"بابا ترى اليوم يقولون لنا شنو درجه جبت" يقول له و يلتفت له فهد و عينه لاحظت طلال اللي يطالعه، و بعد عيونه بسرعه و طالع بصحنه و كمل اكله
"اكيد بتجيب درجه كامله" يبوس راسه له و يقعد بالكرسي جدام طلال و خالد و علي مشغولين ببعض
"ليش ما نمت؟" يسأله و يطالعه طلال
"نمت بس مقطع كان نومي" يقول له و يتمغط و يحط شعره على جنب
"و ليش ما جيت تنام عندي؟" يسأله بهدوء، و قلب طلال زادت نبضاته و ثقلت
"ما حبيت ازعجك بجياتي كثيره" يقول له و يرجع شعره على جنب مره ثانيه و يتنهد "تعرف حلاق قريب هنا؟" يسأله
"لا انا اقص شعري بنفسي و احلق" يقول له و يرفع طلال حاجبه
"اذا تعرف مره عدل اجل قص لي شعري" يقول له و يهز فهد راسه و ياكل
"بعد الدوام" يقول له و يكمل اكله، و يوقف طلال من مكانه و يطلع من المطبخ رايح لغرفته ياخذ غفوه
"اشوف الامور صارت تمام بينكم" يقول له علي
"اي تكلمنا امس بليل مو شي مهم" يوقف من مكانه و يقول لمشعل يروح يجيب جنطته المدرسه و يطلع مشعل برا المطبخ يجيبها
"شنو؟ شقلتوا؟" يسأله خالد بسرعه
"مو شغلك" يطلع من المطبخ و يلقى مشعل ساحب جنطته معاه و يطلعون من الشقه
"وجودنا و عدمنا واحد" يضحك علي و مرزوق يدخل المطبخ بسرعه يفتح الثلاجه و يسحب قارورة ماي و يطالعهم
"اليوم كنسلوا كل شي بنطلع نتعشى متعب قال لي فاهمين؟" يسألهم بسرعه و يطلع من المطبخ واضح مستعجل و ما ترك لهم مجال يعلقون حتى
-
٥:١٦ المغرب
يدخل فهد اخيراً من الشغل و واضح انه تعبان، و يلقى بس مشعل بالصاله، عارف ان كلهم بالمطعم ينطرونهم لكن وين طلال؟؟ "وين طلال؟" يسأله فاصخ كبوسه الرسمي و يفتح اول زرارين من قميصه
"نايم" يرد عليه مشعل و تتسع عينه
"ليلحين نايم؟" يوقف من مكانه بسرعه رايح لغرفته، و يعلق كبوسه على جتفه بمكانه،و يدخل الغرفه يلقاها بااارده، و ظلمه، يفتح اللتيات و ياخذ ريمونت المكيف يقصر عليه
"طلال" يقعد عالسرير جنبه "طلال قوم شهالنوم شدعوه!" يهزه و يفتح طلال عينه و يطالع بفهد بكسل
"كم الساعه؟" يسأل مغمض عينه من جديد
"خمس المغرب و انت حتى جامعه ما رحت" يقولها بعصبيه
"بلى رحت الجامعه! و ليش راد متأخر العاده ترجع مع مشعل" يقول له معتدل بقعدته و يحط ايده تحت المخده، يدور تليفونه و ما يلقاه "ااافففف" يتحلطم نازل من السرير و يلقاه عالارض طايح
"قضية قتل لو تشوف شلون دخل المخفر صار كله دم و شكله مبهذل مكتبي صار كله دم اللي يشوفه يقول مسرح الجريمه" يتحلطم يقرف و يجعد طلال حاجبه و اهوا يلبس تي شيرته
"و ذا شغلك كل يوم جرية قتل و ذبح و دم؟" يسأله قاعد على السرير جدام فهد و وجهه واضح عليه انه ليلحين فيه النوم
"حاب هالشغله بصراحه بس شكل هالقضيه ماراح تطول لان القاتل جا اعترف" يقول له و يقلب طلال شفايفه بتقزز
"بالله وش شعورك و انت تشوف مجرمين كل يوم؟ و تتعامل و تتكلم معهم ما تتعب نفسيتك؟" يسأله بجديه
"طبعاً تتعب نفسيتي بس اتحمل و تعودت خلاص عارف منو الصاج و منو اللي يجذب يوضح عليهم" يقول له واقف من مكانه
"و ترى بنطلع كلنا الحين تجهز" يقول له رايح للباب و يلتفت بسرعه "و يا حيوان مره ثانيه قصر عالمكيف و البس ملابس دافيه شوي الجو بدى يبرد" يقول له و يهز طلال راسه له عاجبه اهتمام فهد فيه، و يبتسم له فهد طالع من الغرفه و يسكر الباب وراه
-
"جب ولا كلمه ناقصني تمرض علي" يسكته فهد و يسكر له جاكيته و اهوا معصب
"اذاا مو برد راح اقطه انا قلت لك" يقول له مشعل بعناد و يوقف فهد
"يهدد بعد" يمسكه وياه لبرا الصاله، و يطلع له طلال كاشخ و لابس جاكيت معاه، جينز فاتح مشقوق من ركبه و شوي من فخذه، و تي شيرت خفيف ابيض مع جاكيت زيتي، يحاول فهد انه يخفي ابتسامته و يطالعهم اثنينهم
"يلا ينطرونا بالمطعم" يطلع من الشقه و يطلعون وراه و يقفل الباب
يركبون السياره و طلال جدام و مشعل ورا، يقعد عالدرج بينهم "مشعل اقعد عدل خلصني و اربط الحزام" يقول له و يطالعه طلال رافع حاجبه و بابتسامه
يلتفت له فهد و ينتبه لابتسامته "و انت شنو يضحك؟ البسه يلا" يأمره و يضحك طلال و يلبس الحزام
"يعنني شوفوني انا الضابط اللي اتبع القوانين؟" يسأله و يطلع فهد من المواقف
"مو عاجبك؟" يرفع له حاجبه و يبتسم طلال
"كل شي فيك عاجبني" يقول له متعمد يبي يشوف ردة فعله، لكن فهد اكتفى انه يبتسم له، و يحط عينه عالطريج و يشغل اغاني
-
يوصلون للمطعم و ينزلون، يركض مشعل لداخل المطعم يدورهم، و فهد و طلال مشوا وراه و يلقونهم كلهم موجودين، يسلمون على متعب، و يقعد فهد جدام طلال
"طلبتوا ولا بعدكم؟" يسأله فهد فاتح المنيو
"لا ليلحين ننطركم" يقول له متعب و مرزوق رافع ايده فوق راسه و عينه على متعب جنبه "اطلب لي نفسك" يهمس له و يهز راسه متعب عارف شنو مرزوق يحب و اللي ما يحبه
يخلصون طلباتهم و قعدوا يسولفون و يتعرفون على متعب اكثر، لكن طلال كان يكتفي بأنه يضحك و يبتسم له، و احياناً يسولف مع مشعل، يقول له عن المدرسه، و طلال يندمج وياه
و حاس بعين فهد اللي كل ثانيه تطالع فيه لكن متجاهله ما يبي يبين له انه شايفه
توصل الطلبات و يوقف فهد من مكانه ياخذ منديل و يحطه على ملابس مشعل حول رقبته، و على رجله "لا تطيح على ملابسك" يحذره و طلال استغل هاللحظه بأنه يتأمل بفهد، لابس جينز اسود سكيني و تي شيرت ابيض مع جاكيت اسود و جوتي نايكي ابيض، و رافع شعره لورا، شكله يجذب ما ينكر هالشي ابداً
"اوكي بس يقزز" يتحلطم مشعل و يحك رقبته من الكلينكس
"يا كثر حلطمتك اوكي شيله" يرد عليه فهد و يبتسم لا ارادياً طلال و اهوا يسمع كلامهم
"بابا ترى مو بيبي انا اقدر اكل شوف شوف" يقول له و ياكل البيتزا بدون لا تطيح و يبتسم له فهد
"بالعافيه" يعدل له شعره
"طلال! اكلك برد" يصحيه علي من سرحانه مع مشعل و فهد و يطالعه فهد، و وجهه صار احمر، ياكل اكله و كعادته ساكت و اهما يسولفون، خالد حب متعب كون بينهم اشياء مشتركه واجد و مرزوق و علي مو عاجبهم هالشي ساحبين عليهم اثنينهم و يسولفون عن اللي يحبونه
كانت ليله حلوه لطلال و يوم حلو، مو مصدق انه انتهى من سالفة نايف اخيراً، حاس انه وزن باخره على جتفه و انزاح، لكن تلاشت ابتسامته لما تذكر امه، و نزل راسه يتعبث بتليفونه و ايده على خده
توصل له رساله بتليفونه و يشوف انها من فهد 'بعد المطعم نخلي مشعل يروح مع علي و خالد و نروح انا و وياك؟' يقراها بقلبه، و يرفع راسه لفهد اللي يسولف معاهم، و طالعه رافع حاجبه ينطر رده
ينزل طلال راسه و يكتب له 'طيب بس وين نروح؟' يرسل له و يطالع فهد اللي اخذ تليفونه علشان يرد
'مادري اللي تبيه بس مابي ارد الشقه الحين' يرسل له و يرفع طلال جتفه و يهز راسه، ابتسم فهد و هز له راسه و طلال كمل اكله بهدوء
يخلصون من المطعم و يطلبون الشيك و فهد اصر انه يدفع كانت بينه و بين متعب، لكن فهد عطاه البطاقه بسرعه سبق متعب، "بابا ابي اروح الحمام" يهمس مشعل و محد سمعه غير طلال
"تعال معي" يوقف معاه و يروحون للحمام، يخلص فهد دفع و يلتفت ما يلقاهم، يلتفت لجهة الحمام و يلقى طلال ماسك ايد مشعل، و ارتاح، و التفت لعلي
"علي ابيك تاخذ مشعل وياك عفيه خله يلبس بجامته و يفرش اسنانه و ينام اوكي؟" يطلب منه و يجعد علي حاجبه و يلتفت له
"وين بتروح؟" يسأله
"بنطلع انا و طلال نتمشى بالسياره او نروح البحر مادري بس مابي ارجع للشقه مغموت" يقول له و يهز علي راسه
"اوكي مو مشكله بس وينهم؟" يسأله مأشر على اماكنهم الفاضيه
"ها مشينا؟" يسألهم خالد بصوت عالي
"ننطر طلال مع مشعل بالحمام" يقول له فهد، "اوه اوكي" يرد خالد، و يلتفت لمتعب و مرزوق، و ياخذ رقم مرزوق
"اوكي بس مو تاخذ راحتك و تسولف كل يوم انا زين اقدر اكلمه و اشوفه" يقول له مرزوق بغيره و يطالعه متعب
"يالعيار كل يوم تشوفني!" ينصدم متعب و يطالعه مرزوق
"هيي شنو؟؟ كل يوم بالجامعه بمكتبك ما ناخذ راحتنا" يقول له و متعب فهمها
"ايي قول جذي حبيبي بس مو تقول ما اشوفه خلاص حبيبي بوديك مكان ناخذ راحتنا" يبتسم له و خالد يخزهم
"استحوا ترى موجود انا!" يقاطعهم و يطالعه مرزوق
"يلا مناك بس روح لعلي" يسكته و يرجع طلال و يوقف فهد و يوقفون معاه كلهم لما انتبهوا ان طلال جا
"يلا حبيبي روح مع علي و خالد" يقول له فهد
"ليش؟ حق شنو؟" يسأله بفهاوه
"علشان تنام انا و طلال عندنا شغل بالشرطه و بعدين نجي انت لا تسوي ازعاج انزين؟ نام على طول علشان بالويك اند اوديك الالعاب" يقول له و يبوس خده و يهز مشعل راسه و يروح لبين علي و خالد
"حط بالك عليه" يقول له فهد و يطلع مع طلال عن المطعم للسياره، يركبون السياره و يطلع من مواقف المطعم
"عطلة خمستعش بترجع لاهلك؟" يسأله فهد و طلال ما فهم
"وش هي عطلة خمستعش؟" يسأله
"عطله عباره عن خمستعش (١٥) يوم بين الكورس (الترم) الاول و الكورس الثاني" يقول له
"اهاا.. مدري مو اكيد علاقتي مع امي ليلحين مو فاهمه اخاف اروح و تطردني من البيت" يقول له "بس ليش؟" يسأله
"مادري افكر ااجر لنا شاليه جم يوم نستانس فيه" يقول له رافع جتفه
"مو برد للشاليه؟" يسأله معقد حواجبه
"لا في مسبح داخلي" يقول له و يوقف عند الاشاره "المهم انت اذا كنت بترجع للسعوديه ماله داعي أأجر" يقول له و اهوا يطالعه
"ليش انا شكو؟" يسأله بسرعه
"ابيك تكون ويانا بس" يجاوبه
"طيب اشوف مو اكيد اروح لاهلي بس خل نروح مكان مافيه احد" يقول له
"اوكي" يرد فهد و تفتح الاشاره
____________________________
هالبارت هديه لكم💓💓💓
ما عندي شي اقوله والله بس اتمنى البارت يعجبكم و بليز كومنت على كل فقره ٢٠٠+