نهاية الفصل الرابع
ياصاحب القبة البيضاء
وبعد فترة مو قصيرة من نجاح العملية ومع اول انتكاسة صحية لفاضل اسرعت بيه رحاب مرة ثانية لعمان
لكن هذه المرة مااخذت اي طفل وياها
الزيارة كانت قصيرة نسبيا
و الطريق الى عمان يبدو اطول بكثير من المرات السابقة مع تاوهات فاضل والي يحاول يختزل الالم في داخله دون ان يظهره
ومع نظرات رحاب الى عنان السماء ودعواتها الي لاتتوقف لزوجها
مكانت خايفة الا من ذاك الصباح الي تستيقظ فيه بدون ماتسمع صوت المي من الحمام وهو يتوضا
وتكوم هي تتسحب تسوي الريوك
كانت ام فاضل وابوه ايضا وياهم
ام فاضل الي تركت بيتها بمشاكله
من حيدروعركته ويه استاذه بالكلية والاخير مصر يفصله
رغم توسط العديد من الناس لمحاولة الموضوع الا ان الامر حسم
حيدرمكان يشبه فاضل بل عكسه تماما
كان يؤمن باخذ حقه من الحياة بذراعه وبالقوة فكان عصبي وفظ التعامل
مايهتم ولا ياخذ اعتبار لاي احد
تماما مثل فاطمة اخته الي رجعت تفكر بالطلاق من زوجها مصره هذه المرة
وبقت زعلانة بيت اهلها
في معمعمة هذه المشاكل كانت ام فاضل مرهقة ومتعبة ترافق ابنها
وكانت تردد انه كلما يكبرون الجهال كلما تكبر همومهم
وابو فاضل ايضا كان يعاني الكثير من الاعباء على كتفه ارهقته وخلته يغط في نوم عميق اول ماصعدوا السيارات لحد ماوصلوا
عمان بنهاية التسعينات اختلفت تماما عن بدايتها
اول تغييرشملها بكثرة وجود العراقيين العاطلين عن العمل والهاربين من الحصار الخانق على العراق
وكذلك كونها الوجهه الاولى للعلاج لكثير من المتيسرة احوالهم
وايضا اصبحت مركزا للام المتحدة لادارة العمليات والتعاقدات مع العراق
اضافة الى هروب نسيب رئيس الحكومة العراقية مع اشقائه اليها قبل عامين وضخ العديد من الاموال الى خزائنها
تحولت انظار الاعلام الدولي الها لتتبع الاخبار
فلطالما تصدر العراق قائمة الاخبار العالمية
ولعبت عمان دور كبير كوسيط بين العراق ودول العالم من حوله
ادى ذلك الى نمو حركة العمران والاقتصاد والسياحة فيها نوعا ما
وتغير طبيعة الركود الاقتصادي الي كانت تعاني منه
عمان كانت اول منفذ للعراق واكبره في تلك الفترة تلته سوريا
الطبيب في هذه المرحلة من عملية فاضل طمانهم انه بخير وانه الكلية المزروعة تكفي لثمان سنوات حينها يتمكن من استبدالها بواحده اخرى
اطمنت ر حاب على زوجها واتنهدت قليلا وبدت ترجع صحتها هي هم
بعد مااخذ منها التعب ماخذه
بقوا يومين زيادة هناك فترة نقاهه لفاضل
عمان كانت احيانا تعاني من شحة المياه والقطع فترات متقاطعة
في هذه الاثناء حولوا من الشقة المؤجرة الى الموتيل صح سعره اغلى بس ارتب واريح
كونها حتكون منعزلة في غرفة بعيدة عن اهل فاضل الي ماخلصت التلفونات عليهم تطالبهم بالرجوع لحل مشاكلهم المتراكمة
من جهتها بقت ميلاد وحدها هي وسعد طول فترة بقاء امها بيت رحاب يم الجهال
جانت ميلاد تقضي نهارها بيت خالتها
وهذا الشي جان يفرحها متضطر تشتغل تكابل التلفزيون وتكعد
عود مرات تكوم تساعد قيم بمسح لو غسل المواعين
ولما بدى الدوام بالمدارس معافتها وحدها كامت تاخذها وياها من تطلع وهالمرة اخذتهالبيت معميلة تخيطلها بدرية بدلة
قل خياط الستر وكثرت البدلات
الكيبور والفيزون والشيفون وغيرها
راحت ميلاد ويه خالتها لبيت راقي بالقادسية الي بالمنصور
كان البيت جديد مبني دبل فاليوم وسيارتين بالباب مرسيدس وبي ام دبليو
طلعتلهم امراءة رغم كبر سنها بس كانت لازلت نضرة
لابسة ملابس نوم ستن رصاصية وعليها روب شيفون قصير
والشحاطة تطقطق برجليها
حاطة مكياج خفيف وشعرها مسرحته على كتفها وابتسامة كبيرة من شافت بدرية بالباب
دخلت وميلاد فاتحة حلكها عليها شلون
شلون هيجي تطلع للناس !!
وهي مية مرة تنكفخ اذا لفت الدشداشة الكودري عليها من تمسح
وظلت تباوع على الحديقة وديكوراتها والنحت على الحايط قريب الباب
نفس الرسمة لكهرمانة وهي تصب الزيت بالبستوكة
والباب خشب صاج فخم
والكاع كلها مرمر
اما الديكور الداخلي فكان صالة تفصل عن صالة بالاقواس ماكو ابواب ويغيطها لباب كثيف
كان الاثاث قليل لكن راقي وثمين
وعربانة ذهبية صغيرة توسطت الصالة الي كعدوا بيها
وعليها استكانات ذهبية رفيعة وناعمة
ضحكت بداخلها ميلاد واتذكرت من رادت تشتري استكانات والي بالسوك كلها جعب ثخين ومخربط ومبطبط واصلا مايكعد عدل يظل يركص على الماعون تلعب نفسك من تشرب بيه
ولازم نشتري منه تشجيع الصناعة المحلية !!! ههههه
وهي الدولة تشجع الصناعة الاجنبية !!
كالتها بهمس باذن خالتها ال دغتها حتى تنصي صوتها
وماحجت اي شي
شربوا جايهم المهيل واخذت ميلاد قطعة كليجة من الماعون جانت كلش هشه ام الجوز
بحيث ذابت بحلكها وبصفها جان اكو ماعون اتذكرت ميلاد اخر مرة من رجعت رحاب من عمان جابتلهم منه
مثل الكليجة يسموها معمول
راسا خطفت وحدها وبلعتها
طعمها يخبل يالقم ياحلقوم
اخذت وحدة لخ جانت تكول خاله جنها شكر لمة
ماحجت بدرية جانت كاعدة وصافنة
كعدت صاحبة البيت بعدما راحت بدلت قميص جينز قصير وبنطلون هم جينز سمائي فاتح
وورثت جيكارة تسولف ويه بدرية عن اشخاص عرف بيناتهم
وميلاد صافنة على البيت
الى ان طلعت بدرية البدلة من الجيس جانت ملفلفتها وكاويتها
اتخبلت عليها وظلت تتشكر منها لانه جابتلها الموديل هو نفسه
وكلتلها من يومج جنت شاطرة بالخياطة
جنت مشهورة بالكلية !!
سكت بدرية ودنكت ماحجت
وطلعت المراءة مية وخمسين الف سلمته لبدرية
كله ارباع ارباع
ضحكت بدرية وكالت اخوها علاء يكول التجاربالسوك مايحسبون الفلوس الهواية كاموا يوزنوهن
شيوزنون المليون شيحسبها ارباع!!
سلمت عليها وقبل ماتطلع كلتلها بدرية هذه بت اياد على ميلاد يعني
من سمعت اسم اياد بدرية دمعت عينها واتبلعمت وجاوبتها انه هذه بت اخوها بتها بالمدرسة
طلعن وصعدن بالتكسي
سالتها ميلاد شبيج خالة المفروض تطيرين من الفرح هاي مية وخمسين الف
---امي مو هاي تكلفة البدلة هم وياها تعرفين بيش المترة اخذتها
---شنو مترة بخمسه وعشرين قابل
اي قماش البدلات غالي امي
هاي رحت لشحم اشتريته منه
---شحم؟ شنو هههه
---شعرفج بيه انت يمه هذا محل بالعرصات كلش طاك
اصلا البدلة سعرها كلش زين لانه كصيرة تعالي شوفي الاقمشة الي عنده يحجي بالالافات خمسين وستين الف المترة
---عزة
---اي ماما هذني ماركات قماش مستورد يجبه خصيصا
---مو كالوا الي يجيب مستورد يعدموه
---هاي قبل هسه لا
---اتذكر جان الصيني يشلعون العلامة ويخلوها صنع في العراق هههه
بس خاله انت ليش حزينة
---اتنهدت بدرية وباعت على الشارع وهملت عينها
اوووف ميلاد شاتذكر
هذه جانت طالبة ويه اياد بالقسم
الله يرحمه جانت كالتله روحها عليه
شوفي الدنيا
دمعت عينها ونزلن الدموع
وماحجت الى ان طبوا للبيت افتهمت ميلاد صعوبة الموقف الي جانت خالتها بيه
كعدت بدرية على القنفة وطوت رجلها جواها ومدت اللخ ودخنت جكارتها وبدت تفرك براسها وتفرش شعرها
طلبت من ميلاد تكوم تسويلهم كهوة
وصاحت كل فنجان مي خلي خاشوكة كوب كهوة ورشات شكر ماحبها حلوة
ركضت ميلاد بالكهوة لخالتها وهي متلهفة تعرف بقية القصة
صفنت وسرحت على الحديقة الصغيرة كبال الشباك مالت الصالة
----الله يرحمها جوري
كالت وهي فرحانة بدرية انت حتزوجين ايااد واني اخذ سنان ونصير زناكين
ونسافر ال لبنان ونفتر العراق بالسيارة
لاهم خياطة ولاهم المصروف
هه
ماتدري الزمن استحيف علينا
ماتت هي بقهرها
ومتت اني بحسرتي
---خالة ليش عيالج جانوا هيجي زناكين مثل هاي المرة ام صفاء!!؟
---لج هاي شنو
عيالي زناكين مالت الاول من زمان من عوائل بغداد المعروفين
غير الزمن لعب بيهم
حجزوا على نص املاكهم واخذوا شكو شي باسم اياد ولوما البيت باسمي مسجله هم جانوا اخذوه
الله يرحمه حتى اهله مجانوا يدرون
----ليش حجزوها
---نصت صوتها وورثت جكارة لخ هم الي عدموهم حجزوا وصادروا اموالهم
ماتدري جوري اني حعيش طول عمري بالخياطة لاشفت الزنكنة ولاعشتها
وكميلة الي حفت على اياد تصير ام صفاء مرت فلان
وبيتها بالقادسية
هيي والله
كومي خلي نسوي الغدا
من جهة ثانية
جانت نورية توها مخلصة الغدا وتلاعب بت سامي رشاوي
رشاوي جانت سمرة حيل وبيها ملامح شبه من بيبيتها
وعلى طول عهود تضحك عليها وتكللها شوفي بيبيتج شكد عيبت عليه تفسة تفسه طلعت انت تفسة
ساعتها نورية مجانت تحجي تبلع وتسكت
نزارملتهي بطيورة فوك
صار واهسه كل ويه الطيور
والبلابل
كل جمعة لازم يروح لسوك الغزل
ومرات يشوف كريم هناك قريب السوك العربي يبيع تي شرتات هاي ام الالف ونص
الفين يشتريها بسبعمية وخمسين من محل الجملة ويبيعها حسب السوك
وهنه غسلتين تلاثه وينشكن للزبل
جان يطلع من التسعة الصبح يرجع بتلاثة الظهر
حتى يطلع مصرفه ومياخذ من امه
ومن ترجع عهود تغسل هدومها تصعد تصلي ويتغدون سوى هي وحماتها الي ترجع قبلها بشي نص ساعة
مدرسة عهود بالامين كلش بعيدة اذا مااجاها الخط معناها لازم تصعد تلاث فورتات يله توصل بهذلة وحارة
وكلما ترجع جانت اكو مشادة كلامية بين مها مرة سامي وعمتها تقريبا يوميه
وسامي عادي كاعد يباوع تلفزيون ولايمه
صار شي روتيني عدهم حتى زهير نفسه مايدخل
على كلشي جانن يتناكرن على الطبخ والمواعين والتنظيف وحتى على البنية الصغيرة
ومها غاسلة ايدها انه رجلها يتدخل ويفزعلها
لانه بس يتدخل يبسطها ويدزها لاهلها
وصلت بيه مرحلة الخيانة الزوجية انه يعرف متزوجات ويشاركهم الفراش همين
ومها جانت تعرف وملت من العرك والحجي مفاد
كل حجاية يكللها روحي اطلكي واني حاضر
جان لازمها من الايد الي تكسر وتوجع
اهلها فقرا وماعدهم امكانية يتحملون بتهم ترجعلهم مطلقة
وعدهم عيب كلش عيب تتطلك المرة بس عادي تنضرب وتنهان وتتبهذل هذا زوجها وشي طبيعي يسوي بيها هشكل
في مرة بعد الغدا حضرت عهود الجاي دتصعده لرجلها الي قلما ينزل من تكون مها بالبيت
فذبتلها حجاية عمتها وهي تلاعب رشا
جانت روحها برشا
كالتلها يله عهود شدي حيلج جيبلنا صغيروني
اندارت عهود عليها ومها كاعدة تصب جايها بالماعون مالي الجاي وتشربه عادات مال قبل
فتحت عينها وبحلقت عرفت حتكب عركة
---عمة ليش مو على ايدج مابقيت دكتور وافتريت عكة ومكة حتى تعالجين نزار
منين يعني اجيب الصغيرون واحنى تونا دنكول ياهادي
لو حابة تسمعيني حجايتين كدام جنتج على ابو ها الولد مابيه شي وتمام
ترة كلها تعرف !!
----هاي شبيج شنو هاللسان الطويل اني شكتلج
---شنو كلتليتي هاي لا اول مولا اخر مرة ياهو الي يجي بيتنا يزورنا
تكولين خطية مااعرف ليش مايصيرلهم خلفة
واني اكول خطية تخجل تكول الصوج من ابني
بس مال تذبيها براسي لا لهنا وكافي عيني مها خلفيلج صغيروني تلتهي بيه عمتي احسن مما تتعارك ويانه يوميه
وبالفعل مها كانت حامل وبشهرها الثاني بس مجانت حاجية لاحد يمكن جانت تخاف من العين!! وكملت عهود وهي تمسح الجاي الي وكع وتصب جديد
وعود بله كوليلهم لخطارج هماتين ليشبتج اسمهان ماخلفت لحد الان و ليش تريد تتطلك من رجلها وزعلانه ورايحة بغير مدينة لاتنسين
----يمه يمه شلون اكلتني وشربتي اني حجيت وشكلت عود هاي انت الصايمة المصلية الي تخافين الله
---انتوا تخلون الواحد حتى يطلع من دينه ظلت ادردم عليها اخذت الجاي وصعدت
شافت رجلها العرك يكت من سالكته الشمس وهو ينظف جوة الطيور
تعال عيني تعال امك تريد منك خلفة
باوع عليها وعيونه تجدح نار من الحجاية
طفى جكارته واخذ جاية ورجع طلع للسطح
نزار الي ترك الصلاة ورجع يشرب يومية بلا محد يعرف
الى ان لكفته عهود بذيج الليل واتخبلت
هي منا نظيفة وكلشي تعليه يلا تستعمله
ومحافظة على صلاتها شافت ريحة رجلها كلها شرب وعرق ريحة تخنك وتكتل
ويطوطح
كامت تصيح وتعيط عليه من اقترب منها يريد يحضنها
ودفعته وهو يتعارك وياها الاان صاحت عليه انت نكس
نكس روح طهر نفسك وتعال لفراشك
لاتنجسنه
اتخبل وكام يضرب بيها
وادخلوا اهله
وابوه من عرف بيه يشرب هم كام يضرب بيه
لانه زهير ابوهم من حرب التسعين بطل وجاز وصلاته كلها بالجامع فرض واحد مايفوت
وكل ايام الصيام المحببة يصومها
وجان محذر سامي في يوم يرجع سكران والا يطرده من البيت
وحتى من جان يسكر مايخلي احد يعرف بيه
كلش بعنب من يضطر يبات برة البيت
لكن هذا مستجد على الامور مايدري شكو
كام يفشر ويغلط نزار
وابوه يدفع بيه برة البيت
ونام ليلتها على المرجوحة يهدد عهود بالطلاك
وعهود تغم بيه وتغم على نفسها
مايطلك على اساس اني متزوجة
ونورية تتوسل بزوجها يخلي ابنه ينام جوة وراحت زعلانة هي هم نامت بالهول
وهذه كانت بداية سلسلة المشاكل بين نزار وابوه الي وكف هالمرة بصف عهود
علما رجعت فخرية راحت عهود يم امها عشرة ايام
واول ماطبت حذرت امها انه تتدخل بيناتهم وتكللها رجعي
لكن خالها علاء هالمرة هو الي ادخل وبسرعة اول ماسمع بالموضوع وزعلة عهود
واول ماحجى كللها تريدين الطلاك؟!!
اتفاجاءت فخرية واختها بالموضوع
شعجب علاء يريد طلاك عهود
ماحجى علاء بس امل جانت تعرف وسكتت
لكن هي عهود نفسها مافكرت بالموضوع
مهما يكون نزار مدياذيها من قبل
بالعكس جان يظل يبجي ويعتذر من تصير مشكلة بيناتهم
مشكلته جان ياذي نفسه
و يكللها انت ماتعرفين ليش اريد اشرب
اريد انسى اني منو اريد انسى الي صار
اريد بس افقد الذاكرة
اريد اعيش حياة ثانية تعبت من نفسي
وين جنت وشلون صرت!!
جانت تنقهر عليه من تشوفه مكسور ومتحطم
وهواية مرات جانت تنقهر عليه وتاخذه بحضنها يبجي مثل الجهال بين ايديها
فرفضت فكرة الطلاق
لكن بدرية ماهدت علاء
عرفت اكو ان ورة الموضوع
وظلت تلح وتمشي وره اخوها
بذيج السنة خريف ال98 دخلت قيم السادس اعدادي
جانت شاطرة وكل سنة اعفاء
بس دخلت السادس من الخوف والرهبه
كامت يوميه تتمرض وتتخربط
معاناة جديدة لبدرية فوك تعبها
جانت يوم جمعة من عزمت اخوها ومرته على الغدا بدون علم اختهم
لان الاثنين يعرفون فخرية ماتضم حجاية بكلبها وهنوبة على بتها
بدى علاء يحجي لبدرية الموضوع من البداية وشلون سوو عقد زواج بغير اسم عهود حتى يضمن الموافقة الامنية واستحقاقات المتزوج والاجازة
وانه زواج ورقي واصلا مشايف البنية غير بس بالمحكمة
وكيف انه اتفق ويه زهير على حق عهود في حال طلبت الطلاق
اتعجبت بدرية شلون مصفطين الموضوع فكللها علاء انه هذا شي هواية صاير من راح دور بالمحكمة
خصوصا الكرايب الي عليهم خط احمر مثل حالتهم
والي عجب بدرية اكثر طلب علاء الطلاق
ممعقولة علمود الفلوس
فعلاء بررلها موقفه انه مايعجبه تعيش وياهم لاهي المرتاحة ولا همه الي مقدريها والولد رجع وضعه مخربط
ليش ديضيع عمر البنية هيجي فوك السنين الي ضاعت تنتظره
خصم الحجي مجان عاجبه تبقى علاقة النسابة ويه بيت زهير
وصل الخبر مثل الطلقة لزهير
فراح بوجهه لمحل علاء يحجي وياه
وكمراضاة
عرض عليه عقد عمل في ليبيا
ضحك علاء وكله بس همه يريدون مدرسين واساتذة اني شعندي رايح هناك
كله لاتشيل هم اني ادبرها الك
صفن علاء وكاله لزهير
تدري ابو سامي يمكن انت ماتصدكني
بس اني مااكدر اعيش برة العراق
رغم الضيم والهضيم مااتخيل نفسي اعوفه واسافر
احس نفسي مثل السمجة الي يطلعوها من المي اذا طلعت بره
من كل عقلي احب العراق ولو العالم كلها تهج بره
اني باقي
كام زهير وحضنه
كله ابو سامي اني مدااكول هيجي لانه اني وطني وقومي
اصلا مااعترف بيهن
اني هيجي اكول لان اني هيجي
فكرك ليش مارحت ويه نرجس !!
من رادت تلوي ايدي وتجبرني اروح لايران وسجلت نفسها ويه اهلها!!
اني ضحيت بزوجتي ابو سامي
لانه اعرف نفسي مااكدر اعيش برة هذا البلد
واني متاكد اكو هواية مثلي
وصاح برهومي الجايجي
ولد صغير بعمر ال11 سنة يوزع جايات على المحلات
كله جيبلنا قاط لاخ
ركض برهومي
ولد نحيف وجهه كله شطب مال عركات
واظافيره سود
حاجاه زهير كله برهومي ليش مو بالمدرسة انت؟
جاوبه وهو يتراكض يلم الاستكاين حتى يجيب قاط اللاخ
كلي عمي نركض ورة العيشة اني يتيم وبركبتي تلاث بنات وامي منو يعيشهن!!؟
انغلق موضوع الطلاق من قبل عهود هالمرة
ووعدها خالها وقت ماتحس نفسها ماتريده يشلعها من عيونهم
وكللها مالي دخل لا بامج ولا اخوج ولاغيرهم
افتهمت؟!!
هزت راسها عهود والفرحة ملت قلبها وروحها اخذت غراضها ورجعت للبيت ويه عمها زهير
هذه السنة عاد سعد المرحلة الاولى من المعهد
فالصبح جانت بس فخرية وميلاد بالبيت
جانت ماتكعد ميلاد الا ساعة عشرة الصبح وعلى صياح امها
حتى تنظف وتساعدها بالطبخ
جانت يومية تكعد تندعي تلكي شغل
الا ان فاتحها زهيربشغلة التعيين
وراح بنفسه قدمه الها
وبالفعل يطلع تعيينها بالمركز القومي للحاسبات والمعلوماتية
وبدت تباشر بشهر الواحد من عام 99
دخلت للمركز وكان يعتبر في ذلك الوقت مركز حساس
الارضية مغطاة بالكاربت واول ماتدخل صورة الرئيس العراقي كبيرة جدا في الوجه
الاستعلامات ثم الصعود الى الطابق الثاني الي يتفرع الى غرف الموظفي نوهناك المصعد الى الطوابق الاخرى
كانت ميلاد هي الاولى بالتعيين بعد فترة طويلة من الزمن ماتم بيها تعيين احد من زمان
تعينت على مركز التدريب
مدير المركز انذاك كان دكتور هلال
العيون اتجهت الى تلك الفتاة الشابة وهي تمشي كبطة في وسط نهرهادئ
لابسة بلوزة خضرة وتنورة سودة مدي وجواريب سودة شفافة ترتجف من البرد
هي نفسها ماعرفت ليش مالبست فد سترة تخلصها من البرد
انتبهت على انه معظم الموظفات هنا شابات لكن لبسهم اكل عليه الزمن وشرب
موديلات قديمة وهدوم كلها من البالة
ذكرتها بعهود وشلون تشتري هدوم و تلبس
في حين كانت تحس نفسها جذابة وسطهم
معظم المموظفين كانوا من الاناث الغير متزوجات الا بعض المهندسين المخضرمين والشباب في قسم الصيانة
وصادفت انه اتعين بعدها بكم يوم شاب تابع للمعهد
الشاب كان بعمرها تقريبا او ربما اصغر بسنة ...
صار كلام بالاقسام بين البنات
اكو شاب جديد متعين كونهم فقدوا الامل تماما بالموجودين
بينما شافته ميلاد كبعير مترنح خصوصا من يمشي
الشاب حاتم كان بسيقان طويله جدا وجذع قصير وكتف متهدل يفتقد للقلافة والاكتاف المتصلبة المسكين كان يحاول يستغل الطول هيبة لكنها انعكست عليه بنطلونه الواسع الحجل المرتخي تحت الحذاء الروغان ذو اللمعة البارزة والقميص الكاروهات ...اي جتي مودتها وهو كان اول من يلبسها يبدو انها كانت غالية السعر نوعا ما ومكوية باهتمام ...فكان يمد راسه الى الامام واحيانا من يوكف يرفع ركبته ليذكر الاخرين بطول هامته الي مابيها جاذبيه ابدا
حاتم كان صاحب عيون ضيقة مبطنة ووجه نحيل بفك مثلث بارز وانف عراقي بامتياز...الشاربان كانت تقليدا لنجل رئيس الحكومة وتفوح منه عطر الكولونيا القوية بعد ماسلخ جلد وجهه بالحلاقة كلهم اتوقعوا هذا الاعزب حينعجب بميلاد اصغر الموظفات الموجودات واحدث نسخة...لكن من اليوم الاول كان نفور واضح بينهم ...
ولانه ميلاد كانت حديثة التخرج عديمة الخبرة اتعينت بواسطة فاعطوها دور وضيع جدا ماحققلها اي طموح
لكن والحقيقة تقال كانت مثاراعجاب الكل من بعيد لبعيد ومحط انظارهم وهذا وحده كان حافز ممتاز يخليها تتشوق للدوام كل يوم
في نهاية الشهر الواحد بدات دورة جديدة
دخل احد الشباب وهو يحمل وصل الدفع بمبلغ الدورة وتايه مايعرف وين يروح
انتبهت عليه ميلاد
وظلت صافنة
يعني شكو بيها لو مثل هذا الشاب يكون من نصيبي
وهناك كان حاتم يراقب الوضع من جوه ليجوه فرفع ايده حتى تظهر ساعته الذهبية واشر للشاب ان يمر عليه
فبدا يسجل اسمه وعلق على خط كاتبة الوصل رغد تكتب بسرعة كلشي مافتهم
كله اسمه عمران محمود
وابتسم والتقت عيونه بعيون ميلاد الي جانت مركزة عليه
حست ميلاد انه تعرف هذا الشاب وشايفته
ماعرفت ليش لسبب ما حست بشعور غريب ظل مصاحبها حتى من رجعت للبيت
المركز كان يوفر باصات نقل كبيرة منشات
ولما توصل للبيت كانت الساعة مقارب ل3 ونص
تكون فخرية متغدية هي وسعد ولافة راسها ونايمة
فتكعد ميلاد تاكل وتتفرج تلفزيون ماتفارقه ابدا
لكن ذاك اليوم جان مو عادي ابدا
ثاني يوم اتانقت بشكل ملفت للنظر وراحت للدوام
وظلت امها ادردم عليها تخفف المكياج
قبل لايكوم سعد ويشوفها لكن هي انطلقت على السريع حتى بلا ريوك حتى تلحك بالخط
كان الجو حلو مغيم ومحمل بالمطر
والهوا البارد يجمد الخشم
خلصت فخرية ترتيب البيت وحطت الجدر على النار وراحت لام صلاح هم منها تسولف وياها وهم تجيب معجون وهالسوالف وراها بساعة مرت على المخضر وشافت ام رعد ام الخضروات الجكارة بحلكها ترش المخضر وصافنة
سالتها شبيج شو صفنة تاخذ وصفنة تجيبج
---سلامتج ام سعد بهاي الدنيا شمدرينه يوميه طالعة شغلة
---شلونهم ولدج ابنج الاسير صدك شلونه
---اييه ايه ام سعد زين الحمد لله ماشية ويايه وياها مرته حامل
وهو لاشغل ولاعمل
من سمعت فخرية مرته حامل انعصر كلبها واتذكرت بتها خطية بعد كل هالصبر هم ماحصلت شي
مشت ودتعبر شافت شهيد ابن صابرين يركض
صاحته ولك شهيد تعال وينك
شجابك هنا
دنك وسلم على فخرية وشاللها العلاليك و كللها دااشتغل ويه امي
---تشتغل ويه امك شنو!!
ليش هي وينها
---بذاك الصوب تبيع مخصرماخلوها تفتح هنا كالو تكطعين رزقنا
---شو تعال ودينا الها ولو مابيه حيل امشي بس شنو جابها هنا وتبيع مخضر
ولك ابوك وينه
---ياهو منم الحقيقي مات والثاني طردناه مانريده مانلفيه بعد
---شنو مات ولك شدتحجي ابوك الى جا من الاسر وينه
---اشرلها انه راح خلص وكام يركض يودي العلاكة يم امه ذبهن وراح
صابرين من شافت فخرية ركضت عليها بوستها وشبكتها حيل
ودموعها كامت تجري
وكعدت بصفها فخرية على تنكة دهن
تسمع قصة هاي المسكينة وهي تهز براسها وتمسح دموعها
ماتحمل زوجها الحقيقي صدمة مرته وزوجته وحبيبته لسنين الي اخذها بالكوة
والي حلم كل يوم يرجع علمودها هي وجهالها
بقى متمسك بالحياة رغم الالم والمصايب رفض يستسلم جان متاكد زوجته تنتظره
ماتحمل من عرف شلون امه جبرت اخوه ياخذها علمود البيت
فحرك البيت وحرك نفسه
---سنة كاملة ام سعد كعدت يم اخويه بنالي غرفة من جينكو تعرفين شنو جبنكو لا ماتعرفين
هاي الحيطان مالتها تجوي نار جهنم بالصيف جنج كاعدة بالتنور
وبالشتا اوووف ثلاجة وينز علينا المطر الشتا كله
متت من البرد شوفيني جلدي تقرح وصار بيه روماتزيم
لا اخويه يرحم ولا اهل رجلي
اخر شي هو زهك مني سواها طلابة ويه عمتي
عمتي ماتحملت ظلمها
من شافت ابنها حرك نفسه وحرك البيت وكعت بالفراش وماتت
وسواها عرايك ومشاكل وياهم الا ان اخذ البيت من عيونهم
على اقلها سكف
سكف على راس جهالي
---ورجلج اقصد عم الجهال
---طلكني اول يوم رجعة اخوه طلكني وهج
ظلوا يتعاركون واحد اكل اللاخ وهج
يكولون تزوج وحدة من الملاهي ومستكعدها مااعرف ولاالي غرض بيه
فتحت هالبسطية صارلي جم يوم واعيش بيها هالجهال واعيش نفسي شسوي ام سعد والله كمت انظف البيوت ويطردوني مثل الجلب اوكف على بابهم
الحمد لله يارب هسه فرجت شويه
انت شخبارج البنات شخبارهن
---احنى الحمد لله زينين وهذا شهيد بطلتيه من المدرسة ليش
اي الولد ال2 بطلتهم بس البنية تروح للمدرسة شسوي ام سعد يادوبك انلحك
صبغت البيت من جده وجديد
واشتريت كاونتر واثاث مستعمل كله بالقصد (بالقسط)
كامت فخرية تكفكف دموعها وهي حسبالها متاذية من الفقر صاحت على شهيد يشيل وياها العلاليك للبيت
ومن وصل انطته ربع وشافت ايده هم ممشكة كلتله تعال مر خلي احطلك فازلين ضحك عافها وراح
جان جيبه ثكيل ونازل مليان دعابل
نهاية شهر الثاني
فاضل هم اتمرض
وبدت رحاب مره لخ تركض بيه
كانت فاطمة اخته اطلكت من فترة ومشاكل ويه طليقة شغلت العائلة كلها
ورحاب تركت الدراسة مصارلها واهس بعد البيت وزوجها شغلوها كلش
هالمرة كان مصاب بالتهاب والطبيب وصى يبقى ليلة بالمستشفى
وحدة من المستشفيات الاهلية
وضعه كان قلق باليل لكن الصبح كعد وابتسم كلش طبيعي
من زرع الكلى فاضل بعمان طلب رحاب تصور كلشي بكامره اشتروها مناك
كان يحب يترك تصوير لجهاله
وحتى شرايط كاسيت
يحجي وياهم ويحجون وياه ويلاعبهم بالفديو ويحجي هواية عن طفولته وعن احلامه عن امنياته المطمورة بالعوق
كانت دتصور رحاب ورفع راسه مبتسم كللها رحاب حموت ومصار عندي بنية
شفتي ماجبتيلي بنية
دمعت عينها رحاب وركض عباس وبشار عليه
بشار كله بابا ميخالف اني اصيربنيه الك
هنا قهقه فاضل بقوة وخضن ابنه لكن عمار وكف بالباب حزين وعصبي
وينفر بنفسه وصاح عليه ابوه كله تعال ولك تعال بحضني
جاوبه بالنفي هز جتفه
فاشرتله رحاب روح على ابوك
هم ماقبل كله مااحضنك الا من تطلع
اني ضجت من المستشفيات
فانقهر فاضل واندار على رحاب وكللها بعد لاتجيبهم هنا خطية ضاجوا
طفت الكامرة ونور اخذت الجهال وطلعوا كللها عطشان وجوعان كلش
حس اريد اكل خروف
ههههه
وركضت وصت نور توصي هادي يجيبله نفر كباب
لزم ايدها وكللها رحاب ابريني الذمة
---يو فاضل يوميه تكلي واكول مبري الذمة حلال عليك هههه كافي باجر تطلع منا وهم نضحك على حجيك
---رجع كللها مثل كل مرة انت جنت سندي بالدنيا وبهاي الحياة واقسى لحظات عجزي من اشوفج ضعيفة ومحتاجتني ومااكدر اسويلك شي
---كافي فاضل
بابا انت روحي من الدنيا يكفي افتح عيني من الصبح اركض اشمك واطمن نفسك موجود احمد الله واشكره نفسك عندي بالدنيا كلها
---ردت بنيه هههه
---صير زين والله نسوي بنيه
--اريدها سمره مثلج دمها معجون
هادئة وراقية ورقيقة ركبتها طويله مثلج وعيونها تحجي كل الكلام
اريدها اممم ماتضم عليه شي
---هههه يااا واني شوكت ضامه عليك
ظل يتشاقى وياها ويدلعها ويتغزل بيها
بعدين اندار واتنهد بعمق
رحاب مرة وحده اسالج الرسالة جانت مالتج
كان داير ظهره عليها وهي دتلم البطانيه مالته
اتبلعمت وماحجت ونقذها ان دخلت عليها نور وهادي بالكباب والطرشي
اكل شويه
ورحاب ماكدرت تخلي لكمة بحلكها
طلب منها تصور مره لخ
واول مابدى التصوير خلته على وجهه وعيونه كانت تلمع مثل المغوركة ابتسمت بحزن رحاب
واندارت على هادي اكل الكباب كله
وجانوا يضحكون ويتشاقون
اجى الدكتور فرغ الغرفة وانطاه ابره التهاب موعدها
لزم ايد رحاب قبل ماتطلع ضمها حيل وعصرها وهي سوت نفس الشي بس جان داخلها يحترك
اتاريه كل هاي الفترة كان يعرف الرسالة الها وضامها بكلبه
ماتحملت طلعت تبجي وحضنتها نور وهادي كل ظنه من الخوف عليه
مرت ساعتين ونص
جان هادي مودي الجهال ونور لبيت فخرية وام فاضل كالت حروح للبيت اسبح وابدل واجيج
صمت غريب
مغربية والشفق الاحمر كان يشق السماء بصرخات صامتة
حست رحاب زوجها موطبيعي لونه تغير وبدى يتمتم ويهذري
المفروض كان نايم
ركضت على السستر صاحتها وصاحت الدكتور
لحظات فقط
غمض عينه وفتح حلكه بهدوء
جان مقهور انه تعب اهله هوايه
اتمنى لوانه مات بلا مايعذبهم
لكن اخذ العذاب حظه وياه
صرخات رحاب على فاضل دوت المستشفى
لزمته وخضته بكل قوه
انفصلت عن العالم وعن الواقع
صارت تصرخ بجنون وتملخ بروحها وبالسستر سووله شي
ركضوا بيه لغرفة الانعاش
كامت تركض وياه مثل السكرانه ممستوعبه
تصرخ ياربي لا
ياربي بحق نبيك محمد لاتاخذه مني ماعندي غيره
بحق الحسين عندك لاتاخذه مني والله يارب ماعندي غيره
يارب عنده تلاث جهال يريدوه
يارب الله عليك يارب لاتخذه كانت تتخبط بالحيطان و الممرضات لزموها وحاولوا يهدوها كانت تتصرف بهستيريه مو طبيعة كالت هسه جان يحجي ويايه
كال مشتهي كباب هسه اكل وشرب
شلون موكلتوا حيطلع باجر شلون
فهموني شلون
وشكد حاولوا وياه مفاد
خلص
مات فاضل يارحاب!!!