نساء مخمليات

بارت 22

احلى الذكريات هي ذكريات الحب الاول , اللي لايمكن ان ننساها مهما كانت مؤلمة, موجعة ...ذكرياتنا جزء من هويتنا شخصيتنا وامتدادنا ...
مرت سنين كانه قروون لكن الى الان تلك اللحظات كانها الامس في ابسط تفاصيلها .. عمقها حتى رائحتها .. الشعور الزمني والقشعريرة الغريبة اللي تسري بالجلد مجرد ان نعيشها مرة اخرى في ذاكرتنا او احلامنا ..
كان الوقت ظهرية ... وميلاد مصابة بالحصبة ونايمة بحضن رحاب في ممر الانتظار .. فخرية كانت تتراكض بسعد كون حالته كانت تعبانة اكثر من اخته واصغر بالعمر واثناء سرحان رحاب في عالمها ومستقبلها المجهول حيث كان تفكر انه تقبل بعرض ابوها بان تكمل دراستها بدار المعلمات بس المشكلة هي ماتحب التدريس وتحس نفسها ماعدها جراءة توكف طدام الصف وتكعد تشرح والكل يباوع عليها ... اكيد ماراح ترتاح بيه
واثناء ذلك مرت عليها لحظات سرحت في عالم اخر جديد عالم ماداخلته من قبل .. رجل بعنفوان شبابه جان مركز عليها و صافن على حركاتها حتى نسى هو ليش جاي هنا ومن اقترب منها كللها انه هو الطبيب المتابع لاختها ميلاد ...
عرف عن نفسه انه الدكتور وسام ونست رحاب تعرف عن نفسه ضاعت بسرعة وحتى مكدرت تركز وتنتبه هو شيكول الى ان جتي المنقذه امها ...
لمحتها رحاب من بعيد وهي شايله سعد وعبايتها تتطاير وراها خطواتها السريعة والعريضة والنظرة المؤلمة تحتويها ...
الى وصلت يمهم ابتسم دكتور وسام وبلع ريكه .. باعت عليه فخرية ها دكتور خيرك! شبيها ميلاد ؟ واشرت لرحاب براسها ان هذا منو ؟
فجاوبتها رحاب بتردد وهي تدفع خصل الشعر المرتخيه عن وجهها
ماما هذا الطبيب الي حيفحص ميلاد
كمز وسام من يمه لا العفو مو اني
اني
اني قصدت انه زميلي هو الطبيب المختص اللي حيتابع حالة الصغيرة
فتحت عينها رحاب باتساع مستغربة من كلامه
وظلت فخرية صافنة مافتهمت السالفة فحتى يعالج الموقف
طلب منهم ان يتبعوه ..
وظل يمشي بين الردهات يسال عن صديقه الدكتورهاني وفخرية تباوع على رحاب وتسالها بالنظرات ان هذا منو؟
وهي تجاوبها بصمت ماتعرف مجرد هزت راسها
الى ان لكى صديقه واخذ ميلاد من رحاب ونومها على السدية وبعد ان سلم عليه وصاه بالطفلة واندار عليهم
لاتقلقين خالة ابد ان شاء الله يومين وترجع زينه
وظل عين على فخرية وعين على رحاب اللي التهوا ويه ميلاد الى ان خلص الفحص وكتبلهم العلاج
لكى وسام بذكائه الطريقة الي يكدر يشوف بيها رحاب مرة ثانية فتجرا وبدا يحجي ويه فخرية عن اسنانها
خاله ولو اعذريني بس لاحظت عندج سنونج الامامية او الي صفح شويه مخلوعات
شنو رايج انه نسويها الج ونركبلج سنون اصطناعيه
عندي زميلتي طبيبة ممتازة هي تشتغل على قوالب الاسنان يعني طخم مثل مايكولون ها وبالمناسبة على الدولة يعني مادفعين الا شي رمزي وهي جانت تدور على مثل حالتج
والاخت هم هنا اسنانها يرادلها معاينة واني ماعندي مانع اهتم بيها شخصيا
دارت وجهها رحاب والدهشة عليها
حضرتك
حضرتك طبيب اسنان سالت بخجل وبفضول
اي هههه اي نعم بس انت ماسمعتيني زين
اني كتلج صديقي يهتم بحالة اختج هههه
فخرية من يمها كلش رحبت بفكرة قالب الاسنان وظلت تحجيله الطريق كله وهو يوصلهم للباب شكد تعاني من تحجي وماتكدر تضحك
حتى انحرمت من الابتسامة وهماتين الاكل الصلب كله تاكله على جهة وحدة عدا انه ماتحب تباوع بالمراية من وراهن وغيرها وغيرها وهو بين مايجاوبها بين ما يسرق النظرات ال رحاب الى غركت بخجلها وصارت رجليها تلف وحدة على اللخ من تمشي وخدودها احمرت وطبعا فخرية انتبهت على هذا الشي فجانت ادغها كل شويه
الى ان صعدن الامانة التهت رحاب بسعد اللي ظل الطريق كله يتنحس وماصدكت شويه هدا
رجعت الى عالمها وصفنتها راسا بدت تسترجع كل تفاصيل اللقاء كانه جانت خايفه تنساه وكرصة خفيفة من امها رجعتها الى واقعها
لج شبيج من عمه اي والله شبيج هيجي كعتي كدام الولد
من ثول اي والله خزيتينا مشايفى اوادم
لج عيب هالحركات
-ماما والله ماسويت شي
اصلا ولا حتى حجيت وياه
-اوووف جني ماشفتج دكات كلبج لهنا وصلن
اكلج منين تعرفيه ولج
-عزة يوم والله مااعرفه ولابحياتي شايفته
هاي اول مرة بس تردين الصدك
-اي ولج احجي
هو جذب عليه بالاول كال اني الطبيب المختص بحالة ميلاد وبعدين طلع طبيب اسنان هههه
-يااا
واني حسيت بيه كاعد يجذب
هسه هو طلع شنو بالاخير
-يمه شبيج مو كلج طبيب اسنان وكال انروحله باجر حتى يسوي سنوننه
-لا لاتجذبين انت هم عليه
كلي وكت مايصيرلكم مجال تجونا وشلون اطلع واعوف الصغار مرضى!
ضاجت رحاب شويه انه مراح تلتقي بيه ثاني يوم
بس ميخالف مو باجر وراها بكم يوم
من رجعوا للبيت جانت زهوري جاية لبيتهم وسامي جايب اسمهان وجاي
زهوري هم بتها الصغيرة اماني مريضة انوب اتخبلت من عرفت جهال فخرية بيهم الحصبة ظلت ضامة بتها يمها وحابستها ماتلعب وياهم
اسمهان من هي وصغيرة تحب تجي لبيت خالها كاطع وكامت تجي اكثر من كبرت بعد..
هي البنية الوحيدة لامها نورية وكلهم ولد بس يصخرون بيها وتكضي الوكت كله بس تشتغل جوة ايديهم
وهنا بيت كاطع دائما لمة البنات .. وخطار على طول يمهم وضحك ولعب وشقى
بس المشكلة جانت بميلاد تغار منها وعلى طول يتعاركن
بس هم ميخالف على الاقل خالو كاطع كا جمعة ياخذهم للحديقة همه الصغار علمود سعودي حتى يلعبون وهي تكيف عليها
والاكثر هم جانت متعلقة برحاب ... تغسللها وتبدللها ومن جانت
رحاب وهي تمشط شعرها لفت سمعها امها من تحجي عن الدكتور وسام
لج عيني شلون شاب حليوة مشايفين مثله من زمان ههه وكلي اسويلج طخم للاسنان اللي واكعة البسهم دائما مو رحاب كال دائمية لو بس من نطلع شو مااتذكر
لا يمه مجاب طاري دائمية لو لا
اي زهورة والله انشلع كلبنا بالجهال لما هذا مااعرف منين طلعنا خلصنا من الهوسة والحر والازدحام
وهاي العوبة ماعت بمكانه تكولين جاي يخطبها
ضحكت زهورة على رحاب وباوعت عليها شافتها خجلانه
ليش لا رحوبه تستاهل احسن واحد
ردت فخرية لا عيني لا
زواج شنو لا يمه عيب من بيت ام غازي المرة ابد ماقصرت ويانه ولساها بحزنها
خلي تطلع السنة مالت الولد الله يرحمه يله عود ساعتها الله كريم بس هسه لايمه ابد ولا افكر شيكولون علينا الناس ماطالعة السنة مالت رجلها وعرست ؟
ثم هي صغيرة وتلحك على هم الزواج والخلفة وهم الرجال !!!
وشجابنا على هذا الدكتور يمه
الله اللي يعلم اهله منو وابوه منين مبين من بيت ناس واصله اي والله داده زهورة هيجي ناس تصير من عوائل جبيرة احنى مو بكدهم
انت ماشفتيه هيجي مرتب ونظيف يلمع لمع
ضحكت زهورة يا ليش شبيها رحوبه دباعيها والله جنها ممثلة فرنسية
ههههه ولو هي هوايه سمرة هههه
سكتت رحاب وماحجت بس ابتسمت ويه نفسها اتخيلت للحظات انه تتزوج هيجي شخص وبسرعة طردت هذه الافكار من راسها
من جهة لخ
سامي كان يتحجج بمناسبة وبدونها حتى يجي لبيت خاله على الرغم انه الكل تعرف بيه انه معجب برحاب الا رحاب نفسها
وهالمرة من اجى كانت اكو غصة بكلبه ... قبل مايجي بساعات فاتح امه بالموضوع انه تخطبله رحاب بس حجي يعني تحجزها اله .. لانه خلصت العدة مالتها من قبل فترة ... صح السنة ماطالعة بس حتى خاله كاطع لاينطي حجايه لغير واحد
لكن وقبل ماتبدي الام اي نقاش بالموضوع انتفض ابوه ضده وظل يصيح ويعيط عليه
كله من الاخير من سابع المستحيلات ازوجك مرة واحد مجرم انت مخبل
شيكولون عليه مافكرت بابوك وبمركزه تاخذلك ارمله وزوجها ميت بالسجن !!! هم ياريت ارملة شهيد جان افتخرنا بيك
لو تموت كدامي ها دااكلك انت مو ابني الجبير لو تموت كدامي
ماازوجك اياه انسى الموضوع واللي يحجي بيه بالبيت بعد عقابه ويايه....
الكل اتفاجا من ردة فعل زهير الغريبة
زهير الي اخذ موقف من بيت كاطع ومن صديقه المقرب علاء من اخر مرة كانو سوى بالفاتحة
حتى نوريه اللي جانت على طول توكف وياه انقهرت كلش من حجي زوجها الي اتجاوز بيه على اهلها عيرهم برحاب وبدرية وعلاء عائلة كلها خونه
عائلة تنزل الراس
انقهر سامي كلش وصعد لغرفته ودمعته بعينه
صحيح هو عمره سبطعش سنه هسه بس جان طويل وضخم ومشورب وياهو اللي يشوفه ينطيه اكبر من عمره بسنوات
حتى اهله جانوا يتباهون كدام العالم انه صار رجال من وكت وشال مسؤوليه البيت
وصار ابوه يعتمد عليه بكلشي ... ويسافر لغير محافظات وهو مطمان ان عايف زلمه بالبيت ماينخاف عليهم
ومن همه صغار وبسبب مرض امهم اللي تشتكي من ظهرها اتعلم هو واخوه نزار وعمه اللي عايش وياهم من صغره ان يسوون كل شغل البيت
فجان قريب على امه وكلشي يحجيلها وهي اكثر وحده حست بالمه وجرحه
فصعدتله فوك وظبت تواسي وتكله ابوك عنده حق وهيجي شي
طبعا ماكسرت بحجاية زوجها
واخذت من اخته اسمهان حجة كلتله روح وديها لبيت خالك وماعليك بابوك مايحجي شي اني اقنعه ابقى هناك
بس لاتبات عيب ارجع ويه المغربية
هو هم ماصدك ركض اخذ اخته وراح
جان يكعد بالصالة من يروح لبيت خاله مايتحرك لو يباوع تلفزيون لو يقرا كتاب جايبه لرحاب
كلش كافية عليه من جان يسمع خطواتها من تمشي هي من غرفة لغرفة
يحس بنفسها موجود قريبه عليه
يسمع صوتها من تجاوب ها ماما
ثاني يوم زهوري من رجعت من الدكتور نومت بتها وصاحت البنات يلفن وياها جدر دولمة كلش جبير
ومن صار وكت الغدا
فرشن البنات السفرة بالكاع وحضرن الكلاصات وجدرية اللبن ومصفي الخضرة
ريحة الكاشي المغسول والبنكة تفتر على سرعتها وصوت الكطكطة بيها وضحكات الجهال يتشافون بيناتهم جانت من اللحطات والذكريات اللي ماتنسي
كلبت زهورة الجدريه بالصينية وظلت تفرد بيها حى تبرد التموا كلهم داير مدايرها وكاموا يتعاركون على الخبرز بجعب الصينية
وصدفت سامي اللي جاي من الصبح حتى يرجع اخته للبيت
صارت كعدته بصف رحاب اللي كنبصت ولفت دشداستها جوة رجلها وكعدت
ومن بدت تاكل .. باعت عليه وكلته كلش طيب البصل اكل منه
هو ساعتها فقد حتى مجاوبها بس هز براسه وماكدر حتى يباوع عليها
وحتى اللكمة مكامت تنبلع
انوب ايدها طخت بيه من جابت الخضرة من المصفي بصفة ... صعدت حرارته وكتم نفسه .. وظل يتلون بكل الوان الصيف وحس انه انعزل عن البقيه اللي
جانوا يضحكون على اسمهان من صارتلها شوارب من اللبن ...
زهوري صاحت والله شمانسوي دولمة ماتطلع طيبة مثل مالت بدرية لج عيني صدك دولمتها دولمة
جاوبتها فخرية وهي تضحك وراسا غطت حلكها
هههه لاعيوني عاشت ايدج عليها والله طيبه انه اموت على الباكلا بيها
وردت عهود على امها لا والله اني احب اكركرط الضلوع لو مكثرة منهن عمه
الكل شارك بالحديث حتى ام كاطع ظلت تسال على بدرية شو ماتبين
فسكتت فخرية كالتلها عمه والله اخر مرة من اجتيني
الله يسلمه كاطع مابقى حجايه مكالها
سمم بدنها سوده عليه طلعت تبجي
عهود دردمت ويه نفسها هو اكو واحد ماسمم بدنه كاطع
كفختها بيبيتها على راسها انه مااتحجي على ابوها هيجي عيب وخزرتلها امها
بس هي عادي ولايمها
وهناك سالت زهورة فخرية
ماطلعين فرد ماعون لكاطع هو على جية هسه يجيج يعربدج جوعان
اخاف الجهال يفلشوها
فجاوبتها هو مايكل دولمه ماتعرفينه سويتله جدريه باميه وتمن
يا لساته مايحب الدولمة واتذكر مايحب الكبه هم
اي عفية اذا سوينا هن لازم نطبخله تشريب لو تمن ومركة
فحجت امه وكالت هم الزلم هيجي مايشبعون اذا مو ثريده لو تمن ومرك
كلها التهت تحجي وموضوع يجر موضوع
الا سامي عينه وكلبه جان على النفس اللي بصفه
على حركة ايدها وضحكتها وعلى نظرتها من ابتسمت اله من طخت ايده
عاد هنا انتبهت زهوري عليه خانس ماحجى ولا كلمة
فكلتله حبوب سامي ورة الغدا اخذ بايسكلك واركض جيبلنا ركية فرد ركيه هيجي حمرة وجبيرة وخلي ينطيكياها على السجين
اليوم كلش حارة وهسه سودة عليه كاطع مابيه يشيلنا وحده ويجيبها انوب اني جت بطرك اماني عفت الولد على بيبتهم جان دزيناه وياك
رفع راسه وابتسم الها وكللها صار خالة تامرين
مايامر عليك ظالم فدوة للرجال الي هيجي طك بسرعة ذاك اليوم طهرناك ههههه
عاد هنا كلهم ضحكوا هو شويه ضاج انحرج
عاف الغدا بحجة شبع وركب بايسكله وطار بيه للسوك
فخرية جانت كلش تحبه لانه مؤدب وعينه بالكاع وكلش خدوم يركض على اي شغلة بسيطة
ومن ذاك اليوم اتفقت وياه ياخذ رحاب لطبيب الاسنان بالايام اللي ماتكدر تعوف البيت وتروح حتى يصلح سنونها عدها سن صاعد على سن بالفك السفلي
وهذا جان احلى خبر سمعه سامي بذاك اليوم
وبالفعل ورة شي اسبوع او اكثر قررت فخرية بذاك اليوم تاخذ رحاب وتروح لطبيب الاسنان
حتى بلكت تسوي اسنان اصطناعية وتخلص
جان الجو صيف وحارة لبست رحاب تنورتها النيليه نفسها ونفس الجنطة والحذاء الاسود وقميص ازرق وبيه شريط ليموني على الركبه
ولفت شعرها رولات وخلت طاك
اول ماطلعت عينها وكعت على طير صغير وناعم لونه برتقالي على احمر ...
جان يكمز من الكاع للشجرة ومن الرصيف على الدجه
ابتسمت اله وحسته فال خيير عليها
ومشن مسافة يله صعدن الامانه جانن حافظات وكتها شوكت يمر بالقطعة مالتهم
ومن صعدن
الامانة جانت كلش حارة وهمه كعدوا عود ليفوك حتى شويه يجي هوا بارد بس ماكو فايدة الرطوبة والحر كلش قوي وظلت تعرك ولزك شعرها على ركبتها وحتفها
حتى التسريحة خربت
وقبل ماتوصل اللف كله راح ماتعرف تخلي سبريه يوكف الشعر ولانه شعرها كلش سرح همين
ظلت امها تحجي عليها وترزلها على كلشي بسرعة تضوجين ...هي جان عاجبها هيجي يشوفها مرتبة وريحتها طيبة شوفي هي شلون وصلت ...
حتى خط الكخل الخفيف ساح...
من وصلوا دوروا على دكتور وسام كلولهم هوبالقسم الثاني من المستشفى يعني بغير بناية اصلا وشويه هم بعيدة ...
وظلوا يسالون عنه الى ان لكوه هو من شافهم ماصدك ركض عليهم والفرحة غمرته ...
راسا رحب بيهم و اخذهم للطابق الثاني جانت قاعة جبيرة وخالين بيها الكراسي الخاصة بعمل اطباء الاسناء ومرضاهم
اول مرة اخذ فخرية لدكتورة جانت تشتغل على اسنان طفل بعدها ممخلصة .. وكللها ست عروبة هذه كرايبنا اللي حجيتلج عليها
انت مو ردت مريض اسنانه الامامية واكعة وعدها هم اثنين خلفيات انتبهت عليهم
بعد انت شوفيها وماوصيج ديري بالج عليها ...
ضحكت ست عروبه وايدها بحلك الطفل وكالت بنبرة نوعية صار دكتور وسام مو تدلل !
فخرية فرحت من كال الدكتور هذولة كرايبي شو عجبتها السالفة
فهي ردت عليه قبل الدكتورة فدوة لعينك الله يخليك لشبابك يمه
اما هو
فراسا ركض على رحاب وكلبه يدك على السريع
وبخطوة سريعة وخاطفة حضر الكرسي الخاص بيه الي يعالج مرضاه وجان على بعد تلاث كراسي من كرسي زميلته
وفخرية تعاين عليهم
طبطب على الكرسي كلها اتفضلي ست
كعدت رحاب على الكرسي
وهو اندار بحجة يعقم الغراض ويحضرهم بينما هو عينه على امها
رحاب جانت متوترة وخايفة ومرتبكه
حتى حركتها جانت متقيدة وهو حس بهذا الشي
فباوع عليها وابتسم ابتسامة خفيفة كلها بصوت ناصي
اهداي مراح تتاذين والله ...شوفي شلون حداريج
ورفع راسه شاف فخريه رافعه حواجبها ومركزة حيل وياهم تريد تسمع شيكولون...وبشنو هو ديهمسلها...