الصدفة احيانا تلعب دور كبير في حياة الانسان هذا ماكنا نقراه ونتعلمه لكن في القانون الالهي لايوجد شي اسمه صدفة كل شي يمر ويسير وفق مسار ومناهج وقانون لايمكن ان يخطئ
اتقدم سامي خطوات سريعة نحو اخته وهو يحاول ان يعرف شخصية الشاب اللي واكف معاها واستجمع ذاكرته بسرعة
وراسا اتقدم نحوها ولزمها من ايدها على كيف
-شعندج اتاخرتي؟
--عزة سامي ؟
-سامي؟ شلونك اخويه شلون صحتك
---الحمد لله عبد الكريم مو؟
-- اي نعم !
--ممكن اعرف شعندك ويه اختي واندار بعينه داير مداير الساحة وهو يسمع نفس اخته المتسارع وسط هدوء المكان وخلوه من الطلاب
يعني شنو معناها واكفين وحدكم ومحد ماكو بالساحة؟
---لا والله اخويه اني اسف كلش مو قصدي يس بالصدفة شفت الاخت اسمهان فكتلها اذا تحاج اي شي اني موجود!
اني سنة رابعة واخر سنه اليه فحبيت اقدم مساعدة بحكم معرفتنا فقط لاغير واعتذر مرة اخرى منك ومن اخت اسمهان اذا سببتلكم اي احراج
وانسحب ببطء بينما عيون سامي كانت اتركزت على اسمهان الي ماعت من خوفها وغاصت جوة الكاع
بس سامي يعرف اخته جبانه ويمكن كلام عبد الكريم صحيح
فسالها وهو يمشي وهي تمي وراه
-- شعندج وياه ومنين عرف انت اختي!
--ماعندي شي والله عزة قابل شعندي
--- منين يعرفج
-- يكول شافني بالعزة مال بيبي الله يرحمها
بيبي ام زهير
هو جان
جان واتبعلمت وهي تعبر الشارع ورة اخوها اللي بدى ياشر للتكسي
-وهو جان جاي ويه ابو ابو غازي تتذكره مو اكيد تعرفه
-- اي اتذكرت كافي عاد انلصمي
صعدت اسما بالتكسي وكلبها يدك من الخوف وظلت الطريق كله دموعها تنزل بسكوت
الشوارع كلها مطر والتكسي يحاول يخلص من زحمة الباصات والخطوط مالت الطلبة وهوسة الطلاب اللي تعبر على الشارع
عيون سامي كانت تتبع الحلوات منهن
بينما عيون اسمهان كانت تبحث عن شخص اخر
مرت الدقايق للوصول للبيت كانه ساعات
على الرغم من الجو الحلو والغريب انه جانت مطر والشمس طالعة والهوا البارد يلفح الوجه
هداءت اسمهان شويه
اول مادخلت ركضت لغرفتها ومن هالحركة عرفت نوريه بتها مسويه شي
بس سامي جان طبيعي نوعا ما ماحجى ويه اخته شي
حط قوري الجاي على الطباخ وكعد بالصالة شال التلفون وخلاه بحضنه وبدى يفرفر بالقرص مالته
راحت نورية على بتها واتفاجاءت من شافت اسما دتبجي
---شبيج شصاير
شو انت تبجين وسامي مدلغم
شكو؟
---ماكو شي ماما والله ماكو شي
--- احجي ولج لعد شكو تبجين
كعدت بصف بته وجرت راسها لحضنها وكلتلها احجيلي يمه شكو ليش هيجي تشهكين
---ماما اليوم
من اجى
سامي للكلية
--اي ادري اني دزيته ابوج قبل شويه رجع جا متاجر
---شافني ويه طالب ويانه
--عزة
وشعندج واكفه وياه مو نبه عليج من هالسوالف
يمه والله
وقاطع كلامهم زهير يصيح على نورية للمرة الثالثة ان تجي تصب الغدا
-يله كومي اتغدي وامسحي دموعج كانه ماكو شي
يله كومي
من كعدوا على الغدا صبته نورية على ميز الطعام مجانت تكدر تكعد بالكاع يفرشون وياكلون مثل قبل علمود ظهرها
جانت مسويه مركة بتيتة وتمن
وسامي مايحب هذا الاكل فكللها هم اليوم مغثة وهم مركة بتيتة
-هسه المغثة افتهمناها طول عمرك شايل خشمك ومغثوث من الهوا الي يضرب صلعتك مركة البتيتة شبيها ساله ابوه وهو متضايق من تصرفات ابنه
---اممم ...
اندار على بته وهي كوة تاكل كانه بلا نفس وكللها كون انت هم معاجبتج مركة البتيتة !!
--- لايابه عاجبها بس يرادلها جرة اذن جاوبه سامي وعيونه اتمركزت على امه
-- خير ليش شصايرشنو هالحجي
-- شفت الافندية واكفة ويه عبد الكريم ابن ابو غازي وحدهم بالساحة
---يا ابو غازي صديق خالك ؟
--- اي يابه
--- وشجابج عليج بابا؟ وين يعرفج وين شافج ؟
--- والله بابا ماكو شي هو يكول شايفني بالفاتحة مالت بيبي الله يرحمه وقبلها جاي للجادر مال اسم اسم الله نزار الله يرجعه بسلامة وهو طالب ويانه بالكلية مرحلة رابعة اجى سلم عليه وكالي اذا تحتاجين شي اني موجود وبالخدمة
ونصت صوتها ودنكت راسها حيلل اصلا هو خاطب بابا يعني مجرد راد يساعد
باوع عليها سامي وحط ايده على خده وصفن مركز عليها كانه يكوللها اشو مدااصدكج!!
---جاوبها ابوها وهو يكمل اخر لقماته مابيها شي بابا اعرفه ابو غازي كلش خوش انسان ومحترم والعائلة سمعتها ذهب وعادي مانكلبت الدنيا من واحد يحجي ويه زميلته بالكليه وباوع بنظرة استغراب لابنه كانه يذكره باللي سواه ايام مجان هوهم بالكلية !!
لكن اسمهان مكالت كل الحقيقة
اسمهان اتعرفت على عبد الكريم بالمرحلة اللي فاتت وبالفعل مثل مكالت هو شافها بالفاتحة مالت بيبتها ومن شافها عرف هاي البنية شايفها بالكلية وحاجين هو واصدقائه عنها
عن جمالها ونزاكتها وعيونها الحلوة
ومن داومت اجى حجى وياها
بعدها صار تواصل مستمر
وبدى عبد الكريم بشخصيته الرزنه واسلوب الهادئ يدخل قلب اسما الطفولي البريئ
بداها عبد الكريم يتقرب من اسمهان شويه شويه اول شي عن طريق المحاضرات القديمة
وبعدين بالظهور فجاءة بكل بريك وطبعا كلها صدفة !!
وبدت امور الغيرة تطغى عليه بحجة انت من معارفي وتهميني وسمعتج من سمعتي واللي يغثج يغثني ومن هالسوالف
صار يلاحقها مثل ظلها
ويخاف عليها من اي شي يضاقيها
حتى ايهاب هو اللي منعها عنه وبعده عن طريقها
انه هذا مو من مستواج
وانت تستاهلين الاحسن منه
وبدوا يلتقون بعد المحاضرات
صارت اسما هي اللي ادور عليه اذا غاب وتستفقده
وهي الي تدور حجج حتى تلتقي بيه
العائق الوحيد اللي جان يخليها مترددة باستمرار علاقتها وياه
هو ذاك الخاتم البلاتيني باليمنى
خاطب!!
عبد الكريم كان شاب عشريني حنطاوي متوسط القامة وشعره اسود كمعظم الشباب العراقيين وكما معظمهم بذلك الوقت ايضا كان مربوع يميل الى النحافة
عيونه سود وواسعة غائرة تحيطها هالة داكنه خفيفة نتيجة السهر والتفكير والتعب
هو ايضا يشتغل ويه ابوه اضافة الى دراسته
كان ذو طبيعة انطوائيه حزينه يمكن لما مر بيه خلال ايام حياته فقد اخوه الكبير وهو صغير وتلاه وفاة والدته بعد معاناة طويله مع المرض وجوده وحده بالبيت لفترة مو قصيرة تنتهي بزواج والده الي خلاه ينعزل اكثر
لكن مع ذلك كان طالب محبوب من قبل زملاءه نوعا ما
وعلى الرغم من وجود هذه النظرة الحزينه الي تشعر المقابيل انه في داخله كم هائل من الحزن
كان عبد الكريم يعمل جاهدا على ان يفرغ كل عواطفه في شخصية اسمهان البريئة
كان يشعرها بالخوف عليها والحرص
كونه بمرحلة نهائية متقدمة عليها
كان يحاول دائما يذكرها انه هذه الامور هو مار بيها قبل والافضل تسمع كلامه وبالفعل تدريجيا صارت اسمهان تتبع حتى ظله
اهتمامه ولهفته وخوفه عليها خلاه يدخل قلب اسما بدون تردد
الكثير والكثير من المواقف اثبتتلها انه متعلق بيها
كان يصر على انه يجي يساعدها بفهم بعض المواد حتى بايام الاوف مالته
وبايام المطر يقوم هو باستنساخ المحاضرات ونقلها الها
ينتظرها برة المختبرات حتى يشوف شلون جاوبت !
ومايروح للبيت الا يطمن انه هي صعدت السيارة او الخط
ومرات كان يراقبها من بعيد لما يكون ابوها جاي عليها
معظم الطلاب انتبهوا عليهم
وبدوا صديقات اسما ينبهوها انه هذا الولد خاطب ومن سنين
ويلوموها علمود خطيبته وانه مالها حق بيه
هذا الشي كان ياذي اسما كلش
والغريب انه هي ماتكدر تبعده عنها
بالعكس صارت ترجع للبيت تبقى وحدها لفترات طويله ترجع تستعيد احداث اليوم وياه
هناك وكفلي وانتظرني
وبالنادي كعد مقابيلي
باوع عليه مرتين ومرة بابتسامة
وبنهاية الاسبوع تسترجع كل الاحداث حتى مرات كانت تحب تشارك بعغضها ويه صدديقاتها
تحسسهم انه هذا الشخص معجب بيه لا وحيموت عليه همين !!
لكن مع كل هذا كانت اسما ممرتاحة
لانه وبعد مرور كل هذه الفترة عبد الكريم مصرح بمشاعره الها
الا قبل بضعة ايام فقط
من طلبت منه بعد مايجي عليها للقاعات
ولاينتظرها صارت تنحرج من كلام الطلاب وخوصصا انه الكل يحجي عليها تمشي ويه شخص خاطب
ولحد ذاك اليوم بالذات اطرق عبد الكريم لخطيبته
وطلب منها يروحون يكعدون بالنادي حتى يحجيلها كلشي
واثنااء مديجيب شي يشربوه كلبت اسما بكتبه ومحاضراته
وانتبهت على اسمها خاطه عبد الكريم بخط كلش حلوو ومتقن
هي تعرف بيه انه خطاط
كان يهتم يتعلم هذا الفن ويتقنه وبالفعل كان مميز بيه
خط اسمهان كانه اوزة او لوحة فنيه بحد ذاتها
ابتسمت لكن بغصة بالقلب شيريد يكول يعني اعوف خطيبتي واجي عليج !!!
شيريد يكول اسما انه يحبج ومراح يعوفج !!
ظلت اسما اتدانش نفسها وعيونها تتكلب مع الصفحات
و اول مابدى الحديث بيناتهم كانت اسما محرجة حست انه الطلاب كلهم يراقبوها ويباعون عليها
ظلت خجلانه وتكلب بكتابه وعيونه تراقبها
هو اكيد حس وعرف لكن كان يستمتع بتلك اللحظات اللي تكون حبيبة قلبه كدامه كطفلة صغيرة تتهرب من امتحان ما
فسالها وهو يمسح شواربه من بقايا الشراب
عجبتج المخطوطات
--- تخبل هذه عبد الكريم كلش حلوة مجنت اعرف بيك هيجي فنان كانه لوحات مو بس خط
--- اي اني كلش احب الخط العربي واتفنن بيه هذه اللي بيدج بالخط الكوفي واسمج كان بخط الثلث
ابتسمت ودنكت
فهو كمل
--- اي تريدين بعد منتحاجى ولا اجي عليج مو ؟
يعني اعدامي بورقة رسميه
كالها وهو صافن على حلقته ويدور بيها
مجاوبت اسما لكن حاولت تهرب بعيونها الى ابعد نقطة ممكنة حاولت تبين لنفسها وللكل انه ماكو شي
وانه كلامه عادي جدا لكن الحقيقة كانت شي اخر
استطرق عبد الكريم لحياته من الطفوله وكيف شعر بفراغ كبير بعد وفاة والدته وبقائه وحده هو وابوه
كيف مرت الايام عليه وهو وحيد بالبيت ومحد يمه
خواته الكبار كلهم اتزوجوا وحتى وهو صغير
--- جنت صغير اسما واتوفت امي
امي اللي شفتها شلون اتعذبت ورة وفاة اخويه الجبير الله يرحمه مرات محد جان يمها بس اني
اسمع صوت بجيها وونينها
خواتي الكبار كلهم اتزوجوا
وكاعدات بالبصرة ووين ماوين جانت وحده بيهم تجي تبقى مدة وتروح
يمكن بس حنان من جانت تجي للعراق تبقى يمنا فترة طويله حنان اختي يمكن انت شايفتها !!
وبقية الايام جانت خالتي تجي يمنا
خالتي هم بيتهم بالزعفرنية يعني مو كلش قريبين علينا
جانوا يجون ينظفون البيت ويروحون
اتبهذلنا كلش
وابويه ماقبل يكسر بقلب امي ويتزوج عليها
رغم اتذكر شكد جنت اسمع كرايبنا يكولوله اتزوج انت رجال ومحتاج مرة بصفك
مايفكرون انه هذه المراءة المسكينة ايضا محتاجه رجل بصفها !!!
اتعلمت بذيج الفترة اعتمد على نفسي شويه شويه وخصوصا بعد وفاة والدتي الله يرحمها
اتعلمت اطبخ واغسل هدوم وانظف البيت
وحتى مرات اني اتسوك
بس تعرفين البيت يرادله مرة
تنطيه ذيج اللمسة النسائيه
كالها وصارت عينه بعيونها الناعسة اللي اتلمعت بدموع رقيقة وقفت على مقلتيها تتراوح بالنزول
سكت عبد الكريم
وكللها ضوجتج مو !! قصة حزينه ولا قصص الافلام الهندية هههه
---لا بالعكس كريم كمل الله عليك
---شكمل اسما شكمل
اتنهد وكال تعاسة ووحدة
بقينا اني وابويه محتاجين احد يدارينا ومنها الدراسه همين
جنت اريد اصير شي زين
يعني حبيت اصير مهندس والي اسمي انسان ناجح مثل مايكولون ردت اوصل جنت احس بنفسي اكدر
و الحمد لله جبت صيدلة وحبيتها كلش
جانت خالتي وبتها اللي هي اصغر مني بسنه
رفع راسه وكللها اسمها مها
حبابه وفقيرة حيل
وكلش شاغوله
جانت تجي تلمع البيت وترتبه وتروح هي وخالتي
واول مدخلت كلية ابويه خطبها اليه وهو راح اتزوج
ههههه
فحسيت غربة حتى بالبيت
جنت استحي حيل من مرة ابويه وهي مرة شابه صغيرة ارمله
فمجنت اطلع من غرفتي من ابويه مموجود
لانه هي جانت تاخذ راحتها باللبس
ومرات اطلع برة البيت الى ان يرجع ابويه من يجون اهلها يزوروها
يعني هيجي شي
سكتت اسما وكان سؤال على بالها من اول بدى الكلام
اتحبها لو لا ؟
لكن ماتجراءت تسال
فكمل هو
على اساس انه نتزوج ورة التخرج
مجنت اعرف اني حشوفج وحتغيرين كل حياتي
!!
--- شلون يعني
عبد الكريم اني مااريد اكون سبب بتعاسة غيري
خصوصا اذا
-اذا شنو اسما ؟
-اذا جنتو رايدين بعضكم يعني هيجي قصدي
---شوفي اسما اني كلش صريح وياج
وعمري من يوم ماعرفتج ماكذبت عليج
بالبداية اي
جنت فرحان انه اني بهالعمر انخطبت وحتزوج جنت اتوقع حتعوضني عن امي وخواتي
لكن!!!
اللي صار.....
انه هي تتصور انه اني ححبها اكثر من اشوفها شكد تتعب بالبيت وشكد تنظف وشلون تسويلي اطيب واحلى اكل
بس مااعرف حسيتها بقت هي مها نفسها الي جانت تجي قبل وتسوي هذا الشغل كله وتروح
ولا صار اي تقارب بيناتنه ولا اي نوع من المعاشر
احسها بوادي واني بوادي!!
--هي حلوة ؟
سالته اسما وراسا انتبهت على نفسها من هذا السؤال اللي فضح غيرتها من مها
جاوبها عبد الكريم وابتسامة كبيرة على وجهه ارتسمت كانه فرح بهذا السؤال كلش
---هي زينه حلوة اي مابيها شي بيضة كلش عيونها عسليه شويه صغار يعني اكيد مو مثل حلا عيونج
مو طويله شويه كصيرة ومتروسه صاحبة خدود عريضة
---يعني شنو انت تحب المتروسات
-هههه شبيج اسما !! لا مو القصد انه اني احب او لا
كتلج خطوبتنا جانت تحصيل حاصل
اتنهد تنهيدة طويله وعميقة وصفن على حافة باب الكافتريا والرجلين اللي تمر رايحة جاية
اصدقائي يكولولي شراح تسوي وشلون تحلها ؟
والله مااعرف شلون احلها اسما
يعني هم مو معقولة خاطب البنية اربع سنوات ومحضرين كلشي وبس اخلص امتحانات نتزوج على اساس يعني
واجي راسا اكللهم بتكم مااريدها
زحمة
اوووف حيل زحمة
وهمه الوجيدين اللي وكفوا ويانه
وباوع على اسما الي غاصت بكرسيها ولمعت عينها مرة لخ وهي تسمع باذنها اول شخص دخل كلبها يكللها هالكلام
وكمل وعيونه هو هم غوركت
---ولابيه اشوفج صرتي لواحد غيري
اسما تعرفين اني ليش ابد ماكتلج عن مشاعري
لان جنت خايف
ولحد هسه خايف
خايف لا مااكدر اكون كد الكلمة
خايف لاتشوفيني جبان ؟!!
كامت اسما اترخصت وعافته ودموعها تهل وتحاول تمسحها
هالمرة ساعدها المطر
ضاعت قطراته وانخبطت ويه الدموع ورسمت مجرى كحلي على الخدود
ابتعدت عنه ايام وهي تسترجع كل كلمة كالها
مايكدر يكلي احبج
يعني مايكدر يستمر ويايه ليش ابقى وياه
اوووف قلبي!!!
وبذاك اليوم اللي جانت واكفه بيه وياه وشافهم سامي
كان يحاول يحاجيها اكثر من مرة وهي جانت ترفض
خلاص مرادت تكون خيار ثاني بحياة اي احد حتى لو عبد الكريم نفسه
النفس اللي تتتنفسه
الظل الي تتبعه
العيون الي تبحث عنها !!
رجعت اسمهان للبيت وهي مضطربه حيل
لكن في داخلها قررت خلاص لازم تنهي حب اصلا مانولد
حب هي رسمته وههي خطت كلماته وهي لازم تنهيه !
اسما جانت تتمنى تلكي احد تحجي وياه
تتمنى لو ان امها صديقة الها بدون هذه العصبية والحساسية والخوف المفرط من كلشي
حتى صديقاتها كانت تحسهم مو صادقات نحوها
دائما ذاك الخيط الرفيع من الغيرة الموجود حتى من اقربهن الها
انعزلت وانطوت
وظلت تفكر رادت نصيحة ضوة شمعة يهديها بهذا الطريق او ربما حتى صفعة تصحيها من هذا الحلم او الخيال
واجى على بالها خالة بدرية
جانت تتمنى تروح تحجي وياها
تتذكر شلون جانت تعلم رحاب وعهود
وتتذكر من جانت تحجيلهم سوالفها بالكلية
بس شيوديها لخالة بدرية وشلون
-بله لو خالتي مثلها !
هسه اذا احجيلها كلشي تاخذه شقى وضحك ونصب هاي اذا مافضحتني همين...
الى ان صارت عطلة نص السنة حتى الكليات اللي عدها نظلم السمستر مو امتحانات نصف السنة كانوا ياخذون عطلة
وفكرت اسما تروح لبيت خالها عن طريق عمتها
وبدون ماتعرف امها لانه اكيد ماتقبل
بس شلون اذا طردتني عهود سالت نفسها اسما!!
وحجت ويه خالتها زهوري انه تريد تروح تشوف بيت خالها مشتاقتلهم حيل
وخايفة من عهود لاتطردها
خالتها هم دكتلها صدر وكتلها لاتخافين اني اخذج ولايهمج
جانت زهوري تكيف على هالسوالف حاولت اكثر من مرة ترجع الشمل
بس الفشل يكون حليفها
وطلبت منها ان تكون بدرية هناك حتى تستحي منها عهود ماتسوي شي
وبالفعل اتفقوا اخر خميس بشهر الواحد انه يروحون لبيت فخرية
فخرية هم جانت ناقلة كعدتها العصرونيه للصالة مو الحديقة هشكل بكل شتويه
حاطة صوبة ناشنال بالنص وعليها كتلي المي الحار وفوكاه القوري ومعجانة الاستكاين متنكعة بمي حار وقوطية حليب نيدو الجبيرة وكلاصين لميلاد وسعد يشربون جاي وحليب وصافنين على التلفزيون جان برنامج نسرين جورج سينما الاطفال فلم الحورية الصغيرة
اندكت الباب وركضت ميلاد فتحته
دخلت الهوسه سوى فرد دخلة جانت زهوري وبدرية وواخرهم جتي اسمهان تمشي ومستحية
من شافتها فخرية اتفاجاءت فدغتها زهوري
فخرية كلبها طيب وحنينة
جرتها من ايدها من شافتها خجلانة ومستحية وحضنتها وبوستها
عهود انسحبت على كيف لغرفتها حست بغصة من شافت اسما جاية لبيتهم
زين لعد اذا شافت عمتها لو نزار شحتسوي !!
لحكت خالتها بدرية ودخلت عليها للغرفة
---ماما عهود كومي سلمي عليهم عيب ماما اني اعرف انت ضايجة من اسما بس ميخالف ماما جانت صغيرة وصارلكم سنتين متتحاجون صفي قلبج ماما وانسي الدنيا ماتسوة
سكتت عهود وماحجت شي طلعت سلمت ومنها بدلت وراحت على السريع تجيب نمنميات العصرونة
بعد ما دوروا على سعد ومالكو قريب على البيت راحت عهود بنفسها
وضعية بيت فخرية مو مثل قبل الجهال كلما يكبرون مصاريفهم تزيد وهم ومايقنعون بسهولة وهي معتمدة على الجم فلس يطلع التكسي
والوارد مالت المحل ويه ابو غازي اللي يجيبه الهم علاء وهم مو مثل قبل يادوبك سد بسد
كعدن النسوان والتمن
وشويه اجى علاء وزوجته والجهال
ومجان ناقصهم غير رحاب
بدرية صاحت على ميلاد تخابر عليها بلكت رجلها يجيبها ويجي
وراحت دكت التلفون عليها
رحاب جانت كاعدة بغرفة النوم وبصف ابنها نايم ولازمة كتاب قصائد لنزار قباني تقره بيه جان نازل جديد
وقبل فترة ام منة جابتلهيا من بسطية كتب كبال المصرف الي تشتغل بيه
والتلفون ظل يدك وديك ومحد يشيله حماتهارقية فوك تسمعه بس ماعليها باي شي لاتنزل ولا تشيل تلفون مادخلها
دخل فاضل ضايج ومتضايق متشاكل ويه ولد خاله علمود المحل يوميه يريدون يفضون الشراكة
ومنا يصيح عليهم محد يرد والتلفون يدك ومحد يشيله
دخل على رحاب شافها متمدةة وغركانه بعالمها ويه الكتاب
من شافته فزت
كلتله فاضل شوكت جيت شو مسمعتك ؟
-طبعا شتسمعين صارلي ساعة اصيح والتلفون يدك محد يشيله مااعرف شدتسوين
---شدااسوي كاعده يم الولد ودااقرا
--- اي تقرين لهذا احسن ماتضيعين وقتج عليه اقري قران صليلج ركعتين
-- شبيك فاضل شو جاي عصبي واطلع قهرك بيه
هنا نزلت رقية من سمعت صياح اخوها
---لا على شنو اصير عصبي حضرتج مضيعة ةوقتج بهالتفاهات والنهار كله تصيحين ضايجة
---شبيك فاضل يعني اني بكيفي وكت مااريد اقرا قران وكت ماريد اقرا كتاب ممعقولة حتى بهاي تتددخل
--- اي ادخل
وحجاية منها وحجاية منه صار نقاش حاد هنا ادخلت رقية تحجي على رحاب تكللها
-- عيني شكو ضجتي بسرعة واتنرفزتي
رجلج الي يكلج عليج سويتي احمدي ربج واشكريه على هالنعمة بس ضايجة وكلشي معاجبج
--والله هلكد تعرفين ليش ماتسمعين كلام رجلج انت بالاول مجان جيتي زعلانه يوميه وبالشهر والشهرين عايفة بيتج
---ها تعيريني مو مو صوجج والله الله لاينطيها لامي لو تكعد بيتها جان كعدت معززة مكرمة بيت اهلي ولا اكعد يم اللي يسوى واللي مايسوى
صاح عليها فاضل شلون تدعين على امي ماتستحين انت وهذا بيتكم مو بكيف احد وغصبا ما على الكل
وكبت عركة جبيرة انتهت ان زعلت رحاب واخذت عباس وطلعت من البيت راحت لبيت اهلها
وهذه مو اول ولا اخر مرة تزعل بيها رحاب وتروح لبيت اهلها
وخصوصا من جتي رقية يمهم وهي كل شهر زعلانة مرة مرتين
بس هالمرة اصلا ماكلف نفسه يوكفها لو يكللها لاطلعين
حتى هي هم جانت كلش مقهورة
علاقتهم اتازمت حيل الفترة الاخيرة
دخلت رحابلبيت اهلها ودموعها بعينها
بالبداية استقبلوها واستهلوا بيها فرحانين انه لمتهم كملت ومع انه حاولت تخفي دموعها لكن الكل عرف انه جاية زعلانه من جنطة هدومها
محد حجى وياها بالموضوع حتى لاتتكلب عليها المواجع بس فخرية انقهرت حيل على بتها ودومها تردد ويه نفسها رضينا بالهم والهم مارضى بينه
هم عليها هم على عهود
كعدت بالبداية ويه خالتها وحدهم بالغرفة
بدريه لحت عليها تعرف شبيها
بينما جانت الهوسه كلها برة ويحضرون للعشى وسوالف علاء وزهوري
انتظرتها خالتها تكمل بجي
وهي تباوع عليها كلمة ماحجت وياها
الا ان بدت هي من كيفها تحجيلها
-خالة مااعرف شبيه اتغير كلش تجاهي
مشاعره جفت
وحنيته مو مثل قبل
جان مايتحمل يبعد عني يوم
يبجي قبلي من يجرحني بكلمة
هسه صرت لا ولاشي ولاكانه اني رحاب حبيبته
وين راح الحب الاسطوري!!
طلع كله جذب بجذب بس بالبدايه
-- لا مو هيجي امي
بدت بدريه تحجيلها وتفهمها انه الحياة الزوجية مو مثل القصص والروايات اثنين يحبو بعضهم وعاشو عيشة سعيدة
هذه حياة واقع لازم الانسان يتعلم عليه
وكل شخص يمر بظروف معينة يخليه يتغير بين فترة وفترة احنى مو ملائكة بشر نخطا ونقسى ونجرح وننسى
بس مو معناها ينتهي كلشي
وبدت تحجي عليها انه لازم تغير هي من طبعها لازم تطلع من الهالة الي هي معيشة نفسها بيها انه هي اميرة بعرش سلطان فاضل
ومو كلشي لازم مثل ماتحب ووكت ماتحب
البيت والزوج والاطفال يرادلهم مسؤليه وتضحية
واللي مو كدها اكيد يفشل
طبعا كلمات بدرية ماثرت هوايه على رحاب اللي كانت جدا متضايقة من فاضل واخته
وحاولت خالتها تعلمها اسلوب المسايسة بالتعامل والصبر والمجاملة وانه من اجل عين الف عين تكرم
لازم تتحمل رقية لخاطر فاضل حتى المركب تمشي
واول ماطلعت رحاب من الغرفة ورة ابنها عبوسي
زركت اسما على بدرية وسدت الباب
جانت ترجف خايفة وخجلانه
بس حست نفسها غركانه وتريد اي شي ينجيها
استغربت بدرية فعل اسما وعرفت اكو شي
فبدت تحجي وتمتمت الى ان هداتها
وبطبيعة بدرية اللماحة عرفت راسا الموضوع
بس من سمعت القصة وعرفت الشخص اللي تحبه اسما يصير اخو غازي
استعجبت واستغربت وحتى كامت تضحك
كالت شوفي الدنيا شلون صغيرة من بين كل هالناس وهالشباب المتروسه الكليات والجامعات الا تحبين اخو غازي الله يرحمه والله عجبة
--- والله خالة هو اجى عليه هو اللي علقني بيه
--- حبيبتي مختصرها مايفيدج عوفيه وانسيه نهائيا لو تموتين اهلج ماينطوج
عزة وسامي انوبه شتكوليله هههه
وفوكاها خاطب وحتى كلمة احبج مكايلها
ماماتي هذا يجذب عليج
---لا خالة لا والله مايجذب انت ماتعرفين شلون يخاف عليه شلون
ورجعت تعيد الكلمات والوصف ونظرات الحب ووقفاته وياها
الا ان لزمتها بدرية من ايدها
وكلتلها كلهم هيجي لا زم يسوون هيجي هذا دور كل الشباب تحب تعيشه
انه يخاف عليج ويموت عليج ويبجي من تزاعلون
ويلحكج ويراقبج ويتخبل اذا شاف احد سوا وياج والليل كله مينام يفكر بيج
ويصير ثور مجنح من الغيرة اذا شافج ويه واحد
لا وهنوبه يسمي بنته عليج وتالي متالي يكلج والله اهلي خطبولي بت خالتي وبت عمي وبت مااعرف منو
ظروفي ماتسمح
ماعندي امكانيه وووو من هالسوالف كومة وكومة اعذار كلها اعددها الج اذا تحبين
امي
كلهم كذابين ومو رياجيل
الرجال رجاب من يوكف ضد كله ظروف ويتزوج حبيبته مو بس حجي
الرجال رجال من ينصر حبيبته كدام الناس ومايخجلها ولايننزل راسها
الرجال مو يبجي وعيونه تغورك وهو يودعها
لا الرجال من يمسح دموع حبيبته كدم اهلها
ظلت اسما فاتحة حلكها ودموعها تجري
وكملت بدرية كلتلها كلشي اعرف شيحجون وشيسوون وشلون يتصرفون كلهم نفس الشي ونفس التصرفات
لاتصدكين ابد الا من يجي يدك بابج
واذا يعيروج انت كاتله روحج على الزواج
كولي اي لانه شريفة
بس الشريفة تريد زواج اما الموشريفة ترضى باللعب !!
كومي غسلي وجهج وانسي
انسي وانتبهي لدراستج ولاتكولين صعبة ابد لا موصعبة انت قويه وشاطرة واحلى بنيه بالعشيرة
لاتخلين احد يلعب بعقلج ويضحك عليج تستاهلين احسن واحد
عافتها وطلعت وكانما تركتلها قشة تتعلق بيها وسط بحر هائج
لكن كلامها دخل قلب اسما وافتهمته اكيد...
باتوا ليلتهم كلهم الا زهوري
شكد لحوا عليها ماقبلت ضحكت كالت حتى الصبح طالب يكعد بالباب شاك هدومه هعههه
بعد فترة تقريب شي اربع او خمس ايام اجى فاضل يعتذر من فخرية الي طلبت من بتها ترجع لبيتها وزوجها موحلو تعوف البيت وتطلع
وكون رقية اخته راحت لبيت اهلها
وحتى ينلم الموضوع ولاتكبر الزعلة
رحاب مكانت من النوع المشاكس بالعكس كانت جدا مطيعة لكن هذا لايعني ان يلغي الانسان شخصيته وطباعة وميوله والاشياء اللي يحبها
بس كلشي يجي باللين والتساهل والسياسة خصوصا بين الزوجين
بشهر شباط كان عيد ميلاد رحاب
وفاضل حب يسوي مفاجئة لزوجته يحاول يصلح من الامور بيناتهم
رجع من وكت بذاك اليوم
مع انه تعمد ميباركلها من الصبح
هي ضاجت وضنت انه ناسي عيد ميلادها
فاتفاجاءت من شافته جاي وجايب وياه كيكة
جانت توها طالعة من الحمام
فسال عن عبوسي كلتله يم ام محمود اجوي اخذوه يلعب وياهم واني طبيت على السريع اخذ دوش
كيف وكللها بعد احسن خلي ناخذ راحتنا
كامت تضحك وكلتله انت كل سنة تتوكح اكثر عكس العالم هههه
بس ماقبلت يحتفلون بالكيكة الا من راحت جابت عبوسي
كان احتفال اقتصر على العائلة
واخر شي الهدية كانت عطر
فتحته وشمته
وراسا داخت وغمضت عيونها وبدت تتبلعم
حست كانه يد من الماضي جرتها حيل وبكل قوة لذيج الايام
هي نفسها نفس العطر اللي جانت تحط منه وتروح تقابل وسام
كعدت على الجرباية وابتسمت لفاضل
اقتربت منه بوسته وشكرته
بس هو حس اكو شي
كللها شبيج ؟
-- ماكو شي لايظل بالك
انتبهت على الشيشة هي نفسها نفس الشكل لكن الي جانت عدها ممسوحة من عليها الكتابة
باعت عليه وهو ينتظر تعليقها
جاوبت وعيونها دمعت وكوة شقت ابتسامة على وجهها
اقسى حرب واصعب لحظة ان تبتسم وفي داخلك كل الاحشاء تتمزق
كلش احب هذه الريحة فاضل عاشت ايدك
--- والله رحوبه مو اني اختاريتها وصيت صديقي يشتغل بالسوق الحرة كتله اريد اطيب واغلى نوع عطور عدكم جابلي هذه
يمكن شانيل اسمها مو ؟
--- اي شانيل