رجعت للدار جلست واحد شهرين غير دار ونعاس قلييل فاش كانخرج، تعرفت على جوج بنات كيسكنو حدانا بنات بني ملال مي كيقراو هنا كاريين واحد الشقة وليت ديما كانمشي عندهم الصراحة فوجو عليا، تال واحد النهار جات واحد صاحبتهم من سعودية ضريفا بزاااف عاملاتني بحا ختها الصراحة تصدمت فالبنت كتقوليا نخرجو وتخلص عليا كتشري لحوايج و كاتعطيني انا قلت يمكن حساتني بحال ختها كانت اتصافر وقاتليا تمشي معايا لشمال انا قلت ليها راه ماعنديش لفلوس هي خليني وهي تحلف قاتليا مابيناتناش لفلوس سيري جمعي حوايجك ورجعي
انا بديت كنقول ياكما كاتعرفني من شحال هادي ياكما هدي ختي ههه بداو كيطيحو ليا افكار ديال الافلام ههه
اه نسيت انا من النوع لي كنعرف بزااااف ديال لبنات ولاكن ماعنديش صاحبي و الصراحة ما عنديش معا لبنات،
يعني هاد لبنات كلهم بيناتنا غير سلام ختي كيدايرا لاباس حمدالله بسلامة.
المهم جمعت حوايجي او دزت عندها شدينا طاكسي صغير دانا لمحطة ديال تران قطعات تيكي الى طنجة الصراحة دوزنا اسبوع كيحمق،
تال اخر نهار فاقت بكري مشات لشي بلاصة ملي رجعات جابت معاها واحد صاك بحال ديال سبور nike✔
فيقاتني مشينا للبحر رجعنا دوشات و قالت ليا نجمعو لحوايج، جا واحد دري بطوموبيل انا يصحابلي ايوصلنا
ساعا دانا نيشان للمطار قاتليا انا انمشي احبيبة عيطو ليا فالخدمة ضروري خاص نمشي، هاهو دري ايوصلك لمحطة ديال لكيران قتليها لا نمشي فتران، معرفتش علاش صرااات عليا نمشي فالكار، صافي قتليها واخا
المهم جبدات من جيبها 3000 درهم مداتها ليا قتليها لا قاتليا والله تاتشيديها نتي محتاجاهة و انا راه عندي فلوس وكدا مهم قاتيا دري ايوصلك و هاد صاك ديالو ملي توصلي لقنيطرة هبطي ايعيط ليك دري عطيه ليه و راه ايوصلك هو تال سلا تا باب دار
انا على نيتي سلمت عليها وعنقتها، مشات خرجنا من المطار شدينا طريق للمحطة، وصلنا بغيت نقطع تيكي قال ليا دري ها خليك انا نقطعو واخا مابغيتش قالي هاظي ابسط حاجة و صلني للكار
ادا هنا ايبدا لفيلم، كانت دنيا عامرا حدا لكوفر ديال لكار هو حط صاكو عطاه لكريسون ورقة مزال عاقلة فيها 24، جا دري بغا ياخد لباليزة ديالي يدرها فالكوفر صبقو كريسون ولصق فيها ورقة فيها 30 و عطاني ورقة فيها 30 سولت لكريسون قتليه هادي ديالاش، قاليا باش ملي توصلي اتعطيني نمرة ونجبد ليك لبازية
المهم جا دري عطاني ديق لورقة ديال صاك وجبد 1000 درهم قلت ليه هادي نعطيها تاهيا لدري قاليا اه
صاف طاعت انا، وطلعت واحد لبنت شكاتني فراسي كل شوي كادزر تشوف فيا
المهم لكار غاادي و انا شدااتني الدوخة بديك شمش وزمت
وااا شوية وقف لكار فواحد لباراج ديال بوليس و جدارمية ودنية مطوقة
طلعو 5 ديال بوليس و كلب بداو كيقلبو واحد بواحد و شوية هبطونا ملي هبطنا لقينا بلي ماينا حملة و لي داز كيقلبوه
حلو لبكابو ديال لكار طلعو لكلب بدا كايشمشم
وا شوية بدا كاينبح
بداو كايز بالباليزات قالو كل واحد يشد حوايجو قدامو
انا جريت باليزتي يالاه انجر صاك ديال دري معا زحام وناس خايفا تا كتنشوف شي حد جرني من لور ملي ضرت لقيتها ديك لبنت
خلعتني قاتليا فين لورقة؟
قتليها انا ورقة؟؟
قاتليا ديال صاك،
قتليها فجيبي
و هي تقوليا كوليها ولا رميها لمهم مايلقاوهاش عند، وداك صاك متقربي ليه ماكاتعرفيه
نكدب عليكوم جمد ليا لما فركابيي، بالخف شديت لوريقة حيت صغير كمشتها وخشيتها في فمي، بقولت لخلعا صرطتها بلاما نحس
درت لقيت لبن بعداات عليا وتخشات حدا شي رجال، انا بقيت مصمرا في بلاصتي بداو كيحلو فباليزا باليزا وحدة بوحد تا شوية واحد بوليسي قال ديالمن هاد صاك؟
تاحد ماهضر و انا شدنيي لوجع ولخلعا ولبكية بحالا فيا العادة الشهرية هههه
وطلعو لكلب بقا ينبح حلف هو لا سكت ههه
جبدو صاك حلووووه
واااااهيا ناري وااااهيا سيدنا وا ميمتيييييي
.
.
.
.
.
.
.
هههه هانا انكمل ليكوم ( ليوما راشقة ليا داكشي لاش كنضحك معاكم و كنكتب، اما صاراحة هادشي لي كنكتب راهةكايبكي )
واااا هيا ميمتيي ملي حلة صااك 😨😨😨
فيه لحشيش، لغبرة، قرقوبي، او شي ويل كحل اخر
انا دنيااا دارت بيا قلبي حبس ناس بواي يتغاوتو شي عيالات تخلعو
جا شاف لكبير كاليهم حيدو لكار من الطريق و نتوها اتقولو ديالمن صاك و الا انديكوم كولكوم فين اتعرفو تهضرو
ناس بداو كيحلفو ديك لبنت نقزت قالت ليه ساف انا ركبت تا زاد لكار سول لكريسون ماطلعت معايا والو غير ساكي فيدي
وكل واحد بدا كايدافع على راسو
نقز شيفور قاليه راه كل واحد عندو فصاكو رقم و راه عطيناهم نفس راقم شوف لي عندو نفس رقم ديال الساك
انا تم قلبي وقف بداو كايجدو ناس وراقيهم تا انا جبدتو
بداو كايتأكدو، وصل ليا خدا رقم شاف لباليزة بجوج فيهوم 30 شاف فيا قاليا مالك نتي كترعدي؟
كدبت قتليه ماجبتش رايوز ديالي حيت فيا الضيقة معا الخلعة كنولي هاكا، شاف فيا قاليا اري لاكارط، بديت كنقول صافي غير نعتارف، ملي كان كيشوف ف لاكارط يدال ضورت وجهي لجيهت لبنت و هي تشوفيا ديك شوفيا ديال تكالماي غير بشوية فهمتها من عينيها
هبت راسي قاليا بنت الرباط نتي؟ قتليه اه قاليا هاد العنوان كنعرفو بنت حي نهضة قتليه اه ( كان كل واحد واقف عليه بوليسي كيسولو ) قاليا واش بنت مريم، قتليه لا حليمة، مريم راها خالتي، و ضحك قاليا اه ماماك كنعرفها الله يعمرها دار
ورجع ليا لاكارط قاليا فين كنتي، قتليه غير دوزت واحد الاسبوع فطنجة ونواحي ودابا راجعة،
قاليا ماعندك تا علاقة معا ساك، بديت نحلف ونعطي لقلبي والله ماديالي والا شفتو انا عندي غير باليزة...
قاليا صافي بقينا تماك شي ساعة وتحقيقات مزالة ملي تأكدو من شي عيالات قالو ليهم اتمشيو و كانت معاهم ديك لبنت و شي ورا و وليداتها المهم كاع رجال خلاوهم، رجع عندي داك لبوليسي قاليا راه ايجي كار اخر اتمشيو فيه
انا غير سمعت ديك تمشيو فيه قلبي بغا يطيير من الفرحة
ركبنا فالكار، طلعات داك لبنت جات حدايا، يلاه بغيت نسولها وهي تقول ليا بشوية wathsap 📲
يالاه انقوليها ماعنديش نمرتم تا وصلني ميساج بالواتساب حليتو لقيتها كاتبا ليا هادشي نسايه و ملي و سيري نيشان لداركم و نمرتك لوحيها، و ديك 1000 درهم ليعطاك دري لخوديها و دابا قدامي مسحي لميساج لي سيفت ليك و تا نمرتي و ناتسوليني تل سؤال
انا قريت لميساج شي 5 دلمرات بقوت الصدمة بقيت ساهيا و هي تعفط عليا برجليها وخنزرات زعما نسيبريمي
داكشي لي درت مسحت كلشي قدامها، خشيت تيليفون فشاك و شديتو كنتسنا هي امتى نوصل، دازت 30 دقيقة لبنت ناضت باش تهبط و شافت فيا و قالت ليا ( ساطا جمعي راسك و ماتيقي فحد ) غمزاتني وهبطات
لبنت باينا فيها شي كزاوية من هضرتها و شكلها باينا
انا دموع بداو كاينزلو ماقدرتش نحبسهوم، تا وصلنا لسلا هبت فسلا جديدة فطريق شيرت لطاكسي
وصلني قدام لباب، هبت خلصتو، دخلت لدار طلعت نيشان لبيتي و سديت لباب
و هي تجيني لهيستيرا ديال لبكا 😢😢😢😢 ماسكتش
جبت تيليفوني و خديت منو لاكارط و هرستها بلا ما نشعر
ناري يا لبنات فين كنت ادي نمشي نييييشان لخريزو ولا لعوكاشا الله يستر واالله لا رحموني ولا تيقوني
واهيا ناري عاظ رجعت سيناريو، قولو لبنت جيتها نية قالت هادي هي لهمزة نسيفطو معاها سلعة و اتوصلها تا حد ما ايعيق و انا كيشي كانبوا ماجايبا لدنيا خبار
الحمد الله رضات لواليدة و ربي وقفو معايا
وتعطاني درس عمرني ماكنت انتعلمو فحياتي
الدنيا كلها تجارب و كلها امتحانات وكلها مخاطر
الدنيا هي مدرسة و التجارب هي دروس اما المصائب فهي اكبر معلم حيت كنتعلمو منها بزاااف
- - - - - - - - - -
كنتمنى تقراو وتستافدو من التجارب الواقعية يا من كتاباتي لحياتي و تجاربي الشخصية او من الناس لي كتعرفو حيت اتعلمو بزاااف و باش ماطيحوش بنفس الشيئ..
خليو ليل لي فوت ديالكم حيت كيحفزوني نكمل
كنطلب من اي واحد قرا يدير فوت ملي يسالي باش نعرف بلي باغيني نكمل
عواشر مباركة احبتي 💟😍