Ang dilag na nais munti kong puso'y
di pangkaraniwan kung magpabugso
ng aking damdaming sa gabi ay lito
kung anong pangalan ang tinataglay mo.
Ikaw'y pintakasi ng aking panulat
kahit inaantok dapat nakadilat,
ang isipang nais ay ang mahandugan
ng isang tulaing mukha mo ang laman.
Makita ka man lang kahit isang saglit
ang ubod ng puso'y hindi magpapalit
ng yaman o ngalan na daling mawaglit
di ang damdaming kong lugod ay ang langit.
sa'king sinisinta, kahit pangarap lang
ang makausap ka'y isang karangalan,
kahit akong aba'y ngalan mo'y di alam
huwag kang matakot ako'y nariyan lang.
Sa lahat ng ganda na aking nakita
ikaw ang nahigit lalo't ang iyong mata'
ngunit, binibini 'wag kang mawawala
pagkat ikaw lamang ang laman ng tula!