" نفوذ الأسياد "
Vote+ Comment فضلاً ولـيس أمراً
الكاتبة : زهــــور
حسابي فالانستا : @bezhorr
حساب الرواية : @merhamet_friends
التعليقااات أكيد ماتنساونيش على الصغيرة والكبيرة هاد البارت غاتزيدو تعرفو على حياة أحفاد ال ورياغل
كندير مجهود كبير باش نديرليكم بارت طويل ومسرود بطريقة زوينة فمتبخلوش عليا
كولشي هنا استغفرو الله أولا 🌸
_____________________
بقـا مدة كـالس فالدروج كيحاول يرد النفس وشيماء معاه مابغاتش تخليه خايفة لايجيه نوبة كيف العـادة، بينما المهـدي بسرعة نقل غـيثة للمصحة الخـاص، دخلوها للمستعجالات يستفسرو حـالتها ويوقفو النـزيف.
الأمـر كـان غريـب ومخيف، قـدر مابين ليلة وضحـاها شتت الأحباء وقمصهوم نصفين، أرواح فخطر، وشخصياتهوم الحقيقة تتصارع مع شخصياتهم الوهمية، لا أحد فاهم شنو واقع ولا يقدر يفهم، شـي حـاجة لي كتكون. داخلية وماكاتبانش كتصعاب على الواحد يكشفها إلا إذا قرر القدر يفضح المستور.
بقـات معاه شيماء حتى توكض شوية ونوضاتو مشات للمطبخ عطاتو كـاس دالمـا كتشوف فيه كيشرب: شوية دابا أولدي ؟
حركليها راسو غمض عينو مزيان وحلها كيجبد التيليفون من جيـبو يعيط لبّـاه جاوبو تم نيت : الواليد شمن كلينيك نتا ؟ شنو دارو معاها !
المهدي : باقا مع الطبيب أجي لأكديطال تما فين ديتها
رضـى : واخا شوية أنا عندك
شاف فمو بسرعة شدات عليه : أمضرا !
رضى : يالله نمشيو عندهوم يالاه دخلوها عند الطبيب
جا يمشي عاودات شداتو حيت كان ماشي هو هاداك وماشي نفس الشخص لي كان عاد دابا طايح : ولدي واش مزيان متأكد
رضـى : أنا مزيـان غا يالاه
خرجو من الڤيلا توجه نيشان لجيب ديالو وعينيه حومر كيستوعب شنو طراليه دابا عاد بصفة نهائية ماكيحسش براسو مزيان وماقادرش يسيطر على نفسو.
توجهو للكلينيك دخلو نيشان عند المهدي كان واقف كيتسناهوم يخرجو حيت دخلوها بوحدها يديروليها فحوصات، رجع رضى اللور وكلس على الكرسي حاط يديه عند جبهتو تاتقدم عندو بّـاه حط يدو على كتفو : كيبقيتي مزيان ؟
طلع راسو فيه : شوية سمحلي الواليد على قبيلة
تنهد المهدي بشوية وكلس حداه حاط يديه على ضهرو : ماتضغطش على راسك أنا معاك الى ضاراك شي حاجة نفكوها بجوج، ماتسدش على راسك بوحدك
هز عينيه فيه كيشوف فيه ونطق بصوت خافت وبحة رجولية : الواليد خايف نخسر غيـثة، بغيتها الواليد تمنيت كون شفتها أنا اللول، تمينت كون عرفاتني انا اللول
تبسم المهدي بشوية، أول مرة كيشوف ولدو كيدوي على بنت قدامو حتي من اسلام كانت علاقتهوم معروفة ولكن عمرو جا وعتارف بحبها قدام واليديه، وبّاه عاد من الفوق، أول مرة كيجي ولدو يدويليه على بنت، اللمعة لي كاتبان فعينو منين كينطق بسميتها كافية توضح شحال قلبو كيضرب على ودها، سرح يديه بشوية كيمسح على ضهرو : الصبر كولشي غايتصلح، كلنا عشنا هاد المرحلة، خاس تشد فراسك، وضعيتك ماساهلاش أرضى، ماسهلاش بالمرة أولدي، عندك ولد ومسؤولية قريبة غاتجيك، على الله اتزاد بصحة مزيانة، كيف ما كان الحال ولا نوعية العلاقة بينك وبين مو كيبقا هاداك الولد ولدك وماخاسش تنسـى
رضى : مانسيتوش الواليد راه ولدي هاداك غانقتل عليه ومانسمحش فيه، ولكن مو ماغاديش نكمل معاها
المهدي : ماقتليكش كمل معاها قتليك عرف راسك شنو كدير وخسك تعرف كيفاش غايكون مستقبل ولدك، هاد الولد غايكبر بين واليدين مطلق وبيناتهوم مشاكيل كبيرة وباه مزوج من الفوق، مكتعرفش داك المراة كيفاش وباش غاتربي ولدك وكيفاش غادي تكبرو
جات وقفات عليهم شيماء : فاش كتهضرو، مهدي شوف هاد الطبيب تعطلو
طلع راسو شاف فيها : يمكن كيبدلو للبنت خليهم يديرو خدمتهم
شيماء : ففففف مافهمتش شهاد المصايب كيطيحو علينا منين هادشي منين.
ناض رضـى وقف محول سوارت طوموبيلتو بين يديه : أنا بغيت نبدل الجو، راسي ضارني، رضو عليا خبارها كيبقات.
شيماء : آه رضى بعدا خاسك تجيب حوايج غيثة من لاباغطومون ديالك بقاو تم.
حركليها راسو : صافي أنا نتكلف
مشا مخلي المهدي متبعو بعينيه ويماء كتأفأف أصلا راسها ترون بزاف، تادار عندها هضر بشوية : رضى مابانش ليا هو هاداك
تنهدات : واييه راه عيان
حركليها راسو بجدية وصرامة وهدوء : لا ماشي العيا هادا شي حاجة فيه ماهياش، الولد كيبغي البنت ولكن شي حاجة مخلياه تبعد منها واش دابزو بيناتهوم ؟
شافت فيه شيماء جامعة حجبانها : لا واقيلة داك خيتي كتقوليه شي حاجة
سكت المهدي كيشوف نطق بصرامة : أولا كتهددو من عائلتها
قربات شيماء بزربة كلسات حداه : اولي احياتي زعما يكون بصح !
حرك راسو بلا : رضـى ماكيخافش ولدي وكنعرفو يصفيها لبنادم بلا رحمة ولكن كاينة إن فالموضوع مخبيها عليا وغانعرفها بطريقتي
* النّـاظور
فتح ليـه الگارديان الباب بعدما تعلم عندو زيارة كان قال غاتكون مو حيت هي لي موالفة تجي تشوفو، حتى وقف باش شاف مراد گالس كيشوف فيه، تقدم بشوية عينيهوم ماتزاحتش من بعضياتهوم، وصل لعندو وگلس فوق الطاولة قبالتو كل واحد كيشوف فثّـاني، كل واحد عينو كتشكي كثر من ثّـاني، وكل واحد عالم بيه غير الله.
عصام : الواليد
بقا كيشوف فيه شحال تبسم : معمرني شفتك باللحية
نطق بهدوء : وليت نعكز نحيدها
بقا مراد ساكت شحال كيتمعن فتفاصيلو توحش ولدو يوقف حداه فجنبو يكون معاه، عصام كان قريب ليه بزاف ربما كثر من طه، رغم انه جد متسرع وكيغلط بزاف ولكن ديما كان هو يدو ليمنية، وطبعًا ماقادر يتيق فتواحد من غير ولادو، بقاو ساكتين بواحد الصمت عميق حتى نطق : ماتوحشتيش عائلتك مابغيتيش خلاص ترجع لعندنا ؟
نطق بجدية : مزال مصاالحش
مراد: هاد الهضرة ماكاناش اعصام ماعمرك كنتي ماصالحش، نتي الوسطاني فولادي، نتا يدي ليمينية وطرف مني، كيفاش ماغاتكونش صالح ؟
تنهد مدور وجهو ورجع عاود دار شاف فيه : الواليد ماعيتيش مني ؟ أي حاجة كتوصل ليدي كتخصر، ويمكن هادشي لاش طه خاس يبقا ديما فالواجهة، لو كنت خديت بلاصة طه كانت آل ورياغل مشات فرجلين
مراد : شهاد العضرة واش هادي هضرة واحد من ال ويراغل كيقولها ؟ لو يسمعك طه...
قاطعو : طه عارف هادشي، اول واحد طه جا شافو كان هو انا، ماشي هو لي مابغاش يخرجني انا لي مابغيتش، هو خيرني ويمكن اول مرة كيخيرني وماكيقولياش شنو ندير، مزال باغي نفتح عيني على شحال من حاجة، مزال مامستاهدش نخرج، ماباغيش نخرج بعصام ديال شحال هادي الواليد
زير على يدو وسنانو : واش باغي تقتل مستقبالك، واش حسابك ساهلة تنعس ففراشك وولدك فالحبس ؟؟؟
عصام : أنا عارف الواليد قادرين تخرجوني اليوم وفهاد الساعة وهاد الدقيقة، ولكن مابغيتش، نهار غانبغي نخرج مامحتاجش شي حد فيكوم غانخرج راسي وبيدي، بكلمة مني غانخرج، ولكن محتاج نعاود وراقي فحياتي،
سكت شحال مخلي مراد غير كيشوف فيه وكمل : وكنتمنى الواليد منين نخرج نلقا علاقتك بالواليدة تصلحات.
ناض وقف قرب باسليه يديه وعيط للكارديان يدو بلاصتو مخلي مراد متبعو بعينيه ساكت، والنار مشعولة فالقلب ديالو مزير على سنانو.
* الرّبـاط
رجعات يالاه وقفات حدة الكلينيك دخلاتها أبيل من طه جاوبات : وي خويا فينك ؟
طه : قربت لرباط ساعة تقريبا أنا معاك
ريتال : واخا دخل من الطريق الكبيرة
قطعات وعيطات لصلاح : وي عيطتيلي كنت مشغولة
صلاح : الورياغليين غايعمرو الرباط هاد النهار !
ريتال : على اساس شي حد جديد ولد عمتك نيت، هادشي لاش عيطتليك وجدليه الطريق الكبيرة دابا ساعة غايكون هنا
صلاح : عارف وجدت كولشي على ودك
تنهدات : كيبقاو عائلتك أصلاح
صلاح : من داك العائلة عمتي بوحدها لي كنعرف
ريتال : ماعلينا دير لي قتليك ومنين تجي من الخدمة جيب معاك ليث أنا مشغولة اليوم بغيت نفوك شوية عيانة
صلاح : مالكي صوتك ماعجبنيش ؟
ريتال : غير ضغط الخدمة اه وبلا ماتبحث مورايا غاددي نكون غير مع دراري خويا وبنت عمي
صلاح : ماشي لهاد الدرجة
ضحكات : حيتاش مزوجة تبارك الله واحد الراجل ماكيفتلش الكبيرة والصغيرة عليها تيليفوني ووليت كنحشم نهضر فيه
ضحك : ماتخافيش محتارم خصوصية مرتي وماكانخلي حد يتبعها
ريتال : كنبغيك واخا هاكاك
صلاح : حتى أنا تهلاي فراسك
دخل فلوتورت ديال الرباط من الخمسة دصباح وهوما شادين الطريق من النّـاظور، معاه رحمة وأمينة الوحيدة لي جات مع ختها بلا خبار دريس غير ربيعة وهيثم لي سمحوليها تجي والا ماكانش يبغي، هيثم خدام ولكن غايجي من البعد لعندها يردها معاه خاسها دابا تبقا معاها شي وحدة من عائلتها.
غادي بسرعة فائقة فالطريق بلاما يوقف، من شحال ماتحرك بهاد الطوموبيل ولف الجيب, رحمة حداه داتها عينيها وسميرة ناعسة اللور وفجنب أمينة شادا سيروم لختها ومدورة راسها لزاجة كتسمع موسيقى ماقاداها فرحة غادة للرباط واخيرا اتشوف المدينة ديال الدري لي حطف قلبها.
مرة مرة كيدير عينو مع زاجة يشوفها ناعسة وباقا حالتها هي هي، رجع مد عينو حجبانو معقودين لطريق شاد الڤولون بيد وحدة ومكسيري بسرعة ليه زمان ماصاك هاكا ولكن خاس يوصل خلاص.
قرب للبلايك ديال الرباط العاصمة، بدا كيتخطا الطموبيلات غادي ب 190 كيضوبل من ليسر وليمن.
وصل للبياج داز من البلاصة ديال جواز تفتحات ليه الباريار بسرعة، عطا فلاش بالضو مع شافو الدرك الملكي البلاكة دطموبيل ونوع Mercedes BENZ تنحاو من الطريق بواحد الزربة حابسين الطموبيلات الاوامر جاو من الفوق، داز عليهوم بحال الريح، زاج كان فيمي ماكيبين تاحد من لي لداخل وهو داير نضاضر فالاسود ماكيشوف فحد ومامسوق لحد، هدفو هو راحة مراتو توصل بسلامة.
تاحد مافهم شي حاجة عند بالهوم شي وزير ولا ولد شي حد معروف ولكن هو كان طه الورياغلي دخل للعاصمة.
ريتال خرجات من البيرو ديالها بسرعة كتلبس الطابلية ديالها شادا تيليفون فيديها هضرات كتشير لكل واحد شنو خاس يدير الكلينيك كولو تقلب.
ريتال : بزربة وجدو البياص المريضة غادخل من كلوار الشخصيات المهمة غاطلع مباشرة للشومبر.
بسرعة خرجو الفرمليين كيوجدو البياص باش كيف توقف يهزوها فتحو ممر الكاراجات من لتحت باش طلع مباشرة من المصعب دالمرضى المهمين، الحراس وقفو عند الباب خايفين من الصحافة كولشي كيضربوليه حساب.
حرجات ريتال ومعاها طبيب من اكبر الدكاترة ديال الراس فالرباط ، وقفو فالباب والفرملين واقفين كيتسناو بلا لي كيقادو الشومبر الفوق باش دخل وبلاصت السكانيرات والفحوصات.
بلاصة يونس بطموبيلتو ونزل مع واحد الدكتور صاحبو داخلين لكلينيك يقاد راسو باش اطلاقا ختو.
تفتح الباريير باش دخل الطموبيل ديال رايس مكعط تاوقف مع باب الكلينيك تجاراو السكريتي سدو البيبان، وتحركو الفرمليين كيفتحو الباب داللور يهزو سميرة للبياص.
هبطات ريتال بزربة متاجهة لجيهت طه لي نزل من طموبيلتو كيحيد النضاضر، لابش شوميز فالاسود وسروال كلاص تاهو فالاسود، شعرو مقاد مع سد الطموبيل طلاقات ليه ريتال تعانقو دورات يديها بجوج معنقاه : كولشي غايكون مزيان اخويا ماتخافش
نطق عند وذنيها مدور يد وحدة كيمسح بيها بشوية على ضهرها وثانية طالقها باقي شاد بيها النضاضر : ماعنديش شك فيك انشاء الله.
بعدات دفعها بشوية من ضهرها زايدين بجوج وامينة نزلات تابعة ختها هبطات معاها من الممر تبع معاها عينيه حتا دخلات ورجع مد يدو ليونس كيسلم عاد نزلات رحمة تقدمات عندها ريتال تسالمو ورجعات مشات لطه مخلياها مع يونس.
دخلو بجوج فالكلوار مقدمين بسرعة بمشية مستقمية فخط واحد، كولشي كيشوف فيهوم كيبانو قد قد طبعا وهوما مفاوتين بشهر ماشي خوت بالدم ولكن حاجة اعمق من الدم، هي الوحيدة لي حاسة من شنو كيدوز وهو نفس الشي، بقاو غادين وكيهضرو : جاو جوج من أحسن الاطباء هنا فالمغرب واحد صاحب بابا يالاه وصل من فرنسا ليوم، غايشرف على حالتها بيدو باش تعالج بأسرع وقت ممكن، دابا غايدخلوها يعاودوليها كولشي من اول وجديد.
متبع هضرتها بشوية ساكت وغادي معاها فالطريق حك على اللحية ديالو : مابغيتش تاواحد يعرف بحالتها شمن درجة واصلة ليها
ريتال : أكيد كولشي غايدوز تحت من عينينا حنا بوحدنا
دخلو بجوج للاسانسور ديال الشخصيات المهمة طالعين فيه تكات على المرايا كتاخد نفس ورجعات شافت فيه هو جبد تيليفونو : قوليا بعدا رضى صاڤا ؟ميمتا مادويت معاه داك خيتي ثاني
بهدوء كيقاد واحد الايميل فتيليفونو : ساعتهم قربات تاهادوك.
تفتح السانسور وناضت موكضة : ههه غايموتو على يديكم.
خرجو متاجهين للغرفة كان فأعلى طابق مخصص فقط للأثرياء، مجهزة بكولشي وبغرف كبار ممكن اكلس فيهوم اي واحد بحمام واي حاجة احتاجها المريض، الصحة فالبلاد خاسها فلوس باش تمرض فالريش.
لقاوها يالاه دخلوها امينة غير كتشوف واقفة عند الشرجم كتبانليها الرباط والعمارات طوال قبالها دارت باش سمعات صوت طه مع ريتال، رمشات فالاخيرة وقلبها بدا كيضرب عارفاها ختو، بقات كتحقق فيها وتشوف فلباستها الانيق وطولتها المهيبة كيفاش كتهضر وتصرف، عضات شفايفها وحشمات من راسها، مشات كلسات فالكنابي مخليهوم واقفين مع سميرة كيقادوليها الفرمليات السيروم والفراش.
الفرملية : دكتورة نبدلوليها ؟
ريتال : آه بلاتي شوية وبدلوليها باش دخل للفحص ومن الاحسن وهي ناعسة قبل ماتفيق.
خرج طه سبقها لبرى بعدما طل على احوالهوم مخليين الفرمليين يتكلفو اصلا على هادشي جابها لهنا باش يقابلوها بأحسن عناية.
خرجات عندو ريتال : هاد جوج بنات غايبقاو ديما فوق راسها.
طه : من الاحسن تخلي غير فرمليات مابغيتش راجل يدور فجناحها من غير لاكانو الاطباء.
غمزاتو ريتال ضاحكة بخفة : ماتخافش فاهمة خويا قبل ماتقولها وجدت كولشي على هاد الحساب.
وصلات عندهوم رحمة ويونس لي ماكيتقابلوش هو وريتال نهائيا بعينيهوم ي امضرا اولدي مزيانة !؟
نطق بهدوء وهو كيشوف فيونس : غانحطها امانة عند خالي وماتكون الامور مزيانة
يونس : الله ياودي سميرة بنتنا أطه، صاحبي قاليك ماشي حالة صعيبة غاتولي مزيان مع شوية ديال العناية.
طه : انشاء الله
رحمة : أنا غانمشي مع خالك نشوف عمتك
يونس : هاد العشية ضاروري تجمعو كاملين عندي للعشا.
ريتال ماجاوبتش نطق طه بهدوء : يكون خير ماديرش بالك معايا حاليا عقلي مع سميرة تدرسو حالتها عاد نشوف لي جاي
حط يدو على كتفو : اتولي مزيان
ريتال : عمتي خودي راحتك ماما توحشاتك بزاف أتفرح
رحمة : شكرا احبيبتي توحشتك تانتي خاسنا نديرو جلسة
ريتال : أكيد اعمتي غاندير وقيت وندوز لعندك.
مشات مع يونس مخلياهوم بجوج بقات متبعاهوم مبتاسمة حتى بهدوء : شنو الموشكيل ثاني ؟
بزربة شافت فيه عرفاتو عاق بيهوم ولما لا وهو ماكيفلت والو : الموضوع طويل أطه ومايستاهلش نخسرو عليه دابا الوقت.
طه : عرفي فين تحطي رجليك
شاف فيها : ماتخليش العصبية تخرجك على بلاصتك.
ريتال : ماتخافش عارفة فين كنحط رجلي
رد تيليفون فجيبو وهضر : فيناهوما دوايات لي قلتي خاسك ؟
ريتال : يالاه نمشيو لابو
فمطار سلا وقف طموبيلتو ونزل هاز واحد اللافتة فيدو لي داز من حداه كيشوف فيه خلا تاوصل للبلاصة منين كيخرجو المسافرين لي عاد حطاتهوم الطيارة وهز للافتة مامسوقش لبنادم.
تحطات طائرة الخطوط الملكية المغربية على الاراضي الوطنية توكضات من كلساتها وناضت واقفة كانو معظم البلايص خاويين حيت جات فالمستوى الاول ديال الطبقة لي كتخلص زايد فيها كيمشيو مدراء الاعمال وناش لي عندهوم الفلوس، نزلات من طيارة محيدة الكاسك من وذنيها حاطاه على عنقها، جارا الڤاليز مع مجموعة من المسافرين.
مع دخلات للمطار طلعات عينيها باش تشوف اللافتة، حلات فمها بصدمة وحنات راسها للجنب ناطقة بالانجليزية : seriously ( منيتك ! )
هبط راسو من لتحت كيطل عليها وغمزها ي يا ربي نكون كنحلم
قربات تاخرجات وهو يطلاقا ليها : كيجاك اللقاء ابنت عمي.
أمال : بنادم كيشوف فينا واش هربليك اش هاد اللافتة اويلي
هزها كيدور يشوف فيها مرسومة بوسة ومكتوبة توحشتك الميمة.
آنس : غير كنفكرك بلي نتي كبر مني
أمال : واو ماكنتش عارفة أبهرت بذكائك موسيو أنس
زادت معلية خنافرها لسما جرليها الڤاليز من يديها جاراها : وافين ازين جات معاك فرنسا
أمال : سير سير أنا مدابزة معاك
أنس : اواه علاش بسلامة
وقفات وطلعات يديها كتعيب فالهضرة : امال ماشيغي سيري لفرنسا أنا غانجي لبريتيش ( بريطانيا ) وغادي نحيحو بجوج تما
شافت فيها بنضرة جانبية : جيتي ؟؟ لا موسيو انس عاد شرا اخر ماكاين فالـ BMW وسمح فيا انا بوحدي
طلق ضحكة بجهد ورجع شاف فيها : حتي واش انا قطعتليك الطيارة قتليك سيري نتي بغيتي
أمال : بييتش
أنس : اباباباا مابقيتيش كتحشمي
خرجات ليه لسانها وزادت تاخرجو للباركينك نيشان لطموبيل شافتها عضات شفايفها : اوووو عرفتي هاد الموديل كان ناوي ياخدو رضى كيلعب بيه Drift .
أنس : ولكن لي عندو واعرة تاهي
امال : حبي شغاندييرو هاد الليلة ؟؟؟
ضحكو بجوج وقربو نطقو هازين صباعهوم : هاد الليلة غانروبلوها.
مشات راكبة وهي كدوي : ضبرليا بعدا على شي ريسطو ناكل حيت فيا جوع
أنس : جاتك على حسابي
أمال : اصلا ماكنتش ناوية نخلص بابا غايعيق بيا دخلت للمغرب لاخلصتك بلاكارط.
هزليها الكارط الذهبية بين صبعانو : ديالي موجودة احبي
غمزاتو مشيراليه بصبعانها : ايي حبيتك
غمزها تاهو : حتى أنا احبي
ركبو بجوج بيهوم وقلع مكغط طلقات سبوتيفاي كتختار الموسيقى عندهوم نفس الدوق بجوج، اصلا من ديما قرابين لبعضياتهوم بحكم فنفس العمر، سد الشراجم فيمي ماكيبان تاحد لداخل، وجهد الموسيقى باش احيحو.
تغداو فريسطو ودوزو العشية مع بعضهوم تادخلو للاباغطومون ديال ريتال القديمة بحكم دابا ولات ساكنة مع صلاح، بقات الاباغطومون ديالها خوها اغلبية كيكلس فيها انس.
دخلات امال اول حاجة عيطات لماماها مابغاتش تصوني فالصباح حيت كانت مسافرة ومابغاتش تعيق، صونات عليها من الواتس باش ماتعيقش : آلو ماما
كانت شيماء كالسة حدا غيثة ناعسة دايرين ليها السيروم عاد ولات شوية، ناضت بشوية من حداها خرجات لبرى وجاوبات : آلو حبيبتي لاباس عليك ؟ مالكي معيطة من الواتساب عندك الزهر كنت شادا تيليفون فيدي
أمال : غير تسالات ليا لابونمو، قوليلي غيثة فيناهي كنت كنصوني عليها ماكاتجاوبش
مابغاتش تخلعها وفنفس الوقت ماقادراش تخبي : غير رجعات لطبيب اليوم دير كونطورل وقالينا تكلس دير السيروم
تهزات من بلاصتها مخلوعة : واش شي حاجة خطيرة ؟
شيماء : لا لا دابا ولات مزيان اتسالي السيروم ديالها ونرجعو للدار.
أمال : عافاك منين تفيق خليها تهضر معاها واخا !
شيماء : غير سيري رتاحي غايكون دابا تعطل عليك الحال غدا وندويو معاك
تفكرات بلي شيماء كتفكر انها باقا ففرنسا : واخا اماما تهلاي ليا فيها واخا ؟
شيماء : ماتوليش توصيني.
قطعات معاها وفشلات فناموسية، قلبها ضارها على غيثة بزاف، وحتى رضى ماكيجاوبهاش عصبها سيمانة ماهضر معاها، نفخات تادخل عليها انس : واش نتي باقا مالبستيش ؟؟
أمال : والله مافياش صافي تخسرات ليا الكانة
انس : واش حمقة راه ريزيرڤيت ديجا ڤيب نوضي تحركي براكة من العكز ريتال تاهي غاتكون معانا.
أمال : ففف صافي خرج خرج غاندخل ندوش عاد نلبس.
خرجات لبسات كسوة كتبري إڤازي حد الفخاض مع ليبا موس كحلة وطلقات شعرها بوكلي قادات الميكاب ولبسات طالون بوط، هزات تيليفونها وخرجات هابطة مع أنس لي خرج كيقاد فشوميز بيضة لي لابس ومتأنق ريحتهوم مطعطعة كيتناگرو تاخرجو لقاو ريتال كتسناهوم ركبات معاهوم بحكم انس باقي فرحان بطموبيل.
وصلو لبار ڤيب غير شافو البوديكار أنس فتحوليه الباب دخل هو اللول تابعاه امال متحمسة وعاد ريتال لي طالع ليها هادشي فراسها ولكن محتمة على راسها تبدل الجو وخاسها تخرج معاهوم لايديرو شي كارثة ويجمعهوم طه عليها مشات معاهوم باش تاخد المسؤولية على عاتقها.
الضباب كثيف وغير الضواو مشعولين الموسيقى مجهدة روميكس مطلوقة، قادات امال شعرها وهي كتشطح مع النغمات، سابقها انس للطاولة وكلسو موراه البنات.
انس : شنو تشربو
ريتال : سمعو بعدا حاجة فيها لانكول ممنووووووعة منعًا باثا، طه كاين فالرباط مافيا لي يوقع شي موصيبة، هاد المرة غايجمع ملتنا كاملين.
امال : اويلي واش طه هنا اويلي
انس : وعلاش انا مخرج معايا ريتال حيت عارفاك الحب لاحصلنا نتي غاتودينا
ريتال : اقسم بالله هاد المرة انخليكم منكم ليه يذبحكم.
امال : وماغايوقع والو نعيطو بعدا لايمان ندخلوها تالاحصلنا تمشي تاهي فيها
انس : كيعجبوني افكارك
ريتال : ناري على شريرة
رفعات ليها كتافها وعيطات ابيل فيديو لايمان تاجاوباتها وعلات تيليفون باش ابانو كاملين : نااااارييي الحمييييييير مجموعين بلا بيااااااااا اش هاد الخيانة نتي ازبلة فوقاش جيتي
امال : جيت اليوم وبعد غدا كاين لانيف ديال رضى فطنجة اكيد غاتكوني حاضرة
ايمان : كيفاش هادشي مافخباريش
امال : طبعا حيت سيربرايز
ريتال : انا من العام ليفات مابقيت نحضر شي انيف ديال رضى مايمكنش كوشماغ ( كابوس )
امال : هههه لا هاد المرة غايكون ناضي
انس : انا مشغول لغيني
ايمان : ناري ماتقولوش ليا فديسكوتيك، والله دابا غانوصلها سخونة لطه ههههه
امال : والله ابنتي تانقوليه ايمان تاهي كانت كتمشي معانا
ايمان : ناري فين عمري مشيت معاكم الكذابة
امال : ايوا جربي
ناض انس جر امال لاحت تيليفون لريتال كتكمل معاها الهضرة وهو دخلها بين كروب كيشطحو مكاليها بيديه باش مايقيسها تواحد، كاتبقا بنت عمو.
* طنجة
حلات عويناتها بقات شحال الضبابة عاد بدات توضح ليها الصورة كتسمع غير شيماء كتدوي مع الطبيب ولكن صوتها بعيد، رغم العيا ولكن وجع شادها غريب فالرحم ديالها ماكيبغيش احيد، عضات على شفايفها السخفة شاداها مابقاتش كتستحمل كمية الاوجاع.
نطقات بحروف متقطعة : خ خ خالتي.
دارت بسرعة شيماء مخلية الطبيب امشي وقربات ليها : حبيبتي فقتي ؟ كيبقيتي
النفس كيتقطع فيها بزز باش كدوي : الوج عع ه هل هلكنيي ا ل لم ووت.
حطات يديها بزربة على شعرها : فين كتحسي بالوجع فييين قوليلي
هزات يديها كيترعدو ويرجفو بزز باش قدرات تحطهوم على اسفل كرشها : ههن ن ا ك كنكوت ا ل وجع بزاااف
شفايفها ولاو بويض وبشرتها نشفات من الدم البنت ولات جسد دون روح، شيماء تخلعات بسرعة خرجات باش تعيط لطبيب وهي كتحس داكشي زايد كيجهاد عليها تاشوية بدات كتغوت لربها لي خلقها الم لا يطاااااق كولشي فيها كيتقطع كتحس روح غاطلع منها وضباب كحل حدا عينيها.
وقف بطوموبيل حدى الموبل، نزل منها متوجه للعمارة وهو كيقاد فتيليفونو نمرتها ودوز الخط طالع فدروج يالاه غايوقف عند الباب باش افتحو جاوبات شي لي خلاه يوقف بلاما يخطي : آلو فينك ؟
اسلام : انا عاد وصلت احبي لطنجة نتا فينك ؟
رضى : سيري للدار نيشان والمرة حايا ماتبقايش تسافري بلا خباري
اسلام : واخا احبيبي مايكون غا خاطرك قولي بعدا نتا فين، محتاجاك !
بصرامة : أنا فالاباغطمون ديالي شنو بغيتي ؟
مع سمعاتف الاباغطمون ضربات فران سييك مخرجة عينيها لدرجة تيليفون طاحليها من يديها ورجعات تداركات راسها باش تهزو وتعرفو واش نيت دخل ولا لا.
رضى : الو ؟؟!
حيد تيليفون من ودنو شاف فيه ورجع دارو ماسمع والو قطع وجبد سوارت فتح الباب مع تخطا حس بالدوخة لدرجة حرك راسو بزربة باش اشد راسو، شد فالباب داخل تافشلات يديه وتجمعو عروقو عنقو تزيد والفك تعصر، صعقات كهرومغناطيسية دنوبة الصرع شدوه فراسو، بسرعة صبعان يدو تشدو بواحد القوة مزير عليهوم وركابيه خواو بيه طاح فالارض طلع يدو كيتحارب مع المرض ديالو كيشد فعنق وزمجر برجولية، بقا سدرو كيتهز ويتخبط مع الحيط بجهد.
نزلات من طموبيل كتعيط ليه دون توقف وقلبها كيزدح توجهات طالعة فالاسانسور شادا فكرشها، مع تفتح الاخير خرجات دايرة مع كلوار الاباغطمون، حتى كتفشل فبلاصتها واقفة مصدومة فيه طايح كيتصارع مع نوبة الصرع، والباب دالاباغطمون مفتوحة هو لداخل غوتات بالخلعة : ررررررضــىىى
جرات بجهد تاوقفات قبل ماتوصل لزاج مفكرة ورجعات جوج خطوات لور شادا فكرشها ماتقدرش تخطا هي عارفة شنو كاين تما خافت على ولدها بداو يديها كيرجفو كتشوفو طايح وماكاين لي يعاونو، شدات على قلبها كتغوت : رضىى واااش كتسمعنييي رضى نوووووض
حيدات المونطو ديالها والكاب رماتهوم عند الباب مفرشاهوم باش تقدر دوز لعندو بسرعة طاحت عندو جارا راسو لسدرها ضاغطة على سدرو باش توقف النوبة فيه، معنقة راسو عند سدرها كتبكي وتبوس فراسو : حبيبي انا هنا انا معاك عافاك فيق تهدن انا معاك.
بـــقا مدة حتا هز يدو مدورهوم عليها معنقها كرشها، ودمعتها طاحت فوق يدو طلع راسو فيها كيشوف عيونها، عيونها الزرقين، عيون البرازلية ديالو، سد عينو وعاود حلهم فاسلام : حبيبتي
اسلام : انا هنا انا معاك انا ديما معاك
حطات يديها كدوزهوم على اللحية ديالو.
صرخات بجهد بصرحة تسمعات فالكلينيك كاملة حتا تغمضو عينيها، وكان فنفس الوقت روح القطة طلعات.
يتبع
_____________
البارت الجـاي غايكون من اقوى البارتيات ديال الفصل الثّـاني
تفاااااعل جيد باش نكتبو 🕊✍🏻