" القُــبلة الآخــيرة "
Vote+ Comment فضلاً ولـيس أمراً
الكاتبة : زهــــور
حسابي فالانستا : @bezhorr
حساب الرواية : @merhamet_friends
كنعتاذر على التأخير البارت زدت فيه بزاف وطولتو
لي قرات تخلي تعليقات على الصغيرة والكبيرة وطبعا تحليلات تحليلات
صافي مستاعدين ؟
كولشي هنا استغفرو الله أولا 🌸
_______________
ناضت بسرعة من الناموسية قلبها كيضرب وباقا دايخة، رد فعلها خلاه ينوض حال عين وساد عين كيشوف فيها نطق بصوت مبحوح صباحي باقي دايخ : مالكي شنو واقع
غيثة : علاش بتييييي هنااااا
علا حجبانو وكيرجع يصغر عينيه دايخ طلع يدو كيحك على وجهو : خلعتيني البرهوشة
جبدات نضاضرها بزررة كتركبهوم باش تشوف : نوض خرج نوض نوض نوض نوض
جابتليه الضحكة ونايضة بداك ليزار هاكاك : ولاش جارا الغطا، راه باقا بحوايج خروجك !
دايرليها حركة استفهام بوحهو بمعنى سبحان الله اشريفة.
رمشات بعويناتها عاضا شفايفها ولاحت الغطا كانت باقا بدجين ديالها والجاكيت كيف طلعو كيف طاحو نعسو، دور وجهو كيضحك عليها ويمسح على اللحية ديالو مدوخ وماناعسش مزيان دوز ساعات من الليل كيتأمل فيها ماقدرش يفارقها ويمشي رغم انه واعدها بلي كيف تنعس غايرجع بحالو ولكن ماقدرش تالقا راسو نعس حداها.
جمع الوقفة باقي بالسبادري ديالو شافها كترد شعرها مخربق وكتمسح فعينيها بحالي حشمات تبان قدامو هاكاك وهي يالاه فايقة دار ابتسامة خفيفة على فمو : زوينة فكاع حالاتك غير رتاحي.
زاد حشمها كثر تاحناكها حمارو ودارت عاطياه بالضهر : صافي خرج خرج سير مابقيتش نتيق فيك ناعس حدايا حماقيتي صافي
تخطا الدورة دناموسية مقربليها ملور حتى حشى يديه مدورهوم على كرشها شهقات بين يدو كرد فعل لا ارادي وبسرعة ضرباتو ليديه : حيييد اويلييي
خشا وجهو بين عنقها من اللور وزير عليها مشبك يديه : فخبارك هادي أحسن نعسة فحياتي.
تهدنات مبتاسمة بشوية ورجعات عاودات غوباشات بزربة ضرباتو ليديه دافعاه ودارت لعندو : حيد صااافي خرج خرج ماكانتيقش فييك أنا قلتيليا غير نعس تمشي بحالك تخيل يشوفنا شي حد تخيل يعرفنا شي حد تخي..
هي كدوي وهو نتاقل من عينيها لشفايفها كيشوفهوم كيتحركو هز يديه دورهوم على عنقها من الوراء وبسرعة البرق جبدها لعندو حتى تلاقات شفايفها بشفافو، غمضات عينيها قلبها تهز.
حل فمو وامتص الشفة العلوية بين لسانو ورجع حول راسو للجهة اليمنى متفنن فتدوق الثغر ديالها، تقطع فيها النفس والقلب بدا كيضرب بواحد السرعة فائقة يديها رجفو طلعاتهم كتشد على القبية ديالو مزيرة بالقبضة ديال يديها، كتحس بالنفس ديالو سخونة ولسانو المتعطش كيدوق فالرحيق ديالها، الروح ديالها من لداخل تقبضات، وقشعريرة خفيفة طلعاتها خلات فائض فالاحاسيس يكونو ليها دموع فعينيها.
جبد يدو من مور راسها وحاوط عنقها وحنيكاتها من ليمن وحتى يدو ثانية من ليسر، دخل لسانو حتى تلاقا بلسانها، باغي يغوص فيها أكثر ثم أكثر، اختلط لعابهم لي زاد فاشتعال خريزتهم، زاد الدم تضخ فوجنتيها شي لي خلا لونها يولي أحمر من الفريز، حتى ولا كيلمس سخونية الجسد ديالها من يديه لي علا حناكها.
جمعات حجبانها بآلم ماقادراش تفتح عينيها ماكرهاتش العالم يسالي عند هاد النقطة ماكرهاتش الدنيا ترجع بيها ويكون رضى أول واحد طلاقات معاه فحياتها، ما كرهاتش تنسى راسها هي شكون ومنين جايا، ماكرهاتش تكون دابا ديال راسها وهو كذلك، ماكرهاتش ماتكونش غيثة، سدرها ولا كيطلع ويهبط بسرعة جنونية ودموع كيزيدو يتكبلو ويتكبلو، خايفة خايفة مايبقاش معاها مابغاش تأكد لراسها فكرة أنها تقدر مايكونش نصيـــبها، نصيـبها، نصيبها...
فاضو دموع فاضو، ونزلو سراب من عويناتها زادت مزيرة عليه حتى حس بمداق ملوحية دموعها شي لي خلاه يفصل القبلة باش ايشوفها هي بسرعة تخشات فحضنو ومزيييييييرة عليه لأقسى درجة دورات يديها على ضهرو بحكم قامتو طويل جا راسها مع سدرو كتبكي.
كيحس بشهقاتها الخفاف وبيديداتها لي قابضين عليه هبط راسو كيحاول يشوفها ويدو تكوانساو ماعرفش شنو يدير : حبيبتي مالكي !! واش حيت بستك
زادت تخشات كثر كتبكي وتبكي تاروحها بغى يخرج يمكن مدة طويلة مابكات على شخص بحال هاكا من ايامات مها الحنينة، عمرها بكات على شي حد ومدام دابا دارتها والا حسات بيه الشخص الوحيد لي يستاحق يشوف دموعها، الشخص الوحيد لي لمسات الامان ديالها معاه، عاملها معاملة انسانة، قدرها وعطاها قيمة، واخا هي ماكاتنتاضرش ولكن انسانة مفتاقدة لحنان عمرها لقاتو، سند باها لي عمرها كان.
دور يدو على ضهرها كيمسح عليه : غيثة قوليلي مالكي خلعتيني عليك.
نطقات كترجف وشهقاتها كيتقطعو : عافاك خليني هاكا شوية عافاك.
جمع حجبانو وسرط الخصة فحلقوسد عينيه متنهد : وقتي كولو ليك
زاد جمعها لعندو وجرها تاكلس مكلسها على حجرو مخليها مخشية فيه، دبلات شفايفها عنقاتو خاشية نيفها فعنقو ومدورة يديها على كتافو، غير عويناتها الحووومر الزرقين لي كيبانو كترمش بيهوم وتنخصص.
رضى : مال حبيبتي شنو ضارها نحضرو دابا، اليوم قبل غدا نفرتك كولشي ونخليك معايا
بعدات شوية وطلعات عويناتها فيه طلاقاو بجوج كتمشي بين عينيه نطقات كترجف : مابغيتكش تخليني، نتا الوحيد لي بقيتيلي من مور ماما الحنينة، ماعمرك غاتخلا عليا ؟
حجبانو تجمعو بآلم الجملة ديالو هرساتو بشكل كبير من الداخل لاول مرة كيحس براسو فاشل قدام شي وحدة حتى ليها
طلع يديه مرخي حطهوم على كنحها جامعليها اللحم بين صبعانو الكبار : كيغاندير نخليك ونتي وليتي مني ؟ مم
مسحليها دموعها كتسد عينيها تاكيدوزهوم على شفيراتها : كيغاندير نخلي هاد القلب البيض قوليلي كيغاندير ؟
ميل عينيه لشعرها المسبسب المطلوق ومد يديه ردليها خصلات مور وذنيها : كيغاندير نخليك ونتي وليتي الهوا لي كنتنفسو
زاد جرها لعندو هو لي حاوطها معنقها وحط فمو بين عنقها كيطبع قبلات حنينة : ماتبكيش، ماكنبغيش نشوف دموعك، دمعة من عينيك كتحرق فيا كولشي.
كيسرح يدو على ضهرها يرخف عليها وكيزيد احتاويها فالاضلع ديالو : معقول نخلي قلبي هادشي ديالك فات السحور
سمعها طلقات ضحيكة خفيفة من فمها خلاه يبتاسم وعضها بحال قرصة فعنقها : ماسمعتش
قفزات مبعدة عنقها : ايي هههههه رصاا
ضحك برجولية وجبد وجهو تاطلاقو عينيهوم بدات الابتسامة كتبهات فيهوم بجوج شوية بشوية تارجعات جمعات حجبانها بالم : ماخاسش نبقاو نطلاقاو وغايبقا قلبي معاك، وانا كيفما واعدتك غانرجع نجيب حوايجي من داك الدار ونرجع نسكن هنا.
رضى : الى مشا تاوقف فطريقك قوليه..
حطات بسرعة صبعها على فمو وحركات راسها باه ي انا قادا براسي ارضى شنو قتليك ؟ نتا ديالي وانا ديالك ولكن دابا لا، خاس نتفارقو منهم عاد نوليو مع بعضنا
رضى : واخا الالة هاحنا غانسمعو لكلامك.
تبسمات ونطقات بهدوء وصوت كالم انوثي : كنبغيك
جبد يدو ضرب بيها سدرو جيهت قلبو طايح على ضهرو فوق الناموسية ساد عينيه بقات كالسة فوق حجرو ضحكات غوت بجهد : والواااالييييدة اجيييي تسمعيييييي ولددددك شكون بغااااتوووو
ضرباتو على فخضو فين كانت كالسة : وصافي اويلي ههه مابقيت نقوليك والو
ناض بجهد تاتهزات موالف هاد الحركة فسبور وعضلاتو مفورميين مزيان : شناهو ابنتي ؟
غيثة : كنتي كطريني باش تعرف كيفاش تخدم البنت بششش
طلع حجبانو وهي ضحكات تاخرجات عينيها جابت العيد بام عينيه ناضت من عليه بسرعة وهو يضحك بابتسامة شرانية : كنعرف مزيان نخدمهم
غوتات كتسد عينيها : سكتنااااااا ماااااسخ عقلك مووسخ
ناض واقف غايسخف بالضحك كيقرب ليها : والخدمات عندي سانك ايطوال تجربي غانديرليك لابونمو.
غيثة : واااااااااااعععع ماااسخ خررررج خرجججججج
قربات كضرب فكتفو بجهد كتدفعو : اي اي مالكي باسلة
زادت كدفعو كتقربو لباب دبرى : خرااااااج علياااااا
مكالي بيدو من دقات ديالها : كتجري عليا من دااااااري صافا پا الكبيدة
غيثة : ايييه ماقلتي عيب هاهيا غاتخرج
علا يدو لسما غادي : الله ياودي هو لي غايخرج
فتح الباب مع خرج دار باسها فالهوا مع غمزة : كنموت على جدك
وقفات على الباب معوجة سيفتها غوتات : بااااااااي
زدحات عليه الباب فوجهو غوت من برى : مصعووووووورة
ردات عليه من لداخل : هو نتاااا مااااسخ
زاد كمل بالغوات : واااخاا مصعورة كنبغييييييك
ضحكات عاضا عل شفايفها طلعات يديها كتغطي فمها وتفكر القبلة ديالو وكلامو كتبغي تغطس فحوايجها، من طبعها حشومية بزاف كبرات فعائلة جد جد منغلقة وبعدها على كولشي سواء من خوتها ولا الناس لي قراتهوم خلاها تكون بنت منعزلة، ماعندهاش ثقافة لا فالجنس ولا فبزاف دالحوايج كتحشم من حاجة بسيطة، حتى من العلاقات لي عاشت مع راجلها نيت كانت عبارة عن جوج دممارسات وكلهم تقسحات فيهم بحكم تجربة جديدة ليها وماعارفة والو فعندها فكرة جد منغلقة على العلاقات الجنسية وماعارفاش كيفاش كيتمو بالشكل الصحيح وعندها خوف منهم بحكم الوجع لي حسات بيه فاول ليلا ليها، فكرة أن شرفها مشا مع واحد ماكيستاهلش كتقتلها من لداخل وكدمرها نفسيا وهادشي لي رضى عايق بيه وعارفها مزيان شنو كيدور فراسها غير من خلال كلامها وشخصيتها، داكشي لاش كيحسسها ديما بعذريتها وبلي المرأة ماشي بداك جليدة انما بروحها وقلبها عارفها عمرها بغات ولا عاشت الحب والعلاقات على اصولهوم وداير فراسو غايوريها كولشي.
هي عمرها هتامات بهادشي اهم حاجة عندها هي القرايا والخدمة معمرها عرفات الحب ولا حسات بشنو كتسمع قصص البنات على هاادشي حتى عرفات رضى، وهي بطبعها الحشومي والعنيد طلاقات معاه هو انسان جريئ ومطير البلاكة، هادشي لي كيخليها فينما تفكر فشي حاجة حميمية معاه الله اجعلها قبلة كتحسم وكتبغي تنشق الارض وتبلعها.
* النــاظور
فاقت بكري صلات وهبطات للكويزين لقات ميمونة كتوجد الفطور، قادات معاها طبلة وطلعات فيقات ايمان حيت رجعات للفاك من مور عام من الانقطاع تقريبا من اخر موشكيل كبير كان وقعليها، رغم الالم النفسية لي عاشت مور داك الكارثة ولكن شوية بشوية قدرات تخرج أو نقولو حاولات تخرج، دارت دافع براسها ورجعات كتكون راسها من أول وجديد، كتبني الثقة ديالها فراسها حيت هاد الدنيا هي ماهزيتيش راسك براسك ماغاتسنى حتى شي واحد يهزهو.
كيف هبطات رحمة كاطلاقا فوجها معاه نيشان، شـاف فيها مبسم هي قلبات عينيها قدامها وزادت بلا حتى رد فعل، مع تخطاتو شدليها يديها حيداتهوم ليه بزربة ودارت : صباح النور هبط تفطر أنا غانمشي لعند طه
مراد : أنا نوصلك
رحمة : مايحتاش قادا براسي
بصوت قاسح : رحممااا
رحمة : ماتهزشي عليا صوتك صافي، خاسك تكون ولفتي العيشة هايدة لا انا نعرفك ولا نتينا صافي كولشي مشا وسالا انا هنا على ود ولادي والا ماغانديشي نكمل ساعة وحدة ونهار كولشي يدير دارو غانمشي حتى انا
جرها بجهد تادخلها مع باب بيتو تعصبات رافعة صوتها : طلق مني كحماااقتي
كلاها مع الحيط وزدح الباب موراها غمضات عينيها : مراد حنا كبرنا ماشي ديال هادشي خليني نخرج
كالاها بيديه بجوج : كبرنا فالعمر اما القلب عليك عمرو يكبر واخا نكونو تحت من تراب
رحمة : هاد الهضرة كان كيخسك تفكرا قبل مانشوف تصويرك مع ديك المرا
رجفات فصوتها : ماغاااديش نسا ماااانقدرشيييي
غوت بجهد تاقفزها : مااااااااااخنتكششششششش امرتي ماخنتكش
هز يدو بجهد وزدحها بجهد مع الباب تاغوتات لدرجة طلعات عينيها بصدمة والم كتشوف واش تهرس حيت الدقة كانت مجهدة هو كانو عينيه حومر عينيها جاو فعينيه، عينيهوم لي ماتبدلاتش النضرة ديالهوم سنين وسنين : تيقتي بلي راجلك غايخووونك ؟؟؟
قلبها بدا كيضرب وعينيها عمرو بالدموع : تخايل لو أنك نتينا لي شوفتين..
جمعليها حناكها بيد وحدة تاخرج فمها : شششششس نقتلو
ضربات ليه يديه : ويانا ماشي هايدا الكاباييرو ماغانقتلك لا نتينا لا هي غير غانمشي فحالي
بغات دور تمشي عاود جرها من يديها معنقها مزير عليها وهي كدفع فيه وضرب فيه كان قوى منها باقا صغيرة فحضنو كيفما عرفاتو اول نهار وباقي هو بنفس عضمتو وطولتو وقوتو، هبط فمو كيبوس فراسها وكيشم رويحة شعرها الزعر لي ماكيشبعرش عينو من الشوفة فيه : ماغاديش نخليك على جنازتي ونهار لي غادي تفكري تخرجي من هاد الدار غادي نلبس البيض عليا
شهقات بصدمة الخوف ختلها فبلاصتها بعدات مطلعة عينيها كتشوفيه كترعد ضربات على سدرو وعينيها قطرو بدموع : كتقتلني كتقتلني كتقتلني انا انااا لي غانكوت قبل من كوولشي انا لي غاتخرج جنازتي فهاد الدار حييييت عيييت عييييت
غوتات بجهد : عيييييييييت
تفتح عليهوم الباب كانت ايمان : مااااماا بااباا مالكم.
دارت كتشوف فبنتها دفعاتها خارجة كتمسح فدموعها وكتبكي بجهد وبصوت.
تبعاتها ايمان بصدمة متألمة ودارت كتشوف فباها : شنووو واااقع ابااااابا شنو واقع !!!
دار كيمسح على اللحية ديالو العروقة غايطرطقو فعنقو قربات ليه كتشد فيدو : واش مزيان ابابا نجيبليك الما نتا مزيان ؟
كتخاف على باها مزيان هو اقرب واحد ليها وربما كثر من رحمة، هي بنتو وروح قلبو، طلع عينو فيها وجرها كيعنقها باغي يوصل لرحمة منها، هي نسخة عن مها فحنيتها واخا خدات قصوحية نغزة ديالهم، ولكن عطفها وحنانها من مها، لو ناكانتش هي لي كتحن عليه وتفكر فيه كون حماق، الولاد مافكروش فيه ولكن هي لي بنتو كتفكرليه فالصغيرة والكبيرة، وشكون كيبقا عند الاب من غير بناتو ؟
البنت لي ماكيبغوهاش، الولد لي كيتمناوه ديما يكون، ولكن فالاخير الولاد كلها كيدير مراتو وولادو اما البنت واخا تزوج واخا تولد كاتبقا ديما تفكر فباها.
دخلات لبيتها كترجف هزات تيليفون كتعيط لولدها كتشهق بالبكا وروحها غاتخرج كيف جاوبها طلقات صوتها كتبكي وتشكي : طه اجي اولدي لعندي عافاك اجي ديني منهنا مابقيتش بغيت نبقا عافاك
تنفض من بلاصتو كـان فالطبيب كيديرو فحوصات بالسكانير لسميرة معاه هيثم، خرج من تم باش يجاوبها : الواليدة شنو كاين ؟ شواقع ياك لاباس !
رحمة : اجي ديني اطه اجي لهنا ديني معاك مريضة اولدي عييت
غمص عينو مطلع راسو للسما، رجع عاقد حجبانو كيشوف بلي سكانير باقي معطل يالاه عطاوها ادوية تهدن ونعسوها فالبياص، رجع مشا لعند هيثم وهو كيشوف فساعتو : عندي عشرين دقيقة غانرجع لهنا راقب ختك ووقف بيدما جيت ولاوقعات شي حاجة عيط
وقف هيثم شاف فيه: هادي ختي ماتحتاجش توصيني
شاف فيه مزير على سنانو عقدهوم كثر وزاد قربليه : مكنوصيكش أنا كنقوليك شنو غادي دير
هيثم عرفو بلي صاعر عليهوم بالبيان ماغاديش يزيد يتجاكر على ود مصلاحت ختو حيت هو الوحيد لي واقع معاها ولكن مارضاش
خلاه حتى دار وهو ينطق : غادي نعيط للواليد خاسو يعرف بنتو فهاد الحالة البنت حماقت وغادخل للسبيطار
وقف فبلاصتو مزير القبضة ديال يديه حتى الدم تجمع فالعروق وتضخمو، ميل عنقو بشوية مطرطقو ورجع دار بسرعة ضرب ليه عند عنقو جمعليه التيشرت بيدو وحبدو لعندو تاخرج فيه هيثم عينو مصدوم ماتوقعش يشعل هاكا فرملية جات مع المنضر وقفات مخلوعة ماعرفات تقرب ولا تبعد، نطق بخشونة تاضربات فيه سخونية ديالو : ماتخلينيش نخرج فيك الجديد والقديم.
جبدو نطحو بجبهتو بالمهل : مرتي ماشي حمقة، الحماق هو تريكتكم المسلگمين لي محتاجين العشبة يسكرو عليها باش تبان رجلتهم وينعسو مع العيالات
رخـاه بجهد حال عينيه بصدمة مازال ماقادرش استوعب الكلام لي قاليه لدرجة يديه ترعدو بقوة الهضرة لي وحلات ليه فالحلق حيت بهاد الهضرة بحالي سب الجدر والطاسيلة بالرجال بالعيالات،
طه طلع عينيه فالفرملية هبطات راسها بزربة ودارت مشات بحالها بحالي ماشافت والو رجع شاف فهيثم : الى حكاتك الهضرة راك فهمتيها مزيان والمرة جايا وزن الكلام ففمك وبالخصوص على ختك.
دار مشا مخليه كيجمع الشتات ديال راسو لاح تيليفون كيدوز يديه على عنقو حاس بالخنقة ماكرهش يلقا شي حط احفرو ويدخل فيه مارضاش ابدا والعافية شعلات فيه .
خرج طه من السبيطار طالع ليه العصب لراس ونيت راه كيجمعليهوم فهاد اللحضة كلمة وحدة قادرة تشعلو وولا كيتعصب على ابسط احاجة بكمية المرض لي طلع ليه فالراس.
* الدار البيضاء
وقفات بطموبيلتها قرابة درب السلطان خلات الطموبيل بعيدة بزاف تقريبا فالشاريع البراني الرئيسي وهبطات بعباية فالاسود معاها بنت خالتها تاهي نفس الشي دايرين الزيوفة فالاسود ونضاضر كوحل باش مايبانوش هوما شكون هازين غير تيليفونات وهي مخبية الفلوس فالصاك لداخل.
تقدمو بجوج بنت خالتها لي عارفة الطريق بالضبط تابعاها بشوية دايزين من الدروبة وخايفين علئ رواحهم حيت البلاصة فين جات دار السلامة خايبة شوية والحي عامر شماكرية وولاد الدرب ضاسرين ماخلاوهومش فراحتهم تاوقفو على الباب ودقو فتحات ليهوم واحد البنت كتمضغ المسكة غليضة وعامرة وليميش واصلين نص فشعرها صفرين مكحلة عينيها والكحل سايح شافت فيهوم : شكون
جاوبات بنت خالتها بفرنسية معكلة : أنا مروى قوليها لللالة شافية غادي تعرفني
طلعات فيها وهبطات ورضخات الباب، دارت شافت فاسلام لي كانت نوعًا نا خايفة حيت اول مرة غاتكون فهاد البلايص: شوفي فيا خاسك توكضي راسك لابغيتي تقضي حاجتك هاد لالة شافية دقتها محصنة
هضرات بالفرنسية : جو سوي سيغ كو أيولي يموت عليك وينفض داك الحمارة
اسلام : شوفي أنا عمرني فهمت فهادشي ونتي لي جبتيني لهنا دابا قوليلي ماغايعرف بهادشي تاواحد ؟؟
مروى : نو رخي راسك واش كيحسابليك دوك لي ميل شيغ كيطيحو فعيالاتهوم فابور نجبدهومليك ما شيغي بالاسماء داك النهار كتعاودليا صاحبتي مرت الشاف، قاتلي لو تعرفي وحدة بالوحدة تجي تقضي حاجتها لالة شافية معروفة وكتخدم غير معاهوم خسك غير تهلاي فيها
اسلام : راه نتي عارفة اصاحبتي انا ماعنديش الموشكيل فالفلوس ولكن خاسها تشدليا راجلي حيت أنا تهديت معاه وجربت كولشي
جات تجاوبها تفتح الباب شافت فيهوم نفس البنت : دخلو
دخلو بجوجات وخطاو أول خطوة فشياطين الجن والانس، وترفعات التوبة من كتابهوم مروى سابقة اسلام لي طالعة بشوية حيت دروج قاسحين وهي كرشها فالثامن، حتى وصلو لعند الطبقة الفوق كان صالون مفرش ولكن دنيا ضلام وريحة البخور مطعطعة خنقات اسلام، كانت كتضن غاتلقا شي كهف هاكا كتسمع بسحارات ولكن هادي طلعات قاتليها ماتعرفي والو السيدة ملعقة وكتخدم خدمتها لي يشوف الدار من برى يقول اش خبارك من لداخل، واخا هاكاك بمقرانة مع الفلوس لي كتاخد كون راها شاريا الڤيلات.
دخلو لواحد البيت كانت كالسة مرأة كبيرة غليضة ووافية بقفطان من تراز قديم مامحزمش، رابطة شعرها بزيف موزون والوشام فوجها الكحل مجبد والعكر منور، ماكاتهضر ماكادوي، فيديها اللولة سرتلة من الذهب وفيديها ثانية خيط بالكحل فيه لويزة مرسوم فيه رموز، سنسلة هابطة حتى لكرشها، ماتقدرش طول فيها شوفة الخوف يركب فقلبك، شاعلة الشمع وبين رجليها طابلة صغيرة فيها كارطة مضموسة، جنبها مجمار مطفي مجمار غارق بفاخر نصو محروق ورمادي، واللور كانت تصويرة كبيرة لخط ماتفهمش شنو فيه ولتحت كانين قراعي صغار وكبار وكل حاجة شنو فيها، طلعات عينيها مع شافت اسلام هضرات بجهد : وقفيي
وقفو بجوج مروى رمشات فيها : هادي انا الالة شافية
اشارت ليها غير بعينيها : رشي عليك زهر لابغيتي ولدك مايتقاسش وطلبي التسليم.
سرطات اسلام ريقها وشافت فمروى طمناتها بعينيها هزات زهر لي حداها بالمرشة ورشات عليها عاد نطقات : تسلييم تسلييم.
تقدمو دخلو كلسات مروى وفجنبها اسلام واخا الكلسة دالارض عذباتها بقات كدور عينيها فالبلاصة حتى نطقات الشوافة : اسلام بنت جميلة، شانك عالي وباك عندو لي يتحرق مايتم، مزوجة براجل باقي صغير تاهو شان وهمة هادا ولدك اللول وعشك قريب يتفك،
حطات ليها كارطة برقم 8 وقلباتو كيعطي نفس الرقم شافت فيها : كاين هادشي ولا ماكاينش
اسلام تصدمات بقات مدعوقة كيفاش عرفات عليها هادشي طلعات حجبانها فمروى ودورات ليها راسهاب لا بمعنى ماقتليها والو.
بلاماتشوف فيهوم الشوافة جمعات الكارطة كضمسها وكتهضر : جوادي الزين لي علموني نسولك جاوبيني لاكنتي ماراضياش بجوازي الباب لي دخلك يجمعك
خرجات مروى عينيها : لا لا راضية راضية
نغزاتها : راضية الالة شافية اييه داكشي لي قلتي صحيح
حطات ورقة ثانية بجهد ونطقات كتشوف فيها : آش حب الخاطر ؟ جايا على محبة ولا غبينة ؟
اسلام : عليهوم بجوج الالة
دورات راسها بجهد وحركات الكارطة : راجلك زين وجايب العين، لي شافتو تبغيه
عضات اسلام عينيها : كاين هادشي
عاودات قلبات اورقة : ولكن وحدة لي فعينيه، هاهي هنا كاتبانليا الحنطية مولات العينين الزرقين.
خرجات اسلام عينيها : ايييه ايييه الالة هييي
جمعات الكارطة وشافت فيها : بغيتي راجلك يولي خاتمك ولا هي تخرج طريقو ؟
اسلام : بجوج بغيتها تندم على النهار لي فكرات تحط العين عليه تعذب كيفما عذباتني وتمرض فحياتها كيفما فكرات تمرضني وتبعدني على راجلي وتفرق الشمل بيناتنا، وبغيت راجلي يكرها مايوليش يشوف فيها يولي يشوف فيا غير انا ويبغيني غير أنا والحاجة لي قتليه يقوليا اه.
لالة شافية : هادشي لي طلبتي كثير وخاسنا عليه خدمة
اسلام جبدات الفلوس من ساكها لداخل وحطاتهوم ليها زرقالاف على الثانية مكمشة : هادو ديالك ونزيد نبرعك بلي بغيتي بغيت غراضي يتقضا البوم قبل غدا
لالة شافية : زربة ماشي من غصايلي ابنت الوزير، جمعي فلوسك عندك تاوكان تشوفي غراضك تقضا غاهو خاسك حصيصة تجيبيهالي باش نقضيليك فيها وانا من اليوم نبداليك
اسلام : لي بغيتيه يكون
لالة شافية : غدا تجيبيليا لسان طير، وتقلبي على قطة يالاه والدة تجيبيها، غاتمشي لصحاب المرايا تجيبي مرايا وتهرسيها وجيبيليا زاجها، غاتعطيني سميت مو وتصويرتو وتصويرتها
اسلام بقات غاكاتشوف منين تجيبليها هادشي
مروى : لالة شافية راه ماعندها منين تجيب هادشي
لالة شافية : ايوا تخلي رزقها وانا نقديليها كولشي، عطيني غا سميت مو وتصويرتهوم، وغدا فالعشية رجعي مور غراضك والباقي انا نبدا فيه من ليلا راجلك غايبدا يقلب عليك، ولكن ضاروري ترجعي مور غراضك وتديه تحطيه فباب دارها هي زاج يترش، والقطة غادي نحيدليها الواليدة كل ما القطة تبكي صاحبت راجلك يهبط منها الدم حتى تنشف ولسان الطير يخلي راجلك متيم بيك وكلامو يكون معقود غير بيك
تبسمات اسلام وهزات راسها : صافي مايكون غا خاطرك
جبدات تصاور كانت موجداهوم حيت قالتها ليها مروى حطاتليها تصويرة رضى وتصويرة غيثة : سميت عكوزتي شيماء.
لالة شافية : سيري ابنت الوزير وحسبي غراضك تقضا ليلا يجيك الخبار.
* طنجة
جمع البيسي فمحفاضتو كل خطرا كيجي لدار غير باش يجيب شي حاجة مابقاش كيحمل يكلس دقيقة هنا كيتسنا الوقت باش يفرتك الزمر، اغلبية الوقت ولا كيبات مع واليديه وشيماء والمهدي عارفين علاقتو متوترة معاها ولكن كيحاولو يهدنو الاوضاع ويخليو ولدهم يتكلف واخا المهدي ماعاجبوش هادشي وشاك فشي حاجة مور ولدو، جمع الكونطاكط ديال طموبيلتو وولبس حوايجو هابط مع الدروج دخل سيفطليها ميساج : امضرا جبتي حوايجك ولا باقي ؟
كانت يالاه خرجات من الدوش هزات تيليفونها جاوباتو : لا باقي خلي تالغدا
رجع جاوبها وهو متاجه لطموبيلتو : صافي لاحتاجيتي شي حاجة قوليهالي احبي
تبسمات يالاه غاتجاوبو شدها كريز دوجع بزربة تكمشو ملامح وجها حطات يديها اسفل كرشها : سسسس اححح
عضات فشفايفها مافهماتش منين جاها يمكن كريز دالبرد بغات تولي تجاوب ورجع شدها نفس الوجع تاكاتحس برجليها كيفزكو هبطات عينيها كتلقا قطيرات دم نازلين، مافهمات والو واش ليغيكل ولكن يالاه جاتها !
زاد شدها الوجع وغوتات هاد المرة بجهد .
مع وصل لطموبيلتو كيتسناها تجاوب حل بالكونطاكط جا يجر الباب كيفلت ليه بين يديه ضباب زار عينيه لدرجة الدنيا مشات وجات قدامو شد على راسو بزربة زلق ليه تيليفون طايح فالارض.
غوتات بجهد كتحس بالوجع غير مازايد وكيجهاد الفوطة البيضة عمرات دم اموغاجي جاها غير كتنزف
زلق ليه البيسي كيحس بالخنقة شداتو من عنقو والطموبيل مشات بيه لدرجة شد راسو بيديه بجوج راجع جوج خطوات اللور والدنيا ضلامت بواحد السرعة رهيبة لدرجة كيحرك راسو يمين وشمال باش احاول يرجع يشوف.
طاحت للارض كتمد يديها لتيليفون كدوزليه لابيل ودموع فعينيها كتحس بالسخفة شاداها
تيليفونو مليوح كيصوني وهو ماواعيش براسو، كاتسناه يجاوب حيت كتحس براسها كتغيب...
" ربما كـانت قبلتنا الاخير يا ليتنا تآخرنا بها قليلاً "
يُــتبــع
_______________________
البارت طويل جدا جدا جدا
ماغادي نقول والو هاد المرة نخليكم فصدمة الاحداث
من غير استعدو لآن لي جــاي يفجر العقول
رأيكم بالبارت وكولشي يخلي تعليقات ونجم ضاروري باش نكلمل