" آل ورياغـــل "
Vote+ Comment فضلاً ولـيس أمراً
الكاتبة : زهــــور
لي قرات تخلي تعليقات على الصغيرة والكبيرة وتحليلات تحليلات
مستعدوووووون ؟؟؟
كولشي هنا استغفرو الله أولا 🌸
_____________________
كيحس بيها كترعد وهي معنقاه، عرفها تخلعات ماشي ساهل على بنت 16 لي مولفة الحنية ديال ختها توفها بهاد الحـالة وخصوصا منين كتفكر عينيها كيفاش كانو حومر ونارية باش تقتلها وتفضـي عمرها.
تنهد وحط راحت يدو بجناب كتافها مبعدها كتنخصص وتمسح فعويناتها كان عاقد حجبانو شاف فيـها مطول : ماوقف والـو خاسك تزيري راسك حيـت ختك مريضة توقعي تشوفيها بهاد الحـالة، سميرة ماشي بعقلها حاليا هي ماكاتعرفكش.
حركات راسها باه كتنخصص غمض عينو مزير سنانو ورجع حلهم فيها : تشربي المـاء ؟
أمينة : ا ا انا ن نجيبو
بعدات منو حناكها حومر بزاف وحشمانة ومخلوعة تخلط عليها كولشي حنات راسها ومشات كتجري للمطبخ ماقدراتش مزال تزيد حتى تسرق الشرفة منو.
بسرعة جبـد تيليفونو حيت عقلو مع سميرة ملامحو صارمة ونضرة عيونو القاسية كتوحي بعدم الرضاء ديالو على هاد الوضع بالمرة، كيشوف حالتها لي كل نهار مكتزيد غير تغرق كثر وكثر، هو كيستمد الصبر ديالو من الله لتكثيف الصمود فهاد الايام.
توجه لصالون كالس بوضعية رجولية عاقد حجبانو وتيليفون فوذنيه كتاصل بالطبيب ديالها، عاودليه على الحدث كيفاش وقع بالتفصيل، وعطاه الجواب لي ماكانش باغي يسمعو هو أن سميرة خاسها تلتاحق بالمصحة النفسية بأقرب وقت.
فبيت ثاني بيت آل ورياغل بالناظور، كانت فالكويزين ميمونة حداها كتقاد فآتاي بحكم مصطفى ومرتو جاو يتغداو عندهم ويشوفو نونو وفنفس الوقت يطلو على خوه واخا فنفس المدنية ولكن كيجيو مرة مرة كلها فحياتو وهمو الانسان منين كيكبر كياخد تيقارو.
بقات ساهية، الكسدة حاضرة والعقل غايب، ومعامن يكون من غير محنة ولادها حالة طه ومرتو ماعاجباهاش بالمرة ولا حالة عصام لي مليوح بين الجذران.
ميمونة : رحمة رجوع الله في غاطسة هاد ليام ماكاتاكلي ماكاتشربي
علات عويناتها الزرقين فيها كانو حميمرين بكثرة البكاء والحزن فهاد الشهور لي عاشتو كان ثقيل عليها بزاف حسات براسها كترجع لايامها وهي صغيرة، الجهد باش تعيش نفس المشاكل دالصغر مابقاش دابا ولكن زمان كيدور : عييت اميمونة ولادي خلاو جمرة فقلبي كتحرقني، عين عند عصام وعين عند طه، شنو ندير ! كنشوف اللول لي ماعالم بيه غير لي خلقو وزادها بحريرة مرتو، ولا الثاني لي مليون فالحباسات وخاه مابغاشي يخرجو لمن نميل أنا !!
سكتات سارطة الغصة بلاما تذكر عشها لي مفرتك ولا فراشها لي تقسم مع راجلها هادي بحد ذاتها حرقة كبيرة شاعلة فروحها ماكاتبردش.
حنات راسها وخرجات من الكوزينة تاباش تكلس مع الضياف مابقاش ليها عليهوم خاطر، تبعاتها ميمونة بعينيها تاخرجات تنهدات : يا الحبيبة ومزالة صغيرة وغاتشرفي قبل الوقت لي ماصابك بعين زينك يصيبك بعين وليداتك، الله اصاوبليك الحبيبة.
الدعوة صدقة، وهي لي توقف معاها، كملات بخطاويها ثقال لبيتها ودخلات محيدة زيف باش اتطلق شعرها على مزيناتو مؤخراً تاهي بدا يطيح ليها بقوة الاعصاب والحزن لي كتعيش، رغم السنين الا ان جمالها مانقص منو والو من غير انها زادت تنورات لما لا وهي باقا فمقتبس العمر كيف ودعات الثلاثينات ودخلات للربعينات، لي يشوف ولادها مايقول هي مهم وهادشي لاش قالت ميمونة العين لي ماتصيبها على زينها تصيبها على ولادها.
ولدات وهي صغيرة وتعذبات وكافحات وكبراتهوم تاولاو صحابها ماشي ولادها هادشي لي خلاها توقف بالنص وتفكر فيهوم كثر من اي حاجة عندها فحياتها.
كلسات فالناموسية وجبدات تيليفونها دخلات لواحد التصويرة قديمة ليها هي وعصام وطه وايمان باقا يالاه تزادت هازها مراد، تبسمات ودمعة خفيفة نـازلة من عويناتها، هزات صبعها كيرجف حطاتو فوق طه، ورجعات دوزاتو على عصام، وعلى ايمان.
ربي رزقها بثلاثة دالوليدات، ثلاثة ديال ثمرات نتيجة الحب والقصة الاسطورية لي تروات فالريف، ديال بنت الجبل لي تزوجها كبير آل ورياغل وخطفها للتمسمانيين من قلبهم، حرق عليها الغلة وتزوج غير باش يحميها، شهور وشهور كيقلب بالليل ونهار باش يلقاها واخا ماعارفها حية ولا ميتة، المرأة لي عشقها لي جات كتجري طالبة معاشها وطالبة حضن يحتاويها، المرأة لي حافضات على شرفها وولدات ولدها اللول وهي بنت يالاه قفلات 16 ولداتو بين أرض ماعارفة لا دينها ولا لغتها، خدمات ودمرات وكافحات باش ترجع واحد النهار محملة رضيعها لراجلها، هي قصتها ... طلعات صبعها كيرجف كدوزهوم عليه، هو ملك قلبها الوحيد الرجل لي عشقاتو وعمرها تعشق غيرو، طلعات نخصة من أعماق أعماقها توحشاتو وتوحشات تكون بين يدو خايفة لا تسرق الدنيا عمرهوم والموت يفرقهم هاكا، واش صافي هادي نهاية قصتهم لي حاربو عليها !؟
حطات تيليفون جنبها كترجف ومدات يديها لوجها مغطية عينيها كتبكي بصوت، نخصة مور نخصة كيخرجو من قلبها، رغم الولاد ولا طولت الزمان ولكن داك الراجل عشقاتو وعشقاتو أصالتو عشقات آمانو وحبو، هو تاج الراس ومول دارها.
فمكان آخر كان موقف طموبيلتو جنب المرصة كيشـوف قدامو فالبحر بمواجو العالية كيهرس، ريحة الحوت والباطيلات، هضرت التجار كيتبايعو والطيور كيحلقو يقلبو بعينيهوم على الحوتة لي ماكنها فايدة ياخدوها قوت لنهارهوم.
موكي على الكوسان دمكان المقود فالصمت وكيتفرج قدامو نضرة عينيه ماتبدلاتش الكابييرو هو الكاباييرو عينين نسر ولد الثلاثين، الجبل لي ماكيهرسو ريح، بين عينيه حياتو لي عاشها من نهار دار ولادو، من نهار حط طه بين يديه، الولد لي خاف عليه من ريح لايقيسو، اخخ لو يعرف بلي لو كانت حياتو تفدى ليه يعطيها بلاما يرمش، عارف هاد الدنيا ماساهلاش، بناادم شراني وخايب، من نهار بدا يكبر وهو خايف عليه، ماينكرش انه خاف عليه كثر من عصام وكثر من ايمان ماشي حيت كيبغيه، ولكن حيت شاف ولاحظ، الحكمة لي كان كيفكر فيها من صغرو، الفطنة الرزينة، رجولتو لي تنبعات فيه من ولادتو، طه تزاد نسر من صغرو خدا منو كولشي وهادشي لاش خداه بلحاج باش يكون ليه وريث وسلمو زمام الامور.
ندمو باش خلا طه قريب لباه لدابا كياكل فيه، بلحاج باه ولكن كان عارفو قاسح فتربيتو وهاكاك كيربيهوم قسى على طه بزاف وخلاه مرتابط، كان ديما كيبغي يبعدو من صلب باه ويرجعو ليه وهادشي لي خلا الولد يكبر مشتت بين قررات جدو وقرراتو هو، بلحاج خدا طه نقطة ضعف لمراد باش اخليه ديما تابت، ماعمرو ينسى نهار قرر يخرج من أرض العشبة، نهار قرر يخلي الحرام مراه.
***
وقف بعصبية مغوت حتى تفزعات نونو ناضت كتهدن فيه : بغيتي تسكت ليا القلب وتطيح وجهي قدام القبيلة ؟
مراد: لي عندي راه قلتو الواليد الله اخلف هادشي ماغايساليش وعمرو يسالي الحرام كيقطع الرزق ويسرق الفرحة من الدار، مانعيش ولادي فهادشي
بلحاج : صعرتي تنفخو ليك الكتاف بجوج ولاد ؟؟؟ ولدتكم بثلااااثة وشديت عصبة جدك بين عمامك بغيتهم دابا يطلعو فوق راسنا نسيتي بلي حنا لي حاكمين آل ورياغل !؟؟؟
غوت بجهد : الوااالييييد بغيتي تبقا، بقاااا ولدتي ثلاثة، ها مصطفى وها محمد دالع فأوروبا تا ولادو سامح فيهوم، اش هاااااد العيييشة ؟؟؟
بلحاج : ماغاتقدرش تخرج منهنا وعمرك غاتخرج، هادي خدمتنا وخدمة جدودنا، غانورثوها لحفايدنا تبث راسك، حنا روافا ماكانهبطوش راس هادي ارضنا وهادشي لي جا فرزقنا.
غمض عينيه معصب مزير على يديه : ولدي ماغاديش يطلع بهادشي أنا غانخرج ولادي منو
بلحاج : كتناافي باااااك، كااااتعاااارضنيييي ؟؟؟؟؟
نونو : اوااش حماقيتو نعلو الشيطااان سبر عند مرتك اولدييي رجووع الله اديرولينا الفضيحة
عض فسنانو عينو ماكيزقحوش من عينين باه دار طالع هضر بلحاج بالغوات : ولدك حفييدي وحامل دمي وغايمشي بتربيتي.
ماجاوبوش طلع معصب
***
حل عينو كيشوف فالبحر مزير على القبضة ديال يدو كيتفكر ان مورى داك النهار خلا ولدو يشهد ضدو هادشي كامل باش مايخليهش يخرج من الحشيش.
ديمارا طموبيل راجع بشوية للدار تاوقف حدا الباب ونزل لقا خوه ومرتو مشاو سلم على مو وطلع بشوية مع الدروج توجه لبيتها، دخل فاتح الباب بالحس وقرب بخطوات مهيلة.
ناعسة كيف الملاك حبيبتو ورفيقة دربو، حنى بشوية ماد يديه لشعرها الزعر كيدوز عليها بشوية ميشوف ميفاش رقاقت والحزن غالب على وحها حرقوه فقلبو وفولدو وفمرتو، علاش ديما منين كيبغيو يشدوه كيهددوه منها، واش لهاد الدرجة كيبان حبو ليها قدام لي أمة الخلق، هز يديداتها الرقاق والضعاف بين يديه الكبار طبع عليهوم قبلة عميقة حتى شم رويحتها تبسم بشوية كيتفكر هاد اليديدات أول مرة شدو فيه، أو مرة ترماو لحضنو، طلع عينو فوجها، وجمع حجبانو بآلم : سمحيلي، عمرني خنتك وعمرني غادي نخونك.
قرب طبع قبلة على جبينها وعلى حناكها، كيطول بزاف فالقبلة ماكرهش يخشيها فيه ومايوليش يخليها تبعد ناض بشوية غطاها وبقا كالس حداها ماساخيش يخرج من حداها يا ريت لو كان يهزها ويهز راسو يمشيو لشي بلاصة غابوحدهوم عياتو الدار هم الدنيا والولاد، توحش يكون بين احضانها راسو فراسها، دخلو بيناتهوم وفرتكو شملهم ولكن ماعمرو غادي يعيا ولا يقول براكة وطول ما الروح فيه غايعطيها فحبو لي بلا حدود، غايسعى لسماحتها حتى يدي مول الامانة آمانتو.
وذكر أن حب مراد كان بلا حدود، لم تنقص منه السنين شيئا بل ضلت رحمة حياته ركيزة القلب والروح.
وقف هيثم طموبيلتو طلع للدار لقا سميرة فايقة يالاه كلات كالسو فالناموسية كتشوف فالفراغ حداها امينة كالسة هازا تيليفونها رغم انها خايفة ودايرة الاحتياط لايوقع شي حاجة.
شاف طه خدام فشغلو مابقاش قادر يخوي الدار ويخليها، قرب ليه حط الكونطاكط فوق الطبلة وگلس حداه : أمضرا أش قاليك الطبيب !
جاوبو بلاما يشوف فيه: غادي نديها لكلينيك غدا خسها مراقبة طبية.
بخوف جاوبو : و واش غاتكلس تما !
طلع عينيه ببرود شاف فيه : إلى اقتضى الحال هادشي لي غايكون
شرط ريقو كيشـوف فيه تردد باش اهضر ونطق فالاخير : طه لاكنتي اخويا عيتي سميرة كتبقى ختي وغانهزها واخا مايبقا فيها والو حالتها صعيبة وا
هضر بسرعة رافع صوتو شوية بجدية : شكيت عليك ؟
سكت كمليه هضرتو بزربة : خليتها ليك مرة وحدة وضيعتيها بين يديك ماقادش على المشؤولية لا نتا ولا باك لي حاشا واش يكون اب
سرط ريقو اول مرة كيتلبك حشم ماعرف باش يجاوبو : الواليد عارف احاولها وكيسول عليها يا..
قاطعو ضارب يديه مع الطبلة بجهد حتى قفزات امينة واخا كانت فالبيت بعيدة مع سميرة ولكن الدقة كانت قوية : علاامن كضحك اولد التمسماني ؟
طرطق صباعو رافعو فحيهت وجهو : لا باك ولا عمك واحد بواحد غايتحاسب على كاع لي داروه مع هاد البنت، وسير قول لباك يوجد راسو ولا عندو شي حساب يصفيه قبل ماتجي نوبتو.
جمع حجبانو : اش كتقول اطه واش نسيتي كنبقاو نساب
وقف بعصبية : أنا اليد لي تمد على مرتي كنقطع لمولاها الراس من جدر اشريف ماكانعرف لا تسيب لا حبيب، تريكتك ماتباع ليها الرجلة تا بلكيلو، الحق كيتخلص هنا فدنيا ونصيفطوه عند الخالق يزيدليه.
تكا بيديه بجوج على الطبلة عينيه حومر فيه خافض صوتو : مانسيتكش على شنو درتي فختي اخو مرتي، عنداك احسابك ناعس على وذني ؟ الريف لي كتشوف كامل قدامك هنا تحت من عصمتي، لا باك ولا معارفو ولا سيادو غاييوقفو فوجهي، قبيلة ايتوزين حكموها آل ورياغل من زمان ولدابا مزال حاكمينها، الدقة كنرضوها غا كنخليو الشمايت ينساوها ويدلعو بين اراضي العشبة باش تجيهوم الغلة غالية.
ناض واقف بصرامة عاقد حجبانو هضر بهدوء : وصل هضرتي لباك قوليه مابقا عندك هنا بنت وسميرة يترحم عليها.
ناض هيثم واقف والخوف تملك فقلبو خلا عينيه فعينين النسر، ضاغط على سنانو عرف بلي لي جاي ماكيبشرش بالخير، وباه شعل عليهوم عافية ماغاديش طفى حتى تحرق كولشي.
مازادش كلمة تحرك خاوي من قدامو معيط لختو مع جات جرها معاه خرجو من دار بقا متبعو بعينيه حتى خوا وطلع كيقاد ساعتو بشوية مصغر عينيه كيرجع للهدوء ديالو.
تحرك بشوية دخل لعندها گلس جنبها هز يديها نطق بهدوء كيشوف فعنيها : كيبقيتي شوية ؟
هو عارفها ماغاتجاوبش وعارفها ماغاتردش مع ذلك كيحاول يتجاوب معاها وييخليها تحيي الواقع لي بين عينيها واخا قدرة الاستعاب ماكايناش عندها كتحسها عايشة فعالم ديالها بوحدها عالم مليئ فقط بالذكريات لي ناكانتش باغا تفكرهم وهادشي لي سبب ليها بفقدان الذاكرة، داك الرغبة دالعقل الباطيني فأنه مايتفكر شنو وقع، خلاها تعيش حياتها مع تراكمات مخزنة فالذاكرة، ونهار لي رجعات عليها داك الذكريات نساتها فالعالم ديالها الحديث لي كتعيشو وخلاتها تنغالق فقط على طفولتها.
ضيـاع وتشتت
* طنجة
صباح جديد وأشعة تسلتات من الشرجم حلات غيثة عويناتها بشوية دايخة بنعاس كتحاول تستوعب هي فين، مع دورات عينيها كتشوفو ناعس وغاطس بدات كترمش وكتحاول توضح شوفتها النظر عندها ناقص، واخا من ريحتو عرفاتو قلبها كيضرب وسرطات ريقها، كتشوف راسها فين هي، تحركات بجهد شي لي خلاه يتعنكش حال عينيه بشوية عضات شفايفها بصدمة قافزة من بلاصتها جارا الغطا ناطقة برجفة :
" ر ررضى "
يُــتبع
______________
هنـا كيكون سالا البارت داليوم كان قصير شوية 🌝
صدمة غيثة ورضى 😭
وقعو بزاف دالاحداث، رحمة لي الحزن مسيطر بزاف على حالتها وعايشة واحد الدوامة كئيبة جدًا بماذا سوف تنتهي واش بخير أو بشي حاجة لي خايبة !
طه اليوم توضح وبدون شك أنه كيخطط لشي حاجة وهاد المرة كبيرة بزاف غير هو لمن بالضبط وشنو ناوي يدير وكيفاش وفوقاش وهادشي واش فخبار شي حد ولا غير هو بوحدو !؟
سميرة للاسف غاتدخل للمصحة 😭 يا ترى كيفاش غايكون تعامل طه مع هاد الحالة وهي فين مزال غايزيد بيها المرض !
هيثم يا ترى هاد المرة بشنو غايتصرف واش غايعلم باه وغايخاف على عائلتو والصمعة ديالو ولا غادي يتسنى ويشوف تاهو الحرب لي غاتنوض !؟
ودابا نحيو للصدمة لي صوطاتنا وهو شنو وقع بين رضى وغيثة واش بصح غلطو ودخلو فزنا !؟
رأيكم فالبارت وتوقعاتكم للقادم 🔥