بين ًسًـــلاسل العادات

بارت 37

﷽

#بين سلاسل العادات
بقلمي: كفايه

لاتنسون متابعة الحساب 🤍
التصويت والتعليق بين الفقرات

"" "" "" "" "" "" ""

الى اين؟
ابحث عن اشراقة لروحي المعتمة
وهل وجدتها؟
بلى، ولكن انقلبت الموازين وبقيت العتمة مستوطنة
الا يوجد شخص بانتظارك؟
يوجد لكن تعب من الانتظار
اخبرني من انت لاحكم؟
سأخبرك واسأخبرهم عن طرقاتي...

طفل صغير يحاول الهروب مع والدتة ليذهبو بعيدا عن سلاسل عاداتهم لكن...

قتلو والدتي امام عيني...

بين نوبات الصدمة والجنون والانكسار نهضت من اجل اخوتي الصغار...

كنت ابتعد عن نوبات الجنون لاجلهم كنت اردد تلك العبارة ..

-اني ابوكم وامكم احطكم برمش عيني
حبيبي حر دير بالك على اختك بين مارجع

-اي بس جيب وياك حلويات

صار

بستهم ورحت مثل كل مرة بحفظ الباري عفت روحي وياهم رجعت مسوي الدرب خطوتين حتى اشوفهم بيدي علاگة الحلويات وابتسامتي على خدي افرح من اشوفهم ضحكتهم المصبرتني ومخليتني عايش

رفعت العلاكة وفتحت ادية اضحك وهما يضحكون اجو باتجاهي بجناح الملائكة ضحكاتهم ولهفتهم غزت روحي وانخطفت روحي بلحضتها..

القدر حتى على اخوتي لحگني ماتصورتها هيج قاسي وشاد وياي ..

عقلي طار واني اشوف اخواني كل واحد بصوب دمهم بطولهم امسح بية اريدة يروح من وجوهم اكوم لحر البلركن مشمور اعثر واكوم اصيح..

-حر خوية حر كوم اكل كووم جبتلك جبس

مابية نفس حري الجنت انتظرة يكبر ويصير سند الي عافني وراح من البداية الجنت اتخيل ازفها بيدي روحها طلعت وهي جوعانة منتظرتني اسويلها اكل

متت هنا متت اني...

فترة من عمري عدت ماتذكر تفاصيلها
انجنيت الكل اتخلة عني بحالات جنوني..

خلص كالو انمار تخبل وايسو مني..

ومثل كل يوم نايم بالدرب الماتو بية ودموعي على خدي الناس صارت تسميني" المخبل " مو بس اثر الحادثتين لا ابوي من جان يشوفني هيج يكتلني لحد مايتعب وجان يكول...

-هم ابن زنا وهم مخبل الناس تعيرني بيك واخوتك ضيعتهم

جان مفكرني مو ابنة لان وصلة كلام على امي ورتبولها موقف رديء، شفتها كدامي هي واخوتي مسحت على راسي بحنية وكالت بصوت عذب:-يمة ينمر ليش تحرگ گلبي عليك

-يمة انتي وين فدوة يمة اخذيني وياج ليش عايفتني يمة ذبحوج واخواتي ماكدرت اعيشهم

-لا يمة شوفني مابية شي شوف اخوتك ذولة وياي مرتاحين شوفهم لعبو ونامو يسلمون عليك

-يمة واني اخذيني وياج حتى كلنا ننجمع سوة

-لا يمة ينمر انت تضل تشوف بعينك الدنيا كوم نمر كوم لاتخلي الناس تحجي عليك ويحترك گلبي صير سبع حتى افتخر بيك...

ذاك الطفل المجنون نهض رجع لدراستة وعاش بين انياب الحياة القاسية جنت معتزل عن الكل...

بداية شبابي حبيت حسيتها معجزة لان جنت احس روحي منبوذ وفعلا اكدتلي الحبيتها اني منبوذ تزوجت وعاشت جانت تمر مني لازمة طفلها

فوك عقدي زادتني عقدة ومحيت ذرة المشاعر الضالة بروحي واهسي انطفا بكلشي حتى بالدراسة...

بيوم جنت جاي لبغداد عندي شغل واشوف عمي حمزة طبگت السيارة گبال بيتة واشوف بنية كاعدة بعتبة الباب تشع من شدة بياضها استغربت من وجودها منين هاي وشعدها بالشارع نزلت ولكيتها عقل طفلة انطتني شكر لمة اباوعلها تبرج مثله ..

-تريد شكر لمة شبيك والله طيب وبلاش

ضحكت على سوالفها بگلبي وعلى برائتها تمشي وكصيبتها تفتر وراها هاي لو عدنة مزوجينها جانت مختلفة لبسها وتفكيرها وحتى شكلها...

تفاجات من عرفت بيها بت عمي حمزة شلون مخليها بعيدة عنة حتى لو عمتي هند خوش مرة ولدها كذلك بس تبقة بت شابة وبين شباب محرمين عنها....

كالمعتاد ماجنت ادخل باي شي يصير بس جانت الصدف تجمعني بيها جنت اشوف ابن عمها عادل واقارن بشخصياتهم احسة مجنون وهي تخاف منة...

القدر هو البعدها عن بيتها وبعد اخوها عنها يمكن لو حياوي جان موجود بذاك اليوم ماجنت ادخل واعقد عليها ..

شائت الاقدار وصارت حصتي من بعد ماحميتها منهم اتزوجتها و جنت مقرر بس تكمل دراستها وتعتمد على نفسها اطلگها لان ماطيق وجود احد بحياتي اني وروحي مامتصافين جنت استحي من تجيني الحالة واحد يشوفني تصرفاتي تصير غرببة وعدوانية تصير ...

من شفتها بالبدلة البيضة ماجذب ردت اتمم الزواج بس من شفت برائتها وكلشي ماتعرف اصريت على قراري وجنت دائما اعوفها واطلع حتى لاتغريني تصرفاتها العشوائية ...

جذبتني تصرفاتها وروحها بس ماخلفت وعدي بفترة مرضها حسيتها طفلتي جنت اداريها مثل الاب من يداري بنتة حبيتها وروحي صارت بيها بس ماكدر اكمل بعلاقتي منها....

بيئتي وابوي وعاداتنا جبرتني اتركها حتى لاتتأذي
وهم جنت خايف ماتتحمل العيشة وياي وتعوفني حقها بت دلال محد مسمعها كلمة تجي لابوي يهين بيها وبزوجها ماكو وحدة تتقبل هلشي ...

خفت ينكسر گلبي بروحتها تعودت على سؤالها واهتمامها البسيط على الاقل تسال عن حالي..

صار العكس واني العفتها وخليتها تعيش العشتة ماطلكتها حتى محد يجبرها على الزواج وتكمل براحتها وهي التقرر شلون حياتها تصير...

جنت مراقب اخبارها اول باول كلشي تحتاجة ادزة الها حتى مصرف المدرسة منطية بيد امي...

رحت اكمل الطلعت علمودة...

التجأت للحارث لان ماعرف غيرة كملت سنة البقتلي وصرت محامي بس مو محامي عادي محامي الحارث وجماعتة اخذ قضايا السياسيين والروس الكبار بفترة زمنية قليلة صارلي اسم جبير ويوم عن يوم استلم قضية اكبر من الخ وهنا صارت عندي عداوات وكل يومية تهديد يجيني بس ماجنت اهتم لان مستحيل يكدرون يأذوني لان تابع للحارث...

خلال هالفترة جمعت نفسي بنفسي طول الوكت اشتغل مكرس والوقت للشغل اصدقائي وكعداتي وي محامين كبار بالمجال حتى اكتسب خبرة اكثر جنت اتواصل وي ولد عمي واعرف اخبارهم بس ماكدر ارجع جنت اخاف يعرفون بيهم اهلي ويهددونهم بية لهذا السبب بقيت بعيد عنهم حتى مايتاذون من ورة شغلي...

لحد هذا الوقت الكل يعرفني من عائلة الحارث لذالك ا العب بيهم براحتي مطمئن...

اما شكر جانت رجعهتا لبغداد مو بصالحي اخاف عليها يعرفون هي تخصني ويلزموني من ايدي التوجعني ابتعدت عنها بعد ماجنت اشوفها من بعيد لبعيد...

شكد متلهف اشوفها كبال عيني وشكد جنت يجي هذا اليوم الاخلص كلشي بية وارجعها بعالمي الجديد بس ماعرف شلون راح تكون الصدفة التجمعنا ...

رجعت لاهلي بافراحهم وجنت ناوي ارجعها واكلها تعاي لبيتج الرتبتة الج بالشي اليناسبج تعاي لروحي ادخلي بنصها تعاي اضمج بضلوعي هواي كلام وهواي مواقف راسم ببالي من نلتقي شلون راح تكون ردة فعلها...

ويبقة السؤال المهم شلون نلتقي؟.

***

سجى"

واگفة على صفحة عيوني تفتر بينهم على ثغري مرسومة ابتسامة حقيقية اضحك من يضحكون احس فراشات بداخلي من الفرحة صارت فرحتين برجعة انمار...

حجالنة اشياء مختصرة عن حياتة وليش عافنة كل هالمدة وبس ...

عمي فايز سلم علية من بعيد ويبتعد عن المكان اليكعد بيه مانجمعو سوة لحد الان، اما فرحة عايشة ماتنوصف كل شوية حاضنتة تبوس بية...

نزار:عمة شني السالفة خنكتي الولد

عائشة:-وليدي هذا مشتاگتلة موت

انمار:-غاليتي حگج علية

عائشة:-لاييمة حگك علينة كلنا

جدة حكمة:-حبوبة كونك راجع رجع مريتك هجرتها سنين شتگل لربك اذا ماتريدها طلگها خليها تشوف دربها

انمار:-حجية دربها ودربي واحد ماكو طلاگ تضل باسمي بس ارتب اموري ارجعها

جدة نوڤة:-ومنهو گال ترجعلك شني الشغلة على كيفك تعوفها يمتة ماتريد وترجعها يمتة ماتريد ترة البت صح تشوفها فقيرة بس موش هينة وترجعلك

انمار:-ترجع حجية اطتني كلمة جا انا كل هذا السويتة المن لابوي

جدة حكمة:-ضامنها يو ماضامنها تحبة وتصبر ماراح وعافها يلا يجدة شد حيلك ورجعها

انمار:-مرتي ماترجع هنا تضل ببغداد هناك بيتها

عائشة:-هاي هية ينمر تعوفني وتسكن ببغداد چا انا مو امك

انمار:-بيتي مفتوح الج تاخذين غراضج وترحين وياي بس مال ارجع هنا هاي مستحيلة

جدة نوڤة:-ليش ولك يمفلوك جا موش حنة هلك تعيش بالغربة وجهالك يكبرون بعيدين عنا

انمار:-ماترهم حجية شغلي كلة هناك شلون اضل رايح راجع ماترهم وهي جامعتها هناك

عائشة:-تتهنة ييمة وين ماجنت الله وياك وگلبي وياك ادعيلك بكل زمان ومجان اهم شي انت مرتاح شنريد اكثر من هاي

باس راسها لزم ايدها طبع عليها قبلة راح كام شال علي يبوس بية ويشمره فوك وعلي يضحك ويصرخ

فارس:-ولك ابني لاتطيحها ويتكسررر

انمار:-مايصير بية شي لاتخاف بايدي امينة هههههه

فارس:-خرررب بليسك الا اگوملك ابنييييي انماااار اصخااام بعينك

حضن علي لگلبة يبوس بيه وفارس لازمة مخنزر علية يخاف لا يوگعة...

فارس:-ديلا جيبة

انمار:-شبيك ماشايف جهال قحط خليني العبة

فارس:-اكلتة انمااار شني هاي مو بوسة طيرت خدة

انمار:بكيفي اكلة ابوسة مالك شغل

فارس:-هو شني مالي شغل ابنييييي هذا

انمار:-وانا عمة شني بس الك واذا ابنك

فارس:-عمي شيلة بس لاتشفطة

انمار:-امووووح اححححح شطيباتة

فارس:-خاب كون مرض بحلگك

ضربة انمار دفرة ونزل علي يضحك على فارس صار اعصاب...

عائشة:-كونك تحب الجهال يبعد امك رجع مرتك

حجة بصوت ناصي وفارس طگها ضحكة قوية وانمار ضل خازرة....

نزار:-خفة هالشكول ماتحجون شي مو كتلنا الفضول

انمار:-المزنجر التهي بالمسلسلات صدك بعدك اتابع عمار كاسوفي

نزار:-عموري اووي نيرمين الخاينة كون صچيچة بگلبج اححح شذكرتني بايام الغوالي لا ولك صار قديم طبن مسلسلات جدد ولك دهر الممثلات يخبلن مدري منين يجيبوهن جمال الكون بيهن

اباوع لزهراء عيونها دمعت بعدة يحجي واجاة راجدي على ضهرة خسفة خسف...

نزار:-احترگتتتتت روحك المجسببببب كووون طلقة بنص گلببببك الجلببببب

جاسب:-حتى بعد لاتعيدها وتضل تصجم بالممثلات جدام ذولاك الناس(زهراء)

نزار:-يمة ضهري يمممممة اكول رغيدة شردت منك الله يساعدها عليك كون بجاة ام البنين تطلگ وتزوج غيرك

كالها وراح صار ورة انمار وجاسب يريد يكطعة بسنونة:-انمار بصايتك انااااا ولك لاتعوفني فريسة للجلاب المجلووووبة

جاسب:هسة اعلمك الجلب شيسوووي بس اطلع خل اشوف وجهك الا اشگة بالنص

نزار:واختك تضل ارملة حتى محد ياخذها يكولون كصتها فكر تضل على كلبك نايمة

جاسب:-خاب الخايس اختي الف واحد يتمناها دطلگها وشوف شلون ازوجها لتاج راسك

نزار:-خاب تاج نعالي الفسفوري مو احسن والله يالله هو وين اكو واحد احسن مني

انمار:هيووو احترمووو وجوودي شمالكم مجلوبين

جاسب:-ماشفتة شلون يحجي

انمار:-شفتة يخوي بس عوفة خطية دخل بصايتي لخاطري عوفة

جاسب:-بس هالمرة لخاطرك

انمار:-عفية باخوي السبع

نزار:-سبع باسبع جلب هذا

انمار لزم جاسب يريد يهد علية ونزار شرد من وراه
كعد انمار يضحك ويسولف وي حبوبتي...

رحت لشروق لكيتها تلبس بعبايتها راح ياخذونها للصالون يسون تنضيف لوجهها ويحجزن بدلات للحنة والعرس...

-ها شريقة شلونها المعنويات

شروق:-ها مادري

ام رحمن:-هيي انتي لاتصيرين فاهية خليني ساكتة عنج ترة كوة عني امشي بيج علمود ابني والله لو تضل علي مااخليج تنضفين حجرتي بس بعد ابني الشفية تورط بيج

سجى:-شني السالفة متحامية عليها دكولي يا الله هسة هي شكالت وگبيتي

ام رحمن:-من هسة اكلها خاف تكول محد كالي

سجى:-عود خوش

اخذت شروق الضالة مفهية ماتدري شسوت..

-ختولي غلسي اذا تريدين تعيشين خلي اذن من طين واذن من عجين ترة تشبعين طن قهر

-تعودت عليها هاي مو بس اليوم ترزلني كل مرة حتى من اشتغل تضل تحجي وسوي هذا وردي على هذا

-تمنيتها عمتي حتى اخليها كل ما تشوفني تكول بارك الله بيكِ يابونيتي

-هههههه تسوينها والله

هدى:-دخل ادبر روحها وي عمتها

سجى:-ها هااا كلشي ولاعمتي ام الغالي هاي خوش مرية فقيرة ولا الها علاقة بالطشت والرشت

هدى:-بعدج مامعاشرتها تعاشرينها وتشوفين بعينج

الله وياج

رجعنا نسوي غدة والبيت صاير هوسة طخة طيخ كض اخوك لايطيح على ماتغدو ولميت المواعين طحت صفح...

هدوة راحت تعزل البيت وانا علمواعين ضليت وزهرة تسوي جاي..

-ها زهيران شعدج وي نزار قباني

-ماعدي شي وياة اصلا قررنا مانتزوج بس فترة ويقنع اهلة يطلگني

-لاه لاه لازم واصلة بينكم للستار سولفي شمتلاغين

-مامتلاغين هو ماينحمل ملطلط وبس يعيب

-عليش يعيب

-خيوولي عوفيني منة ما اطيقة ولا اطيق طاررية

ضليت صافنة شبيها هاي الفرخة انگرصت شوية بعد وتبجي لازم مطلع روحها نزار هم الزمة واعاتبة..
بين ما انا جاي اغسل طبت هدوة تركض وتضحك

-يا ستااار يارربي شصاير ولج اشو تضحكين

-ولج سجيووة هذاا ياسرر الجنة نلعب وياة من صغار

-بس اوكفي علكيفج ياياسر هذا انوب

-ابن خالتي البغداد

-يا والله قديم شذكرج بية

-هذا اجة هو وخالة من بغداد

بعدني فاتحة حلكي مامستوعبة ودخلو ذبيت الماعون من ايدي وغسلتها رحت سلمت عليها وطلعو يسلمون عليهم شوية واجت هدوة تسويلهم جاي اخذتة بسرعة وراحت...

غسلت المواعين وصعدت اسبح نزلت جوة لكيت هدى وياسر دك سوالف ضليت اباوعلهم من بعيد وما اشوف غير عباس دخل هستوة نازل عيوني علية
نزل جنطتة وراح بصوبهم لزم ياسر من قميصة سحبة علية رحت اركض لا يكتلة ويفشلنة مايعرفة

-عباس ابن خالتي هذا عوفةة

عباس:-شني منين صار ابن خالتتتج ياااا خااالة هاي جديدة شنيييي

سجى:-شبيك البغداد دعوف الولد

سحبت ايدة كوة منة والولد صافن بية متعجب علية يريد ياكلة عاكد حواجبة ومخنزر علية فزيت من عاط بهدى:-ماترررررحيييين تقرررين موووو ساااادس شلووون تنجحييين بالسوووالف تنجحيييين لو شلوووون

هدى:-مو هاي جنت اسالة شلون طلع معدل الطبية وصار دكتور

-ثووووور ثوووور مو دكتووور تصيررررين امشششي ررروحي اقرررري لحجرررتج يلاااااا

وجهها صار احمررر راحت تركض وهو ينفت دخان

سجى:-شبيك وي اختي ليش هيج

عباس:-اسكتي عني لا تحصليلج دفرة اوصلج للسطح

سجى:-عيوني دكول يا الله شبيك هسة عصبي

ياسر:-كسرت نفسيتها للبنية ليش هيج تعاملها حتى لو تريد تنصحها بس مو بهلطريقة

عباس:-حبيبي عليك بنفسك ولتدخل تمام بوية

خفت يجلب وي ياسر وخطية الولد خطار كبل كتلة
-تعال ياسر اراويك البستان

ياسر:-ياريت والله

اخذتة وطلعت لاكيت نزار بالباب فايت صحت علية
-نزورة اخذ ياسر ابن خالتي فرة بالبستان

نزار:-يدلل تعال يابة

راحو سوة ورجعت ذبيت نفس همزين ما انلاصت رحت لهدوة لكيت عيونها حمرر وكاعدة تكتب
اول ماشافتني شمرت القلم وصاحت:-شعلييية بييية شعلييية يصييح علية جدام الولد شكوووو

-اهووو شلون سالفة على اساس ماتعرفين عباس شني وخطية بعدة تعبان وشافة عبالة غريب ديلا يحجي لمصلحتج ياعيني

-مصلحتتي متخصصة گليلة لا يحجي وياااي ويدخل باي شي يلا امشيييي كليلة

-رايحة يمة بس علكيفج

اسم الله ذولة شبيهم اشو جاي انصدم بيهم اجت شروق من الصالون طالعة تجننن بشرتها تلصف لصف كمت اصلي على النبي لا احسدها راحت تسبح صاحوني اشيل الغراض وطار اليوم...

كعدنا على الديجي الصوتة خبص البيت خبص نزلت النومة بعدها بعيني لكيت نزار كاعد علية كل شوية ومبدل اغنية والولد متجمعين كلهم بس رحمن بالحلاق ...

غسلت وجهي وكعدت اتريك غصيت بالگمة من خلة على اغنية ساجدة عبيد "شكل امي من اروح انكسرت الشيشية" انوب على هلمقطع حصرا راسا بدلة وطلع اغنية غصصتني من الضحك...

-اريد احجي على جويسم ابو الغيرة
شراب العرگ وبطالة البيرة

انمار:-خايب هيووو هاي هم اغاني شني ذوق خر..

نزار:-شبييية ذوووقي شبييية ولكمممم هاااي ساااجدة عبيد مركصة العالم العربي واريد ارريد احجي على جويسم ابو الغيرة

انمار:-احتركت واحترگت ررروح جويسم ابن المسموووط طفي الديجي لا اجي اكسررة على راسك

نزار:-ترة مو وكت ايمانك عرررس عرررس خلونة نركص شتريد اشغلك باسم الكربلائي

انمار:-طاح حضك يا ملطلط

نزار:-مو مثلك حبيبي

رجع بدل الاغنية وراح شوية ورجع هو وحبوبتي لازمها من ايدها ويركص بيها...

نزار:-هزي هزي هزي خصرج الليلة مايطلع صبح يلا جدة اركصي واستعيدي شبابج الندفن بالتراب

جاسب:-كون يطلعلك جدي الا يهزك هزك على هذا حجيك

نزار:-اذا هو صدك زلمة خل يطلع ويلحگ لعروستة

جدة نوفة:-يا خايب من فلك طرك منيلي عروس

نزار:-تصيرين عروس ليش شناقصج اشو بعدج شباب وتلبسين بدلة وتعوضين المضة والغضة

جدة نوفة:-اهىء وانسة زلمتي الهيبة شمالني تسودنت من انا من جنت بعز شبابي ماخذت
مو هسة

نزار:-جذابة بس حچي هسة لو يجيج شويب تركصين بجفية

جدة نوفة:-من غسل طمك انا جذابة عاباك الله

نزار:-ديلا لاتدعين خلينة نتونس ونركص للعرس

دخل رحمن وجهها احمر من الحلاقةالتفتت علية نزار
وكال:- ها اخوتي هاااا

الكل:-هااا

-ها اخوتي هااااا

-هاااا

-هااا اخوتي هاااا

-وجعاااا

-وعريسنة جكليتة حامض حلو باكيتة كلووولشششششش مباااارك عرسك يالهيبة مبااارك عرسك افررح لابن العممم تحتاج ايامة وافررح لابن العممم تحتاج ايامة هي هي

الف مبروك رحومي الوردة قندرتة فردة وفردة

رحمن:-طاح حضك ويوم الالك

جاسب:-اي بس مو اختي ماطيهت اريدلي نسيب بية خير

نزار:-هسة انت البيك خير حتى دور نسابة براسهم خير

رحمن:-بمممم في منتصف الجبهة

جاسب:-شلون يخليني اكوم اشك حلگة

رحمن:-مو وكتكم اليوم حنتي اجلوها

نزار:-سوف اعفو عنة لخاطرك رحماني ابو جمال الرباني

رجع يركص وكوم الكل وياة سواها خبصة...

رحت اعزل وياهن انهد حيلي هد خابرت سفانة تجيب رغد وتجي صارت بالثنتين وكلها حجزت الحمام كوة خلني اسبح عطرن الباب علي...

لبست فستان ازوگ جويتي نازل موديلة مخصر على الجسم سرحت شعري و رفعتة ذيل حصان وطلعت زلوف من الجوانب خليت شوية مكياج طلعت مصكصكة....

زهراء:-ولج سجيوة خليلي وياج مكياج ماعرف

-دتعاي جدامي امري لله

مكيجتها وفتحت شعرها برمتة من جوة خليتة مفتوح وكفت تفتر ببدلتها ضليت متعجبة على جمالها هي ناعمة وملامحة هادئة بالمكياج طلعت تجنن شعرها نص ضهرها يوصل وسررح بية شكار
جنها لعابة صارت...

زهراء:-عليج الله سجيوة مو صرت اشبة الممثلات

-يروحلج فدوة شني احسن منج

-يعني انا احلة

-خاب جا غير تخبلين طلعتي جماااال

نزلت تركض وابتسامتها على ثغرها روحها طفولية كلش رحت على المراية اخذت صور ودزيتهن للاملح دقايق بين ماعدلت شعري اتصل فتحت التليفون اضحك....

ارفد:-هاي انتي ولج

-لا هاي ام سرحان تعرفها

-لاعليج الله سجوة شني هيج راح تطلعين

-اي هيج راح اطلع ترة لبسي محتشم

-اي كلش محتشم مفصلج تفصال كل محافظة بجهة صايرة

-موووديل حبيبي موديل

-اشتعل ابو حبيبج يانعيل الولد تارسة البيت شلون تطلعين جدامهم هيج

-عادي مثل اخوتي

-وووولج سجيووووة طررركاعة انزززعية

-عزاا ولك ارفد ليش ماتستحي شنزع شكلولك علية

-بدلية بدلية مو البالج

-ها اي انا حلوة

-تشعلين شعل احترگت روحج العنيفة

-ااوووي حبيبي انا عنيفة جد زعلت عليك

-ازعلي بس بدلي فستانج هذا ياكوا.. اشتراة الج

-انت

-بسيطة سجوة هسة ماتنزعينة

-نو بيبي اصلا الولد طلعو البيت بس نسوان

-هي خوفج من النسوان تحفظ التفاصيل وتروح تبسط بيجن يم الزلم احتركن ابو اصلهن

-لا حبيبي لتخاف ماعدنة هيج نماذج يلا حبيبي باي بوساتي الك اجت العروسة ...

سديت الاتصال وصفنت هسة يلة حسيت على روحي اشتعل اصلي هاي انا شحجيت هسة يكول هاي استخفت امداني...

رغد:-حايرة افكر شلبس للحنة كل شوية ابدل فستان ومن نريد نطلع اريد ابدلها

سفانة:-يااا ولج شني ثالفتج راح الوكت لا خليتينة نروح من وكت ولا تخلينة هثة نروح

-اهوو والله متوترة غير تاكدت من المجسب راح خو مو اروح والگاة جدامي اوكفي سفونة بين ما البس الماروني يلوكلي اكثر

-دهر صابج ذاك ضيگ كلش ودلع شلون تلبسينة

-لا مابية شي هيج موديلة يلا بسرعة جايتج

رحت اركض غيرتة لبست الماروني بس فضيحة بية فتحة على توصل لنص فخذي وصدرة وضهرة مفتوحات كلش عجبني مسحت الحمرة بدلتها وطوخت مكياجي باوعت لروحي وذبيت حسرة شكول عليك حتى من المكياج حارمني هسة يلا طلع شكلي....

لبست شال والعباية وطلعت ورة سفانة كال فارس غطن وجوهجن سوينة مثل ماكال ورحنة وراة شوية وصلنة البيت بس نسوان ذبيت عباتي وشالي انطيتهن لهديوة وكعدنا نسولف وي البنات....

-ها ولج سجيوة شلون البيت بدوني

-غرفة بدون گلوب شلونة مالي واهس بكلشي صدك راح تضلين

-لاع بس تخلص الحنة ارجع وي سفانة

-براحتج خية ادبية للمجسب صاير جلب مجلوب

-ههههه صدك مجلوب

-اجت شريقة صلوات

رحنا نتلكاها والهلاهل اشتغلت الجكليت صار مراكع سجيوة انفشخت وكامت تدك رجليها بالكاع من الحركة...

كعدنا شروق ونزعناها الكبوس لعابة مطلعتها ام الصالون لابسة بدلة حمرة طوخ وهي بيضة تبرج برج بس عيونها مدمعة كعدت يمها حبوبتي حكمة ونوفة تهوس بالنص وتهلهل سحبتها وياها تركص بيها هي ونسوان عمي خليناهن يخلصن وراحت سجيوة شغلت الديجي ودخلت بالنص كامت تهز بخصرها تنزل بالكاع وترجع توكف بقيت مفهية عليها

سحبت وياها اختها وزهراء ردحن ردحن ماصاير رجعن علي سحبني صح انا اعرف اركص بس مو مثلهن خبرة هنا تمايلت عليها وهمست...

-اشو تكولين ماعرف اركص واليسالج شلون تكولين حركي ايدج منا ومنا

-جا مامجذبة بس هسة تعلمت يوتيوب يعلم

-لازم تنطيني خبر كبل بساع

-بعرسي ادربج اريدج تذبين فلك

- لادبجلج دبج معدان واكسر الكاشية واصيحن احنا اهل البنية جم سجيوة عدنا

-خايبة اندارلج سبع فدوات

-يبعد روحي سجوة الشكاگية

سحبنة شروق تركص ويانة خطية تستحي...

طفينة الديجي لان كلش انتهينا حنيناها وخلينة حنة شوية كالو راح يجي رحمن وياة الولد كلبي انخمش هسة يجي ويشوفني صعد فوك كلبي يدك بقوة عيني راحت على باب حجرتي بلا تفكير رجلية اخذتني الها فتحت الباب شعور غريب صابني دخلت وسديت الباب....

حسرة بداخلي شكبرها اتذكرت ايامنا شلون ايام ماشفت بيها فرح كبل لاتطيح دموعي تحركت افتر بيها على حطت ايدي النزلة نفسها وكلشي نفسة
رحت للميز انبش بغراضة احس روحي تنعصر من اشتم عطرة خلاني عندي شك حتى بمشاعري تجاهها ساعة اكول احبة وارجع واكول اكرهها اموت منة...

رفعت علبة العطر فتحتها وقربتها لخشمي غمضت عيوني رحت لغير عالم ترة هو عطر اي صح بس يمثل شخصيتة سمعت الباب انطبك فزيت ووكع العطر من ايدي وصار طشار...

بقيت جامدة بمكاني فاتحة عيوني بخوف تقدم ناحيتي اطرافي كامت ترجف عيونة تفصلني تفصال
بلعت ريك وباوعت لروحي خرب عقلي شلون ماحسبت حساب جسمي طالع دنكت الم بالكزاز
رفعني من ايدي كومني وسحبني من خصري علية
احس گلبي راح يوگف ولاجنة زوجي وبينة عشرة حسيت روحي اول مرة اشوفة...

عبر ايدي ورة ضهرة والثانية خلها على كتفة سحبتها ودفعتة رفع حاجب وابتسم شبة ابتسامة هجم على شفايفي يرتوي كل مادفعة يزيد ويطول اكثر نزلن دموعي اخاف حتى استلذ واندمج وياة بعد مني يتنفس بصوت....

-مشتاگلج رغدة ماشتاگيتيلي

-لا ابد ما اشتاگيت لانك ماتستاهل وادري ماميت علية بس حتى تحس برجولتك لهذا السبب اشتاكيتلي

-مع الاسف عليج هيج فاهمة علاقتي وياج ولج انا عاشگج ومتسودن بيج وعليج من انتي وصغيرة سجلتج باسمي تعرفين شني معناها لا ماتعرفين لو تعرفين ماتلوميني على تصرفاتي وتعاملي وياج

-عوفني جاسب اتعذب وياك كل ما ابتعد ارتاح عوفني مرتاحة من وحشيتك...

مسح دموعي النزلن وخلة كصتة علة كصتي وعيوني بعيونة متعلكة:-محد يفهمني لا انتي ولا غيرج تعرفين شني يعني من تشوفين تعبج يروح لغيرج
سنين وانا ضام حبج بگلبي ماكلت لاحد انا احب رغد بس تصرفاتي تثبت جنت ماخلي عين تعاينلج ودوم اركض وراج...

جنا دوم نتعارك وتزعلين وتضلين تبجين من وراي اي صح هذا اسلوبي ماكدر اصير مثل رحمن واتغزل اكول من تصير حلالي ويزفونها الي ذاك الوكت اخليها اسعد بنية بالدنيا....

-صار العكس وخليتني اتعس بنية بالدنيا وحرمتني من ابسط الاشياء لازفة ولا مكياج انت مقتنع بروحك حتى مكياج ماتخليني احط

-اغاااار اغاااار عليج اغاااار من روووحي تعرفين واحد يغار على شخص من روحة لا ماتعرفين زين شلون اتخيل تحجين وي غيري ويتغزل بيج شني احس من خدودج تصير حمر من يغازلج بس افهمي شحس من اتخيل

بدت ايدة تعصر بخصري بقووة وعيوني تصير حمرر رفعت ايدي لركبتة مررت اصابعي على شرايين ركبتة البارزة غمض عيوني برخاوة همست...

-والله غلط السويتي غلط ادري بروحي غلطت وعرفت غلطي وتندمت بكد شعر راسي على كلشي لاتلومني لانك ما احتويتني بس لو محسسني بحبك مارحت عاينت لغيرك ترة مو بس انا الغلطت انت هم غلطت ومن السما للگاع

فتحت عيونة وخلة اصبعة على شفتي ابتسم وبقة يمرر اصبعة على شفتي:-الحمرة لونها...

-شبية

-تؤ تؤ

دنكت عيونة لصدري خزرني بنظرة حادة بلعلت ريك وبعدني ماحاجية دنك راسة...

-بس خلينة نتفاهم

-شنتفاهم بعد

-ما ارجعلك بهذا اسلوبك

-نسيت كلشي وبديت صفحة جديدة وياج انتي تنسين القديم وانا انسة القديم شتكولين

-بعد ماتمد ايدك علية

-ابد

-ولا ترجع لسوالفك

-تؤ

-ماتحسسني انا بسجن وانت سجاني

-بروحي مخليج ياسجن هذا

-خليني اعيش وياك مرتاحة خليني اتعامل وياك بدون تقييد

خلة راسة بركبتي حرك مشاعري وكلشي مدفون جر نفس طويل من ركبتي وهمس عيونة ذبلانة...

-هاي عيونج ماتشوف غيري

-امممم

-وكلبج هذا كلبج مايحب بس غيري ولسانج مايلفظ غير اسمي خلي كلج الي واعيشج بنعيم يصير العكس اراويج جنهم الحمررة

رجع متلهف يبوس ويتغزل بكلام اول مرة اسمعة اخذني لعالم وردي حسسني بحبة الضامة من سنين ماجنة نفسة جاسب جان شخصية ثانية...

رجعني لصدرة وباسني براسي...

-خليني انزل عيب منهم هسة شيكولون

-بكيفهم خل شيحجون شني طالبيني بطلابة مرتي وشالعة گلبي صارلي شهر ماشايفها

-اي بس عيب عدنا غير وكت

-هذا وكتي اسسس

-اممم

همس بذني:-عندي الج مفاجأة

-شني

-اسمها مفاجأة لاتصيرين ثولة

-ماراح تگلي ولا شوية

-تؤ مفاجأة جبيرة تستاهلينها

غمضت عيوني وحضنتة ماجنت اعرف ولا اتخيل هيج مفاجأة جبيرة....

**
سرى"

امسح بطني ودموعي گلبي ديتگطع من القهر الدكتوره حطمت كل ذرة امل بقت بروحي هالطفل ميعيش واذا عاش اني اموت ومنو الة بعدي عنظ منو اخلية منو راح يهتم بية زين اتخلة عنة بس هم راح اموت وراة شكو عايشة والمنو...

بلعت غصتي واصريت للمرة الالف على قراري لازم يعيش خليني اكون انانية واموت اني يمكن راح يوكع بيد ناس زينة ممكن تنطية حياة حلوة...

طلعت من المستشفى بكبره بدون ماخبر احد مليت من وجودي ماطلعت هاي ميقبلون يسوولي خروج واهلي ماعرف شي عنهم مامعقولة يعوفوني كل هذا الوقت ويعرفوني ماعندي غيرهم وحالتي مو تمام..

عاصرة جنطتي بيدي مبيها غير كم قطعة ملابس وفون ومبلغ بسيط مخلية الي باهر بدون علمي
هالرجال يوم عن يوم يكبر بعيني يقدم بدون مقابل
الله يحفظه لشبابة واهلة...

اخذت تكسي ورحت لبيتنة كوة اتذكر وين صاير لان مابقيت بية هواي والمنطقة جديدة علي عصرت مخي اتذكر ماكو مجاي اتذكر منين بيتنة رفعت عيوني للسايق خازرني...

-وبعدين مو المنطقة فريتها فر وين صاير بيتج

-والله ماعرف نسيت كلشي هسة هسة اتذكر

-يعني اكو وحدة ماتندل بيتها غير سالفة هاي وراي شغل خلصيني شلون اضل النهار كلة وياج

شفتة صار عصبي انطيتة اجرتة ونزلت حقة صارلة وقت وكل شويه كتلة منا لا منا...

افتر بالدرابين ادور بيتنا من اصعب اللحضات المرن علية الناس تباوعلي باستغراب جديدة عليهم احس گلبي طگ بعد ماتحمل كعدت على الرصيف وانفجرت بجي ليش عفتوني مو بتكم اني شسويت حتى احصل كل هالجفاء مو رحت ضحية شلون تنسون

رفعت راسي شفت رجال كدامي خفت من شكلة شلت العلاكة وطفرت كال بصوت خشن...

-محتاجة شي كولي اساعدج

-لا لا شكرا

رحت اركض مو امشي شكلة مو مال مساعدة شلون ورطة هاي احسة يمشي وراي رجلية بعد ماشالني حسيت الموبايل يهتز بيدي فتحت الجنطة ملهوفة بدون ماعرف منو كلت...

-هلا حبيبي الجهال عندك ووووين صرتوو منتظرتكم ديلا اوكي خمس دقايق مو اكثر لاتتاخر باي حبيبي

نزلتة بيدي ماعرف انقطع الاتصال لو بعدة التفتت شفتة وراي مقلص عيونة من الخوف شوية ويغمة علية مبينة نيتة شنو وهي اصلا المنطقة كلها مو خوش....

-يعني ماتحتاجين مساعدة منا مناا

-كتتتتلك شكررراً

-على كيفج هسة اني شكلت وهيج عصبية

مشيت بكل سرعتي كلبي صار يدك بجنوني وجهي اشتعل نار وهذا بعدة يلاحقني حجيت واني امشي

-والقرران اذا مارحت من وجهييي افضحك واشهرررك تررة زوجي ضاااابط يخلييي طلقة برررااسك بس تحاجيني

-ضابط المكرن مخلي غزالتة تمشي بهيج منطقة

وكفت ارجف رفعت ايدي بتهديد وصرخت بحرگة

-هسسسة شترررريد مانااااقصتتتك وووليييي منييييي

على اثر صوتي طلع رجال جبير باوعتلة بعيون متوسلة فهم علية واجة باتجاهي اشر الي بيدة ليكدام بمعنى روحي وصار كدام هذا الملاحقني
رحت اركض مو امشي خلصت الفرع بكبرة ودخلت بفرع ثاني حسيت روحي بمتاهة عقلي وكف عن التفكير بشي...

فحطت وكعدت اجر نفس ماحس على صوت عالي فزيت الفون يرعد بيدي رفعتة لاذني احس راسي صدع من صوتة العالي رغم مافاتحة مكبر الصوت..

-للللللللج سرررررررى اااااااانتي وووووووين

رجفة صارت بعضامي وصوتي اريد احجي ماكدر وهذا يصيح وكع الفون من ايدي ونزلن دموعي اريد ارفع الفون ماكدر كون سيطرت على لزمتة خليتة على اذني وشهكت...

-وووووين ااااانتي سوووالج شييييييي اااااحجي

-لا مبية شي والله بس خايفة ضيعت اني

حجيتها ورجعت اشهك ذب حسرة احسها بوجهي صارت بعدت الفون شوية من وجهي:-وين بالضبط انتي هسة اني بمنطقتكم

-ماعرف وين هنة هواي افرع مندليت بيتنة ضيعتة

-اي شي مميز غريب عليج

-ماكو بس مكتبة

-دقايق جايج

سد الاتصال بوجهي بقيت منتظرة بس دموعي تصب دقايق واجت سيارتة طايرة طبگها ونزل دنكت عيوني بالكاع وامسح بوجهي اسمع حسراتة عالية..

-شطلعج من المستشفى شطلعععععععج

رفعت راسي اشوفة صاير نار خزرتة وكمت حس على نفسة ومسح وجهها المتعرق حجة بهدوء...

-شلون تطلعين بدون متخبريني انتي بكيفج تصرفين يولي

-وليش حتى ابلغك او لازم استشارك اشكرك على كلشي قدمتة وفضلك مستحيل انساة خلص لهنا كلشي لازم ارجع لاهلي

-اهلج

-مهما يكون ابقة بنتهم مراح يسدون الباب بوجهي لو يطردوني بتهم اني تعرف شنو يعني بتهم اخذني لبيتهم هذا اخر شي اطلبة منك

اباوعلة صافن ومدنك راسة بالكاع حجيت بحرگة گلب احس روحي دتطلع:-شمنتظرررر

رفع عيونة بعيوني احس بيهن حيرة اشرلي اصعد صعدت وحرك دقايق حرگتني حرگ اشتاقيت لامي لابوي لاختي نهى هسة راح تفتحلي الباب طبگت السيارة گبال بيتنة شهكت زنزلت اركض...

ادك بالباب بثنين ادية دقايق مرت ومحد فتح نزلت دموعي للمرة الالف:-افتحوولي الباااب اجيتتتكم ماما نهى بابا واحد منكم يفتحلي الباب

فلشت الباب ايدي صرت ماحس بيها كل هذا واقنع بروحي نايمين هسة اكيد ميسمعون حسيت علية سحب ادية لازمهن نترتهن بقوة وصحت بية صوتي طبگ...

-عووووفني لتلززززمني

-بس اهدي صحتج صحتتتتتج

-اهلي ميفتحون الباب ليش

اباوع بعيونة منتظرة منة جواب نزل عيونة من حرگتي ضربته على صدرة بقوة واصرخ انهاريت وكعت من طولي سندي كعدني بعتبة الباب...

لازمة راسي بيدي احسة يريد ينفجر وين راحو..

-شوف امي يمكن مريضة واخذوها للدكتور

بعدني مخلصت كلامي واسمع ابن جيرانة كال
-اهلج شالو من زمان وباعو البيت

احس انضربت على راسي كمت ارجف:-لتجذب لتجذذذذذب اهليييييي ميعوووفوني جذااااااااب
جذاااااااااب هسسسة يجوووون اهلييييييي هسسسسة....

فرفحت روحي اصرخ واضرب رجلي بالگاع بحرگة
قيد حركتي من شافني فقدت...

بيدي بطل مي شربت منة شوية ورجعت صفنت عقلي فارغ ميستوعب الكاعد يصير اكو ناس يعوفون بتهم من لحمهم ودمهم وهما يعرفون ماعندي غيرهم
ماكو اكيد ماكو...

التفتت علية رافع راسة وينفخ الدخان ليفوك همست بصوت مبحوح:-جنت تعرف شالو مو

-والله العظيم عرفت من شالو باسبوع لو جنت اعرف قبل لايرحون جان مخليتهم وبقيتهم غصب عنهم

-لهذا السبب متخليهم يسوولي خروج من المستشفى لان ماعندي مكان اروحلة

مجاوبني شمر الجكارة وداسها نهضت على حيلي رغم انكساري وكفت على رجلية لخاطر هالطفل لازم اتقوة واشوفلي مكان مو من الصح ابقة وي رجال محرم عني....

-اني حروح لبيت عمي اهل خطيبي عمتي تحبني اكيد تستقبلني عدها

-تعرفين عنوانهم

-اكيد اعرفة انسة روحي وبيتة ما انساة

غمضت عيوني وجريت حسرة تعال وشوف حالي شصار بية من بعدك...

انطلق بية لبيتهم كل مانقترب احس گلبي يطلع من مكانة اشم عطرة جاي يقوة بخشمي ليا مرحلة وصلت بحبك صرت مثل حال يعقوب من حب يوسف ويشتم عطرة بس يوسف عايش هذا ميت وعطرة بخشمي....

وصلت كبال بيتة بعد مكدرت اتحرك روحي انسلبت مني من بعد غياب طويل اجيتك نزلت روحي تقودني مو رجلية ادك بالباب متأملة يفتحة الي ومن يشوفني يبتسم ويدنك عيونة يسويلي مجال افوت....

-حياوي افتحلي الباب اني سرى

ادك بالباب احس طلاقتة الها السان
تكلي صويحبك باب الصلح سدة

ابجي وادك بثنين ادية الباب شفق على حالتي وهما ماشفقو وفتحولي...

-لييش ووولكم على الاقل استقبلوني سجاااد افتحلييي الباب عبدالله مهنددددددد افتحووولي البااااااب ويييييين رحتوووو. وييييييين

حسيت گلبي وگف درت وجهي ردت اوكع من طولي من شفتة ركضلي يريد يسندني سندت روحي علحايط واشرتلة على باب الجيران...

-اسئلهم وين راحو

هز راسة وراح دك الباب عيونة قلقلة تباوعلي ويرجع يدير وجهها عني رحت وراة من سمعت الباب ينفتح

-السلام عليكم بلا زحمة وين راحو بيت ابو سجاد

ردت علية المرة:-عمت عيني يخالة شالو وعافو بويتهم وراهم

-خير ليش شالو

-والله مادري بس كالو ديرو بالكم علية امنونا علية ومشو...

التفتت على الباب شفت القفل والسلاسل هسة يلا انتبهتلهن وكعت على ركبي طاقتي صفرت حسيت الدنيا تفتر بية والحرارة مشتعلة براسي محسيت على مي بارد بوجهي وادية ينغسلن....

فتحت عيوني لگيتة كدامي بجيت وحجيت مكسورة :-كلها عافتني ليش هيج سوو

-مانعرف الضروف كومي سرى خليج قوية اسندي نفسج بنفسج مانخلقتي حتى تنكسرين ولا انخلقت كل هالصدمات حتى تكسرج بالعكس حتى تقويج وتهيأج لحياتج الجديده وي طفلج

-ههههه حيعوفني هو هم لو اني اعوفة واخلية يعيش يتيم ماعندة احد ويعيش العذاب العشتة اضعاف

-مراح يصير هيج صدكي مادام مافرطتي بيه وقدمتية على نفسج وصحتج مراح يعوفج راح يكمل. يكونلج سند حقيقي بس اصبري وكملي لخاطرة

-شكرا على كلشي

-امشي كومي مو وكت الشكر

-صدگني راح ترجعلك باكثر وقت محتاج بية كلام حتى تستمر راح تحصل اضعافها مثل ماجبرت روحي بذني الكلمات

ابتسم بخجل وصار يرفع بشعرة عدلت كعدتي وانطيتة عنوان اقاربي بس جانت صدمة مامتوقعتها محد قبل يدخلني بيتة من الباب طردوني...

-مانلفي وحده مثلج عاشت وي المجرم تريدين تلعبين بينة يكفي اخوج السكط الدمر سمعتنا يلا منا وانسي عندج اقارب...

هالكلمات صدعني راسي من كثر ماانعادن براسي من كثر الصدمات بقيت ماحس حتى عيوني جفت من الدموع بس صافنة بالفراغ وحايرة بروحي وين اروح اني وطفلي ياسگف يلمنا ياارض تحتوينة راح نكدر نقاوم لو لا....

عدلت شالي وكعدت عدل سلم وكعد مقابيلي حجيت بدون ما اباوعلة:-راح اطلع من المستشفى واكدر ادبر نفسي لتخاف علية ان شاءلله اني كدها والله مراح يعوفني ويستغني عني مثلهم

-اكيد رب العالمين ما يستغني عنج وهل خلاج بطريقي

-ماكدر ماكدر اجي وياك على اي اساس

-الي يعجبج تكولين اخوكي اصيرلك اخو تكولين محرم عليج نعقد وطفلج يتسجل باسمي لاتنسين شلون يكمل هو ماعندة ابو شلون تصيرلة جنسية ويكمل...

فتحت عيوني على وسعهن صفنت بوجهي ماكدر اقرر مثل هيج قرار انخرست...

باهر:-انتي مو وحدج فكري بطفلج ويشهد الله ورسولة ما اتقربلك اعتبريني مثل اخوكي وحتى انا اعتبرك مثل اختي حالك حالها وتعيشن سوة ها شدكولين؟

دنكت راسي وهزيت براسي ماعندي اي حل ثاني وين اروح وشلون اعيش الشارع مايرحم واني طيرة مكسورلي جنح...

-باهر طفلي امانتك اني ما اكمل راح اوصلة وانت ربية

-لاتكولين هيج يبة والله مايصير بيج شي وطفلك حتربية بيدج

-ان شاءلله بس ماضن

-الله كريم اكو شي اسمو طب وعلاج

-شوف عندي شرط

-يجرالك

-كتلك اذا متت طفلي امانة واذا عشت يتسجل باسمك ونتطلك

-اتفقنا اذن

-اكلك انت مو تكول عندي اخت خليني اعيش وياها لبين ما اولد

-صار يبة

ومن هاي الكلمة انتقلت حياتي لمطاف اخر..

بقت هواي اسئلة دور براسي ياترى راح اكدر اشوف طفلي واشمة وابوسة لو انحرم من هلشي؟

صفنت ولزمت گلبي بخوف حسيت بية موجود داير مدايري...

-شصاير حياوي ليش احسك ضايج وزعلان البالك ميصير ارتاح بس گلي اهلك بيهم شي احسهم مو بخير حياوي اهلك مايعوفوني البيت البية ريحتك سجاد مايكدر يعيش بعيد عنة هالبيت بية كل ذكرياتكم يموت والله بس يبتعد...

***
نوڤ"

شوفت انمار هيجت مشاعري ماحسيتة زوجي حسيتة ابوي گلبي يدك بقوة مجرد اتذكر شكلة وغمازاتة جذب لو كلت نسيتة بلعكس متلهفة لشوفتة يوم عن يوم....

بيومها انسحبت روحي ورجعت للماضي صح كلشي ماجان حلو بس اهتمامة وخوفة غفيت واني اتذكر سوالفة طفرت من النوم مرعوبة على الصوت العالي

صوت امي تصرخ بهلع طفرت اركض الدنيا مسودة بعيني كلت هاهية واحد من اخوتي صار بيهم شي
طلعت من غرفتي فهيت بمكاني باب غرفة حياوي مفتوح...

بلعت ريگ كوة حركت رجلية سنين محد داخل الها وكفت بالباب روحي شاغت عطرة اجة بخشمي راحت عيوني لسريرة اتخيلة ممدود ويصيح نووف اطلعي خليني نايم باوعت لكنتورة مفتوح والملابس مسطرة كلشي بخانة وحدة ملابس البيت بخانة والطلعة بخانة مرتبات ومصفطات شكد جان نضيف ومرتب شهكت بصوت عالي ودموعي نزلن...

التفتت لامي مكطعة روحي تكطع شعرها ناثرتة وثوبها شاكتة عبدالله يريد يسيطر عليها مايكدر مسوية وجهها دم وتصيح بعلو صوتها....

-ووولك يمة وييين رحت وعفت غررفتتتك يحيياوي ياجررح كلبي الماطااب ولا راح يطيببب يمة عايف الفراش الدافي ونايم بالتراب يمة هديماتك عايفهن ولابس الجفن المن عايفهن ولك يمة شلعت گلبي

عبدالله:-يمة كااافي كوومي رراح تموووتيننن كافي مو عذبتية بكبرةة مايرضة تبجيين كااافي عذااب خلية يرتاح

-شيرتاح واني مو يمة ولك يمة تدري باخوك بالليل بالمكبرة ينام واحنة وانام بفراشنة الدافي تدري الوياة تخرجو وانزفوو واني زفيت تعبي للنجففف لرملة علي زفيتة

-امر الله شلون نكفررر استغفري الله كومي وعوفية مرتاح بكبرة رحمة لاهلج

-ولك يمة يحياوي اخذني وياااك هديت حيلي صح مو اني الجبتك بس تعبت عليك وعزيتك اكثر من ولدي يمة غرفتك فارغة تعال اكعد بيها

كلامها جنني وكعت بالكاع وصرت ادك والطم وياها حار عبدالله بينة عافنة وطلع فقدت كمت ماحس على روحي حتى امي نسيتها ماحسيت غير شايلينها يركضون بيها اريد اكوم بعد رجلية ماعانني...

طلعت وراهم مالحكت بيها ساعات مرن شفت الموت بيها خفت تروح ورة حياوي روحي تفرفحت من البجي بعد ساعات جابوها وجهها اصفرر والكانونة مشكلة بالايد اشرتلي بيدها رحت حضنتها ابجي..

اخذني مهند حاضني ويسكت بية...

-صيري قوية لخاطرها

-شلون اصير قوية والمقويني طاح

-ماتطيح نكومها ونشيلها برواحنا

-الله يحفظنا لبعض ومانفترق دوم

-ان شاءلله

يومين يلة صارت زينة وكامت تحجي كلنة متعطلين عن دوامنا لخاطرها نخاف عليها...

مجتمعين حولها نباوع لحلكها شتحجي...

-يمة يسجاد طلعني من هذا البيت ماكدر اضل هنا بكل مكان اتذكرة بكل زاوية اله ذكرة اذا تريدوني عفو هالبيت وعفو اخوكم بية يمتها ماحنيتم ارجعولة بس مال نعيش بية ماترهم لا انتم تنسونة ولا اني

سجاد:-ماكدر ابيع البيت شلون

-هالبيت ماينباع يضل مثل ماهو وكلشي يضل بية نقفلة ونعوفة ونأجرلنة بيت على كدنا بين ماتطلع السلفة ونشوفلنا بيت

-ها هية لعد اروح ادور على بيت

مهند:-واني وياك

عبدالله:-واني هم وياكم

سجاد:-لا ضل يمهن خاف يصير شي

يومين وطلعنا من البيت طلعنا رواحنة مكسورة البيت الفتحنة عينة بية وطفولتنا وذكرياتنة كله بية نعوفها لخاطر عين امي...

كعدنا بيت اجار مؤقت لكم شهر وبعدها ننتقل كلشي مخربط بالف ياعلي يلة وكفنا على رجلينة ورجعنا لدوامنة هواي فاتتني محاضرات الليل والنهار بس اقرا حتى ماعندي وقت اشوف فوني....

الشي الوحيد الفرحنة هالفترة صحت امي رجعت وصارت تسير عالجيران والجيران يجونا حتى نفسيتها تغيرت واحنة طايرين بيها نست حتى حياوي وعافت البجي والنحيب....

كاعدة بالسنتر اكمل بالتقارير وسمعت تحمحم رفعت راسي شفتة كدامي تمنيت لو بايك الطفل جنطتي ولا مرجعها الي هذا كل يومية اشوفة طالع بخلقتي

رجعت عيوني اكتب سحب كرسي وكعد رفعت راسي واشرتلة بالقلم:-منو سمحلك تكعد

-ليش وجودي مضايقج

-كلش والله

-لا مو لهدرجة على كيفج وياي اعرفي شريد بالاول

-وقت وقت وقت وقت وقت ماااااعندي

لميت ملازمي واوراقي بعصبية وطفرت رحت لقسمي طالعة روحي كملت التقرير وبوجهي للمختبر طلعت بالثنتين الا الجامعة فارغة تقريباً جاي امشي بالشارع وسمعت صوت سيارة صرت على صفحة وفاتت طايرة...

مريت بالمكتبة اشتري كم حاجة بين ماطلعت داكة الثنتين الشوارع تصوصي باوعت لسيارة طابكة سودة شكلها يخوف تحركت بسرعة وماحس الا سيارة صارت بوجهي شهكت بصوت عالي و ....

يتبع...............

_______________________

تفاعلكم +توقعاتكم ❤️‍🔥

عيدكم مبارك وكل عام وانتو بالف خير ينعاد عليكم بالخير حبايب گلبي 🤍🤍...

ها ولجن ماكلتن شنو رايجن بالتغشوشات استمر الج واخلي عقلجن يضرب 🙂...

تعالو انستا وعن موعد النشر اخبركم لان ماعندي موعد ثابت والله هذا البارت شكد صارلي اكتب بية وعايفة امتحاناتي ولا شايفة مادة انوب كلهن خلوهن ورة العيد ادعولي حبايب الله يدخل المادة بعقلي وان شاءلله بس افرغ من الامتحانات اكتبلكم ماطول

دمتم بحفظ الله ♥