𒆜 𝗠𝗔𝗥𝗛𝗔𝗠𝗘𝗧 ❷ 𝗔𝗙𝗧𝗘𝗥𝗚𝗟𝗢𝗪 𒆜
𝕄𝕚𝕕𝕟𝕚𝕘𝕙𝕥 𝕊𝕦𝕟 🌓 شَمس مُنتصَفِ اللّيل
اللون العسلي لبؤبؤ العين تحول أحمر بفعل إنعكاس صورة النيـران المشتعلة قبالتها، نار حامية من كـاع الجوانب، وقفات بجمود لايحة البيدو دليصونص من يديها مور ماكباتو فالدار كاملة، كـتشوف النار كتنتاشر بسرعة رهيبة وكولشي كيطرطق حداها الخوامي نزلو بزربة لهيب العافية كيحرق ويزيد، الدخاخن طالعين والشراجم دالخشب كيطيحو بالعافية لي شبكات فيهوم كتاكل دون توقف.
" غانحرقكم كيفما حرقتوني فقلبي غانحرقكم كاملين "
تمشات شعرها المدرج الطويل مطلوق نازل عرقان على وجها بالحموم، كتعفط برجليها الحافين على الضس ببرود، حتى وصلات لطابلة ديال الزاج وطلعات عليها كالسة الوسط، جمعات رجليها طاوياهوم وشداتهوم بيديها كيرجفو، طلعات راسها كتشوف الدار كلها شاعلة، الغوات فالزنقا والصياح كان عالي .
" عتقو دار التمسماني كتحرق عيطو لبومبيااااا "
كــانت هي فــعالم ديالها الوحيد، الغايب، عالمها المليئ بذكريات، مدات عينيها ببرود ميلة راسها تبسمات ...
فداك الكوان فين محطوط بؤبؤ العين كتجري وضحكاتها الطفولية متعالية .
" سميـرة أجي لهنا "
كضحك ودور راسها بلا تاكيضور معاها شعرها المضفور گرينات طويل : لاااا هههههه
كتجري ماوقفاتش حتى وصلات للمهد، طفل كيرضع صبعو وكيرمش، ضحكات كتلعب معاه، بغات تمد يديها حتى تطلقات غوتة منو كيبكي بجهد
" سكتي خـــوك المسخوطة سكـتيه حيدي "
تدفعات تاتلاحت فالارض، تقصحات فيديها : ماما أنا تقصحت
لا مجيب هازا الدري كطبطب عليه دفعاتها مخرجاها باش تنعسو.
واقفة حداه فالمهد كيبكي : سكت عافاك سكت ايضربوني سكت .
كتحرك مابغاش مشات هزات الوسادة دصالة وحطاتها عليه، عاودات حطات ثانية وثالثة، تاسمعات الحس تقطع، حيداتهوم عليه بفرحة وآخيرا سكتاتو، عيطات لماماها: شوفي أنا سكتو نعستو.
كانت فرحانة، كولشي مزيان، تقلبات الدنيا ضلام تجرات من شعرها وتخبطات : قــتّــ ـالة، قـتـ ـلتيه، قـتـ ـالة، قـتـ ـالة..
جـنازة، الناس بزاف، كولشي كيبكي ..
وقفات كدور راسها بلا فمها مفتوح، برمشة عين تسحبات من ضهرها وتلاحت فالبيت خاوية تسد الباب، دورات راسها بلا: مبلعانيش ماشي أنا ماشي أنا ..
جبد الصمطة كانت كحلة طويلة، حكات يديها بزربة مع بعضياتهوم كترجاه : عافاك عافاك ابابا، لا مابلعانيش عافاك
بقوة الغوات ماقدراتش تفرز ولا تفهم عراها ولاحها تاطاحت على ركابها دموعها نازلين كيف بغات تكلم غوتات لربها لي خلقها معلية راسها لفوق مع الشحطة القوية لي جاتها فضهرها، يالاه غادور تعاودات ثانية عاودات علات راسها مغوتة صوتها تبح كتغوت بلا: ماشي أنااااااااااااا عااااافاااااااك باااااابااااا لااااا
تعاودات شحطة بجهد تاخرج دم من ضهرها وتزدحات بوجها مع الحيط : ااااااااااااااااااااااااااا عـ عـ ـ فففف ا ااك
تعاودات ليها تاولات تغوت بلا صوت، ودموعها نازلين ضهرها كينزف طاحت مردوخة فالارض على راسها بقلة حيلة كتحس بالحريق فضهرها، ضهر طفلة ماكملاتش 9 سنين.
كتحسس بتشتت، زيرات على راسها، ذكريات كيمشيو ويجيو، اللحضات لي بناتهوم زوينين تاحاجة ماكاينة، زيرات خاشية شعرها بين صباعها، كولشي كيتعاود، كولشي كيرجع عليها.
فين كاينة هي، كتجري فالبحر ودور تشوف فعينيه الزورق، خرجاتليه لسانها: ماغاتشدنيش
ضحك بشوية كيشوف فيها : أجي لهنا
دورات راسها بلا كضحك تاشدها بجهد من يديها، كتمـ ـوت بالضحك كتشم فريحتو الرجولية، كتشوف صورتو.
كتهيئ صورتو فلهيب النيران، الدخاخن طالعين دورات راسها كتشوف خيالو ميلات عنقها بشوية وحالا عينيها طلعات يديها بشوية ماداهوم ليه ونطقات بشهقة بسباب الدخان : طــــه
مدات يديها مبتاسمة كتشد فيه هو كيقرب كيقرب كيقرب كيقرب، ولكن ........
تلاشات يديها فالهوا والفراغ، طرطقات بيها الطبلة دزاج من لتحت باش تنزل بثقلها مزدوحة فالارض ناعسة.
تفرش شعرها فوق الزاج مدخين يديها مجروحين والنار دايرة بيها كتشوف فالسقف ببرود حالة عينيها، الضباب ودخـان كحل، فتحات فمها كتشهق بجهد حيت النفس مابقاش كيوصل ليها، عاودات شهقة ودمعة نزلات من جنب عينيها، كتشوف صورتو بين عينيها، تبسمات بشوية : سمحلي، رجعلي محتاجاك
تاتغمضو عينيها مرخية.....