بين ًسًـــلاسل العادات

الجزء الثاني بارت 36

﷽

#بين سلاسل العادات
بقلمي: kefeyah✨

متابعة للحساب فضلا🤍
التصويت +التعليق بين الفقرات...

بارتين سوة تفاعلكم 🫦

"" "" "" "" "" "" ""

و تلچمني العصافـیر الـ تِلـم عـودان
حلم إثنين .. و توَزع الدفو بـ عشها

يَـ البارد مـکانك .. دمعِـتي بـ فـرگاك
حسرة ليل .. يومية المسَـه أفرشها !

"" "" "" "" "" "" "" "" "

صريخ..
دموع..
شهگات عالية..
واگفة اباوع بعيوني ودموعي تنزل فاتت مني ممرضة صحت وراها..

-شنو صار وهيج حالتهم

غمضت عيونها وذبت نفس:-ابنهم توفة خطية بعدة صغير الله يرحمة

راحت صوبهم وبقيت بمكاني كوة واگفة ؏ طولي سندت راسي على الباب وگلبي يتگطع على حالتهم الام وياها بنات يملخن برواحتهن يردون يلزمونهن ماكو غمضت عيوني ورجعت لخبر رحيلة...

راحت روحي وياة
شلون عشت بعدة!
ماعشت والله متت هسة اني ميتة بس خشمي يشم الهوة...
اخ يا لچمة روحي ياحياوي

-انتِ زينة

فتحت عيوني ومسحت دموعي ابتسمت وهزيت براسي:-زينة منتظرة الدكتورة تفحص العملية

الممرضة:-يلا امشي وياي

مشيت وياها مخلية ايدي على صدري من ناحية گلبي وصلت لغرفة الدكتورة كعدت على السدية منتظرتها شخطت عيوني بالفضاء واجة سؤال على بالي...

-ليش مامتت كل الصار بقيت عايش شنو حكمتك ياربي بقائي على قيد الحياة..

مو لازم اني ميتة ودافنيني بصف حبيبي
ضحكت بصوت وضربت على رجلي بحرگة همست
-لا القهر اخذ عمري ولا الرصاص خر.. بية من عمر شنو اشوف من بعد الشفتة وعشتة..

قاطعت تفكيري دخول الدكتورة سلمت وفحصت العملية...

الدكتورة:-كلش زينة عمليتج ماما اتركي العلاج بعد لا تاخذين

هزيت راسي وتشكرتها وطلعت لاگتني الممرضة ابتسمتلها احسها صارت صديقتي من يوم الدخلت للمستشفى مرافقتني بكل مكان..

الممرضة:-ها بشري

همست:-زينة

-يا الله يلا ولج بعد ساعة يبدي موعد الجلسة وي دكتورج

-بس اني مو مخبلة مابية شي

-ياسرواي الدكتور النفسي مو بس للمجانين كل بشر طبيعي يحتاج دكتور مدا تشوفين حالتج طلعتي من الموت بالويل رجعت صحتج البدنية واجة الوقت التعالجين صحتج النفسية لان كلش مهمة بهذا وقتج...

صفنت بعيوني واخذتني من ايدي كعدنا على الكراسي دنكت راسي بالكاع واسمعلها...

-سرى باوعيلي

-اممم

-شوفي ضروري تلتزمين بالجلسات لان منتظرج خبر وكلنا خايفين من ردة فعلج...

رفعت راسي الها وجهها قلق:-كولي شصاير اهلي بيهم شي

-لا والله

-اممم لعد وينهم

-مو تعرفين ابوج حاير بامج يعالج بيها

-غيرها ليش ماكو

-اختج نهى وصتني ابلغج لان جنتي ماخذة علاجج ونايمة كالت راح يروحون للشمال علمود عملية امج بلكت يكدرون يسوونها..

ضحكت وصرت اضرب على رجلي بخفة حتى مشاعر ماعندي و احترك...

-بتهم طالعة من الموت شهر كامل بالمستشفى عايفيني وحدي ليلة وحدة ما باتو يمي مسلميني بيد رجال غريب اخ اخخ اهل ذولة اهل ينحسبون

-صدك الضابط باهر الصبح اجة هم ولگاج نايمة

-ادري بية مجنت نايمة بس ماريد اشوفة

-ليش ترة حباب خوش رجال

-والنعم منة ومن اصلة بس كافي شنو ذنبة حاير بمصاريف علاجي واكلي وشربي من يوم الدخلت المستشفى واهلي مالهم غرض ..

-صحتج النفسية لادمرينها بهيج سوالف مو كلتلج نهى امج مريضة وحالتها حالة من يوم الي انقتل بية اخوج

-لا ماتريد تشوفني لان القتلة محسوب رجلي تعتبرني اني السبب

-اخوج مجرم سرى كافي استوعبي قتل عدد جبير من الجنود واكيد جزائة القتل وانتي بسببة وبسبب الناس اليشتغل وياهم جان متي

-ياريت

-شلون بهذا كلامج وتفكيرج تستقبلين الخبر اووف

خليت راسي بحضني وغمضت عيوني فصلت عن الدنيا فزيت عليها واگفة فوگ راسي تندس بية

-يلا عيني عندج موعد كوومي

كمت وياهم وصلتني لغرفة الدكتور دخلتني وسلمت وصت الدكتور وطلعت اشرلي اكعد كعدت على الكرسي داخلي مسود بدت جلستي الاولى جانت صعبة ماكدر اجاوب على اسئلتة بصورة عامة ماكدر احجي من بعد الحادث...

خلصت الجلسة نفسيتي زفت كوة اكدر امشي رجعت لغرفتي كعدت على السرير افكر..

-شكد حبقى هنا بعد مصاريف المستشفى شكد صارن؟
شنو ابتلة يدفعلي شعلية بية لازم ارجع البيت مادام عمليتي طابت وصرت احسن..

رحت لميت ملابسي خليتهن بعلاگة ورجعت كعدت على السرير رفعت عيوني للساعة هسة يجي هذا وقت اليخلص بية دوام....

بقيت انتظرة فوك الساعة سمعت صوتة كمت من مكاني وعدلت ملابسي وشلت العلاگة بيدي غابت ابتسامتة من باوع للعلاگة سلم وگال ...

باهر:-مبينة رجعت اللبوة للساحة

نزلت عيوني وكتلة:-لازم اطلع من المستشفى وجودي مالة لزوم بعد صرت زينة

مارد علية رفعت راسي باوعتلة مقلص عيونة سويتلة بيدي شكو..

باهر:-امشي نطلع بالحديقة

مشة كدامي ورحت وراة اسحل بروحي وگف بالحديقة بقيت وراة عيوني تفتر بالمكان دار وجهة وخلة ايدة ورة رگبتة..

-مستحيل تطلعين بدون مامخلصة جلسات العلاج

-ضروري اطلع ماكدر ابقة اكثر اريد اختل بروحي بالبيت و..

قاطعني:-ما ريدج تختلين بروحج وتتأذين فوگ هاي الاذية سرى

سكت لثواني ورجع كمل گال بحسرة :-لاتسولفينها الا اذا كملتي كلشي

- حضرت الضابط شفيت مبية شي العملية ممتازة شنو لزوم وجودي بعد

-الج لزوم بعد ارتاحي سرى بين مايخلص كلشي

حجاها ودار وجهة ومشة بقيت بمكاني مستغربة من تصرفة وطريقة كلامة اكو شي ضامينة علية بس شنو...

مر اسبوع لخ على وجودي بالمستشفى حالتي متبهذلة بكل معنى الكلمة صحتي النفسية تحت الصفر اكعد من النوم اصرخ واعيط احس جاي اعيش الصار من جديد المشهد مايطلع من راسي صفنات تاخذني بغير عالم لوقت كلش طويل اخاف وارتعبت من اقل حركة احسها قريبة مني كل هذا بصوب واهلي بصوب ثاني ماسمعت اي خبر عنهم ولا اجوي سالو عني وهذا مخبلني احسهم عافوني اكيد تخلو عني...

لازمة بطني بيدي اضغط عليها احسها دتتگطع كل مرة احس بوجع بيها بس هالمرة اقوة انتظرت ممرضتي تجي واحجيلها بس ماكو يمكن عدها ريست اليوم لو عملية...

اجت بخشمي ريحة بيض گلي احس معدتي خبطت طفرت اركض ذبيت من راسي روحي انمردت حتى اكل مماكلة رجعت لمكاني ماخطر ببالي شي ولا اي فكرة لحالتي لان صحتي متخربطة...

بيدي دفتر رسم واقلام جزء من علاجي النفسي شخبطت شوية وتركتهن ودموعي نزلت اتذكرت عادل من جنا صغار من يشوفني ارسم يبوگ اقلامي يشمرهن ويخليني ابچي صفنت اتذكر من اول ماطلعت من البيت رايحة اشتكي علية..

شيصير لو واصلة للمركز ومقدمة بلاغ ضدة..

اكيد ماصار الي صار هسة هو بالسجن واحنة عايشين حياتنا احسن من هسة لا عايشين ولا ميتين
ااااه شهل عذاب فتحت عيوني بخوف تلمست بطني احس انضربت على راسي وين جان عقلي ليش مفكرت...

طلعت من غرفتي جسمي كلة يرجف رحت سويت تحليل حمل احس حيلي باد ماعندي طاقة بعد بس لايطلع البالي صح شافتني الممرضة وصيتها على التحليل ومشيت ...

ماكدر اسمع الجواب بصورة مباشرة...

كاعدة بالكاع الباردة ودموعي على خدي الناس تمر مني تباوعلي بنضرة شفقة والممرضات كل شوية جاية وحدة تشوفني ملن مني وعافني براحتي رفعت راسي لممرضتي وهمست...

-احجي

الممرضة:-حامل

غطيت وجهي بيدي ابجي بصوت عالي ماعرف فرح لو حزن مشاعري متضاربة والخوف تارسني ترس من بعد ما تاكدت من الخبر...

خليت ايدي على بنطني وشهگت بصوت من سمعت كلامها هزيت راسي بلا وطفرت من مكاني ابجي بستهتار....

لزمت ايدي بقوة ولزمتني من وجهي :-سرى لازم تسقطينة احنا ماگنالج لان نعرف مو ثابت على اي ساعة يسقط ليش نأملج بوهم وبنفس الوقت خفنا من ردة فعلج خفنا ماتريدين طفل من الشخص المغتص..

-مغتصبني ومعذبني كملي

-وضعج مو مال حمل بنية جسمج ضعيفة ماتكدرين تكملين تموتين

-امنيتي

-مو وحدج تموتين روح وياج

-انتي گلتيها تموتين روح وياج شلون اتخلة عنة

-لان بعدة بالبداية بعدة ماكامل مابية نبض بسهولة تتخلين عنة مادام بعدج..

هزيت راسي بلا ونترت ايدها ومشيت لغرفتي تمددت بالسرير خليت راسي بالمخدة اصررخ بصوت عالي روحي مو بس گلبي التگطعت..

ماعرف شعوري رايدة هالطفل لو لا...

شلون حيعيش بدون اب شلون لو سألني عن ابوة شنو اگلة ابوك مجرم قتلتة الشرطة

لو من يسألني شلون جان يعاملج بابا؟

اگلة جان يشوفني فريسة يسد شهواتة بية لو خبالة المالة حدود...

محتاجة امي بهيج وقت اريد اختل بحضنها وابجي واحجيلها عن كل اليدور براسي تخلت عني باصعب ضروفي هل ياترى راح اسامحها وانسة هالفترة من عمري هاي اذا بقيت عايشة....

صرخت وبجيت الى ان نمت ماحسيت على نفسي..

-جاهزة

-لا

-خلي عقلج براسج بعدج بشهرج الاول

-مايفرق

-حياتج مهمة

-ابد

-مو لساني طلع بية شعر ماتتحملين الدكتوره دزتني ابلغج هالشي

-ليش هي شخلت ماگالت وهسة دزتج تكمل ههههه بشر ميت يخاف على جثتة!!

طلعت من الغرفة ضايجة كلش خليت ايدي على بطني ودموعي نزلت ليش لازم طفلي يفارق الحياة
وهو بعدة بالبداية خسرت الاول غصب عني بس الثاني مستحيل افرط بية حتى لو على حساب روحي...

مر الوقت بين العلاج والتفكير الزايد دخلت الممرضة مبتسمة سدت الباب وخلت ايدها على حلگها تضحك وتغمض عيونها ابتسمت على منظرها...

-شكو

-ضابط ضبوطي بوية يمةةةة اخذ عقلي وسحلني بعيونة الخضر مستحيل يكون هذا بشر هذا ملاك نازل من الجنة

ابتسمت على سوالفها وگمت اعدل بشالي...

-ولج هذا روسي فرنسي مو عراقي بس اعتقد مبرمج بس لو اعرف شبية حضي ولد گرايبنة كلهم ملحان چلحان هسة لو بس واحد حلو نفسة شصار

-تجي وحده غريبة تاخذة وتصيرين التست بحياتهم

-شلون عرفتي

-اروح اشوفة

-اخذيني وياج

-الثگل مطلوب

-دمشي اليشوف هيج شكول شيصير بحالة ياثگل هذا وحضرتة وگف المستشفى على تك رجل

رحت وياها وصلتني القاعة الضيوف كاعد على الكرسي مخلي راسة بين ادية وصلت قريب منة سلمت رفع راسة رد السلام ونهض...

-شلون صرتي

غصة صارت بلعمومي شخص غريب كل يومية يسأل عني وعن صحتي واهلي ماكو:-الحمدلله احسن

-تطلعين تغيرين جو

هزيت براسي محتاجة اشوف الدنيا شلونها من سجنة لسجن المستشفى امشي وراة واباوع بالمكان والناس البرا چني ماشايفة شي مشيت مسافة عن المستشفى وکفت التفت باوعلي...

-فحطت ماگدر امشي اكثر

-على بختج يول گلت ازورج لاماكن كثيرة

-غير مرة صحتي ماتسمح

-خلص نشوف المطعم هذا

دخلنا لمطعم قريب اول ماكعدت كتلة :-ماريد شي نفسي تلعب

-بعدنا ماگلنا يا الله

-احسن كلت اكلك من الاول

-عصير

-براحتك

طلب الي والة جنت اتفرج على المكان التفتت علية من گال..

-عرفتي بالخبر

-اي

-محد توقع يستمر الحمل شهر لان جان ضعيف رادت الدكتوره تنزلة بس جانت الا بموافقتج او شخص قريب منج محد موجود لذلك بغلتها تبقية الى ان تستقر حالتج النفسية وتخبرج هاي اذا استمر

-هذا الطفل غنيمتي من الحرب العنيفة

-هذا هلاكج

-اني هالكة من سنين

-الدكتوره حاجتني اليوم

-اكيد كالت لازم اسقطة

-خطر عليج ماتتحملينو تموتين او احتمال هو يمووت او ثنينكم وانتي المسؤلة عن هذا الشي سقطية سرى صح اني مالي الحق احجي وياج بهيج موضوع حساس وشخصي بس مضطر ماكو غيري
يحجي...

-مسحيل لا لا... لو نموت سوة لو نعيش سوة..

-لاتصيرين خبلة تراجعي عن قرارج عندج وقت

-لا ماعندي هاي نهايتي اي بس بدايتة...

دموعي صارت تطافر كمت من مكاني همست بصوت مخنوگ:-اروح اغسل

-مناك الحمام

هزيت راسي ورحت امسح بدموعي وترجع تنزل هواي علية هالشي كل يومية اخسر شي بالبداية حبيبي وخطيبي وراها حياتي وطفلي واهلي وهسة طفلي من بعد ماصفيت وحدي طلع ولازم اتخلة عنة
مستحيل انزلة هذا اخر قرار شيصير خل يصير اكثر من الصار مراح يصير...

غسلت وجهي ورجعت تفاجأت من شفت حالتة..

يحجي بالفون بصوت عالي يفشر ويسب الناش كلها تباوعلة مامهتم الاحد نازل دوسة ونص بالكلام *** فاقد صاير بركان شفتة هدأ رحت تقربت منة واسمعة يگول....

-خر.. بيه من قانون طلع بتلث سنوات ابن...
ماكو شي ثابت علية وهو يدير الاف من الشباب من اشتعلت روح امة... هذا لو الازمة اگطعة طلعة مثل الشعرة من العجين لا هي معروفة القانون بس گادر على الفقرة اما ولد السياسيين والهوامير مايلوحهم
مو بس بالقانون حتى وي عزرائيل عدهم واسطة يتزرف ومايموت....

***

-اهووو هسة هذا شرايد

رغد:-زهيران عوفية بحالة هسة يمج گرباج

زهراء:-امممم لزگة انوب يغني ايععع

گاعد ؏ الكرسي مخلي رجل فوگ رجل ويطگ اصبع ويغني بصوت عالي....

-نزار: وردة اسگيتها من ماي العيون صارت بالحسن فتنة للعيوون وردة وردة
انگطعت من غصنها وضيعت كل حسنها
اخ ياعزاز گلبي وين صفة بيكم الوكت

زهراء:-ياهم ذولة اعزاز گلبك

مط ادية وذب حسرة وگال:-ام طول الراهي اندرالها سبع فدوات لطولها وين صفة بيها الوكت هسة يابوية يايابة

طگگت عيونها بعصبية وصارت يمة تريد تنفجر

-انتتت صدك ماتستحي تحجييي جداامي على حبيبتك عينك عييينك

رد برود مستفز:-العفو وانتِ شكو يابة عمة ولد خالة ولد

-اهاا خوووش خووش لو تموووت ماررضة بيك روح لحبيبتتتك الجرربة مثلك

-لاتتجاوزين لا امررد حلگج

-موو بكيفك والله الا اخليهمم يموتونك تمووت

-دطيري الصفررة هذا ياهو يموتني

طلعت من المطبخ صايرة نار ودموعها على خدها بقيت بمكاني ساكتة اباوع لنزار يطگطگ باصابعة ومبتسم...

-شبيك وياها

-ختولي زعطوطة

-ترة مايصير تحجي هيج جدامها حتى لو صدك عدك صاحبة حرگت گلبها خطية

-بابو زايد شلعت گلبي الصخلة احسن منها عدها مشاعر وهي كلشي ماكو المشاعر معدومة

- بعد وكت تكبر وتتعود عليك حاول اكسبها ليش تستهزأ بيها وتخليها تنفر بالزايد

-هاي مو مال عين واغاتي شايفة روحها شوفة يگول بت الوزير والله يالله عليمن مغرورة مادري اشو لاخلقة ولا اخلاق

عائشة:-هاي عليمن لا خلقة ولا اخلاق

عدل كعدتة وحجة بابتسامة:-هلا عمة لاهيج على ممثلة ماتعرفينها جنة نحجي بيها انا ورغدة

عائشة:-خوش بس ماگلتلي ليش مبچي زهرة
شسوت وهيج وياها

-انا دخيلك ربي حتى ماشايفها شوكت بجيتها وعليمن ليش هي زهرة مال واحد يبچيها

-هم كلت نزار زين مو مال يحاجيها

-اگوم اشوفها شبيها

-سدت الباب عليها بعد ماتفتحة للميت غير مرة احجي وياها

-چا انا اترخص رايدين مني شي

-رايدتك سالم الله وياك

طلع ملامح وجهاا مگلوبة ملاحظة نزار كلش يضوج من يحجي وي زهرة مادري شتحجي وتجفص وياة وصايرة بيناتهم مشاحنات واحد يغث بالخ محد يعرف السبب شني...

تبلت الدجاج بصلصة وغطيتة غسلت ادية ومسحتها
-عمة اريد اروح لبيت فارس اشوف علي

-روحي بس مو وحدج اخذي واحد من الفروخ

-خوش

صعدت لحجرتي بدلت دشداشتي ورحت للمراية سحبت الكحل خطيت عيوني وخليت شوية حمرة سحرية لشفتي ولخدودي لفيت شالي وطلعت شعري من المقدمة مدري شبية استخفيت بس كلش ضوجة ملل سجيوة ونايمة فاتحة حلكها شبر وهدوة تقرا وماملحگة...

خليت عباتي على راسي وطلعت اخذت واحد من الجهال ورحت لبيت فارس..

البيت مابية طعم من طلعو وليجاي خاصة علاوي الة مكانة خاصة بگلوبنا من طلعو صار البيت وحشة عليهم بس همزين قريبين علينة كل ما اشتاگ اروح..

دگيت الباب فتحتة سفانة تباوسنة وتلگاني علي يركض ويصيح يرحب بيه رحتلة شلتة ابوس واشتم بية:-افييش ريحة الجنة عمبررر مسچ ادري سفانة شتخليلة من عطر ينگرط گرط

-من الله خية كل طفل الة عطر مميز

دخلت للهول فاتحة البلازما على الاخبار نزل علي وراح يركض يباوع شاف ابوة ضل يگمز ويصيح ابااا ابااا

حضنته سفانة تضحك وياة وتأشر:-اي بابا هذا شوف با الله شكد حلو با سويلة بوسة امووح

ضحكت على منظرهم ورجعت اباوع لفارس:-فخر العشيرة ههههه

-هههه اي والله صدك شكد افرح واتونس من اشوفة بالتلفزيون ولا چنة رجلي

-الله يحفظة الكم

-امين

-صدك شكد الج

-ماضابطة حسابي على المنزلي بعدني ماشايفة دكتورة...

-عفية كثرينة مثل علي

-حتى فارس يطلگني سوة بية فلك من حبلت

-يا ليش

-يكول اخاف عليج تعبين وعلي بعدة صغير وبيت وحدج

-سهلة تدبر شلون ماجان

-ان شاءلله وانتي شوكت تشدين الهمة وتجيبينة زعطوط يشبة المجسب

اختفت ابتسامتي احس گلبي عصرني بحال اطفال انا خل اعيش روحي بالاول اصطنعت ابتسامة وكلت
-الله كريم

نصت التلفزيون واجت كعدت يمي بطنها بارزة من الدشداشة وشعرها رافعتة كبة وزلوفها نازلات ابتسمت وكرصت خدها...

-صايرة تخبلين عيني شني السر ماتكلينة

-هههه مادري اسئلي فارس

-جا خل انجب

-شلونج وي رجلج بعدة على خبالاتة

-يعني

-يعني شني احجي ماتعدل

دنگت راسي احس العبرة خنگتني ماتحملت راساً بجيت حضنتني تطبطب على ضهري وانا اناشغ..

سفانة:-يتندم وداعت عينج مايعرف قيمتج

-حرت وياة معيشني برعب والله اخاف حتى احجي شي وياة گبل يخزرني بشك ومن غير مراقبتة وشكة الزايد حسرة علية الضحكة كل هذا بصفحة وتعاملة بصفحة ثانية ساعة يعيشني بجحيم وساعة بنعيم

-والله ماعرف شحجي الله يهدية عليج ويصلح من حالة

-هسة ماريد منة شي بس يعتقني تعبني وزهگني بعيشتي

-يجي يوم ويعض اصابعة ندم على تعاملة وياج

-من يفووت الاوان

ضحكت من شفت علي يمسح بخدي ومبرطم شفتة ويگول:-الدو مو هلو (حلو) هوو هوو

بست ايدة وحضنتة:-يروحلك الدو ابو صماخ فدوة شسوي بية وانت موجود

-عيني اعوفج وي علاوي افندم واجيبلج الضيافة

-مايحتاج هو موجود جنة كيك

-ولج رغيدة عوفينة منة شوية

-بس شوية بس

بقيت الاعب بية ولا ينمل منة شكد عدنة جهال بس مستحيل يوصلون لمعزتة شوية شلتة ورحت وراها للمطبخ..

صبت عصير وخلت صحن كليجة اخذت وحدة اكلتها
-عاشت ايدج تخبل

-سويتها مرة صارت ادمان لفارس تخلص يجيبلي غراض ارجع اسوي وهو علية الشوي

-ههههه الله شكد حلو فارس ذني شاويهن كون تسمع امج

-حتى نطير صدك شلونها

-اليوم راحت لعبير تشوفها

عبير رجعت لرجلها بعد ما تأدبت من گلب ولسان الكل يمدح بيها هسة عسى ولعل الله يصلحلها خطية جهالها شني ذنبهم تبهذلو وراهم بتها تمرضت وصلت الموت نامت وياهة مستشفى وعلى اثرها رجعت...

-الروح والرية زينة

-اي

-دومها ان شاءلله اي البنات شلونهم

-عفتهن نايمات خطية تعبانات من الدوام

-وانتي ماناوية تكملين

-ليش انا بكيفي وما اكمل والله حسرة بگلبي ضالة شني ذنبي من انخدعت وحبيت سگط گلت اعرفة من چنا صغار وابن ولايتي مافكرت بيوم يستغني عني والله لو واحد ماعرفة فلا اسويها واعاين بوجهها

-صار الي صار ماضي عوفية بمچانة

-الماضي هذا هدم مستقبلي وحاضري ااااه خليني ساكتة على الوضع

كعدنا ناكل ونسولف من سالفة لسالفة ماحسينا على الوكت اندكت الباب راحت تفتحة شفتها طولت رحت اشوف ياهو الاجة خليت ايدي على حلگي اضحك لازمها فارس من خصرها وهي مجلبة بية من رگبتة رجعت لمكاني صارت بيها مباوس...

خليت عباتي على راسي ودخلو...

فارس:-ياهلا ومية هلا برغدة منورة البيت

-هلا بيك خوية البيت منور بام علاوي يلا انا اروح مشكورة سفانة على الضيافة

سفانة:-نتعشا ونروح سوة

-لا والله ماگدر هذا مادري بية شوكت ينزل يسويلي مفاجأت بجيتة يلگاني ماكو حتى يحرگني

-شني تايهتلها الا اشوي على اذانة بصل هالمسربت ضلي وانا اوصلج وابن امة اليحاجيج

-تسلم ماتقصر غير مرة وراي العشة هم يلا الحگ اسوية

-چا امشي اوصلج

سلمت على سفانة وطلعت وصلني فارس للباب دخلت وسلم على مرت عمي ورجع خليت رجلي بباب المطبخ وتجمدت بمكاني....

كاعد على الكرسي يهز برجلة ويدخن وجههة مايگصة السيف رفع عيونة خزرني ردت اوگع من طولي بس نضرتة هيج چا شيسوي...

نهض من مكانة واجة صار گبالي من الخوف الساني انبلع حتى ماگتلة الله يساعدك بحركة سريعة جر العباية من راسي وحچة راص على سنونة...

-المن لابستها اذا شعرج كلة طالع

-ها

مديت ايدي لحجابي ردت ارفعة وصاح بية:-عووفية هييج

روحي راحت صرت ارجف هسة انا شطلعني وادري هاي ايامة المفروض كبل اسبوع اتحضر لهيج مداهمة اجت عايشة كالتلة...

-يمة انا وديتهة خطية سفانة مريضة وماراحت وحدها نزار وصلها وهسة فارس جابها

-هسسة اناااا حاچيييي شي مووو ماكل نعل ومنچبببب

دار وجهة الي اشرلي فوگ للغرفة رحت اركض على ساعة واعثر على وجهي خرب بليسك مدمرني بتعاملك شلون تصفة وياك....

وصلت للغرفة دمعت عيوني اخاف شكلة حامي علية ردت اروح لغرفة البنات بلكت سجيوة تحميني لو تحجي وياه بلعت ريگي من سمعتة وراي راساً فتحت الباب ايدي ترجف رحت للكنتور اطلعلة ملابس من الخوف ماعرف شطلع....

اسمع طبگة الباب بقوة رجلية صارت خيوط وكفت متصنمة من صاح:-تعااي يمي

عفت البيدي ورحت امشي حيلي باد كل ماباوع بشكلة انخلس من ذاك اليوم الزماني صرت ارتعب منة لان صدك حسيتة شخص ثاني ماعندة رحمة

ضليت بعيدة منة:-ها

سحبني من ايدي علية اطرافي ثلجت:-ماسويت شي والله

-صح وطااالعة من البييت بدووون علميييي

-بس انت ماموجود

عصر شفتي بقوة احسها راحت زمجر بوجهي بعصبية:-واذاااا ماموووجود بكييييفج تتصرفييين تطلعييين و*** والله نعااالي ماموووجوود

عاف شفتي وجر شعري من مقدمة راسي لزمت ايدة ودموعي نزلت:-بعد ماطلع والله بس عوفني ااااخ شعرري تگطع شبييييك

-بتتت الكلببب رااايحة لبيييت فااارس لو موواعدة شعرررج طالع والوجة لاطمة بية لطممم شعنننندج گولييييي

تسودن علية صار وحش ولايگول بشر اريد اطلع روحي منة ماكدر الراجديتات تجيني من كل مكان وشعري قريت علية السلام گطعاة تگطع...

شمررني ؏ الجرباية ونزع حزامة صرخت بصوت اتوسل بية:-فدوة لاتضربني بية والقران يموت لجاسب فدوة لعينك والله ماعدي شي...

ارجع ليورة وهو يتقدم عيونة صارن بگصتة كل ماباوع للحزام تطلع روحي مرة ضربني بية ضل الاثر شهر شلون لو يجلدني بية انطخيت بالتاج بعد ماكو امل صحت بصوت عالي...

-وووولج سجيوووووووة الحگيلييييي ولج ييييمة رااااح امووووت تعاااولو طلعوون...

ماكملت كلامي واجت الضربات علية وحدة ورة الخ بكل ضربة روحي تشيط بكل ضربة اكرها واحقد علية ضليت جوة ايدة لاحول ولا قوة مطلع قوتة علية يضرب بكل قوتة راص على سنونة....

-مطلعة شعرررهااااا ومخلييية كححححل وحمررررة وطاااالعة من البيييييتتتتتت شكووووو طاااالعة الممممن كاااااشخةةةة احجييييي ووولج رااااح تسووودنينيييي

-والله ماااعدي شييييي يمممم سفااانة والله للللك ااااانت مررريض مسووودن الششك راااح يعمييي على عيووونك...

-كللللة مممن ورااااج سووووودنتيني الممممن طاااالعة شكوووووووووو

سكتت اتحمل الوجع مو مال احجي وي وحش جسمي من الضرب كمت ماحس بية الباب تعطر فوك روسنا اسمع سجيوة تكسر بالباب وتصيح...

-اااابن الكلبببب عووووفهااااا احتررررگت رروحك ووولك عووووفهاااا مسوووي روحك زلمةةةة مطلع رجوولتك على مرررة لان انتتتت مرررة النذذذذل

مو بس انا روحي تفرفح روحها وياي تفرفح الباب خسفتة بيدها ماخلت لاغلط ولا شتم صوتها طبگ

ذب الحزام من ايدة ورفعني من شعري يصيح بوجهي:-ليييش طلعتتتتي ليييييش هسسسة شلوووون اتأكدددد ماحاااجية وووي وااااحد

-احترررگت ررروحك المرررريضة ررروح تعاااالج لييش جااااي تطللع شكك بييييية

ماحسيت الا راجدي دار وجهي صفح فرفحت روحي
صرت جثة ماكدر احرك ايد بس دموعي تنزل وعيني على الباب اليتكسر وصوتهم برة يصيحون راح فتحة وتكوم بالكاع ماشوف غير فارس فوگة يضرب بية بوكسيات ماسكتلة وصارو بالدفرات اجة رحمن لزمة قيد حركتة وفارس تولاة بوكسيات ودفرات ويصيح بية.....

فارس:-مسوووي ررروحك رجااااال ولك شخلييييت للزلم گااادر علييهاااا مرررريض تتتشك بيهااااا والله والله اذاااا ماطلعتتتتلك گلبببببب ماتسمممممة بسمييييي ااااانعل يووومك ارررريد حيووووان....

اجت سجيوة تركض حضنتني تبجي وتغلط وتفشر علية حسيت روحي انتهت غمضت عيوني خلصت طاقتي بعد....

كاعدة على الجرباية راصة على سنوني من الالم اجت سجيوة كومتني لازمتني بيد وايد لازمة بيها جنطة مخلية ملابسي طلعت وتلكاني فارس...

-يلا امشي انعل اصلة الج والله الا اخلية ينذل

نزلت وراة على كيف جمدت من سمعت صوتة بعد ماكدرت اتحررك....

جاسب:-فاااااارس لاتدخل اناااا ومررررتي

رد علية ببرود:-ماسمعت عدل انت منيلك مرة باوعلي باستغراب واشر علية بس لا رغد قصدك طليقتك
اووف شلون نسوة هاي ب...

بعدة فارس مامكمل وهو ثار البيت هرجة هرج بصوتة العالي:-ماااااا تطلللع من البييييييت احرررگكم بسسسس تطلللع لحددددد يدددددخل بينننة

تقدم علية فارس من شافني خايفة وكال برود...
-يلة رغدة تحركي وراج راحة اطمني اخر مرة تسمعين هالصوت القذررر

طلعت صرت بضهررة ارجف من اسمعة يغلط ويفشر
مد ايدة يريد يلزمي ولزم ايدة فارس لواها....

فارس:-ااابن اااامة اليمددد ايييدة عليهاااا وانااااا موجووود احررررگة وهوووو وعاااايش جاااااسب فك الشررر وخلينة نطلع بسلام لان غصباً ماعليك اخذها

اذني انطرشت من صوتة صار البيت هوووسة ارجف ومجلبة فارس امشي على خطاة فزيت من جر فارس مسدس من جيبة ابتعدت اشوفة منيشنة على جاسب ويصيح....

-اكتلك واااطلع وخررر منييييي حيوووان

جاسب:-اكتلنيييي ياااهو الازممممك

راد يجفت علية ولزمة رحمن بوكسيات مارفع ايدة علية ولا دافع عن روحة عفنة نزار يفاككهم و طلعنا لبيت فارس...

بس دموعي تنزل سفانة صافنة بية وعلي يمسح بدموعي ويصيح:- احوو اما احوو

سفانة:-اي يبعد امك احو الله يكسر ايدك يالمجسب بايگة ناهبة حسبي الله ونعم الوكيل بيك

دخل فارس بيدة شريط حبوب انطاة لسفانة:-هذا مسكن خل تاخذ منة كوميها خليها ترتاح

جابتلي كلاص ماي شربت الحباية ورحت تمددت جسمي يون علية من الوجع شسويت وهيج تعنفني شكك راح يموتني انا اعلمك الا اخبلك فوك خبالك
جفني يحرگني نمت من ورة المهدأ...

**

صافنة اباوع على حالتة معقولة عدة انفصام بالشخصية لا احتمال مريض نفسي ماكو هيج امكانية على اتفهة الاسباب يجرم بيها وبعدين يرجع يتصرف طبيعي ماچنة مسوي شي...

استغفرت الله وگمت شافني وصاح علية زفرت بملل ورحت وكفت بعيدة عنة وكتلة من ورة خشمي:-شتريد

-روحي گلي لرغد خل ترجع

-لا والله بيك شي حبيبي انسة رغد

-سجيوووة وحگ السماااج اذااا ماخليتيهااا تررجع اطيحة لحضج و..

-هووب هووب شني امي شبيك ترة انا مو مرتك اعصابك شني تطيح حضي تايهتلك لو هي بكيفك تضرب ماعليك رغيب

رفع ايدة نزيت عبالي يطگني بس تفاجأت من كام يشلع بشعرة بقوة راص على سنونة ومغمض عيونة

-هيج شلعت شعررها هم راح اشلع شعرري يلا گليلها بعد ماطكها خل ترجع وشتريد اسوي

-ليش تضربها اساساً اذا هسة متندم

-من تصيرين بمجاني راح تعرفين شحس يعني الگاها طالعة مخلية مكياج وشعرها طالع وتضحك ليش هاا ليششش شكووو تسوووي هيييج

وخرت منة حسيتة فقد لايضربني راجدي سكتت عنةو عفتة يصيح وراي:-ولج سجيوة بس انتي التأثرين عليها فدوة روحي رجعيها

حجيت وانا امشي:-انساها خليها ترتاح

-شهررر شهررر مارتاااحت

-ماترتاح وانت بهاي حالتك وتصرفاتك المزعجة

صعدت يم البنات هدوة تقرأ خطية منتهية مثل اختها نوف علبو سادس ابتسمت اشوف شروق تخلي علاجات لشعرها بعد كم يوم عرسها بس ماشوف فرحتها كلشي تسوية بروح طافية...

رحت اخذت العلبة من ايدها:-جيبي انا اسوية

ضليت اسرح بشعرها وهي صافنة:-شبيج

-ها لا مابية شي

-لا بيج كولي ياهو وياج حتى اعرف شغلي

-لا والله محد مأذيني

-چا شمالج مكدرة مو راح تاخذين رحمن العاشگتة

-شوية خايفة مو اكثر

-خاب والله ذبحتني تخلصنها تتراجفن يمنة وكالبات خلقجن ومن تروحن تسيحن منين تخافين هو رحمن ماشايفتة اشو مامخلين سالفة طايحة حظ مامسوينها

-لا والله مامسوين شي

-خاب انچبي غير لزمتكم بالجرم المشهود لو ماملحكة هسة ابنج يزحف

-اي بس هاي المرة وراها صار بس يسلم من بعيد

-خوش خوش عود صدكت

ضحكت على شكلها صارن خدودها دم عفتها و نزلت اشوف جدتي تصيحلي:-ها جدة

-ها يمصكوعة زلمتج يريدج

حجيت متفاجأة:-الاملح اجة

-خايبة اي والغسل شو ماتعرفين تحجين زلمتج هذا

-والحمزة نسيت اه شني هسة شسوي كليلي فدووووة

-امشي ولي لاتضلين تفترين جنج صخل املح

رحت اركض طلعت ملابسي نثرتهن نثر سحلت دشداشة جديدة عندي تفصالها وقماشها يخبلن بدلت بسرعة ولفيت شالي ورحت ادنفس بالعطور والمكياج اخذت عطر من شريقة سبحت بية وخليت حمرة وردت خدودي تاكدت من شكلي ديلا هسة ياهو هو احلة مني...

رحت للديوانية لكيت يمنة ابوي يريد يطلع لفصل شافني اجيت وراح...

سلمت وكعدت صارن ورة ضهري مخدتين ارتجيت عليهن ضحك ورفع ايدة وكال بصوت عالي

-الله بالخير

-الله بالخير والعافية

-ادري شيخ عشيرة عوزج بس عكال ماطول لابسة دشداشة

دنكت عيوني للدشداشة جريتها من ناحية صدري وكتلة:-احجيلك عن هاي الدشداشة قماشها تركي اصلييي وسعرها مو هين وخياطها ب...

-هسة عاتب عليج وكايلج منين مشتريتها لو كايلج حلوة

-هسة ضروري تسالني لا بس ضروري احجيلك انا وطبعا هي حلوة لان انا لابستها جمااال عيني

-خبالو شوكت تعقلين

-عاقلة انا من زمان

-چا كونج عاقلة يمتها نتزوج

-ها لا چا ماتدري نسيت اگلك انا جنت بمستشفى امراض نفسية اتعالج الدكاترة ملت مني وطردتني وهسة انا يمك الحمدلله على كلشي شنسوي هذا امر الله....

-لسانج تنطينة فلوس لو يشتغل ببلاش

-لا والله بلاش مو خطية يدري بية حالتي على گدي

ضحك وهز راسة شفتة كام عبالي راح يطلع سد الباب واجة على وجهها نص ابتسامة عدلت كعدتي وعكدت حواجبي...

-شلونك هلو

-زين بخير انتي شلونج

كعد بصفي ومد ايدة ورة ضهري وترني قربة هواي نحجي بس مانتطرق لسوالف غرامية ولا بينة لمسات وحركات....

-ها شبيك

لزم وجهي بثنين ادية واخذ شفتي ....

ابتعد مسافة صرت ادفع بية ايدي ترجف:-فاسددد ملطلط مو...

رجع ثاني مرة انتهيت بيدة كوة فلتت روحي منة كمت ردت اطلع مالحكت سحبني من خصري علية لزمت ايدة ادفع بيها:-شبيك تسووودنت ماجنت هيج
شسودنك علية

مد اصبعة مسحت شفتي وعينة عليها:مو انتي گلتيلي وانا نفذت تدلل سجوة

شهكت فاتحة عيوني على وسعهن:-دهر حتى دهرر يمتها كتلك شني تتبلة علية انوب بسوالف طايحة حضها

طلع موبايلة من جيبة گلب بية شوية وطلعلي محادثتنة قريتها وجهي اشتعل فوك ماهو مشتعل هاي انا شحاجية دهر صابني انسة روحي من احجي

-اءءء شوف ترة انت افتهمت غلط مو هيج جان قصدي تعرفني انا ماعدي هيج سوالف

كرص خدي وسحبة ضربت ايدة وكتلة بعصبية.
-يلا عوفني لاتزودها

عاض على شفتة خفت منة بعدني ماحاجية ورجع باسني مادري شني احساسي ملخبط حلو بس شعور الخجل والغضب من تصرفة البدون سابق انذار خلتني اعصب دفعتة اريد انفجر بوجهة غمز بطرف عينة وكال...

-ترة انا خوش ولد وكلت اتاني العرس احسن ماضوگ واضل اشتهي بكل وكت بس انتي ردتي كلت خطية ليش تضل بنفسها منا للعرس

-شوووكت گلللت شووگ...

سد حلگي بيدة وهمس:-مو هيج گالوها علكيفج يبنية اول مرة هاي المفروض تفهين

كورت ايدي وضربتة على صدرة ابتعد لازم صدرة يضحك ذبيت نفس وباوعتلة بطرف عيني...

-هسة شكو تضحك

-عليج حبيبتي

-حبتك حية

-الحية بشخصيتها وياي

-هلو هلو شو صرت حية شني شفتني

-جبار ابو الشربت

-ااااااارفد

-صمام گلبة

-احجي كلام حلو شني حية ترة عيب

-جا ما گلتي عيب من دكليلي حبتك حية

-نسيت ماجنت متقصدة

-ماصدك الا تكولين والحمزة

-ههههه والحمزة

-عليج هو الحمزة خل نعرس هسة

-شني عيد ماسمعت هسة هسة

-ابوسة لعقلج وين هسة قصدي هاي السنة

-والله فايخ ادور على قاط للتخرج لو بدلة للعرس لو احير بالبحث شلحگ

-چا شلون هسة

-شكو شصاير

-ماصاير شي بس خليتيني اشتعل

-عاصم الكلب

-تعاي ابوس حلگج جبتيها عدل

-دولي صاير ماتستحي يلا امشي انا ضل انت وعاصم

-وين رايحة غير تعرفين عليمن جايج

-غير عرفت

-لابوية مو البالج اجيت علمود البحث

-شبية

-الجنة صدرت قرار كل طالب يسوي بحثة وحدة وهذا الاسبوع يردون اخر مجموعة والباقي على الكورس الثاني

-صخام الصخمهم شنلحگ ماكدر بالكورس الثاني انا من زمان مقررة بالكورس الاول اقدمة واخلص منة
شلون ورطة

-ماكو ورطة وانا موجود جيبي غراضج خل نشتغل مادام فارغ

-صدك

-لا جذب دمشي بساعج

رحت اركض جبت الحاسبة وواوراق واقلام خليتهن كدامهة وصرنة نتناقش ونبحث اباوعلة ولايكول هو نفسة القبل شوية شخصيته تغيرت رجع استاذ نضراتة جامدة كملنة جزء منة وراح....

رحت رجعت غراضي لمجانهن وطلعت برا...

جدة حكمة:-خايبة يسجوة شلونها رغدة

-والله مادري

-يو انتي ماتدرين جا ياهو اليدري

-لا هي زينة بس صار يومين ماشايفة اخبارها ملتهية
هسة اروحلها

-وياج سلميلي عليها وگليلها الجلب العضج كتلناه

-اي واضح اكتل بس خوش تشبيه جلب هههههه

-دمشي لايسمعج وتعالو خلصوني

-افاا ياهي التصيح كبل اشيل ثليثية (طابوكة) وانبتها براسه وابن امة اليدخل

سمعت صوتة يحجي وي عمي رحت اركض جوة يمة لايسمعني لبست عباتي ورحت اشوف رغد البيت وحشة عليها....

وصلت لاگاني علي يحجي بالسرياني وياشر بيدة شكلة يخبل:-ولج فهميني شيحجي هذا

سفانة:-يرحب بيج هاي كل مايجينة واحد هيج يسوي

-اروح فدوة لطولك تعال اكلك

شكد ابوس بية ماشبع بية جاذبية غريبة...

-اي رغدة شلونج

-بخير بس كون الله يبعد هذولاك الناس من دربنة

-حلم بليس بالجنة صدك ولج حليانة

سفانة:-غير عافتة بعد ماطيها تعودت عليها

رغد:-حتى انا بعد ماعوفج تعودت عليج وعلى ابنج

سجى:-اكلج هسة ابد ترجعين

-لو يموت مارجع فوك السواة بية شفت منة وارجعلة لاجلمة حلوة ولا شي بية حظ يكول مجرمة عدة مخلصها تحقيق على اتفة شي وكل هذا الكتل علمود مخلية كحلة لعيوني شدعي عليك يلمجسب

-خاب متسودن كلش يطب ويطلع يصيح اجة الصبح يكلي كليلها ترجع

سفانة:-وكل يومية يجي لفارس ساعة يتهدد ساعة يعتذر ساعة يتوسل بدا ينكسر خاطري علية

رغد:- اوووف لاتجيبن سيرتة يتعكر مزاجي خلص سدو الموضوع(تونست على سوالف سجيوة ساعدتنة بلف الدولمة رادت تروح وجلبنا بيها تعشت وراحت تركض رحت كعدت بالغرفة طلعت مسلسل وكعدت اتابع وعلي بحضني...

من يوم العفتة ارتاحيت بس اخاف يرجعوني الة وهم يضل كل يومية مطلعلي سالفة والله مليت منة

اجت سفانة بيدها صينية حلويات كعدنا نتابع وشوية اجة فارس انضم ويانة وكل شوية سائل
-جا هذا منين شو اجة حامي عليهم

سفانة:-حبيبها القديم هذا لزگة

-احتركو موتاة يحرك الكلب هذا مالة رداد كون عندب جا طريتة نصين

سفانة:-يابة هناك تركيا تختلف عن العراق فدوة فارس اسكت خلينة نشوف شيصير

فارس:-ساكت عمي ها اهاء بس اوكفي هذا الشويب منين جنة شيبة فكر من فتحة قمصية عرفتة طايح حظ

بزعها لسفانة كل شوية وعلق على شي وخلاها تعصب ويضحك عليها ومن يصير اعلان يضل يسولفنة عن شغلة والسوالف التصير وياة وكلنا نضل ساكتين نسمع حتى ابنة....

فارس:-خاب شني تحسسوني الحكواتي مالتكم

سفانة:-لا بس سوالفك حلوة تخلي الواحد يندمج

فارس:-ماكو غيرج الحلو ام علاوي

غزلهم سوالفهم كلشي بيهم مميز وجميل ادعيلهم بكل صلاة ربي يحفظهم فارس هو ورحمن نفس الشي حسسني فعلا اختة...

انقهرت على رحمن من تخارب وي جاسب علمودي وضرباة اول مرة يمد ايدة علية انوب سوو حفلة تخرج وكل واحد بصوب دزلي فارس صور التخرج طالعين يخبلون رحمن جاي ياخذ صور هو فارس وحدهم واجة وياهم اخذ....

گلبي ورم قهر شمرت الموبايل ورحت اعزل بالبيت واطلع شغل سفانة وعلي راحو لبيتنا صايرة هوسة كلها تحضر لعرس رحمن رادت مني سفانة اروح بس مالي واهس مو المفروض نعرس سوة ونلبس البدلات البيض سوة چا شكد ضلمتني حتى الابيض مثل البنات ماخليتني البس وتريد ارجعلك....

شغلت التلفزيون يسد الوحشة شوية ورحت انضف المجمدة رغم هي نضيفة بس شسوي اريد الهي روحي عفت البيدي ورحت اشوف الباب يندك عبالي سفانة رجعت راساً فتحتة....

جمدت بمكاني وگلبي يدك بقوة صفنت بشكلة مو يكول شهر لا جني سنة ماشايفتة...

لابس الزي العسكري طالع علية يخبل بمعنى الكلمة رغم ماحبة بس احجيها لله نزل بيريتة من راسة ودفعني ودخل مدري شصار بية ماعرف حتى اتصرف انثولت ثول....

لزم جف ايدي وسحبني خلة البيرية فوك راسي
نزل عيونة الي وگال:-هاي كلها علمودج ردت من تكعدين بنص النسوان يصيحن هاي مرت الضابط ويحسبلج الف حساب مو يضلن يستهزأن بيج علبو هاي مرت العامل

دمعت عيوني من كلامة دفعت ايدة ورجعت ليورة رجع سحبني علية نزل راسة لراسي ركز نظراتة بعيوني وكال...

-ارجعي رغدة مو هواي كافي اخذتي حگج وزيادة

-ماخذت حگي ولا راح اخذة

-اسف بكد ما اذيتج

-مايفيد اعتذارك شيصلح ياكسرة بيهن خليتني اعيش بقلق حسرة اضحك بالغلط وتحسبلي سالفة ها تذكرتي سوالفة لو غزلة وضحكتي تطلع ابو الضحكة من عيني حسرة علية اضوج حالي حال العالم راساً تكول ها تذكرتية وتذكرتي ايامج وحنيتي
لو...

سد حلكي باصابعة:-اس كافي لاتحرگين روحي كتلج اسف خل نرجع ونبدي صفحة جديدة اسويلج عرس وي شروق واسويلج احلة زفة

-بالوكت الغلط كلش ماراهمة الابيض الالبسة هو چفني وانا بعد ماريد لا زفة ولا بدلة ولا اريدك..

عصر فكي بيدة عيونة صارن يجدحن من العصبية هسة لو يموتني ياهو اليطلعني منة....

جاسب:-ماتررريدييني مو ادررري تررريدينة وتكولين لا جا كونج نسيتية ليييش ماتريدينييي لييش

دفعتة بقوة ابتعدت عنة ارجف راح للحايط يضرب بية بوكسيات ركضت للمطبخ دخلت وقفلت الباب خفت يرجع يكتنلي وجيب اليفزعلي...

كلبي يدك بقوة واطرافي ترجف اسمعة يغلط ويصيح بصوت عالي وي كل ضربة اشهگ لا اكدر امنعة من اليسوية ولا اكدر ارجع وياة...

كاعدة بالكاع ساندة راسي على الباب ودموعي تنزل همس بصووت مبحوح واضح الانكسار علية...

-كافي رغد ارجعي والله تعودت اشوفج بالحجرة تفترين وتطكطگين اصابعج ارتاح من اشوفج احس مسوي انجاز انتي باسمي وجدام عيني نسوي عرس اكوم احجزلج بدلة

-كلشي ماريد بس امشي

-اجيبلج كعب عالي وباقة ورد بنفسجية مثل ماتحبينها تشمرينها على البنات كلشي اجيبلج كتلج اعتذر يلا كومي خل نرجع ترة انا اكدر ارجعج ان رضيتي او لا بس ماريد اتخارب وي فارس فوك ماحنة متخاربين

ساكتة بس ادموعي تنزل بحرگة گلبي متجوي بنار شلون ارجعلك وشلون اعيش وياك ماترهم...

بقة يحجي ويتوعد بشي مستحيل يصير ادري كلش زين هالحجي ماينطبق وبس ارجع يرجع يتعامل وياي باسلوبة الجاف ويعصب علية ليش ما ابادلة

مانطيتة امل بشي ضل يتهدد ويتوعد وراها اختفة صوتة معناها طلع....

***
شروق"

البيت مخبوص الكل يحضر للفرح فرحة التخرج بصوب وفرحة العرس بصوب ثاني...

بداخلي مشاعر فرحة وبكدها واكثر منها مشاعر حزن ماكدر اسيطر عليهن ضهرت على ملامحي وخربت زينة وجهي....

طفرت من مكاني رحتلة دخل وسد الباب بزي التخرج كاعد علية كعود ضحكتة شاكة حلگة همست بابتسامة:-الف مبروك شايف كل الخير

-الخير واهل الخير انتي شروقي

فتح ادية رحت اركض دخلت بحضنة سد ادية بقوة وياخذ نفس من شعري دفو حضنة هيج المواجع ماتحملت وبجيت بصوت....

رفع راسي غابت ضحكتة وتحولت الى استغراب وتسأل:-شبيج بنيتي ياهو وياج

-محد

لزم وجهي بثنين ادية مخلي عيونة المتروسة خوف بعيوني:-مردتية لگلبي احجي شبيج حاس بيج شي سولفيلي شروقي

-محد وياي بس محتاجة اهلي محتاجة امي ابوي اخوي اخواتي الماعرف شي عنهن انكتلن تسفرن للخارج محتاجة عائلتي الجانت بيوم من الايام اسمها عائلة...

حضني بقوة يبوس براسي ويكول:-اصيرلج ام وابو عدهم بس هالوحيدة وحايرين بيها احطج بروحي واسد عليج

-شهكت ورفعت راسي:-التفات واسراء وين راحن

باوع بعيوني بحيرة وكال:-سمعت خبر بس مو اكيد

گلبي نبض بقوة خفت واحس الدم وكف بعروكي كوة همست:-شني الخبر

-طلعوهن من السجن وزوجوهن

-شني ياهو الگال فدوة رحمن لاتجذب وتنطيني امل جذب

-وداعت عينج ماجذب اسراء مزوجينها لشيخ عشيرة مرتة ميتة عمرة بالاربعين صغير مو كلش جبير والثانية فوك ضرة سمعتهم يحجون بس من سالتهم غلسو وسدو السالفة

-ليش سدو السالفة خاف مو عليهن لو يجذبون ليش ليش ماكالو وطشو الخبر

-لان سالفتهن نسدت مارادو يفتحونها من جديد وهما بالاساس كارهين سيرتهن

-عليك الله يعني عايشات

-وداعت عيونج الماكو اغلة منهم حتى احلف بية عايشات وبخير بس يصيرلي وكت اسأل عليهن

حضنته ابجي واضحك هم وانزاح من گلبي هيج وربي رحم بحالهن وعافوهن يشمن الهوة فرحتي ماتنوصف...

-ترة كلش عيب ماضل شي لعرسنة

-اخاف عليج من هالليلة اخاف مايصبح عليج صبح

رديت بخوف:-ليش

لزم وجهي بثنين ادية وهز راسي مكزكز على سنونة
-اكلج اكلج جنج قطعة كيك تشلين حالي

-رحمااان

-اووف يا اسمي اليطلع من حلكج العسل

-احبك

-بعدج قديمة انا عابرج بهواي وصلت لاخر مرحلة وياج همت بيج انا همممت

لزمتة من قميصة وضحكت:-لايگلك الزيتوني ليش كل اليلبسون هيج لون يطلع عليهم حلو مثلك؟

-لاتحاولين تتغزلين ابد ابد

-ليش سيادتك دولة وعلم تستاهل واحد يتغزل بيك وياخذلك تحية

-سيادتة رايد بوسة شيصخم بالتحية

-لاعيب حضرة سيادتك المحترم مو لابس الزي لازم تنطية حقة

-احترك سيادتج واحترك ابو لا ابوي شدخلة

-مدري والله صح شدخلة

-من وراج غير صيري فقيرة واستري على رويحتج

-يدلل الضابط

كلتها بضحكة ودلع راد يهجم علية واندك الباب عوج حلگة وراح يفتحة سمعتة يرزل بسجيوة ضحكت على سوالفهم ومناكراتهم...

مرت الايام ماكو نركض ركض نحضر وما ملحگين رغد بعدها بيت فارس مااجت ولاوصلت بيتنة علاقة جاسب برحمن رجعت لان جاسب يحجي وياة ويسولف مايخلية يزعل...

اتصلت برغد تجي بس تعذرت وكالت تعبانة ماكدر سديتة منها واتصلت بنوف كاميرا طاك كلبي عليها

"" "" ""

جيتك بليلة شتة
ضلمة ومطرها رشگ
وشبعدة صار الدرب
خوف ورعيد ومطر
وجفوف ادية زرگ
بابك طحت ها گمت
ضميت ادية وردت
عالباب بالروح ادك
بس كالو المن تدك
كلمن مشة لحالتة
واحد سكن بالغرب
واحد سكن بالشرق

مسحت دموعي وطفيت الفون صايرة بسرعة اتأثر و ماعرف ليش صايرة روحي بالشعر....باوعت بالساعة و نزلت جوة كعدت على الدرج منتظرة سجاد يوصلني اجة عبدالله كاشخ يريد يروح للدوام وگف كدامي وكال ...

-نوفاانة ادعيلي فدوة

-خير على شنو ادعيلك

-لج اليوم راح اصارح بنية ويانة بالقسم فدوة لله تخببببل

-وشنو يعني

-خاب ومرض كون تقبل بية اشو الا تقبل وين لاگية واحد بجمالي واناقتي اشوگ شگ اني احلة واحد بالقسم

-شلفايدة بعدك زعطوط انطوك الف لو بعدك

هجم علية يريد يكفخني وطفرت اركض لاگاني سجاد ختلت وراة اعيب علية ..

عبدالله:-العگروكة ام الوصخ اني زعطوط لا والله ماغيرج الزعطوط ام الوصخ الكسولة

-اي صح اني كسولة ودخلت صيدلة وحصير صيدلانية

-خاب انتي كبسولة ماتصيرين مو صيدلانية عود اذا فتحتي بالمستقبل كعد كبال الصيدلية وكل اليجي انطية تقرير عن غبائج و اخلية يرجع واشوف شلون
تصيرين صيدلانية

-مقهورررر لا تموت حبيبي

-سجاد:ياخوان على كيفكم من الصبح وفرو العركات لليل مايصير من هسة يخلصن

عبدالله:-اني ماشي ضلي العگروگة

نوف:-خاب طير هسة تضربك بوري

عبدالله:-اي مو اني نوف حتى انضرب بوري

طلع كالب خلقتة، سحبني سجاد لحضنة باسني براسي شميت عطرة وغمضت عيوني بقوة عطر حياوي هذا جانو يخلون نفس العطر ابتعدت عنة ونزلت الدرج...

-انتظرك بالحديقة بين ماتتريك

-وانتي متريكة

-اي

-لاتجذبين نوفانة

-اهوو شبيك متريكة على شنو اجذب

جذب مامتريكة بس ما اشتهي اكل كعدت بالحديقة وخليت الملازم بحضني مررت ايدي على صدري مامرتاحة
الحزن نفس الحزن
والراح نفس الراح
مامرتاح

جنت اعتقد اذا رجعت لبيتنا ارتاح بس صار العكس محد بينة ارتاح مكان اخونا بارد كل مانكعد على السفرة نلتفت ونكول انطيني مي حي..

نكطع كلامنا ونتذكر راح اخونا ماموجود على السفرة نكمل الاكل بغصة بدون طعم ..

كلشي بهلبيت اختلف لا كعداتنا ولا ضحكنا اذا اجتمعنا سوة نبقة نباوع لمكانة الفارغ نتخيلة مخلي رجل على رجل ويضحك علينة..

راحت الضحكة وياة صرنة حديين ناكل بسرعة بسرعة حتى لايصير شي ونتذكرة...

ماكو شي اسمة طلعة طلعتنا المفضلة للنجف امي اووف يا امي كل اسبوع رايحة للنجف وصحتها من سيء الى اسوء كل هالفترة وماكدرنة نتعود على غيابة...

غرفتة مقفولة محد يدخلها ولا نعرف وين المفتاح
خسارتنة جبيرة وكلشي بينة ناقص..

منين نجيب مثلك حتى ننساك؟
ومنو المثلك يوضعك لو خسرنا
الشبة كل اربعين حجاية تنگال
واذا واحد يصح جان انتظرنة

طلع يعدل بشعرة نسخة حياوي يا الله شلون ننساة وكلشي يذكرنا بية، گمت من مكاني وابتسمت بادلني الابتسامة گرص خدي وگال بضحكة...

-صايرة تخبلين شتاكلين

-الاخضر واليابس

-هههههه لايگلج السمن

-بالعطلة اسوي دايت هسة ماگدر لان عندي قراية

-ابقي هيج احلالج شتسوين بالضعف تصيرين چنج مومياء

-عود افكر

-عندج مصرف

-اي عندي

طلع فلوس من جيبة وخلاهن بيدي:-يابة عندي ادري وين رايحة للجزيرة ماخذة كل هالفلوس

-ميخالف احتياط خاف تحتاجين شي ماتطلبين احد

-سجاد بدل اسلوبك هذا ترة ماكدر اتحمل

باوعلي بصدمة وگال متفاجأ:-اسف شسويت والله مابالي اضوجج بشي وغلاتة عندي ماحاس على نفسي لو زعلتج بشي

ضميت الفلوس ومشيت كدامة عيوني مدمعة جرني من ايدي دارني علية:-گولي شسويت

-لاتصير الاخ الحنون مارررريد حنيتتتتك ماناااقصني وجع گلبببب مو كاااافي الاحنة بييية اهملنيي احتقررني اقسييي علية خليك شخص عادي ان غبت لاتفقتد وان حضرت لاتعد

دفعتة من صدرة بحرگة ودموعي تنزل.:-الحنين يروح بسررعة لاتصييررر حنين وبعد لاتوصلني اني ارروح وحدي مو ناقصني كبرررر

عفتة واگف ومشيت دموعي تنزل گلبي يوجعني من اشوف تعاملة وياي اخاف اخسرة وهلمرة اموت من القهر الحنين مايبقة لانة حالة نادرة...

رحت اركض وكفتلي سيارة صعدت وتحركت بسرعة خليت هتفوني باذني وعيني على الجامة منا لمن وصلت....

امشي واعدل بسترتي وايدي الثانية بيها ملازم والجنطة سوة..

ذبيت نفس ووكفت اباوع على قسمنا " كلية الصيدلة" غمضت عيوني بتعب ورحت كعدت على صفحة خليت الملازم والجنطة كدامي وبقيت عيوني تتجول بالمكان شوية واجن زميلاتي سلمن وكعدن يتناقشن بالمواد....

الشي العاجبني بقسمنا طلابة كلش محترمين بنات وشباب وبيناتهن مساعدة واحد يشرح للثاني والاحترام سيد العلاقة يستحقون كلمة صيادلة على اخلاقهم واسلوبهم المحترم ..

كملت محاضرتين وطلعت للمكتبة استنسخ ملازم
وي حضي المكاتب ازدحام والمحاضرة تبدي بعد ربع ساعة اكو مكتبة صايرة بفرع قليل يرحولها تمشيت الها ولاكاني طفل متسول وي الجامعه ياما اكثرهم المتسولين اجة يمي فاتح ايدة...

-يبنية فدوة محتاج فلوس امي مريضة

دمعت عيوني شوية وابجي كسر خاطري فتحت جنطتي ردت اطلع الجيزدان صارت هوسة منا ملازمي انطيتة الجنطة وطلعت الجيزدان بيدي اطلع فلوس واكفة ادور على خردة وماحسة الا ركض فتحت عيوني بصدمة اخذ جنطتي وركض بيها والمصيبة بيها غراضي وفوني رحت وراة وين الحگ بية شيركضني اباوعلة وصل لنهاية الفرع نزلن دموعي بحرگة كعدت على صفحة مخلية ايدي على عيوني ابجي بحركة هو هذا اليسوي خير شكل لامي طفل ضحك علية هسة اكيد عبدالله يسويني محتوى ...

دقايق مرن عصرن گلبي عصر حسيت شخص كدامي رفعت راسي مسحت عيوني شنو هذا جاي من البرلمان لو اني اتخيل لابس قاط اسود ورباط ونضارة كمت وكفت على طولي وعلامات الاستفهام براسي نزل نضارتة وابتسم نص ابتسامة مد ايدة قدم جنطتي اخذتها فاتحة حلگي...

كال بحس جوهري مميز:-مايستاهل هلعيون الحلوة تتأذة علمود جنطة بيها كم غرض

همست بفهاوة:-بس بيها غراضي وتليفوني هم

-اعرف ثاني مرة صيري حذرة ولا تثقين باحد

لبست الجنطة ومسحت وجهي شلت الملازم ورجعت التفتتلة على وكفتة يكص بية شتت نظراتة وصار يمسح بالنضارة:-ماتريدين منين حصلت على غراضج

-تصدك من الفرحة نسيت

-ميخالف اني اذكرج... هالطفل شافني اشتري وكال هذا زنگيل عرض علية موبايل للبيع عرفتة سارقة او لاگية من صورة الخلفية البية عاد

-وبعدين شلون عرفت مكاني

-منة اكيد خوفتة اسلمة للشرطة دلني على المكان وانطيتة كم فلس

-بس اني جنت رايدة انطية

-وفري فلوسج اني انطيتة

تشكرت منة ورجعت للكلية حتى بعد ما استنسخت توالت الايام وصرت اشوفة وعينة علية جذبني بية اناقتة ولبسة الرسمي حسيتة مو طالب لان يبين عمرة نهاية العشرينات...

مرة التقينة صدفة بالكافتريا وسلم علية وفتح حديث واني الغبية شنو يسال اجاوب وين يلة احس على نفسي وصرت اتجنبة بس احس بنضراتة ووجودة الغريب من قسمي مافكرت بشي ثاني....

طلعت من الحمام لافة شعري بالمنشفة ضحكت وفتحت الخط...

-هلا بشروقة شلونج عيني

-هلا بنوف شدعواج نسيتيتة من رجعتي لبغداد صدك لو كالو من لكة احبابة نسة اصحابة

-شلون انساكم صدك تحجين بس والله الدراسة صعبة وملتهية كلش ما الحگ

-عازمتج تجين بعرسي

-ما الحگ اعذريني حبابة

-هي مرة وحدة بالعمر اتزوج تعاي حبابة بس انتي عدي

-مادري اشوف امي وامتحاناتي عود اقرر

-اروحلج فدوة اختي الغالية

-اي شكو ماكو البنات شلونهن

سولفتلي كل الاحداث الصايرة ونزلت تصور بالاجواء صايرة هوسة جهال ونسوان ضحكت واخذت المشط امشط واباوع على هوسة نسوان عمي دخلت للمطبخ كلهم متجمعين اتذكرت ايام زمان نزار موجود وفارس وسفانة وابنهم يكمز وسجيوة وبيبياتي هم....

امشط بشعري وغصيت على سوالف نزار ثبتت الفون طالعين كلهم بالكام وراحت تشتغل....

لحضة وحدة كلبت كلشي ماجنت متوقعة راح اشوفة ابد...

وكعت المشط من ايدي ورجف جسمي لابس لبس رسمي جنة رجل اعمال هيبتة تسطر سطر اخذت الفون قربتة اشوفة واركز بملامحة كبران وحليان

يتبع............

_______________________________

توقعاتكم+رايكم بالبارت..
راووني حبكم وحماسكم 🌚
خاب شني ما اشتاقيتولي صكد جذب ترة ازعل 🙂
العندة سؤال يجي انستا احمم تابعوني انستا انشر موعد النشر عود صدك ليش ماتابعوني 🔪...
اني اروح لا اتحول 🤣

دمتم بحفظ الله ♥