روايه أثارة العـيون
بقلمي : ليال الجاسم
الحلقه _25_
بلأول تصويت + تفاعلو اكون ممنونتكم
وَلِعِيناهَا،
يَقْفُ الجَمالُ خَجَلاً مِنْ جِمالْهِن..
تّعْجَزُ حُروفُ اللُغةِ الثَمِانِيّةِ وَ العِشرونَ ،
عَنْ وَصفِ جَمالهِنَن..
يَسكُنَّ قَلبِيّ و فِكرِيّ،
وَ أحسِدُ كُل مَن يَحِقُ النَظّرُ لَهُنَ كُلَّ يَومٍ..
جَعَلتُهُنَ مَنفى وَ وَطناً لَيِ،
لَأنُهُنَّ بإخْتِصَّارٍ،
يَجْمَعُنَ كُلَّ تَفاصيلّ الجِمالِ وَ النَقاءِ..!
………………………………………
ألين :- طا طا طاح البنيه بنين
أول مسمعنه كلحنه التفتنه لبنين بفرح
ألين :- هوب هوب مو هاي بنين شنو ماعدنه غير بنين بلعالم
صحت بعصبيه :- أليييينن
ضحكة وتقدمت حضنت بنين وتبوس براسه
ألين :- فتيت ضلوعج مو ولله انتِ الخطبج شبيجن غبيات متذكرن عمتي من اجتي كالت لبنين تحضري
زادت تبجي بفرح
بنين :- ياربي واخيرا استجابب لدعائي شديت علگ بضريح العباس وربي واخيرا سهر ليلي مراح ؏ الفاضيي
بتعدت مسحت دموعها وحجت بحماس
بنين :- مو تكولن منتظرين موافقتي روحو گلوله موافقه
شويه ودخل باقر ورا أيدن وياسر
باوعولنه بنظره خاطفه ودخلو للغرفه
شويه ونسمع هلاهل شگتنه شگ
ألين :- اسمالله ياهو المات
رقيه :- وللجج شسالفه
بنين :- يمه بس لا فسخو الخطوبه
دلمار :- لا انتن منتهيات ؏ هاي سوالفجن تخبلتن
روز :- شبيجن خلندخل نشوفف
بنين :- دخلي ألين همه كلهم گرايبج
ألين :- لا عيني اخاف ؏ جمالي
روز :- دلمار دلمار صغيره روحيي
دلمار :- ولله بعد شهرين ويصير عمري 18 ولعباس مو صغيره واخو زيننبب أنا معولي اخلص من الين ونهاد تجيني انتِ
طلعت عمتي زهور وماما وخاله هديل فرحانات شو هذولي جيبن جكليت وشمرن علينه
هديل :- يافرحتي وأنا اشوف وليدي متزوج لبنيه لرايده
زهور :- بنين ورقيه يردون موافقتجن اجوجن عرسان
رقيه :- اناا شعليه
ألين :- وجع هاذه لولد لهسا دخل هوا الرايدج
منار :- ونوران هم طالبين منج الموافقه
ألين :يمه موافقه شنو
هديل :- ياسر خطبها من ابوج
لطمت ؏ خدي بصدمه
نوران :- تحجن صدگ ولله
دلمار :- هاي من يمته ؟
نهاد :- ولا ؏ لبال وربي
ألين :- صدددماااا كبيييرااا
زهور :- هساا تمشن لو لا
رقيه :- شنمشيي هييه قرعه اريد
روز :- دروحن شبيجنن تصنمتن
لزمت ايدي الين ولزمة ايد رقيه
ألين :- امشي بنين
وجرتنه للغرفه
نوران :- وللج الييينن ماريد ازوج شبيها هايي
ألين :- اكلي تبن وين لاكيتها هايي ثنينجن يميي
نوران :- بنين ما اجتي بنين ما اجتي
ألين :- دنجبي معليج ببنين سوت روحها تستحي ام الگلگ ؏ گولت مليكه
دخلتنه وبقينه واكفين بلنص بصدمه كل الانظار متوجها علينه
حجت بهمس :- گععدن
من الفشله كعدت بمكاني يم لباب ضحك ابوي وكال
رحيم :- هنا هنا تعالي يمي
وحجه ابو رقيه
:- تعاي بويه كعدي
تقدمنه ثنينه كعدنه يم ابهاتنه وألين بقت واكفه
رحيم :- تعالي يمي انتِ الثانيه
تقربت وكعدت بنصنه انا ورقيه لزمت ايدي وايد رقيه وتعصر بيهن بأطمأنان
حجه ابو رقيه بصوت عالي
:- كدام الحاضرين نكولها ناس محترمه والها اسمها من بين الكل تقدمولج وطلبوج مني والقرار ألج ومحد يعترض ؏ قرارج مهما كان وهاذه كدامج هوا واهله ونعم بالله من سمعتهم
واشر ؏ باقر
انا من وحدي صرت ارجف بدون سبب
رفعة راسها رقيه باوعت للولد وحجت
رقيه :- بس انا ماعرفه وماكدر اقرر هسا
:- بويه وافقي حتئ يصير كلشي بينكم شرعي وبعدها تكدرين تتعرفين علي وتاخذين قرارج النهائي ومثل ماكتلج محد يعترض ؏ كلشي تكولي
هزت راسه وحجت :- هاي ههي موافقه مدام انتُ راضين انا راضيه
باوعت لياسر يباوعلي ومقلص عيونه همست باذن ألين
نوران :- ألين طلعيني مناا ماريددد
ألين :- ولج شبيج ولله متلگين احسن من ياسر الج
نوران :- ولج شعرف عنه اناا شعرف
ألين :- سوي مثل مكال أبو رقيه وتعرفي علي واذا معجبج وشفتي ميناسبج بوقته عنديي قضيتكم
نوران :- ولله اموتجج
ألين :- خاب دروحي شتموتيني اخذي القرار التشوفينه صح قابل اجبرج اذا تردين من هسا رفضي
مقصتني بطني وجسمي كله صار يرجف حجيت برجيف
نوران :- بابا عوف ايدي هسا ارجع
ابتسم وهزلي راسه كمت بسرعه وطلعت من بين أنظارهم المتوجهه عليه
شويه وطلعت ألين وراي دخلت لغرفه امي مخليه اديه ؏ وجههي واكمز بحيره
والين تفتر وراي ودخلن لبنات وراها
ألين :- ولكم شبيهاا هاييي
نوران :- ولج ولله اخاف
روز :- مو مودينج للعدام تخاف
نوران :- ححققجن ماعدجن گلوببب وين تحسن بيههه
لزمتني من اديه وكعدتني ؏ الجربايه تحجي ويايي بهدوء
ألين :- عمري حبيبتي أنتِ أنا لو ما اعرفه ياسر مالحيت عليج تقبلين بس ولله وسأليي لبنات علي هوا احسن واحد بلبيت كله حنين وهادئ ومرح ويلوكلج ومستحيل يزعلج بيوم
نوران :- عادي انا ماعندي شي ويا بس اخاف والله
دلمار :- هسا ادفرها اوصلها بحضنه شبيج مو دانكولجج الولد يناسبج ويناسب لخلفوجج
نهاد :- فرد نوب اخذيلج راشدي بدربج
دلمار :- اويي انتِ غثثهه
بنين :- نوب بدن يتعاركن هذولي
طفرت الين لزمتها من فكهه
ألين :- انتِ مووكتلج تعالي ورااي
بنين :- يمه ولله ولا اكددرر تشوفني خفيفه بس مو لهدرجهه بس يمجنن ترا
لزمت ايدها ومدتلي ايدها الثانيه
ألـين :- مستعده تبدين حياة جديده وتعيشين كل لحضه بوقتها ؟
اخذت نفس وكمت خليت ايدي بأيدها وطلعنه من الغرفه دخلنه يمهم رجعت كعدت يم ابوي وبنين بمكان الين
وهيه راحت كعدت ؏ صفحه بوحدها اباوع لايـدن يباوعلها اول مدخلت وكان يحفظ بكل تفاصليها ينضرلها بتركيز
حجه ياسر موجه نضره لأيدن
ياسر :- يلا ابونه انت أخطبلنه
عدل روحه ايدن تحمحم وحجه
:- طبعا طلبناهن ووافقتو الحمدالله وبما أن جبير البيت مسافر لكن نعيد لاجل ما هنه موجودات ويسمعن نوران رحيم نطلب ايدج لأخوي وابني ياسر موافقه علي لو لا ؟
رادت تحجي وسبقها من كال
:- قبل لتحجين احب اكلج أنتِ مثل اختي وبنيتي أذيتج من اذيتي ولو سمعت او شفت فد يوم ياسر مأذيج ولو بكلمه بيديي انا اخذلج حگج ومو بس من عين اخوي لا ومن حلگ السبع بعد ومدام نعرفكم وتعرفونه تعرفون اخوي من يا عشيره وشنو شغله ديانته عيشته نسله وهسا نسمع ردج
دنكت وردت احجي كال بثقه
:- رفعي راسج وجاوبي
بلعت ريگ ورفعت راسي
نوران :- موافقه اذا اهلي موافقين طبعا انا ماعرف مصلحتي اكثر من ما همه يعرفوها وانشاالله منشوف ال الخير من هلنصيب
ياسر :- أمين
رحيم :- رحمتك يارب ترا ماباقيليي انا غير هلثنين بحياتي دييرو بالكم حيل عليهن مودعهن عد الله وعدكم وادري بيكم كفو ماتقصرون وزعلي من زعلهن ورضاي من رضاهن
ضحك ايدن وهز راسه
:- ابشر يعمي بعيوني أخليهن لبنات الغاليات وين اكو اعز من البنات ورقيه سمعنه منها الموافقه وهسا صار دوركم يبيت رحيم
ضحك ابوي ودار وجهه ؏ بنين
رحيم :- هاي حسبة بنتي تسمعيني يبنية الغاليه ؏ گلبي طالبين أيدج حگ أبنه امجد وبعد تعرفينه والقرار بيدج موافقه تكونين شريكه حياته دائما وابدا
بنين :- نعم خالو موافقه بعد موافقه اهلي
كالت هيج وصار الجكليت مطر علينه ولهلاهل تصگع نوب حتئ ولدنه يهلهلون احسن من النسوان
سكتو وحجت ألين :- يگلك الناس اليمنه كلها زعلانه شلون بيت رحيم يعرسون وما يعزمونه
سمعناها كالت هيج نوب حتئ ماضحكت تحجي بجديه خو بنين نست روحها وين بقت ترفس من الضحك وأمجد منتكي ؏ الحايط ويضحك بخفه
باوع امجد لألين وكال
أمجد :- أنطيني مخده وياج لوني
دگ ايدن فخذه وكال
:- خلي راسك هنا
أمجد :- يلا ومرغلي راسي
أيدن :- يلا علمود اروح لبيتنه
تمدد أمجد وايدن مخلي وجه قريب ؏ وجه امجد ويتهامسون بسكوت شفت ألين طلعت وطلعنه وراها كلحنه طلعو ورانه ياسر وباقر دخلنه يم جهال ألين هيه تربعت بنصهم وتلعب وياهم
دلمار :- جبناها وجت ويانه ولله تفاجاة شلون ميانه اول مشافوجن خطبوجن
نوران :- انا خرطت العافيه ولا جني هذيج ام لسان
بنين :- اصلا انا لو ما عندي مستحه شويه جان هلهلت وياهم
رقيه :- دنجبي انا اخذتني الرجفه وعوزي شويه وينغمي عليه
نوران :- نوب امهاتنه الخفه خذتهن يشمرن علينه جكليت بس كون يخلصن منه
ألين :- خو خاله هديل يگلك ايدن العريس رگعته ترگع بلجكليت
جوري :- مامي ششبيل ماكو
ألين :- دلمار اخذيهم لابوهم حبابه
دلمار :- كومو كومو يلا شعندي غيركم
اخذتهم وطلعت وألين شمرت روحها ؏ الجربايه
روز :- ألين أريد أروح لبيت عمامي
حجت برود وتباوع لسقف
ألـين :- ليش ؟
روز :- يعني عيب عندي اهل وأنا كاعده هنا
ألـين :- لتردينه يجرالج وين ميعجبج تعيشين عيشي
هزت راسه روز عرفت روز بسبب حجيهن حزت بخاطرها رحت يم ألين وحجيت
نوران :- ألين
روز :- ولله مو بسببهن انا فكرت بيها قبل ليحجن
كعدت الين وعكدت حواجبها
ألين :- منو الحجت ؟
نوران :- مريم ومرام غثنها
ألين :- وأنتِ هيج ياثر بيج كلام فارغ وناس فارغه
روز :- لا ولله قبل فترا هم عمي حجه ويايي وانا هم رايده اروح
ألين :- خوش من تريد تروحين انطيني خبر
روز :- ماشي
دخلت دلمار :- يلا بنات نروح لبيتنه
ألين :- اخخ مبيه حيل وربي طافيه
دلمار :- اصيح لأيدن يشيلج
ألين :- هيهيهي تحششين صايره
دلمـار :- ديلا گومي لعد
ألين :- بنات النعاس كاتلني يمكن اريد اموت
نوران :- نججبي
روز :- فال الله ولا فالج لسان زفر
ألـين :- هسا واذا متت قابل ينقص الكون قابل عايزين بنات
نهاد :- هسا غير تسد بوزها
دلمار :- تخرط بكيفها ديلا يلا منتظرينه واكفين برا
كامت وطلعنه كلحنه من الغرفه لكينه كلها تريد
تروح طلعن لبرا وأنا رجعت منتظرتهم كلهم
يروحون حتئ انام متت تعبب كافي بس
لفرا لحد ما نسحبو كلهم واحد واحد
وصعدت فوگ لغرفتي اول مخليت
راسي ؏ المخده نمت ..
،،،،،،،،،،،،،،،،،،،
ألـين
طلعنه لكينه بس أيدن شايل جوري وكرم واكف منتظرنه
دلمار :- يا ولله صارلي ساعه أصيح عليهن مايطلعن هاي مرتك بس تصيح منعسسهه
أيدن :- عادي يلا اتحركن
مشينه ويا ودخلنه للبيت صعدنه كلحنه لغرفنه والجهال نومهم بغرفتهم يلا اجه عنهم
دخل يدندن بصوت ناصي
:- اخخخ باع لغرفه صايره مجزرة زجاج
باوعت للعطر الكسرته وكلت
ألـين :- الله ياخذني الله ياخذني شسويت
:- ترا ولله فقط شلته وانا دا احجي وياها خليته بلغلط ؏ الميز
ألين :- ابوي مودي عليك تشيلهه بس گُلي
:- ديلا سويتي زين من كسرتي مجان عاجبني
جنت متربعه بلكاع كمت ومديت ايدي بعصبيه
ألين :- بس كُليي شعلييكك منو انت وماعاجببكك لك عططررييي هاذه اممي انطتنيا اوول مراا بحياتهه مرا وحدهه فكرت تهدينيي شييي وصارلي سنين مخليته عندييي تجي انت تمد ايدك علي وبكل برود تكول همزين كسرتييي ولله مجاننن عاجبننييي
لزم اديه ثنينهن وباسهن
:- هدي هدي ياذات الأنياب هدي
كلت بتعب :- أخخخخخخخخ أخخخ
شالنـي ومشه بيه للجربايه نزلني ونزع شالي ويمسح ؏ شعري نترت ايده ودرت وجههي
سمعته دخل للحمام شويه وطلع سابح لابس
بس بجامه سوده واكف ؏ المرايه صدمني
منظر ضهره شلون مشبط تشبط بلأثار
ولمحت رقم مكتوب بضلعه شافني
اباوعله بلمرايه ودار وجهه عليه
وبتعد عن المرايه حتئ مشفت
الرقم فقط لمحته
خله المنشفه ؏ ضهره وفتح الكنتور ولبس تيشيرت
اسود وطلع بقيت افكر بمظهر ضهره شبي وشنو
هاذه بعدين فكرت ان هوا عسكري ف
يمكن من التدريب وما شابه
رجع بيده مكنسه وكنس الكزاز المكسر وطلع شويه ورجع
:- تنوميني بحضنج لو لا
ألين :- هوا انا منتظرتك تنام علمود ادججك ولا يهمك تعال نام
شمر روحه واخذني لحضنه جعصني جعص
:- اموت بحضنج وين لاگيها هم راضي
خنگ وجهي بصدره اضرب بي ليوخر ماكو صرخت
ألين :- خنگتتننيي
بتعد عني وبقه لازم معصم ايدي كرفصت روحي وغمضت عيـوني همس
:- اخ ياذات لأنياب اخ الصفره العقروبه
غلست عنه ادري بي يريد يستفزني حتئ اعارك
سكت شويه ورجع حجه
:- الصفره ، عقروبه ذات الأنياب
هم بقيت ساكته حجه
:- يرادلنه عرس يعني صدگ نمتي ، لا ولله جذابه منايمه ادري بيج لو نمتي كفشتج تصير ؏ وجهج وملابسج توصل لبلعومج
ضربته ؏ كتفه بقبضه ايدي
ألين :- هوا انت يمته شايفني نايمهه
ضحك كرصني بخدي
:- شايفج شايفج ، صدگ يلا نامي أذا تنعسين
غمضت عيوني وهوا باقي لازم ايدي من المعصم لفترا طويله وحجه
:- عيونها وأنيابهه وشراستها تأسرُني يا الله
وتنهد بتعب رجع حجه
:- عجيبه هاي النمره يارب تضحك بوجه اليعجبه والمايعجبه رغم روحها تعبانه تبقه مبتسمه تساعد تفزع وتحمي كلمن ناده بأسمها وهي روحها محتاجه شخص مثلها صايره لغيرها لشخص التحتاجه
عرفته يحجي لان عباله نايمه مادري عجبه يحجي حركت نفسي علمود انبهه انِ كاعده
مر يومين وبهليومين كالو يسوون خطبة
رقيه ونوران بيتنه وامجد كال من
أطيب نسوي عرسنه لكن باقر
وياسر كالو سبوع ورا الخطوبه
ويسون العرس خو نوران عوزها
بس ما تبجي من سمعت بقت تعيط
وين الحك وشورانه واموتكم وكلبت لبيت علينه هلاهل بألف يا علي قنعتها بس رقيه قبلت ومحجت شي
واكفه ؏ المرايه واعدل بشالي جنت لابسه فستان طويل لونه زيتوني وضعيف جوري وكرم اخذهم ياسر ويا دخل ايدن لابس قميص اسود وبنطلون اسود وحذاء تلمع وشعره طولان وصايرتله لحيه صفنت بي
ألين :- اكلك مو صايرلك سبوع مدري شكد مرايح للمركز مقدم است..
بعدني مكملت وحجه
:- شعليج
ألين :- جبحح لهلخلقه
:-هاه ؟
درت وجهي عنه خليت حمره مخمليه وجريت عيني ؏ الخفيف وخليت مسكره عاد من يمي نبهرت بشكلي درت وجهي علي مقلص عيونه
:- هاي اول مرا تخلين مكياج ؟
ألين :- لا ثاني مرا مرا بعرسك ومرا هسا
فرك عيونه ودار وجهه عني لبست كعب زيتوني وكفت
ألين :- يلا
تقدم عليه وصار قريب مني حيل بحيث أنفاسنه اختلطت حجه بثگل
:- هوا العطور التختارينه فريده من نوعه لو أي عطر تخلين منه يطلع حلو
دفعته بخفه وكلت
ألين :- خلي نروح لبنات كلشوي اتصلن عليه
باوع لعيوني وكال بهدوء
:- ألينارتي
ألين :- همم
خله جبينه ؏ جبيني وكال
:- من وعيت وأنا ضايع ماكو عنوان أعتنيله ،ولا اكو واحد دگلي صدره وگلي ذب حملك واشيله بيه حزن الناس كُلها وعيني بلدمعه بخيله ف حاب أكلج كلمه ولا تضيعيني
لزمته من اذانه وحجيت
ألين :- شايف اذا غير الكلمه لبالي اموتك
ضحك وحضني همس بأذني وحسيت جسمي كله رجف أول مرا احس بهيج احساس مع انّ انا بعيده جدا عن هاي الأمور
:- وصلتي غمچ روحي ما أحبج شلون ؟
ابتعد عني ويباوع بعيوني
:- شايفه انتِ منضمن الچويات البروحي وانا كلش مستعز بيهن وحده وحده ألهن مكانه بشراييني
حاوطت وجهه بأديه
ألين :- بس أنا ما أحبك ولا كادره احبك
:- ليش ردتي تسمعين مني كلمه احبك
ألين :- لأن ادري بيك تحبني
:- أيي انا أحبج ومو من هسا وسألي الخلگ كلهم شافوج بعيوني
ابتسمت وأنا اباوع بعيونه بثقه
ألين :- مادري منو الكاتبه بس مرا صادفتني كلمات وصفتك بأدق تفاصيلك
:- أيي ؟
ألين :- قَمَرٌ تَفَردَ بِالمَحاسِنِ كلها
فإلية تُنسَبُ كُل حُسْنٍ يُوصَفُ
فَجَبينُهُ صُبحٌ وَطَرّته دُجىً
وقوامُه غُصنٌ رطيبٌ أهيَفُ
ميل رگبته وطگگ رگبته بطريقه غريبه
:- هاي همه كاتبينه مو أنتِ انتِ بس حبيتي تسمعي الي
حاوطت أيديه ؏ عنقه ورفعت حواجبي بمكر وحجيت
ألين :- أييوا
:- تدرين كُلشي ممكن الأ أنتِ أنتِ أمرأة المستحيل وچويـات روحـي،
وطبع بوسه سريعه ؏ شفايفي
ضربته بكف أيدي قبگ ؏ وجهه ارتد لورا وحجه
:- يمته تبطلين هاي الحركه حتئ ضربتها ضربه مخلاب لبوه
ألين :- وانت يمته تبطل تحلل بشخصيتي ماعندك شغل غيري
دار وجهه وكال :- طالع من تخلصين تعالي وراي
ركضت وصرت كدامه
ألين :- كدامك مو وراك
:- بعد احسن
نزلنه وجان محد بلبيت جانت الساعه بلتسعه م . صعدنه بلسياره متوجهين لصالون لبنات نزلني وراح دخلت لكيتهن مخلصات وياخذن صور
نوران :- لوو باقيه بعد وكتت
رقيه :- خاف عطلناج
ألين :- هسا شنو قابل واكفات عليه
روز :- خو جايه ومخليه مكياج هنا
ألين :- مبيه حيل المهم يمته تخلصن
بنين :- هسا بس اخلص انا ونطلع
زهور :- كتلهن سون مكياج بلبيت كلش ولا كدرتهن
روز :- هيه خطوبه قابل عرس
رقيه :- ولا مخلين مكياج عرس اصلا خفيف جدا
نوران :- يولله انتُ مفلفلين علينه
زهور :- يلا بساعجن ترا راح الوقت
بنين :- يجي وقت ثاني عادي الحياة ماشيه
زهور :- انتِ نجبي بس لسان
بنين :- يلا خلصت منو ياخذنه
ألين :- چا لو كايله لايدن ينتظرنه امداجن
رقيه :- لا رضا كال انا اجيجن بس خابرني
زهور :- يلا لعد خابري
اتصلت علي بنين شويه ووصل طلعنه لكيناهم
سيارتين احمد ورضا صعدت رقيه ويا رضا
ونوران ويا أحمد جانت فساتينهن نفس الشئ
ومستورات ولابسات حجاب وكلش طلعن يخبلن
وصلنه للبيت دخلنه لكينه الكوشه بنص الصاله وتجنن ومزينين البيت بطريقه تخبل ألوان ذهبي وأبيض صعدن ثنينهن
والولد بعدهم ولا واحد والصاله متروسه بس نسوان وبنات جانُ بس بيت اهل العروسات واهل الولد يعني بس احنه
ومشغلات أغاني ويركصن أنا مبيه حيل اركص أصلا بس منتظره جوري وكرم يجون صارت الساعه ب11 يلا اجو اخذو الصاله بس الهم ويركصون ويهلهلون گلت هاي خطوبه لو عرس شلون..
،،،،،،،،،،،،،،،،،،
نوران
اجتي امي وحجت وياي
منار :- يلا تعالي صار وقت العقد
كالت هيج لو ختنگت نمقصت بطني حجيت بخوف
نوران :- ييمه كليلهم بطلتت ماريد اتزوج
لزمتني من ايدي تمنعني انزل
منار :- يا يا تعالوليي تخبلتي شنو مو وافقتي وكلنه أيي تلعبين علينه شنو
تقدمت ألين كرصتني بايدي
ألين :- ولله اشمرج باقرب حاويه مو كتلج فكريي وفكرتي وقبلتيي
نوران :- ولج هوا زواج زواجج مو لعبه
منار :- ماندريي بي شنو ولج ولله ماكو شي هيه بس خطوبه
نوران :- ولله تجذبون علييه
ضحكة ألين بعلو صوته وحجت بغصه
ألين :- ولج شنو نجذب عليج مخبله انتِ
نترت ايدي وحجيت :- ولله ال أكلهم جبروني
كلت هيج وماشوفلك الا ألين واكعه بلگاع وتضحك بصوت ضربته برجلي بكل قوتي اريدها تسكت ماكو فضحتني التمن البنات علينه وهيه تضحك تخبلت
كامت وتحجي بضحك
ألين :- ييلا روحي منتظرين ولله
نسيت خوفي من شفته هيج اصلا رايحه بس مادري وين مو ؏ بالي مشيت ودخلوني لغرفه خلت تحت لساني سكر ألين وبين اصابيعي هيل ورجليه بطشت ماي وبيدي القرآن وانا سن يطگ بسن يگلك ماخذيني للعدام ولباب بي فتحه قليله علمود الصوت
حجت ألين :- گولي نعم مو تنثولين
حجه الشيخ :- هل احد جابرج ؏ الزواج ؟
نوب انا بالي مو يم الشيخ بقت بس كلمه الين براسي اخذت نفس ورديت بكل ثقه
نوران :- نعم
لطمت امي ؏ خدها وألين نشغت بعد ما أجه صوتهم لبرا ستوعبت غلطتي ولطمت ؏ خدي
نوران :- لا شيخنه ولله لا عبالي تكول تقبلين الزواج
ألين مخليه ايدها ؏ حلگه وتفتر بلغرفه تمنع نفسها من الضحك وتضرب رجله بلگاع
همست بخنگه وتنكث بايدها
ألين :- يمه يمه راح اموت يمه
وطبب نفجرت بلضحك نوب لو ضحكة ضحكتها شهيره بعلو صوتها
اجاني صوته يحجي بهدوء
ياسر :- ركزي بكلام الشيخ راح يعيدلج
الشيخ :- مستعده بنيتي
نوران :- نعم
الشيخ :- للمرا الثانيه اذا كنتي مجبوره كولي ولا تترددين
نوران :- لا شيخ
الشيخ :- تمام راح أسألج وكولي نعم وانت وكيلي
بقيت ساكته حجه :- نوران رحيم جاسم تقبلين بياسر وسام حميد زوج لكِ في السراء والضراء…. عاده مرتين وبلثالثه رديت
نوران :- نعم اوافق وانت ووكيلي
وعاد السؤال لياسر وهم وافق وبصوته رجفه اكثر مني
كال هيج ونسمع لهلاهل ترن كمت ونفتح لباب طلعن امي وألين ودخل ياسر سد لباب وانا بحلقت عيوني بصدمه
نوران :- هييو شعندك جااي
ياسر :- أنتِ اليوم ناويه تجيبين العيد علينه غير اشوف مرتي
نوران :- مرتك ؟
ضحك بخفه :- اثر الصدمه براسج
راح كعد ؏ القنفه وطبطب ؏ المكان اليمه وحجه
ياسر :- ماعندج كلام شروط تكولينها
نوران :- ماعندي شي بس وضيفتي ماتمنعني منها ولاتقيدني بحجه انك زوجي وتكون زوج صالح ومن اغلط تعلمني الصح قبل متاخذ موقف مني وتكون الي سند ومصدر قوه والشخص اليستاهل اكمل حياة كامله ويا
ياسر :- بعيوني سواليفج وحده وحده أضمهن
نوران :- وبعدين انا مالحكت احجي وياك ليش من بين بنات عمك وعماتك وخوالك ولبشغلك وصديقاتك اجيت انا تريدني ؟
ياسر :- شفت بيج امي وأمي وصتني عليج
كام تقدم عليه وطبع قبله براسي طويله ابتعد واخذ نفس طويل
ياسر :- راح تكونين زوجتي مو فقط بلأسم لا راح تكونين غاليه وفوگ راسي احطج وما اسمح دمعه تنزل من عيونج لا انا ولا غيري ينزلها ولا ازعلج بكلمه لو بفعل راح اكون ونعم الزوج الج انا أختاريتج من بين الكل لان ادري بيج كفو وبنت اصول وشنو تردينه يجرالج
ابتسم وحجه :- اوكفلج بوجه الشمس لو سومرتج
بكلامه نساني الرهبه لبداخلي والخوف وكلشي سلبي جنت افكر بي اخذت نفس براحه وبقيت ساكته
ياسر :- يلا بعد شويه يصير وقت تلبيس الحلقات
هزيت راسي وهوا طلع طلعت ورا ولكيت رقيه بمكانهه رحت يمها سألتها
نوران :- يمته تعقدون
رقيه :- عقدنه
نوران :- هاي شبسرعه
رقيه :- لاخيه مو بسرعه صارلنه هواي بس انتِ بوجود الحبيب الوقت قصير يمج
نوران :- طير يا طير يازع يمته صار الحبيب
شويه وكالو راح يدخلون يلبسون الحلقات وبعد
كلامه انا نفتح وجهي وصرت مبتسمه شفتهم
دخلو من لباب هسا يلا انتبهت لبسهم لابسين
لبس رسمي اسود وهمه ثنينهم شخصياتهم
حلوه ويمشون بكل ثقه و؏ وجوهم
ابتسامه شاغره ومريحه
صعدو ؏ المنصات وهوا لزم ايدي يطمني عصرها
حيل وعافه من جابو الحلقات بلاول احنه رفعت
ايدي ترجف رجيف مو طبيعي لزمها عدل
ولبسني الحلقه باوعت بعيونه شفته كأن
ضايج مو مثل مساعه عرفته عباله
ماريده ومو فرحانه
نوران :- والله العظيم فرحانه بس ماعرف ليش ترجف
بلل شفته وباسني بايدي انطوني الحلقه ولبسته بلگوا بسبب ايدي الترجف وهوا بعد ايده ترجف بس مو مثلي
شال قلاده ولبسنيياها وسوار ذهب
ياسر :- التراجي ماكدر منا باقر وخاف أذيي اذنج عادي تلبسينها انتِ بعدين؟
هزيت راسي وكمل يلبسني بلذهب خلصنه والهلاهل جرت
جابو الحلقات لرقيه وباقر وهنا رقيه ايدها تهز ضحكت ولزمتها بايدها الثانيه لبسها الحلقه وعصر ايدها يمنعها من الرجيف وههي هم لبسته الحلقه ولبسهه الذهب وحتئ التراجي
والهلاهل صارت تصگع بقو شويه وطلعو تقربت خاله هديل والخاله معصومه لبسنه قطع ذهب ونزلن شويه ودخلو ابوي وامجد وابو رقيه واخوانهه الاربعه
جواد :- هاي بنيتي وهاذه الذهب ياهو الأغله ماكلكم لان تعرفونه
لقا الها بطريقه شاعريه حبيت ودمعت عيوني من الفرح لبسها قلاده جبيره وباسهه براسهه واخوانها كلواحد لبسها قطعه ذهب غير شي وفرحانين بيها وهيه ضحكتها ما فارقت وجها
تقدم ابوي بيده قلاده ؏ شكل طاووس تجنن
رحيم :- كبرت بنتي الصغيره وصارت جبيره الشمعه الضوة بيتيي راح تضوي بيت ثاني وهنيالهم بلورده النادره بعطرها
ام دميعه لازم ابجي وهوا ضحك حضني ومسح دموعي لبسني لقلاده وسووار
ابتعد وتقدم امجد بيده ثلث علب حطهن ؏ الطاوله يفتح بيهن ويحجي
أمجد :- تالي متالي ابو طنگوره يحضئ بي واحد ثاني
طلع كلاده ولبسنياها وباسني براسي
رجع فتح الثانيه وحجه
أمجد :- ماعرف اعبر عن لبداخلي اتجاهج وانا اشوفج تروحين تنورين بيت ناس عدها البخت يسطر وانتِ الدليل
وطلع قطعه جبيره من الغواش لبعيوني حتئ مشفتها شنو
خلاهها بخصري وقفلها ويحجي
امجد :- هوا احنه شچم نور عدنه ونقصر وياها
ضحكت وبجيت لزم ايدي وباسها وخلاها ؏ گلبه
أمجد :- نورج هنا بگلبي يضوي وماوصيج بعد انا اخوج
رجع دنگ فتح لعلبه الصغيره
أمجد :- تاج راسي وراس الخلفني راح تتزوج نشيل أحسن من وحشه لبيت بدونها
حتئ مخلاني اشوفها دنگ ؏ رجليه ولبسنيا حركت رجلي بي صوت كام وباسني براسي رجع لورا وصفگ ايدي
أمجد :- هاي هيه بعد يعني كبرتي صدگ
ضحكت وحضنته قوي أمجد غالي ؏ گلبي مو اخوي لا بمثابه ابو ألي
دار وجهه ؏ الين الصايره ورا طلع علبه من جيبه وراح باتجاها
شال ايدها وحجه
أمجد :- خو ماننسه لقبضاي بهيج يوم
ضحكة ألين ولبسها سوار رفيع وقلاده بعد ارفع كلش حلوات
دار وجهه ؏ ابوي وحجه
أمجد :- يلا شبابات خلو الساحه بس للنسوان
طلعو كلهم ورا وانا فراشات بگلبي من الفرح الف مرا حمدت ربي ؏ هيج اهل…
،،،،،،،،،،،،،،،،،،
ألين
جنت كلش فرحانه خاصه بكلام اهل رقيه ونوران وانا اشوف المعه بعيونهن درت وجهي ؏ صوت جوري وهيه تقدم موبايلي كدامي
جوري :- ماميي بابا
شلته منها طلع رقم المساعده الوياي رديت جان تكول
:- ست ألين محتاجيننج بلموازنه حاليا
ألين :- ماعندي خبر عنها ليش هسا رفعوعها
:- مادري ست فقط يردونج باسرع وقت
ألين :- تمام مسافة الطريق وجايه
سديته منها ودرت وجهي ؏ حور الماله صوت بلحفله كلها
ألين :- حوري ديري بالج عليهم طلعتلي شغله مهمه بلمحكمه ولازم اروح
حور :- روحي الله وياج عوفيهم يمي
دنگت عليهم بوستهم وطلعت بلحديقه اتصلت ع أيدن مرتين يلا رد عليه كُتله رايحه وكال ابقي مكانج جايج
شويه وشفته وصل يمي وحجه
:- شنو موازنه هسا
ألين :- يي ويردوني باسرع وقت ف مستعجله تاخذني لو أشوف غيرك
عكد حواجبه بعصبيه
:- شنو تشوفين غيري ؟
ألين :- ااوو ولله قصديي أبوي لو احمد لو غيره
غمض عيونه وحجه
:- تحركي يلا
مشيت بسرعه كدامه سمعته يستغفر دخلنه للبيت فتحه وصعدت بسرعه غيرت ملابسي ونزلت لكيته يصگع جكاير بلصاله منتظرني
شافني وكام طلع طلعت وهوا قفل الباب ركضت گبله
:- خفهه
وكفت وخليته يوصلني ومشيت ويا وصلنه لسيارته وصعدنه شغلت أغنيه وهوا يطفيها
:- ما احب الأغاني بلسياره
ألين :- دييلا شبيك فجأة صار بروحي حماس للتطفي
:- حماس زفر وماله رداد
ألين :- مال واحد يعيش ويا حيوانات اشرفله
:- مالت واحد هسا يشمرج من الجامه اشرفله
وصلني للمحكمه وكال أنتظرج كتله لا لان ماعرف يمته تخلص
دخلت للقاعه ولكيت طاوله اجتماع وكل المحاميين كاعدين باقي بس انا سلمت وكعدت حجه الواكف يشرح
:- أقراو الملفات وتاكدو منها ووقعوهن
بدت كلها تحلل ونصه تريد تغير الشروط وهاذه الماعجبه بس أنا كلشي مطبوع عجبني سبب رفضهم همه ماكدرو يفهمون المكتوب وقعته وحجيت
ألين :- استاذ أنا موافققه ؏ كلشي ووقعت
كلهم باوعوولي بانبهار حجيت
ألين :- من بعد اذن الأستاذ اذا تحبون أكوم اشرحلكم الموازنه والمطبوع حتئ اذا عدكم مشكله تنحل
حسين :- مامعقوله توافقين ؏ هيج شروط
الاستاذ :- تفضلي ست ألين
كمت وشرحتلهم كلشي مكتوب وبقو يراجعون ليتاكدون من كلامي وصدك كلهم غيرو رأيهم ابتسم الأستاذ وحجه
:- طبعا كلش فخور بيج كدرتي بلحضه ترفعين الموازنه وصححتي اخطاء الممحاميين وبكل ثقه
ابتسمت ورجعت كعدت بقينه نحجي بلقضايه العدنه مرت ثلث ساعات وخلصنه لميت الاوراق لعندي وطلعت شلت موبايلي أتصلت ؏ ايدن يجيني بقيت منتظره
من بعيد شفت رجال يصير بعمر الخمسينات هيج يتقدم عليه ولابس لبس رسمي مد ايده ليسلم خليت ايدي ؏ كلبي وهزيت راسي
نزل ايده واخذ نفس
:- صار 3 أيام سألت عليج بس محد انطاني اي معلومه عندج وكلت انا اتصرف وألكاج
ألين :- خير انشالله
:- عندي قضيه اريدج تستلمينها
اريد ارد واسمع صيحه ايدن وهوا يكول أسمي بصوت وانا ادور وجههي عليّ ندفعت ونسحب موبايلي لزمني ومخلاني اوگع درت وجهي ؏ الرجال صعد بسياره سوده وانطلق البهرني السياره بدون رقم
أيدن :- ولجج بله صارلجج شي
انا مصدومه من الصار شلون نقلبت الموازيين بصيحه من ايدن
ألين :- منو هاذه ليش سوا هيج ؟
:- مو كتلجج قبل فترا جايج تهديدد وهذول همهه شفتي سحب الموبايل منج
ابتسمت بخبث :- يتهنئ بي قابل انا غبيه واخلي هيج ادله بموبايلي الخاص
:- استغفرلله استغفرلله ياربيي
ألين :- شبيك ترا ميخوفون جلبي وانا حاسبه حساب لكلشي أسوي ولأي حركه
لزم وجهه وحجه :- مابيج شي مو ؟
ألين :- لا شبيك شصارلي اصلا
لزم ايدي ومشينه للسياره ؏ طول الطريق هوا يتأفأف ويستغفر وصلنه للبيت نزلنه ودخلنه لاگتنه ميعاد كاشخه توقعت ستوها جايه من الحفله
:- وين رايحه ؟
ضحكت بارتباك :- لا ء مر مرايحه
:- لعد شكو طالعه
ميعاد :- هههه مطالعه رايحه لل للمطبخ اصلا
ألين :- دحجي عدل شبيج مرتبكه
ميعاد :- انتِ بس كون تتبليين علييه تريد تخربيين علاقتنهه
عكدت حواجبي :- هيو شبيج شاخطه منو يمج ؟
ميعاد :- يولله صارلج فترا عينج عليه
ألين :- دمشي لا ا**ل عليج ام الگلگ مخليه عيني عليها
:- هاه ؟؟
عفتهم وصعدت فوگ الي خلگهم انا راسي مصدع دخلت لغرفه حور لكيت الجهال يمها نايمين
حور :- ها ناموو هسا
سديت الباب ورحت كعدت يمها لزمت ايدها وحجيت
ألين :- مكتئبه ومتغيره حيل ولاتختلطين مع أحد حتئ نوران صديقة عمرج مبتعده عنها خلي بالج انا أختج ودائما تلگيني يمج بكل وقت تحتاجين مسانده أنا اسندج احجيلي كلشي مضوجج لا راح اغيضج ولا راح ازعلج بكلمه
قوست حلكهه ونفجرت بلبجي حضنتني وتبجي بكل حيلها وانا اطبطب ؏ راسه لتهدء رفعت راسه وحجة
حور :- مكاعد أعرف روحي شتريد تعبني التفكير الزايد لا اكدر ما احب وسيم ولا أنا لكادره أعترفله بحبي وحتئ لو اعترفت مراح استفاد شي بس انزل من كرامتي لان هوا موفارغلي وحتئ ما أشوفه ولا اعرف عنه شي
حتاريت شنو اكله هلامر معقدد بطريقه صعبه جدا لا انا لأكدر اتجاهل مشاعرهه ولا انا الاكدر أخليها تودي نفسها للتهلكه والخطر نعم وسيم اكبر خطر ؏ حياة الجميع بس محد ديحس ولا احد يفهم
أخذت نفس طويل وزفرته سحبت راسه لصدري وحجيت
ألين :- أنتِ أمرج معقد بطريقه جدا صعبه ، وسيم شخص خطير ومو انسان ذره انسانيه مابداخله ، كلتي ما اعرفه بس احبه لبداخلج مو حب ابدا لازم تتخلصين منه بأي طريقه ممكنه
حور :- ولله أنا فكرت بيها هواي بس مدا استوعب كلامج وبلأخص كلامج دمرني هواي اخذ من حيلي
ألين :- انا الأريده منج تكونين انسانه قويه ، تدرين هوا مجرم ؟ هوا صاحب تجار مخدرات وبيع اعضاء مو سهل تفهميني بس لازم وضروري تتقبلين
رفعة راسه وحجت :- زين انتِ شعرفج بي مجرم
ألين :- عوفينه بشعرفني انتِ تظنين ان انا أجذب ؟
هزت راسه بلا
ألين :- زين انا داكولج هوا مُعتَدي ، شخص قذر تقبلين بهيج شخص ؟؟!
هزت راسه بلا ودموعها تجري بوحدهها
ألين :- حلفتلج متاكده ميه بلميه هوا تذكرين من نخطفت اخر مرا ولله العظيم شفته شفت وجهه هوا نفسه واضحه ترا وهوا ابن عمي يعني شلون ما عرفه هوا نفسه حذرني لو شردت يدفعني الثمن وسواها واخذ ليانتي مني
لزمتني الغصه من جبت اسمها وصار صوتي يرجف
ألين :- انا شلون اخليج تتزوجينه وانا انتقامي منه تدرين حاليا انا شدا اسوي هسا كاعد اسويي أشياء مستحيله كاعد احفر حفر الهم اخطط وأدور عليهم انا مدخله نفسي بأ كبر خطر وسألي ياسر مستعده اضحي بعمري علئ انُ انتقم منهم وانتِ جاي تكوليلي ماكدر بدونه ماكدر افرط بيج ولا باختي لطلع روحها بكل روح بارده
بقت تشهك بقوه حسيت روحها دتطلع بهلبجي
بقيت يمهه وحاضنته لحد منامت ؏ أيدي
نزلتها ومسحت دموعها غطيته وطلعت
لاگاني ايدن لزم ايدي وخله ضهري ؏ صدره
ورجعني لغرفه حور فلتني وراد يدگ لباب
لزمت أيده وحجيت
ألـين :- نايمه هيه والجهال
:- ما عاجبني وضعها اكعدها وما اخليها تنام وهيه زعلانه
فتح لباب وراح كعد يمها كعدها وانا سديت لباب صحصحت وبقت تباوع بستغراب
:- صارلج كم يوم مو ؏ بعضج ردت تجين وتحجيلي شصاير وياج ماكو نفذ صبري
باوعتلي بنظره العبالها انا الكايلتله هزيت راسي بلا
حور :- مابيه شي
:- تغشمين روحج لو قصدج تغشميني ؟
حور :- لاولله مابيه شي بس لان مشغوله مدا ألحگ اكعد وياكم
فرك عيونه وهز راسه بلا
:- شوفيلج واحد غيري ومشيهن عليّ
باوعتله وسكتت
:- ها اها باعي عيونج شابعات بجي وحتئ رموشج بعدهن مبللات
قوست حلكها وبجت :- ولله مادري نفسيتي تعبانه بدون سبب
حضن راسه وحجه :- اخذي ريست ونطلع للبصره اذا تردين
ابتسمت وحجت :- نطلع بس بعد مايزوجون الولد
ضربهه كعكه بايده ؏ كيف :- تمامم شكم حوري عدنه
كام ولزم ايدي وطلعني
ألين :- انت شبيك ويا ايدي
:- أريد اعودها على ايدي
ألين :- أصلا اكدر أخلي أيدي بچف ايدك تعودت
:- شو بله
ومد ايده ابتسمت وخليت ايدي بايده عصرها حيل وطبع بوسه بظهرها
دخلنه للغرفه درت وجهي علي وحجيت
ألين :- ششكد حرام عليك
:- شمسوي
ألـين :- ميعاد ترا حرام عليك عايفها معلگه بيك
:- وانا معلگ بيج
ألين :- ترا احجي بجديه
:- وانا مجذب عليج ؟
ألين :- لاتصير مستفز
كعدني ؏ الجربايه وحجه
:- ميعاد مو سهله جبتها علمود اجيب راس ابوها ذباها عليه وعباله ماعرف شقصده ليش ماخليها تدخل لغرفتي لان كل نيتهم يسربون معلومات ويستفادون ف ؏ گولتج معلگها بيه لأن تستاهل وماريدها تروح لغيري حتئ ما تضيع كل تعبي ؏ الفاضي
مجنت متوقعه كلهاذه منها واصلا كل نيتي هوا يحبها نصدمت
ألين :- معقولهه مالزمته وصارلها مدري شكم سنه يمك
:- المشكله مدا تتواصل ويا ابدا كتلج مو سهله مع أنُ علطول مراقبها
بحلقت عيوني :- ششللون عندكك قلبب تعوف سكرري وسند يمهااا
:- مامخليهم يمها جنت استفزج فقط
ألين :- ومن قبل لتعرفني دائما دكول خلو يم ميعاد وخلو يم ميعاد هيه امه
لزم اديه وطبكهن مع بعض
:- علمود تفكر ان هيه كسبت ثقتي ومحبتي الها
بقيت ساكته ماعرف شحجي كام وحجه
:- كومي تغدي
ألين :- ماشتهي
:- احله شي بيج انتِ شماكان مزاجج تاكلين
ألين :- صحيح أحب اكل وحتلو انا ابجي
رمش بثقل وابتسم :- أحبج بغمج روحي
ألين :- ماعرف شخلاك تحبني
:- ماكو شي معين أحبج وبس
ألين :- أنا شخص لايُملك شيئاً يجعلُلك تود الإستمرار معهُ
:- بس احبج
تمددت بوضعيتي :- مراح احبك
:- مثل معلمتج تخلين ايدج بايدي اعلمج شلون تحبيني
درت وجهي ونمت بوضعيه الجنين
ألين :- أنا امرأة مُتعبه
:- وانا رجلٌ قوي
ألين :- قوة تأتيك من بعد الف انكسار ف اظن انكساراتي بعدهن مخلصن لذالك مدا اشعر بلقوه اتجاه نفسي
:- انا رجل قوي لاجل من احب
ألين :- وانا مُرهقه بسبب من احب
:- مافهمت
ألين :- كنت ڪِٰ مراهقه أحب وسيم ومو حب طبيعي لا مجنت اصلي وعاهدت الله ان اصلي اذا كتب وسيم من نصيبي وهاذه الصار
ماجاوبني وبقه ساكت رجعت حجيت
ألين :- چا هيج اليحب يتجازه بلشوغات ؟؟!
بقه ساكت وانا ؏ وضعيتي وصافنه بلفراغ وبراسي الف فكره كعدت ونزلت يمه لكيته كاعد وصافن كرفصت روحي كدامه وحجيت
ألين :- راح تبقه تحبني ؟؟!
ثبت نضره بعيوني وساكت رتديت لورا ونزعت التيشيرت جبت أيده وخليته ؏ الاثر لبخصري
ألين :- هاذه الاثر النابت بروحي منه هاي قذارته
درت ضهري عليّ
ألين :- باع الاحبه شلون ذَلني
- شايف الاكس لبضلعي عشر جكاير مشاهن ورسم الاكس وجان وججهي مخنوگ بلمخده اصرخ ومحد سمعني
- بنفس الحضه الرحت اشتكي لام أبوي بيها اخذتني للمخزن وضربتني بحزام زنجيل
درت وجههي عليّ وراويته لبزندي قبل لا احجي لزم الاثر وطبع بوسه عليّ
:- وهاذه الأثر نابت بروحي مو بجسدج
رمشت بعدات سريعه وحجيت برهاوه
ألين :- أريد أنام
هز راسه ووكومني ويا تمدد ورفع روحه منتكي ؏ الجربايه سحبني لحضنه وغطاني ويمسح ؏ راسي
حاوطت بطنه باديه وصافنه بلا شيء
ألين :- بعدك تحبني ؟
:- وليش ماحبج ؟
ألين :- تحبون المرأة لترضون غزيرتكم الحيوانيه وانا جسمي مشوه مالعبت نفسك ؟
:- هاه أختلفنه يعني ما تصبرين دقيقه بلا هلسلبيات لبيج
ألين :- يي ولله يعني قابل جذب
:- جسمج مامشوه وجنهن رسمات
ألين :- الغرفه نترست كلاوات
:- جبح لهلخلقه على كولتج ولا مخليتلج صاحب
ألين :- انت اشوفك اكثر من ما اشوف ويهي بلمرايه
:- ويهج
ألين :- انا مو كتلك بعد كلله احجي هيج بس نسيت هسا تذكرت
:- يي مو هنيالج تشوفيني كل يوم غيرج يتمنه نضره مني
ألين :- الله الله عليك يا يوزرسييفف يييااا محور الكونن يا مدريي منوو
:- كافي نامي مو كلتي اريد انام
ألين :- اخوك ليش مفلفل وتردون يتزوج بعد سبوع
:- اكلها نامي تجيبلها سالفه من الشرق
ألين :- اكلك صدك كربلاء شنو ؟
:- كربلاء شنو ؟
ألين :- يمكن غربييه موو
:- كربلاء وسط كربلاء فقط كربلاء جامعه كلشي مثلا يكدرون يكولون عنها جنوبيه ويكدرون يكولون تمييل للغرب وانما ههي..
قاطعته :- يي يمكن بلشرق الاوسط مدري الغرب الاوسط
:- هاي ولايتج متعرفين عنها شي شتعرفين أمي
ألين :- امك فد هادييه ولاتشبهونها
:- دخيلج يلشريفه بنت الحسن لصمي حلگها اسكتها منا جابتها منا
ضربته ؏ صدره :- ديلا فوگ ما مونستك
:- شمونستني بتلل
ألين :- بتل الحلو
:- دييلا كافي
ألين :- أحسك لغز شنهو انت وشنو اوصافك !
:- هاي طاگات عدها عمي حقج حقج كملي كملي
حجيت اقلد صوته
ألين :- اششش ماريد صوت
:- وينك ياعلي صدك وسويها
ألين :- حسيناً وا حسيناً وا حسينا صغيرا محتوا قلبي هواكااا حسيناً وا حسيناً وا حسينا
كملها :- شَعيرت نوحي بِمسيل جروحي حفضتها بروحي اسر تگويني
مثل انصارك تعبت أثارك خدمت زوارك بمحاجر عيني الخدامه عليها
كملتها ويا
ألين :- شرف باريها قسم أفديها بزهور سنيني بعزائك حاضر وعليها مثابر
أريداً باجر أوفي بديني .
:- حسيناً وا حسيناً وا حسينا يلا نامي
سكتت وغمضت عيوني بلكي انام بلغلط بس وين ماكو
بقيت حوالي ساعه كامله انا مغمضه ولا بدرت مني
اي حركه بعدني منه ؏ كيف ونزلني ؏ الجربايه
تحسس الأثر بيده وانا صابتني رجفه بدمي
غطاني وحسيته يطلع من الغرفه
كعدت ؏ حيلي لبست التيشيرت وطلعت الحاسبه وكعدت اشتغل خلصت شغلي ولميت غراضي ورجعتهن خطر ؏ بالي أفتح الخانه القافله أيدن
دورت ؏ المفتاح بكل زاويه بلغرفه ومالكيته فكرت استخدم مفتاح خانتي طلعته ورحت افتحه باوعتله ورتديت لورا
:- يلعنك ؏ هيج مخخخ
لكيته مغير القفل كله يختلف عن باقي القفول البلكنتور باوعت الهن كلهن واحد يختلف عن الثاني
رحت طلعت ماشه بلكي تضبط ولو انا ما مقتنعه بس حاولت مرا مرتين وماضبطت هوا هاي الفكره تريدلها واحد استاذ بيها مو انا بعدين فكرت چا الأستاذ شلون صار استاذ غير هم اكو بدايات
رجعت احاول وأحاول ماكو بلاخير عصبت وضربته قوي حركتها اريد اطلعها وحسيته يتحرك اول ما فتحت القفل نفتح لباب درت وجههي عليّ بسرعه
جان مخلي أيدي ورا ضهره وشعره نازل ؏ جببنه وگصته تنگط عرگ تقدم ويحجي
:- هاي شدسوين
ألـين :- مامسويه يعني شسوي
:- يي بله شو بتعدي
ألين :- ماا
لزگت ضهري لزگ بلكنتور رفع حاجبه وكال
:- هاا؟؟!
درت وجههي واباوع بلفراغ مطنشته ماحس الّ مخلي وجهه بعنقي حاولت ادفعه ماكو لزگ بيه لزگ بلاخير ضربته بمصدر الخلفه وكع كرفص روحه ويتلهوه مثل السمجه
:- خرررببيج لا ابو حتئ…
وسكت باوعت لوجهه صار احمر خفت ودنكت عليي امسح بوجه بخوف
ألين :- ولله جذاببب ماضربتك حيلل
:- امشي طلعي طلعي لا اكتلج طلعي
ألين :- ولله ما اكتلني بس كومم مابيك شي موو
بعدني عنه وگلب ؏ الجهه الثانيه بقه ثابت شويه ودار وجهه عليه رفع ايده عبالي يريد يضربني غمضت عيوني وفتحتهن باوع لوجههي
وكعد ؏ حيله لزم أيديه وفراني علي وخله راسي بحضنه
:- بس كليلي هسا شسوي بيج منين ابديي بيج
لازم أيديه ورافعهن همشت شعره وبقيت جارته
:- ولله اعضج بس ما تهديني ، ولج يوجع فوگ شينهه گواة عينها
ودنگ عضاني بخدي اجر بشعرهه بقوه وأصيح
ألين :- ييييماااا ججلببببب وخر عندي راحح تططلع دددمم
وخر عني وگال :- السبع يطلع دم
طفرت علي وخليت رجليه بحضنه وعضتيه برگبته بكل قوتي حسيت طعم الدم صار بحلگي وبعدت عنه وهوا يصيح
ألين :- السببع يطلع دم هاا ؟!
خله ايده ؏ مكان العضه وباوعله بيها دم فتح عيونه بوسعهن طفر عليه وكعني بلكاع ولازم ايديه ثنينهن
:- انتِ مايفيد وياج هيج
وشفط أذاني بوسه أيييع الصوت صرخت بعلو صوتي
خله ركبت رجله ؏ ايدي اليمين وسد حلگي وباسني بخدي بقوه مو بوس لا شفط وانا اتلوه جوا الازعاج لحسيته بهلحضه اذا اكوم عليّ ماخلي بي عضم صاحي نوب يبوسني ويردلها أححح
وبقه هيج ساعه يبوسني باذاني وساعه بخدي لحد ماحسيت نفسي صخنت من العصبيه اضرب بي برجليه ؏ ضهره ولا يتحرك لحد ما هوا من كيفه بعد عني وتمدد بصفي ولازم ايديه
:- خررب صار وجهج احمر
طفرت گلبت علي وخنگته فلت ايديه رجع گلبني ولزم ايديه بايد وحده ورافعهن لفوگ
:- ترا أبوسج
احرك بوجهي يمين ويسار
ألين :- لاولله بعد ماا اسويها حباب تلعببب النفسس زماللل
:- ابوسج بوسه سطحيه
ألين :- يييمااا لااا ماريد ماقربلك بس وخرر عنيي ثوورر خنگتني
اشر ؏ شفته ويگلي بوسيني
ألين :- ييياعع بالله لو تذبحني ماا ابوسكك
باوعلي بنضره حاده ومنزل حواجبه ؏ عيونه
:- ييياعع ؟؟
ألين :- لا لا ولله مابوسك ككطييعه وخرر
:- اشوف منو اليوخرر اريد لو يطلعلج گرون هم ما اوخر
صحت بضجر
ألين :- يييمااا فدد أكرهكك
:- فدد اموت بهواج
ألين :- ششوف اذا ما ذبحتك وانت ناييمم
:- عادي ذبحيني بس ديري بالج ع جههالي
صفنت بي هاذه مايبتعد لو يطلعلي گرون مثل ميگول
ألين :- يلا تعال ابوسك بس بخدك
:- شنوو تقشمريني بيهاا قابل كرم كدامج وتبوسينه بخده امشيي لج
ألين :- مو حلفت ما ابوسك بحلگك تريدني اتخبل
:- ها يلا لعد بوسيني هنا
ويأشر ؏ عنقه
ألين :- لا لا فدوه بخدك
حجه يقلدني
:- لا لا فدوه بعنقي
ألين :- زينن بعيونك عادي
:- خوش همم راضين عمي
ألين :- يي غير تقرب عليه
شو قرب راسه وركعته كله براسي لزم جبينه ويباوعلي بصدمه
ألين :- لا لا ولله اجيت ابوسكك ولله بس مادري طلعت مني هلحركه
:- اه ؟ تقشمريني شنو ؟؟
ألين :- لا وابو فاضل لا جانت نيتي ابوسك
:- بس گليلي شسوي بيج هسا ؟؟!
ألين :- انعلل ابوك وخرر عنييي
:- دخيلك يا علي من متقلبت المزاج
ألين :- يلا ولله تعال ابوسك وخر عني ضوجتتنيي وخرر حباب
شافني ضجت من صدگ باسني بنص عيوني وخر عني وسحبني لحضنه
:- هاي صدگ ضاجت صغيرونتي
درت وجهي علي وخليت راسي ؏ صدره
ألين :- تمرمط بيه محسسني طفله
:- صدق من گال البدر ڪِٰيف أكتب الشعر وعُيونك قصيد وكيـف اوصفك وانت القصايد كلها ، الله
رفعت روحي وعضيته ؏ كيف بخده
ألين :- شكد تحب هاي السوالف
رفع حاجبه بمكر :- يا سوالف ؟!
ألين :- بباع نييتكك زفرهه قصدي يعني مثل شعر لو القاء كلام هيج شي
:- هوا انتِ عضيتيني وكلتي تحب هاي السوالف الخلل بنيتي لو بفعلج
، مر اسبوع وجان بهاذه اليوم زواج نوران ورقيه علاقتي بأيدن طبيعيه كلعاده لكن هوا هواي يهتم وبطل يغثني من صدگ كل ما نلتقي لازم نتعارك ولو هوا المكسر لو انا وكل ما اسأله ليش مدا تروح للمركز يكُلي مو شغلج
وروز منتظره عرس البنات وتروح للبصره بيت عمامها
جانت الساعه 6 صباحاً طلعت من الحمام وانشف بشعري وهوا مبدل ويلبس بساعته وطبعا لازم الون الاسود رفيقه
ألين :- شرشبيل احلف طلعت سجاد من السجن
:- ۅٛ عيونج طلعته
ألين :- انت مخبل تسجنه ؏ شنو
:- اجي اخبلج بدلي ومو شغلج
ألين :- يمهه فدوة خفت
:- لاتخافين بس ولي
درت وجههي طلعت فستان طويل وبي فتحه من جوا لونه اسود ورداناته خيوط وقماشته حرير هادله تجنن وواحد رمادي هم طويل بس مابي فتحه وعلي وشاح شلتهن وحجيت
ألين :- وينه الالبسه ؟؟
اشر ؏ الرمادي شمرته واخذت الاسود
ألين :- ولله هاذه البسه لو تموت
:- حلكج اشگهه بلا سخافه باعي حتئ ضهرهه كله يبينن
ألين :- هسا اناا مانعتك من لبسك ؟؟ وبعدين القاعات مقسومه النسوان وحد والزلم وحد
:- تعالي منعيني وبعدين وذا مقسومه ؟؟ اكو تصوير
ألين :- عود لو صورو عندي عبايتي
:- لبسي وشوفي اذا ماشگيته عليج
ألين :- يلا علسساس ع حوره مالبسه اذا معاجبك
:- يي يلا علمود تروحين وياهن
ألين :- سكره عوفها عندي
:- عمها يريدها ويا
ألين :- ششو بكل مناسبه تاخذونها مني
:- خوش بقيها بس سند ويانه
هزيت راسي وهوا طلع انا دخلت لبست الفستان الاسود بسرعه بسرعه وشعري واصل لرگبتي شسورته وخليت مكياج بيجي وجريت عيني بأيلاينر وطلعت تجنن لبست تاربون وحذاء أسود كعب لبست بششت عريض وطلعت بسرعه علمود ميشوفني أيدن
دخلت لغرفه حوراء لكيتهه هيه وجوري مخلصات وياخذن صور
ألين :- يلا ولجن قبل لا يجي ايدن
حور :- واذا اجه
ألين :- يشوف ملابسي
حور :- شو خل اشوفهن
ألين :- خاب بعدين تشوفيهن هسا بس خلنولي
ضحكت ولزمت ايد جوري وطلعنه وصلنه لبيتنه
ولكينه لبنات بلسياره صعدنه وياهن ورحنه
للصالون جان حاجزين بمول جبير
وصلنه ونزلنه ولبنات كلوحده كعدت بمكانه وبلشن يشتغلن بيهن
حور :- مامصدگهه صديقه عمرري راح تصير بيتي ويمي
نوران :- وهسا قابل انتِ ماتتزوجين وتعوفيني
حور :- لا انا زوجي اجيبه لبيتي يعيش وياي
روز :- خوش فكره هاي بس وين تلگينه
رقيه :- بلكي نلگا بشي كوزمتك توصيل مجاناً
زهور :- دسكتن ويلا خلن لبنيات يشتغلنجن
منار :- عوفيهن عوفيهن براحتهن
حور تصور بلبنات وتسولف :- وهاي اخر لحضات الهن وهنه عزابياتت
نوران :- دسكتي هوا انا خارطه العافيه
ألين :- دفرحي ونجبي احلئ يوم تمر بي الأمرأة هوا يوم زفافها
بنين :- بنات سامعات نسوان قبل شلون يهوسن للعرسان
ألين :- عريسنه جكليته حامض حلو حبيته
روز :- احا
بنين :- لا وبعد وحده
ألين :- لو تذكرتيها غردي
باوعتلي وكامت من الكرسي
بنين :- اوكفي شويه بله ،ألين تعالي عليج العباس اصور عيونج
روز :- قبل لتصورين صلي ؏ النبي
بنين :- عمي يحرسهن النبي منا هنا حلوات ومسويتهن أيلاينر الذيب
وكفتني وتاخذلي صور لعيوني
بنين :- خل انشرهن
حور :- ها ترا مانقبلل
بنين :- دولي يا ماتقببلون بتنه قبل ماتصير بتكم
ألين :- لا خيه لاتنشرينهن
مرت ساعات وأحنه دوينه الصالون دوي لحد مخلصن وصار لازم يلبسن البدلات وكلشش حلوات طلعن خاصه هنه وجوهن طفوليه والمكياج مو غامض فاتح وطلع يجنن
لحد ما أجتي سياراتهم ونوب السيارات الوراهم ماتنحسب هورنات وأغاني علگوها علگ دخلو العرسان وثنينهم واحد يكُل الثاني انا احله منك من الجمال باقر لابس قاط ابيض وياسر اسود غطو وجوهن ونزلوهن والهلاهل ترگع
وجان ايدن موجود صعدنه ويا انا وحور ولباقيات مادري ويا منو نزلو يم قاعه تصوير وصورو وطلعو
ايدن مطلع اغنيه ومعليها للاخير وجوري منطلقه ترگص وانا وحور وبس هوا لايركص ولا هاي بس يصگع جكاير
أيدن :- هاذه منو البيده سلاح
باوعنه ويا سبق السياره لكدامه ويمشي ورا السياره الشاف واحد مطلع سلاح دكله هورن وكفو ؏ صفحه نزلو وطلع قاسم راحله ايدن وحجه ويا وجاب السلاح ورجع
أيدن :- ڪِٰ****
حور :- شكد يعاند هاذه قاسم
أيدن :- لو رامي ولله ال افرقها براسه
شغل وتحركنه وراهم لحد موصلنه للقاعه ببعد عرس الاممه العربيه بي دخلنه قبلهم وجانت الدخوليه تجنن وحتئ تصوير بلاول ياسر وبعدين باقر ورا وصلوهن ؏ المنصه وبدت الحفله صوروهم وقسمو الكيك وعقدو محكمه وجان الشواهيد ايدن وأمجد اخذوهم وطلعو
شمرت عبايتي ؏ صفحه ونزعت التاربون واشرت للبنات وبدينه نركص لحد متعبنه وكالو راح يجون العرسان وأخوانه يركصون سترنه أنفسنه وهمه دخلو بيهم مليون واحد اصدقائهم وكرايبهم
فرغولهم مساحه وركصو چوبي ايدن وياسر وباقر وقاسم وامجد واصدقائهم ثنين واحمد ركصهم يجننن
خاصه الدبكه بعدين غيرو الأغنيه وتگابلو امجد وايدن ويهزون متن بحيث تعجبت شلون بارعين بعدين هزو خصر والكل متعجب ويباوعلهم ويغنون ويا الاغنيه بعلو صوتهم
هنا انا صابتني فلفله لازم اركص وياهم مستحيل
غيرو الاغنيه وطلعو أيدن وامجد وقاسم واحمد وياهم ثنين ماعرفهم ولبقيه بقو يركصون
تغيرت الأغنيه ع دبك الجوبي ودخلو لابسين دشاديش سود وايدن شماغ ابيض وامجد بيجي والبقيه اسود كلهم وهنا طلعو يجننون
أيدن لازم السبحه ويدبگ دبگ دليمي بهلحضه گزگزت عليهم بس اريد أكلهم ؏ هلركص
جانت بنين يمي وتصور بيهم
ألين :- مواههب مدفونهه
بنين :- لج بس باعيي رجلي المستقبلييي يشگ
ألين :- عمميي بس رجلج كلهم يمرعونن
بنين :- وشنو همه لزگو مو عدهمم قاعه بوحدهم
ألين :- هههاايي ميكدرون يرگصون لأن القاعه هذيج متروسه شيوخ كبار وضباط وناس هواي بيها ف اجوي لهنا
بنين :- يييمهه كزكزتت ؏ امجدد راح اطفر اكله بعد مابيها مجال
دمغتها براسه شويه وطلعو بقو بس العرسان ونزلو يركصون كلمن ويا مرته عاد طلعو يخبلون نوب اليضحك نوران كصيره وياسر طويل بس رقيه بيها روح مو كصيره حيل بس هم مو اطول من باقر والفرحه بعيونهم مبينه
خلصو وطلعو لحد مكالو راح يزفونهم دخل ياسر مد ايده لنوران ونوران ايدها ترجف بوحدها دنگ عليها باسه بايدها وبراسه وطلعوهم ودخل باقر كذالك
صعدنه انا ودلمار ونهاد ويا ايدن ولبقيه مالي علم بيهم وكلشوي وكفو نزلو يركصون ترسو الشارع ترس وصلنه للفندق ونزلت يم نوران وياي منار
نوران :- ييمههه ولله لو خوفتنيي
منار :- علكيفج بس خلحجي وياج
سدت اذاناتهه ماتريد تسمع
ألين :- شبيج بس ندليج ؏ غراضج
نوران :- يي وينهن
دليتهن عليها وطلعت عنها وبقت بس امي رجعت لكيت أيدن منتظرني صعدت ويا وورجعنه للبيت كرم نام بلسياره بقت بس جوري نزلنه دخلنه للبيت لكيت الكل بلصاله
مُلكيه :- غرفة العرسان جاهزه مو
ألين :- أكيد
هديل :- يلا ماما صعدو ارتاحو
صعدنه وايدن شايل كرم وجوري خلصتها بس تهلهل وتركص…
يتبع…
الباقيات الصالحات
-سبحان الله
-الحمدالله
- استغفرلله ربي واتوب اليه
- سبحان ربي العلي العظيم
- الله اكبر
- الحمدالله ربي وبحمده
-اللهم صلِ على محمد وال محد
-سبحان الله والحمدالله
- لا اله الأ الله
سابقِاً البعض شاف تشبيه عين أليـن بس هلمـِرا جبتلكم عين ألين شخصياً بس ها لتكولون مواضحه ومادري شلون
هوّ هذا الكدرت علي ف ها صممو عليها 💞😂
وههِا البارت طوله 7000 تخيلو؟؟؟ فوگ ڪلهاذا انا الساعه 12 م نزلت بارت وهسا الساعه5 م عبالكم سريعه؟
لا ولله بس لان جاهزين هلبارتين وشفت كم وحده كاتبات كملي ف تحفزتت ونزلته
وبعد شغله حراويكم شبه أنياب الين طبق الأصل تِرا
ويمكن هسا حنزلت بارت الأشباه شرايكم انزله هسا ؟؟