" شُــرَكــاء فِـي الجـحـِـيم "
Vote+ Comment فضلاً ولـيس أمراً
_____________
بعد شاف فعويناتها لقاهوم تعسلو حاس بتبوريشة ديالها بين يديه، ومايحتاجش يطل علئ أنوثها لي غاتكون دون شك سردات وكتسنا لي يرويها، تبسم ليها حنيكاتها حومر وسخان كيعجبو يشوفها بحال هاكا.
رحع ركز مع طريق حلات عينيها فيه وعضات شفايفها: كتغفلني.
طه: فهادشي ديال الغفيل مانكونش قدك.
عضات على شفايفها ضاحكة خطف فيها الشوفة ورجع مركز فالطريق: عجباتك البلاصة؟
سميرة: هاا
طه: حجري، شفتك طولتي الكلسة فيه اتخلني نسبق الفرح بليلة.
خرجات عينيها سارطة ريقها بزربة ناضت بغات دوز حيد يدو باش اخليها تفوت تارجعات لبلاصتها قلبها كيضرب حابسة الضحكة وبلا ماتحس رجعات سلتات عينيها شافت فحجرو نيشان خرجات عينيها وبدلات وجها بزربة داكشي لي شافت لا يحمد عقباه، ماكذبش منين قال ممكن يبدل رأيو ويصدق داخل بيها هنا فالطريق.
طه: ركبي الصمطة.
دارت لي قاليها عاد شافت فيه: عجبني الصوكان بزاف والله شكرا كنبغيك.
تبسم بلا مايجاوبها مخليها ميلة راسها كتشوف فيه تاوصل لواحد الدخلة دلوتورت قلب فيها ورجع داخل راجع لناظور، ميلات راسها كتشوف فالطريق تاداها النعاس وسهتات بالعيا.
ماحلات عينيها غير على صوت تيليفونو جاوب كتسمعو كيدوي بالاسبانية مافهمات والو، حسات غير بطموبيل زاد كسيرا وغوت بجهد فتيليفون، قلبها ترعد توكضات فالكلسة كتعرفو لاتعصب الا وانه كتكون نيت شي حاجة لي وصلاتو لطوب، بقات حالا وذنيها ماقشات والو من كلامو تاقرب يقطع ونطق باسم كارولينا، حلات عينيها بجهد وشافت فيه هي كتسمع صوت راجل ولكن كيفاش كارولينا واش دخلها زيرات على يديها شحال خايب تبغي تسمع وماتفهم والو زي الاطرش فالزفة.
قطع لاح التيليفون مكسيري، نطقات بشوية: شنو واقع؟
طه: غانمشي لاسبانيا دابا .
بصدمة: علاش!!
طه: عندي خدمة، غانوصلك دابا لدار عندي يوماين غانجي وجدي راسك منين غانجي غانكلسو شي ايام وغاترجعي تمشي معايا.
رمشات فيه قلبها كيضرب من هضرتو تسللات ابتسامة صغيرة لفمها شوية رجعات هجراتها بلاتي ميفاش كارولينا بعدا.
وقفها حدا الباب هبطو بجوج دخلات مغوبشة طلعات كتجري لبيتها وكمل هو طالع بشوية طلقات ليه رحمة: حبيبي جيتي.
تنهد كيشوفها كيفاش كتودعو وترجع طلاقاه منين تجي، هاد المرأة لي كتملي فحياتو كولشي، كتربع على عروش القلب ديالو، هي حياتو ودنية لي عايش فيها، شد يديها مزير عليهوم باسهوم ورجع باس راسها كيشم ريحتها وشعرها زعر جامعة ديل ريحتو كتغلغل فسدرو رجع شافيها: الواليدة رتاحي شوية شتك وليتي كتعياي بزاف.
رحمة: صافي شرفتيني؟
ضحك بشوية: حاشا الله ياودي الواليد لي جابليه الله أحسن تزويجة.
شدات على سدرو ضاحكة: ماتقولش هاكا تانتا خديتي سميرة تبارك الله واخا هبيلة زوينة.
هزها لعندو ودار طالع بيها ضربات على سدرو: أويلي حوطني هههه
طه: لا شفت الواليد عيق عليك بانليا نديك معايا نريحك منو
رحمة: شوف قداش وكيغير من باه اعباد الله
طه: واش مرأة بحالك مانغيروش عليها الله اهديك
قتـ ـلها بالضحك مشا تادخلها لبيتو ثانية وحطها فوق الناموسية كلس معاها عاود باسليها يديها ورطب على وجها: سمحيلي الحنانة لا عذبتك شي نهار ماتبقايش تبرزطي راسك معايا
رحمة: منقدرش اطه نتا فعيني وقلبي (شدات على يدو مزيرة) غادي تولد ولادك وتجرب.
تنهد كيشوف فيها: الله اسمحلينا من الواليدين (تكا باسليها راسها) نتي الكل فالكل الواليدة لابغيتي تشوفيني فرحان ردي البال لراسك.
رحمة: غانكون مزيان قوليا بنتيلي ماهواش
طه: غانمشي دابا لاسبانيا
رحمة: واش المشية لي قلتيلي داك النهار اتدي معاك سميرة ؟
طه: لا جاتني خدمة تانجي عاد نرجع نمشيو
رحمة: دير بالك مع رمضان مابقاليه والو بغيتك تبداه معايا هنا
طه: ماتخافيش غانرجعو قبل رمضان.
رحمة: طه واش بصح دخلتي سميرة لقلبك اولدي، شوف أنا عارفاك مزيان نتي ولدي وأنا ماماك، داك البنت دخلتها لهاد الدار كانت ناقصة فعينيك بزاف، وكنت عارفاك ماغاديش تشوفها مرتك من أول نهار، ولكن مابغيتكش تضرها، الى بصح بغيتيها ماتلقاش حسن منها، والى مابغيتيهاش تخليها تشوف رزقها فبلاصة خرا حسن ماتبقا تعذب.
ناض وقف شافيها: أنا مشيت كيفما قتليك ردي البال لراسك.
خرج خلاها كتنهد متبعاه بعينيها طبعا كانت عارفاه ماغايجاوبهاش ومن طبعو ماكيحملش لي يدخل فعلاقاتو واخا يكونو واليديه، مكتعرفش شنو من تحت راسو داكشي لاش كتكتفي بالدعاء.
دخل للبيت كانت كالسة فوق الناموسية باقا بحوايجها مربعة يديها ومغوبشة، بلا مايشوف فيها نيشان مشا للماريو جمع حوايج فصاك دخل توضا وخرج صلا المغرب مالحقش يصليه فجامع مزال الصلوات لي دازو كان كيصليهوم ويخليها تاكيرجع عندها، تحا وسالا دار شافيها: ماغاتبدليش حوايجك؟
شافت فيه بعصبية عاقدة حجبانها : ماتمشيش لاسبانيا
دور وجهو ودار يدو عند وذنو: نعام ماسمعتش مزيان!
سميرة: أنا عارفاك غاتمشي طلاقا كارولينا مابغيتكش تمشي، اولا نمشيو أنا وياك، انا مرتك وخاس تديني معاك فينما مشيتي.
طه: بانليا بحالي أثرات عليك الشمس اليوم.
ناض واقف عقد حجبانو كيجمع السجادة: حتارمي راسك بديتي كتخطاي شي حدود غاتخليني نتصرف معاك تصرف ماغايعجبكش.
ناضت واقفة فوق الفراش: فييين الموشكيل لاقتليك مااتمشيش مابغيييتكش تشووفها
طه: منين كتعرفي كارولينا حتا دوي عليها هاكا؟ بشمن حق!
قلبها بدا كيضرب من هضرتو : كنعرفها شفتها داك النهار فتيليفونك
قرب ليه كيحقق: نعام؟ كتقلبي تيليفوني ولاكيفاش!
شافتو جاي بدات ترجع بلور: م ماشي ق قلبت شفتها بالغلط
طه: كيفاش شفتيها بالغلط!
شافها ماجاوباتش غوت بجهد: كندوي معاك
سميرة: ماعرفتش غي غير شفتها و وايمان قاتليا كارولينا كانت غاتزوج بيك.
غمض عينيه مزير على سنانو رجع فتحهوم حط السجادة ودار مشا لعند حوايجو كيلبسهوم حنات راسها متبعاه بشوية تارجع وقف كيسد صاك وكيقلب وراقو شاف فيها: تبتي راسك، كاينين شي حوايج مزال ماكاتعرفيهومش، ماتبقايش طيري كثر من القياس، الحاجة لاماسمعتيهاش من فمي ماتخلقيهاش فدماغك، حاجتي بعدي عليها عطيتك تيليفون عمرك غاتشوفيني كنقلبوليك، ونتي بالمثل، والا ماغايعجبكش الحال.
هز صاكو غايخرج رجع شاف فيها: كارولينا عشرت سنين كانت وغاتبقا، ماتبرهشيش فعقلك، نتي مرتي ماتحطيش راسك فمقارنات غاتخرجي منهم خاسرة.
خرج خلاها فشلات على الناموسية ودموع طايحين ليها: كيبغيها كيفاش عشرت سنين كيبغيها.
هبط مع الدروج هز طموبيلتو مشا شاد طريق المطار تخسرات ليه الكانة وماعجبوش ابدا التصرف ديالها.
* برشلونة
فكراج كبير بين دروبة قدام معروفين كيتجمعو فيهوم غا العصابات والبزنازة، وقفات بطموبيل نزلات داخلة بسروال كحل جلد لاصق عليها، وجاكيت الكوير فالكحل مسدودة من العنق الطالون بوتيو واصل تالفخض، شعر كحل مطلوق واصل لنصها، مع فاتت الباب دالكاراج ثلاثة درجال حناوليها باحترام، عارفينها شكون ماكيقدروش يعليو فهيا العين منين كتكون حاضرة بأوامر من الرايس.
تمشات تاوقفات عينيها كيالقرطاس ممركازهوم عليه.
راجل مكبل فوق الكرسي شادين ليه يديه طلع راسو شاف فيها مضروب جيهت عينو: ههه جات الباطرونة
علات حجبانها بشوية فيه: باقي قاد تدوي؟
ضحك باستفزاز: داكشي لي عندي ماغاديش تلقاوه.
دارت بشوية حيدات الغطا على سلاح كان هو نفسو لي تضرب بيه صلاح، محطوط فوق الطبلة هو جوج قدامو كبار: شوف مزيان هاد السلاح ديال البراتڤا (ميلات راسها كتشوف فيه بهدوء) وحدة لي كدخلو فاروبا هي الموكرو، ولكن هادشي ماغايخليناش نساو الكلاب الضالة لي كياخدة باش الصقو التهم على سيادهوم !
علا حجبانو بهدوء: هانتي قلتيها، هاداكشي كيبقا شك بسيط الباطرونة.
تبسمات بجنب: حلمتي تنعس مع الباطرونات حتا تخايلت ليك وحدة منهوم ولا كيفاش؟
صغر عينيه كيشوف فيها: لا ولكن وسخ نسر معروف، سمعت بلي تزوج شنو زعما يكون دوزك لرجالو.
ضحكات بشوية تابدا كيضحك تاهو دارت دوزات بصبعها على سلاح زادت فالضحك ديالها وتاهو شوية كتغفلو دارت بجهد علات رجليها عطاتو ضربة وحدة لسدر جابتو مقلوب على الارض.
تحركات هزات رجليها حطات طالون عند القرجوطة ديالو كتبرك تاغوت بجهد: زيد مصني زيد، عذبتك؟ كيفاش قلتي ماسمعتش مزيان
زادت بركات غاتقتلو غابطالون كتحشيهليه فالخوية دالعنق: نسر واحل ليكم هنا بالضبط شفتي شحال واحل (زادت بركات كثر) جرب جرب شوف شحال واحل ليكم، واش كيحسابك غادي ضحك علينا بجوج كلمات !
صوتو مشا ماقادرش يدوي ولا كيتقج: م ماغات تفل لتيش Puta.
زدحاتليه راس مع الأرض دخل واحد من رجال كيجري: بوص غايكون هجوم هنا.
جبدات بزربة الفردي صغير من مور ضهرها كطرطق بين يديها كتوجدو وهضرات: جمع السلاح فوق الطبلة.
مشا كيجري كيجمعو فالغطا ديالو تاكيسمعو القرطاس، أول حاجة دارتها دارتهها طرطقات فالركبة ديال هاداك لي طايح غوت فسما كيتوجع، باش ماعندو فين ينوض.
جرات لدخلة طلاقاها واحد داخل بالقرطاس كيف غايعلي الفردي ضرباتو بركلة ليد طيرات القرطاس من يدو وتيرات فكرشو، كتشوف صاحبو داخل من موراه دارتو كالة تخبات فيه مزاد غاتيرا فضهرو رماتو لأرض وناضت باش تيري فيه خوالييها.
جا كيجري هز يدو يضربها خواتليه عطاياه بالضهر وضارت طلعات فضهرو جمعاتليه راسو بين رجليها طاحو بجوج مزدوحين فالارض ناضت بزربة لوات ليه العنق بيديها قتلاتو فالبلاصة ودفعاتو ميـ ـت.
مع غاتوقف جرها واحد بالموت على عنقها: فين غادا دابا اا رمييي سلااااح.
رمات سلاح وعلات يديها: ماغاتستافد والو النـسـر جاي.
ضحك كيدوي فودنيها وكيزيد يبرك على الموس فعنقها معليا يديها: إلى سيفطناك ليه ميـ ـتة براكة علينا.
مع غاتهضر علات عينيها طاحت عليه نيشان داخل نطقات بشوية: طه
ماجا فين يستوعب لي حاط عليها، علا عينو باش يجيه الموس فالعنق ديالو.
كان طه نيش من بلاصتو جابها فيه مقادة داز من حدا وذنيها لدرجة فتحات عينيها بجهد لوهلة قالت صافي الموس جا فيها صدق طاح موراها جثة هامدة.
كارولينا: wow bien
طه: ten cuidado conmigo
توكضي معايا
ضربليها الفردي برجليه وصل عندها نيشان هزاتو ودارت عاطين الضهر لبعضياتهوم شافت واحد غادي لهاداك لي كانو شادينو طرطقات على راسو تاخرجات القرطاسة من جهة ثانية.
فضرف ثانية جمعو كولشي فدقة، خرجو بجوج شافت فيه تبسمات ماجات دور تاكاتشوف من بعيد واحد منيش عليه غوتات بجهد : aguiiiilaaa
شاف فيها تلاقات ليه جرها من يديها باش ماتجيش القرطاسة فيها ولكن مافلتاتش جاتها فالجنب ديالها تطرطق دـم بزربة دارت يديها على جنبها وحلات فمها بآلم شهقات.
طلع يدو ضرب القرطاس كامل خواه فيه تاكيشوفها فشلات تميلات للارض غوت بجهد : كااااروليناااا
بزربة مد يدو لعند راسها شدو قبل مايوصل للارض طاحت بين يديه
هزها بين يدو كيحاول يوكض فيها باش ماتغيبش.
طه: Quédate conmigo, no cierres los ojos
بقاي معايا ماتغمضيش عينيك
غمضات عينيها ورجعات حلاتهوم كتزير على سنانها من كثرت الآلم لي كتحس بيه : tengo que quitarme la chaqueta me duele
خسني نحيد الجاكيت كتحرقني
فتح الطموبيل وحطها فتحات الجاكيت عاونها تاحيداتها بقات ببغاسياغ سبور فالكحل وبانت ضربة الدـم كيتدفق من جنبها مع كانت سخونة.
زير على سنانو بعصبية: شييت، خاس تصبري بيدما وصلنا.
كارولينا: alcohol كاين فطموبيلتي جيبو
جبدليها الكونطاكط من سروال وتحرك بزربة لطموبيلتها جبد لانكول وتم راجع فتحو كب شوية غوتات بجهد شدها من سدرها زير عليها باش ماتحركش: صبري
حيد الجاكيت ديالو وحيد البودي الفوقاني بقا بسوفيطمة سماطي قطعو دغيا ولواه على كرشها وزير على وجها: شوفي فيا ماتغمضيش عينيك بقاي فايقة كتسمعي.
حركاتليه راسها زدح الباب مشا لبلاصتو رجع كيلبس الجاكيت وتحرك بزربة لواحد السبيطار موالفين كيتعاملو باه فأعمال غير قانونية، دخلوها بزربة للبلوك دار كيحك على اللحية ديالو وجبد تيليفونو كيعيط.
* طنجة
صبح الصباح عليها كيف حسات بشوية ديال الشعا ضارب فيها فاقت على ريحة البحر، بقات مدة حالة عينيها وكتشوف قدامها ببرود، ناعسة بحال شي متشردة، مالقات فين تنعس تالوطيل تثلي غاتمشي ليه القليلة كيقوليك 800 درهم، صعيب تخسرها فليلة، جات لقدام لاكوط فالكراسا لي مقابلين البحر وجمعات صاك عند رجليها تغطات بواحد المونطو عندها ونعسات مغطية وجها باش مايبانش راجل ولا بنت لي ناعسة، تما أكثر بلاصة فطنجة ماكاتخواش لا ليل لانهار اللهم هاكا ولا شي درب تصبح ميـ ـتة ولا واقعة فيها شي كارثة، كلسات رادا المونطو فوق حجرها كتشوف فشمس كيفاش منورة مزيان بعدا غير تسخن شوية قتلها البرد فليل نعسات كترعد، هبطات راسها أفكارها كيدورو فين غاتمشي وفين غاتجي اليوم هاهيا فلتات وباتت فزنقة وغدا وين !؟ دموع عمروليها فعينيها نطقات بلاماتحس: علاش اماما ولدتيني علاش؟ ولدتيني باش نتعذب هاكا فحياتي !!
ناضت ماسحة دموعها وهزات ساك والمحفضة تحركات بخطوات مزروبين باش تسخن شوية، دخلات لواحد القهوة على لاكوط نيت ماتبان دوليكس، توضات وغسلات وجها خرجات هبطات لسيرفور لتحت سولات على خدمة، قالوليها تسنا تايجي الباطرون، داكشي لي كان تسنات تاجا لقاها نيت باقا صغيرة وزوينة تكون سرباية بحال هاد نوع يزيدليه حتا الكليان قبلها ودار معاها باش تبدا من غدا تختار يا صباح يا العشية.
خرجات فرحانة كلما ضبرات على خدامي بزاف كلما مزيان الله اجعلها تخدم من الصباح حتالعشية، شدات طوبيس لافاك باش تما تكلس نهار كامل ومنها تشارجي تيليفونها وتاكل.
أمال لبسات حوايجها سروال دجين زرق وقبية فالگري مارك gucci ومن الفوق مونطو فالكحل هزات صاك كيتعلق صغير فين سوارت دطوموبيل وتيليفون والفلوس جمعات شعرها كعكة مادارتش الماكياج مشات نيشان خارجة تاكاطلاقا مع خوها داخل من الباب كيعادتو ليل سهران وصباح ناعس.
شدها قبل ماتخرج : فين غادا؟
أمال: نعيش حياتي نطج
رضى: قادي فمك
أمال: غادا لافاك شنو مافهمتش ! واش كيحاسبك غانبقا بحالك مضيعة حياتي فهاد الدار؟
رضى: غادا تلاقاي بيها؟
نفخات كتحول عينيها: رضى خليني نمشي
رضى: قتليك وجهك مايشوفش وجها
دفعاتو: شنوووو دارتليكً دااااك البنت شنووو دااارتليك؟؟؟؟ الوحيدة لي وقفات معاانا فهاد المحنة ماخلات مادارت باااش تخرج من صدمة ديال نسرين، واش هادا الجزااااء ديااالها
غوت بجهد: أماااال
أمال: قربنا شهر باش مـ ـاتت نسرين حتالفوقاش غاتبقااا هاااكا؟؟؟ ااا حل عينيك وشوف مزيان غيثة ماشي هاكااك وداك الكلب لي كيحسابك نتا راجلها هاادااك شماااتة سمعتي شمااااتة هو لي سامح فيها وبسبابو باها تبرااا منهااا الى كاااانت بنت خالتها بيتش ولا منعرف لديلمها غيثة مادخلهاااش، ودابا غادي نمشي لعندهاااا بغييتي ولا كرهتييي وماتخافش مابقا والو غادي نمشي بحالي.
وقفات شيماء من موراهوم: مالكم كتغوتو واش حماقيتو
طلع رضى عينيه شاف فمو غفلاتو أمال جرات يديها وخرجات زدحات الباب.
رضى: هاد البنت لي مضسرينها بسبابكم غاتخرج لطريق
شيماء: فين كنتي ليل كامل؟
ماجاوبهاش مشا دخل لبيتو وزدح الباب خلاها شادا على راسها مابقات فاهمة فيه تاحاجة.
هزات أمال طموبيل دمها مشات بها واخا كتمشي بشوية حيت يالاه تعلمات تصوك ولكن قادية غراض تاوصلات لفاك تعمدات تمشي بكري حيت عارفاها غادي تجي، وقفات طموبيل وهبطات كتسنا فالباب لي كيدوز من حداها عارفها كتصدمو حيت عينيها كحالو شوية من لتحت وضعافت بسباب الاكتئاب لي جاها مور المـ ـوت ديال بنت عمها.
مع دورات عينيها كتقشعها هابطة من طوبيس وداخلة من الباب ثاني مشات كتجري جراتها: غيييييثثة
دارت غيثة شافت فيها بصدمة: أمال!
هبطات عينيها كتشوف صاكها وشفايفها بويض عينيها حومر وساكادو فضهرها بلا ماتحس نطقات كترعد دمعة طاحت كتحري من عينيها: و وا اش بنتي فزنقة !!
غيثة: أمال الهضرة لي قال خوك صحيحة أنا ماصل..
قاطعتها خطات لعندها جوج خطوات: غيييثة قوليلي واااش بنتي فزنقة!!!
سرطات ريقها حابسة دموعها باش مايهبطوش وتبسمات ليها: حيت ماعنديش دار لي غاتهزني بت فزنقة حيت أنا بنت الزنقة وليت نلقا الخير فالشارع كثر من ديور الناس.
طاحو دموع من عينيها قربات بزربة عنقاتها: سمحيلي لاكنت أنا سباب عافاك سمحيلي (طلعو شهقاتها من الأعماق) سمحيلي عافاك مانقدرش نشوفك هاكا.
بعداتها ومشحاتليها دموعها: أمال مادرتي والو أختي وخوك راه بصح قال الحقيقة أنا مالصاش ليكم شوفي
علات يديها ودموعها سالين ببرود ضحكات: أنا فين ونتوما فين مانليق لابمقامكم لا بوجهكم وهو ماكذبش كل كلامو صحيح.
أمال: لا نتي ماشي هاكاك نتي عارفاني انا ماكيهمني لا مقام لا وجه نتي صاحبتي وختي ولقيت فيك لي مالقيت فتاوحدة.
غيثة: حتا أنا وعمرني غادي نسا نعمة لي كليت من رزقك حاشا، وأنا هنا فوقاش ماحتاجيتيني غاتلقايني ديما حيت هادا واجب عليا
هبطات راسها كتبكي وتشهق حسات براسها هي السباب تاوصلاتها هاكا طلعات راسها ونطقات ببكاء: أنا غانمشي نقرا ففرنسا وصلاتني البارح المنحة فليل والجامعة قبلاتني. خسني نلتاحق هاد اليوماين.
سكتات وطزعات وجها شافت فيها لقات دموعها نازلين وتبسمات هضرات برعشة: فر رحت فرحتليك فرحتليك اختي
قربات عنقاتها كانت عارفة شحال وهي كتحلم تلتاحق لهاديك الجامعة واصلا حيت ماقبلوهاش فلول كلسات عليها لهات وقتها فلافاك ودابا سيفطوليها باش تمشي، زيرات عليها ودموع سخونة نزلات حيت أمال هي صاحبتها الوحيدة لي عرفات ورتاحتليها وعاوداتليها وماكانتش حاملة تعقد علاقاتهوم بسباب كاع لي طرا، زادت زيرات بحالي باغا توصل حتالرضى من خلالها رضى لي حسابتو خوها وصديقها وصدمها وهرس قلبها فراتت، بعدات عليها كتشوف فوجها: شوفي وسمعي مني سيري وماضوريش موراك سيري حققي حلمك بغيتك ترجعي لعندي أحسن بيولوجية، تفتحي شي مختبر ديالك بوحدك بغيتك نشوفك لفوق لفوق
تبسمات كتمسح دموعها: تانا بغيت منين نرجع نلقاك خدمتي فشي شركة كبيرة ووليتي شي مهندسة ديال ريزو ولا سيستام.
غيثة: صافي وعد واعديني ونواعدك
أمال: كنواعدك.
عاودات عنقاتها بجهد وطلقات دموع حارة تابداو يشهقو كيتفكرو أول نهار تلاقاو باش بغاو اتجلو ميفاش علاقتهوم بدات يالاه 8 شهور دابا وكيحسو براسهوم معارفين سينين، هاكا الصداقة وهاكا كتجي داك الصديق ورفيق الروح لي مكتحس براسك تاكاتلقا حياتك مشروكة بيه وولا جزء منها.
دخلو بجوج لبيڤيت ماجبدوش كاع اخر موشكيل وقع كيتعاودو بحال اي مرة واكثرية حاولات غيثة تهضرليها على الحوايج وشنو غادير ففرانسا عارفة أمال شحال كتحماق على هادشي.
لي شافهوم من بعيد يقول كيفاش هاد جوج تلاقاو وحدة تزدان ففمها ملعقة من ذهب لي بغاتو كيتحضر ليوم قبل غدا ووحدة تولدات لا حنين لا رحيم الخبز هو للخر خاسها تحسر باش تلقاه، جوج كل وحدة من طبقة وكل وحدة فمكانة بعيدة على ثانية، ولكن جمعاتهوم روح نقية وكل وحدة كتمنا الخير لثانية من قلبها.
* الناظور
كانت رحمة كالسة كتفطر ومراد حداها كيهضر مع عصام على آخر مكان وقع لصلاح وطه، شاكين بلي الضربة جايا من بلاصة وحدة، عصام اغلبية كان كيهضر اما مراد ساكت وكيخمم عارف ولدو مزيان ماغاديش اتراجع فكل نهار كيفك يدو من شي عصابة قليل منهوم لي غايتقبلو مزال على امل شي نهار اقوليه مابغيتش او العمس يرجع شي نهار اقوليه صافي غانخرج من كولشي فدقة، كاع الاحتمالات فراسو ماقادرش ادوي معاه ولا يفرض عليه حيت ماغايزيد غير اولد العكس كثر.
عصام: واش كتسمعني الواليد؟
مراد: نعام اش قلتي؟
عصام: قتليك هادو ماغايكونو غافعايل الوزير
مراد دور راسو بلا ساهي: الضربة لي جات صلاح ممكن يكون الوزير ولكن ديال طه لا
عصام: شنو لي خلاك تأكد
بغصة: أنا عارف
دخلات عليهوم سميرة كترض الشعر مور وذنيها: صباح الخير
طلعو عينيهوم فيها جاوبها مراد ورحمة اما عصام ماعندوش معاها وتاهي نفس الشي بحالي كتقولو شتيني غا مشتاقة فيك.
مشات كلسات حدا رحمة نايضة خاسرة وماحاملاش راسها ولات مؤخرا كتحس براسها ثقيلة منين ماكيكونش طه وخصوصا منين كيمشي لاسبانيا كتبغي تمـ ـوت والوقت كيولي يجيها ثقيل، هزات طريف دالخبز كتاكل تاطلعات عينيها فرحمة: بغيت نمشي ليوم عند ماما
رحمة: اييه ابنتي خودي راحتك ايوصلك عمك (شافت فمراد) توصلها احبيبي
مراد: مرحبا ابنتي من حقك تشوفي واليديك
سميرة: بغيت نمشي دابا ونرجع فالعشية.
مراد: واخا لاكنتي واحدة يالاه.
طلعات بدلات عليها ولات كتلبس غير من الحوايج لي جابليها طه واخا قلال المهم كتحس براسها قريبة ليه وكتجي زوينة بيهوم.
هبطات ركبات معاه طريق كاملة ساكتين هي اصلا ماليها كانة كتفكر فطه وحتا هو كيفكر فطه ولكن بطريقة خرا حتا وصلها: صافي فالعشية انشاء الله نجي موراك ؟
سميرة: صافي واخا شكرا اعمي.
نزلات دقات الباب دخلات عند مها سلمات عليها ملامها قليل وكتجاوب على قد السؤال تاسمعات سميتها من الفوق: سميييرة
عرفاتو خوها مشات شادا ساكها طلعات عندو شافت فيه معلية حجبانها كان كالس فصالون بالكنابي طبطب بلاصة حداه: اجي اختي توحشتك
لي كملات تخلي جيم وتعليق