" مـَشـاعـر مـبعـثَـرة "
Vote+ Comment فضلاً ولـيس أمراً
__________________
فالعرس رحمة لاحضات اختفاء سميرة قلبها بقا يضرب حيت وصية ولدها وماتقدرش تخالف بوصيتو دارت بزربة عند ايمان : فين مرت خوك ؟
ايمان: مانعرف اماما واش غانبقا حاضياها
رحمة: اويلي استغفرت الله راها ضيفة هنا
ايمان: راها قبيلة قاتليك غاتمشي لحمام منعرف ليها
دارت رحمة بزربة عند امال كانت كالسة حدا مها كتخربق فتيليفونها سولاتها: امال ماشفتيش ابنتي سميرة؟
طلعات عينيها: لا ياك كانت غي هنا
شيماء: مالكم شنو واقع
ايمان: هه تلقايها كدير مصيبة ثاني
ناضت رحمة حمعات الوقفة تخلعات وفعلا كتعرف سميرة راسها غالفمصايب والمحاين، خلاتهوم لبسات شالها ومشات خرجات هازا القفطان دور بعينيها ولي دازت عليه تسولو واخا حد ماعارفها مزيان دخلات لدار طلعات تالحمام ورجعات هبطات والو، هبطات لدروج وقفات كتشد فقلبها اش غادير دابا ولمن تعيط حتا تيليفون باش تعيطليها والو، رجعات خرجات لبرا كاع تقول الارض نشقت وبلعاتها، هزات تيليفونها كتعيط لمراد باش اخرج ايجي لعندها وبقات هي مخبعة شوية مور الصور مبعدة على رجال تالحق عليها مراد شافها فداك الحالة صفارت بالخلعة: مالكي اش واقع ؟
رحمة: سميرة امراد ماعرفتشي فيناهي تقول الارض نشقت وبلعاتها
مراد: ياك البنت كانت معاكم ؟
رحمة: ناضت كتقول اتمشي لحمام دابا نص ساعة ولا كثر ماولات رجعات
مراد: قلبتي فالدار سولتي الناس والو ؟
دورات راسها بلا : واش طه جا راه لاعرف هادشي غاتقوم القيامة
مراد: غير سكتي وصبري تانشوفو راه جا ولكن مانعرف ايكون واقف مع الدراري مانقولو ليه والو حتا نتأكدو ماعرفنا اش كاين .
عضات على شفايفها خايفة لاتطرا شي حاجة البنت غريبة على المنطقة وهوما غافجبال والغابة تالتلفات مايعرفو منين اجبدوها ولا يمشي يلقاها شي حد، كتفكر غير فطه غايقلب عليهوم الدنيا .
فالصالون رمشات بتوتر من الهضرة ديالو كتسرط فريقها تاحس طه بالباب باغي يتحل، ردها موراه بزربة وتقدم لعند الباب حلو بجهد على يونس تاخلعو ..
طه: هانا اخالي كاين شي موشكيل ؟
يونس: اواه نتا هادا خلعتينا اصاحبي شكادير هنا
طه: راه دار الواليدة هادي جيت نرتاح شوية وصلت عيان
يونس: اه وصافي خود راحتك انا جيت نبدل كنسمع هنا الحديث جابلي الشك
ميليه راسو بجدية: معايا المدام
يونس: صافي خود راحتك المسامحة انا خارج
حركليه غاراسو وخلاه مشا سد الباب ودار عندها لقاها كتلوي فصباعها وجها حالتو بالكحل الماكياج تجخمط ليها حناكها مطبزين بالحمورية وشعرها تاهو مخربق، القفطان مطلوق بلا حزام، حشمانة ومزال مامستوعباش لي طرا.
طه: صاڤا ؟
طلعات عينيها فيه عاضا على شفايفها وحركات ليه راسها باه ورجعات حناتو بزربة مشا لعند الحزام ديالها حنا بشوية هزو من الارض ورجع لعندها: ضوري
دارت بشوية عاطياه بضهرها حيدليها شعرها طويل بزاف كيوصل حتالنها ومع هي عاد قصيرة غاهو لي كبات فيها، ردو ليها لقدام وركبليها سمطة بالخيط كيحزمها شوية جبدها من الخيوط بزربة تاتزدحات معاه ضهرها لاصق سدرو جنبات عينيها قلبها كيضرب وهو كيطل عليها بين رموشو وفنفس الوقت مركز مع الحبل تاعقدو، جبدليها شعرها حط يدو على كتافها ومع هي مكحزة ليه بزاف ريحة شعرها دخلات مع نيفو تاغمض عينو بشوية، من بعيد كاتبان بنتو بنقارنة الطولة بيناتهوم راسها واصل لسدرو .
نطقات بمشقة الانفس كترعد: صافي؟
حل عينيه وطبطب على البلاصة لي كان شاد منها كتافها: اتلقاي الحمام قبالت الصالون سيري غسلي وجهك وقدي حاجتك اتلقايني كنتسناك
دغيا تسلتات غادا والسخانة طالعة ليها كيف دخلات لحمام شعلات الروبيني كتغسل وجها وتعاود وتعاود، وهزات القفطان فقلا كانت باغا تقدي حاجتها وهادي عادي مور اي نشوة كاملة عشتيها.
دور عينيه بانليه الكلون ديالها هزو باش مايخلي تاشي آثر طواه مزيان وجمعو بين يدو، وهز المونطو عند يديه خرج كيشوف فساعتو مع حس بالباب تفتح طلع عينو شاف وجها رجع طبيعي مسحاتو كولو قربات لعندو حانية راسها: كتحسي براسك مرتاحة؟
حركات راسها باه حشمانة، جبد المونطو ودورو تاعلات عينيها كتشوفو خشاها فيها من الراس تازغبة من شعرها مابقات كتبان ودور عليها يديه خارج بيها.
طه: تبغي نمشيو بحالنا ولا تكملي العرس مع مالين دار ؟
* طنجة
دخلات بعد يوم شاق، هاد الايام عندها عامرين كدوز الامتحانات ديال اللخر دسوميستر وخسها ضاروري تنجح وفنفس الوقت كتخدم جهدات على راسها وحتا الماكلة مابقاتش كتاكل مزيان، تامنين كتجي قليل فين كتخلي ليها خالتها الماكلة كتلقا دعوا ناشفة وكدير بناقص كتبات بالجوع، ضعافت شوية وعينيها دبالو بالعيا خصوصا ماكانتش كتلحق الدروس فاللخر وتالي يشرحليها والو كدخل غير للكروبات دالفايس والواتساب ضبر على راسها .
حلات الواتساب كتلقا امال مسيفطاليها راسها من العرس تبسمات وعمراتها قلوبة، خرجات من الشات كتبانليها ديسكيسيون ديال رضى لدابا ماشافش الميساج ديالها يمكن مشغول بزاف ماكيلحقش يفتح، تنهدات، وفنفس الوقت تبسمات فرحات حيت غايتزوج وفنفس الوقت بحالي شداتها غصة صغيرة فقلبها حيت رغم الايام الصغيرة لي دوزات معاه حسات بحالي عندها شي راجل فحياتها بحال باها خوها ولد عمها ولد خالتها ولا صديقها، البنت شحال مابقاش ولكن كتحتاج داك الرفيق الذكر لي تكمل راسها بيه مرة يجي بصفة باها مرة يجي بصفة خوها مرة يجي بصفة صديق او حبيب او زوج، هي فتاقداتو من جميع النواحي، ودابا حتا الانسان لي شافت فيه داك الامل ديال صديق غايمشي بصح بصح فرحانة من قلبها ولكن غايبقا واحد الذكرى لي زوينة فحياتها .
* الناظور
كانت كضحك وهي كتشوف فالبحر دارت شافت فيه: غاقوليا لاش سامح فالعرس وجاي ليا
ضحك كياكل فالزريعة خداوها بجوج كيف كانو كيديرو وهوما صغار : ماعندي ماندير بداكشي
نسرين: باز تامانكونش كنعرفك ونتا أكثر واحد عزيز عليك القساير
رضى: كضلميني والو
كطرطق الزريعة وكتشوف فالبحر : باقا مامصدقاش غانتزوجو هاد السيمانة هههه
رضى: راه مامصدقش راسي غانتزوج انا
بابتسامة باردة: باقي عندك الوقت فين تراجع
دار شاف فيها: منيتك وشنو ترجعي ثاني لداك السبيطار
تنهدات: اودي الغلط ماشي ديالك الغلط فواليديا
رضى: نساي نساي عليا الزمر
حيد الكاسك من عندو ودارو فوذنيها وطلع موسيقى جدها على طوب تادارت شافت فيه كضحك دارليها اشارة بيدو بمعنى ضربي الدنيا بركلة
غوتات : ضارباها منين قررت نتزوج بيك راني ضارباها
* بني سداث
طلعات عينيها فيه بشوية كترمش ماتنكرش انها كتمـ ـوت على العراسات، ولكن فنفس الوقت تقنطات باخر ماطراليها كتحس براسها باغا تغسل وحتا حوايجها مالابساهومش مزيان قلبها كيضرب والحشمة مأثرة عليها وجها تغسل حالتها وحالة ايامها .
سميرة: مابغيتش
مزادش هضر جرها سد الباب موراه وكبر بيها الضورة تاوصل من اللور لطموبيلتو فتحليها الباب لقدام بقا واقف تاطلعات ورجعات المونطو محيداه عطاتوليه مابغاتوش يحس بالبرد.
شد من عندها المونطو كيشوف فيها: غانسد الطموبيل واحد جوج دقايق راجع عندك .
حركات راسها سد الباب وسوكر الطموبيل تحرك غادي كيلبس فالمونطو ديالها، بقات متبعاه بعينيها من ضهرو فنفس الوقت كتعض فشفايفها كتفكر اشنو طرا جناكها ماقدروش يبردو
سميرة: شنو درتي اسميرة شنو درنا دابا افففف (كتقيس فحناكها) تشوهت تشوهت (بقات كتحك فخاضها) خسني نبدل حوايجي تشوهت (رجعات تبسمات كتقيس شفايفها) ولكن باسني ههههه بااسني بااااسني
نقزات فالكوسان كضرب برجليها بالحماس ورجعات دارت يديها على وجها واحد المشاعر غراب تحركو فيها حسات براسها بحالي قريبة منو شوية وطبعا بحيث شاف محرماتها لي عمر شي حد شافهوم كانت ليلة غريبة بالنسبة ليها حسات بلي الوقت غايدوز ثقيل غاتكون أطول ليلة فحياتها.
سميرة: كيغاندير نولي نشوف فيه داباااا (علات كتافها مغبنة) ياء راجلي راجلي وااه (كتعاود تخايل ليها صورة راجلها) اويلي ولكن حشومة افففف شغاندير دابا لابصح بصح بغا ينعس معايا نيت شغاندير (زيرات على قفطانها بيديها) شوية بشوية ماغانوليش نقولهاليه بغيتو هو لي يبوسني (ضربات برجليها) كيعرف يبووووووس (تغرغرو عينيها) دابا داك الكاورية هاكا كان يدير معاها (دبلات فمها) لا راجلي بوحدي حمارة
مشا لجيهت القاعة درجال كيقلب على باه بعينيه والو مابانش ليه مشا لعند المهدي شافو وقف سلم عليه : الروبيو فين هاد الغبرة زمان ماشفناك
حك اللحية ديالو بشوية : نتا لي غبراتك طنجة
المهدي: ياك بعدا باقين فالمغرب مامشينا فين
ضحك ضرب على كتفو: كلها كيعيش وقتو دابا ندكو الوتد شي نهار تاحنا هنا، ماعلينا ماشتيش واحد الواليد فين راه ؟
المهدي: عاد كان معايا قبيلة شوية هنا يكون خرج عند رجال ولا منعرف
مع خرج من عندو كيشوف لابيل فتيليفونو من عند باه : آلو الواليد فين راك ياك لاباس
مراد: اجي عندي راه اتلقاني مع مُّك مور صور ديال الدار .
قطع معاه وتحرك لفين نعت ليه داير يديه فجيبو عاقد حجبانو مافهمش اش واقع، تاوقف عليهوم: السلام عليكم اش كاين
رحمة كانت متلبكة وكتجمع فيديها تاهضر مراد: اولدي سميرة كانت مع مك فالعرس تاشوية ماولاتش بانت عينا نقلبو عليها والو عليها قلنا نعلموك بعدا
علا حجبانو بشوية : راها فطموبيل كانت معايا
علات رحمة راسها بزربة كتشوف فيه: الله يا لدي قربت نسخف غا بالخلعة، كون غي علماتني (يديها كانو كيترعدو) خفت لاتوقع ليها شي حاجة والبنت مسؤولية فعنقي
تنهد ماعجبوش الحال يشوف مو بهاد الحالة وجها ولا زرق تخلعات ديال بصح يشدليها على يديها طلعهوم كيبوس فيها: الله اسمحليا منك الواليدة .
مراد: الحمد لله منين الامور مزيانة دابا ماوقع باس
رحمة: فففف والله تخلعت الحمد لله بعدا وصلتي مزيان هو هاداك (كتفحصو بعويناتها)
طه: هو هاداك الحمد لله لقيتيني غانتحرك دابا نمشي عيان بزاف سلمت على الناس باركة للعرس الله اجعل البركة
رحمة: كون كلستي غير تعشا ؟؟ سميرة اتمشي معاك !
حركليها راسو : تاهي عيانة شوية بغات تمشي نطلقاو انشاء الله فناظور
مراد: كون دزتي للحسيمة حسن ماتصش تالناظور بزاف عليك نعس رتاح فالدار تما تالغدا انشاء الله
تنهد كيحك على عنقو : داكشي لي بانليا غاندير
رحمة قربات شادا على يديه : واش عنقك رجع يضرك احبيبي
باسها فراسها: لا ماتشغليش بالك
مراد : رد البال لراسك
رحمة: ااه خود لسميرة شي حاجة تاكلها راه مسكينة ماكلات والو من الغدا
طه: محال نلقا دابا شي حد حال ولكن نشوف سيري الواليدة نتي دابا عند الناس
حركات ليه راسها وتحركات غادا بقاو متبعينها هي ومراد تادخلات للعرس عاد تحركو بجوج تقريبا نفس الطولة غير طه زايد عليه شوية مع تبارك الله طويل فعائلتو وكتافو عراضين غير الوقفة منو كتعرفو شديد وباه زايد عليه شوية فالغلض، غادين بشوية لفين خلا طموبيلتو .
مراد: عرفتي السلاح منين جاي؟
طه: القضية فيها إن ومخلوضة شوية، داكشي داخل فيه بزاف ديال الوجوه
مراد: الى كان داك الكلب ديال التهامي راه ماغاديش يخلي موراه باش نقيو سنانا
طه: يخلي ولا مايخليش راه نسى بلي راضعين حليب حلال، باغي يوكلنا الرجيبة، الموكرو ماديرش هاد الضرابي الناقصين، البارون واحل ليها فالحلق ماتخسرش سلعة كبيرة
مراد: دابا رد البال لراسك تاحد مايعيق بلي كتقلب على السلاح، وخلينا ندوزو السلعة ديال الطاليان على خير
طه: غادوز غاهاد المرة عصام يشد عندو يدو، مافينا لي يلوح شي سلعة للحراكة ثاني، الديبوات خواو ماغاديش نبقاو نستناو فجبالة يقطرو علينا بالعشبة، ولدك مقروص غابوحدو ودايرليا الكالة، يا يخدم خدمة مقادة يا يتكمش
تنهد مراد : سير الله اديك علخير تالغدا وندويو فهادشي
باسليه اليد : الله ارضي عليك اولدي .
مشا راجع لعندها كيشوفها من بعيد كتحنقز غابوحدها فطموبيل عقد حجبانو تاقرب مزيان مع شافتو كانت ضاحكة جمعات راسها بزربة صامطة.
ركب وخبط الباب ديمارا كيقاد الكليم هضر بلاما يشوف فيها : فيك جوع ؟
سميرة: لا مافياش
حرك طموبيل بشوية داير دوميتور بلامايزيد الهضرة عاد كسيرا غادي يشد الطريق الرئيسية ديال الحسيمة .
بقات كتلوي فصبيعاتها والسكات طلعات عينيها بشوية كتشوف شاد الفلون بيد وحدة صايك بشوية كتبان فيه عيان الكانة باش يهضر ماعندوش، دورات عينيها لشرجم محرجة ومتوترة فنفس الوقت، هاد الصمت ماعجبهاش سيغتو انها كتحس براسها عاد دابا عاشت احساس زوين وعاد حسات براسها قريبة ليه بزاف شنو وقع دابا، رجعات شافت فيه بحال كتسرق شوفات وحنات راسها.
طول الطريق هاكاك مشاعرها مخلبطين صوتها الداخلي ماسكتش، مرة تصول صافي عيان خليه داكشي لاش مابغاش ادوي، مرة تقول لا يمكن دار داكشي غير باش نسكت، مرة تقول يمكن تنادم معاه الحال، ماقدراتش تفهمو ولا تعرف شغايوقع .
بقات ساهية فطريق دخلو لمدينة الحسيمة وبداو يبانو ليها الضواو والشوارع دنيا خاوية بحكم نص ليل، عرفات بلي هادي ماشي الناظور اكيد : شمن مدينة هادي ؟
طه بهدوء: الحسيمة
فتحات فمها كتشـوف من ديما سامعة بها كتعقل جاتليها مرات قلال وهي صغيرة ولكن ماعقلاتش عليها مزيان حياتها دوزاتها بين بني توزين والناظور ومرة مرة السعيدية وبركان .
طلع مع واحد الشارع تاوصل لواحد البلاصة فيها ڤيلات زوينين باينين دناس لاباس عليهوم وقف طموبيل حدا وحدة وسكت الطموبيل جبد قرعة دالما شرب منها ومدهاليها: شربي وتسناي تانعطيك ماتلبسي عاد نزلي .
خلاها كترمش : اويلي غانباتو فهاد دار بوحدنا ! انا وياه وبس (بفرحة) يا ربي نكون كنحلم
طلات عليه من المرايا كيبانليها كيهبط الحوايج لي شراهوم ليها من الكوفر، عضات شفايفها تاجا لعندها حليها الباب ومدليها واحد الجاكيت ديالو: لبسي هادي كاين البرد .
لبساتها وهبطات بشوية كتعكل فجلايلها سدات موراها الباب وتبعاتوً كيحل الباب دبرا بساروت، دخلو على واحد الجردة كبيرة هي ڤيلا شادا مساحة على دو فاصاد بزاج طويل من جناب منضرها زوين وموديغن اغلبية كيدوزو فيها الصيف سيغتو فحي زوين دايرين تما العساس.
بقات كدور فعويناتها تابعاه فتح ثاني الباب ديال لداخل كبير من الخشب، مع دخلات زادت توسعو عويناتها الدار عندها الفصالة ديال تركيا، الفراش غير المضخم والزليج بحال الرخام كيف برك على الضو تشعل فدار كاملة نطقات فنفسها
" واو "
عضات على شفايفها تبوريشة جاتها راسها بحالي تهزات وتحطات فديور ديال دوك تواركة لي كتفرج فسيريات ديالهوم .
بقات تابعاه وهو غادي حط الساورت ددار فوق الرخايم دصالون، وكمل كيتمشا داير يديه فجيبو طالع مع دروج لفوق تبعاتو كتشوف وتفحص تفاصيل مع وصلو لفوق زادت حلات عينيها ضحكات بلاما تحس : واااش عندكوووم لابيسييين فوووسط داااار
كان فعلا حوض واخد مساحة كبيرة وغارق ولكن خاوي بحكم ماكيعمروهش بالما غير لاكانو ايعومو فيه، جا كيطل على حيط كولو زاج
طه: البنات عندنا كيبغيو ياخدو راحتهوم فالعومان داكشي لاش الواليد دارليهوم هاد البلان .
بقات حالة فمها بصدمة وكتسمع لكلامو المهدن، كمل هو طالع لبلاصة ديال البيوت حل اول بيت قدامو : تقدري تباتي هنا
حطليها ساشيات لي جابليهامن برا: هادشي جبتوليك معايا شوفو واش يعجبوك لابغيتي بدلي بيهوم دابا غاتلقايني فالبيت لي حداك تصبحي على خير انشاء الله غدا ونهضرو.
خلاها فالبيت وخرج هو رمشات بعويناتها حسات بحالي زرب عليها ماخلاش ليها المجال فين تهضر وهي لي كانت كتضن بلي غايبات معاها فبيت وحدة وربما عقلها مشا لابعد من هاكاك.
تنهدات هازا كتيفاتها محيدة عليها الجاكيت كتشوف فالبيت كاتبان نقية موصين المرا كل مرة كتجي تنقي الدار وتجمعها وتمشي باش لي حتاجها يجي ليها، دار وحدة فالحسيمة لي عندهوم هي هادي ومراد لي كان بناها، شومبر كانت فالبيض وزربية بريش فالابيض الماريو مشات حلاتو لقات فيه شي حوايج دالعومان وبيجامات باينين ديال ايمان ربما مخلياهوم هنا ديالها تاباقي الطبقات خاوين، كلسات فوق الناموسية بكوفرلي بقات كتنقز فوقاها ورجعات ناضت مشات لشرجم حيدات رواق كان فالرمادي، كيطل على الشارع خاوي غير الضواو ديالو لي مشعولين، عضات على شفايفها فرحانة عجباتها البيت رجعات بدلات عليها وحيدات القفطان كتفكر فيه: زعما يكون عيان قالي غدا نهضرو غايهضرليا على هادشي لي وقع !
تنهدات فتحات الساشيات لي جابليها لقات واحد جوج بيجامات دالقطن سخان هزات منهم وحدة لبساتها جاتها كتحمق زوينة وسانبل فالزرق غامق، عجباتها وبقات كضحك حدا المرايا حيت اي حاجة منو بالنسبة ليها زوينة وكتزيد تخليها تحس بلي هي قريبة ليه
كملات ساشي لاخور شافت داك البواطة دصبايغ لي جاب تحلو عينيها وفمها بقات كتنقز وتعنقها غاتحماق طاح ليها على النقطة دالضعف وبلا عجز عليها خرجاتهوم، كاملين وفتحاتهوم كتجرب فرجليها حيت ديال يديها كانو مصبوغين، كل واحد دارتليه لون المهم تجرب كولشي، تنغمات عليهوم تابدات كتفوه حطات كولشي فالارض وتخشات فكوفرلي تنعس .
* طنجة
صباح جديد فاقت فيه باش تمشي للفاك مع خرجات كتلقاها خالتها شداتها: اجي ابنتي واش مابانتش ليك خولة لبارح
غيثة: لا علاش ماشي خدامة ؟
عيشة : الله يا بنتي اليوم ماجاتش كاع موالفة ليها تعطل شوية ولكن كتجي ليوم غبرات نصوني ليها ماتجاوبش
جابتليها الشك : والله ماعرفت اخالتي مايكون واقع ليها والو تقدر تكون غا عند شي صاحبتها
عيشة : ايوا نتمناو نتي فين غادا ؟
غيثة : عندي امتحان دابا خسني نلحق
عيشة : الله اوفقك سيري
حناتليها راسها وخرجات كتلبس السبادري كتمشا والبرد الضبابة تخشات فكبوطها كتسخن يديها مع غادور من درب قفزات راجعة بزربة كطل مور الحيط، تصدمات وعقنيها تفتحو .
خولة هابطة من واحد الميرسيديس، دارت الدورة باستو من فمو تاجبد عطاها الفلوس شهقات غيثة دايرة يديها على فمها بصدمة.
* الرباط
واقفين جيهت واحد الشرجم عالي فالكلينيك كيطل على برا نوضاتو شوية يتمشا باش مايبقاش غير فالشومبر، واقف على العكاكز وهي حداه : باش كتحس دابا شوية ؟
حركليها راسو وهو ساهي بزاف دالافكار فراسو كيشوف راسو كيفاش كان غايمـ ـوت وتكتابليه عمر جديد، تبسم منين عرف بلي خلا ريتال تعتقو باي طريقة .
شافت هاكاك كيفاش ساهي ومرة مرة كيتبسم: فاش كتفكر ؟
تنهد ماد عينيه: كنفكر بحال أي واحد تكتاب عليه عمر جديد
ريتال: عادي راه فكل نهار خسك تفكر هاكا، كنعسو ماكانعرفوش راسنا واش غانفيقو حيين ولا ميـ ـتين، خاسك تبرا أنا غانغبر عليك هاد اليوماين .
دار شاف فيها كيتمعن: علاش ؟
تبسمات: رضى غايتزوج ههه باقا الصراحة مامصدقاش، غايتزوج ببنت عمنا نيت.
دارت شافت فيه عضات على شفايفها ماعرفاتش لاش حسات بحالي غاضرو بكلامها يعني كيفاش هو ضحا بروحو على ود واحد منهم يبقا عايش وهوما دابا معرسين طبعا هي لي فكرات هاكا اما هو بلعكس شافها عادية دغيا كملات هضرتها: ماتخافش طه باقي من مور العصابة لي ضرباتك، ماغاديش يخليوهوم يمشيو هاكاك
تنهد: داكشي فيه روينة بزاف، ولي بغا يدير هاكا كان الغرض ديالو يوقع بينا وبين الموكرو
ريتال: اصلا طه ماتيقش هادشي قال بلي الموكرو مستحيل دير بحال هاكا هادشي داخلين فيه ناس كبار وماتخافش النسر بيدو غايطلع يقلب على منين جاي داكشي
صلاح: عصام بعدا لاباس عليه
ريتال: ماقدرش يتقبل هادشي لي وقع ليك كيحس براسو هو السبب
تبسم على كلامها: هاكا كيكونو الخوت واخا مايتشاركوش بـدـم
دارت كتشوف فيه: علاش ماعندكش خوك ؟ عائلة !
شاف فيها مطول: سيري حضري لزواج رضى ومنين ترجعي نفتليك كتابي
* الناظور
صبحو كولهوم تما جاو تالشي وقت من العرس كلها فين تلاح، الاغلبية فايق دايخ، حيت غايخسهوم ثاني يوجدو لضريب الصداق ديال نسرين ورضى، شي غادي شي جاي فطرو بعدا كاملين فجو من الضحك، موراها كلها فين ناض رحمة مشات مع شيماء تقضي آمور الطبوقة وداكشي لي بقا، حيت غدا يالاه يلقاو الوقت اعمرو داكشي ويتكلفو بالماكلة، العائلة مشتاركة يعني كولشي ديالهوم .
أمال كلسات مع إيمان لي عاودات ليها على كاع داكشي لي طرا معاها، كل خطرا تصدم مزال مامصدقاش هادشي يطرا ليها، حيت ماكانتش كضن أن ايمان ساهلة باش طيح ففخ بحال هادا، واش لهاد الدرجة تعمات ليها البصيرة، مابغاتش تزيد تكمل عليها ولا تزيد تحكم عليها حيت كانت باينة بلي داخلة فاكتئاب مكضحك ماوالو ذبلات فوجها بزاف حاولات غير تنسيها وطبطب عليها.
* الحسيمة
حلات عويناتها كتسلت بصبيعات رجليها حلات الباب وخرجات راسها كطل عاضا على شفايفها باقا الدنيا ساقلة والدار كلها مضوية بالشيع لي داخل من الشراجم الكبيرة ديالها زادت توضحات ليها الرؤية ومع كلها بيضة زادت بانت كثر، تفكرات البارح البيت لي قالت ليها وتمشات على قرون رجليها تاوصلات ليها مدات يديها حلات الباب بشــٰويّـة ودخلات كتسلل لقات ناعس على كرشو ناعس الوسط دناموسية، قربات كطل تاوصلات لعند وجهو ميلات راسها وتبسمات كترمش بحال الفارة، تفاصيل وجهو عندو واحد الزين قاصح لحيتو ماكثيرة ما قليلة بين وبين مبعثرة شوية جيهت الحنك ماعندوش مع داكشي ديال طراساج، عجبانو موالمين عينيه لي منين كيفتحهوم كاتبان نضرتو القوية، حتا وهو ناعسة طالق هالة الفخامة ديالو، طاحت فحب هاد الرجل لي صعيب توصلي لقلبو بحالي داير درع ماكيقدر تاحد يفوتو
نطقات بينها وبين راسها
" يا ربي شحال مهيب هاد الراجل حتا وهو ناعس"
بغات دور تسلت مور ماسرقات شوفاتها منو، ماحسات غير ويد طلاقات على المعصم ديالها جبداتها بجهد تاشهقات تلاحت على ضهرها فوق الناموسية رفعات عينيها مصدومة فيه، حشاها تحت منو وتكا عليها كيشوف نيشان فعينيها: شكون سمحليك تشتتيلي نعاسي هاد الصباح ؟ مم
سرطات ريقها يديها باردين بدات تلوي فصباعها: ففوقاش ك كيفاش فقتي
هبط عينو كيتفحص فوجها ورجع تبت عينيه فعينيها العسلين: كيصبحتي ؟
تبسمات على سؤالو بشوية وميلات راسها جنب: مالاباسش
علا حجبانو صوتو كان مبحبح وقاسح بزاف مع نبرة صباح كيدوي مهدن بجدية : علاش !
عضات على شفايفها ماعرفاتش منين جاتها هاد الضسارة ولاكانت الضسارة تديها لجهنام معاه هي موافقة علات صبيعات يديها وطقطقات بيهوم بشوية على عروق عنقو: حيت مانعستش بين يديك
مد عينيه بلا رد فعل على هاد البرهوشة لي مابقاش لايق يقول عليها برهوشة، لا ولات مرأة ناضجة بكلامها المغري لي كتعمد تغري بيه روجلتو وتجذبو ليها، هاد الطفلة الشقية تمادات كثر من الحق ديالها وكتنقر على الوتر الحساس.
طلع يدو وشد مزير على يديها لي كانو كيقيسو فعنقو وزير بجهد تاصافي قالت تهرسو صبيعاتها غوتات بشوية : احح كتقصحني
زاد زير كثر تابغات طلع اليد لخرا تفكها وشدها ليها تاهيا: فين باغا توصلي ؟
غبنات ملامح وجها ودبلات فمها: والو صافي مانقوليك والو
حنا بشوية لعند وذنيها: برهوشة كدير الفعايل فصباح ومرأة بشهوة ناضجة فلسانها وهادشي بجوج بدا كينغمني كتخليني نتخايلك فشي حوايج ماخاسش تكوني فيهوم، كيبانليا استفخت بيك نهار اللول
بعد شوية مد عينو لعينيها حناكها حمارو: لي يشوف حناكك مايعرف لسانك شنو كيخرج
سرطات ريقها كترمش فيه: غانمشيو ؟
ناض عليها خلاها قارنة فبلاصتها وقف فتح الرواق على الشرجم: لبسي حوايجك تانرجعو لدار ودوشي، كاينة واحد المناسبة
ناضت بزربة تابعاه كتسول بفضول: شكون ؟؟ شمن مناسبة عاوتاني ؟؟ فين واش فناظور ؟؟؟ عن..
دار مقاطعها سدليها فمها بصبعو ببرود: سميرة لبسي عليك ضرتيني فراسي
خرج مخليها هاكاك غاتاكل راسها وتدور فعينيها لبسات عليها سروال دجين واسع هو جابوليها وتريكو صوف مخلية شعرها مطلوق، عاودات قادات الساشيات كاع لي جابليها فرحانة خرجات هبطات لتحت لقاتو واقف حدا لابسين جرات دغيا وقفات حداه: كون غابقينا ماكرهتش نعوم
طه: كتعرفي تعومي ؟
حركات راسها بلا كتدوي ضاحكة: لا ولكن كنعقل منين كنا صغار كنمشيو مع بابا لسعيدية للبحر كان كيعجبني نحشي فيه رجلي
حرك راسو : دابا نرجعو
دارت عندو فاتحة عينيها بحماس طارت كتشدو من يدو : بصح بصح بصح عافاك عافاك هاد السيمانة
ضربليها عند جبهتها ودورها مخليها تعطيه بضهرها: منين غايكتاب وقتو راه غانجيبك
جمع شعرها بين يدو قلبها بدا ميضرب باغا تعرف شنو كيصنع
طه: هاد الشعر لاش طالقاه ؟
زمطات فمها مابغاتش تجاوب، جمعو بطريقة فنية على شكل كعكة وشدو بزغيبات من شعرها نيت مايوليش اتطلق، طلقها وتحرك هابط قاست بيديها على شعرها مصدومة: كيدار جمعو هاكا بلا بانضة !!!
هبطات تابعاه هزليها الحوايج وخرجات ركبات فرحانة، ركب داير نضاضر ديال الشمس ديمارا يدوزو يفطرو فشي بلاصة عاد يتحركو لناظور .
* الناظور
داز نهار طويل بتوجاد جمعهوم الغدا كلهم تغداو عند رحمة فالعشية وصل طه وسميرة وليل ريتال، مع حطات طموبيل لصقات فيها أمال باش تمشي تجيب غيثة من المحطة بحكم بزاف عليها الليل كامل وهي ترغبها منين كانت فالعرس هي صاحبتها لي كتيق فيها ونيت قريبة لرضى بغاتها تحضر.
دوزات الامتحان ومن تم نيشان للمحطة داكشي لي خدماتو خلصاتو مابغاتش تحشم بصاحبتها وهي عرضاتها فهاد النهار القريب، مشاو جابوها فرحانين وعاودات تعارفات مع ريتال للمرة ثالثة داوها معاهوم حيت شرطات عليها أمال بلي غاتبقا معاها.
كولشي تجمع فدار وحدة تامن يونس شدوه وانس امال غيثة دراري طلعو لبيت لي فسطح طلعو ايمان بزز وريتال يقسرو على الكارطة، جرو تاسميرة بقات تادوشات عاد طلعات لابسة بيجامة سخونة حناكها حومر وملوية شعرها بزيف حياتي، عندهوم دارو دائرة أما كتفرق فالكارطة : سمعو غانلعبو الحكام، لي خسر غايتحكم عليه
آنس: لا باش ديريليا بحال اخر مرة نتي غشاشة
ضرباتو بالكارطة: سكت سكت البرهوش راه نتا لي كتغش
ريتال: واخلااص ولا نوض بحالي شارفة ودايرة عقلي معاكم
امال: منيتك فين شارفة نتي عاوتاني لي قدك باقين عاد غايشوفو دنيا
دخل عليهوم شاد الكونطاكط فيدو: تريكة الحمير شكاديرو هنا
أمال: بزاف عليك
رضى : اديك البرهوشة راه باقي مانسيت اشنو درتي فيا
شاف غيثة تصدم وتبسم دغيا: اهيا شاكيرا هنا فين القرايا لاباس
حشمات مهبطة راسها ضحكات: لاباس نتا صاڤا
رضى: عاش من شافك
سميرة: ودابا شرحولي هادشي كيفاش انا ماموالفاش نلعب
أمال: دابا سمعي كنفرقو الكارطو لي حا فيه الجوكير خاس يغمز
رضى : سميتو لاس الغماز الكلخ
ريتال: ههه واش كيحسابك هادو البرومو ديالنا
رضى: ماكاينش الكارطة حيدي غانلعبو الحكام وتقرفيد، اري داك القرعة ديال الما
زاد وسع الدورة ديالهوم وكلس بين ريتال وسميرة مقابل مع امال وغيثة وايمان وانس فجناب
أمال: خوتي هادا عندو شي حكام مراض
رضى: شكون قاليك ماتحكميش البرهوشة وريني حنة يديك
ريتال: شوفو هادا هو اللعب خاس يكون قاسح باش اكون زوين ماكاين حشمة ماكاين والو
أمال: اييه واخا هاحنا غانشوفو انا حلفت عليك
انس: واخلاااص واه بناقص
امل دارت عند سميرة: شوفي هانتي غانلعبو بالقرعة الفم كيحكم والقاع كينفذ
حركاتليه راسها متحمسة وبداو كيلعبو دورو القرعة اول ماجات ايمان فانس : ههههه
ايمان بضحكة جانبية: سير دفل على عصام واجي
كولشي تفرشخ بالضحك انس شاف فيها مصدوم: منيتك واش بغيتي تبيتيني فالسبيطار !
ايمان : ماشغليش
بدا كولشي كيغوت نوضوه بزز مشا هابط تبعوه البنات كيطلو وديكشي لي كان سبو من السمطة لتحت وكان تابعو هرب ليه كولشي بقا كضحك رجعو دارو ضورة وجات ريتال فسميرة .
طه سمع الصداع طلع بشوية يشوف الجنون اش كيديرو مع دخل ريتال قشعاتو دارت تبسيمة شيطانية شافت فسميرة: نوضي بوسي راجلك