ပုဇွန်ဆီရောင်သန်းနေတဲ့ ညနေခင်းရဲ့ နေဝင်ဆည်းဆာအလှက ချစ်ရသူနဲ့အတူတူကြည့်ရတဲ့အခါ တန်ဖိုးကြီးတဲ့ပန်းချီကားတစ်ချက်အလား လောကမှာလှပါတယ်ဆိုတဲ့အရာတွေအားလူံးထက် သာလွန်နေသယောင် သိပ်ကိုလှပတင့်တယ်လွန်းနေတယ်လေ
အရှက်သည်းနေတဲ့အချစ်ငှက်ကလေးနှစ်ကောင်ကတော့ နေဝင်အိပ်တန်းတက်ရန် အသိုက်အမြုံကိုပြန်ဖို့ရာမေ့လျော့နေကြသလို ကမ်းနားတစ်လျှောက်ကဇင်ယော်ငှက်ကလေးတွေနဲ့အပြိုင် ရေပြင်ကျယ်ကျယ်ရဲ့အလှကိုတဝရှုစားနေကြလေရဲ့
နှစ်ဦးသားရဲ့နှုတ်ခမ်းထက်မှာ အပြုံးတွေကိုယ်စီချိတ်ဆွဲထားသလို မျက်ဝန်းတွေထဲမှာလဲ ပျော်ရွှင်မှူတွေပြည့်လျှံနေကြတယ် တစ်ဦးရဲ့နှလုံးသားကိုနစ်ဦးနားလည်ပြီးသားပေမယ့် လေးနက်တဲ့ ဖွင့်ဟခြင်းတစ်ခုတော့လိုအပ်နေသေးတယ်မဟုတ်လား
"ကျန့်အာ ငါ"
"အိပေါ်...ခုနက...နမ်းတာ..ငါ...အဖြေပေးတာမဟုတ်ဘူးနော်....ဒီတိုင်း...ဒီတိုင်း...ငါ့ကိုယ်ငါလဲသတိမထားမိလိုက်တာ"
"အင်းပါ ကျန့်ရ ငါသိပါတယ် ငါ...ကျန့်ဆီကအဖြေမရမချင်း ငါအတင့်မရဲပါဘူး"
"အင်း..."
"ဒါပေမယ့်...ငါ...ငါရင်ခုန်တယ်ကျန့်...ပြီးတော့...ကျန့်ကိုမြတ်နိုးတယ်...သဘောကျတယ်...ချစ်တယ်"
ကျန့်အာရဲ့ရှက်ရဲရဲမျက်နှာလေးကိုကြည့်ကာ ရင်ထဲကစကားတွေကိုတစ်လုံးချင်းပြောမိသည်
"ကျန့်ဆီကအဖြေပေးလာမယ့်နေ့ကိုစောင့်နေပါ့မယ်"
"ငါကဆိုးတယ်နော် အိပေါ် စိတ်လဲကောက်တတ်တယ် ပြီးရင် မင်းကိုအမြဲအနိုင်ကျင့်တတ်သေးတယ်"
"ဒါတွေအကုန်ငါသိပြီးသားလေကျန့်အာ ပြီးတော့ ကျန့်အာကို ဆိုးတယ်လို့တစ်ခါမှမတွေးမိဘူး ကျန့်အာကအနိုင်ကျင့်တယ်လို့လဲငါမတွေးဘူး"
"ငါကနောက်လဲအနိုင်ကျင့်နေအုံးမယ် ဆိုးနေအုံးမယ်ဆိုရင်ရော မင်းကချစ်အုံးမှာလား"
"ကျန့်ရဲ့အရာရာတိုင်းကို ငါလက်ခံတယ်"
သူ့ဆီကစကားကြားတော့ ကျန့်အာကခေါင်းလေးတဆက်ဆတ်ညိမ့်တယ်
"ငါပြန်လာတဲ့နေ့သေချာပေါက်အဖြေပေးမယ်"
"ငါပျော်ရမယ့်အဖြေလားကျန့်အာ"
"မပြောပြဘူး သိချင်ရင်စောင့်ပေါ့"
"ငါစောင့်နေမယ်"
ထိုညနေက ကောင်လေးနှစ်ယောက်ရင်ခုန်ခြင်းတွေကိုယ်စီနဲ့ အိမ်ကိုပြန်သွားခဲ့ကြသည် ဆင်တူလက်စွပ်လေးနှစ်ကွင်းရယ် အတူတူရိုက်ထားတဲ့ပုံလေးတစ်ချို့ရယ်ကတော့ ပိုင်ရှင်နှစ်ယောက်ရဲ့ ပိုက်ဆံအိတ်ကလေးတွေအတွင်းမှာနေရာယူလို့
အိပေါ်ကတော့ ကျန့်အာကိုချစ်တဲ့အကြောင်းတွေဖွင့်ဟလိုက်ရလို့ရော ဒီနေ့ကျန့်အာပါးလေးကိုမရဲတရဲနမ်းခွင့်ရတာရော ကျန့်အာဘက်က စတင်တဲ့အနမ်းလေးတစ်ခုကိုရလိုက်တာရောကြောင့် အိပ်ယာထက်မှာအပျော်လွန်ပြီးရင်တွေအတိုင်းဆမရှိခုန်နေသလို
ကျန့်အာကလဲ အိပေါ်ဆီကမမျှော်လင့်ထားတဲ့ချစ်စကားတွေကြားလိုက်ရတာရယ် ဒီနေ့ကြုံလိုက်ရတဲ့စိတ်လှုပ်ရှားစရာတွေကြောင့်ရော ရင်ခုန်လွန်းလို့ ညအိပ်မရတော့တဲ့အထိပင်
.
.
.
ဒီနေ့နဲ့ဆို ကျန့်အာ ချုံးချင့်ကိုလိုက်သွားဖို့ တစ်ရက်သာကျန်တော့သည် ဒီနေ့တစ်ရက်ပေါ့ တတ်နိုင်သမျှတော့ အိပေါ်နဲ့အမှတ်တရလေးတွေများများဖန်တီးသွားချင်သေးတယ် ဟိုမှာ သူတစ်ယောက်တည်း အိပေါ်အပေါ်မှာထားရှိတဲ့ခံစားချက်တွေကိုပြန်ဆန်းစစ်တဲ့အခါ အိပေါ်နဲ့ရှိခဲ့တဲ့အမှတ်တရလေးတွေကိုပြန်သတိရရင်း ထည့်သွင်းစဥ်းစားဖို့လေ
အမှန်ဆို အမှတ်တရတွေဆိုတာ မှတ်ထားဖို့တောင်မလိုတဲ့အထိပါဘဲ ငယ်စဥ်ကတည်းကအတူတူရှိခဲ့တဲ့ သူတို့နှစ်ယောက်မှာ ပြောပြစရာအမှတ်တရကကုန်နိုင်မယ်မထင်ဘူး ဒါပေမယ့် ဒါတွေက တစ်ယောက်ခံစားချက်တစ်ယောက်မသိတုန်းကအမှတ်တရတွေလေ တစ်ယောက်ကိုတစ်ယောက် သဘောကျနေတာ သိရတဲ့အချိန်လေးတွေကိုတော့ အမှတ်တရအသစ်တွေအဖြစ်သိမ်းသွားချင်သေးတယ်
"အိပေါ် မနက်ဖြန်ညနေ စက်ဘီးသွားစီးရအောင်နော်"
မနေ့က သူငယ်ချင်းတွေနဲ့နှုတ်ဆက်ကြပြီး အပြန် ကျန့်အာရဲ့စကားလေးကိုနာခံဖို့ အိပေါ်စက်ဘီးလေးကိုယူပြီး အိမ်ထဲကထွက်ခဲ့တယ် ကျန့်အာအတွက်ရည်ရွယ်ထားတဲ့အရာလေးတစ်ခုကိုလဲလက်ထဲကကိုင်ထားရင်းပေါ့ မားကတော့သူ့လက်ထဲကပစ္စည်းလေးကိုကြည့်ပြီးရယ်ကျဲကျဲပြောတယ် တော်တော်မွေးရကျိုးနပ်တဲ့သားတဲ့ ပါးကတော့ထုံးစံအတိုင်း လိုက်နောက်နေတော့တာပါဘဲ
ကျန့်အာတို့အိမ်ရှေ့ရောက်တော့ စက်ဘီးလေးကိုဒေါက်ထောက်ပြီး ခြံတံခါးကိုအသာတွန်းဖွင့်ပြီးဝင်တော့ နိုင်နိုင်းကပြုံးပြတယ် ရှောင်းအားရီကလဲ စကားပြောနေရာကနေလှည့်ကြည့်လာပြီး ပြုံးပြသည်
"အားကျန့်ဆီလားသား"
"ဟုတ်အားရီ"
"ဟုတ်ပါပြီ ဝေးဝေးလံလံလျှောက်မသွားကြနဲ့နော်"
"ဟုတ်ကဲ့ပါအားရီ စိတ်ချပါ"
"သားကိုစိတ်ချပါတယ်ကွယ်"
အာရီစကားပြောနေရင်း ကျန့်အာက အိမ်ထဲကထွက်လာတယ် အပြာနုနုရှပ်လေးကိုဝတ်ထားတဲ့ကျန့်အာက လူငယ်တွေရဲ့ သဘာဝအတိုင်း အရမ်းသစ်လွင်နေတယ် မျက်ခုံးတန်းညီညီလေးနဲ့ နှာတံချွန်ချွန်လေးတွေရှိတဲ့ မျက်နှာလှလှလေးကိုငေးမိတော့ နှုတ်ခမ်းလေးတွန့်ရုံပြုံးပြီး တစ်ဖက်လှည့်သွားတယ် ဒါကရှက်နေပါတယ်ဆိုတဲ့အမူအရာလေးလား
"အဟမ်းးး အကြည်စိုက်မနေနဲ့ သွားကြတော့လေ"
နိုင်နိုင်းကချောင်းဟန့်ပြီးပြောတော့ အိပေါ်ဂုတ်ပိုးလေးကိုအရှက်ပြေပွတ်ရတယ် ကျန့်အာက မျက်လုံးတောက်တောက်ကလေးတွေနဲ့ နိုင်နိုင်းကို မျက်စောင်းလေးလှမ်းထိုးတယ်
"ညမိုးမချုပ်စေနဲ့ အိပေါ်လေး"
"ဟုတ်ကဲ့ပါနိုင်နိုင်း စိတ်ချပါ"
"အားကျန့် နိုင်နိုင်းပြောတာကြားလား"
"ကြားသားပဲ"
"ဒီကောင်လေး ငါထုလိုက်ရ"
"အားးး အိပေါ်ပြေးမယ် လာ"
နိုင်နိုင်းကလက်သီးဆုပ်နဲ့ရွယ်တော့ ကျန့်အာက မူပိုပြကာ အရှေ့ကအော်ပြီးပြေးထွက်သွားသည်
"ခွင့်ပြုပါအုံး နိုင်နိုင်းနဲ့အားရီ"
"ကောင်းပါပြီကွယ်"
နိုင်နိုင်းနဲ့ ရှောင်းအားရီကိုနှုတ်ဆက်ပြီး ကျန့်အာနောက်ပြေးလိုက်ရသည် ခြံရှေ့ရပ်ထားတဲ့စက်ဘီးလေးကို ဒေါက်တင်ပြီး ကျန့်အာရှိရာနင်းလာတော့ ကျန့်အာက နောက်ထိုင်ခုံကနေခုန်တက်ပြီး သူ့ခါးကိုလှမ်းဖက်တယ်
ငယ်ငယ်က ကျောင်းကပြန်ရင်လဲ စက်ဘီးနောက်ကထိုင်ရင်း ကျန့်အာကခါးကိုဖက်ထားနေကျဆိုပေမယ့် အခုအချိန်လေးကပိုထူးခြားနေသလို ရင်ခုန်သံတွေက ကယောက်ကယက် ဖြစ်နိုင်ရင် ကျန့်အာဆီကအဖြေစကားကို အမြန်ကြားချင်မိပါရဲ့
ချစ်ရသူလေးကို ပွေ့ဖက်ထားချင်တယ် ပါးပြင်ဖွေးဖွေးလေးတွေကိုခနခန နမ်းရှိုက်ချင်မိတယ် လက်ကလေးတွေကိုဆုပ်ကိုင်ပြီး ကမ္ဘာကြီးအနှံ့ကိုလည်ပတ်လိုက်ချင်တယ် ဒါပေမယ့် ကျန့်အာက စောင့်နေပါ ဆိုတဲ့စကားလေးကြောင့် သူစောင့်နေပါ့မယ် ကျန့်အာသူ့ကို ချစ်တယ်လို့ပြောလာမယ့်နေ့ကို ဘယ်လောက်ကြာကြာစောင့်မယ် အသက်တွေကြီးလာတဲ့အထိစောင့်ပါဆိုလဲ စောင့်မယ် ဒါမှန်သောစကား
ငယ်ငယ်ကသွားဆော့ခဲ့ကြဖူးတဲ့ကန်ရေပြင်လေးကို စက်ဘီးပါတ်စီးရင်း အတွေးကိုယ်စီနဲ့ငြိမ်သက်လို့
စက်ဘီးနင်းနေတဲ့ကောင်လေးကလဲ သူ့အတွေးနဲ့သူအပြုံးတွေချိတ်ဆွဲလို့ အနောက်ခုံကနေ ခါးကိုဖက်ထားတဲ့ကောင်လေးကလဲ မသိမသာမြင်နေရတဲ့ အရှေ့ကကောင်လေးရဲ့အပြုံးလေးတွေကိုငေးကြည့်ရင်း နှုတ်ခမ်းလေးတွေ တွန့်ကွေးလို့
လေပြေနုနုလေးတွေ တိုက်ခတ်တဲ့အခါ နှစ်ယောက်သားရဲ့မျက်ဝန်းလေးတွေက မှိတ်ဆင်းလို့ လေထုရဲ့အရာသာကိုခံစားရင်း ကန်ဘေးက ကော်ဖီဆိုင်လေးကခပ်ကျယ်ကျယ် ဖွင့်ထားတဲ့(I do)ဆိုတဲ့ သီချင်းလေးကိုအပြုံးကိုယ်စီနဲ့ စီးမြောခံစားနေကြပုံမှာ မြင်ရသူတိုင်းအဖို့ ကြည်နူးဖွယ်ရာမြင်ကွင်းတစ်ခုသဖွယ်
သီချင်းလေးထဲကလိုပဲ ကျန့်အာဆိုတဲ့လူသားလေး သူ့ဘဝထဲရောက်လာကတည်းက သူ့ကမ္ဘာကြီးကပြောင်းလဲခဲ့တာ ဘာနဲ့မှမတူတဲ့ပြောင်းလဲမှုမျိုးနဲ့လေ
ကျန့်အာဆိုတဲ့လူသားလေးကိုပဲမျက်လုံးထဲအမြဲမြင်တယ် ကျန့်အာကိုပဲချစ်ရမယ်လို့ ကံကြမ္မာသတ်မှတ်ခဲ့လေသလားပဲ ကျန့်အာနာမည်လေးတစ်ခါကြားတိုင်း ရင်ခုန်တယ် ကျန့်အာလို့ခေါ်မိတိုင်း တစ်ခါတိုးပြီးချစ်ရတယ် ဒီလူသားပေါ် သူရူးသွပ်တာ မိဘတွေမပြောနဲ့ လောကနတ်မင်းကြီးတောင်သိလောက်တယ်
နတ်ဒေဝါတွေတောင် ကောင်းကြီးပေးမယ့် ဒီလူသားနှစ်ယောက်ရဲ့ချစ်ခြင်းက သိပ်ကိုရိုးရှင်းတယ် တစ်ယောက်ကိုတစ်ယောက်ချစ်မယ် သူ့အပြုံးလေးတွေမြင်ရအောင်ဖန်တီးမယ် ချစ်ရသူဖျားနာတဲ့အခါ ဂရုစိုက်ပေးမယ် ချစ်ရသူလက်ကိုဆွဲပြီး လောကကြီးကိုအလည်ပတ်မယ် အလှပဆုံးအပြုံးတွေနဲ့ပြုံးပြမယ် ပကာသနတွေမပါဘူး လိုချင်တပ်မက်မှူတွေလဲမပါဘူး အနှောင့်အယှက်တွေလဲမရှိဘူး
လူတိုင်းအားကျရတဲ့အချစ်မဖန်တီးချင်ဘူး အေးချမ်းတဲ့ ချစ်ခြင်းလေးပဲဖြစ်ချင်တယ်
ကျန့်အာလဲအိပေါ်ကိုသဘောကျတယ် သူ့ကိုယ်သူထပ်ပြီးသေချာချင်တာပဲရှိတာ ငယ်ငယ်လေးကတည်းက နေမကောင်းလို့ အိပေါ်ကဂရုစိုက်ပေးရင် အိပေါ်လည်ပင်းလေးကိုဖက်ပြီးချွဲလိုက်ရမှ သူ့ခြေထောက်တွေနာလို့ အိပေါ်ကုန်းပိုးတိုင်းလဲ နောက်တစ်ခါ ခြေထောက်နာခြင်ယောင်ဆောင်ပြီး အိပေါ်ကျောပေါ်လိုက်ရအောင်လုပ်မယ်လို့အမြဲတွေးနေတတ်တဲ့သူ သူခေါက်လိုက်လို့အပြစ်မမြင်ဘဲ ခေါင်းလေးကိုပဲပွတ်နေတတ်တဲ့အိပေါ်ကိုကြည့်မိတိုင်း ဒီသူငယ်ချင်းကို အသည်းယားပြီး ဒီထက်ဆိုးနွဲ့ချင်ခဲ့သေးတာ
ရင်ခုန်မှူတွေကဘယ်ကစလဲမသိပေမယ့် သေချာတာတော့ ငယ်သံယောဇဥ်တစ်ခုတည်းကြောင့်မဟုတ်ဘူးဆိုတာပဲ
ကန်ဘောင်ကို အခေါက်ခေါက်အခါခါ စက်ဘီးပါတ်စီးပြီးကြတော့ ကျန့်အာအမိန့်တော်အတိုင်း ညစျေးလေးထဲစက်ဘီးတွန်းပြီးလျှောက်လာကြသည် အရင်နဲ့မတူတော့ဘဲ ဆိုင်ကြီးတွေနဲ့ပြည့်နေတဲ့ ညစျေးလေးမှာ လမ်းဘေးမုန့်သည်လေးတွေတော့ ညဘက်ရှိနေတုန်းပဲ
ည ၇နာရီလောက်ရှိပြီမို့ ဒီချိန်ဆို ညစျေးမှာ မုန့်တွေစုံနေလောက်ပြီ
"အိပေါ် ပုဇွန်ကြော်စားချင်တယ်"
"အိပေါ် ဟိုးကတုတ်ထိုးချိုချဥ်တွေလဲစားချင်သေးတယ်"
"အိပေါ် ဟိုးးကအရုပ်ဆိုင်ဝင်ကြည့်ရအောင်"
"အိပေါ် ငါတို့ သီချင်းခွေဝယ်ရအောင်"
ညောင်းလို့ဆိုပြီး ခုံတစ်ခုမှာထိုင်နေတဲ့ ကျန့်အာက နှုတ်ခမ်းလေးဆူပြီးလက်ညှိုးထိုးသမျှ အိပေါ်အပြေးလေးသွားဝယ်ပေးတယ် အရုပ်ဆိုင်ထဲလဲ အရုပ်တွေသွားကြည့်တယ် မကြိုက်ဘူးလှလဲမလှဘူးလို့ပြောဆိုပြီး ပြန်ထွက်လာလို့ ဆိုင်ရှင်ကို အိပေါ် အားနာနာနဲ့ ပြုံးပြ တောင်းပန်ရသေးတယ် တော်သေးတယ် စာအုပ်ဆိုင်ဖွင့်ထားတဲ့ ကျန့်အာပါပါးရဲ့ အသိဆိုင်မို့လို့
မုန့်စားပြီး လည်ပတ်လို့ပြီးသွားတော့ သီချင်းခွေတွေရောင်းတဲ့ဆိုင်ကို ကျန့်အာခေါ်လို့ လိုက်သွားရသည်
"ငါသီချင်းနားထောင်ချင်တယ် အိပေါ် ဘာသီချင်းကောင်းမလဲ"
"ကျန့်အာ နားထောင်ချင်ရင် ငါ့ဆီမှာ အခွေတွေရှိတယ်လေ ယူမလား"
"မင်းအိမ်မှာလား အိပေါ်"
"အင်းပေါ့ ကျန့်အာသဘောကျမှာသေချာတယ်"
"မင်းကဘာသီချင်းကြိုက်တာလဲ"
"I do"
"ဟင်?"
"I do လေ အဲ့သီချင်းထဲကလိုပဲ ကျန့်အာက ချစ်တယ်လို့ပြောမယ့်နေ့ကိုစောင့်နေမယ်"
ရဲဆွေးသွားတဲ့မျက်နှာလှလှလေးကို တဝငေးရင်း ကျန့်အာ လည်ပင်းဆီ မာဖလာလေးပတ်ပေးလိုက်သည်
ကျန့်အာက မျက်လုံးလေးလှန်ကြည့်လာတော့ သူပြုံးပြလိုက်သည်
"လေတွေတိုက်တယ် ကျန့်အာရ"
"အိပေါ် ဒါက"
မာဖလာ အနားစလေးမှာ "战"ဆိုတဲ့စာလုံးလေးကိုတွေတော့ ကျန့်အာက လက်ညိုးလေးထိုးပြီးပြတယ်
"အင်းကျန့် အမြဲသိမ်းထားနော် ငါမရှိတဲ့အချိန် ဒီမာဖလာလေးက အနွေးဓါတ်ပေးလိမ့်မယ်"
သဘောတကျပြုံးတဲ့ ကျန့်အာက မျက်လွှာလေးတွေပါချလို့ မာဖလာပေါ်က စာလုံးလေးကိုလဲသဘောတကျကြည့်နေသေးတယ်
"သဘောကျရဲ့လား"
"အင်း...သဘောကျတယ်"
"ကျန့်အနားမှာ ငါအမြဲရှိနေမယ်နော်"
ခေါင်းလေးတစ်ဆက်ဆက်ငြိမ့်ပြလာတော့ ကျန့်အာနှဖူးပြင်ပေါ်မှ ဆံမျှင်လေးတွေက ပွလို့ ဆံပင်လေးတွေကို အသာ သပ်တင်ပေးတော့ ရှက်ရဲရဲမျက်နှာလေးက မော့ကြည့်လာတယ် လောကကြီးကအလှတရားအားလုံးနဲ့ နှိုင်းယှဥ်လို့မရလောက်တဲ့ထိ ကျန့်ကသိပ်လှတယ်
အိမ်ပြန်မိုးမချုပ်စေနဲ့မှာလိုက်တဲ့ စကားလေးက လေထဲလွင့်လို့ စိတ်ချပါလို့ပေးခဲ့တဲ့ ကတိစကားကလဲ ဒီလူသားနဲ့မှပဲ ဖောက်ဖျက်မိရတော့တယ် မဝေးခင်အချိန်လေးတော့ ခပ်ကြာကြာလေး ဒီမျက်နှာလေးကိုငေးချင်သေးတယ် မနက်ဖြန်ဆို ဝေးရတော့မယ်လေ
.
.
.
.
.
အရမ်းကြာသွားလို့ သွေ့ပုချိပါ 😔
Friendက ပြီးတော့မှာ အပိုင်းကသိပ်မလိုတော့ဘူး ရှိလဲ ၂ပိုင်း ၃ပိုင်းပဲ ကျန်တော့တာမို့ မပြီးချင်သေးလို့ပါ
အိပေါ်နဲ့ ကျန့်အာလေးကိုမခွဲချင်သေးလို့updateမလုပ်တာ😔
Friend(သူငယ်ချင်း)
Chris Ellina