وتيرة الاعرج

الوتيرة الرابعة والخمسون

وتيرة_الاعرج
بقلم : حوراء السعيدي

حبايبي لاتنسون التصويت من النجمه+التعليق
بين الفقرات + ومتابعة لحسابي .."🍂hawraalsaidi

ملاحظه قبل بدأ قرائة البارت ..
الي راحو تقرو مابيه اي مبالغه وفكرو بكل كلمة قبل لا تكتبوها ابطالي راح يقرون كلامكم بهذه البارت الي وصلي نصاً نقلته الكم واعتذر ع هذه البارت ..

-حنين: ماقبلو يدخل الغياهب اكثر من شخص واحد وانه لان اداوم هنا بالمستشفى كدرنه ندخل الها انمرد گلبي مرد عليها لحد الان اصفن اكول اختي شلون طلعت من هذه الحادث وانكتب الها عمر جديد بس مثل مايكولون ماكو شي صعب عند رب العالمين

اتقدم ابويه الها وهيه فاتحه عيونها بتعب تفتحهن شويه وترجع تغمضهن حاول ابويه يسيطر على نفسه بس ماكدر نزلت دموعه دنك بهدوء باسها براسها ..

-سلطان: بنيتي غياهب ريت الوجع بيه ولا بيج بابا شسويتي بيه

اباوعلها عيونها لمعت بدموعها ونزلن بهدوء بدون مايطلع منها صوت نزلت انظارها على بطنها بسرعة ابويه فهمها من عيونها ..

- عايشات عايشات بابا لا تخافين

غمضت عيونها كأنما جاي تحمد ربها حاولت تحجي بس باحرف متقطعه ..

-غياهب: ا ر س ل ا ن

- هم زين بس عنده كسور الحمدلله ماكو شي خطر عليه

- ا ر ي د اشوف ب بناتي

تحجي بصعوبه كلمة تطلع منها عدله وكلمة متقطعة رفع راسه ابويه عليه رجع يباوعلها يطمن بيها ..

- شويه تعبانات لان اجن قبل موعد الولادة وحطوهن بالخدج مابيهن شي يخوف

التفتنه على الباب والصوت الي جاي منه جان صوت ارسلان يصيح بصوته المليان تعب ضلت عيوني اختي على باب طلع ابويه اله اتقدمت الغياهب لزمت ايدها المجرحه ..

-حنين: يمكن يريد يشوفج وماقبلو

ضل صوته العالي نسمعه ويصيح عليهم ويكلهم ادخل وغصباً عليكم هَوُ غلط تصرفه هنا بس من حركة گلبه يريد يشوفها كبت الهوسه يم الباب بالنص ساعة لحد ما صار هدوء دقائق وانفتح الباب وفعلاً سواها ودخل الها ابتسمت بعز حزني سبحان الله نفس العناد ويباسة الراس هَوُ وغياهب

-سلطان: انه طالع مايصير نبقى هلكثر ارسلان المدير كال شويه وتطلع ماتتأخر

وارسلان وين تحسه فصل عن عالمنا ودخل بغير عالم جانو مكعدي على كرسي متحرك لان رجله مصبوبه وايده هم مصبوبه رحت من ورا قربت الكرسي على اختي طلع ابويه وانه ابتعدت عنهم شويه وكفت على جهه اباوع لهل الثنائي الي ماشافو الراحة بحياتهم

-ارسلان: ياحيل ارسلان ياروحه ودنيته انتِ

يجبر بنفسه يتقرب الها اكثر حد ماكدر يبوسها ويرفع بشعرها الواكع على كصتها نزلت دموعه ناسيني وناسي كلشي ثاني مره اشوفه تنزل دموعه على اختي من بعد يوم طلاكهم

- يوجعج شي

هزت براسها تطمن بيه طبك حواجبه ودموعه تتسابق يحجي بغصه وصوته يرجف مادري شلون خلو يجي وهَوُ بهل الوضع ..

- تجذبين عليه ماتريديني انقهر جاي تتأذين

حار شلون يلزمها ومنين يخاف تتوجع رجع باسها بكصتها همس مبتسم ..

- اجن سيرين ولارين اجن بناتنه

اتقدمت الهم ومجبورة اكيد مسحت دموعي الي نزلت على منظرهم ..

-حنين: ارسلان

رفع راسه وابتعد عنها شويه خجلان مني تحمحم ..

-ارسلان: اتفضلي ام الحسن

- مانكدر نبقى اكثر لازم نطلع

- هسه دخلت مالحكت اشبع منها

- بس اصبر ذني الايام وبعدها براحتك تشوفها محد يكدر يمنعك تعرف قوانين المستشفيات

هز براسه بقبول وجه كلامه الـ غياهب ..

- انه يمج تمام غياهب ارجعيلي انتظرج وبناتنه ينتظرونج خليج قوية ارسلان ولا شي بدونج

ختمها بكلامه وباس اصابع ايدها اخذته وايده بايدها لحد مابتعد تفارقت الايادي طلعنه من الباب جانو خوالي جايين والكل واكف عبالك عشيرة ماعدا ناز وخالها ماموجودين سلمو خوالي على ارسلان. يتحمدوله بالسلامة ..

-عمر: الحمدلله على سلامتكم

-جابر: مشافى ان شاء لله ابني الحمدلله على سلامتكم

رد عليهم ارسلان وصوته بعده بيه الرجفه ..

-ارسلان: الله يسلمكم

اتقدم عمر اخذه مني رحت وكفت يم درغام الي مقلص عيونه ويباوع الـ مجاهد ضربته بخفه بعكس ايدي التفت الي ..

-درغام: هاا شني لا تتحرشين احنه بنص المستشفى

-حنين: شكو تباوع للولد بهل النظره منتبها عليك من اجه للمستشفى لحد الان تباوعله هيج

- اكلج وماتكولين

- اي كول

- لا ما اكول لان انتِ فضيحه وهم الموضوع بعدني مامتاكد منه كلش

- تره انه احافظ على السر ابو الحسن
لا تضلمني

باوعلي ماعاجبه ..

- اسئل مجرب ولا تسئل حكيم

- وعلي شبيك ماتصدكني

- مصدكج مصدكج عود من اتاكد يصير خير

اجه مجاهد قريب علينه ..

-مجاهد: انه راح اروح محتاج شي ضلعي

-درغام: احجي الارسلان عن الي صار بالتحقيق ضروي يصير عنده علم

دار وجهه مجاهد يباوع الارسلان الي خوالي واكفين يحجون وياه بخصوص الحادث ورجع باوعلنه ..

-مجاهد: خلي مرته وبناته يطلعن بالسلامة بالاول واحجيله وضعه مو مال اناقشه بهيج شي

- اذا لزم الامر انه احجيله

- بكيفك بعد يلا في امان الله

- وين رايح

- عندي شغل

- شغليش

- بعدين اسولفلك

غمزله درغام بخبث وهَوُ يگله ..

- نسولف ليش لا اموت بالسوالف وياك ضلعي

- ديلا انجب اعرف شنو الي ابالك

- همزين تدري علمود لا اتعبني ولا اتعبك وجرب تجذب العب الغالي على الغالي

- دام ابوك هنا اروح اسئله سؤال ضال بنفسي وانتَ واحد ماكدر احجي مرتك واكفه

راح مجاهد جاب خالي جابر ووكفو كبالنه ..

-مجاهد: الله بالخير عمي

-جابر: الله بالخير والعافيه

- رايد اسئلك سؤال ضال بنفسي فضولي بعد مايسمح اسكت

- خير ان شاء لله

- ليش تسمي درغام سبع الهوره مايرضى يحجي شكد كناله يحجي مايحجي نوب احنه مشيناها عليه سبع الهوره تعال سبع الهوره امشي ومانعرف المعنى

ضحك خالي ويمسح على شواربه يباوع الدرغام بفخر ..

-جابر: ليش ماتحجي الاصدقائك

-درغام: خيولون يابه

-مجاهد: هسه تحجولنه لولا

رد عليه خالي ..

- سميته سبع الهوره لان ابني فعلاً سبع ومايخاف من شي وين ماتحطه يكلك انه كدها شجاع وهاي قبل بالهوره تصير خطره لان كلشي تلكه بيها والي يدخل الها ويطلع مابيه شي يتسمى سبع الهوره ودرغام وهَوُ بصغره شفت هل الصفات بيه يستاهل للقب وماغلطت من اطلقته عليه

-مجاهد: رحم الله والديك هسه ريحت گلبي وتريد الصدك ابنك صدك يستاهل هل للقب

نفس ريشاته درغام وضل يباوع بغرور كام مجاهد كفخه علابيه فتح عيونه درغام كوم ارجع رجعها عليه وكفخه هم صاح بيهم خالي ..

-جابر: ولكم بويه كبرتو شبيكم عبالك بعدكم صغار انتَ صرت اب وانتَ شكبرك بعد تصير ماتتزوج

-حنين: عنده حساسيه من النسوان خالو

مجرد حجيت هيج غصو بالضحك ضليت اباوعلهم ..

- احم .. خوماجفصت

كرص خدي خالي يضحك ..

- لا بعد خالج ماحجيتي اله الصدك

دار خالي على خالي عمران ..

-جابر: يمعود ابو نيروز الرجال طالع من الموت سوالفكم هنا جبتوها

-عمران: هنه كسرين كم يوم يرجع مثل الحصان

اخذ عمر ارسلان الغرفته وخالتي كالت اتروح لان متاخره على دوامها وابويه خوالي ضلو يلحون عليه يرجع للبيت يرتاح اقلتاً لان تعب بشكل ..

-سلطان: يابه شلون اروح وبنتي تبقى وحدها

اجه عمر بعد مارجع ارسلان سمع كلامنه ..

-عمر: عمي لا يضل بالك ناز راح تبقى ويا غياهب

-حنين: شبيكم تره انه هنا

-جابر: بابا انتِ راح تنشغلين بدوامج ولزوم احد يبقى يم اختج

- هيه وينها ناز شو اختفت

-عمر: راحت هيه وخالي يجيبون شغلات غياهب وشغلات بناتها من سلمونه اغراض ارسلان انطونه المفاتيح من ضمنهن

-درغام: خوش حجي عمي سلطان هسه بعد ماعندك حجه ارجع للبيت ارتاح وهم غياهب هسه محد يكدر يشوفها براحته

بعد اقناع صعب كدرو ياخذونه وحلفني كل مايخابر اجاوبه واحجيله الصدك ماضم شي عنه راح الكل حتى مجاهد بقى درغام وعمر واكفين بس ..

-درغام: راح اروح يم ارسلان وانتِ روحي الشغلج لا تخلين تصير نقطه عليج

-حنين: بس لا تبقى تطلعلي كل شويه عوفني اشتغل براحتي

- بحالج انه علساس

- هه واضح

ضحك عمر علينه استحيت منه سكتت ..

-درغام: شو ارسلان ماطلب يشوف بناته ؟

رد عمر عليه ..

-عمر: كلتله يكول خلي غياهب تتعافى وانشوفهن سوا لان تضل فرحتي ناقصه اذا اشوفهن وحدي

-حنين: تدرون سموهن سيرين ولارين

-درغام: هسه احنه شلون نميز بينهن وهنه وجه واحد ياهي سيرين وياهي لارين

-عمر: احم .. شفتوهن

- اي بنات اخوك جنهن امهن وخالتهن فرد وجه واحد

ابتسم عمر ..

- الله يحفظهن .. نسيت اكلك ارسلان يريدك

- عرفت راح يطلب يحجي وياي يلا تعال انروحله .. وانتِ حنين لشغلج

راح الولد اله وانه بديت بشغلي انوار مابينت اليوم ماكو استغربت خابرتها ..

-حنين: شنو وينج الدوام من شوكت بدأ

-انوار: مريضه والله اليوم ماكدر اجي

- سلامتج لعد انتبهي النفسج

- شلونه وضع اختج بالي يمج اعذريني بس والله من رجعت من الدوام والمرض لزمني

- معذوره .. الحمدلله اتجاوزت مرحلة الخطر

- الحمدلله

سديته منها ماطولت لا يجي هذه المدير يطنطن فوك روسنه واحد قنقينه بشكل خانكنه خنك ..

-درغام: ها خويه

-ارسلان: شصار على موضوع الحادث

- جماعتك لزمو صاحب السيارة

- وشطلع وياكم مظلوم لو مقصوده ؟

- مقصودة

- سالم ؟؟

- اي

- ايا كلب عرفته .. السايق مايعرف شي عنه

- داكه مجاهد دكه معدله بس ماطالع شي منه غير الي مكلفه. بسالفة حادثكم سالم الكو***

- اسمع درغام هذه اكو واحد جاي يساعده ومو شاك لا متاكد سالم مايكدر يسوي كلشي وحدة وهَوُ مطلوب للقانون اكو ايد جاي تساعده بتنفيذ خططه

- ابالك احد ؟

- ثائر

- ماتوقع لان انه جبته وهم دكيته ماطلع منه شي غير الرقم والرقم متخلص منه هم سالم

- ثائر يعرف بشي وضامه

- اذا هيج الحجي راح ارجع استضيفه معناها يمنه

- سويله سبرايز وبالليل لا تطلعوله بالنهار بالنهار كلشي مكشوف

- هايهيه

- درغام سالم اهواي لعب بذيله صار لازم ينكص هل الذيل عمك عمران هم حجه وياي بخصوص الحادث وعقله راح يوكف عن مكان سالم

- دخل الزمه انعل والديه الي مايكص هل الذيل

-ناز: دخلنه البيت ارسلان اخذ اغراض البنات الي جانو مشتريهن جبناهن ويانه للبيت اخذ كم قطعة منهن لان مشترين اهواي ماشاء لله للتوأم واغراض الغياهب وارسلان ووجهي بعده مبوخ من اخر موقف صار بالمستشفى

بقى خالي كاعد جوه وانه صعدت و بديت اجهز بيهن متت بملابس الاطفال الي جايبيهن يخلنك تشتهي غصب عنك يصير عندك طفل

دك جهازي وهَوُ بجنطتي عفت الجنطه على النص ملابس مال التوأم حبيبات عمتهن طلعت الجهاز جان رقم منو هذه انه رقمي بس عند اهلي و ماعندي صديقات وانطيهن الرقم فتحت خط ..

-ناز: الو

ماكو صوت بس صوت هوا قوي عبالك احد جاي يسوق رجعت كررت كلامي ..

- الو تسمعوني

انسد الخط سويت حركة بشفايفي مال تعجب ذبيت الجهاز يمكن واحد مشتبه بالرقم رجعت اكمل اغراضهم حد ماكملت نزلت جوه شفت خالي خطيه متمدد على القنفه ونايم حطيت الجنط بالكاع باوعتله محتاره اكعده لو يبقى نايم بس مضطره همست ..

-ناز: خالي

بسرعة فتح عيونه حمر فركهن وكعد ..

-كُميل: كملتي خالي

- اي

- چا يله خلي انروح علمود ارجع للبيت اناملي كم ساعة راسي مو الي والزهره مانايم البارحة للصبح

اخذ الجنط وطلعنه رجعنه للمستشفى لاكانه يم الباب مال المستشفى زوج حنين طالع سلم وراح دخلنه جوه بالبداية دخلنه الارسلان جان نايم بس عمر كاعد يمه ..

-كُميل: شافها ؟

-عمر: اي وصارتلك ذيج الهوسه والعركة وياهم ودخل كوه عليهم بس ماطول يمها

- المهم شافها وارتاح

- خالي بعد ما اطلعه وين اكو واحد ماصارله يومين طالع من الموت يسوي سوايته

- اتحمل چا موزين منه ضل بهل العقل اخوك زين منه ومافاقد عقله على المار بيه من طفولته لليوم

- كلهن مچودرات بگلبه

زفر نفس بحسره خالي وهَوُ يباوع الارسلان النايم ..

- تهون خالي تهون

-ناز: جبتله ملابس

-عمر: فدوه للنادره حبيبة اخوها

-ناز: متوجع ارسلان ؟

- شلون مايتوجع وهَوُ مايكعد بكاع الله ويرتاح

-كُميل: انه رايح للبيت عمر ارجعلك بالليل مسطور سطر

- روح خالي اساساً ردت اكلك وسبقتني واذا البنات كللك يجن وياك لا تجيب وحدة هسه اله لمن يسمحون انشوف غياهب على راحتنه لان نيروز خابرتني تريد تجي وكتلها مايقبلون احد يشوفها انتَ هم كللها هيج

- بعدك على قرارك

اخذ الجنطه عمر وحطها على جهه يجر حسره ورا حسره شك گلبي بيهن ..

-عمر: للابد واتمنى ماتحجون بيه بعد هذه قسمتنه من رب العالمين وراضين بيها المهم مرتي عندي مايهمني يصير عندنه طفل

- هايهيه براحتك خالي انتَ اعرف بمصلحتكم

طلع خالي بقيت يم عمر شويه اخاف اكله حجيت ويا العلويه تنطيكم طفل ويصير غير شي من فكرتلها شفت طلبي جان غلط مهما كان يبقى طفلها والگلب يضل يحن لبزره وعمر من المستحيل يقبل خصوصاً بعد ماشفت ردت فعله بموضوع التبني الي اقترحو ..

بدأت الايام تمشي بالمستشفى غياهب وضعها شوي شوي صار يتحسن وتحن وتون على بناتها تريد تشوفهن ارسلان مكابلها واهلها ماعايفيها واحد يروح وواحد يجي خلص الاسبوع وباجر يطلعون من المستشفى همه وبناتهم وضعهن هم اتحسن لليل صار لقاء عائلة الاعرج ببناتهم

جان الكل موجود ابو غياهب وخالتها واختها وزوجها وارسلان كاعد بصفها وينتظرون بلهفه وشوق عيونهم على الباب ..

-غياهب: شلون تحملت ماتشوفهن لو انه ماتحمل

-ارسلان: العيونج اتحمل المايتحمل عزيزة عيوني رغم هنه قطعة من روحي بس جبرت نفسي اتحمل واشوفهن وياج اريد اعيش كلشي وياج لحضه بلحضه

ابتسمت غياهب اله وعيونهم ينقط منها الحب واحد يتحدا الثاني بضراته ويحجيله بعيونه ويكله انه احبك اكثر دخلو جايبين البنات والكل فرحان حطو وحدة بحضن غياهب الي ما ادري شلون اوصف ملامحها وجها الحياة ضحكت الها رادو يحطون وحدة بايد ارسلان ورد عليهم بتوتر وهَوُ يباوع الهن ..

-ارسلان: لا خاف ماسيطر عليها بايد وحده

حطتها الممرضة بمكانها وغياهب عيونها مدمعه تباوع للبنيه الي بحضنها ومبتسمة بكل فرح ..

-غياهب: اجمل شعور يعيشه الانسان هيه لحضة من يحطون قطعة من دمك ولحمك وروحك بين ايديك شعور الامومه الي تحسه وتعيشه بحياته مايتكرر خص من يكون اول مره دخلت اصبعي باصابع بنتي الصغيرة اريد اضمها بنص روحي اتمنى اكون ام حنونه واعيشهم طفوله احسن من طفولتي انطيهم الحب والحنان الي نحرمت منه التفتت اباوع للثانية فاتحه عيونها وتحرك بيهم ارسلان مكابلها

-ارسلان: عيوني تركزت على الشامه الي بايدها صايره ماكدرت اضمها جنت اتمنى اضمها الصدر ابوها واستنشق عطرها عطر البرائه الي بيها

انعام رب العالمين لا تعد ولاتحصى انطاني غلطت غلط بس ماقصر وياي اهواي فضل على عبده رفعت راسي اللانسان الي الها فضل جبير بحياتي هيه السبب الاساسي بتغير كلشي جانت تباوعلي وبحضنها وحدة
من ورداتي ..

-ارسلان: الي بحضنج سيرين والي يمي لارين

ضحكت ودموعها تنزل ..

-غياهب: نسخة وحدة شلون نفرق ؟

رجعت عيوني على لارين الگلبي يضل يرف الها مجرد اباوعلها ..

- عندها شامه بكف ايدها

طلع الكل بقينه انه وياها عيوني ماجاي تشبع منهن هل المنظر عندي يسوا كلشي منظر ادفع كلشي عندي لو لزم حتى عمري بس اعيشه بكل تفاصيله ليوم واحد منو يصدك طفل مثلي عاش طفوله مامفهومه ماشاف بحياته غير الجرائم والحقد الي تغلل بداخله اليوم اب وصارت عنده عائلة فرحان بيها ماحسيت نفسي مصدك اريد شي يثبتلي انه الجاي اعيشه واقع مو حلم

-غياهب: ههههههه ارسلان ممصدكه بين ايدينه بناتنه مجاي اكدر اعرف اوصف شعوري وفرحتي انه غياهب صرت ماما

- اجمل ام بعيوني

- اممم اخذات بياضك واتوقع يعني اتوقع راح ياخذون شعري شوف من هسه شعرهم حلو

رجعت انظاري الي تتنتقل بين سيرين ولارين مثل ماكالت غياهب ..

- نعمة الله عليه انتِ وبناتج الي

ضلت دموعها تنزل بدون توقف وهيه تباوعلهن احسها مثلي مامصدكه ..

- ليش تبجين يحيلي

- دموع فرح والله ممصدكه شكد حلو عوض رب العالمين

- اممم شو لارين اتربعت بالگلب اكثر

- ها بدينه بالتفرقه

- هههههههه شوفي الشامه الي بالايد تخبل ياروح ابوها

-غياهب: صفنت بيه سبحان الزرع التعلق بهل الطفلة بهل السرعة بينها وبين ارسلان بحيث بقى بس مكابلها حتى سيرين ماتقرب الها بكد ماتقربه صار الارين مدنك عليها ويحجي وياها بهمس ..

-ارسلان: شنو هاي باباتي شو تعلكت روحي بيج فدوه اروحلج يابعد هلي

- شنو هل الاصابع اكلهن هسه باباتي حبيبتي

الثاني يوم طلعنه من المستشفى متوجهين البيتنه بس من وصلنه تغير كلشي ابويه گال ماتبقون ببيتكم لان وضعكم بعده مامتشافى على الاخير وانتم عندكم توأم اصر نبقى عندهم ارسلان رد عليه ..

-ارسلان: عمي لو تخلينه نروح الاهلي مو احسن مانريد نتعبكم

-سلطان: ماكو اي تعب بنتي وبناتها عيوني الهن

- يعني تقصد بكلامك تكلي روح بس انتَ الاهلك

ضحك ابويه ..

- اتفضلو اتفضلو اخلص من المزنجر يطلعلي الاعرج

دخلنه جوه ارسلان يمشي على عكازه بعده مافاتح التچبيس خالتي ويانه واهل ارسلان طلعو البيتهم ناز ماقصرت ويايه بهذه الاسبوع

كعدنه وبناتي حطيتهن وحدة بصف الثانية اجه ابويه كعد بصفهن ..

-سلطان: يذكرني بيج انتِ وحنين اول ماصرتن

-ارسلان: رجاءً بناتي لحد يحتك بيهن

باوعله ابويه بتك عين ..

- شيخلصنه بعد

هنا سمعه ارسلان رجع رد عليه ..

- انه اب غيور مثل بعض الناس

-وجدان: الله يحفظهن الكم وتكون بداية السعادتكم هل المخلوقتين

-ارسلان: يحفظج النه عمتي الغالية

- حضرت الكم غرفة هنا جوه لان مو مال تصعدون وتنزلون وانتم بعدكم تعبانين

-غياهب: تعبناج خالاتي

- عيوني الكم

كام ارسلان من مكانه وابويه كام كعد بمكانه يم البنات ..

-ارسلان: حطي وحدة بحضني ماتحمل بعد گلبي طك اريد اضم وحده

- لارين لو سيرين

عض شفته يباوعلهن بحيره ..

- اختيار صعب غياهب خاف اشيل وحدة وتزعل الثانية يكولون الطفل يفهم بدون مايحجي

- ههههههه عندي فكرة

- شنيه

- تاخذ وحدة ورا الثانية

- خوش

شلت سيرين حطيتها بايده وهَوُ زين سيطر عليها بايد وحدة لان مكمطينها دنك باسها على كيفه يخاف تتحسس ..

- شنو هل الترافه بابا

- يلا عيني ست لارين تنظر حضن بابا هم

- اله هاي روحي بيها

ضحكت اخذت سيرين منه رجعتها المكانها وحطيت لارين بحضنه يشم بيها ..

-ارسلان: حتى لو كبرتن ما انطيجن اخليجن كدام عيني

ضل طول اليوم مكابلهن واذا يبجن هَوُ اول واحد يطفر بينه رغم وضعه لليل اجو اهل ارسلان النه وانسام وياهم من زمان ماشايفتها وخوالي هم ..

-رماد: دشووف الجمال خرب بعرضجن مو
ابن حنين المزنجر راسه مصلبخ

-حنين: ذني بنات والبياض حلو عليهن بعدين انه ماحب الرجال الابيض كلش

- هسه انتِ صاحلج وكلتي لا غير رجلج مزنجر عبالك دهن سيارة وابنج مثل ابوه

-درغام: زلم حوك احنه

-رماد: تسبحون ماتسبحون يبقى لونكم واحد

اباوع للبنات غرام وناز كوه مصبرات نفسهن مايضحكن لان الكل كاعد سراج يمشي ويوكع لحد ماوصل الارسلان رفعه ارسلان بايده كبل سراج حضنه ..

-كُميل: خالي لا تتقرب لبناتك وابني موجود لايموت من غيرته

اجت مليكة باستني وتباوع للبنات ..

-مليكة: اللهم صل على محمد وآل محمد يحفظجن الرحمن يابعد بيتي

-عمر: مليكة خلي اشيلهن يعني يصير

-غياهب: اي عادي

كامت نيروز من مكانها اخذت سيرين حطتها بحضن عمر وكعدت بصفه فرحانه بيها ..

-نيزوز: شوف شعرها عمر

رفع عيونه يباوعلها ويشوف فرحتها
من لمست هل الطفلة كلنه انتبهنه الهم بس
ما بالايد حيله كام رماد اخذ لارين ..

-غياهب: رماد على كيفك لا تنمتن

رفع راسه الخاله حياة الكاعدة تباوع الابنتها بقهر ..

-رماد: يمه دامج بعدج شابه جيبيلنه فريخ نلعب عليه

-عمران: ناوشوني نعال

- شبيك سيد الوالد بعدكم شباب اريد اخ اخت العب عليه بالبيت مكابل الحيطان واذا ماتسولي زوجوني بعد كبرت انه وصرت طالب جامعي

-حياة: عمران اناوشك النعال لو لا

-عمران: ابنج جلده يحكه واستهتر اكثر
من دخل جامعة

-رماد: هسه شكلنه

-ارسلان: يلا رماد رجع بنتي مو خذاك الواهس

-درغام: استلم اجانه سلطان ثاني بالعائلة

-سلطان: شبيه سلطان

- تاج على الراس بعد هذه ابوووو مررررتي

كام ارسلان وأشر الدرغام يجي ورا طلعو بره انه بعدني ماكدر اتحرك اهواي بقيت كاعدة بمكاني بس ضل بالي يمهم جابو الضيافه خالتي وحنين ..

-غرام: اريد بنيه

-غياهب: مارحتي للسونار

- لا بعدني

دخلت حنين ويانه وناز تباوع البناتي تريد تاخذ وحدة بس وين اخذوهن فلاحه ملاچه عمر ونيروز لازمين وحدة ورماد لازم وحدة ومايقبل ينطيها

-حنين: تتنسين على شي حامض لو حلو

-غرام: حلو

- بيج بنيه

-غياهب: ام زكي استقري

-حنين: ههههههههه بباب الحارة شفت اذا وحدة تتنسى على حامض يعني البيبي ولد واذا حلو بنت

- مو كتلج ام زكي

- لعد ارسلان ودرغام شعندهم طلعو

- مادري ممكن عندهم حديث خاص

- هسه وكت خصوصياتهم ميشوفون فرحانين ومنجمعين كلنه

انتبهت الـ غرام صافنه على عمر ونيروز وذبتلها حسره بهدوء كل ضني مقهوره على نفس السبب الي كلنه مقهورين عليه ..

-حنين: بيج شي علويه

ابتسمت ابتسامتها الي تزيدها جمالاً ..

-غرام: لا مابيه شي شويه تعبانه

-غياهب: جان بقيتي ماجيتي

- غير من جنتي بالمستشفى سحلنه روحنه سحل علمود نجي وماقبلو حتى عمر الحباب قفل بالبداية كالو من يتحسن وضعهم بعدين كلبو كالو من يطلعون من المستشفى

-انسام: شهيتني احبل شني عمي ذني بنات اخوي يكول كيك

ردت اجاوبها وصرخ ابن حنين باوعنه جان رماد لازم ايده يضحك كامتله حنين شالته والولد مفرفح كام خالي عمران جره من اذنه ولارين بحضن ناز..

-عمران: شسويت للطفل

-رماد: ماسويت شي بس عضيته

كفخه خالي على راسه ..

- ولك طفل شتعض بيه

- اجتني مشاعر حب اتجاها وعضيته شكو بيها هسه عضه قابل شمسوي

-حنين: والله اله اكول الدرغام عليك اصبرلي بس يرجع

- ديلا يلا هسه شسوينه

سحله خالي من ياخته كعده بصفه وابن حنين شيسكته بعد بيه شغلة اذا يبجي بعد مايسكت حد مادخلو الولد ارسلان ودرغام شاف ابنه يبجي اجه عليه اخذه من امه

-درغام: شبيه ليش يبجي عفته مابيه شي يلعب

خزرت حنين رماد ضايجه منه ..

-حنين: رماد عضه

بسرعة باوعله ذب ابنه على حنين وركض عليه كام يضرب بيه وهذاك بس يضحك ..

-درغام: زمال لا تصير رماد

-رماد: هيه عضه شكو كبرتوها

- انجب اشوفك. بعد تتقربله اطيح حضك

عافه ورجع اخذ الحسن يسكت بيه وهذه مثل امه مكروص حسره الواحد يسويله شي اذا مايخبص الجو وكل شويه واحد مرزل رماد صار دوشك رزايل وهَوُ مامهتم ياكل ويضحك

رجعو البنات يمي حطوهن نايمات وارسلان اجه كعد مكابلهن كام ابويه من مكانه وكف قريب عليهن طلع من جيبه علبتين صغار فتحهن جانن تراچي ذهب ناعمات قدمهن الهن كل وحدة حط على صدرها هديتها ..

-سلطان: احتاريت شنو اجيبلهن بالاخير ماطلع وياي اله هل الشي

-غياهب: حبيبي بابا ليش زحمت نفسك

- حبيبات جدو ماكو اي زحمه وتعب

كامو خوالي همه حطو على صدرهن فلوس دلاعه الهن وخالاتي نفس الحالة كام الخال وغرام حط ورقة يم سيرين وورقة يم لارين باوعله ارسلان ..

-ارسلان: شنو بس ذني ؟

-كُميل: چا شتريد

- من صار سراج ماقصرت وياه وهسه تحطلي ورقتين يم بناتي انه منك اطم روحي

-غرام: انطيت خير من الله نحجي الحق

- رحم الله والديج

عضيتله شفتي يسكت استحيت من كلامه دنكت راسي وهَوُ فلا سكت ضل يداهر بيه ..

- شبيك ناقص فلوس عندك معرض سيارات دولاوات تستلم وحاط دلاعة بنياتي ورقتين والله عيب عليك ياخالي

-درغام: چا شكثر تريد وين اكو واحد يتشرط

-ارسلان: بس انه

ضحك الخال رجع طلع ورقتين هم صارن اربعه حطهن يم البنات ..

-كُميل: بس السانك الزمه .. يتربن بعزكم ودلالكم خالي

-غياهب: شكراً الك

اتقدمو حنين ودرغام هم جانت هديتهم فلوس اما عمر ونيروز جانت هديتهم مجموعة من الهدايا وهم وياها فلوس شوكت لحكو يشترون هل الهداية وانسام وياهم رجع كعد الكل كام رماد بايده علاكه ضلينه نباوعله مد ايده للعلاكه مطلع منها جواريب حطيت ايدي على حلكي ماكدر اضحك بسبب عمليتي

-حنين: بشرفك جايب جواريب هدية ؟؟

-رماد: ليش اكو احسن من هل الهدية ؟

- جوواريب جوواريب شهل البخل هو الجوز يكتل روحه بالف دينار

- حياتي ذني ماركه

-درغام: راح اكوملك السانك الزمه

- ست چفصه نقصد اي شبيك ماتتفاهم

دنك على البنات يبوس بيهن مايبوس عدل جنه خبل دفعه ارسلان منهن ..

-ارسلان: استغفرلله شبيك ولك

- ريحتهن طيبة والعباس

-درغام: لطش بعد

- زوجوني لا اسويلكم سالفه اريد وحدة جمالها يشك المطي

جاوبته خاله حياة ..

-حياة: كلشي يطلع منك انتَ

-رماد: چا زوجيني اريد منهن شوفي الخدود والريحة الطيبة

-ارسلان: عود ذني الجواريب ماركه شني وين اكو جواريب ماركه مبين جايبهن من الباله بربع دينار

- والعباس جبتهن من صاحبي وكالي ذني ماركه علساس هسه يطلع يضحك عليه اله انعل والديه

ضحك الكل ورجع المكانه وهَوُ يگول اذا طلع ضاحك عليه اطلع كل فلس دفعته من خشمه انتبهنا كلنه على مليكة من گالت ..

-مليكة: يمه سلطان رايدتك بحجايه

-سلطان: اتفضلي حجيه

- انه ادري انتم ماتقصرون ويا بنيتكم وبنياتها بس انه اشوفن لو غياهب تجي يمنه وانداريها والبنات يمي ماعندهن شي انتَ رجال تصيرلك طلعه والجهال يريدون اهتمام ومريتك هم بالدوام

ضل يباوعلي ابويه رجع گاللها ..

-سلطان: الي تريدي ام كُميل اخذوهن صح كلامج لان غياهب عمليتها جديدة وبناتها يريدن رعايه

- خافنك صار بخاطرك عليه امشيه عليك الزهره لا تزعل

- لا حجيه على بختج احنه اهل وماكو فرق بينه ان شاء لله

دارت علينه الحجي مبتسمه ..

-مليكة: وانتِ يمه شني رأيج

-غياهب: بكيفكم ماكو فرق سواء هنا عند اهلي او عندكم اثنينكم ماتقصرون

-ناز: يايييي يعني راح تجون النه

كامو البنات يحضرون باغراضنه علمود نرجع ويا اهل ارسلان طلعنه من بيت اهلي امشي على كيفي واعرج على كولت حنين مادري شلون طلعتو من هل الحادث ..الحادث الي ماسئلت عنه لان متاكدة الي ورا سالم

صعدنه انه وارسلان والعلويه ويا الخال وناز ونيروز وانسام ومليكة ويا عمر ودعنه ابويه الي شفته ضاج بس يدور راحتنه ..

-سلطان: ديري بالج على نفسج وعلى بناتج

-غياهب: ان شاء لله

طلعنه من فرع اهلي وحدة من بناتي بحضني ووحدة عند غرام سراج يم ارسلان كعدناه وكل شويه داير وجهه يباوع للبنات ويأشر عليهن بكلام ممفهوم منفهم غير كلمة داده

وصلنا ناز فتحت الباب فرحانه نزلت على كيفي ارسلان واكف ويباوعلي اجه اتقدم الي لزم ايدي ..

-ارسلان: على كيفج بابا

نزلت وجان صيف الحر يكتل وبوخه دخلنه للبيت ومليكة تهلهل فرحانه بينه مادري ببناتنه مجهزين النه غرفتنه الي قبل جنه كاعدين حطو اغراضنه حطيت بناتي بمكانهن الخاص ووبدلت ملابسي تمددت بمكاني دخلت غرام الي ..

-غرام: محتاجه شي غياهب ناقصج شي

-غياهب: لا بيبي

- ارتاحي لعد تعبتي اليوم

- هو راح انام

طلعت وسدت الباب وراها كلبت على صفحة بناتي اباوعلهن مبتسمة الراحة الي انه بيها اول مره احس بنفسي مرتاحة هلكد مجرد عيوني تباوعلهن انسى كل تعبي

دخل ارسلان بعكازته كعد بصفي ..

-ارسلان: تعبانه

- بصراحه اي

- نامي يروحي

- وانتَ

- اشبع عيوني بيهن شويه وانام

- امممم

غمضت عيوني انام لان تعبانه وجسمي ضل يون عليه بالالم لازم ما اتحرك اهواي واحتاج راحه بين النايمه والكاعدة اسمعه يسولف بهمس وياهن ..

-ارسلان: سبحان الزرع محبتجن وتعلقجن بروحي من قبل لا تجن وگلبي ماغلط من حس جايني بنيه بس المفاجئه اجيتن اثنين مو وحدة ويا محلاتجن

حسيته تمدد بصفي انفاسه صارت بركبتي طبع بوسه خفيفه ..

- اشكرج اهواي غياهب منقذتي من اخطائي انتِ

حط راسه بشعري يسحب نفس ووياه حسره الثاني يوم كعدنه على صوت بُكاء بناتنه اثنينه فزينه ومليكة تدك بالباب رحت امشي كوه فتحت الباب ..

-مليكة: عدلين ميتين ولكم البنات يبجن ماتسمعوهن

درت وجهي اريد اروحلهن شفت ارسلان واكف يمهن يحاول يسكت بيهن بس مايكدر يشيل وحدة رحتله اخذت لارين ومليكة اخذت سيرين واثنينهن يبجن توترت بينهن حرت المنو انطي نفسي شافتني مليكة بهل الوضع

-مليكة: جوعانت بنياتج يمه رضعي هاي الي بايدج بالاول وخليني اصبر بالثانية بين ماتكملين

هزيت براسي وكعدت ارضع بيها وصدك جانت جوعانه ارسلان واكف يم راسي يفرك بعيونه ..

-غياهب: ارجع نام

-ارسلان: والبنات

- مليكة يمي

-مليكة: روح نام بغرفتي يمه ماراح تكدر تنام هنا هوسة

هز براسه وطلع بقينه انه وياها كملت من لارين رضاعه انطتني سيرين هم رضعتها لحد ماشبعن طلعنه ملابس الهن بدلنالهن ..

-غياهب: لعد شوكت نسبحهن شنو يبقن بدون سبح

-مليكة: بعاداتنه للاربعين الطفل ونسبحه

- ايععع مثل ابن حنين هم للاربعين يلا سبحوه لا عفيه من يمي جسمي ضل يكرصني بناتي شلون

- خايبه اسكتي لا الطج على حلكج مو جاي نغسل الهن

- اي شنو الفرق خلينه نسبحهن

- انعنع ضلوعج بس تسبحيهن

- هسه شهل العادات والخرافات الي مسوينها

دخلن البنات وكابلنه ..

-ناز: ياروح عمتجن جنجن فراوله

-نيروز: لا ولج جنهن قطع كيك

-مليكة: ماتكومن تسون لرجولتجن ريوك يتريكون كبل لا يروحون لشغلهم

-غرام: بعدهم نايمين

- چا احنه نريد هم ريوك كووومن لاتكابلني

خافن منها وكامن يسون ريوك بقت بس ناز كالتلها مليكة ..

-مليكة: چا وانتِ

-ناز: ماكوم

- تغسل لهل وجه

- هسه انتِ بجمالي وتحجين على وجهي

- غير شبابي راح جنت شحلاتني وكصيبتي تسحل وراي

- اصيح ارسلان عليج هسه منين كصيبتج وراج

- تجذبيني ام شعر المزنجر

ضحكت ناز تباوعلي غمزتلي رجعت تباوع المليكة بغرور وتفر بخصله من شعرها ..

- يخبل لون شعري احسن ما اخليله حنه

ضلت ناصبه عليها ومليكة بس تريد تكوملها كملنه البنات ودخلت نيروز ..

-نيروز: يلا تعالو اتريكو

عفنه البنات بالغرفة وطلعنه امشي على كيفي حسيت بايد لزمتني باوعت جان واكف وجهه مبين جان بالحمام يغسل ..

-غياهب: مانمت

-ارسلان: الي عنده اخو مثل عمر وخال مثل خالي ينام مرتاح اكيد لا

ابتسمت لان الولد مكعدي كعدنه كلنه بالصالة نتريك ..

-عمر: ارسلان ماترجع ويانه هنا بالبيت والله يخوي البيت مادري شلونه

جانت ناز تاكل من حجه عمر هيج رفعت راسها وكالت متفقه ويا كلامه ..

-ناز: اي حبابين ارجعو يمنه هنا

ركزت بعيونها على ارسلان المدنك راسه وصافن ..

- اذا عليه انه اتعودت والله ماتقربلك ولا المسك

رفع راسه الها ارسلان ابتسم بخفه ..

-ارسلان: اول وتالي كلمن يطلع ببيت وحدة وعوائلنه جاي تكبر ماريد نتقيد كلنه ببيت واحد

-كُميل: بكيفك خالي الي ترتاحوله البيت بيتكم

مشت الايام واسبوع جر ورا اسبوع بدينه نتعافى وبناتي كل يوم يحلون اكثر بس مايشبهني ولا يشبهن ارسلان ماعدا البياض والشعر الي ورثنه منه باقي الملامح مايشبهونه بيه ومنو يجي يوم شو ذني مايشبهنكم وارسلان الاحظه يبقى ساكت

لحد مابيوم دخلت للغرفة لكيته شايل وحدة من البنات بعد مافك التچبيس الي بايده وكفت كدامه متخوصره ايدي على خصري ..

-غياهب: احسك تعرف البنات يشبهن منو بس ماتريد تحجي

-ارسلان: يشبهنه غير

- وين يشبهنه ارسلان دباوعلهن وجهن مدور وانه وجهي طولاني وحتى مو يم ملامحي ولا نفس رموشي ولا عيوني بس الشعر الواضح عليه البنات وارثات جمال

- امممم

حاوطت ايده حضنتها حط سيرين بكاروكها ..

- ارضي فضولي واحجي حتى من يسئلوني اضل محتاره شجاوب

سحبني الحضنه وايده اتسللت الوره ظهري حد ماوصلت الخصري شدني اله دنك باسني همس مختنك ..

- يشبهن امي

طبكت حواجبي وابتسامتي على وجهي ..

- امك ؟

- مو امي عفاف امي مرت فاروق

فتحت عيوني بدهشه من كلامه ماتوقعت اسمع هل الجواب ..

- امك

- اممم

- الله يرحمها

حضنته مقهوره لان ماضيه لليوم يقهره ..

- انه امك وحبيبتك وصديقتك وشريكة حياتك للموت لا تفكر ما الك احد احنه كلنه يمك وكلنه نحبك

اخذني الحضنه اكثر ويتحسر ..

- شمصبرني على الدنيا غيركم

- احبك ارسلان

- ميت بيج

ابتعدت عنه شفت عيونه مدمعه باوعتله
بزعل رفعت ايدي امسح بدموعه ..

- اممم احنه مو اتفقنه نتعالج سوا شو مغلس عن الموضوع واحنه متفقين من احنه حامل

- ماصارت فرصة

- طيب نبلش ؟ جاهز لهل الخطوة

دار وجهه للبنات يباوعلهن بحب وحنيه ..

- الخاطرج والخاطرهن كلشي اسوي

- الخاطر نفسك مو بس الخاطرنه نفسك الها حق عليك

- وانتِ

- راح احارب لاجل هل المره انجح اريد اعيش وياك وويا بناتي وانه متخطيه الماضي ماريد امثل بشي تعبت من التمثيل

حطيت راسي على صدره بهدوء ..

- انه هم اريد اتخطى كلشي اريد نعيش بسعادة احنه نستحق نعيش سعداء ويا بناتنه احنه ضحية ماضي اغلاطه اهلنه

- ان شاء لله

- وين مبدل تريد تطلع شنو

- اي عندي شغل

- اممم لا تتأخر نشتاقلك تره

- صار من بطن عيني

- شوكت نرجع البيتنه دام صرنه احسن
من قبل

- هنا مأمن عليجن اكثر بس قابل لشوكت نضل هنا ذني اليومين نرجع

- براحتك بيبي

رجع دنك يبوس بالبنات ويشمهن شم مثل مايبوسني ..

-ارسلان: بنياتي

التفت الي ..

- شعجب ماسئلتي شي عن الحادث

- لان اعرف الجواب

هز براسه وگال ..

- طالع احقق بهل الموضوع جدج قربت نهايته

طلع وبناتنه وحدة كاعدة ووحدة نايمة طلعت ورا الخال وعمر كلعادة بشغلهم وانسام بهل فترة تجي بين يوم ويوم بس صارلها يومين مريضه كلش ارسلان دز الها ناز اتداريها لان يكول رحتلها نايمه بالفراش وتحتاج احد يساعدها وهيه عندها اطفال وبالمدرسة راح ارسلان وكعدت يم مليكة والبنات وبداخلي خوف من موضوع سالم كل ماينذكر ..

-غرام: ظهري موتني مادري شبيه

-مليكة: انه مامرتاحتلج كتلج من امس خليني اخذنج للدكتورة مارضيتي

اباوعلها مبين الألم طاغي عليها ..

-غياهب: مليكة لو تاخذينها للدكتورة لاسامح الله لا يصير شي ويروح يصير بيها شي هيه وطفلها

باوعت علينه نيروز ..

-نيروز: اذا ماتكدرين انه اخذها يعني عمر يقبل اطلع اذا شي ضروري

-مليكة: انه اخذنهه بس خلي البسن عبايتي وجواريبي كومي يمه غرام بدلي

كامت غرام لازمه ظهرها ودموعها بعيونها متوجعه اجه سراج ذب روحه على نيروز شالته تضحك وهَوُ يضحك ..

-غياهب: نيروزه

التفتت الي وسراج يبوس بخدها ..

-نيروز: ها غياهب

- شلونه وضعج

خفت ابتسامتها ورجعت اتلاعب بسراج ..

- احاول اتعود مابيدنه شي الحمدلله على المقسوم

- صدك عمر ماقابل تتبنون

- اي

- عن نفسي اشوف قراره صحيح لان الولد اذا ولد من يكبر راح يحرم عليج واذا بنيه عمر يحرم عليها بس تبلغ

- صحيح هم كال هيج من رجعت حجيت وياه يكول نعتبر جهال خالي وجهال اخوي اطفالنا

- بدون ماتعتبرونهم بناتي مثل بناتج واذا تريدين اخليهن يصيحلج حتى ماما

نزلت دموعها ..

- الله يحفظهن الج والابوهن

طلعت مليكة لابسه عبايتها وشيلتها وطلعت غرام هم البنيه وجهه صار اصفر ..

-غرام: خاله كُميل جاي النه ياخذنه ماقبل نروح وحدنه

-مليكة: بعد احسن مالي خلك يضل يحجي عبن طلعنه وحدنه

كعدن وسراج كلب الدنيا بس شافهن لابسات عبايه خذته نيروز وطلعت بيه للحديقة ربع ساعة ووصل الخال اخذهن وطلعو بقينه بس انه ونيروز بالبيت خابرت حنين ..

-حنين: هلو عيني شلونكم

-غياهب: الحمدلله

- بالليل جاينكم انه وابويه وخالتي وبيت خالي درغام عنده شغل يمكن مايجي

- هلا بيكم عيوني

- شلونهن بنياتنه

ضحكت ودخلت جوه اشوفهن ..

- بس وحدة كاعدة الثانية نايمة

- شوفي احسهن هيج راح يطلعن مثلنه كزكزت عليهن خرب يومهن

- تطلع وحدة تجفص ووحدة تلم جفصات وراها هههههههه

- هههههههه بالضبط مثلنه انه وياج انه اجفص وانتِ تسدين وراي

بقت تسولف شويه وتكول درغام جاي يطلع من الصبح مايرجع اله بالليل ومن تسئله ماينطي جواب وعلى مرتين متعاركين سديته منها بقيت كاعدة ماكو شي اسوي اخذت بنتي الكاعدة الي هيه لارين تناغي وتفر بعيونهه ..

-غياهب: ماماتي نياتي اغوو

الاعب بيها الابتسامة شكت حلكي من شفتها ابتسمتلي گلبي مات بابتسامتها وشكلها البريئ ..

- يمههه الي يضحكلي نياتي

بقيت الوقت اهوايه احجي وياها والاعبها وهيه تبتسملي وفاتحه عيونها سحبت جهازي اصور بيها وهيه مبتسمة باوعت بعيوني للثانية نايمة بهدوء ضحكت وانه افكر تطلع مثل حنين ومن هسه عاشقه للنوم ..

-ارسلان: اتصلت على درغام اشوف وين اخذ هذه ثائر

- هاا درغام وين انتم

-درغام: بمكان الـ *** راح تجي ؟

- اي جايك

اتوجهت للمكان الي موجودين بيه مو بالمركز لان هناك الوضع ماراح يصير مثل مانريد وصلت الهم دخلت لكيت درغام ومجاهد واكفين وثائر مربط مكعدي على الكرسي صارله فترة هنا ..

-ارسلان: عوفونه وحدنه وانطوني جهازه

انطوني الجهاز وطلعو الولد درغام ومجاهد باوعت عليه وجهه مزورك مبين منطينه المقسوم ..

-ثائر: شتريدون من عندي

-ارسلان: كل خير حبيبي

فتحت جهازه الجان مقفول سحبت كرسي كعدت كباله ..

- اي ثائر

- شرايد ؟

- سالم وين

- يوميا هيه كتلكم مادري وين كاعد

- اهاا كتلي ماتدري

كمت من مكاني صرفنت اردانات القميص اجته كفخه ..

- لا تصير ذكي وياي العبك انتَ وجدك على تك رجل

- ههههههههههههههه

- اضحك اضحك تالي هل الضحك بجي

- جدي محضرلكم مفاجئه

سحبت جكارة من باكيتي ادخن رفعت رجلي حطيتها على الكرسي الكاعد عليه ..

- اممم وشنو المفاجئه

- راح يحرك كلوبكم مثل ماحركتو ابوي

- والله من انعل ابوك لابو جدك

فتحت الحبل المربوط بيه سحلته عذبته عذاب الكافر ومانطق حرف اتوقفت من دك جهازي خليته نايم بالكاع بدمه جان رقم فتحت خط ..

-ارسلان: نعم

الصوت الي صارلي قرن منتظره ..

-سالم: حي الله الاعرج

- اووو سالم الخسيس زمان عليك

فتحت الحاسبه الي عندي اريد احدد مكانه فتحت سبيكر وكعدت ادور على المكان دخل درغام أشرتله يسكت ..

- شلونك نسيبي

- اكل خر* ماتشرف اصير نسيب قاتل

- اتصلت عليك علمود اسئلك سؤال

اجه درغام مركز ويانه بالكلام ..

- اكيد جاي تسئل شوكت نهايتك حبيبي سلومي ان شاء لله مابقالها شي جايك لو تصير جوه الكاع اطلعك منها

- ودعت بناتك زين ؟

-درغام: اباوع الارسلان اختفت ابتسامتة رد عليه بهدوء ..

- لاتجيب طاري بناتي على السانك الزفر

سده سالم الاتصال وخلانه مصفنين بكلامه بسرعة كمز ارسلان والحاسبة طاحت بالكاع

-ارسلان: راح يروححح البيت اهلييي لااا
يا الله

طلع يركض مسحت على وجهي لزمت ثائر سكطته تسكط ..

-درغام: اذا صار شي للبنات يا ويلكم

رد وهَوُ يحجي كوه ..

-ثائر: ر راح تشب النار الي شعتلوها ورضيتو بيها

دفرته ببطنه وطلعت الحك ارسلان صار بوجهي مجاهد ..

-مجاهد: شبيه ارسلان طلع يركض

- اقفل الباب على هل الكلب وتعال وراي سالم يمكن راح الاهل ارسلان

- اكو حمايه هناك غير شلون بعد يكدر يدخل

- مادري مجاهد رايح انه

عفته واكف وطلعت بسيارتي وادعي ربي مايوصل الاحد ولا ياذي احد بس هو هدفه واضح بنات ارسلان ..

-غياهب: وكلت نيروز سراج طلعت يمها بالحديقة مطمئنه اكو حمايه بره

- اتأخرو مو

-نيروز: لان راحو بدون حجز فيتأخرون

- نسوي كيكه

- يلا

شالت سراج ودخلنه جوه طلعنه مواد الكيكه وبدينه نخبط بيها جنه نسولف انه وياها عن سالم ودك جهازي باوعت شفته ارسلان ايديه جانت متوسخات رحت اغسل بالسنك

واندك الباب بس الباب الثاني الي صاير
من ورا مو الباب الرئيسي ..

-نيزوز: منو جاي يدك بالباب

-غياهب: خاف واحد من الحمايه لان هم حاطين واحد بهذه الباب

- لا تفتحين الباب

- يمكن محتاجين شي خطيه هم واكفين على طول الوكت

- شو خايفه

باوعت الجهازي انكطع الاتصال طلعت من المطبخ ورجع جهازي يدك كلت بس اشوف الي بالباب صرت قريبه على الباب ونيروز طلعت راسها من باب المطبخ ..

- رجلج جاي يدك خبصنه خبص بالاتصال

- اي هسه اجاوبه افتحي خط عليه كليله هسه اجي

شفتها فتحت خط خلت الجهاز على اذنها وانه مديت ايدي افتح الباب ماجنت اعرف شنو المضموم ورا هل الباب وياريت لو مافتحه هل الباب بذاك اليوم ولا وصلت اله ولا شفت منو الوكف ورا ..

فتحت الباب بسرعة اندفع عليه الباب شهكت من الحمايه الي حارس هل الباب وكع كدامي ضليت مصدومه جامده بمكاني راسه ينزف وغايب عن الوعي وكفت انفاسي ورجف جسمي من سالم دخل وموجه سلاحه عليه واسمع صرخة نيروز غياهب لا تفتحين الباب بس شنو الفايدة اتأخرت

دفعني رجعت لورا وانه مصدومه الولد الضاربه عافه بالترك الواكفين بيه والولد فاقد النزيف اخذه رفع سلاحه وجه عليه ..

-سالم: امشي كدامي جدو

-غياهب: سافل شجابك لهنا

ماحس غير انشلت براشدي وجهي شب نار حط السلاح براسي ونيروز بايدها سراج ودموعها تنزل بخوف دخلنه جوه للبيت مهمتني نفسي خفت لا يسوي شي البناتي

وكفنه بالصالة دفعني يم نيروز الصارت ترجف مثل السعفه لزمت ايدها اهديها كعد كبالنه حاط رجل على رجل وشكله خبيث مابيه ذرة رحمه ..

-سالم: انطيت اشارة الزوجج اذا ذكي راح يفهم ويجي لهنا هاي اذا لحك طبعاً

- شرايدددد انتَ

كام وكف ماكدر اسوي شي اخاف ياذي نيروز وسراج ضل يباوع السراج يضحك بخيث ..

- ابن منو هذه

- مايخصك صدكني ارسلان اذا وصل لهنا ماراح يخليك تطلع من الباب عايش

صار باب البيت يندك بقوه فتح الشباك يباوع ضحك باستهزاء ..

-سالم: حمايتكم صار الها علم ماراح نكدر نكمل شغلنه براحتنه هنا

سحب نيروز من ايدها ركضت عليه احميهم منه دفعني بكل ماعنده قوة انضرب راسي بالحايط صرخا بألم عيوني صرت كوه افتحهن دخلها الغرفة مليكة هيه وسراج سحب المفتاح وقفل عليها الباب وهيه صوتها انبح وهيه تصرخ صوت صريخ سراج الي عج بالبيت

سحبني من ايدي رافع سلاحه مخلي بنص راسي ويحجي سريع ..

- وين بناتج ويننننن

ماحجيت ماريده يوصل الهن ضغط بسلاحه على راسي دمعت عيوني من الألم ..

- وينهنننن

- لووووو تموووووت ياااكلببب ماكلككك وينهنن

بس ماكو مهرب من القدر بجن بناتي وانعرف مكانهن دخلني للغرفة والاثنين يتصارخن بنفس الوكت كمزت من صار باب الصالة الي هم قفله يندك بقوه سحب وحدة من بناتي حطها بين ايديه تصرخ وسحبني يمشي بيه سريع ..

- اي حركه تسوينها تخسرين بنتج صيري عاقله ولا تتذاكين

بلعت ريك بخوف وجسمي يرجف خوف طلعني من الباب صعدني بسيارته ومشى بيها حضنت بنتي خايفه والثانية عفتها مفرفحه ببجيها ياترى راح ارجع الها ؟ راح ارجع اضمها الحضني راح نرجع انه واختها ؟

باوعت من ورا سيارة الحمايه لحكتنه كام يدخل بشوارع ودرابين علموي يضيعهم يمشي سريع خفت لا يصير حادث ..

-سالم: اذا مافجعت كلوبكم بهل الليله مثل مافجعتو كلبي بابني

الخوف سيطر عليه خوفي على بنتي شراح يسوي اذن المغرب واحنه نمشي بشوارع الحمايه الي ورانه ضاعت سيارتهم نزلت دموعي بضعف دعيت ربي احد ينقذنه من
هل المجرم جانت لارين الي بحضني حاضنتها الصدري بكل ماعندي قوة من خوفي

وصلنه المكان اشبه بصحراء فتح الباب وسلاحه علينه ..

- انزلي

نزلت دموعي ..

- الله يخليك لا تأذيها مالها ذنب

- انزززززلييييييي

سحبني من ايدي روحي مفرفحه دخلني لداخل غرفة بيها تنكه مكصوصه وبصفها قوري چاي وجربايه نفر واحد كرسي محطوط على الجهه الثانية بدون مقدمات سحب لارين مني ويهدد بيه مخلي السلاح عليها

حطها على الجربايه كعدني على الكرسي رجع ايديه لوره يشد بيهن باجر بناتي يقبطن اربعين يوم جنت محضره الهن كلشي التفتت اله عيوني نار تطلع منهن ..

-غياهب: اذا بنتي تتأذه شعره منها تندفن قبلها

ضحك بخبث وراح كعد يمها يمشي بالسلاح عليها ..

- ودعيها جدو حبيبتي ودعي بنتج

رجف گلبي وكل جسمي من شفته كام شغل النار الي بالتنكه المكصوصه صارت دخانه اختنكت عيوني على بنتي ..

- ولككككك حيووووواننننن شجايييي اتسويييي الله ياخذذذكككك ولككك طفله شنوووو ذنبهاااا

مايرد عليه لف على وجهه مثل الچماغ وشال بنتي هزيت راسي برفض ..

- ابوسسسس ايدكككك لاااا تسويييي شييييي

صرت اتوسل بيه اتوسل مايرد عليه النار صارت حمره كعد قريب عليها وبايده بنتي بنتي الي ماجاي اكدر احميها بنتي الي راح تروح نتيجة ذنب مو ذنبها

احاول افك بروحي عيوني غوشت من دموعها قويت نفسي بس اريد افتح هل الحبل الي رابطني بيه مثل الحيوان توسعت عيوني واتوقفت حركتي گلبي نبضاته صارت تنبض ببطئ من سمعت صرخة بنتي رفعت راسي جان بكل خبث وقذاره يحرك برجليهاا ماكفاه كام يحرك بايدها حاطها بنص النار ويضحك ببرود انسان متجرد من المشاعر صرخت بصوت من اعماق قلبي ورحي

- لاااااااااااا

جسمي مات اريد اعين نفسي ماكدرت حطها على الجربايه وهيه كاد قلبها ان يتوقف بصراخها العالي سحب اقسام رمشت بثكل نزلت مني اخر دمعه بهدوء وانه اشوف طلعت الطلقه وهيه تخترق قلب بنتي شهكت شهكة الموت فارقت الحياة هل الطيره قبل لا تعيشها مالحكت تعيش شي مالحكت تشوف حب امها وابوها ولا دلالهم الها مالحكت تلعب ويا اختها وتوأمها مالحكت افرح بيها ..

-ارسلان: وينن صاروو

-درغام: عيوني تراقب بالمنطقه لحد ماشفت سيارة واكفه وطلع صوت طلقه مادري شحجي عن موقنه هنا اسرع ارسلان بسياقته لحد ماوصلنه نزل ارسلان يركض وبايده سلاحه دفر الباب ركضت ورا ضلت عيوني صافنه بالمنظر الكدامي غياهب عيونها حمر وصافنه رجعت انضاري على الطفله الي مغركه بالدم ماتشوف شي من ملابسها متلطخه بالدم

مجرد شافنه سالم رفع سلاحه مالحك وارسلان فرغ الشاجور كله بيه طاح سالم بالكاع والدم ينزل منه طاح سلاح ارسلان من ايده يمشي بخطوات بطيئه عيونه ببنته لحد ماوصل الها ركضت الغياهب احررها فتحت الحبل طاحت بين ايديه فاتحه عيونها

انشك گلبي على صوت ارسلان من صاح بعلو صوته ..

-ارسلان: لاااااا بوووويه لااااا بنيتيييي

اخذها لحضنه والدم ينزل منها حاضنها الصدره قميصه جان ابيض اتلطخ بدمها دخل مجاهد انصدم بالمنظر الي كدامه فاتح عيونه غياهب بين ايديه مثل الميته بس عيونها فاتحتهن

-مجاهد: الله اكبررررر

-مجاهد: الي صار ماكسر بس غياهب وارسلان كسرنه كلنه طفله عمرها مايتجاوز الـ 40 يوم تموت بهل الموته البشعه

اتقربت الارسلان مايقبل ينطيها حاضنها الصدره ويشهك بدموعه نزلت دموعي اول مره موقف ياثر بيه درغام دموعه ماكدر يسيطر عليها دخلو ابو غياهب وابو درغام وعمران انصعقو من الي شافو ركض ابوها اخذها من درغام ومصدوم جابر وعمران ملامح الصدمه على وجوهم يباوعون الابوهن الي نايم بدمه وعلى بنت ارسلان الحاضنها

-ارسلان: بابا لارين انه بابا افتحيلي عيونج لاتغمضيهن يلا بابا افتحيهن لاتصيرين انتِ هم جرح من جروح گلبي

-جابر: انا لله وانا إليه راجعون

-درغام: اتقدمت اخذها منه مايرضه عاصرها عصر بحضنه

- ارسلان

-ارسلان: راحت بنيتي المالحكت افرح بيها واحت شمعتي راحت وردة ابوها

دك جهازي باوعتله حنين شكلها هسه اكلها مالحكنه ننقذ بنت اختج وصارت طيره من طيور الجنه ماجانت عندي الجرئه افتح خط عليها

كوه كدرنه نسحب البنيه من ارسلان لفها ابويه وطلع بيها شال عمي عمران غياهب وطلع بيها كوه كومنه ارسلان من مكانه طلع عمي ارسلان الي حيله انهد بهل الشوفه وماكول غير الله يساعد گلبه جاي نمشي لازمين ارسلان انه ومجاهد قبل لانصعده بالسيارة طاح بين ايدينه

صعدناه بالسيارة منتهي هاي جانت كسرة ارسلان الكبرى رجع نزل من السيارة وركض السيارة ابوي اخذها أشرلنه ابوي نعوفه رجع حاضنها الصدره صعد بالسيارة

الطريق كله على نفس الوضع گلبي اذاني عليه شلون حاضن بنته مجاهد يسوق ودموعه تتسابق لحد ماوصلنه للمستشفى يريدون ياخذوها منه وهَوُ مايرضى ينطيها

-ارسلان: ولكم عفتهااا مابيهاا شييي عفتتت بنتييي بصفف اختهاا شميتهاا مادري راح تكون اخررر مررره ولكمم ماكدرتتت احمييي بنتييي

اتقدم عمي سلطان اله وغياهب دخلوها للطوارئ ..

-سلطان: ارسلان

رد عليه بغصه ارسلان وصوته منتهي ..

- لا تكلولي انطيها البارحة كضيت الليل العب وياها وويا اختها هسه عرفت ليش روحي تعلكت بيها

- اكرام الميت دفنه حرام تبقى مخليها هيج

سحبها عمي منه وعيون ارسلان بيها راد يروح وراها ولزمه ابوي ومجاهد كعد بالكاع على ركبه مهدود حيله مكسور المستشفى كل واحد بيها شافه صار يبجي على حاله صاح بصووت رج المستشفى رج ..

-ارسلان: هاااا يالمكبرررره خذتييي شكووو عزيزز عنديييي

للحكايا بقايا ..»

حسابي الانستا

Instagram :hawraalsaidi

قناة التلگرام

Harahir