* الحسيمة
غيثة رجعات جوج خطوات اللور منين غوت عليها هاكاك مصدومة، ماشي غي هي تالي دايرين بيه تاحد مافهم شي حاجة، جات امال كتجري وقفات بينها وبين رضى : خويا صافي تهدن عافاك صافي، الناس غايشوفونا
أسامة : ( طايح فالارض ماكيقشعشع ) اندمك على هادشي غا بلاتي
رضى : واش باقي كتدوي اااا
يالاه غايرجع انزل جا عصام بزربة خبط عليه مرجعو اللور شادو
عصام : واصاافي اصاحبي اواااه
جا حتا صلاح مور ماسمع الصداع شافت فيه ريتال بشوية، نزل عند اسامة هزو : سير اصاحبي بدل ساعة منهنا سير
شيماء جات بزربة عند رضى : واش حمقتي غاتقـ ـتل الدري فيديك هبلتي ولا مالك دوز دخل صافي عييت انا بناقص من هادشي .
غيثة دخلات طالعة للفوق وعينيها عمرو بالدموع، دخلات نشان للشومبر كتحيد فالكسوة والبكية كطلع ليها
امال : ( تبعاتها من اللور سدات الباب ) غيثة غير سمعي
غيثة : ( شافت فيها ) انا مادرت والو مااادرتليييه والو هو لي وقف عليا
امال : عارفة والله تاعارفة شوفي راه داك الحدش عندو شي موشكيل فالعقل
غيثة : غوت عليا قدام كولشي انا مابيني وبينو والو انا قادا براسي
امال : عارفة والله اصاحبتي ماكانش حاسو يدير هاكا يمشي يديها غير فنسرين ديالو اففف
كلسات غيثة على الناموسية معصبة وحاطا يديها على راسها دموعها نزلو معاهوم الكحل، قربات ليها امال : عافاك شوفي مسحيها فيا واخا مسحيها فيا
غيثة : نتي مادرتي والو، وتاهو ماشي دارليا انا شي حامة ولكن مابغيتش هادشي ينوض بسبابي .
دخلات عليهوم شيماء وقربات لعند غيثة : سمحيلينا ابنتي والله هاداك راه مسطي حال وحوال، رجعي نزلي بقاي بحوايجك ماتبدليش
غيثة : لا اخالتي مادرتو والو غير انا صافي دابا عييت انحيد هادشي ونشد الطريق لطنجة
امال : اويييلييي تسطييتيي واش حماقيتي مستحيل عرفتي شحال دااباا راه طناش دليل فين غاتمشي
شيماء : ( جراتها من يديها ) سمعي ابنتي عندك الحق فكولشي ولكن مسحيها فيا وعتابريني بحال ماماك
طلعات غيثة عينيها بزربة فيها
شيماء : انا لي جبتك انا لي غانردك مابغيتيش دابا تهبطي كلسي رتاحي اصلا غايتفرق دابا شوية كولشي وغانشدو الطريق جميع
امال : هبطي تاكل يغير شي حاجة
غيثة : لا صافي غير سيرو والله مابغيتش صافي
شيماء : امال سيري نتي ( شافت فمها تنهدات وهي تخرج خلاتهوم بوحدهوم فالبيت كلسات حداها فوق الناموسية ) سمعي ابنتي رضى مغيار على حاجتو، ماشي هادشي كيعني انك حاجتو ولكن هو هاكاك دابا كيشوفك صاحبت ختو يعني بحال ختو ولي قاستك قاست امال، امال ديما كتعاود عليك فدار وبلي نتي قريبة ليها بزاف داكشي لاش دايرنك فمكانة بعيدة، ماديريهاش منو قلة صواب يمكن ماعجبوش الحال يشوف هاداك كيدوي ولا يبسل عليك فهمتي ( مسحات ليها دموعها ) شوفي حشومة هاد العوينات تبكيهوم
غيثة : ( ضحكات من فوسط دموع ) عارفة اخالتي والله ولكن انا لي معجبنيش هو نكون السباب فشي موشكيل وعاد يالاه وقع معاكم داكشي ثاني لتحت
شيماء : ( تبسمات كتنهد ) شوفي ابنتي راه حنا منحوسين هادا زهرنا الصبر وصافي
غيثة : سمحيلي
شيماء : نتي لي سمحيلي يالاه تهبطي
غيثة : لا اخالتي والله انا نبدل حوايجي وداك الساعة نشوف نهبط
شيماء : ( تنهدات ) لي رتاحييتي ليه
مشات هبطات خلاتها بوحدها فالبيت حيدات عليها داك الكسوة ولبسات حوايجها باش جات سروال كيط واسع وكابيتشو، دخلات مسحات وجهها فالحمام غسلاتو وفكات شعرها من حيت كانت جامعاه مشيطة خفيفة، كيف جرات المقبط طاح مسرسب على وجهها، خرجات دايرا يديها فجيب وهزات تيليفونها كتفكر واش ترجع تهبط ولا لا
شيماء هبطات معصبة صافي مشات نيشان عند امال : صافي فرقي لاطاغط نمشيو بحالنا منهنا هادشي طلعلي فراسي
امال : تفو الحفلة لي درت انا تخورت فيها تخويرة سانك سانك شهاد الزبل هاد المرة مابقيت نعرض لا تريكة لا زبل وتاداك الدحش مايستاهل لا لانيف لا والو
شيماء : غايسمعك غاتنوض تاني شي قربالة وداكشي لي ناقص صافي قتليك فرقي بنادم وزيدي نمشيو بحالنا
عصام وصلاح صدرو اسامة ورضى هدناتو ريتال ودخلاتو للحفلة واخا صافي تخسر، هز عينو لقا نسرين كتشوف فيه بمعنى شنو واقع كانت حدا حليمة، تنهد ودار بحالو مشا هز قرعة دالما شربها، شاف عند كمام الشوميز شوية ديال د ـم طلعها وجبد كارو يكمي
ريتال مشات رجعات لكنابي وكلسات : مافهمتش اش هاد النهار
ايمان : اش وقع ثاني
امال جات ترضخات حداهوم معصبة ودارت شافت فايمان : ختي العار هاد المرة تاشي تريكة ماتجي اجيو بوحدكوم
ريتال : نتوما سباب داك البنت حتا نوضات داك الروينة
ايمان : كيفااش واش طايحة على راسك منيتك بانليا عاداك بحماقها
ريتال : ( بجدية شافت فيها بكالم ) حتارمي راسك كدوي معايا هاكا وانا قد خوك الكبير انا لي شفت كولشي نتوما موالفين بتبرهيش ديال les facultés، البنت ماكاتعرفش تلبس كتحلو عليها ففمكم، الى نتوما موالفين عيشتكم وحداخر ماعندوش، حمقة ولا بعقلها هاداك شغل راجلها لي مزوج بيها فاش مشاليكم نتوما، اييه كتعرفو تلبسو وعندكم الفلوس ولكن الاحترام ماكاتعرفوش ليه ( هزات ساكها وناضت واقفة المونطو فوق كتافها ) ليلة سالات هنا
* الناظور
بقات كتشوف فيه وهو كيهضر، حناكها حومر وسخانة كلاتها، مغيبة وواعية، كتشوف ففمو وفعينيه تاسالا هضرتو، نطقات بشوية : ولكن انا مادرتليها والو
طه : ( تنهد ) دفعتيها وشفتك بعيني، دابا رديتينا تاحنا كنكذبو !
سميرة : نتا عندك بناتك يعني ولادي أنا ماغايكونش عزاز عندك
علات كتافها مدورة راسها لجنب
بــقا ساكت كيشوف فيها، ناض وقف : تكاي نعسي، على الله داك دوا يهبط ليك شوية سخانة، تالصبح ويفتح
دار غادي وهي تهضر بزربة مترددة : بقا معايا
وقف كيسمع ونطق بشوية : تصبحي على خير
مشا سد الباب وتحرك لتحت دخل لواحد البيت كانت ديال مصطفى تكا فوق الناموسية وحط يدو عند جبهتو، كيـفكر شحال غدا خسو يتحرك لمراكش بليل، خسو ضاروري يطرق بلان الدون حيت مبرزطو .
صبح الصباح كولشي ناعس من حيت سهرو الليل، ايمان جات مع عصام اما ريتال وانس باتو فلوطيل وشدو طريق لرباط، خلاص رضى جاب حليمة ونسرين لناضور وبات معاهوم المهدي لي دا شيماء وامال وغيثة لطنجة ماوصلو تالستة دصباح
فاقت رحمة باقي فيها نعاس ولكن بعدا تقاد الفطور تاوكان وترجع تنعس، فيقات ايمان بكشيفة حيت عندها لافاك، ورجعات نزلات لقات ميمونة بدات الفطور : صبحنا ناعسين اليوم
ميمونة : ايوا اهادو الدراري داليوم يسهرو ويصبحو ناعسين خليهوم ياخدو راحتهم
رحمة : واييه والله ماعرفت شمن ساعة جاو انا جيت مع طه
ميمونة : علاه تاهو لحق ومشا
رحمة : ( كلسات فوق الكرسي ) غير سكوت عملت الفالطة مع مرت ولدي نسيتها تاجا هو جابها
ميمونة : كانت هنا باش قلتو غاتمشيو
رحمة : واييه هي مسكينة ماقالت والو كيف تنوض خاسني نحزر عروستي
ميمونة : هانا تاني على لالة رحمة والحزارة واختي جات معاه سيدي طه يستاهل هو وشانو عالي كيف با تكون مرتو
رحمة : ( تبسمات ليها ) ضاروري ماتكون عزيزة مرت ولدي اللول
ميمونة : ( حطات المسمن كطيب ودارت يديها عند فمها ) سي طه شانو عالي ولدتي وعرفتي اشنو تولدي تبارك ربي يحفضو من العين فكل مجامع يتذكر سميتو وشحال من وحدة تسناتك دقي بابها باش تكون ليه وشوفليك سبحان الله شكون دا وشكون يقول بلي هي تكون مكتابو
رحمة : كلنا بحالك هانتينا تشوف ايوا الله يواتيهم ناللخير ويجيبولينا شي حفيد، عشقي ليه اميمونة نشوف ولد طه ولا شي بنتو من د ـمي ولحمي نهزها بين يدي
ميمونة : ( ضحكات ) مزالة صغيرة تبارك الله راه توقفي حداه تباني نتي بنتو هو تبارك الله طولة والقلدة فات باه، ونتي ثاني مزالة غزالة وتشدي العين غابقاي ديما مهليا فراسك الالة تهزي ولدو وولد ولدو
تبسمات ليها رحمة تادخلات عليهوم ايمان لابسة سروال واسع ديال الصوف مع تريكو ديالو حد الفخاض تاهو واسع فالبيج، ساك كبير فيديها دايرة فيه الكتوبة، وزيف فالبيض مع مونطو .
ايمان : ( باست مها بجهد تاكلاتها ) مامي والله مافيا لي ياكل غير نمشي دغيا
رحمة : اواعدي دوزي تاكلي بزربة ومشي
ايمان : لا لا
خطفات زيتون وكاس دالما ومشات مزروبة
رحمة : ايوا يالاه نوض نتينا ووجد فاللخر يخليوه ليك
ميمونة : راه تمشي تاكل فلافاك تاوكان تجي للغدا
كيف ناض طلع لشومبر الكبيرة، دخل نيشان لعندها هي ناعسة وشعرها مزلع حداها، حط ضهر يدو على حنكها لقا سخانة هبطات، دار مشا للحمام ديال البيت حيد حوايجو ودخل تحت الرشاش، بشوية غسل مزيان وخرج توضا هادي عادتو لادخل للمرحاض يخرج منها موضية مايعرف الوقت شنو تجيب، خرج من الحمام لابس البينوار حط عينو عليها لقاها تقلبات فبلاصتها، بدل ولبس عليه سروال دالكيط فالكري مع قبية ديالوودار هز فوطة صغيرة كينشف بيها شعرو، تاحلات عينيها كدور تشوف، مدوخة، دغيا ناضت كالسة كتحك فشعرها قشعاتو تبسمات مدوخة مافهمات والو : صباح النور حبييي
دار شاف فيها مهدن : صباح الخير
شافها مبسمة غابوحدها تقول ضاربها جن طلع حاجب ونزل الثاني: صبحتي مزيان ؟
حركات راسها باه بزربة رد عليها غابراسو حط الفوطة فوق الكرسي غايهز حوايجو ددوش وهي تغوت بزربة نايضة : حبس بلاتي
هز عينو فيها عاقد حجبانو كيشوفها جايا تجري تاوقفات عليه بغات تجره ليه الحوايج طلعهوم للفوق : ياك لاباس
سميرة : عطيني انا نصبنهوم ليك ماتمحنش راسك احبيبي، وبصحة دوش
مبسمة حمقاتها ريحتو وشعرو نازل على جبهتو
طه : لا، الوالدة غاتكلف سيري بدلي حالتك
سميرة : ( تغبنات ) ولاااا وانا لاش مراتك راه خاسني نصبنليك حوايجك
غمض عينو بنفاد الصبر رد الحوايج من يد ليد وهز يدو بزربة عطاها بصبعو لجبهتها تارجعات بزربة شادا على راسها بجوج يدين مقصحة : اااااححح
طه : ياكما عينيك فشي مليون ثاني تحرديها فالماكينة ؟
طلات عليه بنص عين مخرجها : كيفاش اش اش كتقوول نتا
طه : قرينة ابليس تبتي راسك وتقاي شري ولا غاتباتي ماتصبحي
سميرة : دابا هادشي كامل على الفلوس واااه وانا نشفتهوم ( كتغبن ) مابلعانيش والله اخر مرة غاجربني نعجبك
طه : لا حول ولا قوة الا بالله واحاجتي عطيها تيقار صبني حوايجك ولا لوحيهم شغلك هاداك
* رباط
فالصالون لي كيطل على الجردة دالفيلا ديالو، شتا خيط من سما حطاتليهوم الخدامة الفطور، كياكل بشوية بكونبلي فالزرق، داير نضاضر فعينو ومرة مرة يشرف من كاسو دالقهوة وكيقرا فالجورنال، كطالع علي اخر الاخبار لي تحطو فالجريدة، شاف مقال على الوزير بناني، بقا كيتبسام مزيان داكشي لي بغا، كلما زادو الفضايح كلما كفاست عليه الدعوة، هز تيليفونو كيعيط : اهلا الشاف ديالنا لاباس عليك
الشاف : صباح الخير
الـتُّهامي : بغينا الجديد
الشاف : هاد الساعة الدون داخل للمغرب
الـتُّهامي : هههه تلقا الويراغلي كيحمموليه بالليل والنهار
الشاف : غايديرو يديه معاه مافيهاش شك عشرتهم معاه قديمة
التهامي : حنا داكشي لي بغينا لامجبناش دقتهم من التمسماني نجيبو دقتهوم من الدون
الشاف : التمسماني قبرهم تحفر، ماليهوم حيلة، الويراغلي هي شوكة لي غاتبقا فحلقهم
التهامي : مايجيش نهار يديرو يديهوم معاهوم ؟
الشاف : لا، منين زواج وماشركهومش وماطيبش العداوة فراه تاحاجة خرا ماغادي تزيد طيبهوم
التهامي : ومانعرف حضي راسك ماتخليش العداوة تولي محبة، بغيت الحرب تزيد تشعل بيناتهوم، تخلي الورياغلي يقابلو غير ديبوات ديالهوم وينساو يديهوم الكبيرة منين جايا، داخلين على الانتخابات مابغيتش غلطة وحدة تكون
الشاف : ماتخافش نعس على جنب الراحة اوزيرنا داكشي ماغايكونش
التهامي : مزياان
الشاف : ولكن اسي الوزير، هاسنارنحضيو مزيان من ولد النسر حيت ماشي سطل مقرقب، اخر مرة طيرها لتمسماني من فم للسبع، ماساهلش وخبيت فمخو تميماني بيدو كيترعد منو
التهامي : باه طار حتا طار وربطاتو مرا تاهادا غاخليه دابا نلقاو ليه وجيبة
الشاف : طلب الله حيت الوحيد لي ماتعرفو باش مطوي
التهامي : ( تعصب ) مخدمك تما باش تكون حسن منو، وانا ماختاريتك تاعرفتك قدها، سير دابا نهارك مبروك
حط تيليفون بجهد معصب وجغم كيبر
رجع كيشوف فجورنال ويضحك : هاحنا انشوفو اسي بناني لامشاتليك يديك الكبيرة كيغادير دخل راسك فالحكومة مزال
دخلات مرتو لابس الكلاص خفيف كلسات حداه وحطات يديها على يدو : كيصبحتي
التهامي : لي غايكونو تابعينو الانتخابات كيغايكون
مرتو : مانخافيش عليك الحكومة ديالك بغا لي بغا وكره لي كره
التهامي مشا بعينو بعيد كيفكر فالكلام لي قاليه الشاف وكيدورها فمخو : على الله .
*الناظور
بقات كتغبن يالاه غاتدوي سكتها : لبسي عليك غانخرجو
دغيا تقلبات حالا فيه فمها مامتيقاش : بصح بصح فييييييين
عينيها لمعو
طه : مابغيتيش تعرفي على لينا ؟
جمعات فمها كتشوف معوجاه كتفكر وهي تحرك راسها باه : منين عزيزة عندك تانا عزيزة عندي
حركليها راسها : يالاه لبسي حوايجك دغيا انا كنتسناك لتحت .
عضات على شفايفها كتنقز تحرك خرج داز على بيتهوم لقا ليلى كتمشط لينا كيف دخل عليهوم ناضت لينا كتجري عنقاتو وليلى تبسمات ليه : صباح الخير
هز لينا عندو باسها فعنقها وحنكها : صباح النور الغزالات دياولي كيصبحتو ؟
ناضت تاهي قربات وحنا عندها باستو فحنكو: لاباس نتا كيصبحتي ؟
طه : الحمد لله
لينا : بابا قاتليا ماما صافي انمشيو منهنا واش بصح انا عجبني نبقا مع دادا رحمة وطاطا ايمان
طه : درتليكم دار جديدة زوينة مابغيتيش تشوفيها
ليلى : لينا حنا عندنا دارنا بوحدنا مايمكنش نبقاو هنا
طه : ( شاف فيهوم تنهد ) فينما رتاحيتو غاتبقاو
لينا : هنا عافاك ابابا
ليلى : لا لينا هادي ماشي دارنا
طه : ليلى ( شافت فيه غمضليها عينيها بمعنى صافي دار شاف فلينا ) دابا غاتخرجي معايا واخا ؟
حركات راسها باه : اليوم مابغيتش نمشي للمدرسة
طه : ( شاف فليلى ) انوصلك للمدرسة ولينا اتبقا معايا
ليلى : ( حنات راسها ) واخا احبيبي
طه : يالاه هبطو تفطرو
هبط لينا وشدات فيديها هبطو بجوج وتبعاتهوم ليلى كان جابليها حوايجها وكتوبتها، جمعاتهوم ونزلات، مع وصلو لطبقة ثانية مراد طلاقا مع طه فوجهو نيشان شاف فيه نزل لينا تكمل هي وليلى ودار عندو هزليه يديه باسها : صباح الخير الواليد
مراد : صباح النور، البارح شوقع ؟
طه : سوق العيالات الواليد
تنهد مراد كيشوف فليلى ولينا من اللور تنهد : مكانش عند بالي غاتردهوم بسميتك
طه : الظروف كتحكم الواليد، ولو تبغي تنسا وتدوز الجرح مايبراش
شاف فيه شحال وطه بجدية قال كلامو وكمل : يالاه تفطر
هبط داير يديه فجيبو وبقا كيشوف كلمة " جرح مايبراش " حس بلي قالها عليه كثر ماقالها على ليلى ولينا
تجمعو فطبلة كياكلو مهدنين رحمة فرحانة بيهوم لي عزيز عند ولدها عزيز عندها تاهي، مراد نزل بدا كيفطر تاشوية قرب ليه لينا كيدوي معاها وهي كتجاوبو بالعقل والهداوة مربين احسن تربية وماتسنعش حسهوم غير بشوية كيجاوبو لا هي لا ليلى .
تاشوية نوضوهوم باش اهبطو لطوموبيلتو شاف فساعتو ورجع شاف فدروج ثاني، تعطلات علم الله اش كتلبس، تاشوية كيشوفها هابطة بكيطمة كرية نفس اللون لي لابس وسبرديلة ودايرا القب على راسها حيت ماكاتحملش زيف ولكن لاشاف شعرها غايردها ثاني، طلعها من راسها لرجليها ودور راسو كيستغفر الله هي كتبسم ليه زعما شوف راه لبست بحالك، هبطو لتحت ليلى كانت كالسو لقدام طلاقات عينيها بعينين سميرة حناتها مدورها وسميرة عوجات فمها وبقات كتغدد لاش كالسة القدام حدا طه
ركبات اللور جنب لينا شافت فيها وتبسمات ليها : سلام
لينا تاهي تبسمات معاها وغير شيرات ليها
تحرك بطوموبيل سكات كولهوم ساكتات، وتاوحدة ماقادرة تقول شي كلمة حشمانين من طه اما سميرة غا خايفة اما كون لقاتها ماتخلي فيها غير لي نسات، وصل ليلى هي اللولة للمدرسة، ورجع دا لينا وسميرة لواحد البارك، نزلات لينا فرحانة شادا فيدين طه وسميرة غير كتشوف بنص عين دار طه دارليها بعينو اجي
شرا واحد الكورة للينا ومشا بيها للبارك حطها ونزل عندها وقرب سنيرة لجنبو : لينا هادي سميرة مرتي ( حيدليها شعر على عينيها ) شوفيها بحال ليلى
سميرة تبسمات باش قال هاكاك وهي تنزل تاهي عندها بنفس الطريقة ديال طه كتشوف فيها : فخبارك تانا عندي ختي صغيرة غير هي كبيرة عليك، وكنا ديما كنلعبو انا وياها الفار والقط نوريك كيفاش
لينا : اه تانا كنلعبها مع ختي ليلى
ناضت كتنقز وجراتها: اجي اجي يالاه
جراتها كيجريو وهو وقف مبسم ليهوم دار نضاضر فعينيه دالشمس ومشا لعند واحد الكرسي كلس كيشوف فيهوم
دارت كتجري وهي تابعاها من اللور، وشوية قلبات ورجعات هي كتجري على لينا، كتعلب معاها بحالي قدها فالعمر ماتقولش وحدة فعمرها 19 ومزوجة، مشاو لحظيشة كيدفعو بعضياتهوم ومرة مرة كيهضرو، تاشوية جابت لينا الكرة بقاو كيرميوها وخاس وحدة تبعها تجيبها، هزات لينا رماتها بعيد ومشاو كيجريو تاشدوها
هزات سميرة الكرة ورماتها بعيد كضحك وتبعاتها لينا كتجري والكرة غادا، طه علا عينو شاف الكرة غادا جيهت الشارع تنفض من بلاصتو كيغوت : سمييييييرة
ضرت هي ضاحكة تشوف فطه وهي كتجري ورجعات شافت فلينا كتشوف الكرة عند الشارع وطوموبيل جايا كتكلاكصوني
وقفات بجهد مصدومة ويديها كيترعدو طه رما تيليفون كيجري وكعيط بسمية لينا
دارت يديها يجهد على ودنيها كدور راسها بزربة بلا :لا لا لا ماشي انا مااااشيي اناااا
خطفها طه من شاريع هازها لعندو وجايب الكرة دار يرجع ..
سميرة شافتو جاي فجيهتهاا رجعات باللور عينيها عامرين بالدموع كترعد : مابلعانيش لا لا لا لا لا لا ماشي انا ماشي انا ماشي انا
كتشوفو ضبابة كيعيط بصوتها وصوتو بعييييد هبط عينو باش اشوفها سروالها فزك بالت تحتها وكتغوت : ماشي انا ماشي انا لي قتـ ـلتو لا لا لا مابلعانيش مابلعانيش
لي كملات تخلي تعليق ونجمة