" العز كيتربا من صحاب الخير، لي كيكبرو بين النفس الصحيحة، نيفهوم ماينزلش، بين راجل حاكم ضارو بالهضرا قبل اليدين، بمرا تربات توكل اللقمة بالحكمة وماشي بالاهانة، العز كيتربا فرجال ولاد الرجال، والنسا بنات الرجال "
بقا كيشــوف فيها معلي حجبانو هضر وتكلم مهدن، بقات ساكتة وكتشوف ساهية قدامها، قلب عينيه لعند الماريو وتقدم لتم هز الحوايج باش غايبدل ورجع دار مشا خارج سد موراه الباب بلا مايرجع اشوف فيها، غادي للبيت الثانية تبنات فنفس الطبقة عادية.
بقات شحال ساهية قدامها سرطات ريقها مطلعة يديها بشوية وشدات بين الزغبة بين صبعها كتدورها عليه بشوية تاحكماتها مزيان ونتفاتها، ورجعات شدات ثانية بنفس الطريقة وجبداتها بجهد، وعاود لثالثة وجبداتها بنفس الطريقة بزاف ديال المرات.
علات كتافها باهمال وتبسمات : المهم ديتك وتزوجت بيك ( تبسمات عينيها لامعين )
ناضت بشوية ومشات للحمام غسلات وجها، شافت مزيان فيها وردات الشعر مور وذنيها : مالي انا غزالة وشهوة مني غاديني لمكانش اليوم غدا، المهم راجلي وحلالي
لوات شعرها بقراسة وخرجات حيدات شوميز دونوي ويديها كيترعدو، لبسات بيجامة سخونة تاهي جابوهاليها ومشات تكات كتشوف قدامها شحال عاد داتها عينيها
فجبال الريف فين الضلام وغير ندا دالكمرة لي كيطيح، جبد رضى السلاح من الكوفر وركبو بزربة، قاد عليه الصيلونص، دار من بعيد موقفينو ورابطينو مع الحجرة، شير ليهوم براسو وهوما يطلقوه ماجا فين انوض اهرب تاتطلقات القرطاسة جاتو فجنب الجبهة طاح على وقفتو، السكات غير الصوت درجلين درجال لي معاه لي كيهضرو، دار رد السلاح ديالو لبلاصتو، لي دار الذنب يستاهل العقوبة، ولي بغا يهرس الوتاد كطلع ليه الروح قبل مايصبح الصباح، هاكا القانون بين رضى وطه، بعد على شرهم.
ناضت قافزة من بلاصتها، كتلهت مدات يديها كترعد للقرعة دالبلاصتيك، شربات منها جغمة وحطات يديها على عنقها كتمسح فعنقها، مع خدات نفس كتسمع الاذان كيودن زاد قلبها كيضرب، الحلمة مع الفجر، بقات كتقلب على نضاضرها تالقاتهوم ركباتهوم وشافت فالساعة كاتلقاها الربعة دصباح.
غيثة : غير حلمة اغيثة غير حلمة، ( بقات ساهية قدامها ) هاداك مكانش راجلي هاداك كان كيشبه لرضى ( سرطات ريقها )
* الرباط
وصلو لرباط معطلين بزاف حيت شدوها من الناضور مباشرة راجعين بحالهم، دخل يونس نيشان الطوموبيل للكاراج نزلات كلثوم مدقدقة واناس مبوق حيت الطريق كامل وهو ناعس
كلثوم : طلع نيشان لبيتك ترتاح
حناليها غا راسو هاز الشارجور وتيليفون مشا نيشان طالع لبيتو، فالازرق وديكورات فيها فالكحل، الفيلا عندهوم كبيرة وزرينة وداكشي موديغن كلثوم مخلية الخدامة لي كتجي تجمعليها كل نهار هي حدها كتطيب، ومرة مرة كيخرجو هي ويونس لبرا يتغداو اولا هي تخرج مع صحاباتها، انس مع صحابو ولا فالمدرسة وريتال ديما فالكلينيك اولا فدارها حيت دار ليها يونس اباغطومون قريبة للكلينيك باش تجيها قريبة فالبريمانونص ديال الليل، مابغاتش دير العيادة ديالها حيت ولفات حياة الكلينيك وديما خاشية راسها فيه.
كانت نيت قلبات واحد المريضة فالمستعجالات وطلعات عيانة دخلات للبيرو ديالها كتسنا السبعة توصل باش تمشي بحالها تنعس، كيف وصلات كلسات على الكنابي وتكات، حتا كيطيح فبالها اخر ماوقع معاها، ماكيبغيش اتحيد من بالها، كيفاش ناضت ولقات راسها فداك الدار وهو نيت، عينيه زورق لي كانو كيشوفو فيها، حسات بيه قريب واخا هو غريب، تنهدات وداتها عينيها تاصونا ليها التيليفون، ناضت مسخخة السهير والخدمة خايب وكيقلب، حيدات طبلية ودارت المونطو على الكيطمة لي لابسة عاد خرجات شعرها ، هزات الكونطاكط ديال الطوموبيل ومشات خارجة.
الاغلبية لي شافها كيسلم عليها عزيزة عليهوم خصوصا ان شحال من واحد كدافع عليه باش اتداوا فابور، وكدير عمليات خيرية بزاف وكتطوع ديما تمشي للبلايص لي ناقصهوم الدعم الطبي هاكا هي وهاكا دايرا، فحياتها ماكاينش الحب حيت بكل سهولة ماعندهاش ليه الوقت، وبالنسبة ليها لي يستاهل قلبها خاسو يكون كيستحقو.
هزات الطموبيل نيشان للموبل فين كاينة لاباغطومون حطاتها فالكراج لتحت وطلعات فالاسانسور، كيف دخلات شعلات ضواو وشوفاج عاد حيدات المونطو والفوقاني دالكيطمة بقات بديباردور، الدنيا مرونة الماكلة دبرا معمرة الدنيا الشكلاط والتشيبس والبيتزا لي شافها مايقول طبيبة، تحركات نيشان للتيليفزيون طلقات ميوزيك خفيفة عاد كملات تحياد ديال الحوايج ودخلات تحت الرشاش دوشات بالخف خرجات لابسة بينوار كدور بيه، دارت طاس ديال الحليب وكولاكاو ومشات تلاحت فالناموسية ديالها كادور فالانسطا، هي ماكاتحطش تصاورها عندها كونط نورمال دخلات لقات بزاف دالميساجات من امال كتعاود ليها على الخطبة سخفات بالضحك وفنفس الوقت فرحات حيت بقح كتشوف طه بحال خوها وكاتمناليه الخير واخا ديما واليديها كيفكرو يزوجوهوم ولكن هي عمرها فكرات فيه حيت تربات وكبرات معاه كتحس براسها ختو وصاحبتو كتر ماتكون مراتو ماتقدرش تخيلها، بحالي كيقولو ليها نعسي مع خوك ففراش واحد، كملات تقشاب وجاوباتها عاد دخلات دارت ليها جيم فالستوريات محيحة عندها انسطا فيه 15 الف متابع كضرب بياسات صحاح وما blogger ما والو غير كونط عادي وجامعة ليك الروينة.
سدات تيليفون لاحتو وحطات الكاس هبطات الخوامي بتيليكوموند هي جات تغمص عينيها ورجع صلح طاح فبالها تابدات كتقلب.
صبح الصباح على دار الورياغلي، رحمة كتفيق بكري هاد العادة بقات فيها من صغرها، مشات حلات لباب لواحد المرا كبيرة كتجي تخدمهم وكتهلا فيها رحمة مزيان واخا هي واقفة على شغالها ولكن الدار تبارك الله كبيرة وصعيب توفيها بوحدها.
جبدو الكصعة كيقادو الملوي، خلاتها رحمة طلعات مخلية شعرها عريان حيت غابوحدها مع ولادها المهدي مشا عند مو ودا معاه شيماء امال لي بقات مع ايمان اما رضى مشا للاباغطومون ديال باه بايت تما بوحدو.
شعرها زعر باقي زوين وقوي وفيه زغيبات قلال بويض ماكيبانوش مع الزعورية، فيقات البنات مبوقين، عاد رجعات لبيتها لقات مراد ناعس عيان تبسمات وخلاتو يكمل شوية.
طلعات عند عصام دخلات لقات وجهو صبح زرق، تنهدات ومشات كتقيص فيه بشوية قلبها ضرها وماحيلتها ليه ولا لولد قلبها، لي كملات فخطاويها طالعة للفوق قربات عند الباب مابغاتش دق حشمانة بحكم عرسان جداد، مع دارت كيتفتح الباب ديال البيت الثانية خرج منها طه شعرو نازل على جبهتو يالاه فايق لابس تريكو دصوف وسروال كيط.
شافت فيها مصدومة : طه !!
طه : ( سد موراه الباب وقرب ليها باسليها يديها وراسها وقرب كيشم فريحة شعرها كتحمقو ) الواليدة صباح الخير
رحمة : حبيبي مانعستيش فبيتك ؟؟
طه : ماشي دابا الواليدة ( باسليها يديها من لداخل ) وخلي هادشي هنا
رحمة : ( صغرات عينيها بالم حاطة يديها على حناكو ) شنو واقع ماقلتيلي والو شنو فقلبك اطه
طه : ( تبسم ليها عينيه كيلمعو فعينيها هي لي بنفس لونهوم ) رتاحي
عاود قرب باسها فراسها مغمض عينيه، ورجع دار بالخف مشا هبط للحمام، هي بقات متبعاه بعينيها، خرجات نفس من الاعماق، وعاودات دارت مشات للبيت حلاتو بشوية، كتلقا سميرة ناعسة وشعرها مسرح على الناموسية تعنكش، والعطا طايح عليها، تمشات ليها بشوية وهزات الغطا تغطيها حتا كتقفز سميرة من بلاصتها شافت فيها.
رحمة : باسم الله عليك ( تبسمات ليها ) صباح الخير
سميرة : ( فايقة مبوقة عاد كتحاول تستوعب ) خالتي رحمة
رحمة : كيصبحتي شوية ؟
سميرة : ( دارت كتشوف راسها فين ) اه لاباس
رحمة : ( تنهدات وبقات فيها واخا هاكاك ) نوضي بشوية عليك ولبسي هبطي تفطري معانا
حركات راسها باه كتحشم من رحمة
رحمة : ( بقات مترددة وهي تهضر ) شوفي لي باينك وباين طه خليه هنا فالبيت تاواحد مايعرف علاقتكم كيدايرة
سميرة : اصلا مزال منعسش معايا اخالتي باش نعاود
خرجات رحمة عينيها وسميرة عاد تداركات الموقف : ههه زعما ماواقع والو
رحمة : احم زعما لي اي حاجة تاهادشي مايعرفو تاواحيد
سميرة : واخا كوني هانية بيني وبين راجلي
رحمة بقات كتشوف فيها شحال وتبسمات ليها ببرائة جات نايضة ورجعات سميرة نطقات كتوشف فشعرها زعر من اللور وهي تنطق : خالتي نتي زوينة بزاف
رحمة : ( دارت شافت فيها وضحكات ) مانكونش قادك نتينا لي مزوينة اعروستي
سميرة : ( تبسمات ليها ببرائة عجباتها كلمة عروستي ) الله اخليك لينا
رحمة : اميين يالاه يالاه نوضي دغيا باش تهبطي تفطري
مشات خرجات مخلياها باقا مبوقة كتفوه ناضت دخلات لطواليط قدات حاجتها وخرجات بقات بنفس البيجامة هزات كريمة ماعرفات ديالاش دهناتها لوجهها وطلقات شعرها فرحانة براسها وعجباتها البيجة سروالها مزير من الفوق عازل ليها نصها لي ماعندهاش، وتريكو قصيير بزاف، عجبها راسها هزات الكحل عاودات كحلات، تحققات من دفارها باقا الصباغة كتبري فيهون ورجعات ستفات الحوايج عاد مشات خارجة فرحانة بشعرها وبراسها هابطة اول صباح ليها فدار راجلها.
كانو لتحت تجمعو كيفطرو تحط الفطور العسل والزبدة البلدية الفرماج الكوفيتير نيوتيلا، والحليب اتاي لي حبيتي كاين، كلس مراد كيدوي مع عصام لي بزز باش فايق وامال وايمان مغامزين كيضحكو وكيوريو فتيليفونات، تادخل طه مغوبش كينوض فصباح مخنزر، سلم غا بشوفة وكلس بقا كدوي معاه مراد، تادخل المهدي وشيماء ورضى تاهو حيت دارو ايفطرو باش ارجع هو وامال، تلاهاو كيدويو على الموشكيل دالبارح العيالات مامسوقينش كلها وهمو.
رضى مع كلس خطف تيليفون لامال
امال : اراااا تيليفوني
رضى : شكاتشوفي على الصباح ( كيلقا تصويرتها بالقفطان دالبارح حاطاها فالانسطا ) علاش كتخرجي فمك فتصاور كتجي بحال النعجة
ضحكات عليها ايمان
امال : ( خطفات تيلفونها مغوبشة ) ارا لهنا تيليفوني ماشي شغلك
رضى : توحشتي نطيرليك الكونط للمرة الرابعة ياك ؟
امال : ( شافت فالمهدي ) باباااااا
المهدي : رضى هنينا الصباح هادا
رضى : بنت الفشوش فششت مك غابلاتي، نقطعليك الركابي
خرجاتليه لسانها دار كيضحك ومشا كلس حدا طه، جات رحمة ملوية على راسها الشال حاطا سينية ديال اتاي باش تكلس كولشي نغامس حتا دوا مراد : فين العروسة ماغاتفطر
باقي ماكملهاش تادخلات عليهوم والشعر كيشالي : صباااااح الخيير هانا اعمييي ( التبسيمة واصلة للودنين )
كان يالاه هز كاس داتاي مع سمع صوتها غمض عينيه قبل مايطلعهوم
كولشي طلع عينو فيها مصدومين، ماعرفو باش تبلاو دارت ليهوم واحد الدخلة معجبة على الصباح، ايمان شافت نيشان فطه لي باقي ساد عينو، ورحمة ناضت قافزة مشات لعندها تلبق الوقت وتساير : مرحبا بيك ازاين دار دارك
جراتها كترد شعرها مور وذنيها وعينيها نيشان فطه لي ماكيشوفش فيها، رضى خوا البلاصة من تم وكلساتها حداه من جنب شيماء
مراد : ( شاف فيها ) مرحبا بيك ابنتي حسبي هادي دارك ونتي وحدة من بناتنا
سميرة : شكرا اعمي ( تبسماتليه ببرائة )
مراد : يالاه الشرفة باسم الله
امال وايمان بقاو كيتغامزو ورضى نزل عينو ماشافش فيها لا هو لا عصام، وكولشي مصدوم حيت عارفين طه مزيان كيداير حتا انهم تسناو انوض افرشخها قدامهم.
دارت كتشوف فيه ونزلات عليها الحشمة باش تاكل تسنات شي حد اعرض عليها والو كولشي ترون ونسا، دارت هي كتشوف فيه كيجغم من اتاي بكاالم بحالي ماكاينش، عوجات فمها وعلات كتافها كدور فعينيها وزادت كحزات تالصقات معاه.
هو حس عليها وخلاها مقربة ليه طلع عينو لعند ايمان شيرليها غابصبعو تمدليه واحد الطبسيل تم نيت عطاتوليه، هز مسمنة لواها بين صباعو وحطها، وقرب الفرماج ونيوتيلا وحطهوم حداها، حلات عينيها كترمش، رحمة شافت هادشي لي دار وهي تنطق مادا ليها كاس داتاي : كولي ابنتي ماتحشميش مرحبا بيك
تبسمات عاد قربات لعند الطبلة، وهزات كتدهن من الشكلاط لي حط قدامها فالملوي، اما هوا وكا اللور مد يديه لعند البودي دالبيجامة نزلو بشوية يغطي نصها وحط يديه مريحها على المخذة مورا ضهرها وكيشوف فيها عاقد الطناش
كلها فين كيهضر هي غير كتاكل وكتحس بيه موراها قلبها كضرب خصوصا عارفة بلي عينيه عليها، هو حتا باه كيجاوبو غير براس ماولاش تكلم، سالاو الفطور وناض المهدي شاف فشيماء : يالاه اشيماء يالاه نوصلو بكري ( شاف فمراد ) بيناتنا تيليفون ولابد غانولي نضرب دورة هاد السيمانة
رحمة : كلسو معانا شوية بعدا غير تاتغداو
شيماء : والله ماكرهنا ارحمة ولكن لافاك وامال تاهيا قارية كيخسنا نمشيو مزال نوليو نجيو الا كانت عندي شي سويعة خاوية هاد السيمانة نجي مع المهدي
مراد : ( ناض تسالم معاه ) طريق سلامة الجديد غايكون عندك
شيماء : ( شافت فامال ) يالاه اماما هبطي باليزتك، ولا تمشي مع خوك ؟
امال : اه انمشي مع رضى
رضى : تانا غادي غا يالاه
ناض طه سلم على المهدي ورضى ومشات امال طلعات جابت لاڤاليز عاد باش هبطات معاها ايمان لتحت باش اودعوهوم، بقات غا سميرة بوحدها كتفطر باقا الطبلة هاكاك فالصالة تامن عصام ناض، بقات كتاكل بالمهد تاسالات ورجعات اللور كتشوف فالدار والصالون ودور فعينيها، مزال ماكاتعرفش المهدي وشيماء ولا علاقاتهم مع طه ولا شكون عصام ماكاتعرف تاحد يالاه كتحاول تفهم, عضات على شفايفها كتفكر كيفاش فكر فيها وعطاها ماتاكل بلا ماتسنا من شي حد اعرض عليها، دارت يديها على فمها كتبسم بحال الحمقة تاكاتقفز بصوتو
طه : ساليتي ؟
طلعات عينيها شافت فيه دار يديه فسروال وكيشوف فيها مهدن،حركات راسها متبسمة : اه
تحرك لعندها وهو يشدها من دراعها مزير عليها تاغمضات عينيها ورجعات حلاتهوم جرها بجهد غادي بيها طالع وهي غير كتشوف بلا رد فعل، وصلو لشومبر فتح الباب ودفعها تارجعات اللور كتحك فدراعها خبط موراه الباب ودار شاف فيها شير بصبعو لوجهها : اخر مرة نشوف نقطة ديال الصباغة فكمارتك
بدا كيقرب وهي كترجع اللور قلبها كيضرب : شعرك يتغطا قدام اي راجل من غيري نشوف زغبة وحدة منو خارجة نقطعها ليك من الجدر
زاد كيقرب تاطاحت كالسة فوق الناموسية وهو يحني عندها بجهد تاتخلعات زديح قلبها وصل تالعندو هضر مهدااان : ماعلموكش والديك تحتارمي البراني ؟ نازل عازلة فلحمك ؟ شنو ماكفاكش تزوجت بيك ؟
سميرة : ( علات حجبانها قلبها كيزدح وليني لسانها واكلها ) انا هاكا كنلبس فدارنا فين الموشكيل
جرها من دراعها تاخوات بيها طاحت متكية وهو يحشيها فوسطو وزير برجليه على فخاضها تاغوتات بشوية : ااااه
زاد زير وعاودات غوتات وهي تجي تطلع راسها حكمليها يديها الفوق وقرب لوجها : هاديك داركم وهادي داري، فداركم سوطي بريح باك، فداري غاتمشي بهوا راجلك، ( هبط يديه حطهوم على نصها وزير بجهد تاعضات شفايفها ) نصك مانشوفوش معزول بطويل ولا القصير( زاد جامع ليها فخاضها برجليه تاعودات هاد المرا غوتات بجهد ) اش قلنا ؟
سميرة : صافي صااافي راه دريتيينيييي ( كتعض على شفايفها ) عندي جرحة ففخضيي ضريتيينيي
فتح رجليه وطلع راجع جوج خطوات اللور : هادي حسبيها اول مرة والهضرة ماكاتعاودش ولا شفتها مقصودة غاترجعي كفن عند باك
سرطات ريقها وهي كتشوف فيه ومرة مرة تهرب عينيها مشا لعند الباب حيد ساروت شافت فيه خرج وسد موراه الباب، خرجات عينيها فيه : سد علياااا الباااب، ( نفخات ) تفو قاسح قاااسح
هبطات سروال كتشوف فالفاصمة عمرات بالدم يعني جرح تفتح شوية دلات شفايفها : يعطيه مصيبة
ضربات فمها بزربة : لا لا الله انجيه راجلي وعمارت داري
رضى شد الطريق لطنجة بطوموبيلتو معاه امال تابع باه من اللور تاوصلو للدار، هبطو كاملين طلعو، دخل هو نيشان للدوش تحمم وخرج لابس بينوار، كيرتاح فبيتو مصممها بواحد الطريقة زوينة وعلى دوقو هو من النوع لي منين كيطلع ليه بنادم فراس كيفضل اكلس فدار، شومبر غلاب عليها لون الكحل فالرواق والناموسية والحيوط واحد لي مخليه بيض مقابل مع المرايا بضواوات خفاف، وفجهة محطوط كيتار اليكتريك مع كيتار نورمال عاد ماريو بكوفر فور كبير كيحط فيه السلاح، عندو شي ربعة ومنين كيبانليه شي واحد ناضي كيعاود اشريه، مبلي بصيد و tire, منخارط فالكلوب ديال طنجة والكلوب ديال الهدارات قريب لرباط، فينما كانت مجموعة الكليكة كيمشي، لبس عليه وهز البيسي يقضي خدمتو، هو ingénieur d'informatique، وماشي غير هاكا وانما تطور بزاف فخدمتو وكيطير فالمعلوميات، قرا شاد فيها ديبلوم ودار جوج دالماسترات، بلا لي فورماسيون العرام لي عندو، ودابا رجع دفع للدكتورة داير فيها بحث، كيخدم free lancer و trading ( التداول ) كيدخل منو الروينة ديال الفلوس، بلا السيستام لي كيخدم للشركات الكبار وخدمتو متقونة داكشي لاش كيتخاطفو عليه بعد المرات كيوصل بروجي تال 8 دالمليون، مدخل الصرف مزيان، التبزنيز داير يدو مع طه وباه، ولكن ماشي بزاف غير هو حافض نقايم كاملين وعندو دراري كيقادوليه الخبار مزيان ونهار كتوقع شي روينة كيصفيها لبنادم بلا مايحن فيه داكشي لاش كيخافو منو حيت عارفين لاغلطو غاتكون مــوتهم بالقرطاس.
ضل العشية كاملة خدام فالبيسي خرج تغدا مع مالين دار ورجع كمل تادخلات عليه امال : حوبيييي
ماجاوبهاش بقات تاحطات عينيها على تيليفون ديالو مشات هزاتوليه فتحاتو عارفة الكود وهي كتدوي معاه : بقا تحيد الموافقة احووبي كنحتاج لاكارد بزاف
دخلات عطات الموافقة على الكوموند لي دارت من واحد الشركة دالحوايج وهي كتقفز فرحانة خلصات لي بغات وحطات تيليفون ومشات كتنقز لعندو باستو من حنكو وخرجات هو ملاهي فالبيسي وهي قضات فيه الغراض
سالا الخدمة عوج عنقو مطرطقو، وناض لبس عليه حوايج الخروج سروال فالكحل وتريكو فالبيض طالع بالكول دصوف فوق منو جاكيت غليضة دالكوير فالكحل كيبري الجلد ديالو، جمع لي كارت ديالو مشط شعرو ركب الساعة رش الريحة ومشا خارج كيتلاقا مع امال كالسة بالبيجا هازا رجليها فوق لوسادة وحاطا قدامها طبلة ديال السقاطة كتفرج وشيماء مجمعة فواحد التيليفون مع صاحبتها.
رضى : منين تسالي الواليدة قوليها انا خارج
امال : اوكاااي حووبيي
رضى : شتك ضريفة هاد النهار ياك لاباس لاكنتي دايرا شي مصيبة سبقيها دابا قبل منعرفها نقسم مك على جوج
عوجات فمها : اشمن مصيبة بعد مني
رضى : الله اعميها ليك
قلبات عينيها مخرجة ليه لسانها مشا هو خرج هز طوموبيلتو G class mercedes, عندو فالكحل، قلع غادي عند صحابو فين موالف ادير معاهوم فواحد الكافي جيهت البحر، دارو قهيوة وتحركو لواحد الديسكوتيك اسهرو فليل مفوجين، مع كلسو جا عندهم سرباي جايب الشيشة، وحط شراب هو هز الشيشة منكهة، بين جوج صباعو كيتنغم بيها وفنفس الوقت عينو كيالنسر ضايرة بين كولشي ديسكو كان عامرة وزاهي تيتيز، تاخلطات عليهوم واحد خيتي باينة فيها بنت الليل كدبر على راسها وحطات عينيها على رضى، جات كلسات حداه وحطات يديها على سدرو : لامور ميمتا ماشوفناك
ساط فوجهها الشيشة عاد دوا : توحشتيني ولا توحشتي تبي ؟
خولة : بجوج نتينا وهواك فهاد الساعة
حط يدو على نصها كيزير عليه وكيرخي وكيشيش بشوية، وهي تهز كاس دشراب من حداه كتشرب فيه بشويّة، تاتعسلو عينيها وهو مرة مرة يلوح ليها كلمة ولا جوج كيزيد اشعلها وكيدور يدوي مع صحابو البنت كتدوز من قدامو لاشافت فيه وغمزاتو كيتفحصها من صبع رجليها الصغير تالزغبة اللخرة من شعرها، واحد الشوية صافي حس براسو تزير، تاواحد صاحبو لقا واحد الـ*ـحبة وناض معاها.
دار عند خولة لي لقاها قربات تبوسليه رجليه باش ينعس معاها ويرحمها، ناض تبعاتو تم نيت قابضة على دراعو وتاهو مخليها، هز طوموبيلتو ومشاو نيشان للاباغطومون ديالو دايرها فالشاريع دلاكوط لي علا البحر، كيف فتح الباب بسوارت تلاحت عليه كتحيد ليه فالجاكيت تبوس وتشلقم فيه هو حط نيشان يدو على الكسوة من لور كانت غاتوب رهيف قطعها عليها ولاحها فالارض، وزاد زيرها من شعرها بجهد تاقرب يتقطع غوتات ليه فوسط فمو ووزاد عضليها فشفايفها تاخرج ليها الدم ماجاو اقربو لناموسية تاكانت زبطة اصلا لابسة غا سترينغ تحت من الكسوة، لاحها بجهد تاتمخضات حيد البودي والسروال لاحو فالارض، وجرها من رجليها قلبها قطع عليها السترينغ طلع عندو نصها ودخلو فيها بجهد تاغوتات، بقا كيمخض فيها وهي كتغوت زير بيدو على عنقها من اللور وكيزيد ادي فيها ويجيبها ماعندوش مقدمات كيفرغ شهوتو فبنات الليل بلا مايضسرها ولا يعطيها وقت ويحل ليها النعسة، وفينما يطلاقا شي وحدة فايتليها نعسات معاه كتحماق تعاود تنعس معاه، رجولتو وهيبتو طاغية على بلاصتو وسابقاه، ولكن نهار كيبغي يطيح شي وحدة كترجع كيالعجينة بين يدو ماخلا مادوز الاحتراف ميزتو مطيب البنات انواع واشكال، ولكن لي عجباتو ودخلات لقلبو وماقدرش يقيسها هي نيسرين.
* الناظور
بقات كدور فالبيت كيالحمقة، ماقدراتش تحيد البوصمون حيت ماعندهاش باش تبدلو، وصل وقت الغدا تسناتو يفتح والو ماكاينش حس وتاحد ماجا عندها كتسمع مورا الباب والو غاتحماق شداتها القنطة كون كانت غا التلفازة بعدا هي لي كتلهيها ومتبعة مسلسالاتها، دخلات لحمام غسلات رجليها ويديها ووجها ماميكنش دوش وهي ماعندهاش باش تغطي الجرحة، ضفرات شعرها وجربات فيه كاع انواع المشاطي مسحات الصباغة وعاودات لون ثاني وماعجبهاش وعاودات مسحاتها وعاودات الثالث تنوض وتكلس، ستفات حوايجها كاملين فالماريو وتدور تشم فحوايجو هوا فرحانة حيت مرتو، تاهزات الكرسي ديال الكوافوز ومشات لجيهت البالكون كلسات كتفرج فالديور وغير من الزخارف كتطل على الغادي والماجي، جاها الملل حيت ماشي بحال ايتوزين هنا الدنيا صاقلة وساكنين غالي لاباس عليهوم، قليل فين تلقا شي واحد خارج وهاز طوموبيلتو، نفخات بجهد ودخلات وكلسات كتحرك رجليها بجهد كترعدهوم، المغرب وذن والضلام طاح سمعات معداتها كتغوت، نفخات وتكمشات ناعسة فوق الناموسية.
وذن العشا صلا فالمسجد عاد دخل للدار لقا غا رحمة وايمان كالسين فصالون كيتهاودو وفنفس الوقت كيتفرجو وداك المرأة لي كتخدم تاهي معاهوم.
طه : السلام عليكم
رحمة ناضت وقفات : وعليكم السلام حبيبي نسخن ليك الغدا ؟
طه : لا غا خليك تغديت لي قسم الله
بحنية : سميرة مانزلاتش تاكل كاع اولدي واش واقعة معاها شي حاجة
بهدوء : انا غانشوف
جاب ميكة حطها لعند ايمان وهي تنوض قافزة كتشوف فيها : يااي جبتهليا من اسبانيا
حركليها راسو وهي تضحك : شكرا شكرا شكرا..
طه : بصحة
مشا طالع وفيدو ميكة خرا عارف ختو كتحماق على الشكلاط دبرا والسقاطة ديال اسبانيا ديما كيجيبليها معاه منين رجع المرة الثانية عمرليها وجابليها من صغرها مولف ليها هاكا، وصل للفوق جبد السوارت من جيبو وحل البيت، دخل كيشوفها مضلمة قرب لعند الفيوز شعلو كيلقاها ناعسة مقلوبة والشعر مدلي على وجهها، مبدلة ولابسة بيجامة طويلة، بقا كيشوف شحال فيها، حط دوك الميكات كوحل عند الكوافوز ومشا دخل للحمام غسل وجهو ويدو عاد خرج بدل عليه كيف سد الماريو وهي تقفز كالسة مبوقة، هز تيليفونو كيخربق فيه وهو كيدوي : النعاس كيكون فالليل ماشي فصباح، نوضي هبطي تاكلي
علات عينيها مبوقة كتشوف فيه، طلع عينو فيها وهي تبسم كتقاد شعرها بزربة : جيتي، توحشتك ( تبسمات بعينيها لامعين )
علا عينو كيشوف فيها ببرود : يتوحشك الخير انا هابط، ستري راسك وهبطي تاكلي
مشا خرج وهي عوجات فمها كتعلي فكتافها : الباااارد، غير كيكذب توحشني وماباغيش اقولها
ناضت مبوقة غسلات وجهها ولبسات الشال على مافيها لي يحبسها ثاني غدا اتحماق داك الساعة، دارت بينوار فوق البيجامة طويلة ومشات هابطة تاوصلات للصالون لقات طه كالس حاط البيسي كيخدم فيه وداير النضاضر ديال البروتيكسيون، اول مرة تشوفو بالنضاضر وماعارفاش ديالاش بقات غي كتشوف، دورات عينيها فايمان كضرب فانواع السقاطة لي جابليها شافتهوم وهي يتحلو عينيها وريوكها طاحو كتموت على السقاطة وكانت فينما دير على الفلوس تمشي تشريها اما ماكانوش كيجيبوها فدار، عضات على شفايفها تادوات رحمة : مرحبا احبيبة اجي كلسي هالمرا اتحطليك دابا ماتاكلي
حركات راسها باه وقربات دور عينو غير من جنب قشع بلي باقا كتعرج تاكلسات حداه، وحطاتليها الخدامة طبسيل صغير ديال الدجاج محمر والضغميرة ديالو والخبز، قطعات بشوية كتاكل ولكن عينيها على السقاطة ديال ايمان كل شوية وطلع عينيها تشوف فيها، رحمة ناضت مشات طلاقات لمراد وطلعو بقات غير هي وايمان وطه، السكات غاصوت التلفازة ديال ايمان لي كتفرج فالاخبار زعما زعما اما هي كانت كتفرج فمسلسل غا قلباتو منين جا طه.
هزات كتاكل غابشوية ماكلتها قليل واصلا هي رقيقة كتاكل بزربة وغا شوية، ضغمات شي خمسة د الضغمات ووقفات.
كان متبعها واخا ماحاساش مرة مرة يدير عليها عينيه، تاسالات دار شافيها : زيدي كولي
سميرة : لا براكة عليا
تقلقات حيت ايمان ماعطاتهاش حلوة وحدة والاخيرة مامسوقاش ليها : وزايدون ماكيجنيش الماكلة غابوحدي مابغيتش خليتها ليكم
ناضت كتهز فكتافها ومشات ايمان بقات مصدومة كيفاش هزات كتافها لطه بلا حشمة بلا حيا، دورات عينيها لطه لي كان تبعها مهدن بعينيها تامشات ورجع كيطابي فالبيسي ديالو.
ايمان ماقداتش تدوي خايفة يقمعها ويقلبها عليها
طلعات هي للبيت ردخات الباب وحيدات الشال لاحتو وكلسات فوق الناموسية كترعد فرجليها، دورات عينيها وهي تبانليها ميكة كحلة فوق الكوافوز، جمعات حجبانها وناضت عندها كطير هزاتها فتحاتها كاطلقا العرام ديال السقاطة نفس لي عند ايمان غوتات بجهد وشداتها عندها مزيرة كتنقز ودور شعرها كيطير معاها مشات شتتاها كاملة فوق الناموسية، وكتفرق فيها بين يديها وتعض فشفايفها وترجع تنوض تحنقز، بدات باول شكلاط فتحاتو وكلسات تبننن وتعوج فعينيها، وكملات الثاني والثالث تاتكهمات جمعات داكشي ومشات خزناتو فماريوها زعما خايفة لا يهزو ليها شي حد وتمات راجعة كتحيد الكسوة الطويلة بقات بدوبياس بغات تلبس كولون حيت كتحماق تنعس غاب كولونات حنات مخرجة نصها كتقلب عليه تاتفتح عليها الباب هاكاك دارت بزربة شافت فيه وهو شاف فيها مشات عينو نيشان للبونصمون لي عامرة بالدم، وهي مع شلطها بقات تدور فعينيها.
مشا وكلس جبد الكارطونة ديال البونصمون ودوا كيشوف فيهوم وكيقرا وهي بقات واقفة كتسرط فريقها حتا هضر بلا مايشوف فيها : اجي لهنا
ماعرفات ترجع اللور ولا تزيد للقدام لابسة غادو بياس، علات كتافها وزادت لعندو تاكلسات حداه، جبد البونصمون قطعها وقادها بالمقص وهو يوقف : زيدي لعندي
كحزات عندو شويكيكة بجنب جاتو كتفلا، تجرها من دراعها بجهد تقصحات وساكتات مكمداها حيدليها داك الفاصمة وجبد البيطادين حمر دارو فالقطن وبدا كدهن ليها تاقفزات باش حط يدوبين فخاضها وعضات شفايفها، دورات عينيها كتشووف فيه وكتحس بيديه كيقيسو تما قلبها كيزدح، تعسلات وداخت، الشهوة ديالها شعلات بدوك القيسات لي كيدير ليها هو مركز مع دوا بشوية ومهدن، حيدو ورجع نقاليها بلانكول عاد لصق سبارادرا باش الوي الفاصمة فنفس الوقت هضر : ماتخليش عقلك يعواج كنقادليك دوا حيت كاتبقاي حرمتي وعلى مسؤوليتي
باش جايا باش ضايرة خرجات عينيها فيه طلعاتلهيا سخانة ربعين، واش هادا شريف كيقرا الدماغ اويلي بغات الغطا ينفاجر تحت منها وتهبط فيه، ناض واقف : جمعي هادشي وخزنيه تالغدا ونعاودو ليك
غسل يديه فالحمام وهز حوايجو ومشا خارج بقات هي فبلاصتها مصدومة وهي كضرب فناموسية : شحاااال عاااجبووو رااسووو، متكبببر طه الحكاااار
عضات فشفايفها تجننات ورجعات هزات البيتادين كان حداها رماتو بجهد ماعلابالهاش نيشان فالحيط حتا طرطق فيه كاع تفرشخ فالحيط مع بيض تطبع كولو : ويلييييييييي
ناضت كطير هزاتو من الارض تكب النص وباقي داكشي كيتكب جراتو لحمها باش مايزيدش بلطات وعمرات كولشي وخسرات الفاصمة لي قادليها مشات لطواليط دغيا لاحتو ورعات هازة شيفون باش كيمسحو زيجان هي دارتو على الحيط وهو يزيد اتبلط
خرجات لسانها كتفكر : هادشي خاسو جاڤيل
رجعات مسحات بزربة لحمها ولبسات بيجامة طويلة خرجات هابطة بشوية كتسلت كولشي نعس مشات لكوزينة كتقلب على جفيل مالقاتوش مشات لطواليط فين كاينة ماكينة دصابون كتقلب عليه والو هزات واحد القرعة شماتها جاتها بحال ريحة جاڤيل وهو الما القاطع خنقها ودمعليها العين بريحتو.
سميرة : عندهوم جاڤيل مجهد
طلعاتو كتجري للبيت خواتو فالشيفون كيتسمع تشششش، هي لاحتو على الحيط تاكاتشوفو كيتبوق والصباغة كطير لاحت الشيفون دغيا كتشوف يديها كيتقشرو عطاوها الحريق وتبوقو وهي تغوت لربها لي خلقها تازعزعات الدار كاملة كولشي قفز فبلاصتو
اول واحد وصل عندها هو طه كان قريب ليها دخل بزربة كيشم ريحة الما القاطع كتعطعط، كيف شافتو عينيها مدمعين بقوة الحريق قربات ليه كتمدليه يديه وتغبن وتصغر فصوتها : كيحرقنيييي كيحرقنييييييي اففف اففف
دغيا جبد يديها كيشوفهوم حومر بزاف هادشي غاشدات الشيفون اما كون كباتو نيشان كون راه طارت ليها جلدة، بزربة داخا لطواليط جبد يديها لعند لافابو كيغسل ليها وهي دخل رحمة موراها موراد كيشوف البيطادين مزلع والحيط عامر بيه وعاد تقشر من البلاصة دلاصيد روينة تقول الحرب العالمية الثالثة دازت، وهادشي غا سي سيدة بوحدها.
مراد مابغاش امشي لحمام احتراما لمرت ولدو رحمة اي قربات كتشوف سميرة كتبكي وطه كيغسل ليها فيديها.
رحمة : اشنو واقع هنا اش جاب الما القاطع لهنا
تعصب تاعينيه حمارو غسل ليها يديها مزيان وجبد الفوطة كينشف عاد قرب يديها كيشوفهوم : الواليدة كاين الثلج
رحمة : اه انا نجيبو
مشات خارجة دار عندها كيشوفها كتنفخ فيها وهو يقربها من دراعها غوت فوجها : فييييييين باغا توصليييي اقرييينة ابليييس فيييين ؟؟؟اش هاااد الرويينة
خلعها بغات تبول تحتها وكتحاول تملص من يديه قرب يقسم مها على جوج : مابلعانيش مابلعانيش طرطق ليا دوا بوحدو
ضرب ليها راسها من جنب جبهتها بصبعو تامشا وجا : واش كتبوهلي عليا ولا قنبولة حتا يطرطق
سميرة : هنننن
بدات تغبن وتعصر فعينيها : راه مابلعانيش طاحليا طاحليا
طه : واااش داااك لااصييد
كتعصر ومامفكاش رمشات فين كتهرنن : كيفاش هننن اش شاناهو لاصير
طه : المااا القاااطع
سميرة : جاڤيل جاڤيل كحسابني جاڤييل والله والله
كتحاول تملص كتشوفو باقي غايقتلها غابعينيه ومزير عليها كترجع تعصر وتغبن : مابلعانيش والله عافاك كنموت عليك ياك انا مرتك
طه : تقاااي شرييي ابنت التمسماااني تقاااااي شري راه غانقبرك فشي قنت الجنون مايلقاوكش
سميرة : يدي يدي ( كدمع ) يدي كيحرقوني
طلقها من يديها دافعها تارجعات اللور كتنفخ فيها ومشا خرج كيستغفر مولاه ويمسح على اللحية ديالو
مراد : اش هادشي
طه : بحالي بحالك الواليد فهاد الساعة
* طنجة
بغات تكمل النعسة معاه ولكن رضى ماخلاهاش خلصليها الف درهم على الليلة هزاتها خشاتها فساكها ولبسات كسوتها واخا مقطعة مع مونطو ومشات خرجات شدات طاكسي كتمسح فالماكياج، وصلات لدرب ديالهوم هبطات خلصات ومشات غادا للدار طايبة، كتعض فشفايفها وتفكرو، ماكرهاتش تزيد معاه من نهار نعس معاها اول مرة وهي طايحة فيه، دخلات لدار بساروت السقيل مشات لكوزينة وهي تلاقا معاها نيشان فالكوزينة كتشرب.
خولة : شتك باقا فايقة
غيثة : غير بغيت نشرب الما، خالتي قبيلة تسناتك تجي وتعطلتي
لي كملات تخلي نجمة وتعليق ✋🏻