كولشي كيتفرج فالموكب لي وقف، كون تعرض فشي فيلم مايتيقو طوموبيل مور طموبيل والدهاز كيهبط من منهم مستف، سبعة ديال الطبوقة وزيدها دالورد، وقف كامل فالارض وخرجاو التمسمانيية دراس اللول وموراه ولاد خوه وحكيم تاهو حاضر، وقف مراد مقابل معاد حاكم يد رحمة ومشبكها صباعو بصباعها، هي حانية راسها احتراما لراجلها ماكاتشوف فحد غيرو
تقدم تاوصل عند دريس العنين مقابلين : زيدو
خواليه الطريق وباينة التخوبيشة فوجهو شي ماحامل شي وكولشي واقف فالحلق وكولها جايب تريكتو الثقة ماكايناش، دخلو وتبعهوم المهدي مقدم شيماء هازا الورد ولابسة الكلاص فالكحل، عاد كوم ويونس هازين الكاديوات، الدراري هزو الطبوقة وتعاونو معاهوم ولاد عم سميرة تاهوما هزوهوم مدخلينهم، بقا طه هو اللخر تادخل كولشي على عينيه راد البال لكولشي هو من طبعو هاكا القبشة ماتدوز قدامو بغفلة، وكيرد البال بزاف بزاف للتفاصيل
تبعهوم داخل الدنيا عمرات تما التمسماني كتار والورياغلي تاهوما كلسو فصالونات كبار ومقادين على حقهم وطريقهم، تريات عاليين والطلامط متولين لي شاف من برا مايعرف الخبار من لداخل .
العيالات شدو صالون ورجال صالون مقابل مغطي غا برواق، تقدم جنب مراد طلع شوية السروال وكلس حال رجليه وكا لور مشبك يديه والخاتم دنسر بايين بين يديه .
شوفاتو متبتة ومن نوعو كيتقل بزاف كدورهوم بالمهل وكيعبر بيهوم بنادم .
والنسا كلسو رحمة حداها كلثوم وشيماء عاد ايمان وامال وحليمة مت المهدي لي جات معاهوم بحكم نونو مـ ـات ليها الراجل .
عند سميرة جاو صحاباتها كجريو لعندها كيهزو فيها وهي كتعض على شفايفها تقصحات كلسات فالناموسية ماقدراتش تاطلع عندها الرجل باش تشوف اش طراليها بسباب الفتحة لي عندها فالفخض
صاحبتها : اويلي اصاحبتي مالكي ويلييييي .
سميرة : اففف وا سيري برككي ليا ونتي كتويلي عليا
مشات صاحبتها كطل وبقات معاها الثانية هي بقات كطلق فرجليها وتجمعهوم والو تقسحات بجهد، مالقات كيف دير، ولكن والله ماتفلتها ليهوم
كان واحد السكات غريب تقول جنازة وماشي زواج، شي ماكيشوف فشي المهدي مرة مرة يدوي مع مراد ودريس مع حكيم، اما دراري كلها فتيليفونو من غير طه لي ماتفهميهش فين كيفكر ونيت هو لي قطع داك السكات خلا كولشي يشوف فيه .
طه : سي دريس التمسماني، جيت اليوم ندير الواجب مع بنتكم، طالب راغب فيديها على سنة الله ورسوله، إلى كان كولشي واجد ماكاين لاش نطولو فالهمس
بداو كيفرقو فاتاي والحلوة كتحط والنسا ساكتين وكيسمعو لراجلهم
دريس : لي بينا عمرو سنين طويلة، لا دم ولا عش غادي يقادو، كيديتو كيالبنت كيبقات ماغاتغير بينا والو
طه : ( طلع عينو كيشوف فيه بجدية وبكالم )
" إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ [الرعد:11]"
الملحة لا تلاحت على الجرح غادي تدودو، ماجايش نديها باش نهي العداوة الحرب لي بدات هادي عوام غاتسالي بالنية وصلاح النفوس، وانا حاشا واش نكون رب ونهدي الخلق، بنتكم غاتجي وتمشي من عندكم كيف كل لحوال، ماغانمنعهاش، والدم ماكيوليش ما، بنتك ليها عليك حق ونتا بالمثل، وفلي بقا بينا وبينكم القضبان
دريس : الدقة غاترجع لماكانت اليوم تكون غدا
طه : لي تقد عليه بالي بيه، ونسر ماغايحنيش الراس
حط مراد يديه عند فخضو بمعنى انا غانتكلم : لي معروف مايتقالش قدام البراني، كولشي يبقا مستور هنا، والا ماكاين لي غايضيع قد بنتكم ( بمعنى تاواحد مايعرف شنو خلف الستار وهاد الزواج لاش )
دريس : الزواج قدام الناس ولكن لي فراسنا غانديروه مور الحيوط، العدول هاهو اسي الورياغلي، نعيطو للبنت تهبط تسني
صاحبتها جات كتجري لعندها كتعيط ليها ناضت عاضا على شفايفها حات تحرك ماقاداش، كتمشي وتعكز بشوية .. مها طالعة ليها باش تشدها شافتها هاكاك كحلات بالعما : اويلي على المسخوطة اش درتي مالها رجليك
سميرة : مامالها والو دوزي عاونيني نهبط عند العريس .
ربيعة : بقيتي ترطاي تاجبتيها فراسك حوفي مك يالاه زيدي شوفي هاه تركني وترزني راكي ماغاداش بالاحضان يا هد المسخوطة ماكاينش لي خارج علينا من قدك .
سميرة : ( علات ليها كتافها ) ديتو ورياغلي كيتك، حسدتيني .
قرصاتها تاصمطات، وشداتها مزيان من رجليها هبطات كتعكز وصلو لتحت وهي دور لوات ليها الزيف على شعرها تاغطاتو كامل ودخلاتها حنات راسها بزربة حمارو حناكها كتسرط ريقها، داخل بشوية ولكن كتعكل، حط عليها العين من دخلها وسكاناها من شعرها لي خارج شوية من زيف لكحل عينيها للعكر لي ففمها وشفايفها لي كتعض فيهون كيبان عليها الستريس بقا غادي نازل معاها تاوصل لتحت صغر عينيه عرفها اتكون كتكز حيت رد البال لطيحة منين شاف فيها، علا حجبانو مزيان وتسنا تاكلسات عاد قلب عينيه لعند العدول لي بدا كيفتاتح الكتاب السكات وكيتسمع غير صوتو، تاحد مامصدق شنو كيطرا دابا، سمية التمسماني، والورياغلي تجمعو فكتاب واحد .
وصل عند الصداق وهو يعلي عبنو لدريس رفع صوتو باش كولشي يسمع : حنا ماكانطلبوش وقيمة بنتنا غالية
رد عليه طه بصوت عالي رجولي .. سمعاتو تهز قلبها ويديها بداو كيترعدو : كنعطيها عشرة دالمليون .. ( ناض رضى وحطها مقادة مليون تابعة مليون زرقين مستفين تاحلو عينيهوم مزيان )
طه : ( نطق بجدية ) هادا نصيبك من عند راجلك حقك وحلالك تصرفيه بالهنا
دريس شاف فيه مزيان وفهمو بلي معنا عليه بمعنى راه صداق يتعطا لمراتو وماشي ليه
* طنجة
قاليك لمــاتت مك توسد العتبة، غيثة طرشوها الحيوط ولقات راسها عند بيوت العباد طالبة فنعسة تحت من السقف، مفتاقدة لعش حنين لي ينعسها فحجر الراحة، لا عائلة مقادة لا ووالدين بغاوها
كتشوف بعينيها منهنا لهيه المدابزة نايضة بين بنات خالتها وبنات جيران وهي غير كتفرج، ماعندش مع المدابزات وماكاتبغيهومش حدودية وديما مكالية الحيط، ماشي حيت ماقادراش تواجه بلعكس، تواجهك وتقول فوجهك لي خاس يتقال، ولكن طرونكيل وماكاتبغي عيب ولاصداع
طلعات للبيت ديال بنات خالتها تم غاتنعس فالارض، وبدات تجبد حوايجها لي خاس يتصبنو، ختارتهون بين يدهيا وهبطات بيهوم لتحت فواحد الطواليط كتصبن خالتها فالبانيو واخا بناتها مقاتلين برا هي موالفة داكشي مرة مرة تغوت من تم تسكت فيهوم، وقفات عليها غيثة بصوتها الكالم : خالتي بغيت نصبن هادو
عيشة : اري لهنا نشوف ( جبداتهوم لعندها ) اري انا ندوزهوم ليك مشي نتينا اتكون عيانة نعاس
يالاه غاتجاوبها وهي تطلق واحد البودي كيجي طالع بالكول وزوين واخا غيثة حوايجها ماشي ماركات ولا شي حاجة دزواق ولا ستايل لا اغلبيتهم عاديين ولكن نقية وكتلبس متول وداكشي مامقطع ماوالو
عيشة : زيين هاد البودي سنااااااااء ( كتغوت لبنتها ) اجي لهنا
جات سناء من موراها كتلهت : هانا امّـي مالكي
عيشة : شوفي هادا واش ايجي
سناء : ايجيبننيي ايجييي
عيشة : ( شافت فغيثة ) هانتي بنات خالتك يبقاو يلبسو معاك راه مساكن ماعندهوم شاي وتانتي بقاي تلبسي معاهوم
غيثة تشلطات بقات غاكاتشوف وترمش تحت من النضاضر ودارت كتشوف سناء لبسات تريكو ومشا بيه بالنسبة ليها هي ماموسخش تنهدات مغمضة عينيها عرفات بلي لي جاي ماكيبشرش بالخير
خلات ليها دوك الحوايج ومشات طلعات جبدات تيليفونها سامسونغ قديم ومهرسا ليه الزاجة، دارتو فشارج تاهو عندها مقطع غي كتلبق بيه من شحال وهو عندها، هزاتو شعلاتو ودخلات غير من زيرو فايس تما فين كتواصل مع امال، لقاتها مسيفطة تصويرة من صالون قاتليها : ناري اصاحبتي وجنازة هادي
ضحكات وجاوبتها : عائلتكم اختي مافيا هه غاخوك داك النهار خلعني
هزات صوراتو ليها بزربة وسيفطاتو ليها شلطاتها تاسرطات رقها وقربات مزيان تيليفون كتحقق فيه كيبان جدي بزاف بزاف عكس كيف كان معاها اخر مرة وكيحسب الفلوس بين يدو خرجات عينيها وقلبها ترعب ناري ياكما بصح مافيا
أمال بقات كضحك وكتهضر تانغزاتها شيماء : براكة ويلي قدام الناس
أمال : شلا ناس اماما
خرجات فيها عينيها باش تسكت وطلعو عينيهوم كيشوفو فالعدول كمل العقد ومد الكتاب لطه سنا بخط رقيق عندو واحد السينياتير متميزة وصعيب شي حد اقلدها ورجعو مدوليها الكتاب هي حنات بشوية عاد كتفكر كيدير تسني كولشي كيشوف فيها وكيتسنا ليها دارت دويرو فوسط دويرو ونقطاتها لداخل رضى دور راسو كيضحك وعصام كيتشفا فيهوم، اما عمامها وولاد عمامها كينفخو كولشي شافها كيدارت ليها، اما طه شاف فيها ورجع هبط عينو بشوية كدور الخاتم بين يديه فيه طبيعة
مداتليهوم الكتاب بابتسامة بريئة، وناض العدول كيبارك ليهوم عاد وقفو تقدم دريس مقابل مع مراد تسالمو غا باليد وعاد شاف فطه وهو يمدليه يديه وشوفاتهم مامفسرينش، الحقد والغل تشميه من بعيد، ماكاين لا الله اكمل بالخير لا الله اكمل بالشر مصاب غا سلاك حيت ماكانش سلام عادي كان سلام كيعني بداية الحرب لي ماعارفينش باش غاتسالي
نوضات ربيعة سميرة مشات لعند دريس باستليه يديه وحطاتها عند راسها ورجعات مشات عند مراد بخطوات ثقيلة حيت دازت من حداه وحاسة بعينيه كيسكانيو فيه الرعدة شداتها فقلبها تاتزيرات، باست اليد لمراد تاهو وهو ينطق بجهد : الله ارضي عليك ابنتي الله اكمل عليكم بالخير
طه : ( ماحدها قريبة ليه دوا بكالم مقصح هضرتو ) لاكانت العروسة واجدة ماكاين لاش نطولو الكلسة الله ارحم من زار وخفف
سرطات ريقها بحالي بدات كتحس بسخانة، وحناكها تزنكو تخلطو عليها العرارم ولكن فوسطها كيشطح بالفرحة حيت غاتمشي من هاد الدار دزلط
مشات كتعرج خرجات وتبعاتها ربيعة طلعو بيها للفوق شربو غا شوية من اتاي بزز وطه لي بدا اللول هز الكاس وجغم منو بمعنى ماكاينش اللعب فالنعمة
الطبوقة كولشي طلع للفوق كانو جابوليها باليزات وهي ديجا كانو عندها شي وحدين .. بدات كتعمر فالحوايج لي جابوليها حيت حوايجها هي ديجا جمعاتهوم
عيطات ربيعة لولد عمها مخلية الهبلة كتعض على شفايفها وهي كتشوف فشوميز دونوي لي شراوه ليها فالبيض كيحمق هزاتو بين يديها وبقات كتنقز دارت ربيعة كتشوفها : وجمعي الله اعطي لمك الهرس
خرجات ليها لسانها ورجعات خشات كولشي فالباليزا شافت عرام دالماكياج وكولشي كتحمع وغايطير ليها الفرخ وعينيها لامعين ربعة دالباليزات كبار لي تعمرو وبداو كيهبطوهوم ، تستفو حدا الباب، ناضو الورياغلي كاملين خارجين دارو اسرع ضريب زواج فالمغرب، بقا طه واقف مع العدول باش ادير معاه توقيت اجيب العقد من المحكمة، عاد خرج حليهوم الطوموبيل كيحطو لي ڤاليز تما، والنسا مشار ميطلعو فطموبيلات ديالهوم
الفوق هي دارت الشال على راسها فالبيض عوجات ربيعة فمها : لا لا هادشي ماعاجبنيش تسناي
سميرة : وراااااه تعطلللت اشنوووو
مشات دغيا مها طارت لبيت جبدات سلهام فالبيض قديم ديال الفقهة وتمات جابها ليها شافتو سميرة وهي تنذب حناكها : اويييل امي واش وليت بغلة القبور
فالناظور، فواحد الحي باقي ماتسكنش بزاف بالناس فيه البني باقي بالطوب وديور مامصبوغينش وكاملين عندهوم كاراجات من لتحت، كالس فوق واحد الكرسي فالسطح الفوق كيكمي جوان مبوق، تاكيسمع شي جوج دراري كيدابزو بسبان من الصمطة لتحت ناض كيطل كيشوف دراري تجمعو وهو يهبط من تم وصل لتحت وخرج من الدار كيقرب باش اتفرج مزيان، مخلي موراه الباب محلول، دخل مخبع وجهو مغطيه من الباب نيشان للكاراج بلا مايشعل لا ضو لا والو جبد البيدو وكب دوليو عمرو علي الخناشي تما عامرين بطونات دالحشيش، وخرج لبرا قبل مايرجع العساس، تخبع فواحد القنت قبيلة الدار وبقا كالس تاسالت المدابزة لي كانت مديورة اكسبري .. وتم راجع العساس سد الباب وطلع الفوق
شافو دخل جبد كارو كماه مزيان باقي شاعل ومشا داير من حدا دار رماه عند الباب ديال الكراج لي كان خارج منو الدوليو خانق دنيا .. مع فات تاكيدير شعلة وحدة مع الدولية وتطلقات العافية فوسط الكاراج لي مسدود
* ايتوزين
ربيعة : تي لبسي بغيت البغلة تنطحك
شافت فختها صغيرة وتبسمات ليها حنات عندها : غانبقا ديما نجي نشوفك قراي مزيان، انا ديما معاك
حركاتليها ختها راسها وهي تعنقها مزيرة عليها بزاف عاد دارت عند مها بقات كتنفخ لبسات ليها السلهام صحة ومشات مهبطها مغطيا راسها تاوصلوها لتحت وهي تسلم عليها تاشدوها دموع وسميرة كاتسنا تسالي خلاص .
ربيعة : ردي البال لراسك لا تعداو عليك عطيلينا
سميرة : حسابليكو هادو نتوما، بسلامة وتهلاي فامينة امي كتسمعي
ماخلاتهاش تكمل مشات خارجة وهازة قفطانها على رجليها لي كضرها بزاف كتعفط عليها بزز تاخرجات كتشوف طه واقف عند الطموبيل كيتسناها سرطات ريقها ومشات تحت عينين باها لي ماسلمش عليها ولا شاف فيها عينيه فعينين طه لي هادشي كامل دايز قدامو
تاوصلات عندو بقات حانية راسها ماقاداش تشوف فيه، هو عينيه كانو حارين قاصحين بزاف فباها هبطهوم لعندها ومد يدو حطها على ضهرها من لور حسات عليها تاطلعات تبوريشة من معداتها وزيدها فتحليها الباب قدامو هزات بشوية القفطان وطلعات تابقا سلهامها مدلي، هزوليها وحطو لعندها عاد سد الباب بجهد، تاقفزات عاودات سرطات ريقها ويديها بردو عاد طلع لطوموبيل قدامها ..
كيف ديمارا تبعو كولشي ومشاو غادين ربيعة دمعو عينيها بنتها لي كانت باغا تفرح بيها بزاف وديرليها عرس دايزو الكلام مشات كيف الميتين بحالي سيفطاتها فالمحمل، دريس دار دخل وحكيم بقا كيشوف وهو يعيط فتيليفون : قديتي الغرض ؟ ... مزيان .. ايوا دابا نقولو الله اكمل بالخير ..
مشاو شادين الطريق لناظور، السكات والسقيل وهي حانية راسها وكتنتف فصبعها بضفرها، ورجليها كتزعزعها، عكسو هو لي مهدن وشاد الكيدون غا بيد واليد الثانية محطوطة باريحية على فخضو بحكم الطموبيل اتوماتيك يعني مغاديش يحرك الفيتاس
كتقلب غا عينيها ليه وترجع تشوف قدامها الهضرة تسرطات ليها ولسان تلوا، شداتها لخنقة هزات يديها بشوية كيترعدو مداتهوم لعند الشرجم تفتحو يالاه هبط شوية تاكاتشوفو تبلوكا ورجع كيتسد دورات راسها بزربة كتشوفو كيرجع اسدو وسوگرو باش مايعطيهاش مرة خرا الحق تهبطو، شدات على قفطانها مزيرة وكتشوف فملامح وجهو لي مهدنين وماكيبينوش على فاش كيفكر، طلعات معاها تبوريشة الباردة وقلبها بدا كيضرب ديال بصح بجهد
مازادتش دوات حتا دخلو لناظور ديجا طالعة لهيا فراسها من كترت ماكيمشيو ليها هي ومها، ولكن عمرها عرفات فين جات دارهوم تاوقفو حداها هزات راسها كتشوف ودور فعينيها تاكاتقفز باش ردخ بابو، دورات عينيها كتشوف مراد وقف تاهو وموراه المهدي وعصام كولشي نازل وشي كيدوي مع شي عضات على شفايفها، دغيا ضارت كتسربي فتحات الباب باش تنزل وهو يتشد عليها
طه : فين غادا ؟
سميرة : ( خرجات عينيها وطلعاتو وهي دير ضحيكة صفرة ) غانزل
طه : قتليك نزلي ؟
سميرة : ؟؟ ( كتمرش عينيها )
طه : ( شير ليها بعينيه عند رجليها ) جمعي رجليك
مع جمعاتهوم مع ردخ عليها الباب تاتهزليها قلبها وسد عليها بالكونطاكط حلات فمها كضحك : ياكما غانمشيو لوطيل ههه ( عضات على شفايفها ريحتو باقا فطوموبيل ) ريحتو زوينة
مع دارت مع كتشهق دايرا يديها على قلبها ، طه عطا كروشي لعصام سوطاه فالارض ناض الغوات .
عصام طاح فالارض كيمسح الدم لي خرج من فمو وايمان لي غوتات امال بقات مصدومة رضى كان عارف شنو وقع وفضل مايدخلش والا طه غايشرك الحزاق كامل حيت عينيه حومر ..
دور ساعة من يدو وشير بصبعو ليه : منين ماتكونش قد المسؤولية ماتراماش ليها ( رجع حنا عندو هزو من الكول وعاود عطاه ضربة ثانية واطاه فالارض اما المهدي ومراد كان مشا بالطموبيل افك الروينة دالحريق لي ناضت ) توكض ازا*ـل توكض .. ( رجع هزو من اللور ومشا مدخلو لداخل فدار وهو الضربة لي كلاها نونخو فيها عاود عطاه كروشي خر تاطيحو
طه : قتليك الذيبو ديال زمامرة حط عليه العين قلتها ولا لا اش درتي نتا ؟ ( غوت تاتزعزعات دار ) دوييييييي
عصام : ( علا عينو فيه حومر وكيمسح دم ببرود ) هادشي بسباب بنت الـ*حاب لي جبتي اسي روبيو ولا ( جاتو دقة قادات معاه تواطا فالارض تاغوتات رحمة وجات كتشد فيه )
طه : مرت خوك الكلب ( عاود عطاه بالخاتم ضربة قاصحة تارش ليه دـم من نيفو )
رحمة : طه عافاك طه لا شوف سماعني طه هو ماعرفش عافاك ( عينيها دمعو )
مادوا ماتكلم عينو قاصحين عليه هو بقا مواطي ود*ـمايات خارجة من فمو ونيفو عينو تزرقات
امال وايمان طلعاتهوم شيماء للفوق مخلين غير رضى لتحت كيهضر فتيليفون مع المهدي تحرق ليهوم الديبو كامل ..
طه حيد عليه المونطو بقا غا بشوميز ويديه حومر ، عروق عنقو مزيرين دار عند رضى : داك العساس يطلعو لديبو الكبير باش نتحركو
عيط بجهد لختت هبطات كترهد قبل مايمكمل عليها تاهي صباعها تعوجو : طلعي العروسة لبيتها تانجي
حركاتليه راسها بزربة باه بلا ماتزيد تكلم، مشا هو خرج كانت ساهية وكتفكر كيفاش وعلاش تاحل عليها الباب بجهد وهي تقفز : هبطي دخلي لدار
شافت فعينيه كيحومر ، نزلات بزربة كتحفي فرجليها وهي كتعرج حل البالز كيهز كل وحدة غابيد وحدة وكيحطهوم عند الباب بواحد الزربة تابقات غامضدومة دار شافها باقا واقفة حدا الباب : ( علا صوتو شوية ) دخلي لدااااخل
دارت بزربة داخلة تترضخ الكوفر ومشا كيفتح الصدايف دالعنق طلع فالطوموبيل وقلع تاطير الغبرة، بقات كدور فعينيها كتشوف فعصام طايح ورحمة كتحاول تعاون معاه تهزو علات كتافها وهي مالها، بدات كتجر فباليزا جات ايمان كتعاونها وهي معصبة حيت كتشوفها هي سباب هادشي .
ايمان : طلعي نوريك بيتك ( هزات معاها تاهي باليزا )
طلعات وتبعاتها كدور فعينيها كانت الدار من لداخل كتحمق وزادت تقادات منين سكنو فيها مراد ورحمة وزادو طبقة رابعة، خلاو وحدة كلها غير صالونات ووحدة كلها بيوت عاد طبقة ديال المعيشة فين كياكلو وكيكلسو، وصلاتها لطبقة للخرة كانت فيها بيت كبيرة معروفة ديال طه .. حلات ايمان الباب ودخلات مقادة ومبنية بفصالة على دوقو، فيها حمام لداخل وهي البيت الوحيدة فالدار لي فوسطها حمام
دخلات سميرة غاكاتشوف واسعة وفيها ناموسية ديال جوج داكشي متول وكوفرلي زوين فالبيج ( bland cassé ), وكوافوز فيه روايحو مستف وسانبل فالبيض، الماريو كبير وفيه مرايا الوسط طويلة زرابي فالبيض ورواق بالذهبي والبيض .
سميرة : ( حمقها البيت ) وااو هادا بيت طه ؟
ايمان : اه بيتو، دوك البالز تاجي واحد من دراري ونقوليهوم يطلعوه
سميرة : اصلا مامحتاجاهومش دابا
ايمان : ( نفخات ) مهم رتاحي دابا وبدلي عليك تصبحي على خير .
سميرة : صافي غاتنعسو دابا ؟
ايمان : واش ماشفتيش اش واقع ؟
سميرة : لا ماشفتش اش واقع
ايمان : ( مصدومة ) ختي انا مشغولة من البعد
مشات وخلاتها كتشوف فيها عوجات فمها وعلات كتافها، مشات كدور فالبيت حلات الماريو كتشوف حوايجو مستفين قربات شمات كطلع معاها ريحتو، زادت فتحات عويناتها كضحك، سداتو وحلات ثاني كتلقا التيكوات كولشي مطوي ومقاد وتقول واش مخسر شي حاجة والو، تحت منهم مجورة حلات لول كتلقا البوكسورات مستفين واحد فوق واحد هزات واحد بين يديها وزادت عضات شفايفها حسات بتبوريشة
سميرة : انا فبيت راجلي وهادو حوايج راجلي اييييي ههههه
عاودات سدات وحلات الثاني كاتلقا تيشرت مطوين وحداهوم تقاشر تاهوما مطوين واغلبيتهم بالباكيات جداد، جات تحل الثالث مابغاش لقاتو بساروت، سداتو ودارت ثاني مشات لجيهت البالكون كتلقا الصلاية محطوطة جنبها المصحف زوين ونقي ، علات حجبانها زعما " ايييه "، دارت مشات لحمام دخلات باش تلقا الماكينات دالحسنا طوندوز كولشي مستف شيتة دسنان نقية، لافابو برخام فالابيض وموراه بانيو كبير فالابيض عاد دوش برشاش، حمام كبير معلق فيه بينوار فالكحل، تقول اوطيل، بحالي تاواحد ماساكن هنا، كولشي فبلاصتو
مشات خرجات من تم وهي متحيد القفطان تابقات غا بكولون وديباردور فالابيض، تقدمات عند الكوافوز هزات ريحتو كتشم فيها تاغمضات عينيها، وحطاتها
رجعات حيدات كولشي تاولات زبطة وفرعات باليزتها فالارض جبدات شوميز دونوي لبساتو تقدمات عند المرايا خلات شعرها مطلوق جاها كيحمق وزادت الكحل عكرات وباست راسها من المرايا
سميرة : انا واجدة ليك العمر
وقف بالطوموبيل حدا ديبو الكبير، نزل لقا رضى كيساينو ورجال مستفين ضربوليه تحية، كاملين كيترعدو غايبولو فسروالهم قليل فين كيجمعهومً ولا كيتلاقا بيهوم، الا لاكانت نيت نايضة شي مصيبة، مشا داخل عينيه حومر دور عينيه على رجال كاملين وهو كيفتح فالصدايف ديال الكمام وطلعهوم تاوصلو لحد الكوع حيد الساعة مدها لرضى، لي جبد كارو كيتكيف، عارف بلي هاد الليلة غاتسالي بالمـ ـووت ديال شي حد
دور خاتم النسر من برا لداخل، كيشوف فالعساس كالس فوق الكرسي وربطوليه يديه كيف شافو بدا كيزاوجو : اناا راغبك الرايس ديالنا الله ارحمليك الوالدين والله ماشفتو ماشي انا لي درت داكشي و ( باقي ماكملش كيرفع يدو وكيعطيه لوجهو تاطاح بالكرسي مردوخ بجنب على الارض طارت السنة من فومو والنسر بقا مصور فوجهو )
قرد لعندو وعاود طبطب كيعطيه بدقات خفاف على الحنك لي سرفقو فيه : منين نجيبك ا*بي باش تحضي السلعة، ماخاسش تضرب العشبة، ماخاس تكرع الطاسة، وماخاسش تجمع ليا الزوا*ـل، كنخلصك دير خدمتك مقادة ولا تــ*ـاود ( عاود عطاه تسريفقة تاتغمضو ليه العينين )
فمو كيترعد ضربة وحدة هبطاتو ماكيضرب لا بزرواطة لا بتيو يدو كافية وموفية دقة وحدة ماتوليش
ناض واقف كيقاد الخاتم كيسمع رجال مدخلين هاداك لي شعل الحريق بالكارو، ضربو ليه السربيس وقلعوه شكون طه داير الغرص فكاع الريف، النحلة يعرف رحيقها من تولد
وقفوه حداه شابع عصا، جا رضى بشوية كان متكي على الكراج كيتفرج موالف بهادشي ولكان طه كيعطي دق هو كيفنيها بنادم بالقرطاس، وقف عند طه مادليه الكارو، وحيد العساس رماه مغيب وجبد الكرسي قالبو كلس عليه اتفرج
طه : ( حيد ليه الطاكية من راسو ) رجال كيشعلو العافيا بلوقيد ماشي الكارو الكلب
هبط عندو طفالية الكارو عند حجرو تاصعر بالغوات مطلع راسو عينيه تقلبو، وطلع واقف كيشوف فيه، الفك ديالو مزير، طلع عينو لعند رضى : سيرو تعلمو فيه التيير
رضى : ( ضحك طانز ) الحجل قلال هاد العام
طه : والحلالف كتارو ( رما الكارو بجوج صبعين وبدا كيهبط الكمام دالشوميز ) منين تقديو فيه الغراض رميوه فديبو دالجبل، خليوهوم منين يصدرو السلعة دالبحر اوصلو معاهوم العشا للشرن
مشا خارج مخلي رضى كيضحك على كلامو نيت عندو واحد السلاح جديد خاسو فيمن اجربو
طلع فجيب ديالو وشد طريق كيطرطق فعنقو، وكيفكر مزيانو، مزير على الكيدون بيد وحدة، واحد البلان فراسو، عارف انهم غايطيحو عليه حيت هادي ماهي غير الشلاظة، مزال عاد غايبداو، عيط على مراد هو والمهدي باقين كيفكو داك الروينة مع البوليس والمحضر والروينة، خاسهوم اخرجو منها سالمين وبلا شوهة بلا تقارير، عاود دور هو غابتيليفون كيحرك كولشي وكولشي ترون، يا ايما غايكمعو راسهم يا ايما غايمـ ـوتو النسر جاعر وفاي لحضة غايقلب عليهوم القفة كاملين، تقلبات فالريف وكولشي وصلو الخبار
وقف عند الباب ديال الدار ورد راسو اللور ساد عينيه، تارجع فتحهوم جبد كارو وشعلو، فتح شوية شرجم باش القا دخان منين اخرج، تاسالا عاد هبط فيديه هاز المونطو بقا غابسوميز واخا البرد ولكن دمو سخون، حل الباب بسوارت كيسمع السكات، عرفهون ايكونو تجمعو فشي صالون صاقلين ولا كلها مشا ينعس ..
مابغا يدوي مع حد مشا طلع نيشان لبيتو، مع حل الباب كيلقا غير الضو الخيخ مشعول وهي واقفة حدا المرايا كتمشط شعرها، سد الباب وناضت دارت شافت فيه تبسمات، طلع حجبانو من راسها لعينيها لفمها لسدرها لي باين من شوميز دونوي لخسرها لنصها لفخاضها لي عريانين والفاصما كاتبان، وهو هابط تاوصل لرجليها لي مصبعين ووحدة منهم كاتبان منفوخة وزرقة
تقدم رما من يدو المونطو على بوفا صغيرة وهي تسرط ريقها وحاولات تشد فراسها حيت كترعد منو ولكن هادشي كيزيد اطيحها فيه، عينيها لامعين فعينيه نيشان
تاهو قرب مهدن تاوقف مقابل معاها ولات كطلع راسها باش تشوف فيه حيت قصيرة مقارنة معاه هو لي طويل وعامر ماكاتباتش قدامو .. زاد كيقرب سرطات ريقها وبدات ترجع اللور وهو زايد بيها تاتكالات مع الحيط
سميرة : ( رققات صوتها وهي مبسمة فيه ) على سلامتك
زاد علا حجبانو ورفع يدييه حطها على الحيط حدا عنقها وقرب وجهو منها وهي غمضات عينيها محمسة والفراشات كيطيرو كتسنا يبوسها قرب وقرب وقرب تاوقف عند وذنيها
طه : شتك موحشة تنعسي معايا ؟ ( حلات عينيها بجهد عاود هضر متابع كلامو ) كلسي فالناموسية
بعد ودار كيفتح الصدايف ديال القميجة وهي سرطات ريقها قلبها كيضرب فتسعين مشات كترعد وتعرج كلسات، صوتو رعبها، دار كيشوف فيها وهو كيفتح الصدايف مهدن وبدا كيدوي
طه : سمعي ابنت التمسماني و عقلي على هضرتي...الكلام عندي مكيتعاودش زوج مرات، لحتي باطلك عليا و رخصتي راسك تال الأرض و مقلنا والو،لاحوك طاسيلتك سلعة ذليلة بين الرجلين و هزيناك و قلنا دير الخير تلقاه، بلاني الله بيك و تجمعات سميتك بسميتي و مزال مخلاقش لي يمرمد و لا يطيح بالورياغلي غتشدي الطريق مسگدة ولا قبرك انا لي غنحفرو بيدي و إلى مقـتلوكش ديك المرة هاد المرة غتكون موتك على يدي،خطوة مور ضهري غتساوي حياتك، و الحرف لي بيني و بينك الريح متسيقش ليه الخبار ولا داك اللسان الطويل غنقطعو ليك من جدر، نوضي تجمعي عليا و حيدي هاد التبهديل لي دايرة في راسك نهار كان كيتفرق العز على الناس فين كنتي؟
كملتي خلي تعليق ونجمة ✋🏻