بين ًسًـــلاسل العادات

البارت 31

           بسم الله الرحمن الرحيم

#بين سلاسل العادات
بقلمي: kefeyah

متابعه للحساب فضلا 🤍
تصويت +التعليق بين الفقرات..

"" "" "" "" "" "" "" ""

شَوضح للبشَر اكثر ؟
النَاس تگلي مِتغير !
هو الميل لو لاگي رقم يحوي
ما جاب العمر يفتر
شنهو الفايدة مرتب گبال الناس
وانا بداخلي مطشر !

"" "" "" "" "" "" "" ""

گاعدة على الاخبار گلبي ناررر عيوني غوشت وانة اقرا عدد الشهداء شمرت الريمون وركضت للحجرة لفيت راسي ودموعي تجري شلون اهلهم يتحملون
خايفة كلش على عباس انوب ولدنا راحو كلية عسكرية محد عارضهم شلون قهر هذا..

غفيت دمعتي على خدي اتخيل وألف مشاهد وداع وموت..

طفرت من فراشي مخنوگة النفس ماگدر اتنفسة اجاني بالحلم يعاينلي من بعيد ببدلتلة العسكرية نضراتة غريبة جنة يگلي تعاي بس مايكدر يحجي عيونة متعلگة بيه اجتة مرة اخذتة ومشت..

فزيت دموعي تصب خليت ايدي على حلگي اكتم شهكاتي گمت عبرت سجى النايمة على درب اليمرون طلعت الجو باررد كعدت بنص الزرع...

ابجي گلبي محترگ نار ليش اجاني بالحلم شكلة ضل مطبوع ببالي نفس ماجنت اشوفة گبل قريت الفاتحة
على روحة  ودموعي ماوگفن..

مرت فوك الساعة الجو بااارد بس بس جسمي نار   لازمة راسي بيدي افرگ بصدري واصلي على محمد نفسيتي دمرت من يوم  استشهادة حتى لو ماعندي علاقة بية يبقى ولد شاب وانقهر على شبابة مر وكت طويل يلة كدرت اتخطة واجة الاسوء  ..

منظر الدم والدعاوي مترسخة بذهني جسمي يكزبر من اتذكر دعاويها.. تعبت بين صدمتي وبين شعور الذنب المالة سبب انة اقتل طفل ماجاي للدنيا ليش لهدرجة حاقدة وگلبي قاسي حسبي الله ونعم الوكيل
على كل دمعة نزلت من عيني وعلى كل شهگة شگدت صدري من وراها..

مسحت دموعي ورفعت راسي اسمع صوت الاغاني  منين يجي استغربت كلش منو يسمع اغاني تركية ابتسمت وانة اتذكر هاي اغنية لميس ويحيى كمت من مجاني لازم اعرف ياهو هذا بنص الليل  يسمع هيج رحت ورة الصوت ..

دخان الجگاير صاعد للسما لابس شورت وتشيرت صيفي بنص هالبرد وسن من يوم الصار عد اهلها زعلانه تريد بيت وحدها وهو مايرضى يعزل وجاي يقنعون بية يبني،،

احس گلبي تفتت حسيت بية مامرتاح همست بصوت ناصي ...

-الله يعاينلك

التفتلي يسحب نفس من الجكارة نفخة وكال..

عباس:-شتسوين طالعة بهلبرد

-انت شتسوي جاوب روحك

اشرلي اكعد يمة كعدت مخلية راسي على رجلية..

-الجو بارد وانت ولايمك شني سالفة هاي الاغاني

-طلعتلي باليوتيوب من قريت الترجمة نزلتها

-ها حلو

-اي

عاين بعيوني وكال بحس مخنوگ:-تحلمت بية

رفعت راسي الرجفة سرت بجسمي:-شراد منك حجة لا شني جان حلمك حباب گول

شمر الجكارة  ودار وجهها..

عباس:: سلم علية وتشكر مني

-ليش

-رجعلي حلقتي خلها بيدي وگال تعذرني ماحسبالي هيج رايدها

دموعي تصب وارجف حجيت الغصة بلعومي:-حتى انة هم اجاني بالحلم بس ماحجة شي راح

غصيت بالبجي ماكدر اسيطر على روحي كل ماتذكر شبابة وضحكتة طمهن التراب..

سحبني لحضنة يسكت بية رفعت راسي مجلبة بية..

-عباس فدوة اغديلك عوف الجيش والله شغلتك خطرة شفت شفت هذا صاحبك شلون راح بساع وغيرة وغيرة عوف الجيش والله اموتن اذا صار بيك شي انة زلمة ماعرفة كلش وتخبلت علية اموت وراك اذا صار بيك شي

رفع راسي اشهگ وابجي مسح عيوني وخدي ضام راسي لصدرة وحاضني..

-عباس وغير عباس فدة لتراب الوطن مانعوف العراق بيد الغريب اذا مو انة وغيري ندافعلة ونحمي عرضنة تريدين الغريب تتحرك غيرتة علينة

-اخاف والله اخاف ماتدري جاي اموت كل ما اسمع صار قصف لو راحت شهداء ليش تأذيني بهاي الطريقة..

شدد حضنتة الي وباس راسي بقوة:-لا تخافين المكتوبلة عمر يعيش ولاتنسين ذولة ابطال صيتهم بالدنيا كبل الاخرة الشهيد اله منزلة عظيمة عد ربج جنة الفردوس يتنعمون بيها والرسول (ص) يتلگاهم ويمسح عليهم مو اي واحد يستاهل الشهادة الشهادة فوز جبير

زدت بجي وخفت اكثر من سمعت حجية حسيتة متلهف على الشهادة فرفحت بيدة من البجي حار شلون يسكتني..

سكتت والشهگة ماراحت من صوتي خاتلة بحضنة شكد صارلي مفتقدة الامان من يوم الكتلة احبك ماتقربتلة عكس گبل كرص خدي بخفة وكال..

-هلكد تحبيني هدوة

-الابو والام والصديق وابن العم والاخو الجبير كلهن جمعتهن بشخصك شلون ماحبك وانت كلشي دير بالك على روحك ولا تحط طاري الشهادة على بالك اتذكرني واتخيل لو شخص يفقد صاحبة وامة وابوة واخوة شيصير بية وشلون يدمر

-كلهن بية يهدوة

-واكثر اول مافتحت عيني على الدنيا لكيتك انت حاير بية وشريد تسويلي تعلقت بيك كلش حتى من ردت تزوج خفت تروح مني ولهلسبب كتلك..

طفرت من مجاني متذكرة الفترة الاخيرة كبل مو مثل هسة اختلف كلشي..

-طب جوة بارد الجو مو زين عليك تصبح على خير

-تلاگين الخير

طبيت جوة وتلگتني سجيوة مخروعة خطية وجهها اصفرر لزمتني من ايدي تحجي ملهوفة..

-شمالج هدوة شبيج

-ماكو شي

-جا ليش نازلة بهلبرد

-اخذت نفس شوية

اخذتني من ايدي وكل شوية تسألني هسة يلا عرفنة سجى على حقيقتها عبالنة گبل قاسية وماتهتم طلعت اكثر وحدة بينة حنينة وتهتم بينة غطتني واشوفها واكفة يم راسي راحت تغطي البنات وتعدل بروسهن جوة المخدة..

كعدنا على روتينة المعتاد هوسة صياح خبصة ملاسن بالحجي تريگنا ورحنة نقرا اجت سجيوة تدور على شريقة وتسال اذا شايفينها دگت على رجلها بقوة وصاحت..

-خررب بليسها ويين الگاها تغط غطات الها اول مالها تالي وهاي ام الغثة بس تريد تحجي بيها

نوف:-تعالي نشوفها خاف راحت للبستان تقرا لو شي

سجى:-يلة مشينا بس سوي روحج ماندور عليها
هذا رحيمان اووف منة شوكت يخلصنة مادري..

***

-رحمن روح ماناقصة طلابة

-آه هسة انة صرت طلابة شروق

-مو لبالك بس ماريد واحد يحجي علية وانة مثل اخواتي يگلولي

-احترگن اخواتج ماعلينة بيهن

رجعت ليورة طخيت الشجرة بعد وين اروح وجهي اشتعل نار عيونة على وجهي رفعت اصبعي بوجهة  يرجف..

-رحمن لا تتمادى الزم حدك

-مامسوي شي بس ماكدر اصبر

-لا رحمن فدوة لاتدنة

رفع ادية ليفوگ باستسلام كلش قريب مني غمض عيونة مبتسم وكال..

-احس راح اموت وماضايگ شفايفج

-اسم الله كول يا الله شني السالفة والكاتبة الله يصير

-بس اتخرج واتوضف كبل اخذج وعلي بس اتوضف ماضل شي مو

-اي هي جم سنة الله يسهلها

-احبج شروقي

-كافي رحمن اريدن امشي الشيطان ماميت

-هسة احنة وين ماتشوفين بستان شكبرة شكدة الشيطان يجي بس بالاماكن الضيگة

يضحك من كل كلبة وانة ارجف خوف ومستحة كل ماريد اتحرك مايخليني..

-رحماااان

-بس گولي احبك حتى اولي

-عيب ترة انة استحي

-هسة هي جلمة عاد تصبرني هناك من اضوج اذكرها
بداعتي كولي

-احبك

كمزنا على صوت سجيوة ضليت الطم لازمة عودة ماسحة وجهها احمر..

رحمن:-لا هلا هم انتي وراك وراك ماتعوفينة

سجى:-شووف رحيمان انت هواي زودتها ماخذ البت بالبستان ماتستحي هاي اعرفها بس ماعدك غيرة وتخاف عليها هاي هسة اكتشفتها

رحمن:- شبيج هدادة

سجى:-لا لازم اگلك اخذ راحتك بعد بوسها بدربك وبعدين تمشي بحجي امك

سحبتني من ايدي بعصبية مادري وين اضم وجههي عنها رفعت العودة بوجهة رحمن وصاحت بية..

-كتلك شريقة عووفهااا لاتحجي وياااها ولاتغمززلهااا تزوجهاا حضرر امورك وبعدين تعال نتفاهم مو هسة جايني حب وغزليات وانت لامتخرج ولا متوضف ولاعدك شي لامة وامك تنگز فوك راسك..

جهز كلشي وتعال وثاني مرة الي غير حجي وياك مو شفت محد الها لا اهل ولاشي وكاعدة عدنا حلالك الجو..

ماخلتة يحجي شي اخذتني سحل ماحجت وياي شي بس كالت اقري دروسج كعدت وي البنات الدمعة بطرف عيني والله مالي غرض هو يطلعلي ويضل يسولف وياي اووف شوكت تخلص..

كملت البيدي ونزلت انضف الديوانية انهد حيلي يلة كملت تنضيفها   طلعت و صارت بوجهي سجى تركض هي ورغد طبن جوة البيت انخمش كلبي من سمعت الهوسة شصاير رحت اركض كلها فوك اخذتني الصدمة عمامي يضربون على الباب ونوف تصرخ وتصيح..

***

نوف:-طلعت بالحوش اركض ورة البزازين روحي متعلكة بيهن بلكي الزملي وحدة واربيها مثل ميمو بعدني بباب الحوش الرئيسي ولاگتني عبير مرتبكة

-ها نوف شعدج هنا

-ولا شي خيرج

-اكلج تجين وياي بالبستان

-يلا امشينة

عدلت شالي ورحت وياها اشوفها تمشي وتتلفت ماسألت ولافكرت اكو شي دخلنا بنص البستان وگفت

-اكلج نوف ضلي هنا هسة شوية واجي مو ترحين

-تمام

بقيت واكفة اباوع للشجر عالي كلش بهتت ملامحي ولد مر مني اخذتني الصدمة ماكو غريب يدخل هنا اجة باتجاهي وكال..

-هلو نوف

-هلو انت..

بعدني مامكلمة كلامي واشوفة انهزم يركض بقيت اباوع وراة شبية هذا التفتت شفت عمي وراي  عيونة بگصتة صار يغلط ويسب على تربيتي
خفت منة يريد يضربني ركضت كدامة واخذني للبيت يركض وراي واني مثل الاطرش بالزفة ممفتهمة شي صعدت لغرفتي راسا وسديتها علية كلبي يخفق بجنون شبية هذا ماصدكت صارو زينين

مرت دقايق  والباب تعطر يدكون علية بقوة ويصيحون..

-وين تولين اليوم موتج حلال *****

لزمت راسي بيدي ماكدر استوعب الكلام الدا يحجونة معقولة يتهموني مصادقة هذا الولد صرت اگطع بشعري من العصبية واصيح هوسة وخوف ماحسيت على شي...

كعدت راسي مسطور وعيوني تغوش البيت هادء ماكو صوت كمت فتحت الباب على كيف مالكيت احد رحت اغسل وجهي وصار عباس بوجهي عيونة حمر خفت منة كال تعالي وراي

رحت امشي وراة لغرفتة دخلت كلني ارجف راح كعد على سريرة وخلة رجل فوك رجل لازم رجلة بقوة..

-اي نوف احجي منين هذا الولد الجنتي تحجين وياة بالبستان

-والنبي ماعرفة ولا حاجية وياة بس كلي هلو وبعدين راح يركض بيش تريدني احلفلك ماعرفة

-بس عمي يكول شايف الولد يجول بالبستان ويسولف ويضحك من سمع بية شرد وراجع لاكية وياج ثاني مرة

بس دموعي تجري انعادت علية المواقف القديمة نفس الشي هم اتهموني بس جان انمار موجود وحماني هسة منو اليحميني وشلون يصدكوني واني ماعندي دليل..

-بيش تريدون احلفلكم ماعرفة ولا شايفتة من قبل ا

-عدج دليل لو حجي ثاني

-اي اي عبير جانت وياي اصلا احنة رحنا سوة ومن راحت اجة الولد بعدين عمي

-استغفرالله رربي وتالي وياك صخاام هسة شلون اسااعدها

-والله مالي علاقة باحد فدوة صدگني

-مصدگج بوية اعرف انتي شني بس ياهو اليصدگ ارجعي لحجرتج بين ماشوف عبير.. ولاتطلعين دوم

رجعت لغرفتي عيوني ماشوف بيهن نار وين رجعت بذاكرتي مجلبة بقميص انمار وابجي يصدكني ماجان اكو احد من اخوتي بس هو موجود هسة حتى هو ماكو الشهگة خلصت گلبي موقف رجعني ليورة وحطمني الماضي يأذي والمستقبل يخوف..

سجى:-اعرف نوف اكثر من روحي البت فقيرة وماعدها هيج سوالف منين اجتها لازم اكو سبب اجة عباس يصيح عبير شافها وكال..

-انتي جنتي وين نوف طالعات سوة

-اي صح طلعنة بس انة رجعت هي كالت راحن اضلن عفتها ورجعت

عباس:-خوش

راح للديوانية ورحت اركض لحجرة نوف دكيت الباب شهگت من شفتها وجهها صاير ازرگ على احمر راسا طاحت بحضني..

مخليتها بحضني وامسح على صدرها ورغد تغسل بوجهها كلنا ملتمين عليها شوية واجة عباس من شافها سكت وصاحني عفتها وطلعتلة..

-ها بشر شصار

-هذا عمي فرد مرة متحامي كوة قنعتة يعوف السالفة بس

-بس شني شيريد هذا فليح (ابو سفانة)

-يكول احلفها بالعباس يلا اعوفها بحالها واذا جذابة هي والامام

-سهلة

-حضرن رواحتجن كلجن بعد فرد نوب زورن خوما بس هي ماخذينها بايكة ناهبة

-خوش سهلة

-يلا انة رايح اشوفلي سيارة تكفينة مابينة حيل حجي

-الله وياك

لليل انة اتحرمس من سمعت عبير رايحة وياها عرفت اكو انة بالموضوع رحت اشوفها كاعدات يتابعن مسلسل وياكلن ارتاحيت من شفتها زينة البنات هودن عليها..

كعدت بصفها لزمت ايدها خليتها بين ادية تعاين بعيوني ضايعة احسها محتاجة واحد يحتويها جانو اخوانها مايخلونها ساعة تالي انمار سد عنهم بس هسة اختلف كلشي محد وياها سحبتها لحضني يالله شكد انقهر عليها حيل فطير ماتفتهم شي وبالفترة العاشترها تاكدت هي بت وانمار ماماخذها بس ماكلت لاحد حتى لرغد..

-صرتي زينة

-احسن شنو گالو صدگوني

-اي اكيد يصدگونج واحنة هم مصدگينج بس لازم تحلفين بالعباس

-شلون يعني

-مادري باجر عگبة نروح كلنة للزيارة وهناك تكولين وحق هذا العباس انة ماعرفة وانتهت

-ههههه سهلة عبالي شراح يسوون

-محد يسويلج شي وانة موجودة هسة گليلي صدك رحتي وي عبير

-اي رحت هي گلتلي نروح وهناك كالت ابقي وهسة اجي

احس نار تحرك بيه عرفتها هاي سوالفها السا**هي
دور هاي السوالف ومن شايفها عمي راح جابت نوف حتى توخر منها الشبها ويشوفونة وي نوف عفت نوف وطلعت فاير دمي لكيتها بالمطبخ تاكل بتفاحة..

-اكلج انتي ليش تجذبين شلون تكلين لعمامي هي كالتلي راح اضل بالبستان وطلعتي انتي كايلتلها ضلي لاتتحركين بين ما اجي..

-جذابة هي رادت تضل انة ماكايلتلها ضلي..

بدون سابق انذار ضربتها راجدي وشبعتها كتل لزمت اديها وملختها تملخ كل صرخة وشهگة لنوف طلعتها بيها محد كدر يطلعها مني ذبيت حرگتي بيها ماعفتها الا من التمو صعدت بوجهي ليفوگ..

بس لو اكو دليل عليها  ويثبت البراسي حتى لو احجي محد يصدگني لان يدرون ماحبها شكلك تكرهها ماضل واحد مارزلني خو امي ملت يلا راحت انتي وانتي ماهتميت لواحد اليوم طاحت بنوف باجر باختي الفاهية لو بية كلشي يصير..

الليل كلة مانمت من الحركة والتفكير كلبي يحترك كل ما اشوف نوف تفز من نومها كل شوية وتهذي باسم اخوها وتشكيلهم كاعدة يم راسها اخاف تطلع لو يصير شي والله صارت افكار سلبية تجيني دمرتني كلش..

كعدت ثاني يوم اشوف عبير وجهها صاير خريطة ولايكول بت كاتلتها راحت للحجرة ورجعت وجهها يلمع خالة الحمرة والكحل خافية الجريمة بالمكياج
تعجبت من شفت بيدها جنطتها طلعت تدعي وتصيح

-رااح اررجع لعيالي اشو نفس الضيم هنااك شابعة اتكفخ وهنا هالبربو..  محد يحاجيها ولايگلها بعينج كحل مرة شكبرني شكدني جهالي كل واحد شكبرة وهي تمد ايدها علية محد يحاجيها

اجت امها تحضن بيها وتكابلن يدعن وينحبن سكتتهن حبوبتي وطلعت لعيالها رحت وراها وصحت

-كلعة بلا رجعة مو ترجعين بعد عليج الله ترة مانتحمل هيج ناس ثاني مرة

شالت طابوگة وشمرتها ربك لو ماموخرة جان اجت براسي..

البيت كلة مكلوب علية جي حاجيت عبير مايدرون بيها حية غلست عنهم ورحنا نحضر للزيارة للعصر كلنا رحنا بكوستر كعدنا بالاخير كلنا ورحمن وجاسب جدامنا بعدنا مامنطلقين واجة نزار يركض ويصيح

-بروح الغوالي اخذوني وياكم

جاسب:-ماكو مجان وين نخليك

-بحضنك وين ماجان اصعد بس لاتتركوني وحيد

رحمن:: اهو بدة بسوالفة

نزار:: سوولي مجال يلا انتن شني ماخذات الورة كلة والكدام شريقة  بصفج اكعد ادني

سوتلة مجان لان جانت كاعدة هي زهراء واكو مجان صغير صاح بيه رحمن وكعد بصف شريقة خلاة بالنص بينة وبين جاسب مشت السيارة وكال رحمن..

-شني شو جاي بنعال سالمين ترة رايحين لمحافظة

نزار:: دهر صابني كون نسيت روحي كالولي يروحون العصر بس الدكتور طارق وديالى لهوني كبر لفهم هسة من وراهم طلعت جني مجدي

جاسب:-ديلا بلة خل الدكتور يفيدك كبر لفك تابع مسلسلات جنك مرة مو كنالك عوفهن شبيك لازك بيهن

نزار:-اهو هسة انة وين اروح لاصاحب عدي ولا حبيبة عاد اشوف مسلسلات تعوضني النقص

رحمن:-بس لاتطلع على الترابي منا بنات

نزار:-هسة انة شكلت هنا علساس مايتابعن مسلسلات كلة يشوفن نور ومهند عاد انة اتابع مراد مابية فساد

هذا راح يخزينا ويشهرنا انوب صوتة عالي ويحجي منطلق رجع كال..

-اريدن اتزوج حبوبة ماتزوجيني من حفيداتج

التفت علينة وكال:-زوجوني رغيدة ..

كفخة جاسب على راسة...

جاسب:-انجب لاتضل تلغي

نزار:-يععع ماريد رغيدة زوجوني شريقة حلوة حمرة

ماحس الا رحمن ضربة راجدي وهو بس يضحك جاي يشاقة احنة نعرف سوالفة بس هم مدري شبيهم وياة

نزار:-ديلا ماريد شريقة الوصخة زوجوني هديوة

خزرة عباس صار جدام وصاح بية يسكت رجع نصة صوتة وملتفت علينة..

نزار:-هاي الفرخة لانمير طلعوها وانتي سجيوة ماريدج لو تضلين بس انتي جنج جدتي نوفة اخاف تكتليني وانة رجال فقير

سجى:-هسة انة علساس ميتة عليك دولي مني

نزار:-امداج مو جنتي تكولين جنك نزار قباني مدري رباني شبسرعة زهدتيني يلا ولي ضلت بس زهيرة

دار وجهة لجاسب وكلة:: اكلك ماتزوجني زهيرة المخبلة

جاسب:-انجب لا اطلعها من عيونك واشمرك من الجامة

نزار:: اهوو هسة انة شكلت غير اخطب لروحي جا اضلن هيج بدون زواج امداك هي شلون زهيرة طگة ونص جنها صخل

زهراء:: لا والله انت الصخل ابو كرون ال...

سديت حلگها بيدي بعد ماتسكت هاي ونزار سكتوة بس ضلو يضحكون علية لان جاي بهدوم البيت وهما شلون كاشخين لابسين نفس الشي قمصان سود وبناطير رمادي واحذية رياضية بيض..

من شاف محلات راح نزل ومنا ازدحام ضلينة متانينة شوية ورجع بيدة علاليك شكثر شمرهن علينة وصار يطلع هدوم جديدة ونزع التشريت صاحو بية الولد واحنة غطينة من الضحك علية..

نزار:: ومرض عوفوني ابدل ترة لابس ملابس داخلية

رحمن:: من بنات ماتستحي خرب باليجيبك وياة

نزار:-هسة البنات ماشايفات زنود اشو يعاينن لمهند مالابس شي بس علية تحجون

غميت روحي الف غمة خربنة ضحك على سوالفة خو نوف صار وجهها احمر من الضحك بدل وكمل دار وجهها علينة يمشط بشعرة ويخلي جل دهر صابة حتى جل جايب..

نزار:-احلى واحد بالعشيرة انة وانتي سجيوة اشهدي لاعبالهم بس هما كاشخين

رحمن:-انت سالفتك عجيبة منين جبت الفلوس وانت طالع بطرگ نعالك الاملح

نزار:-مخليهن بجيبي شلون

جاسب:-عبالي بصدرك

نزار:: لا يطيحن واخاف ياخذونهن اخليهن بالجيب محد يكدر ياخذ

رش العطر خنگنة خنگ طلع صدك احلى واحد اليشوفة يكول مدير سترة سودة ومنسق وياها قميص والبنطرون ماشفتة بس من نزلنا اعاينلة فد كشخة التشوفة تكتل روحها تقريبا يشبة رحمن بس احلة كطول وجسم اجت زهراء تهز بيدة وتعيب ماعاجبها..

زهراء:-هسة المن جبتو هذا ويانة خرب الزيارة

نوف:: لا عوفية يونس

زهراء:: يعععع مقرف ماشفتنة شلون يبدل يمنة

سجى:-رحمة لاهلج اسكتي لايسمعج ويضل يحجي

اخذتها وطلعت كبل السانها صاير شطولة يوم عن يوم تتغير وصلنا للامام وعايشة وعمامي راحو واخذو نوف وياهم اما احنة قسمونة خاف نضيع هديوة وشريقة وانة ورحمن سوة ورغد وزهراء راحن وي جاسب...

رحمن يمشي بصف شروق يتاهمس وياها مدري شيحجون غلست عنهم ودعيت الامام يجمعهم سوة
راح ورجع مدري شخلة بيدها عرفتة اشترالها شي..

زرنا وخلصنة ضلينة متانين نوف كلبي ضل يمها كلنا اجتمعنا ضلت بس هي..

نوف:-كاعدة بحضرة الامام ودموعي تصب ماخليت شي ماحجيتة حسيت الامام  يسمعلي  ابجي بحركة  على المضى والفات من عمري مصيري مجهول ماكدر اكمل عمري كلة وياهم اريد ارجع لحياتي لقديمة بس مستحيل يخلوني..

حسيت بعايشة تندس بية:-كومي بسج بجي روحي زوري وتعاي راح يرحون

كمت اعدل بالعباة كوة لابستها دخلت جوة للضريح ماكدرت شفتة ازدحام توجهت للامام بروح صافية  طالبة الراحة تدخل لحياتي ويوجهني للطريق الصحيح..

دعيت للكل مانسيت احد بدعائي طلعنا ورحنا الهم ماشوف دربي خلفلة على عايشة تمشي بية..

رغد:: شبيج نوف جا هي هيج كالوها

-احتاجيت احجي مو اكثر

اخذونا لمطعم ما اكلت شي نفسي مسدودة كوة البنات جبرني اكل خلصنة ورحنا للكوستر مجرد خليت راسي على الجامة نمت ماحسيت الا من وصلنة راحن نامن الا اني شبعت نوم اخذت موبايلي اتصلت بامي حجيت وياها وي اخوتي  فوك الساعتين نحجي كتلهم جنت بالزيارة بس ماكتلهم على الصار اخاف عليها مابقت امي مثل قبل تمرضت كلش جلب وياها ضغط وسكر واخاف تحترك وتطيح

نهيت الاتصال منها الي ماكاطعتة ابد...

***

انور:-صفية تصيح تريد واحد يروحلها

باهر:-انجب لك صفية شنو احترمو

انور:-مو الساني متعود

باهر:-اكصة يولو وهسة روحولها

ازاد:-صاغ تأمغ امغ

باهر:-اهوو بدت رحمة الله شلون وياكم  ما الدددغ ما اصخممم

انمار:-شباب عيب عليكم كلشي ولابو عيوان جداحة
واحد يتحارش بلدغتة

باهر:موو لدغةةة مو صخمةةة جممم مررة اكول وانت خابصني ابو عيون عمي اخذهن وخلصني ساعة السودة الصرت كرايبكم

انمار:-لاماريد عيونك انة اسمر وعيوني خضر شطلع مو مثلك  عويناتك خضر وابيض مثل الگطن جنك امرريكي

ازاد:-جا مثل حضنة زركان

باهر:-ولكم استحيت يلا ولو من وجهي عدي شغل يولو

انمار:-وانة هم ماكاعد

انوار:-ماشاء الله اجتك الدعاوي فلوس تكرف بيها كلة لروس كبار

انمار:-بس لاتخلي عينك بعدني بسم الله الروس الكبار ماحصل غير الاعداء من وراهم

باهر:-تعال امشينة خل يولون ذولة

ازاد:-شلون ثنين اجتمتت حمدية وسعدية

طلعو يمشون ليگدام بانحاء المزرعة دخن جكارة وكال بحسرة..

انمار:-شوكت تخلص

باهر:-ماعرف انت بيدك شوكت تنهيها تخلص

انمار:-ماكدر اعوفهم بهذا الوكت

-صح حتى اني اكول بس لازم تتحمل الاذية التجي حياتك راحت تصير مغامرة ولازم تحب المغامرات

-احس راح انحكم بمجان معين وناس معينين ماكدر ارجع شي قديم بهاي حياتي

-لا تحاول ولا تفكر كلشي تأساس الك من البداية حاول تتأقلم

-كلشي صار عكس ماردت الجيت علمودة راح من ايدي

-كول يا الله بعدنا مانعرف شي ولاشلون تدور هالدنيا الغريبة

-اتفق

-وين رايح

-لشغلي

-لاتنسى تمر على الحارث بطريقك

-هسة اشوفة وخلي موبايلك مفتوح حتى اطمن عليك

-مايصير بية شي لاتخاف

-سبع ماينخاف عليك..

توجة للحارث سلم علية وكعد يستمع لطلبات البيك
يهز براسة ويسحب نفس من جكارتة كملها وكام على طولة..

-من تخلص الجكارة يبدي الشغل

الحارث:-تختلف عنهم اشوفك

-صح انة ماشبة واحد

-متاكد ماكو اربعين شخص يشبهك ولا يملك صفاتك مجد طموح ذكي شجاع دوم اريدك هيج ماتهاب شي ولاتنسى الخطر من ذاك اليوم صار مرافقك انتبة على نفسك وصير حذر بكلشي

-لاتوصي حريص كلشي مرتبلة كبل لا ابدي بية..

****

سرى""

واكفة بالمطبخ اسوي غدة واسمعة يخابر يغلط ويصيح بصوت عالي ماكدرت اسمع الطرف المقابل بس هو سمعتة كلش زين..

-لو يموت شغليي مايخصك بالجيير ويروحن كتلك انت حلها بنفسك اني مادخل شتسوي سوي...

شغلي ماشي اني شعلية اخي من البداية واتفقنة كل واحد علية بروحة وحتى لو ابوي من البداية عزلني

مو مشكلتي بلغة هالكلام...

مافهمت شنو الموضوع بس اكيد مشكلة بالشغل اجة كعد علية الطاولة ماكدرت اسئلة اخاف يشك واصلا مامسموحلي اسئل هواي..

الصراحه تفاجات من تصرفاتة ولاكاني موجوده كلش ارتاحيت من مضايقاتة اكيد بية شي والا مايكعد عاقل غلست عنة ماطولة متجاهلني وكملت الاكل صبيت وخليت كدامة ابتسم وبدا ياكل كلش خفت اليوم مو طبيعي بس لاعرف بية اسرب معلومات

سحب ايدي بوسها ورفع عينة بعيني::تعبتج اسف وعاشت ايدج 

-بيك شي

-بية انتي

-عن الشقة اكو شي صاير

-لا اكلي وخليني اكل

اباوعلة ياكل بهدوء يمة كلبي يوجعني من الخوف كلت خل افتح اي موضوع واحجي بية..

-اكول حبيبي

-روحة

-اريد اروح لاهلي اشوفهم امي اختي طاك كلبي عليهم

-تؤ ماكو

-شنو ماكو ترة صار فترة طويلة كلش اشتاقيتلهم لاعرف خبر عنهم من ذاك اليوم مو عيشة هاي

-هذا الموجود

-شنو يعني ماشوفهم شلون ذولي اهلي

-اني اهلج

-ههففففف يطلعها لروحي يلا يرتاح

طفرت من مكاني صعدت لغرفتي فوك القهر زادني توتر من ورة تصرفاتة الهادئة كعدت بالكاع اهز برجلي مو عيشة هاي حتى نسيت شكول اهلي ياترى هم يتذكروني يسؤلون علية نهى وين راحت كلش متأذية عليها اخاف من عادل يزوجها لواحد من اليعرفهم..

راح تصير بية حالة نفسية منو كال هسة اني صاحية صرت مخبلة جد تصرفاتي اختلفت ساعة اصرخ ساعة ابجي مو طبيعية..

رفعت راسي شفتة فوگي واگف مد ايدة لفروة شعري يفرك بقيت على كعدتي واهز كعد صار كدامي نزل رجلية ومدد فوگهن اخذ ادية وخلاهن على راسها..

-دلكيلي يحليوة

-اي بس احجي لاتضل ساكت

-ماعندي حجي تعبان والدنيا تفتر بية

-شكو

-خايف

-هههههههه انت تخاف ههههه ومن منو بس لادكول شرطة

-الاكبر منهم

-ومنو الاكبر من الشرطة

-ابوي

-ليش تخاف منة مو تشتغلون سوة

-تؤ كل واحد وحد وابوي جاي يخسر يريدني بشغل قوي

-شنو الشغل وليش ماتروح

-مالي خلگ ادخل وي اعداء جدد وطربگة جديدة

-مافتهمت

-احسن

غفة على رجلي انوب قيدني لا اكدر انزلة ولا اكدر ابقة اخر شي خليت راسة بالكاع رحت جبتلة مخدة خليتها جوة راسة نام بعد مكعد للعصر..

كاعدة على القنفة الهدوء يقتل تلمست بطني ونزلن دموعي مستحيل يروح هليوم من بالي الالم والصريخ احسة براسي ليش انقتل بدم بارد طفلي جان جزء مني علاقل لو موجود مو هذا حالي او يمكن العكس لو موجود هم مايعيش بنص الاجرام

طلعت من هاي الفترة والبشاعة الشفتها بيها رجعت لايامي القديمة حايرة اتعطر وارتب بنفسي وكل شوية رحت للمراية الضحكة مافارگتني يوم خطوبتي اي هذا احلة ايام عمري مستحيل انسى لحضة وحدة من هذا اليوم المميز جنت كتلة من الفرح والسعادة الاحبة صار حلالي يربي شكلة ماجاي يطلع من راسي راح يخبلني ضحكته الهادئة خجلة نضرة عيونة اموت واني اتذكرة والله احس بكلبي يتگطع ليش مادامتلي السعادة ردتها مرة وحدة اعيشها وي حبيبي ماريدها وي غيرة..

احس راح اتخبل من كد مافكر بية ماعندي احد احجي وياة لو اسوي شي مثل قبل دراسة غيرها كاعدة واحجي وي طيفة البالي صرت اتخيلة ومرات من اتأذى استنجد باسمة وين اروح وانساك ريتني متت بدالك ولا انت..

آخ يا نسمــــة شبابي الغـربت ياهـو اليــردهـا

كمت غسلت وجهي وطلعت صار كبالي بوسني وطلع طلعت الجهاز وبغتهم بطلعتة ماعرف شجاي يسوون بس كل ما اسال الضابط يكلي..

-نعرف شغلنة لاتخافين

-ماخاف عليكم بس اخاف على روحي اذا مامتت بيدة اموت من الخوف الدا عيشة انتو تفتهمون علية

-اكيد نفتهم ومقدرين وضعج بس ينراد وقت مو بسهولة نتخلص منهم ينراد صبر يولو

-الله كريم نشوف شلون تكضي

-مامحتاجة شي

-اي اهلي اريدك تعرف اخبارهم عادل وين راح انقتل لو شنو سالفتة مجاي اسمع عنة شي.

-مابية شي عرج مايطگو اهتمي بنفسك وبس

-واهلي اريد اخبارهم اختي هم

-ان شاءلله ارجعلك خبر

غلقت الجهاز بعدة بيدي وسمعت صوت اشخاص بلبيت ردت اموت من الخوف حتى النفس كطعتة ترسو الغرفة ترس لابسين اسود صاح واحد بيهم

-البسي ملابسج واطلعي ويانة

-منو انتو

-الجيثام دزنة الج لاتخافين مانسويلج اي شي بس امشي ويانة

اشرلهم يطلعون محد بقة بس اني بالغرفة ماكدر اسوي شي من الخوف والرجفة منين ذولة وهذا ابوة شبريد مني جني راح اروح بيها وباسوء طريقة لبست صاية ولفيت شال على راسي خليت شي برجلي وطلعت انتفض بمكاني..

-فدوة لاتسوولي شي والله اني مالي دخل بدلهار

-نعرف كلشي بس اتحركي واخذي ملابسج وياج
يلا كدامي بسرعة مو نروح نحير بيج وباحتياجانج

دخلت للغرفة ارجف فتحت الجهاز ومثل مامتفقين الا اني احجي وياهم بشكل طبيعي يلا يردون علية طلعت ملابسي خليتهن بجنطة سحلها واحد منهم والباقين محاوطيني..

-بس كلي شيريد الجيثام مني

-ماعرف شغل

-ليش دلهار ماخبرني راح اروح اشوف ابوة زين هسة هو وين

-لا تسالين هواي مانعرف شي

صعدوني بسيارة سودة احس نفسي بفلم حياة المسلسلات جاي اعيشها بس هما تمثيل اني حقيقة
طريق طويل خبصتهم خبص وكل شوية صايح بية مانعرف شي اخر شي سكتت وصلنا كدام بيت قصر
نزلوني التلفت يمنة ويسرى كبل سحلوني واحد صاح بيهم خلاني امشي..

عجيب كل هالجمال والفخامة موجودة بغداد مثل المسلسلات التركية نفس الفخامة والترتيب بين ماعيوني تجول بتفاصيل البييت الجذابة انتبهت كدامي رجال جبير بالعمر شعرة ابيض لابس قاط
والمحابس تارسة ادية  بكامل اناقتة مخلي رجل فوك رجل والجكارة بحلكة..

مسلسل تركي مجاي اصدك حقيقة رمشت عيوني بثقل كوة ركزت وياة اسمعة يرحب بية بطريقة محترمة اشرلي اكعد على كرسي كعدت وكال..

-اهلا بيج بنتي سرى شرفتينة ونورتينة راحت تضلين لفترة معينة بضيافتنة شنو تريدينة يجيج وهسة تكدرين تتفضلين

-وين دلهار

-عندة شغل بنتي

-هو يعرف بوجودي

-راح يعرف

-انت جيثام

-بلي

-حلو والتقينة والله باكبر تجار بغداد

-العراق عن قريب

اشرولي الحماية انصرف امشي على اعصابي اصلا ماعاد يهمني شي خل يقتلوني وارتاح شهلعمر بدايتة بهذال وعذاب..

اخذني الحماية لغرفة مرتبة وكاملة دخلت بيها البيت فارغ ينعل ابو الحظ شلون سالفة هاي واكول شبية اليوم صاير حباب اثاري شمرني لابوة انوبة اخطر منة..

نزعت الصاية ورحت مددت حتى نسيت الجهاز وهو الخلاص من هاي الورطة..

***

نوف:-واخيرا حصلتلي بزونة مخليتها بحضني العب وياها خطية لكيتها مشمورة سبحتها وكلتها وهسة تعودت علية طايرة بيها من الفرح والبنات يضحكن علية لا والمشكلة مايقبلن ادخلها للغرفة..

صرت انام اني وياها بغرفتي خطية اعوفها وحدة اباوع بعيوني بالغرفة شعور مزعج مرني شكد صارلي ماكاعدة ادخل بمتاهة من اصفن باماكهن فزيت ادور على ميمو الجديد شفتة بالزاوية خاتل شلتة وذبيت حسرة شلون قهر هنا كل الذكريات طلعت ماريد اتذكر اكثر من هذا..

اليروح بعد مايرجع وكل اشتياق يخلص مايضل شي على حالة...

انمار الكل ساكت عنة يكولون عد اخوالة احتمال هذا بس ليش محد يروح يشوفة هذا الشاغلني يمكن لان قتلو اختهم بعد ماعرف شي عنة مكانة برد كلش ومثل ميكولون الماتشوفة العين تنساة الكلوب..

مرت الايام مابيها شي جديد وسن عد اهلها جاي يبنون الها بيت  رحمن وجاسب يدرسون ماضل شي ويتخرجون بالنسبة النة خلصنة السنة الدراسية وبدات العطلة افكر بالسادس وشلون اطلع معدل وشنو ادخل ياقسم التفكير هلكني قبل الدراسة..

البنات نجحن وكل وحدة عبرت على المرحلة البعدها ماعدا رغد تركت وسجيوة مكيفة صارت ثالثة اما سفانة هاي ايامها مانعرف شوكت تولد ومخبوصين بيها..

اخذوها للمستشفى لان عدها وجع كلنة ندعيلها صغار وكبار ورة الغدة وطب الخبر سفانة جابت البيت انترس هلاهل وفرح فعلا بيتنا نور بنفر جديد نرتب ونحضر ماخلينة اكل اشكال والبيت على حباية ونص سجيوة طايرة بالكاع وكل شوية وصاحت معتز ونرجع نصيح بيها "علي "

دخل علي لبيتنة ودخلت السعادة وياة الكل فرحان ومكابلينها وكاعدين خو فارس متسودن مايخلي واحد يشيلة لو يلزمة بس نباوع علية ذبحو ذبايح وزعوها البيت مخبوص خطار وهوسة مانلحگ..

خلصنة شغل وكعدنا يم سفانة ملتمين على الطفل وجهها احمرر  وصغيررون كلش رادت سجى تبوسة وصاح بيها فارس..

-سجيوة اموتج عوفية بعدة صغير وولج لاتبوسينة

سجى:-هسة انمونة هي بوسة شبيك

فارس:-مو خطية شبيج ماتشوفين جلدة رقيق خاف يتأذى

سجى:-اليسمعك يكول عاضتة

فارس:-البوسة تاذي ترة اسالي سفانة خاف اجذب

سجى:-عوف الفسوق على صفحة وخليها بالك ابوسه ابوسة بس تطلع

فارس:-ماطلع بعد وحتى لو اطلع اخلي كامرات حتى اشوف خاف تشيلونة

سجى:-نشوف بس بالبداية بعدين تشمرة علينة

طايرين من الفرح معقولة طفل صغير خلانة بالسعادة والفرح الكل يضحك ويشاقي مهتمين بسفانة كلش وحبوبتي بغرفتها ماتطلع ابد بس الفرحة ماتدوم جنها..

دخلت هديوة كالبة خلقتها وراها شروق هم نفس الشي وراهن سجى وجهها احمررر صايرة اعصااب

-شكو شنو صار

-المصايب ماتعوفنة ابد..

بقيت بس ارمش بعيوني من شفت...

يتبع...

توقعاتكم 🦦🦦

ملاحظة:-الفترات الزمنية بيا وماكدر اوازن بيهن فلا تنتبهون غلسو +ماكدر انشر بارت الاحد اتاخر عليكم شوكت ماعرف من اريد انشر ابلغكم بالانستا..

دمتم بحفظ الله ♥