وتيرة الاعرج

الوتيرة الخمسون

وتيرة_ الاعرج
بقلم: حوراء السعيدي

حبايبي لاتنسون التصويت من النجمه+التعليق
بين الفقرات + ومتابعة لحسابي .." 🍂hawraalsaidi

لطفاً بنات تفاعلكم بالبارت لان البارت السابق تفاعله كلش يكسر الواهس جازو التعب حبيباتي

-غياهب: كعدت يم الباب مثبته ايدي عليه
من الي صار جسمي كله صار يرجف عيوني تثبتت عليه من اجاني يركض لمني بين ايديه وروحي احسها ماتت

-ارسلان: غياهب

رفعت ايدي بصعوبه وترجف اتلمس بوجهه ..

- مـ مابيك شي ارسلان

- مابيه شي يروحي

شالني من الكاع دخل بيه جوه للبيت حطني على القنفه والخوف والقلق تارس ملامحه مسح على وجهه بتوتر دخل للمطبخ وانه منظر السيارة الي اجت سريعة مثل الطلقه ماتلحك تشوف حتى الي بداخلها شالت الباب

طلع من من المطبخ بايده كلاص ماي ثنى ركبه وكعد لزم راسي يشربني بالماي وعيوني عليه اتخيل لو ماجان صاعد بالسيارة يمكن ضربته نزلت دموعي

حضن راسي وانه مجلبه بايده ابجي ..

- لو ماصاعد بالسيارة جان دعمك

- هذه انه يمج ماصارلي شي كافي حبيبي

دخلو ابويه ودرغام لان اتوقع ارسلان عاف البيبان مفتوحه وملامحهم مرسوم عليها القلق اجه عليه ابويه ارسلان كام من مكانه حضني خايف ..

-سلطان: شصاير ارسلان طلعنه من سمعنه الصوت شبيها سيارتك بنتييي شبيهااا

غمض عيونه متنرفز ارسلان بس يحاول يلزم اعصابه ..

-ارسلان: اجت سيارة وانه صاعد بسيارتي ردت اسد الباب لان رايح الدوامي ماحس غير اجت سريع طيرت الباب

رد ابويه عليه ..

- هذه ثائر ومتأكد كتلكم حط ارسلان بعقله

-درغام: هذه يريد يلعب كولو شلون لان لو يريد يكتله موت جان قبل لا يصعد دعمه بس كتلكم يريد يلعب

طبك حواجبه ورد بهدوء وهَوُ يباوعلي ..

-ارسلان: مومهم هسه هل الشي عمي خلي ناخذ غياهب للمستشفى شوف وضعها

همست وصوتي كوه طلع ..

-غياهب: مايحتاج

- شلون مايحتاج شوفي روحج وجهج صار اصفر

-سلطان: زوجج وياه الحق انتِ حامل وانهبطتي خلي ناخذج للمستشفى انشوف وضعج

ماكدرت ارفض لان صار عندي الم وكف ابويه راد يشيلني رجليه ميتات ماكدر امشي عليهن گاله ارسلان ..

-ارسلان: من رخصتك خليني انه اشيلها

ماعارض ابويه اخذني وطلع بيه كدامه درغام راح كبالنه يفتح سيارته صعدنه بسيارة درغام وابويه صعد لكدام ورا بس انه وارسلان

وصلنا للمستشفى دخلوني للدكتورة ضل بس ارسلان ويايه بالغرفة شافتني سوتلي الفحوصات للازمه ..

-الدكتورة: الحمدلله لا تخافون ماكو شي يخوف اثر الصدمه الي متلقيتها بس تحتاج الراحة هل الاشهر ولازم تاكل لان فقر دم صاير عندها

-ارسلان: مشكورة دكتورة

ابتسمت بوجهنه وطلعت زفرت نفس براحة طفلي مابيه شي معتزه بيه اهواي

-غياهب: راح ترجع الدوامك

- عوفي الدوام هسه .. شلونج تحسين بشي احجي لاتبقين ساكتة

- احسن شويه الدكتورة طمنتنا

عصر على عيونه شهكت بدموعي نزل ايده لزم ايدي بيها ..

- عزيزة عيون ارسلان والله هذه يمج مابيه شي ليش البجي هاا ؟ احجيلي يوجعج شي

رديت من بين دموعي ..

- مايوجعني شي بـ بس خفت عليك

طبع بوسات على وجهي يمسح بدموعي ..

- ماصار شي يمج انه

اندك الباب ابتعد عني دخلو ابويه ودرغام ..

-سلطان: هاا بابا غياهب شلون صرتي

مسحت دموعي بايدي شكد كارهه هل السالفه اهوايه صرت ابجي مومثل قبل جنت اتمنى الدمعه تنزل مني رديت عليه بصوت مختنك ويرجف ..

-غياهب: زينه حبيبي زينه

-درغام: الحمدلله على سلامتج خويه

- الله يسلمك

رجعت الدكتورة الي وصتني اكل وانه عدوي الاكل بهل الحمل طلعنه من المستشفى رجعنه البيتنه درغام وصلنه وگال عنده شغل واحنه دخلنه جوه ابويه ويانه ..

-ارسلان: راح اجهز غراضج علمود تروحين
يم اهلج وانه اروح للدوام

-غياهب: انه اجهزهن لا اتعب نفسك

- اكعدي انتِ او اكلج تعاي انه وياج نجهزهن

هزيت براسي اترخصنه من ابويه صعدنه فوك سحب جنطتي فتحتها ..

- غياهب اكعدي وانه اطلع غراضج الي تريدينه احطه الج وماتريدي ارجعه

ابتسمت بتعب ..

- تخرب غراضي فوضوي انتَ مابيه حيل ارجع ارتب وراك

- امم ارتبهن الج اصير مرتب مومشكلة

- تمام انه أشرلك وانتَ طلع بس لا تسوي فوضى

هز براسه كعدت على الجرباية وفتح كنتوري وكف كباله ..

- شطلعلج هسه

- طلع ذني التراكين الي على ايدك اليمنى

- اي اوكفي

طلعهن أشرلي مبتسم ..

- ذني مو

- اي ابني

- شفتي شلون شاطر

حطهن بالجنطه رجع هم وكف يم الكنتور يبلوعلي علمود اكله شيحط ضليت اكله شريد بالضبط وهَوُ مثل العاقل يجيب ويحط بدون غلط او يسوي فوضى سد الجنطه بعد مامكمل رفع راسه الي ورجع باوع للجنطه ..

- موجنج كثرتي شنو راح تقيمين ببيت اهلج غياهب

- لاوين اهواي بس تعرف انه متعوده كل يوم ابدل

- موبيدج نظيفه على رجلج

- رجلي الي يشوفه ويشوف اناقته يكولون اوف شكد مرتب بس لو يشوفون الفوضى الي تسويها من تبدل تتغير كل نضرتهم

- غير انتِ بيج وهواس مال نظافه وترتيب

- يلا عيب خلي ننزل بابا جوه كاعد وحدة هسه شيفكر

- عبالنه دخلنه بشوط

- اتادب ادبسزز

- اسف حضرة المحامية

- حطلي من عطرك

- هاي شنو

- اصبر نفسي بيه بين ماترجع

- اوكفي

فتح كنتوره طلع منه قميص من قمصانه ترسه ترس عطر فتح جنطتي حطه ويا ملابسي ..

- هاي كل ماتتنسين عليه شمي وهذه العطر هم وياه

- هههههههه اتنسى عليك صدك والله

- علمود يغزر

- شتقصد

- ماقصد شي روحي غسلي لا ابوج صدك عباله خذينه شوط

- منحرف

طلعت غسلت وجهي اباوع شصاير بحالي ماجنت اعرف الحمل هيج يسوي رجعت بدلت ونزلنه الابويه جان يخابر سده ووكف ..

-سلطان: درغام يكول رحت ادور على ثائر لاكي كاعد بالكهوه ويا صحبانه بس نكر الي صار

-ارسلان: اكيد ماراح يعترف شفتلك حرامي يعترف على روحه

- لاوالله

- ارجع من دوامي ويصير خير هسه ماكدر
لان مافارغله

- انتَ شلون راح تروح الدوامك اخذ سيارتي

- لا عمي مشكور انه احلها

طلعنه البيت اهلي والي صار بعده ابالي جاي نمشي ضحك ..

-ارسلان: مانتعب بالطريق واحنه رايحين الاهلج شبختين نوصل

فتح ابويه الباب دخل كدامنه حط الجنطه
يم الباب باوعتله والشمس تضرب بعيوني ..

-غياهب: ماتدخل ؟

-ارسلان: لازم اروح للدوام ما اكدر اتأخر اكثر

- فدوه ارسلان انتبه النفسك الي صار لحد الان من اتذكره ارجف

لزم ايديه باوع للباب ابويه داخل جوه للبيت واحنه بالحديقة ..

- انتِ هم انتبهي النفسج

- خابرني كل يوم واذا ماتكدر دزلي رسالة

- صار ... وبعد شنو اوامرج

- ارجعلي بالسلامة وكلشي ماريد

- ان شاء لله يلا دخلي جوه

- راح تاخذ تكسي

- اي من ارجع اشوف وضع سيارتي اذا ماصارلها حل اخذ وحدة

- اخذ سيارتي هاملتها انه

- لا سيارتج الج يحلوه

- بكيفج بس لان متعود سيارتك جوه ايدك راح تتقيد

- تنحل

حضني باسني بخدي وطلع عيوني تراقبه لحد ماطلع من الباب سده بايده دعيت ربي يحمي ويرجعه الي بالسلامة دخلت جوه لبيت اهلي اخذ ابويه الجنطه مني ..

-سلطان: ارتاحي نضر عيني لا تعبين نفسج

كعدت شابكه اصابيع ايدي ببعض خاف الي سوا هل الشي اليوم يرجع يكرره التفت على صوت ابويه ..

- لا يضل بالج خليت درغام يوكف الارسلان على الشارع ياخذه

ابتسمتله ..

- الله لا يحرمني منك ياحبيب روحي

- درغام گايل الـ ثائر اذا ارسلان يتاذه اول المشتبهين انتَ واخيسك بالسجون

- شكايله

- يكله مالي علاقة .. درغام يگول هَوُ واضح بس من مهدده خايف وثائر خنيث مايكدر يسوي شي وحدة هذه انطي عرك ويدخل بعالمه

- خايفه بابا والله من شفت المنظر اليوم گلبي اجه يوكف

- الله كريم

لليل رجعت خالتي من دوامها وابويه حجالها الي صار ..

-وجدان: انه ذولاك ولد اخواني غاسله ايدي
من تربيتهم لان تربية ابوي

-سلطان: ابوج الله يعلم بيا حفره ضام روحه

صبت خالتي العشاء نفس لعبانه بس ذكرت كلامه شكد وصاني اهتم بأكلي وهم كلام الدكتورة جبرت نفسي اكل وهَوُ بعده ما متصل عليه مامعقوله لحد الان ماواصل

وابويه وخالتي فوك راسي اكلي كملنه اكل ردت اكوم اساعد خالتي بس ماخلتني ..

-وجدان: ماما انتِ ارتاحي هنه كلهن كم ماعون شيرادلهن

-غياهب: راجعه من دوامج تعبانه

- سلطان صيح على بنتك يمه منج شكد تعاندين

رحت عليها حضنتها ..

- شنو هاي وجدانو صايره تشكين مني

- من عنادج هاي لو حنين جان كبل كالت
اي همزين

- ذيج جايفه ماعليها عتب بس الله طيحها بدرغام

- هههههههه هنا صدكتي

- لا وتدرين شنو هيه وارسلان نفس الطينه
فد واحد فوضوي مثلها وانه ودرغام نلملم وراهم

- لا غياهب ماتوقع ارسلان هيج

هزيت بايدي وكعدت ..

- غير انه افتر ورا ويخاف يسوي شي واعيط بيه

- چا كولي خالسه الرجال ولج

- لا خاله مو لهلدرجه

- والله عاد انتن بنات سلطان ينخاف منجن

- مكروده يا انه بصوت حنين

ضحكت واخذت المواعين صاح ابويه ..

-سلطان: وجدان چاي چاي

-غياهب: انه اسويلك بابا

أشرلي بسرعة ..

- انتِ بس اكعدي يابابا

- كعدنه يابه كعدنه

دك جهازي فز گلبي عبالي ارسلان طلعت حنين فتحت خط ..

-حنين: هاا غياهب شلونج شلون صرتي
ما ادري والله هسه درغام حجالي

جانت تحجي بخوف ..

-غياهب: احسن صغيرونتي لاتخافين شبيج جري نفسج

- خفت عليج والله

- الحمدلله احسن وبيت اهلي انه

- اجيج ان شاء لله بس هذه ابني السربوت يكعد راحه شويه

سمعت صوت درغام صاح بيها ..

-درغام: طالع عليج ابنج مسربت يالسربوته

ضحكت وهيه تضحك گالت ..

-حنين: مايقبل احجي شي عنه عبالك بس ابنه

- ابو الحسن هذه بعد اكيد مايقبل على ابنه

- وانه ام الحسن. دباعي فخامة الاسم

- والله شكلج وشخصيتج مومال هل الاسم انتِ وحدة شاخطه نوب ام الحسن

- خلي نشوف انتِ بلا شيطلع بيج ونشوف شتسمين

- الله كريم .. احجيلي شلونه تعاملج ويا ابنج

- لا الحمدلله جاي اتعلم بديت اعرفله حتى اليوم بدلتله بدون ما اخاف بس موتني بس يبجي

- طفل بعده قابل شتريدي

- زين غياهب حبابه سئلي خاله شو يتقيئ اهواي واستحي اسئل خاله جوهره

- ثواني

صحت على خالتي طلعت بايدها المجلافه ولابسه دشداشه قصيرة رافعه شعرها باوعت الابويه باوعلها ..

-وجدان: ها خالاتي

-غياهب: خاله حنين تكول شو الحسن يتقيئ اهوايه

- عادي ماما يصير عمره 6 اشهر يخف طبيعي

-غياهب: هاا سمعتي

-حنين: اي خوش

ضلت تسولف شويه ويايه وسدته راحت الابنها سمعته يبجي طلعت من المطبخ جايبه الچاي انطته الابويه اباوعلهم مبتسمة مادري ابويه شكاللها ضحكت

عفتهم ردت اصعد فوك الغرفتي گال ابويه ..

-سلطان: وين رايحه باباتي

- راح اتمدد فوك وهم انعس

- براحتج

صعدت فوك للغرفة وعيني على جهازي ليش لحد الان مامتصل ودام درغام موجود ببيتهم يعني من زمان من واصل اووف

بدلت وتمددت بمكاني دزيتله رسالة ..

-غياهب: بالي يمك اذا تشوف رسالتي طمني

بقيت كاعدة رغم انعس بس ماكدرت عيوني تغمض اخذت كتاب من كتبي الباقية هنا قريت بيه نص ساعة ودك جهازي باوعت للشاشه شفت اسمه بسرعة فتحت خط وگلبي دگاته مسموعة ..

-غياهب: ارسلان

-ارسلان: ياروحه

- وينك انتَ شكد صارلي منتظرتك

- اعذريني بس انشغلت وهسه كدرت الزم الجهاز

- وصلت

- اي الحمدلله ومن طلعت من بيتكم لكيت درغام واكفلي على الشارع كتله مو عندك شغل كال رجعت لان عمي سلطان گال اوصلك

- اي گال بابا

- اكلتي

- اي والله اكلت

- كليتي شويه لو اهواي

- اممم زين لان ابويه وخالتي هم كل شويه كايلين اكلي بعد وانه اخاف اترزل اكل

- اي يحيلي اكلي لاتبقين بدون اكل

- ان شاء لله

سكتنه اثنينه وصوت الهوا الجاي منه مسموع ..

- أولريش

- عيوني

- ابوسهن

ابتسمت لكلامه ..

- شنو ردت تكول

- تضيع الحروف يمج

- هههههههه لا والله

- اكلج

- كول

- هم احد كايلج قبلي صوت ضحكتج مُميز

ضحكت وانه اجاوبه ..

- شنو هاي جديدة

- جنها العافية .. بس والله صوت ضحكتج مُميز مو مال خبال وفضايح

- كول مو ضحكة الرقاصة ليش مستحي

- خفت ترزليني

- حالياً انه كادره عليك بس بالرزايل السبب لان حامل ما اكدر ادفر واتعارك اخاف على البيبي بس من اولد بالسلامة ارجع مثل قبل وياك شنوو هاي ارسلان شو موحلو اذا كله رومانسيات

- انتِ بالشهر حسنة تطلع منج رومانسية

- يعني شوف

- امم اي شفت سولفيلي

لزمت خصله من شعري الف بيها على اصبعي واسولف وياه

- اي هذه يعني انه احب اصير مو عبالك
ما احب بس اخجل

- چا شلون انه رجال رومانسي اريد رومنسيات

- احترم نفسك شو تدور رومانسيات

- مدورها ويا مرتي بالحلال

- هه ناقصك تدورها ويا غير وحدة

- اذا اخونج شتسوين

- اتريد التهمبل لو الصراحة

ضحك قوي كام يكح ..

- لا الصراحة شسوي بالتهمبل

- انطيك بالبداية رزاله غسل ولبس

- شددد .. كملي

- واحرمك مني للموت والله اخليك تتحسر على شوفة خيالي وتدري بيه من اقسى بكد ماگلبي بيه حنيه بيه قساوه

- لا شبيه ماعندي عقل اخونج مو زلمه الي يخون

- حرامات ينعد على الزلم اصلاً

- اليوم ولد صديقي من وصلت المكان دوامي خابرو صار عنده ولد لو تشوفينه شلون فرحان  لان اول طفل اله

- الله يحفظه اله

- آمين

لاحظت شغلة بارسلان مايندمج اهواي
ويا الكل بالكلام ماعداي يندمج ويضل يسولفلي كلشي كلش حبيت هل الشي بيه ..

-ارسلان: يلا بابا انه لازم اسده مايحتاج اوصيج بعد

-غياهب: تمام موتنسى كل يوم حاول تتواصل ويايه

- صار عزيزة عيوني

ردت اسده اجاني صوته بس بنبرة مختلفه
عن الي قبلها ..

- احم غياهب

- عيونها

- قبل لا اتصل بيج اجاني احساس بس مادري اذا يطلع صدك اولا

- شنو هوا ؟

- حاس راح تجينه بنيه

دمعت عيوني شلون يحجيها بحنيه ..

- اممم ان شاء لله احساسك يطلع صح

- اشبعها حنيه ودلال بس تجيني بنيه

- وانه

- هههههههه ادللج انتِ وياها

- اممم مو تفرق وتعز بنتك اكثر مني

- مافرق وعيونج .. شنو رأيج بس ارجع نروح للسونار مادري بس گلبي مفرفح يريد يعرف شنو راح يجينيه

- خلي ادخل بالخامس علمود يصير اوضح مرات بالرابع تصير خربطه

- يلا بكيفج

- تحبني ارسلان ؟

- لا ماحبج .. عاشگج بنت سلطان

- هسه شلون راح انام

- ليش

ةعضيت شفتي همست ..

- تعودت على حضنك

- غياهب لا تحجين هيج تهيجين المواجع

- يلا اوكي اوكي

سمعت صوت صار قريب عليه ..

- راح اسده بنيتي قبل لا تنامين فرشي اسنانج واشربي ماي والبسي شي مريح تغطي زين تمام

- تمام

سد الخط وكمت سويت مثل ماكالي وكفت افرش اسناني ضحكت على نفسي قبل شكد اعاند بيه واخلي ينجلط وماطبق اي شي يحجي هسه مثل العاقلة اسوي كلشي واذا مايوصيني ويهتم لهل تفاصيل استفقدها واضوج غسلت ورجعت لبست تراك مريح ورجعت تمددت بمكاني قريت اية الكرسي قبل النوم متعودة اقراها دائماً قبل لا انام ..

-غرام: رجعت من الدوام صليت وكعدت اقرأ قران سديت القران التفتت على صوت سراج اخذته بحضني طلعت نيروز من غرفتها مطنكره مو من عادتها

-نيروز: غرام عادي اسئلج سؤال

- اي

فركت اصابيعها بتوتر وخجل مدنكه راسها لثواني رفعته ..

- وحدة من تزوج شكد يعني ويصير عندها طفل

- بيد رب العالمين وحدة عن وحدة تختلف

- هااا

ابتسمت بوجهه ..

- تريدين طفل

هزت براسها تتبسم ..

-غرام: يصير ان شاء لله وبعدكم بداية زواجكم

-نيروز: هم صدك .. بس حنين ماطولت من صارت حامل وغياهب ورا اشهر هم صارت حمل بس انه بعدني

رفعت سراج بسته اباوعله يباوع الـ نيروز
من تسولف ابني بيه وهواس التركيز من هسه

- اذا مرت سنة وماصار راجعي يم دكتورة مختصه

- اي حتى عمر كالي البارحة

- هَوُ عمر طلع ويا خاله للشغل

- اي الصبح طلعو سوا وما اجو للغده خابرني گال عندهم شغل مايجون

- لعد هاج سراج خلي بس ارتب غرفتي واغسل الملابس الي عندي

خذته مني دخلت رتبت غرفتي على السريع واخذت الملابس الوسخه ذبيتها بالغسالة تغسلهن اليوم خميس وسوزان جاي تسوي خميسات ابويه يمها تكول اول خميس سوو عمامي واتفشلنه بس مايرضى كُميل اروح لان عمامي يحضرون

مادري اذا راح هم اكدر اتخطى الي صار
او تعودت على الصدمات بسبب الي شفته بحياتي مديت راسي  باوعت الـ نيروز كاعدة تلاعب بيه التفتت على صوت الباب مال الحمام طلعت ناز من الحمام لافه شعرها لابسه تراك زيتوني ياكل ويشرب عليها
من شدة بياضها ..

-ناز: هلو اجيتي من الدوام

-غرام: اي بس ماشفتج

- عمر انطاني مسائل رياضيات احلها لازم
ومن يجي ايشوفهن وضليت احل بيهن ودخلت اسبح

- شلونج بالمواد مابقى شي للامتحانات

- يعني زينه بس جاي اواجه صعوبة لان المواد مادارستها قبل ومن زمان تاركه

- بالتركيز والفهم كلشي يسهل

- ان شاء لله .. البارحة حلمت حلم غريب

- خير ان شاء لله

- هذه الولد الي شفناه من رحنه للنجف

- يا ولد ؟

- هذه يمكن يصير صديق ارسلان حتى كعد ويانه

- هاا هذه الولد ماعرفه كلش اي شبيه

- شو شفته بالحلم

- شجابه عليج

- مادري

- شنو الحلم

- ماتذكره كلش بس الي اتذكره شفت هل الشخص

- عادي حلم عابر لا تخلي ابالج

- اي .. وين سراج

- جوه يم نيروزه

- رايحه الهم اشتاقيتله اليوم ماشفته بس بالغده

رحتلهم وانه رجعت كملت شغلي جففت الملابس وشريتهن رجعت يم البنات كاعدات ناز تمشط بشعرها القصير ..

-ناز: هاي غياهب شلون تمشط شعرها انه همزين كصيت منه رغم احب الشعر الطويل

-نيروز: عمو سلطان يموت على شعر بناته عندج غياهب تحب شعرها بس حنين ماتحبه لو بيدها تكصه بس تخاف من ابوها ماتكدر تسوي شي

-غرام: شعري جاي يوكع صاير خفيف

ردت نيروز ..

- هاي اما عندج نقص فيتامينات او بسبب نفسيتج

- اي يمكن لان ماجان هيج هسه يهر هر

بقيت ساكتة وهنه يسولفن باوعت الـ ناز المندمجه تسولف الي يشوفها قبل ويشوفها هسه مايصدك فعلاً ماكو شي صعب على رب العالمين وكل هذه فضله يرجع اله ثم
الـ غياهب الي حاربت علمود يوافقون بالعلاج

ناز وضعها اتحسن اكثر بعد ماراحت للنجف وشافت اهلها ..

-غرام: لعد مليكة وين

-نيروز: راحت الاختها شو هم متخربطه

- الله يشافيها

سمعنه الباب يندك ..

-ناز: منو جاي هسه حتى ماكو احد بالبيت غيرنه

-نيروز: رايحه اشوف اباوع من جوه الباب اذا زلمه ما افتحله الباب واذا مره افتحه هاا شكلتن ؟

-غرام: خاف ابوج او اخوج

- لا ابويه بدوامه ماما كالت من خابرتني الصبح ورماد دوام مايجي اذا راد يجي ينطيني خبر

- خوش روحي شوفي ومثل ماكلتي اذا رجال لا تفتحين الباب لا الولد يضلون يحجون

طلعت تفتح الباب شويه ورجعت عاوجه حلكها طبكت حواجبي على الوراها هاي جيلان شجايبها هنا وكُميل محذرها توصل لبيتنه اباوعلها طاكه للبس الرسمي والكعب والواحد يحجي الحق هيه حلوة

دخلت وكفت لازمه سراج ناز بقت على كعدتها تباوعلها بتك عين ..

-جيلان: السلام عليكم

-غرام: عليكم السلام

- شلونكم بنات

-نيروز: بخير

- شنو ماكو اتفضلي

باوعتلي نيروز متعجبه من تصرفاتها تتصرف طبيعي سحبت نفس بهدوء لان مالي خلك للمشاكل كافي الي بيه ..

-غرام: اتفضلي جيلان

دخلت بكعبها على الفراش تمشي گالتلها ناز ..

-ناز: احترمي البيت الي تدخليله

باوعت. جيلان عليها أشرت على نفسها بتكبر ..

-جيلان: ويايه ؟

- لعد ويا الحايط نزعي الي لابسته بيتنه نظيف مو حضرتج جايه داخله بحذائج على الفراش

- هاا العفو نسيت لان متعوده ببيتنه مانزعه

- طبعاً مامتعوده اذا مخلين مساعدة عندكم تنظف وراكم

خزرت ناز وراحت نزعت حذائها ونيروز تأشر الـ ناز بحركة بردتي گلبي رجعت كعدت واحنه كعدنه تباوع بارجاء البيت ..

-جيلان: لعد خالتي وين

-غرام: راحت الخالتج المريضة راجعه متخربطه

- هاا ولولد اشو ماكو احد بيهم هنا

رفعت حاجبي متحملتها على اعصابي ..

- ماتوقع شي يخصج ؟ جيلان

- هههههه وشكو ضجتي تره كُميل ابن خالتي وخطيبي السابق

- وانتَ كلتيها خطيبج السابق عيب سؤالج عنه

- عجيب شكو ضجتي

- الي جاي تسئلين عنه زوجي

- تمام تمام

التفتت الـ ناز تباوع عليها ..

-جيلان: وانتِ نازو شخبارج

-ناز: من الله بخير

- وشبيج تنترين هم صار عندج السان وتحجين الله يرحم ذيج الايام الي جنتي بيها طكه ونص ومبتلين بيج

توسعت عيونه على كلامها وجرائتها وكفت ناز ..

-ناز: احجي عدل احسلج جيلان

- وشحاجيه انه مو جنتي مريضة ماضل دكتور ماخذوج اله

- وانتِ شعليججج

- ليش تضوجين من الحقيقة

-غرام: جيلان احترمي نفسج لاتنسين كاعدة بنص بيتنه

- شبيجن هيه مو جانت مريضه ويعالجون بيها

-نيروز: كلامج بالاول ماجان هيج وبعدين شعليج انتِ المبتلين اهلها مو انتِ الحمدلله عندها اخوان يدفعون عمرهم كله علمودها كلامج تافه مثلج

-ناز: كومي طلعي من بيتنا بلا كرامه

بقت جيلان كاعدة بمكانها وحاطه رجل على رجل وتباوع بابتسامة خبث بعد مافورت دمنه تقربت ناز الها وكفت كدامها شهكنه من تفلت عليها ..

-ناز: اذا جايه ومخليه ابالج تعكرين اجوائنه
فـ احب اكلج غلطانه ولا تعبين نفسج ذني صغار بالنسبة النه تخطينه الاكبر منها اذا باقي شويه بس من كرامتج وتريدين تحافظين عليها كومي اطلعي منا احسن مايرجعون ويشوفونج ويمسحون الارض بيج

دفعت ناز رجعت مرتديه للورا ..

-جيلان: مانقصني بس المخابيل

- دوكفيلي وشوفي المخابيل شتسوي هسه

ركضت ناز للمطبخ وانه ونيروز واكفين مصدومين. بـ ناز ماجنه متوقعينها بهل القوة طلعت من المطبخ لازمه الچفچير بايدها اشرت الجيلان ..

- اذا ماكسرته على ظهرج ماطلع تربية الاعرج

ركضت ناز عليها وشبعتها ضرب بيه رغم ضخامة جيلان بس ناز مسيطره عليها وهاي فضحتنه بالصريخ نيروز كعدت لازمه بطنها فاطسه ضحك ذبيت سراج عليها وركضت عليها اسحبها منها لان انفضحنا بالصريخ

-غرام: ولج ناز عوفيها فضحتنه

-ناز: خلي اعلمها المخابيل شيسون

ورمتها تورم كوه سحبتها من فوكاها وذيج ماصدكت طلعت تركض من البيت الشال صاير صفح ولازمه اماكن جسمها تلبس بحذائها وتغلط على ناز ..

-جيلان: الكلبه المسودنه انه اعلمج

-ناز: زيج بصوت اخويه حبيبي

خزرت نيروز من طكتها بضحكه قوية وكاعده ماهامها ..

- انعل ابوج لابو اخوج التافه مثلج

ماكدرت اسيطر على ناز هنا ركضت وراها وبايدها الچفچير وجيلان ركضت كدامها لطمت على خدي وانه اسمع كب الصريخ

-غرام: ولج نيروز كومي ويايه

-نيروز: والله ولا اكوم خليها حيل وياها وخلي تحمد ربها هسه من سبت ابوها ارسلان وعمر مامجودين جان دفنوها بمكانها

طلعت وراها وناز لازمتها بنص الساحة وتكفخ بيها لحد ماوصلتها لباب الشارع فتحته ودفعته طلعتها تفلت عليها سدت الباب بوجها

اجت ناز فحطانه لازمه حاطه ايدها على صدرها والوجه مزهمر احمر ..

-ناز: بردت گلبي بيها هل العايقه

-غرام: انتِ بخير ناز

- اي مابيه شي بس هذه بعد لا تطبخون بيه لعبت نفسي منه لان لمس جيلان الحيه

راحت ذبته بالزباله ورجعت دخلت جوه للبيت دخلت وراها نيروز صاحت بس شافتها دخلت

-نيروز: خاب ابوسج ابوسج تعاي خلي ابوسج على هل الكتله الي انكتلتها جيلان التسس

هاي هم ماكالت لا راحت باستها وكعدن فاطسات ضحك وهنه يسولفن على العركة هزيت بايدي مجنونات ردت ادخل للمطبخ مديت راسي من الباب

-غرام: ابني وضح مستقبله دام متعلق بارسلان

-ناز: راح يطلع تربية ارسلان يمشي ويتفل على الي يضوجه

- صخام الصخمني

اسمعهن يضحكن وراي هزيت راسي مأيسه من الوضع بس لا صدك ابني يطلع هيج صخام بعينج غرام ابوه كُميل وارسلان موجود شيطلع ابنج

لليل رجعو الولد والبنات سولفو الهم الي صار ..

-كُميل: كفووو بعد خالج

-عمر: طبها مرض تستاهل

-ناز: كسرتها تكسر وداعتكم

باسها عمر وهَوُ مشجعها على الي سوته طلع عمر علاكه مامعروف شنو الي بداخلها اخذ سراج حطه كدامه وطلع من العلاكه غتره وعكال صغار

-كُميل: ولك شنو هاي

-عمر: اريد اسوي جلسة تصوير الي وراح اخذ سراج وياي

-نيروز: عمر سراج وينه وين هاي السوالف مال العكال

- مالكم علاقه انتم

لبسه الغتره وابني مادري شيرطن ويا عمر محد يفهم عليه وعمر مسوي نفسه يفهم عليه ويكله اييي وانتَ رجال ومدري شنو

لف الغتره عليه بس العكال ماصار ذبه عمر لف بس الغتره بطريقة مرتبه وكفه سراج بعده مايمشي يوكف ويوكع ثبته بايديه

ضلو يهوسوله عمر وابوه وهَوُ يهز بروحه والبنات ماتن عليه يصورن بيه ابتسمت اباوعله همسلي كُميل ..

-كُميل: اضحكي من فدوه اروح لهل الضحكه الدنيا خلصانه علويه

-غرام: ماباقي شي للاربعين مال ابويه تاخذني

- ان شاء لله

ضلو ياخذوله بالصور والفيديوات اباوع
الـ كُميل دزهن الارسلان وكتبله شوف ابنك

مشت الايام دوام وابني وبيتي ومليكة مارجعت للبيت بعد بقت يم اختها لان وضعها كل ماجايله يسوء راحلها كُميل بس انه ماوصلت لان مامتقبليني بينهم

مالكيت بحياتي انسان مثل ابو سراج سندني باصعب اوقاتي ماعايفني طول هل الفترة الي مرت اليوم الاربعين مال ابويه سويتله ثواب ووزعنه للجوارين باجر نطلع للنجف سراج يبقى يم نيروز ماكدر اخذه ويايه

الثاني يوم طلعنه الفجر انه وكُميل وسوزان كالت نلتقي بالمكبره على طول الطريق مشغلين القران دخلنه المكبره وتهينه رجع كُميل خابر زوج سوزان ضل يدلي لحد مااندل  اخذنه ماي ورد من ولد يبيع بالطريق وصلت رجليه الهم انعصر گلبي وانه اقرأ بالاسماء مالتهم

كبر امي وكبر ابوي مشيت بخطوات ثكيله قبل لا اوصل الهم لزم ايدي ..

-كُميل: اتذكري هذه قدر رب العالمين وكلنه على نفس الطريق لا تاذين نفسج وتأذيهم

هزيت براسي وغصتي خنكتني وكفت محتاره منو اروحله اول واحد اثنينهم بجهات مختلفه راحت رجليه على امي وانه ذاكرتي تسترجع اخر نضرات ووداع جان بينه من شردتني
من البيت بذاك اليوم

كعدت بالتراب رفعت ايدي ترجف اتلمس بكبرها ..

-غرام: يمه يمن اروحلج فدوه هاي انه غرام اكعدي اتلكيني اجيج اليوم

تحررت دموعي صرخت بصوت من اعماق گلبي ..

- يمه اكعدي واتلكي بنتج اخ يايمه كسرتج كسرة مالها جبر

محتاجه الج وين رحتي وعفتيني انحرمت منج اهواي تعاي شوفي غرام شصار بيها حتى ابويه اجاج وصار يمج صفينه انه وسوزان وحدنه تعاي وشوفي اطفالنه مو جانت امنيتج اتشوفينهم رحتي وماشفتي ابني مالحكتي تفرحين هل الفرحه

بجيت وعاتبت اهواي بس ماكو فائدة مايرجعون لو ندري يرجعون لكضينه العمر كله نعتب ونبجي بس مايرجعون عافونا بهل الدنيا واختباراتها رفعت راسي من الكبر كُميل يذب ماي ورد على كبورهم اجه حط بايدي قران

-كُميل: اقريلهم وريحي نفسج وريحيهم علويه البجي مايفيد بس مامنعج تطلعين الي بگلبج الله ينطيج الصبر من صبر مولاتي زينب

بديت اقرالهم ودموعي مابطلت انتهيت موقف اصعب من موقف مصيبة اكبر
من مصيبة لحد ماكملت قريت الفاتحة الابويه ووكفت سيارة زوج سوزان نزلت منها وراهم منشئه عمامي ..

- نروح غرام ؟

-غرام: ليش نروح هم ارض النجف انحرم منها بسببهم

وصلت سوزان انطتني ابنها وعيونها انكلبت حمر كعدت يم كبورهم ملخت روحها تملخ لازمتها عمتي الي تخزر بيه كأنما عدوتها ماتحملت اختي موتت روحها انطيت سيف
الـ كُميل ورحتلها مديت ايدي الزمها اندفعت باوعت متفاجئه شنو هل البشر ..

-مديحه: وخري ايدج لا اكسرنها الج كلشي صار بسببج اخوي مات من وراج ومن وره قهرج وعارج الماطمو

عضيت شفتي بقهر الناس الواكفه كلها اتباوعلنه باوعت كُميل عيونه صارت بكصته مارديت عليها دنكت على اختي رجعت دفعتني منها ماتحملت عطت بيها

-غرام: كااافييييي شبيججج ماتشوفيننن احنه بيااا حااال فوووك ظلمكم الي جاي تحجينن هذه الحجييي وخرري هيجج

دفعتهاا ولزمت اختي الي انتهت مادري اصبر روحي لو اصبرها واحنه نفس الجرح بس غصباً عليج ياغرام تقوين نفسج وتكونين سند الها ماعندجن غير بعض من اليوم ورايح

-غرام: سوزان

شهكت بدموعها ..

-سوزان: راحو غرام راحو اثنينهم راحو وعافونه

- راحو لرحمة الله المكان افضل من هل الدنيا

كامت تلطم على وجها وتصرخ صوتها راح اجه رجلها يحاول يلزمها ويايه بصعوبة كدرنه نهديها عمامي ونسوانهم يخزرون بيه لو بيدهم هسه هنا وبهل المكان يكتلوني ويدفنوني صارت هوسه درت وجهي بتعب شهكت وانه اشوف كُميل هَوُ وعمي منصور واحد يدفع بالثاني والزلم صارت بنصهم

همست اختي بتعب ..

-سوزان: كومي الرجلج ذوله مايخافون الله لايسون شي

عفتها كاعدة ورحت امشي سريع بس اريد اوصل الهم عثرت بطابوكه اجيت اوكع لو
ما الزم بواحد من الكبور لحد ماوصلت يمهم لزمته من ايده ورجل سوزان لازم كُميل

-غرام: كُميل حباب عوفه تعال وياي

-منصور: اجت ساس البله

-كُميل: ماساس البله غيركم يالفكوره عمام انتم حشه سادة محمد منكم وبريئ منكم محمد وآل محمد

- فدوه تعال وياي عوفه كُميل جاي تسمعني مواحجي وياك

-منصور: ولي منا انتِ ورجلج مانتشرف بيكم بينه

طك صبري درت عليه انفض غضب ..

-غرام: علساس انه الي اتشرف بامثالكم اجيت الاهلي ماجايه السواد عيونكم حسبي الله ونعم الوكيل بيكم الى يوم الدين

سحبت رجلي كوه يريد يهجم عليه ولازمينه انه وابو سيف ومتشعوط يصيح هدوني صعده بالسيارة يهدي بيه

-ابو سيف: خويه امسح بوجهي هذه منصور مايعرف يحجي لا يصير بخاطرك

-كُميل: بقندره حشاك ما اعترف بيه

- ارجعو انتم لبيتكم شوف مرتك صوفرت
من الخوف كافي مصيبتها عليها

سد الباب على كُميل واجه باتجاهي ..

-ابوسيف: خويه انتِ روحي وسوزان انه افهمها

اثنينه درنه وجهنه من سمعنه صوت صياح سوزان تحجي على عمامي غمض عيونه بقلة صبر ..

- خلي اروحلها لا عمامج يسون شي انتم روحو

- بس شلون ماتشوفها شلون جاي تتعارك وياهم

- هيه محمله عليهم من زمان يلا خويه صعدي ويا رجلج

صعدت وعيوني عليها جانت تحجي بروح محتركه ما اريد اروح بس شسوي الوكت والظروف اقوا مني الشي الي طمني زوجها وياها وماراح يخليهم يتقربون الها

طلعنه من المكبره زرنه الامام على السريع ورجعنه البغداد لان ابني يتنحس من اطلع ..

-غرام: شصار بينك انتَ وعمي منصور وهيج خلاك تفور

ضل ساكت ماجاوبني عيونه بالطريق ..

- مو احاجيك

كُميل: ضل يمسلت وحدة

- شمسلت ؟

- من اسمه تمسلت مايحتاج احجي

- ضل يحجي عليه مو

هم سكت ..

- جاوبني

- اي بس ماسكتتله طيحت حضه ولو ما ابو سيف يلزمني جان كتلته بنص العالم بس بيه بخت

درت وجهي مختنكه رغم عرفو انه مالي ذنب والذنب ذنب غسان بعدهم يكرهوني ويحجون عليه بس ماكول غير الله على الظالم ..

-حنين: دخلت الدوامي اتلكتني انوار مبتسمة

-انوار: لك هلا با ام الحسن

ضحكت حضنتها ..

- هلا بيج شلونج

- الحمدلله انتِ شلونج حسونات شلونه

- الحمدلله بس لو يبطل بجي اصير بخير

دخلنه لغرفتنه الخاصة وكفت اعدل بملابسي واسولف وياها ..

- اي شلونج بالزواج الجديد

ردت وعيونها تلمع ..

- كلش مرتاحه هَوُ واهله زينين وياي

- الحمدلله والشكر الله عوضج وان شاء لله دائماً يبقون هيج وياج

- امين ..

طلعنه بدينه بشغلنه وكل مايصيرلي مجال اخابر خاله جوهره اسئلها عن الحسن ودرغام التحق اليوم الدوامه هم صفينه وحدنه بديت اتعود على هل الوضع قبل جنت هم انقهر من يروح بس هسه عندي ابني يملي عليه فراغي

دخلت انوار وجهه مايكصه السيف مع العلم هيه وجها بشوش ودائماً تضحك

-حنين: انوار شبيج

ابتسمت مجامله بوجهي ..

-انوار: لا ماكو شي بس شويه تعبت

- وتقنعيني هاي حالتج لان تعبانة

كعدت ضايجه والدمعه بطرف عينها ..

-حنين: هيوو انوار راح اطيح حضج احجي

- الممرضات هنا يحجن عليه صارلهن فترة يكولن على رجلي لان دكتور وماخذني يكولن شنو ماخذله زعطوطه وهَوُ دكتور ويستاهل الاحسن منها

- هاي الحالة اول مره ؟

- لا من اتزوجت لليوم اسمع لكلامهن

- تعاي حبيبتي

كعدتها على الكرسي سحبت كرسي كعدت بصفها ..

- انوار اسمعي دائما من ينحجي على احد اسمع اهلنه يكولون رسول الله بعظمته ماخلص من كلام الناس ومن شرهم تريدين احنه البشر نخلص من الكلام

ذني تلكينهن طاكتهن الغيره منج من حركة گلبهن يحجن هيج ويتقصدن يغثنج يريدن يخربن بينج انتِ وزوجج وبعدين تعاي اكلج مثلاً وظيفتج قليله واذا هَوُ دكتور شنو ربه وحد ذني ماعندهن سالفه يحجن بيها يدورن فروقات وبعد يومين كلنه نفس التراب ينذب علينه لا تبقين تهتمين لكلام الناس خليج انسانة واثقه من نفسها ومن خياراتها

الكلام الناس طنشي مايحجي عليك غير الي ميت غيره منك ومايتمنى الخير الك اهتمي بنفسج وبعائلتج انه جان كمتلهن هسه وطيحت حضهن بس تدرين بالمدير شلون متشدد ويانه

-انوار: لا فدوه اكعدي حنين مانريد مشاكل خيولن وصدك كلامج مادري شبيه مقهوره منه

- عفيه البسيهن واذا تريدين تردين ردي بكلمة كلمتين سدي حلوكهن

ابتسمت حضنتني ..

- احلا صديقه والله

- ام الحسن انه بعد خيه وين تلكون مثلي

- فدوه للحسن والامه .. صدك ذكرتيني

باوعتلها حطت كدامي مجموعة هداية مغلفه ..

-انوار: من خاله انوار وزوجها للحسن حبيب خالته

-حنين: اوويي عمري ليش زحمتو نفسكم بعدين انتِ مو اجيتي وقمتي بالواجب

- شجايبه قابل يمعوده

- شكراً حبيبتي انوار اردها الج ان شاء لله

حطيتهن على جهه ورجعنه لشغلنه ماعندي غيرها صديقة هنا بالدوام معتزلين عن الباقين مكتفين بنفسنا لان وين مااروح النفاق بكل مكان ..

خلص دوامنه وهيه طلعت ويا رجلها وانه اخذني الخط رجعت للبيت مشتاقه لابني دخلت ادور عليه شفت خاله كاعدة ومخليته بحضنها سلمت عليها اخذته منه ابوس بيه

-حنين: حبيب امك اشتاقيتلي مثل ماشتاقيتلك هاا

-جوهره: خلي احميلج الاكل وانتِ بدلي

- لا خاله انه احمي كافي عليج الحسن
من الصبح يمج اكيد شلع گلبج

- خايبه شو اسكتي حفيدي هذه ابن العزيز

- رحم الله والديج بس ارتاحي انه هسه اهتم بكلشي

- بكيفج ماما بدلتله قبل شويه بس جوعان رضعي

- اي هسه

باوعت للعلاكة الي حطيتها بصف جنطتي ..

- شنو هاي

- هاي انوار هيه وزوجها دزوهن لهل الحلو

- ياا فشل ذاك اليوم البنيه اجت وماقصرت

- كتلها والله .. راح ادخل جوه ارضعه وابدل

دخلت الغرفتي وهَوُ يباوعلي بعيونه السود حطيته على الجربايه وبدلت ملابسي ركضت اله ..

- يمه وليدي يمه جوعان

حطيته بحضني ارضعه وصدك جوعان بقيت كاعدة لحد ماشبع اتصل درغام ..

-درغام: بعد ماكو بلائي كله ام الحسن

-حنين: مامتفقين هيج اذا ماتكولها احس بنقص

ضحك ..

- شلونج بلائي

- زينه قبل شويه اجيت من الدوام وصلت انتَ ؟

- اي وراح تتغير اوقات الدوام ايام النزول هم

- للاحسن لو للاسوء

- نفس الشي بالنسبة الي

- هاا مادري بعد

- شلونه ابني

- يبوسك هَوُ وامه راح انومه واكوم اتغده

ضل يحجي ويايه شويه وسده بالدوام مو اهواي نكدر نطول بالاتصال نومت ابني وطلعت جوعانه حميت الاكل خاله مسويه مرك لبلبي على دجاج وتمن حميته همزين اعرف لهل السالفه

حطيته بالصينيه كعدت اكل اخذتلي صفنه بحياتنا والتغير الي صار بيها من كم سنة جانو بابا وغياهب بالدفرات يكعدوني من نومي هسه صرت مسؤؤلة عن عائلة وطفل ودوام والحمدلله الحياة جاي تستقر ويانه ..

-درغام: شبيك ضلعي شو صاير تصفن اهواي

-مجاهد: لا ماصافن وياك

- بعدك ضايج على موضوع امك

- تريد الصدك

- اي

- گلبي ملچوم منها منين مادير وجهي كلامها يرن براسي

- تتوقع مهددها ؟

- ياريت وماتخليني هيج مكسور منها على الاقل لو تتواصل وياي وتحجيلي

- جربت تتواصل ويا اختك ؟

- لا ماريد اراسلها خاف هذه الكلب ابوها يشوف المراسلة ويأذيها لان يفتش بجهازها دائماً

- هيه بالجامعة مو

- اي

- چا شبيك يحضي الاغبر روحلها لهناك واحجي وياها وهنا راح تكتشف اكو شي
او امك الي حجته صدك من قناعتها

- شلون راحت عن بالي

- انتَ ماعاجبني صاير تصفن اهواي

- لا تلح كنالك ماكو شي

- انشوف صفناتك مو خاليه واعرفنك انه
مو غشيم روح طكطهن على غيري

حك طارف حاجبه ورفع راسه يباوعلي ..

- اكلك

- اسمعك

- لاهيج انه رايح الشغلي

دكيت على الميز ..

- مو كتلك شغلتك مو خاليه

مارد عليه طلع بس متاكد اكو شي اباله لان اخوي من الطفوله وحافظه مثل ماحافظني دك جهازي شفته ابوي ..

-درغام: الله يساعدك يابه

رد عليه وصوته كل متغير حتى مارد عليه السلام مومن طبيعته ..

-جابر: راح يوصلك فيديوات شوفهن

- فيديوات شنو

ذبله حسره ورجع يكمل ..

- يخص حبوبتك هيله

سده شويه ووصلي الفيديو انتظرت يحمل وكلي فضول اعرف شنو الي بيهن كمل تحميلهن فتحته واحد منهن باوعت بأستغراب هذه جدي سالم

الواضح الفيديو تصويره جديد جان والمكان مهجور الكاعد بيه يشرب بالجكارة ويباوع للكاميرا ..

-سالم: شلونهم اولادي .. اولادي الباعوني راجعلكم مابقى شي اصبرو عليه .. تسكتون عن الي كاتل اخوكم عارات ماتصير الكم جاره راجع واول واحد راح يتعاقب هَوُ الي حرك ابني مجيد حضرو نفسكم كلكم راح تتعاقبون شوفو الفيديو الثاني نهايتكم مثل نهاية هل الشخص 

درست الموضوع بعقلي معناها ثائر عنده تواصل ويا جدي سالم والا شلون درا بكل هذه بس يا شخص يكول عنه نهايتكم مثله

رجعت فتحت الفيديو الثاني وريتني مافاتحه جسمي كله رجف وانه اشوفه مصور حبوبتي هيله وهو يذبح بيها ضلت عيوني مفتوحه بدون ماترمش يذبح بيها بكل برود لحد مافصل راسها عن جسمها حط رجله على جثتها وهَوُ يگول

- هاي نهاية الي يلعب من ورا ظهري

انكطع الفيديو وعقلي وكف من الي شفته الدم صعد الراسي خابرت ابوي

-درغام: ثائر الكلب يعرف مكانه

-جابر: رحت البيتهم وامه تكلي سافر

- شوكت لحك سافر شهل الكلاوات تلكاه حط ايده بايد جدي واتفقو علينه

- ادري بيه مامسافر بس تلكاه ضحك على اهله وكلهم مسافر ومثل ماكلت ثائر وابوي حطو ايد بايد واتفقو علينه

- ارسلان لازم ايشوف هل الفيديوات حياته صارت بخطر

- دزيتهن اله والـ عمران الي خابرني مفرفح وقسم يكتل ابوي بايده على السوا بـ امي

سديت الخط من ابوي وراسي احسه راح ينفجر شنو هل البشر من المجرمين الخطيرين يذبح بكل دم بارد ولا كأنما جاي يذبح بنفس

اجت اشعارات على جهازي واحد ورا الثاني باوعت للشاشه الكدامي هذه رقم ثائر دازلي صور لزمت الجهاز افتحهن اشوف شنو الي بيهن هذه هُوَ وجده بدو يلعبون جمد الدم بجسمي من الي شفته ..

للحكايا بقايا ..»

توقعاتكم للقادم ؟

حسابي الانستا تابعوني عليه گلبي

Instagram: hawraalsaidi

قناة التلگرام ابلغ بيها كلشي هيه والانستا

Harahir