" دمـاءٌ شرقـيّة "
_________
فايت توزين الصباح ورحمة ومراد ولا نعسو ولا شافوه الجنازة والعيا والسهير والمشاكيل من الفوق، كيجريو منهنا ومنهنا وعاد خاس اوجدو الفطور وعاد كاين الغدا ضاروري ديال صدقة، الدراري باقي كولشي كيقلب على ريتال، وقف رضى جهت شجرة فتح قرعة دالما كب منها شوية فيدو وضرب بيها وجهو ودوز على عنقو بالعيا وماشارب لا قهوة ماكامي تاكارو كيحس بالعيا .. جا وقف عليه عصام : ( بعصبية وصوتو مضغوم ) يا خطفها شي حد ياهي هربات دريوش كلها وماكايناش مايمكنش !!
رضى : ( كيطلع راسو وكيبطو بحالي كيتحلف ) الى خرج هادشي من تحت شي شي قــــواد غادي يكون حفر قبرو بيديه
عصام : ( كضغط على الفك ديالو ) نكلس مو على القـــرعة
فجهت الجبل، دار مبنية بالطوب والحجر الدنيا صاقلة والكالم حلات عينيها فالصقف كتحس بكولشي كدور بيها، ناضت كتوكض بشوية كتحس براسها مبوقة شافت قدامها كتلقا الفراش غريب عليها والشقف والدار كاملة بقات كدور فعينيها كتحاول تفهم هي فين واش جابها لهنا .. حاولات ترد ذاكرتها اللور حتا كتفكر حوارها مع باها وباش خرجات غير كتجري باغا تهرب من داكشي لي زامتها فوسطها حتا بدات تخنق ومن تم مابقاتش عاقلة على راسها، شدات على راسها بيديها كيضرها .
دخل مدخل فيديه جوج كيسان دالقهوة علات عينيها بزربة وراجعة اللور دوات بزربة مخلوعة .
ريتال : ش شكوون نتاا !!
بقا مهدن وقرب حط كاس دالقهوة قدامها وبعد كلس قبالتها : كيبقيتي ؟
الخلعة شداتها فقلبها وهبطات راسها كتقلب فحوايجها بدون وعي لايكون قاسها ولا دار فيها شي حاجة .
شافها هاكاك شرب جغمة من كاسو وحطو وهضر : داكشي لي كتفكري فيه ماكاينش
رفعات راسها بزربة فيه : شكون نتا وفين انا كيفاش جبتيني، الصباح دابا دارنا ايكونو كيقلبو علياااا .
مهدن عكسها هي لي كترقف وترجع تكلس وخايفة : هاكا غاتشكريني ؟
ريتال : ( شافت فيه مزيان ) علاياش انشكرك ؟
صلاح : ( حط الكاس دالقهوة من يدو ) كلس شربي كاسك تسخني شوية فهاد البرد
ريتال : لا مابغيتش كنقولي واليديا غايكون مخلوعين عليااا .
صلاح : شربي كاسك وغانديك حتالعند واليديك .
ريتال : مابغيتش شكرا .. شكون نتا وفين كتعرفني وفين لقيتيني !!
صلاح : شربي كاسك قاديتوليك
ريتال : ( عصبها تجننات ) قتلييييييك ماابغييييتش ماااابغييييتش هزات الكاس وضرباتو مع الارض ) هاهو سالا خليني نمشييي بحااالي
ناضت كتقلب على الباب حات تفتحو لقاتو مسدود وهي دور : فتحلياااا هاد الباااااب فتحووليااا
صلاح ناض وقف بشوية داير يديه فجيبو ومشا كيقرب وهي ترجع تكالات مع الباب قلبها كيضرب بقا كيقرب ويقرب حتا زادت تلصقات وبقا كيفصلهم سنتيميترات قلال نفسو كيضرب فيها .
ريتال : ( هبطات صوتها كترعد ) خليني نمشي فحالي
صلاح : لقيتك فالغابة طايحة عليها جبتك ودابا خليني نفتحليك الباب باش دوزي
سرطات ريقها عينيها فعينيه كتشوف فيه وكيشوف فيها بعدات شوية وهو يفتح الباب وتقدم هو سابقها وهي تبعاتو من اللور هابطة وكتدوي : وكتعرفني انا شكون ؟؟؟
ماجاوبهاش بقات تابعاه تاخرج ودخل فواحد الضاسيا قديمة وفتح الشرجم طل عليها : ركبي
ريتال : فين غاتمشي بيا ؟؟
صلاح : ماشي بغيتي تمشي عند واليديك ؟
بقات ساكتة وهي تركب وسدات الباب ودارت الصمطة وهو ملاحظ مع كل تفصيل دارتو خلاها تاسالات عاد قلع هو ماداير لا صمطة لا والو دارت شافت فيه : شكون نتا ودابا فين غاتعرف دارنا فين كاينة ؟
صلاح : ماعارفش يالاه غانسولك .
ريتال : حنا فين دابا ؟
صلاح : ايتوزين الشرقية
ريتال : انا من بني ورياغل
صلاح : ( بصوت هادئ ) الورياغلي .
ريتال : ( شافت فيه ) كتعرفهوم
صلاح : البزنازة لي حاكمين ريف شكون ماغايعرفهومش، ياكما بنت الرايس نتي ؟
ريتال : ( سرطات ريقها ) شكون نتا ؟
صلاح : بزناز من الجبل كنعرفو بعضياتنا بساهل
ريتال : منقدرش نقوليك شكون انا ماكانتيقش فيك
صلاح : كون بغيت نديرليك شي حاجة مانعتقش من بين الذياب البارح
بقات كتــشوف فيه ودورات راسها لجيهت الشرجم مازادتش جاوباتو شافتو غادي نيشان لدار بلحاج طبعا بزناز والبزنازة كاملين كيعرفو بعضياتكوم كيف قال .
وقف بعيد شوية على الدار وهو كيشوف هنا وهنا حاضي مع الغادي والماشي : انخليك هنا
ريتال : ( دارت كتشوف فيه ) شكرا ( شافتو ماجاوبهاش رجعات هضرات ) انا غانضطر نقول لمالين دار بلي نتا عتقتيني واخا ماعارفاش سميتك
دار شاف فيها : صلاح
ريتال : متشرفين صلاح ياش ؟
صلاح : خليها صلاح صافي
فسبيطار بقا معلقو من عنقو كيجيف فيه تاقالت روحو زهقات كيشوف فعينيه نيشان : ( فكو مزير دوا بشوية ) مرحبا اسي التمسماني نهار كبير هادا .
طلقو تاهبط مردوخ فالارض وورجع خبط يدو من اللور على قرفادتو جارو تالاحو برا وردخ عليه الباب دار جاي فوجهها تاتمات راجعة باللور خواو بيها رجليها بالخلعة طاحت للارض، هو عينيه نقطة الــد*ـم، قلبها صافي هبط تلصقات مع الحيط، حيد عينو عليها ودار جبد الغطا بجهد حتا تزعزع البياص ورماه عليها : ستري راسك .
" ربي خلقنا طوب وحجر كيفما خلق الذكر والأنثى وكيفما خلق الانسان فأحسن تقويم ورعاه وحفضو ورزقو من نعمو الكثيرة، ذكر يكبر ذكر ولكن ماشي كولشي يكبر راجل، ورجلة لاهي بنسا ولا هي بالعصا، بل بالحكمة والتباث والرزانة، هاكا علمنا النبي وعلى خطاه خاس نمشيو فحياتنا، وكيف كانت وصيتو الاخير ( رفقا بالقوارير ) "
كلمة وحدة ودار خارج زدح موراه الباب كيشوف جواد باقي طايح فالارض دوخو فخطرة نزل عندو مقرد وعاود عطاه بتصريفقات على الحنك كيفيق فيه : توكض، توكض ..
تعطل عليه بثانية وهو يشدليه على يديه وطواها تاغوت بصعرة سمعها السبيطار كامل وكولشي جا كيتجارا، لواها مزيان تاتسمعات طــرّااق
طه : هادي تغصبك واحد ربعين يوم باش تحس بالعصا على الولية كيفاش كيكون
الفرملي : اش واقع هنا، اش هااد الصدااع، انعيطو للبوليس .
طه : ( قرب كيشوف فيه وجبد ميا درهم خشاها ليه فالجيب دالسدر ) عندو الهرس فالمعصم العضم ديال الضورة هادي فلوس تجبيرة .
نفض يدو ورجع دور الخاتم لبلاصتو الفرملي بقا غاكيشوف ورجع هبط عينو لجواد لي كتلوا فالاضر شاد يدو البكا لي بقاليه من التهرنين، نزل عندو وهو كيعيط الفرملية لي كانو نيت جايين كتجاراو مولشي سمع الروينة .
طه مشا معصب جبد تيليفونو كيعيط على رضى وكيطرطق فعنقو ( منين كيكون عيان كيبدا يحس بالالم فعنقو ) باش كان جاي للسبيطار عيط ليه دري وجبدها ليه من فم السبع انها بنت ادريس التمسماني، غمض عينيه حط يدو جيهت جبهتو كيماصيها، هادشي ماكانش على الحسبان وخاسو يكون مستعد مزيان حيت لي جاي ماكيبشرش بالخير .
رضـى هابط كيجاوب طه صدمو بهادشي لي قال وغمض عينيه، حيت عارف بلي الحرب تشعلات واكيد ماغاديش تطفا حتا يساليوها بيديهوم، باقي ماكملش معاه الهضرة كاتبانليه ريتال نازلة من الطموبيل وصلاح كيدوي معاها، سد لابيل متاجه كيحقق فيه مزيان ويقرب ليهوم، تاوصل طلعات ريتال عيتيها فيه : رضى ؟ .
عينيه على صلاح بلا سلام فتح الباب وجبدو من عنقو تابدات ريتال كتغوت : رضى رصاااااا رضاااااا
رضى : شـــكون نتا أولــد القــ*ـحبة وشكادير معاها ؟؟؟( جبدو تاوقف وهو يعطيه كروشي لنيف طيحو للارض )
ريتال : لا رضااااااا ( جات كتشدو ) رضااا رصاا هو عتقنييي رضااا
عاود هبط عندو وطلعو عطاه كروشي من الجنب الثانية تاطيرليه الدم من نيفو وريتال كتغوت ولكن شكون غاتشد مستحيييل رضى يقدر غابدفعة يطيرها، عصام شافو من بعيد وجا كيجري بلا سلام تاهو تلاح على صلاح فالبلاصة تابدات ريتال كتبكي، وصلاح مخليهوم دون ردة فعل رضا رجع اللور وهي تعنقو ريتال : سمعني سمعنييييي
مالين الدار سمعو الغوات كولشي خرج المهدي غاشاف ولدو ميتقتال مشا كيجري شدو : رضاااااا وقااااااف
مراد : ( غوت بجهد ) اااااش وااااقع هنااااا عصااااام رصاااااا .
يونس : ريتاااااال
ريتال : بابا وقفهوم عافاك هادا عتقني عتقنييييي
جرها لعندو كيعنق فيها ومراد فرق تاعصام جرو ورضا شاعل ماحملش اشوف ريتال مع شي حد ماشي حيت كيبغيها ولكن غيرة على بنت لافامي .
خرجو امال وغيثة من موراها كانو كالسين فالقيطون عند النسا وخرجو منين سمعو الصداع بقات كتـشوف ثاني من بعيد فرضى
غيثة : ناري اختي بزاف مع هاد خوك بازليك
امال : ( عاضا على شفايفها وكطل ) راه غير كيجبليك الله رضى لكان معصب بلاما دوي معاه ولكن هو ماشي هايدا
غيثة : ( دورات رسها ) بزاف ( بقات كتـــشووف فيه مطولة حتا دار جا عينيه فعينيها نيشان وهي تخبا مور امال وتاهو بقا مخلي عينو عليها وكيدور فيدو حيت ضرب صلاح بجهد ونفسو سخونة لدرجة وترها زادت تخبات فامال تارجعات كتقاد النضاضر )
مراد حنا عندو وقفو : لاباس اولدي ؟؟
صلاح : ( حيد منو يدو كيمسح الدم من نيفو ) انا هاد البنت مابيني وبينها والو شفتها طايحة عتقتها وهادا هو الجزاء
مراد : سمحلينا اولدي ( دار شاف فعصام بمعنى من البعد ماشي دابا ) عندنا شي ظروف شوية قاصحة وكنا مخلوعين عليها راه الليل كامل وحنا كنقلبو الله ارضي عليك اجي اولدي تفطر الخير موجود منها صدقة علي الميت
المهدي : ( جابليه فيدو واحد قرعة دالما مدهاليه ) هاك اولدي شرب شوية
يونس بقا كيشكر فيه وجرو مراد للخزانة ورضى ماتصوقش ليه مشا معصب طالعا ليه القردة اصلا، ركب فطوموبيلتو عاود عيط على طه وصليه الخبر ومشا شد عندو طريق باش افكو حريرة التمسماني حيت مراد لاصاق الخبار غادي تنوض ترون
ايمان سيفطها طه رجعات دخلات مع سميرة لقات الفرملية كتعاود تقادليها السيروم وهي كتضفر فشعرها بقات كترمش فيها واش هادي لي ناضت عاد دابا قربالة عندها اويلي
دارت شافت فيها : ( تبسمات ليها ) سلام
ايمان : ختي واش لاباس شوية ؟
سميرة : لاباس الحمد لله
ايمان : واش ولد عمك هادا لي كان عندك
سميرة : اه هاداك ماتديوش عليه غي حمق ماعرفتش كيفاش عرف
ايمان : ( فخاطرها راه اختي نتي لي دابا حمقة ) واخا نتي وليتي مزيانة دابا ؟
سميرة : مزيان واش خوك طه ؟
ايمان : اه خويا ( ضغطات على هضرتها ) لي دابا عاد صلخ ولد عمك
سميرة : ( حركاتليها راسها وهي كتشوف فسيروم ) اه عبر عليه عجبني فيه بغيتو يعاودهاليه مرة خرا
ايمان حلات فمها على جهدو مصدومة
باقي ماكملوهاش كيسمعو الغوات كيقرب للشومبر تاكيتفتح الباب دخلات مها كتغوت : واااابنتييييييي الللله يابنيييتيي وااش كدييري هنااا .. ( قربات وهي تتعنقها )
سميرة : ااه اماما شفتي اش دااروولياااا ( بدات كتبكي )
ربيعة : شكوون هادو ؟؟؟ غااقولييلييااا شكوون ليرزاااوك ابنييتي رااااه بااك طاااح بسكاااار عااد جااايبووو عمممك
سميييرة : ( سرطات ريقها وزادت كتخشااا فيهوم ) مااعرفتهوووومششسس ماعرفتش شكووون
ايمان : ( ناضت واقفة معصبة ) يااك قلناليك حنا الورياغلي !!!
ربيعة : ( شافت عندها بزربة مصدومة وسميرة صمطات كتشوف فيها حسات بلي فرشاتها عاودات دارت عندها مها بالعرض البطيئ ) كيفاش الورياغلي !!؟؟
سميرة : انا مادرت والو
ربيعة : كيفااااااااش الورياااغلي الوييلة ( جبداااتها من شعرها ) اششش شدااااك لعندهووووووم اششش شدااااك
سميرة : ومااادرت وااالو وااطلقيييي ( بدات تبكي ) وبعدي منيييي
ايمان : ( كتشوف فيهوم ) اويلي شهاد العائلة واش مراضين فراسهوم !!
ربيعة : ( دارت شافت فايمان ) اش بغيتو عند بنتييي اش بغييتووو شكون هادا لي دااار فبنتيي هادشييي شكووون اولاااد الحرااام ماكفااكوومش الحشيش وليتو داباا فالبنااات اولاد الحرام
ايمان : ( بدات كترجع باللور ) انا ماعارفة واالو وحنا مادارنا والو اصلا اخر حاجة هي خويا يشوف فبنتك مستحيييل
سميرة : ( شافت فيها من اللور ) مااامااا كتكذب خووها لي دااار فيااا هادشي ضيعنيييي انا لاماتزوجتش بيييه غانمووت صافي غانـقــتل راسيييي ( بقات كضرب فراسها ) غايضيعوني فراااسي
ربيعة : ( عاودات دارت فيها بذات تنذب ) اوييلي اويييلي واش كتعرفي ولد من هااداااا
رجعات كتجبدليها فيديها وبداو كيتزافطو باليدين ايمان خرجات كترعد ماقدراتش تحمل تبقا بدات كتعيط لطه يجي يشوف هاد الروينة بالغلط عيطات على باها : االوو طه اجيي تشووف راااه مرت داك التمسمااني جاات لهنا وتجمعو هنا راااه حمااق اويلي اش هادشي
مراد : شمن تمسماانيي اش كتخربقي ؟؟
ايمان : ( بصدمة ) بابا
لتحت وصل رضى عند طه وقفو برا حدا الباب دصبيطار
رضى : دابا شهاد الروينة هادوك لي كانو ناقصين
طه : (مسح على اللحية ديالو ) التمسماني منين غايعرفو غايرضو دقتهوم دير هادي فبالك
رضى : دابا شغادير مع البنت ؟
طه : غانتزوجها قلتها قبل تامانعرف تريكتها وهضرة وحدة لاخرجات من عندي راه كادار .
رضى : شوف الخاوا التمسماني عقدة ماعندهاش حل هادي كثر من خمسين عام من لرايس ونتا هابط
طه : العداوا حدها الدنيا، وهاديك على جنب اما البنت غاتمشي من دارهوم بعزها وغانمشيو نجيبوها برجلينا .
رضى : ( ماكيزيدش معاه فالخلفيات ) واخا وهوما غايبغيو
طه : بغاو ولا مابغاوش ماعندهومش حل البنت فعقلهم تعيبات وماغادايش ارضاو تبقا عندهم غايسمحو فيها
رضى : مراد ماغايبغيش اطه .
طه : أنا لي كنقرر شنو ندير فحياتي ماشي الواليد يا غادي يعلي براس ولدو ويدير يدو فيدي ياكلها ياخد طريقو
رضى : ( شعل كارو ) راسي مامقادش فيه المزاج .
طه : النعاس ( عاود طرطق عنقو ) تنا مخسر
يالاه غايجاوبو رضى حتا كيشوف الميرسيديس وقفات نازل منها دريس وحكيم : هالي قالت شوافة اروبيو
طه علا عينيه كيشوف حكيم غادي داخل طلعات معاه سخونية ويديه تزيرو يالاه غايخطي حتا كتكمال الباهية ومراد تاهو كيوقف هبط هو والمهدي
رضى : ( ضحك ورما الكارو فالارض عافط عليه ) لاعندك شي يدين وجدهوم، مالك اصاحبي كــ* ك غامع الصداعات .
مشا طه مقدم نفسو حامية، حكيم ودريس كانو وصلو لفوق ايمان كانت واقفة برا شومبر غادا جايا كيف شافتهوم رجعات اللور وتكمشات مع الحيط هوما دخلو للبيت ربيعة طارت من بلاصتها
حكيم : فــين جوااد كان سبق جا لهنــا
سميرة : ( قلبها غايطير من بلاصتو رجعات حتا تكمشات مع الكادر دالباياص ) ماعــرفتش ماعرفتش
ادريس : صافي شوهتينا صافي ؟؟ ( قرب طلع يدو وعطاها بتصرفيقة تاوجهها ضار وعاود سرباليها ثانية تاصافي دنيا ولات ضباب قدامها بلا ماطيح دمعة ) شوهتينا ابنت الحرام التريكة الناقصة
ربيعة : ( قربات كتبعد ليه يديه ) الحاج الله ارضي عليك مادارت والو مادارت والو
ادريس : سكتي نتي مضساراااها لااش خارجة فنصاص الليل لااااش
سميرة الصباع ديالها تعوجو بالعصب تابدات كترعد طلعات يديها لشعرها بقات كتلوي الزغبة على صبعها وكتنترها بجهد وتعاود للثانية وتنترها بجهد وكتبعها ثالثة بحال شي مصدومة دمعة كطيح باردة من عينيها وباها ومها كيتغاتو قدامها وحكيم كيعيط لجواد تاكيتفتح الباب دخل منو مراد موراه المهدي دار دريس وحكيم واحد الصدمة تلاقات بالوجوه كاملين، شي كيشوف فشي، شي كيحاول استوعب الثاني اش كيدير هنا
" العين فالعين والعقل كيعيد
رحمة فالبال ... الحبس والمؤبد ... الحريك واسبانيا .. الوزير وتهريب ... مـوت عزيز .. الحرقة دالقلب ...
العين فالعين، والعدو مايحنيش
العدو قدامك، الغدر فالكتف، دم غايتشرك ؟، شكون غايهرس الثاني ؟ "
كولشي سخن والحرارة طلعات مع رجليهوم
حكيم : ( دار شاف فدريس ) اش كديرو اولاد الحرام هنا ( غوت ) ااااااااشش كاااااديييرووو
ادريس : ( شاف فسميرة ) اش كيديرو هاددو هنا الويلة ؟؟
حكيم لاح تيليفون فالارض وجا مقدم عند مراد بدا كيغوت تاطلاقاليه المهدي ومراد غوت ماباغيش اتزافط معاه ولا غادي يقاديليه العمر لي باقيليه فحياتو
ربيعة بدات كتنذب وتغوت
دريس : ( دار عند سميرة ) واش ولد هادو لي تعداااا عليييك
شافت فيه قلبها كيترعد وحركات راسها باه
دريس : الللله انعللللل طاااسيييلتك الصلــكوطة، ( دار كيشوف فيهوم ) الله انعلكوم الشماااايت ساليتو من العشبة دزتو للولية الله انعلكم اولاد الحرام ( دار عند سميرة وجرها من شعرها ورماها عند رجلين مراد جات مزدوحة فالارض ) هاهيا لكان هي لي بغيتو ديوها ولكن عرفو الدقة فين تجيـــكوم
حكيم : ( دفل على رجليهكم ) لاماطاحش وجهكم الورياغلي فالريف راحنا شمايت
مراد زير على يديه مغمض عينيه المهدي بغا يطير على وجهو وهو يشدو مراد هبط عينيه كيشوف فالبنت لي مرمية عند رجليهوم
دريس : ( شاف فربيعة ) زيدييي نتيييي ابنت الحراام زيدييي
مع جرها من جلابيتها تافتح الباب بجهد ودخل طه موراه رضى كيشوف فيهوم قبالت باه هبط عينيه لعند سميرة طايحة فالارض عند رجلين مراد، مشا ليها بكااالم وكولشي كيشوف وهو يهبط لعندها مقرد حكمها من كوعها مطلعها بشوية ودار وقف بينهوم وبين مراد وردها موراه : ( شاف فعينين ادريس ) بشحال كتبيعو بنتكم ؟
خلي تعليق ونجمة ✋🏻❌