اورطيغا: (خرج مو ومشاو يشوفو الزليج للي تبغي دير لكوزينة حيت خلا لمعالمية فالدار كيعاودو الكوزينة ويحايدو الزليج لقديم ديال الخيط والبوطاجي، حتى الجبص غيعاود ديال الكوزينة وبيت نعاس على حساب سيپورات ديال الضو ويقاد شي حاجة فالصالون)
صباغة منين تكمل الدار فصليح ختاري للي بانلك
أمينة: حشمتني ملاك خلاتلي كولشي مسكينة
اورطيغا: بيناتكم
أمينة: شفتي قلت ليك بنت الأصل
اورطيغا: ولا معݣازة
أمينة: هههه صواب هداك ݣالك معݣازة (كملو من تماك وصلها للرياض ورجع المحال كيفكر ففراش الدار بيت نعاس عندو مزال جديد كانت ختارتو هي نيت بقا خاصو غير شي جلسة مغيكترش عليه ويعمر الكوزينة.. صونات عليه جاوبها)
اورطيغا: زين!!
ملاك: انا غنجي لفاس (كتلحنها)
اورطيغا: مزيااان حتى انا الدار خاوية
ملاك: ههه ايخااان.. غنمشي لبلاصة
الخدمة باش نشوف
اورطيغا: شنو غتشوفي؟!
ملاك: غير لبوسط ديالي وصافي قالي المدير مزال باقيلي شي شهر ونص
اورطيغا: ياك قالك غير شي يامات
ملاك: راه الحمدلله منين لقيتها الناس راه جلسو سنييين ووالو صعييب بزااف اكترية معنديش بزاف فالخدمة
اورطيغا: هاديك نيتي
ملاك: ههه غيجي معايا بابا
اورطيغا: ياك!!! هي ما فيها مشااوفة
ملاك: حتى نهار الخطوبة وشوف حتى تشبع
اورطيغا: اودي الشوف مبقى تيبرد الجووف.. شنو درتي مع السمسار فداكشي
ملاك: بزاف الزليج غالي غير الكوزينة قالي مليون ونص مالو غيزلجو لية ب..
اورطيغا: هي بلا منخلعك شحال تقامت علية كوزييينتك هاد صباح
ملاك: نتا راك العمر
اورطيغا: ههه غتجي للدار؟!
ملاك: اه باش يشوف بابا سراجم
اورطيغا: الا بانتلي نضرب دويرة تماك
ملاك: اه بغيت نشووفك ولكن من لبعد
اورطيغا: واخا لالة..
ملاك: (تسنات باباها يجي حتى كتبانلها طموبيلة ديال حمزة طرطقت عينها)
ألاااااااااااااا !!!
(بانلها باها راكب حداه بقات غير كتشوف حتى نزل باها سلمت عليه مستغربة)
فين طموبيلتك؟!
رشيد: (لقا 4 دروايض ديالو متقوبين رجعو الكاميرا كان واحد ملتم هو للي فرݣعهم بحديدة وكملها شير لكاميرا القهوة باي باي وكمل طريقو)
وقفت، ياله نمشيو راه حتى عمك معايا
ملاك: غنمشيو كاملين لخدمتي ابابا!!!!!
رشيد: عمك بغا يشوف الدار ابنتي ولقينا حمزة هابط لفاس يوصلنا معاه
ملاك: ها طموبيلتي نمشيو بيها مواقفاش وخلي السيد يمشي بوحدو يقضي غراضو
رشيد: صافي ابنتي ركبي (طلع باها ركب وهي بقات غير كتشوف حمزة عارفها مابغاتش تمشي معاه ولكن رشيد للي طلب منو يوصلهم طلعت راكبة معصبة هادشي غادي غير يزيد يخلق ليها مشاكل مع اورطيغا.. شدو طريق هي مكتهضرش وصلوها لخدمتها دخلت بوحدها)
حمزة: مغديكلاريش بعدا للي دار هاد الفعلة انا مبانليش غيكون من الحومة
رشيد: (شك فعائلة زهرة) لا غنديكلاري
حمزة: عمر وقع لينا هاكا وحتى العساس قال مشاف والو غيكون داك الدبوز نعس عاود
اخ رشيد: ولا شي واحد بينك وبينو شي حسيفة اخويا
رشيد: مااا عندي مع حد شي حاجة
حمزة: صافي كون هاني اعمي انا غنشوف فهاد لبلان ونشوف فكاميرات لوخرين منين خرج وفين ركب
رشيد: اممم.. وداكشي للي وصيتك عليه
حمزة: الا على مراد كولشي عندو مزيان شي مشاكل فالمحكمة على حساب خدمتو
رشيد: بحالاش هاد المشاكل
حمزة: معرفت بحال شي واحد باغي غير يمرضو ديما جاياه استدعاء وكيدوز المحكمة وكيخرج هو الرابح
رشيد: ياكما كيرشي!!!
حمزة: لا لا موحال الا كان كيرشي مغيكملوش الجلسات باش هو للي يربح فالتالي، غيكون تنازل من المشتكي
رشيد: بعدا الحاج غير كيشكر فيه كتر من ولادو على حساب خدمتو
حمزة: اوا غيكون معقول فخدمتو...
ملاك: (شافت داكشي حست باحساس غريب هي ولفت صفرو ولفت الناس للي كانت خدامة معاهم، دوزت وقت زوين معاهم كتفهمهم ويفهموها كيعاملوها مزيان ومع صغيرة فلبيرو كيعاملوها بدلع هنا معرفت واش غي حيت اول مرة ولا غيبقى هاد الاحساس مرافقها!!! صونا عليها مراد خرجت كتهضر كيسولها كيف لقات الدنيا تماك)
زوين.. غير انا ولفت لهيه هنا جاتني مقناطة ومكنعرف حتى واحد
اورطيغا: معايا احبيبة غتولفي بزاف غترجع عندك الخدمة غير سويعات دوزيهم دغيا باش ترجعي لدارك طيبي على قلبك لعشا
ملاك: ههه
اورطيغا: ونجي انا خانز بريحة لحم ونݣر عليك حيت مطيبتيش بزااف وانا وكااال وغتكوني عياانة ونقولك نووون دابا بغيت الحريرة
ملاك: الله!!! زيد قنعني
اورطيغا: وغشد مك فالليل احسن **** غنديرهالك نخليك تتزغرتي بالفرحة
ملاك: اووووووف امراد
اورطيغا : وغنبقى نحب فيك ونساريك ونونيك ونكون خوك باك عمك منخليكش تقنطي
ملاك: (تبسمت) بالصح!
اورطيغا: واش حنا دراري صغار دابا!! ولكن فالليل عن (سمعها كتأفأف تبسم) مهم قوليلي غتمشي للحومة!!
ملاك: اخ (زفرت) جا معايا بابا وعمي وووووو حمزة
اورطيغا: شناااهوا!!!
ملاك: انا براسي مكنتش عارفة حتى شفتهم جايين سولت بابا قالي الطموبيل ديالو وقفت وهو جابهم
اورطيغا: (تسيف) والق**وي هادا واش هاد *** غيبقى لاسق فينا ولا!!!
ملاك: مراد!!!
اورطيغا: ميات مرة ابنادم قلتلك بعدي من ساحة هاد زمر شفتيه جاي طيحي مرضي قولي مصالحش هاد نهار ماشي كل دقيقة لقاه جاي معاك
ملاك: مجايش معايا جاي مع بابا
اورطيغا: (تكره) صافي سيري من بعد ونهضرو (جات تهضر قطع قبل ميبدا يخصر معاها هي نيت، هو عارفها شخصيتها قوية وعندها لا هي لا يعني الا بغات متجيش معاهم وميكونش معاها مغتجيش...
كان فالحومة نيت كيقاد شي حاجة تعصب دخل للقهوة جاب نص نص وشعل ݣارو كيكمي جاو عندو شي ناس لاح الݣارو وكمل معاهم الهضرة وعينو على الطموبيلات حتى كيشوفهم نازلين من طموبيلتو ونزلت من جهة حمزة للي هضر معاها وحتى هي جاوبااتو ومشات حدا باها رجع جبد باكية دالݣارو هز واحد دارو فمو متبعهم طلعو شعلو وبقا هو كيكمي..
ركب فطموبيلتو ومشا المحال مفهمش هدا كان خاطبها وفرتكوها علاش باها لدابا مزال ديما دايرو جنبو واش طامع لاخر يطلق ويزوجو لبنتو ولا شنو!!!
مفهمش ودخلوه تناوي، عارف باها حمزة عزيز عندو بزاف ولكن باها ماشي متفتح للي يخلي حمزة فجنبهم كل مرة هاابط لفاس مع ملاك!!!)
ملاك: (تبدل ليها لمزاج راه شافت طموبيلتو فين كاينة يعني كاين فالحومة وعاد قطع عليها مرجعش صونا!!
موضوع حمزة كيعصبو كما حتى هي كيعصبها وعندها مزعج كما موضوع غيثة واخا مبقاتش بزاف ولكن حاسة بيه وفنفس الوقت، مكتستحملوش وهو كيخصر الهضرة ويعاملها هاكا وهو معصب وعاد مبقى ليهم والو ويتجمعو!!
جا السمسار عندها علمها على الجبص بقا باها كيتفاهم معاه مبقات عندها ݣانة تهضر ولا تفاصل فشي حاجة وهي كدور فالدار كانت باردة وفبيت نعاس ديالها كان الاثاث للي خلات ليها وفاء كولو عيات معاها تخلصها لوخرا مبغاتش قالتلها عاونتك باش تكريها مفرشة للطلبة على متزيد ليها لفراش..
كان كولشي مجموع اورطيغا للي تكلف جمع ليها الاثاث فبيت ومغلفهم بايزار، وحيت قالها كولشي رجع تكرا فالموبل لاخر ومكانش الݣراج فين يتحطو... هزت تيليفونها والو مصوناش وهي مغتصونيش دابا حيت عارفة عصبيتو خايبة وممكن يطرحها يهضرو للي أكيد مغتسكتلوش وغطور الأمور وتبقى هي الغاالطة)
حمزة: ملاك!!
ملاك: (بعصبية ) شنو؟!
حمزة: مالكي؟!
ملاك: حمزة انا دابا كنتعتابرك بحال خويا كما كنا فاللول قبل متكون شي حاجة بيناتنا نتا عارف دابا قربت نتخطب متبقاش تحموم حدايا مبغيتش يتجبدلي صداع وليك حتى نتا راك عارف مرتك عفاك بعد طريقي احمزة مكتهمنيش نيتك كفاش دايرة وكفاش كتفكر انا بغيت غير التيقار الله يرحم الوالدين...
(بقا كيشوف فيها حرك راسو بأه هي خرجت وهو بقا مدة عاد تبعها مكانتش عندو نية ݣاع يجبد ليها شي صداع كان مكتافي يكون بحال خوها كما قالت!!)
رشيد: (تفاهم مع السمسار غير يبدى الجبص يدير شي حاجة للي عادية حيت غتبقى غير للكرايا ملاك كانت دايرة حسابها هازة 3000 درهم عطاتهالو على متكملو شي حاجة قليلة هبطو لتحت وقفو حدا الطموبيل)
رشيد: كاينة بلاصة زوينة هنا ديال الحوت
ملاك: خاص نرجع ابابا راسي ضارني
رشيد: نتغداو ابنتي ونمشيو ماشي ديالك هادي هه!!
عم ملاك: ملاك عارفك تتحماقي على زرود
ملاك: (بابتسامة صفرا) غير عيانة شوية
عم ملاك: نتغداو ابنتي ونوصلوك للدار ترتاحي
ملاك: (حركت راسها باه.. حمزة غير كيشوف واش لهاد الدرجة غيكون جبد ليها صداع ولا علاش رجعت هاكا عارفها كفاش بطبعها وغتكوني شي حاجة ݣغاڤ للي قلقتها، مشاو للكرامة تغدات بالحوت كلات حيت كان فيها الجوع مشاو لمرجان شافتو كيتقدا خدا من الديسير للي ماشي وقتو واخا غالي خدا غير شوية شوية، خدا من الحلويات المغربية والشامية وعاد الفرماج ودانونات الشكلاط عواصر)
لمن هادشي؟!
رشيد: ناخدوه لختك انا معرفتهاش شنو غتكون مشهية
ملاك: (تبسمت معنقااه من ذرااعو) لهلا يخطيك علينا الكبيييدة
(خلات حمزة متبعها ومتبسم غير ميعيق براسو كيقلب وجهو كملو وصلها لحدا دار خديجة هبطت عندهم عطاها الساشيات بقات كتبكي بالفرحة)
ناري اختي الهرمونات شنو دايرين فيك
(لحق حتى يوسف عندهم للي هبطات معاه غيثة عيا فيهم يطلعو مبغاوش رجعو لصفرو وهوما طلعو لدارهم، يوسف كيشوف فهاد الأب عرف هاد الحنان للي فلبنات مجايش من والو وموقف رشيد كان بسيط وكبييييييييييير ...)
غيثة: (كتشوف فديك تقدية) تهلا فيك عموو رشيد
خديجة: ههه مسيكين هادي طبيعتو معانا كاملين للي حملت فينا كيدير ليها هاكا ولبنات للي برا كيصيفط ليهم داكشي ديال لبلاد
غيثة: الله يخليه لييكم (بقات كتشوفها كتجبد هادشي للي بسيط وعادي يوسف يجيبو ليها ويجيب ما اكتر ولكن معنويا كيعني بزااف....
حتى هي باها حنين وزوين ولكن من نهار كان غيموت فشي مشكل وقع فالدار قررو يبعدوه على مشاكل العائلة كاملة كما كان المشكل، رجعت كتحس بيه بحال شي ضيف مخاصوش يتقلق مخاصوش يسمع مشاكل العائلة مخاصوش حتى يحزن كولشي كيأثر على قلبو!! ولكن هي شكون غيحس بيها واخا خوتها معاها ولكن الا مشات قالت هاد الفضيحة فاش كدوز غتنوض كارثة وشافت غير خوها للي بسبابها كما قالت ليها مها دار كسيدة حيت عقلو رجع غير معاها وخايف عليها!!)
يوسف خويا خاص نمشي لاتوليي
خديجة: انا ندخل هادشي للكوزينة، غيثة حبيبة اي حاجة بغيتيها هزيها (غيثة رسلت ليها 😘)
يوسف: غيثة هضرتي مع ادم؟
غيثة: لا قلتلو بغيت نفكر
يوسف: الا رجع تعرض ليك قوليها لي انا ولا أشرف صافي نتي خرجي راسك من هاد الموضوع
غيثة: (حركت راسها باه ودخلت لبيتها لبست مبقاش عندها ݣانة دير ميكاب ولا تلبس وتناسق هزت صاكها للي فيه داكشي ديال سطاج وخرجت لقاتو جالس كيقرا كتاب)
يوسف انا مشيت
يوسف: علاش مبقيتيش تتهزي طموبيل ديالك؟
غيثة: غير مرشقاليش على الصوݣان (فهاد اللحظة وسوس ليها الشيطان تهز تصوݣها ودخل فشي حيط تكون ضربة قوية ومنها يطيح البيبي واخا غتاكلها فصحتها ولكن هادشي مزال كيتعتابر قتل وكلام طبيبة مزال كيدور فراسها... نفضت هاد الافكار الشيطانية من راسها)
يوسف: غيثة!!!! غيييييثة!!!!!
غيثة: ها.. هم!! غير تفكرت اسماء قالتلي اليوم غنمشيو نشوفو شي ثوااب
يوسف: هي قربنا نفتحو المشروع
غيثة: (تبسمت) هو صراحة الفكرة ديالك للي غنطبق غنخدم معاها تقريبا شي عام حتى نفهم بزاف دلحوايج نعرف السوق نداخل مع لكليان نشد هادشي فيدي مزيان عاد غنفتح شي واحد
يوسف: (تبسم بفخر) وليتي تتكبري اغيثة!!!
غيثة: (تبسمت بحزن كبير) ضرووري اخويا (هزت صاكها حنات باستو فحنكو وخرجت الوجهة ديالها مشات لطبيبة للي خلاتها تبدل شحال من حاجة...)
ملاك: (رجعو للدار هوما بقاو فالقهوة وهي رجعت للدار صونات مرة وحدة على اورطيغا مجاوبش)
*** هاد ايخان شحال معصب غير مع راسو!!!
(دخلت للدار كانو كيخملو)
الاااااا!!!
(خرجت مها من الصالون بفواطتها ومݣفضة يديها)
زهرة: جيتي؟!
ملاك: لا غرجع للخدمة دابا جيت غير نبدل هاد لبوط ضبرني فرجلي
زهرة: حطي حطي حوايجك وزيدي تعاوني
ملاك: راني مريضة اماما
زهرة: ملاااك!!!
ملاك: وراني عروسة زعما!!! مفهمتش غير ديك المرات خملتو علاش عاود روينة!! صراحة من حق حنيني كيطلعلو هادشي فراسو كل مرة لايحين الما وتجرو واش مكتخافوش يضربنا الجفاف هادشي راه زايد فينا!!!
زهرة: (جات عندها) بنتي زواج راه ماشي هو الخروج والظحك راه مسؤولية خاصك تديها فدارك وتكون ديما متولة ونقية هنا فدار باك راك كنتي مخنتة مكديري والو حيت أنا هنا معاك وخليتك تحت جناحي عكس خوتاتك ولكن تماك راك غتكوني غير نتي وراجلك
ملاك: والله اماما الا عارفة انا غير دابا عييت راه صباح الخدمة ومن تماك لفاس مجلستش ݣاع كنت كنشوف الخدمة ورجعنا للدار وعاد طلعت واحد السخرة فيها 20 كيلو لخديجة حتى لدارها حيت كان لاخر مخدامش (بقات كتلهت وهي كتعاود وتحاول تقمص دور لعيا) والله الا عييت
زهرة: باااااز!! ديما جاية السبة!!!
ملاك: والله مكنكذب عليك اماما وعاد خاصني بلاتي نخرج نشوف مع الكوافورة (هزت حواجبها كتقلي السم) غندير المكياج المكياج المكياج
زهرة: ههه فالخطبة؟!
ملاك: ومتعرفي يديرلي مفاجئة حتى انا ويجيب لعدول معاه حق ربي حتى نبصم بالعشرة
زهرة: كتفرجي ابنتي بزااف فالافلام، سيري قابلي خوك ولعبي معاه شوية متخليهش يخرخ فهاد روينة
ملاك: (تعلات باستها فحنكها) يخليك ليلي يا احسن أم فهاد الدنيا
يوسف: (صونات عليه الياقوت علماتو انها تنازلات على القضية باقي خاص يكون هو على الوعد للي عطا ويبقى فكلمتو ويعتارف بولدو كانت خديجة جالسة كتاكل شبس حداه وكتفرج ولا يحة ودنيها معاهم)
الياقوت: شنو ايوسف مزال مبغيت تشوف سليمان
يوسف: منين نبغي غنقولهالك
الياقوت: غادي تحبو تيشبه ليك بزااف
يوسف: الله يعاون... (قطع وشاف فخديجة)
خاص نبدا الإجراءات
خديجة: واش غديرو فحالة مدنية بوحدو!!!
يوسف: معرفتش الإجراءات احبيبة، ولكن غالبا غيكون بوحدو خاص نهضر مع المحامي هو غيتكلف بكولشي
خديجة: امم.. (شاعلة فيها العافية) مغتبغيش تشوفو كما قالت ماماه؟!
يوسف: (من وجهها كتبان هادئة ولكن عارف من لداخل مغتكونش مرتاخة) صراحة مبغيتش
خديجة: اممم فخبارك لبارح جات وقفتها غير ملاك ومراد من حدا لباب مخلاوهاش دخل
يوسف: هنا؟!
خديجة: اه حدا باب الدار (شيرات للباب) وباينة شكون لي عرضها (تبسمت) كفاش كنت قادر دوز معاها 4 سنين والله مافهمت هاد الوقاحة ديال جوج دريال!!
يوسف: (بانزعاج) مبغيتش نفكر فداك تخربيق
خديجة: اممم.. قولي غنمشيو لخطوبة ديال ملاك؟! ياك تقدر؟!
يوسف: ضرووري ان شاء الله
خديجة: خاص نشري ليها شي كادو زوين
يوسف: ختاري للي بغيتي ونخرجو نشريو... ملوكة تستاهل كل خير
خديجة: فاللول مكنتيش بغيتها تكون مع مراد!!!
يوسف: مكنتش عارف مراد غيفكر فالمعقول ولكن منين عرفتو جدي بلعكس راجل ديال الوقت حتى هو يستاهل بنت الناس بحال ملاك... انا دخلنا العجب فاللول ولكن براڤو عليها بدلات واحد بحال مراد كان كاره حس زواج هنا عرفي راه ختك مميزة بزااااف
خديجة: (بقات غير كتشوف فيه!!!!!!)
يوسف: اي واحد يتمنى تكون عندو ملاك فحياتو
خديجة: (تشدت شهيتها رجع كيقرا وهي بقات مبلقة عينها فالتلفازة!!!)
اورطيغا: (وصل الليل من بعد مسد المحال طلع للدار يرتاح كان داز عليه هاد نهار بالاعصاب كتر من الخدمة!!
حط عشاه للي جابو وجلس كياكل صونات عليه أمينة هضر معاها شوية وعلماتو الغد ليه يجي عندها بكري باش يمشي معاها يشريو حوايج الخطبة لملاك،
قطع معاها وبقا مكمل عشاه تفكيرو كان فرشيد للي باغي حمزة لملاك وحمزة مزال باغي ملاك ولكن متأكد ملاك معاه هو!! دماغو خدام بزاف سؤال كيجيه فبالو واش مبغاتش تبوسو حيت محترمة راسها وباغية مسافة بيناتهم، ولا حيت مزال مكتبغي ولد الجيران!!!
تخربق بزااف هو راه كتر من عام باش كيعرفها ورجع عارف طبعها ولكن!!! رجعت صونات عليه قطع ورجع صونا عليها)
وي!!!
ملاك: باقي مقلق!!
اورطيغا: واش غيبقى لاسق فيك املاك!!
ملاك: ملاسقش فية هو كان مع بابا راف فرق
اورطيغا: حطي راسك بلاصتي ومتقوليش عاود حتى نتا مع غيثة!! انا اصلا خويت ساحتها وعارفها تتضيع وبسبابك بعدت عليها
ملاك: بسبابي!! يعني مزال باغي تبقى معاها!!
اورطيغا: ملااك!! نتي فاهمة شنو تنعني.. غيثة منين كانت صغيرة وهي قدام عيني تتبغيني ولا عاجبها سوقها هداك انا من ديما كنت تنشوفها ختي صغيرة وغدعمرني فت مع الحدود!! وداكشي غير مرحلة مراهقة منها وصافي
ملاك: مراهقة ف27 عام!!
اورطيغا: شنو بغيتيني ندير كتر!! راه للي أهم مكانت حتى حاجة من جيهتي مكناش مخطوبين وومابيناتنا والو!!! راه فرق كبيير اما داك ***** راه كان خاطبك واش تتفهمي شنو هي كان خاطبك يعني مفكر فيك باغيك تكوني مراتو ففراشو فحيااتو تشاركو كولشي
ملاك: مراد!!
اورطيغا: خلي نكمل هضرتي باش تفهمي مزيان اه غيثة ماشي ختي وخاص نعطيها شبر التيساع وعطيتو وحتى حمزة راه ولد جيرانكم ولكن معطيتيش شبر التيساع
ملاك: نتا مبغيتش تيق راه بابا للي لسقو وجا معاه!!
اورطيغا: تنعرفك املاك وعندك لا هي لا مبغيتيش تمشي مغتمشيش
ملاك: الهضرة عندك ساهلة راه كان بابا وعمي جاو عندي كفاش غنديرلهم!! راه تحطيت امام امر الواااقع
اورطيغا: (بقا ساكت)
ملاك: مراد علاش حتى نتا مبغيتش تفهمني كما فهمتك
اورطيغا: علاش تفارقتو؟! ميمكنش السيد مزال تتبعك بحال ظلك وتفارقتو على شي حاجة تافهة
ملاك: (بقات غير ساكتة) الخلاصة نتا مكتيقش فية!!!
اورطيغا: علاش تفارقتو!!! شي حاجة كاذبة فيها علية عاود!!!
علاش تفارقتو؟!
ملاك: اولا انا ماشي كذابة تانيا نتا كتيقش فية وهاد شغلك!!
اورطيغا: مدخليش الشكلي فالعكلي لبنت لي باغي نتزوجها باها ديما حجار للي كان خاطبها معاهم هادشي متيديرش تناوي!!!!!
ملاك: (عاد فهمت مشكلتو) شوف بابا هو لي تقريبا ربا حمزة معانا مكانش كيخرج من دارنا منين كان صغير، حتى كبر و وقف معاه عاود باش دخل البوليس حيت باباه مابغاهش يخدم تماك يعني واخا تفارقنا وانا لي فسخت الخطوبة بابا عمرو قالي لا هو مزيان ولا مربي حتى حاجة، صافي تفهم مرجعش ناقش معايا ݣاع وحيت اصلا مطولناش فهاد الهضرة مكملاش حتى 10 أيام ومكانتش خطوبة رسمية غير هضرة قبل متكون شي حاجة كولها شد طريقو، واش فهمت امراد بابا نسا انه كانت شي حاجة بيني وبين حمزة بقا عاقل غير هو بحال خونا وكبر معانا
اورطيغا: وعلاش تفارقتو؟!
ملاك: حيت ماما هربت مع بابا وتزوجو وهو عايرني بهادشي ماشي عايرني ولكن جات فالهضرة وانا الا ماما منقدرش شي واحد يهضر عليها
اورطيغا: (تيقها حيت مكانش عارف القصة كان فاهم كانت شي حاجة على زهرة ولكن عمرو دخل فالتفاصيل مع مو تعاود ليه)
ملاك: فهمت دابا!! هادشي للي خلاه فاللول ميتقبلش نتفارق معاه ومبغاش جاه سبب تافه كما هو كان كيقول وانا منقدرش نسمع ولو نص كلمة على ماما حيت عارفاها شحال تعذبت هي وبابا ويجي برهوش يبقى يحل فمو
اورطيغا: اممم فهمت
ملاك: مبغيتيش ندخل معاك فهاد التفاصيل امراد حيت هادشي من خصوصيات ماما وهي اصلا نسات كولشي وعاشت حياتها هادشي راه داز عليه كتر من 38 عام
اورطيغا: صافي فهمت علاش مقلتيش هادشي من شحال هادي !!
ملاك: معمرني هضرت فشي حاجة ديال ماما مع شي واحد
اورطيغا: وانا ماشي أي واحد نتي حبيبتي ونبغي نعرف كولشي عليك زوين والخايب، بعدا عرفنا السي رشيد دوز الغرااام الله يسمح ليه باغي يحرمها علية انا!!
ملاك: هه (هو مسولهاش علاش هربت يعني مغتقولش كولشي)
اورطيغا: قولي كانو مدوزينها!!
ملاك: وصااافي امراد
اورطيغا: عليها مكنتش تنشوف خوالك وخولاتك تنسمع غير عمك بنت عمك ولد عمك مرت عمك
ملاك: هههه براكة هادو فيهم الكافية
اورطيغا: اممم واخا هكاك السلام منبغيهاش بيناتكم
ملاك: مكاين والو غير بابا للي تنلقاه معاه وهانا فهمتك علاش.. وغيثة منبغيش بالصح نشوفها كظيع وفيدك الحل ومديروش مكنبغيش لبنت تضر والله يعني ماشي بسبابي غتخليها غارقة فهمت...
اورطيغا: (من بعد مشرحاتلو وقالتلو امر حساس للي باين عندها كتر من حساس، مبقالو فين يعاتبها كتر، ولحد الان مزال باغي يكون جنتل مان فموضوع حمزة ويحل معاها الموضوع لغويا..)
شنو غديري؟!
ملاك: دابا؟!
اورطيغا: غدا
ملاك: حكمت علية ماما باش نعاونهم عرفتي قلبو الدار سفاها على علاها ومن موراها نمشي للحمام
اورطيغا: (تبسم) شتهم ما صدقو شي واحد جا يخطبك!!!
ملاك: بزاااااف عليك ولهلا يحيييك... (بعد التيليفون من ودنو عارفها مغتسكتش)
اورطيغا: صافي صافي... وانا من داك زهر يعطيوني مليييكة!!
(سمع طيط طيط عرفها قطعت عليه، ظحك حط التيليفون هاد لبنت لقد مكتعصبو وتجلطو فثانية كظحكو وتخليه مااشط،
ناض جمع الطابلة غسل الماعن مسح الدنيا مشا لبيتو فرش فراشو طلق الشوفاج يسخن لبيت شوية مشا طواليط عاد رجع مصوني عليها مجاوبتش حتى صيفط ميساج كيتمعشق فيها ويتودد، عاد صونا وجاوبااتو دخل ففراشو وكملو تمعشييقهم...)
~~~~~~~~~~~~~~
اصبحنا واصبح الملك لله..
#ساعات_قبل....
غيثة: (رجع جاها الڤيديو من نمرة اخرى مسحاتو قبل متشوفو وهدا يمكن الرابع، وكل ڤيديو مختلف على الڤيديو للي صيفط داك نهار، جبدت التيليفون من تحت حوايجها فلماريو للي عطاها شعلاتو وهو يصوني منين وصلاتو انه شعلاتو.. بعصبية ولكن كتهضر بشوية)
شنو باغي مني الحمار شنو!؟!!!
ادم: توحشتك!!
غيثة: مستحيييل راه مستحيل نعاود نخليك تقيسني شي نهار واش متتفهمش!!!
ادم: فين نتلقاو ولا غير فالطموبيل!!
غيثة: واش متتسمعش الحيوااان!!!
ادم: غيثة!!!! كالم طوا!!
غيثة: (بقات غير كتشوف فهاد الحقارة والبرود للي كيقتلها بيه) شنو بغيت مني ادم واش مكفاكش هادشي للي درت فية!! باش اذييتك انا بااااش؟!!!
ادم: عاود هاد الديسك؟؟
غيثة: معمرني درت فيك شي حاجة قبيحة
ادم: غيثة خاصك تفهمي نتي ديالي بوحدي هادشي بغيتك تفهميه
غيثة: لي تيبغي متيديرش هاكا
ادم: يعني بغيتيني منبقاش نتعصب ونعاقبك!!
غيثة: شتتخربق!!!
ادم: غيثة لا انا لا نتي بغينا الغالية تآذى ياك!!
غيثة: واش حسابلك السيبة كاينة!!
ادم: معايا كاينة غير السيبة ولي بغيتها تنديرها وانا مرتااااااح
غيثة: بعد من ماما!!
ادم: اذا غطبقي داكشي للي بغيت ومتخافيش حتى واحد مغيغرفك نتي
غيثة: شنو تتخربق؟!
ادم: كاينة وحدة بغيتك ديري معاها واحد لبليزير!!! وهادي للي غتهنيك من هادشي كامل غترجعي تفيقي بحال مكاين والو...
نجية: (مشات لبلاد وفلعشية غترجع مشات تطل على عمتها للي جات من الحج.. وصات أميمة على عمها وزادت)
أميمة: (تبسمت بشر صيفطات ميساج لادم)
اليوم غندير داكشي
ادم: تنتسنى أخبار زوينة وفلوسك غتلقايهم من بعد منسمع الخبار
أميمة: هههه (كان عطاها نص وبقا نص!! بقات فالكوزينة كتقاد لغدا ودماغها خداام شافت فالساعة كانت 11،
حمزة حتى الوحدة عاد غيخرج غيجي يتغدا ومن موراها كيخرج يا القهوة يا يلعب كورة مع دراري مكيبقاش فالدار اما عمها كيبقى نهار كامل فالدار من غير الا جا عندو رشيد ولا خوه يخرجوه للقهوة وغالبا كيخرج للقهوة.. الاجواء كولها فصالحها!!!)
~~~~~~~~~~~~~~
أمينة: (خرجو على صباح حيت الخطوبة بقات ليها يوماين يعني بعد غدا، مشاو تقداو شرات ليها جوج تواب جلابة جوت تواب جوهرة وكريب وتوب ديال تكشيطة عاد دازت خدات ليها 4 بيجامات جوج طوال وجوج قصار خدات ليها حوايج ديال لتحت كولونات بيديباردور وتريكو خدات ليهم الشيلان وخدات 6 ديال دوبياسات وخدات فوطة كبيرة متوسطة وصغيرة، خدات باليزة كبيرة فين دارت لحوايج وباليزة صغيرة غدير فيها روايح برودويات وصبابط بغات تشري المكياج مخلاهاش مراد كملت تقدية وتابعها كيخلص مهضر موالو حدو كيشارك معاها الرأي فاللون ولا ستيل منين كيكونو اختيارات
مشاو ذهايبي خداو ليها خاتم بسلسلة حوالق وبراصلي عاد خداو الفاكية والحنة مقادة، اما تمر معمر والحلوى عطاتهم كموند لبارتيسري يتقادو وحتى لاطاغط ولحم ودجاج ساهل حالهم والديسير..)
معرفتش شنو باقي!!
اورطيغا: باقي غتكركبي للدار
أمينة: سكت سكت، علاش زواج سااهل!!
اورطيغا: (كيدير داكشي فالكوفر) لا صعيب انا تنشوف وتيهلك الجيب
أمينة: ههه وعلاش ملوكة عندنا قلييلة
اورطيغا: عليها شفتك حكيتي جييبك كولشي من حميدة قرصي شوية حتى نتي الحيط ولا ملاك دوزت ليك لاماص
أمينة: ههه اوا زيد احميدة نمشيو نشوفو العصري
اورطيغا: انا غنحجبها فالدار بلاش
أمينة: هادشي غير الخطوبة مزاال العرس فين تحطهم صحااح
اورطيغا: الله يبشرك بالخير!!
#يتبع