جنون الغيرة

الجزء 56

ملاك: (ركبت اللور وباها ومها القدام زادو من طريق الحي وهي كتشوف.. دازو قريب من خدمتها بقا فيها الحال بزاف حيت وقفوها هي اجراءات قانونية غترجع غترجع ولكن علاش هي مظلومة وتزيد توقف حست بحال الخدمة منصفنطتهاش وهي كانت كتخدم معاهم بالنية!!!
تفكرت الدار للي عليها طريطا شنو غدير!! باقي قدامها 20 يوم باش تخلص 1200  درهم والمشكل مكملاش ممفينياش باش حتى تكريها لا زليج فالارض لا صباغة لا ݣبض!! ردت راسها اللور متنهدة كولشي تجمع عليها وباش تخلص لاصيرونص الطموبيل وشحال من حاجة هي معارفاش دوك الإجراءات شحال غيتعطلو فلوسها غيتجمعو رابيل ولكن دابا باش غتصرف؟! باقي عندها شي حاجة فلكونت ولكن بحال ديما كتفضل تخسرها فشي حاجة للي مهمة ماشي فالحاجات اليومية!! وصلو لصبيطار نزلو من الطموبيل)

رشيد: طلعي مع مك ولا تمشي معايا نتقدا؟!!! (زعما حيت تفارقو هي واورطيغا)

ملاك: احم... معليش نطلع نشوف خالتي أمينة

زهرة: حسن ابنتي تشوفيها (مشا باها وهوما طالعين بشوية فدروج شادة مها فذراعها) قالك مراد شي حاجة قلقاتك؟!

ملاك: لبارح؟؟.. لا

زهرة: اوا وشنو درتو؟!

ملاك: دابا مكاين والو، هو ملهي مع مو وانا مع حريرتي

زهرة: باش تكوني عارفة ابنتي هو راه داك نهار المشؤوم راه كان فالحومة (قلبها ضرب) كان حتى هو معصب بزااف ولكن منين باقي كيجي للمحكمة ويصوني عليك ودار المحامي عرفيه راه  داير جهدو للي فهاد الوقت هو خاصو للي يوقف معاه ومنين باقي كيقلب يهضر معاك غيكون مزال باغيك

ملاك: فين كان داك نهار واش حدا الدار؟!

زهرة: (وصلو وهوما يسكتو منين شافوه واقف فسرجم عاطي بظهر أغلبية غيكون كيكمي شافت فبنتها وقفت) وااا زيدي!! (تمو ماشيين حتى كتبان غيثة جالسة فكرسي ساهية)

ملاك: (فنفسها هادي شافتني خويت وهي تعمر الساحة!!!!)

غيثة: (وقفت وتبسمت حتى خرجت خالتو من الشومبر كانو متكيين كيتسناو طبيب ضار اورطيغا كيشوف شكون جا حتى لقاها هي للي كان كيفكر فيها!!
بقاو كيتسالمو لاح داك الݣارو وهو كيتمعن الشوفة فيها 6 ايام بدلاتها!!
هي مشافتش فيه مقدرتش، ولكن عارفاه كيشوف فيها تم طبيب خارج مشا عندو اورطيغا زربان ولكن من ملامح طبيب باين..)

خديجة: (حست بلعيا بزاف مقدرتش تنوض تمشي لصبيطار مقدرتش حتى تنوض من فراشها تقاد فطور، يوسف صباح بكري خرج مشا يشوف مو كيف بقات وهي كتسناه يجي يقولها على الياقوت للي راها ساكنة تماك اه خافت يبعدوه عليها ولكن كرامتها هي اللولة مغتدخلش لديك الدار ولوخرا تماك وتقدر تهان دابا كتفكر فنفسيتها كتر ومقاداش شي حاجة تأثر على البيبي ديالها..
صونات على مراد تسولو على أمينة مجاوبش صونات عليها وفاء)
اهلييين