دخل رشيد للدار ملاك دارت مفراسها والو تخليه يهضر مع مها للي غتجيب ليها لخبار..
صونا عليها مراد واخييرا!!! دخلت لبيتها سدت عليها لباب بكل براءة مخلية باها ومها يهضرو على خاطرهم!!
ملاك: (كتلحنها) هااالوووووو!!
اورطيغا: زين فين شداها !!
ملاك: فالدار (جلست فوق ناموسيتها مربعة رجليها) شفت قبيلة طموبيلتك حسابلي جبتي خالتي أمينة وجيتي!!
اورطيغا: كنت عند باك رشيد
ملاك: ههه خير وسلام!!
اورطيغا: خير ان شاء الله خيير... مقالك باباك والو؟!
ملاك: لا.. اممم شنو قلتو؟!!
اورطيغا: هضرة رجال.. شنو نتي غتمشي لݣرسيف؟!
ملاك: والله معرفت انا مكرهتش نمشي ولكن بابا معرفت شنو غيدير كلمتو هي اللولة راك عارف
اورطيغا: عارف العمييرة.. شفت قبيلة فصباح دار زوينة عجبات الوالدة
ملاك: بالصح وريهالي!!
اورطيغا: غتجي وغنوريهالك وختاري صباغة للي بغيتي
ملاك: ههه لا صافي كنتيق فذوق خالتي أمينة
اورطيغا: متجيش نشوفو؟!
ملاك: ههه لاءء
اورطيغا: ملاك مثلا باك الا عكس وبدا يترطا ويقول بنتي بغيتلها پيلووط!!
ملاك: هه لا بابا كيبغيلي غير الخير ميمكنش يعرف انني باغا ديك الحاجة ومرتاحة فيها ويحرمني منها.. وأصلا منقدرش نبعد عليك امراد راك وليتي مني
اورطيغا: (تبسم) النيكوتين نتي يا جدك
ملاك: ههه، واش بابا قسح معاك لهاد الدرجة؟!
اورطيغا: عادي بحال أي أب باغي لخير لبنتو.. مزال قالك غيجاوبني، دارلي بحال داك شكل ديال الشركة سير راه نمرتك عندنا حتى نجاوبوك
ملاك: هههه
اورطيغا: معليييش انا وتكون عندي قطيطة بحالك منرخيهاش
ملاك: (تبسمت مفرنسة) علاش مبقيتش فصفرو نشوفك!!
اورطيغا: حيت باك بقا حاضيني (سمعها كظحك) عنداك تبيني راكي كتعرفيني!!
ملاك: كولشي كيوصيني
اورطيغا: حيت الموصيبة من لبعد الواحد تيعرفك مزعووطة فية وواكلة جوااانط
ملاك: (ميقت) اممم الثقة امسكيين
اورطيغا: عادي عادي احبيبي مزال تزيدي تزعطي كتر..
خديجة: (كانت فبيت ضياف سادة عليها كتبكي بهستيرية هي الياقوت ومتقبلاتهاش عاد تقبل عندو ولد ومنها!!! عاد فهمت تهديد الغالية نهار قالت ليها هاد الظحك للي كظحكيه كولو غتهجريه وتبكيه دم وهاد الراحة للي نتي فيها غترجع جهنم تبغي غير تهربي منها..
حست بالغدر مكيهمش قبل ولا بعد ميعرفهت المهم هو دابا عندو ولد بقا فيها راسها بزااف كانت حاسة بحال ديما فرحتها مغتكملش ميمكنش زهرها يتبدل فدقة ضرووري من المفاجآت.. صونات على ملاك جاوبتها)
(بصوت مخنوق) علاش مقلتيليش على ولد يوسف؟!
ملاك: (بعدت من حدا مها للي كانت كتعاود ليها على باها) ماما انا جاية!!
زهرة: هضري هنا
ملاك: شي حاجة ديال قلة دالحيا، نهضر!! (زهرة بقات كظحك.. دخلت لبيتها) اخديجة!!
خديجة: علاش مقلتيلي والو؟؟
ملاك: لبارح بغيت نبدا معاك الهضرة ونتي تعصبتي
خديجة: واخا هكاك تقوليلي ماشي تخليني معارفة والو
ملاك: باش عرفتها؟!
خديجة: هو
ملاك: وراه مسكين بعدا عاود ليك مبغاش يزيد يخبع عليك
خديجة: باش غيفيدني انا هاد المسكين؟؟!
ملاك: شوفي راه من حقك تغضبي وتغوتي ولكن داكشي حدو يبقى عندكم
خديجة: علاش انا مزال نبقى معاه!!
ملاك: اوا صافي طلقي وخليه العزافة كادو لا هي لا لالاهم الغالية وها هوما ربحو شنو كانو ناويين من اللول ومخططين ليه ومتنسايش واحد الحاجة هو راه دار هادشي قبل حتى ميعرفك
خديجة: (كتبكي) مبقيتش كنحملو
ملاك: (بقات غير ساكتة تفكرت نهار باها جاب أنير كانت هي اول المؤيدين وكانت كتقنع مها باش تقبلو..)
واش هو قالك يجيبو يعيش معاكم؟!
خديجة: واش بنيتك املاك؟!
ملاك: وانا كنسول عاوديلي شنو قال!!
خديجة: صافي ما فية للي يهضر نشوف شنو ندير واش نجي ولا معرفت
ملاك: دار باك هادي اختي تجي ليها فوقما بغيتي غير واش يوسف يستاهل تعامليه هاكا وهو طايح فالفراش!!
خديجة: (هي براسها مقاداش تخليه ولكن الغضب عما عينيها...)
بلاتي ونهضر معاك املاك...
أميمة: (دخلت لطواليط كتهضر بشوية) راه مصالحش دابا حماتي مزال ممشات....
معرفت غتسافر غيبقى غير باه...
لا لا فهاد الايام غنزرب..
اه داك نهار شافني فالليل منين كنت جاية من عندك ولكن مشكش..
انا بعدا عمرني خنتو كنت غير كنهضر معاك اما هو وديك القزيپانة كانو عايشين الحياة...
صافي واخ..
ادم: (قطع معاها هادي بعدا غطرق ليه مسمار من جهة اورطيغا، هي عينها تنتاقم وجات سااهلة تعمر واحد قلبو وعينيه عامرين بالانتقام وتسهل عليها طريق...)
#فلاش_باك
ادم: فعرس يوسف وخديجة كان هااااادئ وكيركز على خطتو للي رسمها كان حاضي مزيااان اورطيغا للي كان شي مرات فحال خيال ملاك وكل مرة كيتلقاو فقنت وغيثة كانت خيالهم بجوج استغل انشغالهم ببعضيااتهم بقا غير حاضيهم حتى شاف طرف تالت تابع ملاك وعاد منين ضاربو هو واورطيغا تبعهم فهم كيدابزو على ملاك وقفت حداه وحدة كرشها كبيرة ومن عينيها كانو كيطلقو شرار هادي كانت جالسة مع الطرف الثالت للي دابز..
ادم: نتي مرات هدا؟!
أميمة: (شافت فيه معصب، طلعت الشوفة وهبطتها فيه) شكون نتا؟
ادم: (بهدوء مصطانع البراءة) انا باغي نخطب ملاك ومفهمت والو فهادشي وقت هنا تنتفرج وتنسنى شي واحد يشرحلي هاد الزوج علامن تيدابزو!!
أميمة: حتى نتا معمي على عينيك؟!! اش بغيتي هاد الطاسيلة راهم يهوود
ادم: يهود؟!
أميمة: اه مكتشوفش كفاش منوضة الفتنة بيناتهم؟! الله ياخد فيها الحق فيه نهار الق***
ادم: ولكن هي مبغات حتى واحد فهادو وقالتها ليهم
أميمة: هي راه كتحماق تجمع رجال عليها ياكما حسابلك عندها غير هاد الجوج انا للي جارتها وعارفة وزيد ها راجلي واخا عارفاه مزوج وقرب يجيه ولد مخليااه ضاير بيها بحال لحمار
ادم: اممم نهنيك من هادشي؟!
أميمة: (بقات كتشوف فيه كيبان انسان محترم وهاااااادئ)
علاش؟!
ادم: انا باغي لبنت متيهمنيش هادشي للي قلتي هليها ونتي باغية راجلك
أميمة: وكفاش؟!
ادم: انا غنكتب ليك نمرتي نتي غير حضيني فين غنحطها وهزيها باش منوضةش صدااع... انا غراضي ماشي خاايب في حيت بغيت لبنت ونتي يرجع ليك راجلك يبقى بوحدو ليك.. غنتفاهمو
أميمة: (شافت فحمزة للي كيقول لمراد ان ملاك ديالو ويبعدها.. رجعت شافت فادم)
صافي واخا...
بقات متبعاه دخل مكملش دقيقة خرج حطها فوق ڤاز كبير ودخل هي مشات خداتها فين خلاها ليها، فالايام اللولة مزعمتش تواصل معاه خافت من راجلها حتى مات ولدها عاد رجعت كتواصل معاه...
ادم: (اليوم غيثة غيتسالا ليها داكشي للي عطاها حيت حاسب شحال من حبة للي غتكون كتشرب حبة فنهار وهو غير عليها اياام..
لدابا مزال مصوناتش عليه.. صونا على الغالية يسول فيها يعرف اخبار غيثة مجاوبتش.. )
اممم خاص نمشي عندها بحال والو قلبت على بلاصة اخرى منين تجيب داكشي!!
(مشا عندهم الڤيلا ملقاهمش قالت ليه المساعدة التانية عاد دابا مشاو لعند دار يوسف حيت مريض، عارف عنوان دار خوها ولكن معرفش واش يمشي ولا لا!! صونا على غيثة للي تفاجئ منين جاوباتو)
غيثة!!
غيثة: وي ادم!!
ادم: انا رجعت المغرب وسمعت شنو وقع مع خااك !
غيثة: اممم
ادم: فينك نتي بغيت نجي نشوفك ونمشيو نشوفوه
غيثة: انا برا عاد غنمشي للدار.. ادم بغيت نهضر معاك فموضوع مهم
ادم: انا جايب ليك شنو بغيتي!!
غيثة: (رجعت كتناسا تااخد وباقي ليها من داكشي حيت كتحاول ما فجهدها متاخدش) مبقيتش تناخد داكشي ادم
ادم: كفاش؟!
غيثة: انا نصيفط ليك فين كاينة نتسناك تجي.. (قطعت صيفطات ليه لوكاليزاسيون.. بقات غير صااقرة ميمكنش تحل هادشي بوحدها راه عيات تشرب عشوب كتنقز ووالو مطاح والو حدها يوماين دلحريق وكيفوتها الحال وحتى الدوخة ولا الردان مافيهاش كرشها عادية غير الشهية للي مفتوحة ليها بزاف ومخلياها مضعفاناش..
جا عندها دخل الكافي وجلس عارف مغتسلمش عليه غير من ملامح وجهها للي باينة مكتفسرش)
ادم: وي حبيبة!! صاڤا
غيثة: انا حاملة
ادم: (بقا غير كيشوف فيها) متأكدة !!
غيثة: (حركت راسها باه)
ادم: وعارفة شكون؟!
غيثة: (خرجت عينها) واش حماار!!! معاك نتا!!
ادم: غيثة انا متنولدش عاااقر تندݣ الشوكة باش منولدش قلتها ليك ديك المرة ونعاود نقولها الف مرة
غيثة: تتفلى!!
ادم: لا متنتفلاش وعلاش غنكذب الا كنت انا باباه راه حنا مخطوبين وغادي نديرو العرس، ولكن عارف ماشي مني راه كتر من 6 سنين وانا تنديرها وعمر وقعلي شي بروبليم.. (بانفعال) نعستي مع داك الشمكار!!!!!
غيثة: انا ممتيقاكش!!
ادم: وبغيتي انا نتيقك داباا!! واش مشيتي لطبيب راه ميمكنش تحملي!!
غيثة: (توترت) انا شكيت!! حيت تعطلت علية بشي 3 جوغ
ادم: كفاش شكيتي نتي تتخرجي معايا غير انا!!!! وانا مستحيل تحملي مني!!
غيثة: (قلبها كيضرب وقفت بغات تمشي هزت صاكها وقف بعصبية شاد ذراعها) طلق!!
ادم: كنتي معاه؟!!!!
غيثة: قلت ليك غير شكيت ابنادم واخر مرة تعاملني هاكا
(زادت كترجف بقا كيخلص وهي خرجت بالزربة كتقلب على تاكسي جا يهضر وقف ليها واحد ركبت وزاادت راسها غيتفرݣع!!!)
يوسف: (مشا كيدق على خديجة فلبيت للي سادة عليها وصوت بكاااها كيتسمع، حتى سمعاتو طاح خرجت بالزربة لقاتو طاااح باغي يوقف)
خديجة: (بصوت مخنوووق) علاش ايوسف نضت من بلاصتك واش باغي تهلك صحتك؟!!
يوسف: (دايخ) علاش مكنتيش تتجي منين عيطت ليك؟!
خديجة: غير تكيت فلبيت وصافي (بقا فيها بزااااف... نوضااتو كيبغي يكاابر عاوناتو واخا تقيييل وصلاتو لبيت نعاس)
دخل طواليط؟!
يوسف: علاش كنتي تتبكي؟!
خديجة: يوووسف!! عفاك! قولي دخل طواليط؟؟! (حرك راسو بأه.. دخلت معاه عيا يقولها تخرج ولكن غير كطلقو كيبغي يطيح عاوناتو ممبينة والو واخا جاتها التروييعة سمعو الدقاان خرجو حطاتو فالنموسية كتغطيه بشوية وهو متبعها كيحس بالضعف بزاااااف معاجبوش الحال انه يبان قدامها هاكا وفنفس الوقت حاس بأنه مقلقها بزااف..)
سمحيلي اخديجة
خديجة: (ضارت عندو) يوسف انا للي مهم عندي هو تبرا.. عفاك ديها فصحتك (لباب كيتدق بالجهد) متنساش بنتك وولدك للي جايين فطريق!!
يوسف: (غير متبع ليها العين يمكن اول مرة غيحس انه كيبغي خديجة بالصح ميمكنش هادشي للي يكون كيحسو غير إعجاب.. لبست شالها وبينوارها ومشات خرجت غمض عينو بتعب كبييير كيسمع صوت مو وباه حتى دخلو عندو حل عينيه بشوية كيطمئنو عليه جات مو جلست حداه فالنموسية وباه جراتلو خديجة الكرسي يجلس)
اب يوسف: الله يرضي عليك ابنتي عييناك بزاف ونتي للي خاصك للي يتهلا فيك
خديجة: مكاين حتى عيا اعمي انا نقاد أتاي
الغالية: بلا متعذبي راسك انا جبت نادية تعاونكم هاد الايام واشرف مشا يتقدا نتي تهلايلي غير فابني
يوسف: (شاف فمو) هي داكشي راه تديرو معايا بلا ميوصيها شي واحد!!
الغالية: انا مقلت عيب اولدي !!
خديجة: انا نجاوب التيليفون.. (خرجت هزت تيليفونها صونات على مريم ختها تعاود ليها شنو ضارها مقدرتش تبقى فهاد الدوامة بوحدها بلا متفش قلبها على شي واحد...)
وفاء: (مشاو لدار أمينة للي عرضاتهم لعشا وراتها وفاء شنو شرات زادها براسلي وسنسلتو وحلقات ذهب)
أمينة: من داك صداق قلت ولد ختي جلدة!!
وفاء: هههه والله مكيهمني شي صداق ولا شي فلوس
أمينة: يهمك ݣالاك ميهمكش ديري تحتك واش نتي خدامة راه ياله كتقراي منين غتجيبهم!
وفاء: حقا كرالي غير هنا حداك
أمينة: واه فخبري
وفاء: خالتي أمينة قوليلي كدايرة ديك العائلة غدا راني ماشية وخايفة
أمينة: كيف زبل (ظحكت امينة) متخليهمش يطلعو فوݣ راسك كلمة بكلمة معاهم والشايطة عندهم حتارموك احتارميهم وعطيهو صوابهم دارو العكس متحشمييش انا للي عارفة تريكتي، من برا قال الله وقال الرسول ولداخل ديالهم كاين ابو لهب
وفاء: ههه الله يبشرك بالخير
أمينة: توݣضي وجمعي حوايجك بيتك سورتيه فالدخلة والخرجة..
~~~~~~~~~~~~
ملاك: (جلست حدا مها للي فهمت باها ممتحمسش لهاد الخطوبة بزاف)
وعلاش؟!
زهرة: هو نهار شافو لقاه كيدابز
ملاك: اومن بعد عادي زعما مفهمتش غير شافو كيدابز صافي راه قبيح؟!!
زهرة: شوفي بلا متعمري راسك هو 3 ايام ويرد عليه
ملاك: انا راه غنتزوج بمراد
زهرة: ملاك!!
ملاك: ماشي هو ختارك وانا ميخلينيش نختار
زهرة: الا هضرتي قدامو هاكا غيتعكس معاك ونتي عارفااه
ملاك: (صونات خديجة) انا نجاوبها
زهرة: اري نهضر معاها نشوف كيف بقا يوسف خليناها مسكينة بووحدها، وكان شديتي ابناي كونجي تمشي عندها ولكن بلاش غادي غير تزيد تقابل جوج دالناس
ملاك: عنداك تزݣلي شي وقت ومطنزيش علية
زهرة: ههه.. (جاوبت) ابنتي!!
خديجة: (مصلاحش ليها تعاود لمها حيت الدار عامرة وبيتها ناعس فيه يوسف ومو حداه بيت لاخر فيه غيثة سادة عليها بيت التالت ممفرشش ولكن مرت أشرف حاطة ولادها كيلعبو تماك وهي حاضيااهم الخدامة فالكوزينة كطيب الصالة جالس فيها اشرف ومرتو بقالها غير طواليط كتهضر بشوية تماك)
ماما.. لباس عليك
زهرة: الحمدلله ابنتي ونتي؟ كيف بقا يوسف!!
خديجة: شوية دابا.. راه جات عائلتو وجالسين معانا
زهرة: معليش ابنتي وسعي خاطرك وراه عائلتك حتى نتي
خديجة: انا بغيت غير التيقار وسكاات
زهرة: خديجة بنتي نتي ماشي هاكا!!
خديجة: حيت ضرافة ديالي هي للي مخلياني اللور اللور
زهرة: شنو واقع؟! قالت ليك الغالية شي حاجة!!
ملاك: (كضور عينها باينة خديجة كتشكا ليها)
خديجة: لا... جابت خدامة معاها هي للي كتقاد كولشي مسكينة ديك نادية للي كنقولك
زهرة: الله يكتر خيرها مسيكينة تهلاي فيها ابنتي
خديجة: (بتنهيدة شافت فلمرايا وحابسة البكية) واخ..
زهرة: مشهية شي حاجة ابنتي
خديجة: مشهية نبقى غير بوحدي
زهرة: راجلك ابنتي مريض فين غتخلييه
خديجة: (بانفعال) يبقى مع مو
زهرة: خديجة!!!
خديجة: صافي اماما راه غير طالعلي الدم شوية وصافي فينها ملاك
زهرة: ها هي حدايا وكان ماشي خدمتها تجي تجلس معاك وعاد غنمشيو العرس يمكن
خديجة: مكرهتش نجي
زهرة: صبري ابنتي الله يرضي عليك دابا تفاجا
خديجة: (بتنهيدة كبييييييييرة) واخ.. انا نمشي حدا يوسف نشوف واش خاصو شي حاجة
زهرة: الله يرضي عليك ابنتي....
اورطيغا: (مجمع مع عمر فالصالون)
...معرفتش صراحة واش نجي ولا لا وعاود مبغيتش الوالدة تجلس تمااك مع دوك القوووم
عمر: شوف واخا متحضرش خالتي يهضر معاها شي حد نوصلو انا وياه بݣطيع الراس
اورطيغا: واخا هكاك اعمر واش نتا غتبقى محشي حدا لعيالات ديما
عمر: اوا الحل هو تمشي
اورطيغا: متنحملش داك القنت أخاي صراحة ولكن.. بعدا فيها شي شطيح!؟
عمر: ههه شطيح لنسا ولكن حتى رجال نديرو ݣصارة
اورطيغا: الشيخات!!!!
عمر: لا شيوخ
اورطيغا: رجال!! اش غندير انا برجال؟؟
عمر: ههه لا لغياطة زعما لعلاوي والبرطيات
اورطيغا: اممم والشيخات للي يشطحو على هادشي؟!
عمر: ههه لا مكاينش..
اورطيغا: كيف والو!!
(عيطت عليهم أمينة يتعشاو ناضو تعشاو فجو الظحك وفاء اول مرة تشوف عمر حتى هو كيقشب ويظحك شداتهم أمينة يباتو اورطيغا عطا لوفاء بيتو تنعس فيه وهو وعمر نعسو فبيت التلفازة مقصرين.. خرج لبالكو كان لبرد بزاف صونا على ملاك)
اورطيغا: التوتووز!!
ملاك: (كاعية مزيااان) بابا مخلانيش نمشي لݣرسيف
اورطيغا: (عرف على حسابو) ما فيها خير اصلا مدايرين والو غير رجال للي تيشطحو
ملاك: هه شنو!!
اورطيغا: مهم بحرا نتي توجدي راسك لية راه السيمانة جاية غنقصدك ازين
ملاك: هه بغيت نمشي امراد!!!
اورطيغا: شنو غتعاندي مع باباك!!
ملاك: بفففف ووفاء؟! نخليها بوحدها وبغيت نشوف حتى انا تقاليد ديال ناس الشرق
اورطيغا : التقاليد تيشطحو غير رجال
ملاك: هههه موريتنيش داري
اورطيغا: (تبسم) اجي برجلك تشوفيها
ملاك: نسا فاس دابا اكبيدة جبدتي نحل مع بابا
اورطيغا: وغنجبد من اصل مك حتى العسل (سمعها كظحك) هكاااك دابا تفاهمنا
ملاك: مراد بالصح باغية نمشي مع وفاء
اورطيغا: معرفتش املوكة شوفي مع ماماك تعاود تهضر الا علية انا غنكون بعيد عليك والا شتك غنقنت مك
ملاك؛ ياك!!
اورطيغا: منزݣلكش ازين.. ياله انا غندخل الزفزووفي هنا
ملاك: تصبح على خير...
غيثة: (جالسة فوق النموسية وعينيها خارجين بحال مصدومة المشكل ردة فعل ادم كتأكد انه متأكد من راسو انه مستحيل يكون سبب فحملها وهي مقتانعة نسبيا !!
حيت كتعقل كانو اسماء بزاااف فراسها ولكن كاينة حتى سمية اورطيغا واخا من ساابع المستحيلات هي عارفااه مزيان مستحيل يدير معاها شي حاجة.. راه عمرو فكر فيها حتى وهي صاحية ولايحة راسها عليه عاد يدير معاها شي حاجة وهي مدروݣية!!!
فاش مكتلقى حتى شي حل كتبقى غير تبكي أكبر مشكل واجهاتو اعتبراتو انه اكبر من مشكل المخدرات للي واخا دمها مزال محتاجو وعانات بزااف ولكن مقدرتش تعاود تاخد شي حاجة من غير دوايات كالمو..)
يوسف: خديجة (دارت راسها نااعسة حتى تفكرت يكون محتاجها فشي حاجة ضارت عندو) صاڤا!!
خديجة: (حركت راسها بلا)
يوسف: سمحيلي
خديجة: يوسف منقدرش نهضر معاك من غير الا بريت عفاك دابا فكر غير فصحتك
يوسف: اش بغيت بشي صحة الا نتي مقلقة مني!!
خديجة: (بقات كتشوف فيه) صحتك ايوسف هي اللولة عندي حتى انا.. غدا غنمشي عند طبيبة باش ناخد ليها هادوك التحاليل للي قاديت
يوسف: (مرض كتر بهاد الضعف للي فيه..)
~~~~~~~~~~~
اصبحنا واصبح الملك لله..
أمينة: (فاقت بكري توجد لولدها فطور وبغات تهضر معاه) ولدي علاش منمشيوش اليوم نهضرو معاهم؟
اورطيغا: (مدوخ بنعاس) شكون؟!
أمينة: نساابك
اورطيغا: اشمن نساب.. (عاد فهم) هو قال 3 ايام عاد يصوني علاش حنا نزلو عليهم!
أمينة: الڤيزا وكيردو على بكري
اورطيغا : ههه الاخت مزروبة كتر مني!!
أمينة: اوا علاه نتسناو كتر من هاكا!!
اورطيغا: الوالدة هاد نهار غادي نمشيو غير غنحرجو راسنا وغنصدقو فمواصل خاايبة هو عطا كلمة وانا غنتسنى!!
وبنتو دايها دايها بغا ولا كره ولكن حنا نبغيو داكشي يكون بصفا والخواطر ونكبرو العائلة ماشي من اللول نبقداو بصلابة الخاوية وشدلي نقطع لييك...
ملاك: (كانت فالخدمة جا المدير عندها لبيرو ديالها جلس ودار مقدمة كبيرة وعلمها ان بقات ليها غير أيام معاهم وغتنتاقل لفاس فرحت بزاااف صونات على مها)
ماما قالي المدير قربت نمشي
زهرة: (تبسمت) وفرحانة!!
ملاك: (جمعت الظحكة) لا
زهرة: احح عليك يا شلاهبية
ملاك: ههه سنة الحياة ولكن راك نتي حبي اللول ديما غتلقايني مقلزة حداك
زهرة: دابا نشوفو
ملاك: وشنو عاد فيها الشك.. دابا امتى نصدم بابا!!
زهرة: بيناتكم
ملاك: يااااك نعطيك 500 درهم وغيزي لية لبلان
زهرة: اش هاد الهضرة!!
ملاك: زعما قادينا داكشي اماما
زهرة: واا بيناتكم
ملاك: اوا نخليه بينو وبين مراد مالي غير انا للي تجي فية
زهرة: بينااااتهم ههه
ملاك: عقلي فيها!! (عوجت فمها كملت مع مها عاد علمت مراد لي صيفط ليها ڤيديو ديال الدار صونا عليها)
واش غتصلحها!!
اورطيغا: انا شريت ونتي اكبيدة صلحي
ملاك: ههه وانا عاد للي بغيت نقولك الا شاط عليك شي جليج شي رخام شي صباغة دوزولي ودير فية خير
اورطيغا: هههه اسبحان الله اشريفة راه دارك هادي
ملاك: اوا حتى لوخرا داري
اورطيغا: نتي للي صدقات ليك
ملاك: انا صادقاالي غي حيت نتا كاين فحيااتي
اورطيغا: هاكا تتاكلي دماغي حتى تلقى راسي تنقاد ليك بحال شي حميدة الݣبص
ملاك: ههه العمر نتا
اورطيغا: نشد مك نصرطك
ملاك: ههه مشات وفاء وعمر؟!
اورطيغا: مشاو.. مهم حتى نشووفك دابا خاص نقاد حريرة ديال هاد الدار
ملاك: ݣاع مبغيت تقولي شحال؟!
اورطيغا: هي ناوية تسلفيني!!
ملاك: نعطيك علاش غنسلفك غير هو تكتبها فعقد الدار ها شحال عطيت وشحال جاياني فنسبة ديال الدار
اورطيغا: ههه كولشي ديالك احبيبي
ملاك: هه غير كنظحك معاك بالصح الا كانت شي حاجة نقد عليها نعطيهالك
اورطيغا: عطيني غير شي بيييسة هاد الساعة
ملاك: ههه (ميمكنش شحال فرحانة معاه.. دخلت زينب) مراد عندي خدمة من بعد ونصوني عليك...
ادم: (عيا ميفكر فهضرتها ممكن جدا تكون بالصح حاملة نعاس حرم عليه واش من اورطيغا ولكن ديما كان حاضيها ولكن منين كان كيغيب واش هي كانت كتمشي مع شي واحد اخر!! عيا يصوني عليها والو مكتجاوبش وكفاش مبقاتش كتعاطا ميمكنش تبرا علميا ميمكنش راه كانت مدمنة ميمكنش تعالج راسها براسها!!
جات عندو البنت لي باتت معاه طردها اصلا من لبارح كان كيتعامل معاها خايب ولكن هو شرط عليها ان من اللول غتكون معاملة ديالو معاها غتكون خايبة
حدد معاها فلوس وهي قبلت... بقا غير كيفكر هاكا هو للي ضايع هو للي مشات منو البنت للي كيبغي اما اورطيغا غيعيش حياتو كما بغا ومع البنت للي بغا..)
~~~~~~~~~~~
رشيد: (جاتو مكالمة من نفس النمرة ديالهم.. تعجب لطلبهم وهاد المرة قطع عليهم بلا ميقول حتى كلمة عيط على خوه باش يجي هو القهوة يحضيها ومشا لدار.. عيط على زهرة ودخلو لبيتهم)
زهرة: شنو واقع خلعتني
رشيد: ضروري كان خاص نجي نهضرو
زهرة: متقولش غتعيط على الولد تقولو لا (شاف فيها باستغراب) على مراد ولد أمينة
رشيد: واش انا دابا فداكشي!! صوناو علية عائلتك قالك هوما فصويرة
زهرة: (قلبها ضرب ورجع نفس الخوف حتى وقفت من بلاصتها) اوا!!
رشيد: (باستغراب) قالك تلاقايهم ولكن بوحدك ومعاك بناتك
زهرة: آش جاب بناتي للهضرة؟!
رشيد: حيت قالك هوما ديالهم ومفهمتش حتى انا واش بغاو بيهم
زهرة: (تفكرت كلام باها للي كان قال ليها انها غتبقى يهودية شنو ما دارت وانها واخا تسلم وتزوج مسلم بناتها حفايدها وحفايد حفايدها غيبقى اصلهم يهودي بغات ولا كرهت ولكن فالاسلام لقات العكس!!)
صافي معندي مندير بيهم
رشيد: قالك الا ممشيتيش مدام نتي قلبتي عليهم هوما غيجيو عندك يشوفك ولكن مقالوش عارفينا كاينين فصفرو
زهرة: صافي مبغيتيش ومبغيت حد يقرب لبناتي
رشيد: متخافيش
زهرة: غلطنا من نهار اللول ارشيد مكانش خاصنا نقلبو عليهم دازت كتر من 38 عام ولا كتر علاش فكرنا فيهم
رشيد: زهرة متخافيش
زهرة: نخاف على بناتي وولادهم
رشيد: بإذن الله مكاين للي يقرب ليهم راه هنا ماشي هو لهيه للي كيديرو مبغااو!!! بغاو غير يخوفوك وصافي متخافيش..
زهرة: (بقات فدوامة كبيرة نادمة علاش قلبت عليهم من الأصل ولكن توحشاتهم وشحال من عام. هي كتبكي بغات غير تسلم عليهم اخر مرة ولكن هوما مزال منساوش وباغيين يكملو انتقامهم للي مكملوش فبحر صويرة!!
ولا يمكن فهموها غلط يمكن فهمو ندمت وبغات ترجع عندهم حيت فبالهم اليهودي فينما مشا وشحال ما بعد غيرجع ليهم فأخر المطاف!!! هضرت وهي كترجف)
خاص ملاك تزوج دغيا باش ميلقاوهاش هنا معايا الا جاو
رشيد: و اش دخل ملاك ؟!
زهرة: (وقفت) زعما معارفش ارشيد!!! عيط للدري قولو يجي
رشيد: واش حنا فكرنا واش نقبلو ولا لا!!
زهرة: سولت ملاك بيني وبينها كأي أم وبنتها وعرفتي شنو قالت الا كان معقول مرحبا بيه يعني ماشي داكشي للي فبالك محݣرت لا خدمتو لا هو قالت بفمها مرحبا بنتك بعقلها باغية غير راحة البال بنتك باغية تزوج ودير وليداتها ومو الله يعمرها سلعة اش بغينا كتر من هادشي!!!!
رشيد: واش بنتي تصرف عليه!!
زهرة: راه خدمتو كيدخل منها كتر مكدخل هي فصااليراها!! اش غتصرف ونتا معارفش بنتك الا على راسها وقمشاشة غتصرف على راجل؟؟
رشيد: راه غنزربو ازهرة!!
زهرة: الا كدير بكلمتي عيط للسيد يجي هو ومو
رشيد: اوا باه؟!
زهرة: الحاج زعما!
رشيد: اه
زهرة: يقدر يجي بيناتهم داكشي ارشيد من فوقاش حنا ولينا ندخلو فالناس
رشيد: انا هادشي معاجبنيش
زهرة: منين تعاشر داك الوليد غتندم.. عفاك ارشيد مبغيت حتى وحدة من بناتي توقع ليها شي حاجة وانا عارفة ملاك الا مشات عند دوك الناس غترتاح راه غير هاد صباح هاد الݣزار للي حاݣرو شرا دار فأحسن حي فاس بملاااين صحيحة
(غير مقتنع)
راه مخاصش يجيو لقاو ملاك ممزوجاش!!
رشيد: واش انا حسابلك على الفلوس
زهرة: واخا غير توكل على الله وربي غيبين البرهان عيط ليهم يجيو مكاين علاش نأجلو...
رشيد: انا نهضر مع ملاك
زهرة: معندك فين تهضر صافي هضرت انا الله يجعل البركة
رشيد: اوا وخدمتها؟!
زهرة: هادي سيمانة قالتلي كاين شي بوسط فاس قالهم المدير شكون بغا يمشي لتماك هي مابغاتش تعاود تسول الا كان باقي وفمكتابها تعمرو
رشيد: كولشي عندكم ساهل؟؟
زهرة: ماشي انا للي كنسهلو ربي للي ميسر هادشي ارشيد ونتا لا..
اورطيغا: (كان فالمحال ديالو حتى جا عندو الحاج كيهضرو فالدار للي عطا العربون ديالها جاه اتصال من عند رشيد تفاجأ حيت مقالش غيعيط ليه دغيا) صبر الحاج نجاوب على هاد المكالمة!!
اورطيغا: (خرج لبرا مبعد) السلام عليكم...
لباس الحمد لله ونتا اسي رشيد؟!
انا.. اه يصلاحلي، نجي دابا؟!...
واخا..
(قطع مفهمش شنو غيكون بغاه والمشكل حتى من صوتو ماشي هو هداك صونات عليه مو صراحة تنوووغش راه ينوض القيامة على ملاك واخا باها ولكن فنفسو كيقول)
شكون بغا يكون فملك الله للي يحايدهااالي!!!!
(دخل كاعي مجاوبش موو حتى كيسمع الحاج كيهضر معاها دخل لاكيس جلس فالكرسي وعينيه خارجين كيفكر ألف مرة فمرة الا مبغاش باها وعارف ملاك كتموت على باها ومغيبغيهاش تحط بين جوج اختيارها للي مغتكون مرتاحة حتى مع اختيار الا مكانتش تراضي بيناتهم!!!)
الحاج: بالصح!! مرحبا وألف مرحبا...
اه دابا نمشيو (شاف فاورطيغا للي مكاينش فهاد العالم)
صافي واخا دابا نقولهاليه...
ندوزو عندك دابا..
(قطع)
مراد!!!
اورطيغا: نعام الحاج!!
الحاج: عيط ليك السي رشيد.. (تفاجأ) امتى نمشيو عندهم؟؟
اورطيغا: وعلاش نتا غتمشي؟؟
الحاج: وشنو ناوي تمشي بوحدك؟ غنمشي ونهضر معاهم حتى انا راك مسؤول مني
اورطيغا: (معندو ݣانة) بلاش
الحاج؛ علاش بلاش!! اولدي الله يرضي عليك فالخطبة خاصك تدي ناس كبار عليك باش يهضر الكبار والناس كيتيقنو راه الامور جدية
اورطيغا: اوا حتى نعرفو واش بغاو
الحاج: عاد عيطت لية أمينة وقالت بغاو (شاف فيه باستغراب) جاوب بعدا أمينة وتفهم منها.. ونيت ندوزو عليها باش نمشيو مجموعين
اورطيغا: (هز تيليفونو صونا على مو للي خرجت تقدا شنو تدي معاها أكدت أن زهرة للي قالت ليها رشيد عيطلو غير باش يتفاهمو على الخطوبة ويوصيه على بنتو كان بغا يشوفو وجه لوجه باش يهضرو جديا)
ومال جد أمو مقالهاش فالتيليفون مخليني منوي!!
أمينة: ايييه وكان يسمعك يخليك تشتاقها
اورطيغا: واخا يبني عليها جبل لبقات معاه..
مهم انا نبدل علية ونجيو..
واش الحاج يمشي معانا!!
أمينة: معلوووم
اورطيغا: تديري شراع يدك أمينة!!
أمينة: ههه سير الجحموم بحرا نكمل سخرتي ومتعطلوش..
خديجة: (كانت مشات معاها غيثة لطبيبة أكدت ليها ان الحمل ماشي مزيان وحتى التحاليل كولشي عندها مزيان متخاف من والو وتاكل للي بغات.. ووصاتها تبعد من تقل والاعصاب خرجو من تماك)
غيثة نتي عارفة الياقوت
غيثة: اه ولكن علاش تتسولي على ديك ***** معندك مديري بيها
خديجة: اوا وولدها؟!
غيثة: (شهقت) عرفتي؟!!
خديجة: اه قالها لي يوسف من فوقاش كنتي عارفة نتي؟
غيثة: عرفت فرمضان ولكن مقدرتش نقولك شي حاجة احبيبة غير سمحيلي
خديجة: نتي معليك والو ولكن علاش كيديرو فية هاكاك هي وماماك
غيثة: معرفتش اختي الله يهديهم وصافي بحال ناقصنا مشاكيل للي مشاو جابوها
خديجة: ونتي بخير بعدا؟!
غيثة: خديجة (حتى كتبغي تقولها وكتحبس) داكشي راني مزال قاطعاه واخا صعيب علية بزاااف ولكن كنشرب شي كالمو كيخليني ممعذباش بزااف حتى نعاس والو مكنعسش
خديجة: (كانت باينة فيها حيت تحت عينها رجع حالتو بالهالات ووجها صفار ولكن الصحة هي هاديك)
مع الوقت غتبراي
غيثة: (بتنهيدة) ان شاء الله.. (شدو تاكسي ومشاو لقات ادم فالدخلة ديال العمارة)
خ** شنو تيدير هاد الحيوان هنا!!
خديجة: تخاصمتو؟!
غيثة: مبقيتش باغاه وهو مبغاش يفهم
خديجة: قوليها لخوتك
غيثة: مبغيتش نزيد على يوسف مسكين
خديجة: حقا متقولي حتى لواحد راني عارفة على داكشي (خلصو التاكسي وهبطو)
غيثة: كوني هانية!!
خديجة: لهلا يخطيك ازين
غيثة: (جا عندها ادم) شنو بغيت ادم؟!
خديجة: شوف البنت مبغاتش تهضر معاك خليها حتى تبغي وتناقشو
ادم: (معصب بزاف) نتي حاملة من داك الشمكار ديال اورطيغا ؟!!!
#عند_ملاك
ملاك: (عيطت ليها مها قالت ليها على مراد للي غيحي هو ومو والحاج باش يحددو نهار الخطوبة فرحت بزااااف وبقات كتنقز)
زهرة: ويل مها حسابلي غتحشمي ولا غير نبقا فيك وتقولي منسخاش بماما كما كنتي كتقولي!!
ملاك: ههه والله اماما الا فرحانة منكذبش عليك ههه هداك راه حب قلبي غيجي
زهرة: ههه اوا سيري حتى تجي باش نقريك شوية بانلي رزانة بينك وبينها غير الخير والاحسان هاد المرة
ملاك؛ ههه (قطعت صونات على اورطيغا قطع ورجع صونا عليها) واش جايين دابا!
اورطيغا: (كان حداه الحاج ماشيين عند امينة)
اه
ملاك: وعلاش مقلتلي والو؟؟
اورطيغا: من بعد ونصوني عليك (مابغاش يبين الحاج انه ديجا كيهضر مع هاد البنت)
ملاك: معاك شي واحد!!
اورطيغا: اممم معايا الحاج
ملاك: اه اوا صافي بسلامة.. (قطعت وصونات على مريم تقولها الجديد واخيرا غتعاود ليها وبفرحة كبيرة على الشخص للي هي معاه وتݣر بكولشي)
~~~~~~~~~~~
أميمة: (صونات على ادم باش تعلمو ان داكشي للي قالها واجد ونهار قرب يجي ولكن مكيجاوبش)
دابا منين خواتلي الساحة غنوريك اش قادة عليه أميمة البهلة !!!
(دخل حمزة..)
احم حمزة بغيت نقولك شي حاجة
حمزة: غير زربي شوية الله يحفظك حيت عندي ماتش مع دراري
أميمة: غير زعما انا عارفاك صابر علية على حساب نعاس لدابا معطيتكش حقك
حمزة: ماشي مشكل أميمة
أميمة: (هادشي للي كيقتلها علاش هو متكونش منو المبادرة)
عارفة، غير بغيت نقولك صافي غير نصفا من ليغيݣل ونمشي الحمام كولشي يرجع طبيعي
حمزة: ان شاء الله أميمة.. انا نمشي دابا خاصك شي حاجة صيفطي ميساج
أميمة: لهلا يخطيك.. (مشا وبقات كتغدد على هاد البرود خاصو هو يطلبها ويرغبها باك هو للي قالها نكملو زواج علاش متكونش منو المبادرة!!)
أمينة: (خداو شي حاجة يدخلو بيها شكلاط ورد داكشي ديال باتيسري غير على ميتافقو ويديرو الخطبة كانت فرحانة بزاف مكرهتش دابا تشري الخواتم الحوايج وتدي معاها العدول ݣاع مزال ممتيقاش ولدها بغا يخطب ونوا المعقول هدا للي كان كاره فكرة زواج ورافضها ها هي ماشية باش تخطب ليه حبيبة قلبو وللي خلاتو باغي يدير وليداتو..
الحاج دخل باش يلبس شي جلابة بسلهامها خبر مفتاحة تمشي معاهم وتحججت بركابيها، وامينة جاتها من الجنة والناس متمشيش اورطيغا غير ساكت كيتسناهم دازت مو من حداه ضرباتو لصدرو بشوية)
بدا يدخل معاك الصهد
اورطيغا: (تبسم بلعكس هو مرتاح من ديك القضية ولكن علاش رشيد هضر قبيلة بنبرة مقصحة واش مباغيهش هو كشخص يكون راجل بنتو!!!)
أمينة: مالك اولدي؟
اورطيغا: والو غير سربيو خاص رجع المحال
أمينة: واش دابا وقت شي محال
اورطيغا: فالدار تتختاري غير لكبيرة و3 دلبيوت وخاص الفينسيون ولفراش ومنين تنقول الخدمة قولي تتهلك صحتك وماشي وقتها!!
أمينة: اسيدي اليوم مكاينة خدمة
اورطيغا: لا لا داير مع شي كليان تقيل تندي ليه السخرة حتى لعندو فهاد الوقت من شهر
امينة: اممم اوا يكون خير ميتعطلونااش غير فلعشا
اورطيغا: شنااااا هوااا!!!! (مشات سبقاتو كظحك هو تابعها كينݣر جا الحاج)
الا جلستي غتجلسي بوحدك
أمينة: هاااء!! ويلا شدونا لعشا!!
اورطيغا: غنقولو ليهم مرة أخرى انا مغنݣردعش لكليان للي تيتسناني ونجلس نزها ونتعشى
أمينة: الحاج هضر معاه وفهمو فصواب شوية راك غدير مرا ونسااب
الحاج: (على قلبو) العمل هو اللول الالة أمينة ميمكنش يخوي بالكليان ونتي عارفة مراد خدمتو وكلمتو فوق كولشي
اورطيغا: ولااااهييلا قالك منتعطلوش فلعشا.. من دابا الوالدة غنرصيو مع الناس ونتمو مكركبين حتى نهار الخطوبة واراي متعشااي
أمينة: باااز!! (صونات على ختها تعلمها مغتجيش لگرسيف حيت غتخطب لولدها زاد تكره مبغا حد يعرف شنو كيدير فحياتو ولكن مقال والو ميمكنش يقمعها ولا يقولها علاش ولا!! بقا كيتساب غير مع الصواݣة وشدو طريق لصفرو...)
رشيد: (جالس فالقهوة معاجبو حاال كيشوف من حقو يختار عريس لبنتو صغيرة ومراد ماشي احد الخيارات ديالو كيبانلو ماشي واحد للي معقول وقاد على شي مسؤولية..
جا حمزة سلم عليه جلس حداه طالب قهوة)
مالك؟!
حمزة: معرفتش اعمي بغيت نطلق بنت عمي
رشيد: مزال متفاهمتو نتوما ؟
حمزة: لا انا مرتاح لا هي مرتاحة!! شنو شادنا نبقاو بجوج معرفت الواليد مزال مبغى يفهمني
رشيد: الا بقيتو على هاد الحالة اللهم الفراق ولكن هضرو بجوج اولدي بعدا راه الحوار مهم كيحل بزاف دالامور معقدة
حمزة: مبقيتش كنقد حتى نهضر معاها والو كنحس بيها بحال ختي وصافي خاصني نوكلها نصرف عليها صافي!!
رشيد: ختك لا!! عاود هضر معاها والا مكان حل ديك الساعة الفراق محرموش الله
حمزة: (جاتو القهوة وهز منها كيشرب) يكون خير.. (شافو غير ساهي)
مالك اعمي؟!
رشيد: والو غير كنتسنى شي ناس.. جايين يهضرو فملاك
حمزة: (حرك راسو باه) الله يكمل كولشي بالخير
رشيد: امييين... (بانتلو طموبيل ديال مراد حتى حمزة شاف)
بغيتك تقلبلي اولدي على هاد الولد، (شحال من مرة كان بغا يهضر معاه فهادشي) حقا فعرس خديجة كنتو كدابزو!!
حمزة: (جغم من القهوة ضارو خاطرو) كنت معصب مع أميمة وجا هو قدامي فشيت فيه أعصابي ولكن من بعد هضرت معاه وعتاذرت ولد مزيااان
رشيد: يااك!!!
حمزة: اه ولكن نقلب عليه ملاك معندناش قليلة
رشيد: الله يرضي عليك اولدي نمشي عندهم..
حمزة: الله يعاونك اعمي.. (عينيه كيرمشهم دغيا حس بخنقة وغمة خاايبة ولكن صافي مبقالو فين يزيد ديك الصفحة تحرقت وهو حرقها بيدو..
مينكرش شحال حاااقد وكاره مراد ولكن معندوش الحق يوقف فطريقها! شافهم كيتسالمو وماشيين للحومة بقا غير كيتنهد راه كانت ديالو وهو سمح فيها.. وهادشي كيزيد يخليه متشبت بقرار الفراق من أميمة يبقى بوحدو ولا هاد الربطة!!)
رشيد: (شاف الحاج عاد طمئن نسبيا) مرحبا مرحبا نهار كبير هدا (دخلو للدار جا حتى العم الجد كولشي مرحب بالخطااب ملاك فسطح كطل من واحد لقنيتة كتفرنس وكتشوف فمراد للي هااادئ وحتى هو كيرد صواب كيبان مكاااالمي)
ملاك: تحلف عليه الا مربي جوج مرات ههه..
الغالية: (دخلت عند ولدها كتوكلو وتحاول تودد باش يسامحها ووالو كان معصب عليها)
شنو ندير اولدي باش تسامحني!!!
يوسف: خليتي غير نعيش حياتي فالتيقار
الغالية: وشنو انا دايرة دابا الياقوت كانت غتجي عندك سوا اليوم ولا غدا بيا ولا بلا بيا
يوسف: الوالدة نتي تتعمري راسها باش تلسق فية!! علاش تتنافقي!!! نتي خديجة متتبغيهاش وداكشي شغلك مقلتش ليك بغيها بالسيف عليك انا تنقولك غير احتارميها هادشي للي طلبت منك
الغالية: راه حتى هي ك..
يوسف: علاش مالها حجرة باش مغدافعش على راسها انا عارف غتكوني درتي حقك وحتى هي ولكن على الاقل تتحتارمك قدامي ومقدرة وضعية منختارش بيناتكم براكة غير عمرها جات عندي قالت لي مك دارت وقالت وفعلت!!
داكشي باش انا تندافع عليها
الغالية: هي عرفت تلعبها
يوسف: هي ذكية الوالدة، وانا تنبغيها بزااف
الغالية: هاكا كنت تتهضر على الياقوت!!
يوسف: لا علاقة داكشي لي بيني وبين مرتي لا علاقة ليه مع ديك ل..
الغالية: شنو الفرق؟!
يوسف: فنقا خديجة نقية فكولشي تعاملها معايا هي كولها مرأة تنحس بيها هاكا معرفتش ولكن هادشي مغتفهميش حيت نتي حاݣراها حيت طلقت ومعارفاش حتى علاش وكفاش وشحال صبرت!! حسابلك انا غير جيت وتزوجتها راه سولت وعرفت شحال من حاجة، راجلها وجابتني الصدفة معاه وبودني سمعتو شحال نادم وبدموع بكا ...
مهم من هادشي كامل بعدي من خديجة وخلينا هانيين
الغالية: بغيت ماماك تبعدك اولدي!!
يوسف: اه وغدا غتوصل ورقة ديال التحاليل وهداك الا كان ولدي غندير واجبي معاه
الغالية: مغتخليكش مرتك
خديجة: (كانت كتصنت عليهم دخلت عليهم كتزول شالها)
خديجة: علاش مغنخليهش!! علاش من حق شي واحد اصلا يتدخل فهادشي!!
الغالية: (بقات غير كتشوف حسابلها معارفاش)
يوسف: خديجة!!
خديجة؛ خالتي يوسف كنديرو معاه مجهود كبير باش يبرا خليه غير شوية يرتاح وهضرو فهاد الموضوع واخا هو منكر والو ومتهرب من والو
الغالية: ولك.. ول.. غير (زربت عليها رجعت كتبان صغيرة قدامها)
خديجة: مكاين بو ولكن.... (حطت المونطو وشافت فيوسف) شربت دوا للي خليت ليك؟!
يوسف: شنو قالت ليك طبيبة؟!
خديجة: قالت ليك اسيدي برا دغيا بنتك ولا ولدك بغاوك المرة جاية تكون معايا
يوسف: (تبسم وشاف فمو للي كتكدد فشنايفها) فين غيثة!!
خديجة: (خلاتها مع ادم تحت طلب غيثة) لتحت كانت كتهضر مع ادم
يوسف: وعلاش مطلعوش؟!
خديجة: (لوات شنايفها بمنعرف هزت بيجامتها ودخلت للحمام)
الغالية: درتوني بحال مكيناش معاكم!
يوسف: وسوليها بعدا غير كيف دايرة مع الحمل!! راه ولدي ولا بنتي لي فكرشها
الغالية: مكتشوفهاش مكتشوفش فية!!
يوسف: الوالدة خليني نرتاح شوية
الغالية: (خرجت من تماك مفقووسة مشات لبيت للي كتنعس فيه قلبت فصاكها جايبة داك دوا معاها)
حسابلك غتبعدي مني ولدي بالولاد انا نوريك لالة الغالية علاش قادة!!
~~~~~~~~~~~~~
غيثة: (دفعاتو فصدرو) علاش قلت هكاك قدام مرت خاي؟!!!!
ادم: شكون للي حملك؟!
غيثة: تمشي معايا عند طبيبة وتأكد حتى نتا حيت أنا ياله جيت من عندها والحمد لله (بقرف) مكنتش حاملة منك
ادم: (كيشوف فيها عارفها متقدرش تكذب)
غنقتلك الا عرفتك كتمشي عندو
غيثة: سير تمووت حسابلك مغنقولش لخوتي على شنو درتلي وباش بليتني نتا للي وجد راسك ليهم والبوليس...
ملاك: (بقات فسطح مها حبستها تماك عارفاها فموضوع اورطيغا ممرزناش ومكتحكمش فعينيها وابتسامتها العبيطة!!
اكترية فاش قالتلها فوقاش ندخل بلاطو دلحليب وتمر!! بقات تماك فسطح قلبها كيضرب مكرهتش تكون حداهم تسمع الحوار وكفاش اورطيغا يعبر انه باغيها ليه زوجة وكفاش باها غيشكر فيها ويوصي عليها مكرهتش تحضر وتسمع داكشي بقات دايرة يدها على خدها كتنهد وتبسم حتى هزت عينها كان حمزة كيكمي فسطح حلت عينها مزيان مخبية ابتسامتها)
حمزة: هادي فرحة الخطوبة!!
ملاك: (بفرحة) ههه اه
حمزة: الله يكمل كولشي بالخير الالة ولكن علاش جالسة فسطح؟!
ملاك: غير بقيت وصافي، بسلامة.. (مبغاتش تقوي الهضرة معاه مشات جلست تحت العشة عاطية بظهر ليه وحتى هو تحرك من تماك مشايفش التيليفون للي كيزومي فيهم..
ملاك كتبت لاورطيغا ميساج)
دير اوديو ونتا كطلب وتزاااوݣ بابا يقبل ويبغي يزوجني ليك!!!
اورطيغا: (كانت هضرة عادية بين لكبار هز قرأ الميساج ورجع جاوبها بلا ميدير تي تعبير فوجهو راه عينين رشيد حاضياااه)
غنطلب ونزاوݣو باش يعطيني نضرب (وصيفطلها ايموتيكون ديال الخوخة 🍑) بنتو لعزيزة
ملاك: (خرجت عينها مجاوبتش) ولد لحرام!!!
اورطيغا: (شاف فالحاج للي كيشكر فمراد وخدمتو والثقة للي عاطيه وان ولادو فكفة ومراد فكفة اخرى!!
حس بيه نيت قريب منو بحال شي عمو كيشكر فيه ومنين كيشكرو شي واحد كيتلف كيبقى غير كيضور فعينيه)
أمينة: (كانت فالطابلة لوخرا هي وزهرة ومرات عمام ملاك ومرت جدها مكرهتش دخل فهاد الحوار وتشكر فولدها ولكن غير رجال للي كيهضرو فهاد الساعة وعيب دخل مرا وسطهم واخا الحاج مخلا ليها تزيد حتى شي إضافة!!)
رشيد: (داااخ، عاود كلام الحاج فشكل على شنو شاف وميمكنش الحاج سليماني بمكانتو والعمر ديالو وقيمتو يكذب شاف فباه للي فرحان وحتى خوتو باينين مقتانعين شاف فزهرة للي كظحك مع لعيالات وباين كولشي فرحان)
مرحبا بيكم
اورطيغا: شنو نهار؟! الا كنتو.. زعما الا بغيتو.. بعد غدا، بعدا غدا مزيان!!!
الحاج: اه خير البر عاجله اسي رشيد
رشيد: (مفهمش لاخر علاش مزروب ولكن هاد الزربة كيديرها العاااشق ماشي واحد غير منعتين لييه وجاي قاصد المعقول!!)
على منوجدو..
الحاج: معندكم متوجدو اسي رشيد حنا راه عائلة وحدة وتبارك الله ولدي يوسف مزوج بنتكم وشركنا الدم من شحال هادي معاكم
رشيد: مرحبا سيدي، غير ان شاء الله لالة زهرة غتعلم (شاف فمراد) الوالدة ديالك بنهار للي نجيو فيه.. حنا رجال كيجينا كولشي عادي وسااهل ودغيا يوجد ولكن نسا هوما لي كيعرفو شحال خاصهم دالوقت
اورطيغا: مرحبا سي رشيد.
(رجعو كيهضرو عادي رجع كتب ليها)
هاد باك معككككگكككككككس كتر منك!!!
ادم: للي بغيتي نكون حتى معاك الا بغيتي تقولهم راه ادم للي تيعطيني لادغوووݣ وكنت تنخرج معاه لي بواط ونمشي معاك حتى البوليس
غيثة: حيت نتا متتخافش حتى من للي خلقك عاد غتخاف من عبادو!!!
ادم: ڤوااالاااااا متنخاافش ودابا جوج كلمات حطيهم فراسك نلقاك معاه نقتلك
غيثة: (بتحدي) للي فجهدك ديرو
ادم: تتحدايني!! انا راه صعييب عليك!!
غيثة: (ظحكت باستهزاء) قلت ليك للي فجهدك ديرو مبقيتش تنخاف منك ادم داكشي علاش كنت تابعاك عفتو وكرهتو وكرهتك معاه ادم عرفتي شنو نتا الوحيد للي تنتمنى ليك شي مووتة ميلقاو ميجمعو فيك تنتمنى ليك الشر
ادم : ههه هانية نودع من هنا تودع ماماك من هنا
غيثة: (بقات كتشوف فيه)
ادم: اول مرة جاتني ساهلة ودرت ليك نص حبة خليتك تابعاني كما بغيت!! وهي ساهلة ندير ليها 20 حبة نصيفطها للدود نيشان وفين غيشكو!!! غيشكو فبنتهم لمبلية للي مابغاتش تبرا ولا تحبس من لادغوݣ
غيثة: شماتة متقدرش!!
ادم: اممم صراحة غراضي بيك مكانش فماماك ولكن الا درتي هاكا ولا هاكا عارف كفاش نخلي شرف العائلة للي تيهضر عليه خوك وباباك طاايح فالارض بحال شي جفاف مع أكبر شوهة ففاس لا ماشي غير فاس اخبارك تعرف فالعالم فأحسن موقع عندي!!
غيثة: وفاش غراضك!!!
ادم: منين وصلنا لهاد النقطة غنوريك فاش غراضي واخر مرة لقا التيليفون للي عطيتك طاافي
غيثة: مغنديرلك والو كون هاني اصلا غنفرشك مع كولشي
ادم: (جبد تيليفونو دخل لڤيديوهات كيوريها مصورها بزاف فوضعيات +23 وعاد حيت كتكون مدروكية كيخليها ترغبو ينعس معاها ومصور غير للي باغي ولكن هو مبااينش وكل مرة كتقول سمية بغات تشد التيليفون بعد من مور ظهرو وبيدو دفعها)
كاين بزاف ليكوپي فالدار هنا فالمغرب فرنساا فبلاصة خدمتي عند شي ناس دياولي متخافيش علية احبيبة عارف شنو تندير
غيثة: (عينيها خارجين ودموعها مضببين الشوفة)
ادم: ولكن الا سمعتي الهضرة مغيخرج والو وغنكملو حياتنا طبيعي كما كنا.. (باستهزاء) باش شرف العائلة للي كل مرة تتهضر عليه الغالية ميتوسخش بالقيل والقال وهنا فالمغرب هاد الفضايح تتعيش كتر من 100 عام...
خديجة: (خرجت من الحمام كتهضر فالتيليفون مع نعيمة ختها ابيل عادية)
مفخباريش حلفي بالله..
ههه جنية مقالتلي والو..
احم (شاف فيوسف للي متبعها بعينيه وختها نعيمة سولتنا واش مزال هي وملاك مخاصمين على يوسف)
لا مبقاش بيناتنا داكشي... لا بلعكس..
صافي واخا.. لا الحمدلله راه بيخير.. موبلغ
الحمدلله على كل حال..
انا مزيان كنت عند طبيبة قبيلة قالتلي كولشي مزيان.. اه.. نعيمة واحد شوية ونصوني عليك
(قطعت مشافتش فيه)
سلمت عليك ختي نعيمة
يوسف: مرحبا بسلامها
خديجة: (بجفاء) واش كليت شي حاجة!!!
يوسف: (حرك راسو بلا مغمض عينيه بقات كتشوف فيه جلست حداه حل عينيه)
انا عمرني كنت قبيح معاك!!
خديجة؛ وانا؟!
يوسف: نتي خديجة للي بغيتك نهار اللول وواعدتك غنعيشك مرتاحة وفرحانة وكنت هاكا ماشي!! واخا كانو مشاكيل ولكن كنا عايشين عالم ديالنا
خديجة: دابا انا للي غالطة؟!
يوسف: انا للي غالط اخديجة ولكن مع ربي نتي مغلطاش معاك (هزت حواجبها بجوج بحال تفاجئت) هادشي راه واقع قبل حتى منعرفك احبيبة نهار تلاقيت ملاك وعرفاتني بيك كنت بالصح ناسيها ماشي حتى تزوجتك باش نساها ولا نعمر وقتي بيك!!! يعني من اخر هضرة مع ديك بنادمة درتها بحال عمرني عرفتها
خديجة: علاش كتقولي هاكا!!
يوسف؛ باش نفهمك ان حتى انا مكنتش عارف ومكنتش باغي وجاتني فوق طاقتي
خديجة: والا صدق ولدك؟!
يوسف: غنصرف عليه مغنتخلاش عليه مغنكونش داك الاب للي يكبر ويقول علية ولد لحرام سمح فية منقدرش اخديجة نكون هاكا غنشوفو وغنسول عليه ومغنسمحش فيه فالوقت للي يحتاجني وغنكوز معاه فمرضو، وووو... مهم غندير واجبي معاه كأب
خديجة: (غير كتشوف فيه متوقعتش منو هاد الهضرة ولكن كان صريح معاها)
يوسف: خديجة انا غلطت بزاف ومغنزيدش غلط فوق غلط مغنخليش راجل اخر ولا معرفت مو منين تتجيب الفلوس وتصرف على ولد مني... (باستسلام)
غلطت وغنخلص الضريبية، للي تنواعدك نتي غتبقاي بعيدة على هاد المشاكل
خديجة: حسابلك انا ضد تصرف عليه وبغيتك تسمح فيه!!! انا مشكلتي فمك ايوسف فخالاي الغالية! حيت هي باغية الياقوت وغتحاول دخلها فحياتنا بأي طريقة هادي هي مشكلتي لكبيييرة..
خديجة: متزوجتش ايوسف باش ندخل عاود فحرب العݣوزة وشد لية نقطع ليك انا تزوجت باش نعيش معاك هاانية!!!
يوسف: (بقا كيشوف فيها اول مرة تجبد ليه مو بشكل صريح والمشكل العويص عارفها على حق!!)
خديجة: اما ولدك حتى وتبغي نتا تجيبو شي ايام هنا (قالتها فوق قلبها) معنديش مشكل اي واحد من طرفك كنحسبو مني وحتى ونتا منبغيكش تفرط ميمكنش نشوفك كدير داك الغلط
يوسف: بالصح اخديجة!!
خديجة: منكذبش عليك فاللول ايوسف غتجيني صعيبة وقتسحة وانا كنقولها ليك دابا وكنحس بحال كنافقك ولكن غدوز مدة وغنفهم مزيان ولد صغير معندو ذنب فهادشي كامل وحتى نتا غتفهمني علاش كنحس هاكا!!
يوسف: (عجباتو بصراحتها) اه غنفهمك وغنقدر اي مجهود درتيه على قبلي ماشي كاستغلال انك مراتي وخاصك لا هادشي من حقك ترفضيه وانا ممنحقيش نفرض عليك هادشي!!
خديجة: (بقات كتشوف فيه)
واخا يوسف يكون خير ولكن فهمتني انا شنو بغيت نوصل ليك!!!
يوسف: فهمتك ومكاينش للي غيدخل فشي حاجة ديالنا الياقوت عمرها غتكون بيناتنا انا وياك ولا فحياة ولدنا ولا بنتنا
خديجة: واخ.. دابا ايوسف الا كانت عندك شي معزة كبيرة فقلبك من جيهتي متفكر فوالو عفاك غير برا وديها فصحتك
يوسف: مسامحاني اخديجة
خديجة: عطيني وقت ايوسف
يوسف: وقتي كولو ديالك احبيبة
خديجة: (تبسمت وهو عجبو الحال لصراحتها كانو محتاجين هاد الجلسة حس بيه عقلانية واكتر نضوووج) اه بغيت نقولك واحد الحاجة ضرووري غيثة بقات مع ادم لتحت وووو.. معجبنيش الحال !!
يوسف: علاش بقات معاه؟!
خديجة : هي باينة مبغاتش تبقى معاه على للي فهمت مبقاتش كتجاوبو حتى فالتيليفون وهو جا تبعها لدارنا باش يهضرو مهم مناقشين
يوسف: عطيني التيليفون
خديجة: (جابتلو تيليفونو صونا مكتجاوبش) عاود صوني
يوسف: (صونا على ادم جاوبو مهدن) ادم فين غيثة
ادم: ها هي حدايا جالسين فكافي حدا الدار
يوسف: واخا تعطيهالي!!
ادم: (خرج عينو فيها بتهديد ومد ليها التيليفون) خوك يوسف
غيثة: (كتمسح دموعها ولكن مثلت انها عادية) وي خويا
يوسف: فينك؟!
غيثة: حنا فكافي
يوسف: اجي دابا
غيثة: واخا خويا...
#عند_ملاك
ملاك: (شافت هادو معيطوش ليها)
مغياخدوش رأيي واش قابلة ولا لا!!! بغاو يزوجوني بلا ميعلموني!!!
(شافت مراد خارج تابعو باها والحاج وجدها وعمامها)
اويلي فين دايين الراجل ادوك شلاهبية!!!
(كتهضر بشوية وظحك بحال الحمقة من كترة الفرحة، خرجو من الدار تبعاتهم من سطح لقاتهم ماشيين خارجين من الحومة)
اممم ماشيين للقهوة تكملو فية النميييمة!!!!
زهرة: (خرجت من الصالون هزت راسها فسطح) ملااااك
ملاك: (طلت عليها) فين مشا؟
زهرة: هبطي جلسي حدانا
ملاك: وحلي علية لباب... حابساني هنا بحال شي نعزى!!! عقلي فيها ازهيرو!!!
زهرة: (طلعت حلت بالزكروم هبطت ملاك كتنݣر دخلت بوجه ظااحك سلمت على أمينة للي فرحانة بيها علموها الخطوبة غتكون باذن الله من بعد سيمانة ولاكط والعرس من بعد شهر شافت بنتها فرنست، تبسمت)
ملاك أتاي ولا قهوة!!
ملاك: (بصوت شتوي وضرييف) بغيت حليب بلويزة اماما الا قديتي!! (ناضت مها كظحك مشات لكوزينة تصاوبلها)
سهام: (مرت عمها) هاد العريس عجبك؟!
ملاك: (شافت فيها بتحدي عارفها شنو كتقصد) اه حسن من دوك لكرارس للي جاوني (على خوها)
سهام: خياار!! (ملاك شقلبت عينها حيت الا مسكتتهاش غتبقى غير تهضر تهضر!!)
امينة؛ (غير كتشوف.. بقاو كيتوشوشو) حقا ها الدار صيفطهالي السمسار (بقاو كيتفرجو فلڤيديو وكتشرح ليها الإصلاحات للي خاص يدارو)
حتى تجي ان شاء الله وختاري شنو الديكور لي بغيتي
ملاك: خالتي ديري للي بان ليك كنتيق فذووقك
امينة؛ بلحݣ !!!
ملاك: والله، انا دارك كتحمقني فديكورها فكولشي فيها ومكاينش للي غيصرع ديك الدار بحالك صباغة الكوزينة ديري للي بغيتي راه دارك حتى نتي
أمينة: يا ختي على الزين (جراتها باستها فحنكها دخلت مها بفنجال حليب ولويزة)
ولدتي يا زهرة وعرفتي واش ربيتي.. تحيااي هاد البونجور ديالك (عطاتها سلام)
زهرة: ههه
سهام: اوا شاركونا فالحديث بانتلي المعرفة قديييمة
أمينة: (بفرحة) والله يجعلها مطولة ونشوفو ولاد ولادهم ݣولو أميييين....
اورطيغا: (جلسو فالقهوة مجموعين كيهضرو على الخدمة وكان اقتراح من الحاج علاش رشيد ميحلش ݣراج عندو حدا القهوة غير سادو ومرة مرة كيدير فيه غير الدبش ديال القهوة يبيع فيه لحم)
السيد تخصص قهوة دابا نتا الحاج نجي نقولك تحل قهوة!!
الحاج: نحل!! انا تنحمااء على المشاريع (قلبوها ظحك، اورطيغا علمهم خاصو يرجع واخا عياو يرغبو يبقاو يتعشاو اعتاذر انه تابعو خدمة ولكن الا بغاو لوخرين يبقاو حتى يرجع ليهم والحاج عجبو الحال باغي يقنع رشيد بالمحال وربي كبير )
اورطيغا: اوا صافي انا نمشي حتى تصونيو علية ونجي ناخدكم.. الله يعاون
(مشا لطموبيلتو ركب وزاد شاد طريق لفاس رجعت صفرو عندو غير فراس الدرب!!.. صونا على ملاك مجاوباتوش حيت كانت فوسطهم كتاكل رجع صونا على شريف للي نسا مجابوش معاهم خرجلو من بالو)
شريف: ياك وانا اخر من يعلم
اورطيغا: جات على غفلة اصاحبي
شريف: وانا تنعرف غير لبنات للي تيقولو جات على غفلة
اورطيغا: ههه سير **** شوووو دوز عندي المحال نبين ليك
شريف: ها حنا غنشوفو!!
~~~~~~~~~~~~~~
الغالية: (كتهضر فالتيليفون مع مفتاحة) يااااااك!!!! وااا شوف ليك الشمكار حتى هو مشا يخطب!! ...
حلفي بالله...
والله مفخباري انا حداها نهار كامل مقالت لية والو!!!..
اممم.. قولي ختها الله يغصبهم بجوج بيهم...
اييه اييه ديك لبتيپانة الموظفة!!...
اوا نيت من سهمهم حتى هاديك واحد النار..
غيثة: (دقت حلت ليها مها كانت مشادة هي وادم)
الغالية: (عجبها الحال) مرحبا مرحبا بولدي ادم
ادم: (هاز بوكي فلوغ مع الشكلاط) لالة الغالية!! كيف بقا يوسف
الغالية: الحمدلله اولدي. دخل (قطعت مع مفتاحة رحبت بيه جات خديجة كتشوف فغيثة هي وادم بحال شي جوج متفاهمين مفهمت والو رحبت بيه ولكن ماشي بالفرحة ناقصة مزال كلامو كيتعاود فودنيها ومتسبقش الأحداث حتى تفهم!!! دخلاتو الغالية لبيت نعاس يوسف)
خديجة: علاش جا؟!
غيثة: (لسانها مربوط) تصالحنا!!
خديجة: ماشي كمارة ديال وحدة تصالحت مع خطيبها... متأكدة!!!
غيثة: (حركت راسها باه ومشات تبعاتو..)
خديجة: (باستغراب فنفسها) غيكون كيهددها بشي حاجة ما فيهاش!!!
اورطيغا: (مشا وقف على شغلو وصل الأمانة للي كان داير مع الناس وتخلص عليها.. هبط للحومة قضا غراضو تماك صونات عليه مو كتعلمو انهم كيتسناوه لعشا مكرهش يخرج يحيح عليها هوما تافقو غير عشية جاتو حشومة يبقاو يتعشاو مشا المحال ديال شريف خدا لحم شي 6 كيلو)
شريف: مبقالكش؟!
اورطيغا: هادو على حساب الحاج حتى تفاهمو بيناتكم
شريف: ههه واش بالصح
اورطيغا: انا قلت ليهم ميجلسوش يتعشاو وهوما لاسقين وماشيين طوال جاتني حشومة اصاحبي
شريف: هههه نيشان اجي بعدا دوز معايا نشوفو داك البغل
اورطيغا: ياله ولكن مخاصنيش نتعطل (مشاو عند يوسف كيلقاو ادم تماك غيثة سلمت على اورطيغا من لبعد مقدرتش تنوض عندو ولا حتى تمد يدها خايفة من ادم.. وحتى هو مسوقش ومسلمش عليهم كاملين من غير خديجة ورد سلام من بعيد لغيثة و نيشان دخلتهم خديجة لعند يوسف)
فين البغل!!
يوسف: غبرتو اشمايت
شريف: علاش مفراسكش!!! حميدة كان تيخطب (خديجة جمعت الظحكة)
اورطيغا: غير ختك اختي
خديجة: هه بالصح!! مقالولي والو!!
اورطيغا: غير هضرة حتى السيمانة جاية ان شاء الله
خديجة: ان شاء الله الله يكمل عليكم بالخير واخا فديك الجنية مقالت والو!!!
اورطيغا: امييين
يوسف: وبلا بية!!
اورطيغا: اوا هي الا زربت وتݣعدت راك طولت فهاد الفراش اصاحبي
شريف: امتى غترجع لطبيب؟
يوسف: بعد غدا الدوخة تتمشي وترجع
اورطيغا: راه مساهلاش شفت الڤيديو الطموبيل تقلبت بيك بزاف، الحمدلله على سلامتك
خديجة: قالي غير مرة!!
اورطيغا: مهم هه انا مشيت تابعني نجيبهم من صفرو
يوسف: هه سير..
خديجة: (مكرهتش تمشي معاه توحشت دارهم.. ولكن جات حشومة ودعهم ومشا هي خلات شريف ويوسف على خاطرهم باينين باغيين يهضرو شوية بوحدهم مشات للكوزينة كتشوف الغالية هي للي كتختار وتقرر شنو دير فلعشا ومنين كتحضر هي كتكموندي عشاها من برا، حست براسها ما فيها للي يتعاند معاها مغديرلهاش شنو دارت ليها داك نهار وتطردها!! خلاتها دير شنو بغات ومشات كاترد تصبينة ديال يوسف فالماكينة...)
#يتبع