#مراس_الدعجاء
للكاتبة هدهد
لا تنسون التصويت والمتابعة للحساب وتعليقاتكم الي احبهم حلوياتي 🎀💛
✤———————————————✤
دخلت بيت اهل عثمان لأن حسب كلام ميان بعد هواي سوالف تنتظرني
اول ما دخلت جوه شفت الي اسمها ربى بملابس قصيرة ومرتبه نفسها حيل
باوعت لنفسي وردت اغمها لأن لابسه تيشيرت وبنطرون عريض
بدون اي ترتيب، غلست ودخلت بالممر
لحد ما وصلت جوه لغرفة ميان ودخلتها ولگيتها كاعده يم عماد
الي مبين من وجهه مزعوج لدرجة عالية جدا
-شبيك عمود؟
خزرني وزفر بدون نفس وگام وهو يتمتم بمدري شنو وطلع
باوعت لميان وميلت راسي بأستغراب
-شبي هذا؟
-ميان: يوووه لتحجين ولج كله بسبب هاي المربى الي بالصالة الي كلش متستحي على نفسها
-هوب هوب وحده وحده شسوت؟
-ميان: لج هاي مصيبه تافهه وحقيرة وعماد عنده ماضي وياها
عدلت گعدتي وحجيت بفضول
-شنو شلون احجي؟؟؟
-ميان: مرة عزمنه عماد يمنه بلبنان قبل كم سنه من جان مراهق خوش؟ فشنو هاي المدري شتتسمه تقربت منه حيل وخلته يثق بيها وبقوا قريبين من بعض وطلعت تتسلى بي وكل فترة من ولد لولد تخيلي
-مافهمت؟
-ميان: لج يعني تلعب وتسوي علاقات للتسلية وتلعب فهمتي؟
-يعني مو حب؟
-ميان: لج لاااا بس تستمتع وياهم على گد اسبوعين هيج وتمل وتغير !
-وهسه تتقرب من عثمان حتى تسوي علاقة وتلعب؟
-ميان: لعد على سواد عيونه؟
-والله صفنتيني
ماجنت مستوعبه السالفة، يعني هم أكو هيج بشر؟
زين الحلال والحرام؟
خلينا من الحلال والحرام..
منظرها گدام الناس؟
انفتح الباب مال غرفتها وفزيت من صفنتي وشفته
جان عثمان
-هاي منو يمنه؟
-خالتك
ضحك وتقرب يگعد يمي وحجه
-شبيج معصبه
-وين منو گال معصبه؟
-محد
ميان وگفت وحجت حسيتها تريد تتهرب
-ميان: شويه واجي
قبل لا أرد على كلامها طفرت ركض وطلعت ، باوعتله متململه وحجيت
-شكو؟
-شكو شكو؟
-هو شنو شكو؟
-ليل تخبلتي؟
-اي ماتعرف؟
جان قريب مني لدرجة اگدر اسمع أنفاسه، رفعت راسي وحجيت
-مغيـر عطرك؟؟
عقج حواجبه ونفى
-لا !
تقربت يم كتفه وسحبت نفس
-غريب أحسها متغيره، لا لا اكيد مغيرها
أندهشت من حاوطني وحضني وحجه بثقه
-تأكدي هسه
دفعته بسرعة وخزرته
-تأدب لك!
ضحك بصوت عالي وضرب أنفي بأصبعه
-تخجلين؟
ماحجيت شي بس خزرته ووگفت اطلع وهو ابتسم ولحگني،
دخلت للصالة وشفت الكل مجتمع وجان رائد يحجي
-رائد: اكللكم ليش ما نطلع كلنا؟
اجه صوت عثمان من وراي وحجه
-وين؟
-رائد: نستكشف مشتاق لبغداد
-ميان: ماعندي مانع
-ربى: جميل كثيرررر، احتاج كثر واقي شمس لا انحرق بهذا الجو
تقربت من عماد وشفته منزل راسه وهمس
-عماد: الحيه هم تنحرك؟ اول مره اسمع
ضحكت بدون صوت وكعدت يمه
من باوعلي مبتسمه فر عيونه بملل عباله استهزء وگام بعد ما احسه گوه واگف
على اعصابه لا ينتحر، الله يلوم الي يلومه هاي صدمتني
تقدم عثمان وگعد يمي بمكان عماد الي طلع من الصالة
وحجه مبتسم
-الله يزيد ضحكاتج
-امين عيني
تقرب من أذني وهمس
-هنيالي صرت عينج
ماگدرت اسيطر على ابتسامتي وضربته بعكسي
وقررت إطلع ارجع للبيت بس هو استوقفني
-ليل عادي نحجي بموضوع؟
رفعت حواجبي بأستغراب
-بشنو؟
-خلينا نطلع سوه بسيارتي اول
-احسها حجه شو؟
ضحك بهدوء ومسد على كتفي
-لا الموضوع جّدي
هزيت كتوفي بدون مانع وتحركنا للسيارة بس قبلها شفت ربى تطلع من الباب
وجانت تخابر من شافتنا حجت بنبرة مستكينه
-ربى: وين طالعين؟ ما بتنتظرونا؟
رد عليها عثمان واحسه يحاول يقلل كلامه معاها
ويرسم حدود بس هي ماتفهم
-لا أحنه طالعين بمشوار وحدنا، انتو اطلعوا سوه
وقبل لا ترد على كلامه هو دار وطلع من الباب،
قبل لا اطلع شفت نظراتها تحتد عليّه وتعجبت الي يشوف عبالك
كاتله الها احد، گلبت عيوني وطلعت وره عثمان
صعدنا السيارة وحجيت
-هاي البنت حيل غريبه!
باوعلي بأستغراب وحجه
-شلون؟
-متفهم
رجع نظراته على الطريق ووصلنا للساحة الي چنه اني وياه نروحلها
حجيت بنبرة مرحة
-جايبنا هنا يعني الموضوع بي حياة وموت؟
رفع حواجبه وهز راسه مبتسم وگال
-أنزلي نتمشى
ما گلت شي وفعلًا نزلت وياه
-شبيك أحسك مو طبيعي
-ليش؟
-تخوف وين بعد نروح حتى تحجي؟ ولك خاف تريد تكتلني
ضحك بصوت عالي ومد ايده يغمني
-باع تفكيرج شكد سگط
وگفنا بمسافة عن سيارته وحجه اخيرًا
-عندي طلب أريد أخذ رأيج بي
استغربت ورديت على كلامه
-شنو؟
حجه بكل جّديه
-اريـد نتزوج بهـاي العطـله
-شنووو؟ بربك؟
هز راسه وحجه
-اي شهرين تكفي وزيادة حتى نتمم زواجنا
باوعتله بكل صدمه .. تفكيري أصلًا ما متقبل الزواج للان عبالك لعبه نلعبها
رمشت اكثر من مرة واحاول أفكر عدل
-عثمان شلون نتزوج بهالسرعة!
لزم كتفي يثبتني گدامه وحجه بهدوء يقنعني
-سهله حيل ليل، حاولي تفهميني
-أفهمك ؟؟؟؟، أنت افهمني!
-ليل أريد أسوي زواجنا هالشهرين قبل لا يرجع اخوي رائد للبنان.. اذا تبدين من هسه تگدرين تخلصين وقبل الموعد حتى يعني الشغله سهله
هزيت راسي ورجعت خطوتين لوره.. متردده!
أصلًا أحس جان غلط من وافقت على الزواج ..
-يمكن ما چـان لازم اوافق اتزوجك
تغيرت نظراته لنظرات مصدومه وتغيرت نبرته
-شنو؟
ضغطت على راسي وحجيت
-أحس مانرهم نتزوج مالازم نلوث علاقة صداقتنا هيج
تقرب مني بسرعة ولزمني من ايدي وحجه منفعل
-الشغله مو لعب ليل ولا تلعبين عليّه !
-عثمان ما لازم نلوث روحنا بهيج زواج
رفع ايدة وكمم حلگي وحجه بكل انفعال
-اششش لا تحجين خلص كلامج بدون معنى
وقبل لا أگدر احجي هو كمل
-راح نتزوج ليل رضيتي أو لا
هزيت راسي بنفي بس قاطعني
-اذا رفضتيني راح أتزوجج غصبًا
دفعته وضحكت مستهزئة
-تخبلت مو؟ مستحيل تصير
-لا تصير تصير واسويها هم بسهولة
-شوفني السهولة الي عندك لعد
انداريت ومشيت احس ما اعرف شنو اريد
اعصابي طافرة، تحركت ووصلت للسيارة ودخلت وسديتها بدون كلام
شويه وهو لحگني وصعد وتحرك بهدوء يسوق السيارة لحد ما وصلنا البيت
نزعت حزام الأمان وتوني اريد أفتح الباب لزم ايدي وحجه بهدوء
-لا ترفضيني وصيري حبابه
-عثمان أسكت لا افر راسك فر
طلعت بعصبيه ودخلت البيت واني أغلط عليّه بگلبي
-
گعدت الصبح واني اسمع باب غرفتي يدك، گمت بتعب افتحه وشفته بابا
دخل هو مبتسم وحجه
-فضل:مبينه توج كاعده ؟
-لا كعدت على صوت الدك
ضحك وهز راسه وحجه
-فضل: خطيبج جان يمي أمس بالليل وگلي شنو قررتوا
ارتفعت ملامحي بصدمة وحجيت
-شنووو گلك؟
حط ايدة على كتفي وحجه
-فضل: لتشيلين هم حبيبتي اعرف خاف مستحيه او شي من عدنا فهو حجه بدالج وعرفنا راح تسوون عرسكم هالشهرين .. اطلعي وياه واشتروا لزواجكم تعرفيني اني وامج واخوتج ماعدنا اي مانع
أبتسمت بصدمه وداخلي ماخليت غلطه ما غلطتها عليّه
عود يجبرني هيج مو؟ الك الي تريده وراح العب لعبتك وأفوز بيها
باوعتله مبتسمة بتصنع
-اي قررنا هالشهرين لآن إخوه هنا
-فضل: گلي هيج
خلصت محادثتنا وغيرت ملابسي وتريكت وخابرته
شويه ورد
-ها ليل
-حضر روحك
-لشنو؟
-نطلع نجهز يعني شنو؟
بقى ساكت لحظه وحجه بتفاؤل
-عشر دقايق واني يمج
سديته واني احس الافكار هواي تجيني وراح العب لعبتي
تمتمت واني اشد قيطان الحذاء
-اندمك والله عثمان
قبل لا اطلع اجتني امي وحجت
-امنية: وانتِ تعرفين شنو تجهزين؟ خلي الملابس الخاصه عليّه
رفعت طرف شفتي بأبتسامه خبيثة
-ما يحتاج امي اني اختار كل شي
-امنية: صيري سنعه واشتري شي حلو مو نفس تيشيرتاتج التخزي جيبي لبس حلو واذا ماعرفتي خليهن عليّه
-ماشي
هزت راسها ما مقتنعه وطلعت وعفتها
وأول ما سديت باب البره طلع هو واكو ابتسامة مستمتعه عباله رضخت لكلامه
حجه مبتسم
-هلا زوجتي
رفعت حواجبي مستنكره الكلمه
-للان ماصرت
تقرب يمي وفتح الي الباب مال الراكب وحجه
-قريبًا جدا
دخلت بدون ما ارد عليه وحرك وهو يباوعلي
-وين حابه تروحين اول شي؟
-مول ***
هز راسه وساق لحد ما وصلنا بهدوء
دخلت واني ادور على غايتي من الجيه وبعد كم محل شفته
محل الملابس الداخلية
جريت ايده ودخلنا وهو متعجب وحجه
-وين؟ ادخلي وحدج
رفعت راسي اله ببراءة وحجيت
-ميصير غير يعجبك الاختيار ياعيني؟
وبالفعل دخلنا، رغم حرجي وحسيت راح انفجر من المستحى
بس قاومت وسويت نفسي ما مهتمه وبقيت افرفر وايده بيدي
باوعتله بطرف عيني وشفت عيونه بالكاع ومتوتر وحتى اذاناته صايرات
حمر من الحرج وردت اضحك بوقتها
تقربت من ثياب قصيره حيل ماتغطي ولا تستر شفافه
وحجيت اميل راسي ببراءة
-ياهو أحلى ؟
رفع عينه ونزلها بسرعة وحجه
-بكيفج
تقربت اسحبه وحجيت امطط بالحجي
-لا ميصير غير همّه البسهم الك؟
رفع راسه وعيونه متوسعه حيل وبقى يباوع منا ومنا وعت ايدي
-ليل خلصي وخلينا نطلع
-شبيييك عُثمااان غير نختار سوه؟
رفعت نوعين واحد اسود وواحد ابيض شكلهم يفشل وحجيت
-هذا لو هذا؟
شفته يحك برگبته من وره وحسيته متوتر
-اثنينهم.. بس الأسود يلوكلج
رفعت حواجبي مصدومه من كلامه بس سيطرت على حرجي ومديتهم اله
-اثنينهم اريدهم
خذاهم وتقدم للي تبيع وجانت تباوعلنا مبتسمه وعلى ما يبدو سمعت محادثتنا كلها
وحجت
-تتزوجون قريب؟
-ليالي:اي هالشهرين
-الله يهنيكم
-ليالي: بعد روحي
-عندي انواع جديده اذا حابه وقطع نادرة تفيد كل عروسه كلش حلوات
باوعت لعثمان الي هز راسه بـ لا حتى نطلع وباوعتلها مبتسمه
-ليالي: اكيد ليش لا؟
وكفت هي وراحت لنهاية المحل وجابت اشكال والوان ملابس صنف
بيهم ريش وصنف مدري شنو يلعبن ستين نفس ولو اني وحدي
هم ما البسهم لان مشلتحات بس حجيت
-كلش حلوات ، يلا حبيبي اختارلي
عثمان رفع راسه مصدوم وقبل لا يحجي جريته وحجيت
-يلا شنو تحب تشوفني لابسه الك؟
حاول يجرني أطلع من المكان بس عصيييت وحالفه اطلع العرس من عيونه
تريد نتزوج مو؟ يلا هاي اني الا اكرهك بيّه
شفت شفايفه تتجمع بقرف من المناظر الي يحسونها حلوه ترا تخزي
خصوصًا الي بيهم ريش وجلد نمر ومدري شنو
-ولا واحد بي حظ
گوه حافضت على ملامحي وما ضحكت بس شفت عيونه تتجول بالمحل وثبتت على ثوب طويل حريري أسود سادة وظهره كله مصلخ وبي فتحه وانصدمت من اشر عليّه وحجه
-هذا حلو
هي بس شافته اشر على الاسود بسرعة سحبته وغلفته وحطته مع
البقيه الي اخذناهم ردت أعترض بس تذكرت كلام ماما ولان
اعرفها اذا شافتني ما مشتريه هواي راح تروح بنفسها تجيب
اخذت علاگه وتحركت بعيد عنه واخذت ملابس خاصه زيادة ورجعت
انطيتهم الها وحاسبنا وطلعنا
خليته يفتر وياي كل المول محل محل واشتريت سبعين الف علاگه
حتى ينكسر ظهره بيهم حرفيًا اشتريت اكواااام ، اخر شي استخطيته
ورجعنا للسياره وهو حرك بتعب وحجه
-اشتعلت صفحتج شنو من رجلين عندج؟ وين أكو واحد هلگد يبقى من يشتري؟
-بعدنا حبيبي بعدنا بالبداية هذني شويه هواي بعد
ارتفعت ابتسامته ومد ايدة يگرص خدي وحجه
-حبيبج؟
-اگولها للكل يعني لتميز
خزرني وما رد
وگفت السيارة گدام مطعم وشفته مطعم لبناني
نزلنا وهو حجه
-هذا المطعم اكتشفته قريب، الطباخين كلهم من لبنان واكله يجنن حيل
-جعت خلي ندخل
دخلنا وكعدنا بطاوله وهو طلب الاكل واكلت بكل استمتاع
بعد احاديث متطرفه خلصنا وحاسب وطلعنا
جانت الدنيا بالليل واحنه على فرة وحده من الظهر
اول ما وصلنا حسيت راح اوكع من طولي من التعب ودخل
هو العلاليك للطارمه وراح
بالزور دخلتهم لغرفتي وحتى ما جربت شي وگبل نمت بعد
ما گلولي تعالي تعشي وگلتلهم ماكله
-
مرت مدة من التحضيرات والكل ويانه نجهز وأخيرًا اليوم يوم عقد القرآن
الي قررت أسويَه عائلي بدون حفله جبيرة وقاعة وهالسوالف
لبست فستان ابيض بسيط لان الكل رفض البس غير لون
وماما تگول حتى بدايتها حياتكم بيضه ونقيه ومدري شنو
حطيت لنفسي مكياج وماعزمنا بس خوالي واهلي وعمامي واهل عثمان بس
جنت اسمع صوت الضيوف جوه وغسق دا ترتب شعري وتبرمه من جوه وحجت
-غسق: طالعه تموووتين هنياله بيج
ابتسمت بدون ما ارد عليها وانفتحت الباب ودخلن البنات خوات عثمان
ووياهن نيران صديقتي اكيد ماعفتها وعزمتها
سلمن عليّه وكعدنا ندردش والبنات ميان وليان طايرات فرح عبالك اختهم اني
حيل حسيت بمحبه من عدهن وهنه يباركن الي وياخذني بالاحضان
-ليان: دهشتيني صراحة ولا غلطة
ابتسمت ارد عليها
-انتِ الي حلوه والله
-ميان: هنيال اخونا عمي الف مبروك
ضحكت وتقدمت نيران وهيه تطبطب على كتفي
-نيران: عروسة السنه والله طالعه تملخين هنيالج عليّه وهنياله عليج شفته بره طالع يخبل نفسج
رفعت حواجبي الها بتمثيل للغيرة وهيه ضحكت
-نيران: تغارين؟؟
-ميان: لك هلا عمي اله اكله لاخوي تغار عليك
-انجبي ادفنج
تقربت غسق تدفعهن بالشقه وحجت
-غسق: وخرن يالله لاتزعجنها يالله
ضحكت وياهن وبقينا ندردش
شويّه وانفتح الباب ودخلت ميس وربى، تقربت ميس تسلم بحنّيه وسلام حلو
وربى بس من بعيد سلمت بسطحيه
-ربى: معقول تلبسي هيك بعقد قرآنك ؟
-وشنو بي لبسي ست ربى؟
-ربى: كثير بسيط ومغطي..
جانت لابسه فستان قصير ورجلينها للفخذ طالعات وماهمها
حجيت أرد على كلامها
-كل شخص ويلبس اللي يريحه مو صح؟
هزت راسها بدون كلام وطلعت ولحگتها ميس
ما اهتميت وساعدني البنات البس مجوهراتي اخر شي
حطيت بروش بسيط على شعري من فوك ورشيت عطري وعافني وطلعن
حتى يشوفن الاوضاع جوه ويصيحني من يطلبوني للشيخ
نزلت البس الكعب ودك موبايلي واندهشت من شفت اسم المتصل!
جاوبت بس انصدمت من جاوبت وانفتحت عيوني بوسع ووگع گلبي بوقتها
-لـيالي ... راح اموت
بدون وعي نزلت أركض
نسيت العقد
نسيت عثمان
نسيت اهلي
نسيت كل شي وركضت انزل
✤———————————————✤
يتبع 💛
الانستگرام : iwantmeto
منو تتوقعون المتصل؟ ❤️🔥
وشراح يصير؟
هل تحسون المكالمة الها علاقه بشي ثاني؟؟ |:
ارائكم؟
توقعاتكم؟
احبكم 🎀🎀
دُمتم بِوّد